ដោយ: គង់ លាងហួរ
អន្តរជាតិ: សារពត៌មាន Bloomberg បានចុះផ្សាយអត្ថបទវិភាគថា សហរដ្ឋអាមេរិក បាននាំមុខប្រទេសចិនបន្ថែមទៀត ក្នុងការប្រជែង រក្សាតំណែងជាមហាអំណាចសេដ្ឋកិច្ចធំជាងគេទី១របស់ពិភពលោក។

កាលពីឆ្នាំមុន ផលទុនជាតិសរុបរបស់សហរដ្ឋអាមេរិក (nominal GDP) បានកើនឡើង៦,៣ភាគរយ ខណៈដែលផលទុនជាតិសរុបរបស់ប្រទេសចិន(nominal GDP)បានកើនឡើង៤,៦%ប៉ុណ្ណោះ។លោក Eswar Prasad សាស្ត្រាចារ្យនៃសាកលវិទ្យាល័យ Cornell University លើកឡើងថា “ដំណើរការសេដ្ឋកិច្ចអាមេរិកដ៏រឹងមាំ បូករួមជាមួយនឹងបញ្ហារយៈពេលខ្លី និងបញ្ហារយៈពេលវែង ដែលសេដ្ឋកិច្ចចិនកំពុងប្រឈមមុខ បានបង្ហាញភាពមិនសូវច្បាស់លាស់ថា តើ GDP របស់ចិននឹងវ៉ាដាច់សហរដ្ឋអាមេរិកនៅថ្ងៃណាឡើយ”។

លទ្ធផល និងដំណើរការនៃសេដ្ឋកិច្ចរបស់ប្រទេសនីមួយៗ ត្រូវបានឆ្លុះបញ្ចាំងឱ្យឃើញតាមរយៈទីផ្សារភាគហ៊ុន។ ជាក់ស្តែង ផ្សារហ៊ុនរបស់សហរដ្ឋអាមេរិកបានហក់ឡើងថ្លៃដល់កម្រិតខ្ពស់បំផុតមិនធ្លាប់មាននៅសប្តាហ៍នេះ ខណៈដែលផ្សារហ៊ុនរបស់ប្រទេសចិនកំពុងតែដាំក្បាលចុះ។

កាលពីដើមឆ្នាំ២០២៣ សហរដ្ឋអាមេរិកត្រូវបានគេព្យាករណ៍ថា នឹងធ្លាក់ចូលទៅក្នុងវិបត្តិសេដ្ឋកិច្ច ខណៈដែលធនាគារកណ្តាលអាមេរិក (Fed) បានដំឡើងអត្រាការប្រាក់យ៉ាងខ្ពស់ ដើម្បីទប់ទល់នឹងវិបត្តិអតិផរណា។ ប៉ុន្តែ ផ្ទុយទៅវិញ សេដ្ឋកិច្ចអាមេរិកបានបង្ហាញពីភាពធន់គួរឱ្យកត់សម្គាល់កាលពីឆ្នាំមុន។

យោងតាមទិន្នន័យបានបង្ហាញថា សេដ្ឋកិច្ចអាមេរិកបានកើនឡើង៣,៣ភាគរយនៅក្នុងត្រីមាសទី៤ ឆ្នាំ២០២៣ បន្ទាប់ពីបានកើនឡើង៤,៩ភាគរយនៅក្នុងត្រីមាសទី៣។

ចំណែក អតិផរណារបស់សហរដ្ឋអាមេរិកកំពុងស្ថិតនៅលើផ្លូវឆ្ពោះទៅកាន់គោលដៅ២ភាគរយរបស់ធនាគារ Fed ហើយការភ័យខ្លាចអំពីវិបត្តិសេដ្ឋកិច្ចកំពុងថយចុះ។

ផ្ទុយទៅវិញ ប្រទេសចិនកំពុងជួបស្ថានភាពត្រដាបត្រដួស ដោយសារវិបត្តិអចលនទ្រព្យ និងបញ្ហាបរិត្តផរណា។ រីឯ ការនាំចេញ ដែលធ្លាប់ជាសសរស្តម្ភដ៏សំខាន់នៃកំណើនសេដ្ឋកិច្ចចិន បានធ្លាក់ចុះ នៅឆ្នាំ២០២៣ ខណៈភាពអត់ការងារធ្វើក្នុងចំណោមយុវជនវ័យក្មេងបានកើនឡើង ហើយបំណុលរបស់រដ្ឋបាលក្នុងតំបន់ក៏ប៉ោងឡើងថែមទៀត។

យោងតាមតួលេខរបស់រដ្ឋាភិបាលចិនបង្ហាញថា សេដ្ឋកិច្ចចិនបានបំពេញតាមគោលដៅកំណើនប្រចាំឆ្នាំរបស់អាជ្ញាធរ ដោយកើនឡើង៥,២ភាគរយនៅឆ្នាំ២០២៣ ប៉ុន្តែ គេមានការសង្ស័យថា តួលេខនេះមិនឆ្លុះបញ្ចាំងរូបភាពពិតនៃអ្វី ដែលកំពុងកើតឡើងនៅប្រទេសចិននោះឡើយ។

លោក Josh Lipsky អតីតទីប្រឹក្សាមូលនិធិ IMF ដែលបច្ចុប្បន្នជានាយកមជ្ឈមណ្ឌល GeoEconomics របស់ក្រុមប្រឹក្សាអាត្លង់ទិកបានលើកឡើងថា “ជំងឺរាតត្បាតបានបិទបាំងភាពទន់ខ្សោយជាច្រើនរបស់ប្រទេសចិនដែលមានភាពស៊ីជម្រៅ និងជារចនាសម្ព័ន្ធ ហើយវានឹងបន្តអូសបន្លាយអស់រយៈពេលពេញមួយទសវត្សរ៍នេះ និងអាស្រ័យលើសមត្ថភាពរបស់ចិន ក្នុងការធ្វើកំណែទម្រង់”។

លោក Lipsky បានបន្ថែមថា “រាល់ការពិភាក្សាអំពីលទ្ធភាព ដែលប្រទេសចិនក្លាយជាមហាអំណាចសេដ្ឋកិច្ចធំបំផុតរបស់ពិភពលោក ត្រូវ បាន គេផាត់ចោល និងមិនគិតគូរនៅ ពេល នេះ ទេ”។

លោក Adam Posen ប្រធានវិទ្យាស្ថាន Peterson សម្រាប់សេដ្ឋកិច្ចអន្តរជាតិ លើកឡើងថា “ប្រធានាធិបតីចិន លោក ស៊ី ជីនពីង បានធ្វើឱ្យការធ្លាក់ចុះនៃសេដ្ឋកិច្ចចិនកាន់តែមានសភាពធ្ងន់ធ្ងរ តាមរយៈការប្រើប្រាស់អំណាចតាមអំពើចិត្តទៅលើសេដ្ឋកិច្ច និងសង្គម ជាពិសេសក្នុងអំឡុងពេលនៃជំងឺរាតត្បាត”។

ទន្ទឹមនឹងនេះដែរ សហរដ្ឋអាមេរិកបានធ្វើឱ្យសេដ្ឋវិទូ មានការភ្ញាក់ផ្អើល ជាមួយនឹងភាពធន់នៃសេដ្ឋកិច្ចរបស់ខ្លួន បន្ទាប់ងើបចេញពីជំងឺរាតត្បាត។ ទោះជាយ៉ាងនេះក្តី សហរដ្ឋ អាមេរិក ក៏ មាន ក្តីព្រួយ បារម្ភ រយៈពេល វែង ផង ដែរ ពោលគឺកម្រិតឱនភាព ថវិកា ដ៏ខ្ពស់ ជា ប្រវត្តិសាស្ត្រ៕

ដោយ: គង់ លាងហួរ
អន្តរជាតិ: សារពត៌មាន CNN បានចុះផ្សាយថា ទំនុកចិត្តរបស់បណ្តាក្រុមហ៊ុនសាងសង់លំនៅដ្ឋាននៅសហរដ្ឋអាមេរិក បានកើនឡើងនាពេលថ្មីៗនេះ ស្របពេលដែលអត្រាការប្រាក់លើកម្ចីទិញផ្ទះបានបន្តធ្លាក់ចុះ។

បច្ចុប្បន្ននេះ អត្រាការប្រាក់លើកម្ចីទិញផ្ទះនៅអាមេរិកបានធ្លាក់ចុះមកនៅក្រោមកម្រិត៧% ជាលើកដំបូង គិតចាប់តាំងពីពាក់កណ្តាលខែសីហា ឆ្នាំ២០២៣  បន្ទាប់ពីធនាគារកណ្តាលអាមេរិកបានផ្អាកការដំឡើងអត្រាការប្រាក់ចំនួន៣លើកជាប់ៗគ្នា។

សន្ទស្សន៍សុទិដ្ឋិនិយមរបស់សមាគមក្រុមហ៊ុនសាងសង់លំនៅដ្ឋានទូទាំងប្រទេស (National Association of Home Builders) ឬហៅកាត់ថា NAHB បានកើនឡើងជាលើកដំបូងក្នុងរយៈពេល៤ខែ ដល់៣៧ពិន្ទុ ក្នុងខែធ្នូ។ទំនុកចិត្តរបស់បណ្តាក្រុមហ៊ុនសាងសង់លំនៅដ្ឋាននៅសហរដ្ឋអាមេរិកបានកើនឡើង ស្របពេល ដែល អត្រា ការប្រាក់លើកម្ចី ទិញ ផ្ទះ បន្តធ្លាក់ចុះ ហើយក្រុមហ៊ុនសំណង់មានសុទិដ្ឋិនិយមកាន់ខ្ពស់លើទិន្នន័យសេដ្ឋកិច្ចអាមេរិករហូតដល់ឆ្នាំ២០២៤នេះ។

ទំនុកចិត្តរបស់ក្រុមហ៊ុនសាងសង់លំនៅដ្ឋានក្នុងសហរដ្ឋអាមេរិក បានចាប់ផ្តើមធ្លាក់ចុះជាលើកដំបូងនៅក្នុងខែសីហា គិតចាប់តាំងពីខែធ្នូ ចុងឆ្នាំ២០២២។ ចំណែក កាលពីខែកញ្ញា សន្ទស្សន៍ទំនុកចិត្តរបស់ក្រុមហ៊ុនសាងសង់លំនៅដ្ឋាន បានធ្លាក់ចុះដល់៤៥ពិន្ទុ និងបន្តធ្លាក់ចុះដល់៣៤ពិន្ទុ កាលពីខែវិច្ឆិកា មុននឹងស្ទុះងើបឡើងវិញដល់៣៧ពិន្ទុ ក្នុងខែធ្នូ។

លោក Robert Dietz ប្រធានសេដ្ឋវិទូនៅសមាគម NAHB អះអាងថា “ទីផ្សារលំនៅដ្ឋានបានឆ្លងផុតដំណាក់កាលដ៏លំបាកមួយ បន្ទាប់ពីអត្រាការប្រាក់លើកម្ចីទិញផ្ទះហក់ឡើងដល់កម្រិតខ្ពស់បំផុត ប៉ុន្តែវាបាននិងកំពុងថយចុះមកវិញនាពេលនេះ ដែលការណ៍នេះ នឹងជួយជំរុញតម្រូវការរបស់អ្នកទិញផ្ទះក្នុងរយៈពេលប៉ុន្មានខែខាងមុខ”៕

ដោយ: គង់ លាងហួរ
អន្តរជាតិ: រដ្ឋាភិបាលកូរ៉េខាងត្បូងបានប្រកាសកញ្ចប់ចំណាយ ដែលមានតម្លៃ១០០,៤ពាន់លានដុល្លារ ដើម្បីសាងសង់បណ្តាញផ្លូវរថភ្លើងថ្មីមួយនៅជាយក្រុងសេអ៊ូល ដែលមានឈ្មោះថា GTX ។

ប្រជាជនរស់នៅតំបន់ Greater Seoul ចំណាយពេលជាមធ្យមប្រហែលពីរម៉ោងសម្រាប់ការធ្វើដំណើរប្រចាំថ្ងៃរបស់ពួកគេទៅកាន់ទីក្រុងសេអ៊ូល។ នេះបើយោងតាមការប៉ាន់ស្មានដោយក្រសួងដែនដី។ប៉ុន្តែ នៅពេលដែលការសាងសង់បញ្ចប់រួចរាល់ ប្រជាជនដែលរស់នៅក្នុងតំបន់ Greater Seoul នឹងចំណាយរយៈពេលធ្វើដំណើរត្រឹមតែ៣០នាទីប៉ុណ្ណោះ តាមរយៈបណ្តាញខ្សែរថភ្លើងថ្មីនេះ។តំបន់ Greater Seoul សំដៅលើរដ្ឋធានីសេអ៊ូល បូករួមជាមួយនឹងខេត្ត Incheon និងខេត្ត Gyeonggi។

ប្រព័ន្ធរថភ្លើង GTX ដែលមានឈ្មោះពេញហៅថា “Great Train Express” នឹងមានបណ្តាញរថភ្លើងចំនួន៦ខ្សែ ដែលគ្របដណ្តប់តំបន់ Greater Seoul ក៏ដូចជាផ្នែកខ្លះនៃខេត្ត Gangwon និងខេត្ត Chungcheong ផងដែរ។

ក្នុងចំណោមផែនការចំណាយសរុបដែលបានប្រកាស ក្នុងនោះថវិកា៣០ទ្រីលានវ៉ុន នឹងបានមកពីប្រភពថវិការដ្ឋ ខណៈដែល ថវិកា១៣,៦ទ្រីលានវ៉ុននឹងត្រូវចំណាយដោយរដ្ឋបាលក្នុងតំបន់ និងថវិកា៧៥,២ទ្រីលានវ៉ុនបានមកពីវិស័យឯកជន។

ផែនការនេះត្រូវបានប្រកាសនៅក្នុងការជជែកដេញដោលជាសាធារណៈក្រោមអធិបតីភាពលោកប្រធានាធិបតីកូរ៉េខាងត្បូង Yoon Suk Yeol នៅក្នុងខេត្ត Gyeonggi ដែលមានចម្ងាយប្រហែល២០គីឡូម៉ែត្រពីភាគខាងជើងនៃរដ្ឋធានីសេអ៊ូល៕

ដោយ: គង់ លាងហួរ

ប៉េកាំង: ក្រុមនិយតករហិរញ្ញវត្ថុកំពូលបានអះអាងថា ប្រទេសចិន នឹងជំរុញកិច្ចខិតខំប្រឹងប្រែង ដើម្បីទាក់ទាញក្រុមហ៊ុនបរទេស ហើយនឹងមិនផ្លាស់ប្តូរជំហររបស់ខ្លួន ដើម្បីការពារសិទ្ធិស្របច្បាប់របស់ក្រុមហ៊ុនបរទេសនោះទេ។

លោក Li Yunze ប្រធានរដ្ឋបាលគ្រប់គ្រងហិរញ្ញវត្ថុជាតិរបស់ប្រទេសចិន (NFRA) បានថ្លែងក្នុងវេទិកាហិរញ្ញវត្ថុអាស៊ី នៅទីក្រុងហុងកុងថា ប្រទេសចិននឹងមិនផ្លាស់ប្តូរ គោលនយោបាយរបស់ខ្លួនឡើយ ហើយយើងនឹងបង្កើនកិច្ចខិតខំប្រឹងប្រែង ដើម្បីទាក់ទាញ និងប្រើប្រាស់មូលធនបរទេស ទៅក្នុងឧស្សាហកម្មហិរញ្ញវត្ថុ។លោក Li បានគូសបញ្ជាក់ថា “ទិសដៅនៃការផ្តល់បរិយាកាសធុរកិច្ចកាន់តែប្រសើរឡើង សម្រាប់ការវិនិយោគបរទេស នឹងមិនផ្លាស់ប្តូរទេ”។លោកបន្ថែមថា “ប្រទេសចិនកំពុងសិក្សាលទ្ធភាព ពីការកាត់បន្ថយការរឹតបន្តឹង សម្រាប់ស្ថាប័នហិរញ្ញវត្ថុហុងកុង និងម៉ាកាវ ដើម្បីអនុញ្ញាតឱ្យពួកគេ អាចចូលហ៊ុនក្នុងក្រុមហ៊ុនធានារ៉ាប់រង របស់តំបន់ចិនដីគោក”។

សេដ្ឋកិច្ចរបស់ប្រទេសចិន បានកើនឡើង៥,២ភាគរយនៅឆ្នាំ២០២៣ ដែលលើសពីគោលដៅផ្លូវការបន្តិច ប៉ុន្តែដំណើរការស្ទុះងើបឡើងវិញ គឺមានភាពរង្គោះរង្គើ ជាងអ្នកវិភាគជាច្រើនបានរំពឹងទុក ស្របពេលមានការកើនឡើង នៃបំណុលរបស់រដ្ឋបាលក្នុងតំបន់ និងវិបត្តិអចលនទ្រព្យ។

ផ្សារហ៊ុននៅទីក្រុងហុងកុង និងក្រុងសៀងហៃ បានដាំក្បាលចុះ ខណៈពេលដែលអ្នកវិនិយោគ ទូទាំងពិភពលោកនៅក្នុងប្រទេសចិន កំពុងឆ្ពោះទៅរកច្រកចាកចេញ ពីប្រទេសមហាអំណាចសេដ្ឋកិច្ចមួយនេះ។

លោក Li Yunze បានអះអាងទៀតថា ការអភិវឌ្ឍន៍សេដ្ឋកិច្ចរបស់ប្រទេសចិន កំពុងប្រឈមមុខនឹងការលំបាក និងបញ្ហាប្រឈមមួយចំនួន ប៉ុន្តែកំណើនសេដ្ឋកិច្ចរបស់ប្រទេសយើង នៅតែមានភាពរឹងមាំ។

លោកបានបន្ថែមថា ប្រតិបត្តិការសរុបជាទូទៅ នៅក្នុងឧស្សាហកម្មហិរញ្ញវត្ថុ របស់ប្រទេសចិនមានស្ថេរភាព ហើយហានិភ័យនៅតែអាចគ្រប់គ្រងបាន៕

ដោយ: គង់ លាងហួរ

អន្តរជាតិ: មូលធនប័ត្រទីផ្សាររបស់ក្រុមហ៊ុនយក្ស Meta បានកើនឡើងលើសពី១ទ្រីលានដុល្លារអាមេរិក កាលពីថ្ងៃពុធម្សិលមិញ ដោយភាគហ៊ុន បានងើបឡើងថ្លៃជាង១%នៅពេលបិទជួញដូរ។

ការជួញដូរចុងក្រោយរបស់ក្រុមហ៊ុននេះ ត្រូវបានជួញដូរក្នុងតម្លៃ៣៩០ដុល្លារ ក្នុងមួយហ៊ុន។
តម្លៃទីផ្សាររបស់ក្រុមហ៊ុនយក្ស Meta បានហក់ឡើងលើសពី១ទ្រីលានដុល្លារ ជាលើកចុងក្រោយបំផុតគឺនៅឆ្នាំ២០២១ ដែលនៅពេលនោះ ក្រុមហ៊ុននេះត្រូវបានគេស្គាល់ថាជា Facebook នៅឡើយ​។នៅខែកញ្ញា ឆ្នាំ២០២១ តម្លៃទីផ្សាររបស់ក្រុមហ៊ុន Meta បានឈានដល់១,១ទ្រីលានដុល្លារ។

ការហក់ឡើងថ្លៃ នៃភាគហ៊ុនរបស់ក្រុមហ៊ុនMeta បានកើតមានឡើង បន្ទាប់វាបានហក់ឡើងថ្លៃជិត២០០% កាលពីឆ្នាំ២០២៣ ដែលនៅពេលនោះ.លោក Mark Zuckerberg នាយកប្រតិបត្តិក្រុមហ៊ុន Meta បានចាត់វិធានការកាត់បន្ថយការចំណាយ ដោយជម្រុះបុគ្គលិកជាង២ម៉ឺននាក់។

លោកមហាសេដ្ឋី Mark Zuckerberg បានចាត់ទុកឆ្នាំ២០២៣ ថាជា “ឆ្នាំនៃប្រសិទ្ធភាព” បន្ទាប់ពីភាគហ៊ុនរបស់ក្រុមហ៊ុន Meta បានដាំក្បាលចុះដល់កម្រិតទាបបំផុត ក្នុងរយៈពេល៦ឆ្នាំក្នុងឆ្នាំ២០២២​។

យោងតាមសារពត៌មាន CNBC បានចុះផ្សាយថា តម្លៃភាគហ៊ុនរបស់ក្រុមហ៊ុន Meta បានហក់ឡើងដល់កម្រិតកំពូល ប្រហែល៣៩៦ដុល្លារក្នុងមួយហ៊ុន កាលពីថ្ងៃពុធ ទី២៤ ខែមករា។

ម្ចាស់ភាគហ៊ុនបានបង្ហាញសុទិដ្ឋិនិយម លើក្រុមហ៊ុន Meta ខណៈដែលក្រុមហ៊ុនយក្សមួយនេះ កំពុងខិតខំពង្រឹងជំហររបស់ខ្លួន ជាក្រុមហ៊ុនដែលមានឥទ្ធិពល និងជោគជ័យខ្លាំង លើការប្រើប្រាស់បច្ចេកវិទ្យាបញ្ញាសិប្បនិម្មិត។

ចំណែកឯ តម្លៃមូលធនប័ត្រទីផ្សាររបស់ក្រុមហ៊ុន Microsoft បានហក់ឡើងលើសពី៣ទ្រីលានដុល្លារ បន្ទាប់ពីវ៉ាដាច់ក្រុមហ៊ុន Apple ដែលជាក្រុមហ៊ុនសាធារណៈ ដ៏មានតម្លៃថ្លៃបំផុតរបស់ពិភពលោក៕

        ដោយៈ និស្ស័យ

        ភ្នំពេញៈ ថ្នាក់ដឹកនាំជាន់ខ្ពស់ធនាគារជាតិនៃកម្ពុជាបានអះអាងថា ប្រព័ន្ធធនាគារកម្ពុជា បន្តមានស្ថិរភាពរឹងមាំ ខណៈអត្រាការប្រាក់ឥណទាននៅកម្ពុជា រក្សាបានស្ថិរភាពល្អ ក្នុងស្ថានភាពនៅបណ្តាប្រទេសមួយចំនួន មានការដួលរលំគ្រឹះស្ថានធនាគារ ដែលបានបង្កជាការព្រួយបារម្ភយ៉ាងខ្លាំង ចំពោះស្ថិរភាពហិរញ្ញវត្ថុសកល។

លោកស្រីបណ្ឌិតជា សិរី ទេសាភិបាលធនាគារជាតិនៃកម្ពុជា ថ្លែងលើកឡើងនៅក្នុងការ បើកសន្និបាតបូកសរុបលទ្ធផល ការងារប្រចាំឆ្នាំ ២០២៣ និងទិសដៅការងារឆ្នាំ ២០២៤ របស់ធនាគារជាតិនៃកម្ពុជា នៅថ្ងៃទី ២៥ ខែ មករា ឆ្នាំ ២០២៤ នេះថា នាឆ្នាំ២០២៣ កន្លងទៅនេះ សេដ្ឋកិច្ចពិភពលោក បានជួបប្រទះនឹងបញ្ហាប្រឈមជាច្រើន ដែលបានបន្ទុចបង្អាក់ដល់ការងើបឡើង សេដ្ឋកិច្ចពិភពលោក ជាពិសេសភាពតានតឹង នៃភូមិសាស្ត្រនយោបាយដែលរួមមាន៖ ការអូសបន្លាយសង្គ្រាមរុស្ស៊ី-អ៊ុយក្រែន នៅអឺរ៉ុប។

 ការផ្ទុះសង្គ្រាមរវាងអ៊ីស្រាអែល និងក្រុមហាម៉ាសនៅមជ្ឈិមបូព៌ា និងការឡើងកម្ដៅនៅតំបន់អាស៊ី។ សង្គ្រាមពិតជាបង្កនូវសោដនាដ កម្មដ៏ធ្ងន់ធ្ងរ ដល់ប្រជាជន សង្គម និងសេដ្ឋកិច្ច។លោកស្រីបណ្ឌិតបន្តថា ស្ថិតក្នុងស្ថានភាពដ៏លំបាកនេះ កម្ពុជាពិតជាមានមោទនភាព ដែលប្រព័ន្ធធនាគារកម្ពុជាបន្តមាន ស្ថិរភាពយ៉ាងរឹងមាំ ក្នុងស្ថានភាពដែលនៅបណ្តាប្រទេសមួយចំនួន មានការដួលរលំគ្រឹះស្ថានធនាគារដូចជា នៅសហរដ្ឋអាមេរិក និង ស្វីស ដែលបានបង្កជាការព្រួយបារម្ភយ៉ាងខ្លាំង ចំពោះស្ថិរភាពហិរញ្ញវត្ថុសកល។

ទន្ទឹមនេះ អត្រាការប្រាក់ឥណទាននៅកម្ពុជា ក៏រក្សាបានស្ថិរភាពល្អ បើទោះជាបានកើនឡើងបន្តិចបន្តួច ចំពោះគ្រឹះស្ថានមួយចំនួន បើធៀបនឹងការកើនឡើងនៅបណ្តាប្រទេសនានា ដោយសារការដំឡើងអត្រាការប្រាក់ គោលរបស់ធនាគារកណ្តាល ក្នុងប្រទេសអភិវឌ្ឍន៍ចម្បងៗ ដូចជាសហរដ្ឋអាមេរិក និងអឺរ៉ុប។លោកស្រីបណ្ឌិតជា សិរី បានវាយតម្លៃខ្ពស់ចំពោះគ្រឹះស្ថានធនាគារ​ និងហិរញ្ញវត្ថុនៅកម្ពុជា ដែលបានរួមចំណែក ក្នុងការគោរពតាមបទប្បញ្ញត្តិប្រុងប្រយ័ត្ននានា និងបន្តខិតខំរក្សាស្ថិរភាពអត្រាការប្រាក់ឥណទាន ក្នុងនោះស្ថានភាពការរៀបចំ ឥណទានឡើងវិញ ត្រូវបានបញ្ចប់ក្រោយវិបត្តិកូវីដ-១៩ ហើយសេដ្ឋកិច្ចជាតិ តំបន់ និងពិភពលោក បានប្រឈមនឹងភាពមិនច្បាស់លាស់ខ្ពស់ ជាមួយនឹងការកើនឡើងអត្រាការប្រាក់កម្ចីក្រៅប្រទេស កំណើនឥណទានបានថយចុះមកត្រឹម៤,៨% ដែលជាអត្រាទាបបំផុត​ ក្នុងរយៈពេលជាង២ទស​វត្សរ៍ចុងក្រោយ។

ទោះយ៉ាងណា កំណើនឥណទាន នៅតែបន្តដើរតួនាទីយ៉ាងសំខាន់ ក្នុងការរួមចំណែកជំរុញវិស័យផលិតកម្មដូចជា វិស័យកម្មន្តសាល និងកសិកម្ម ដែលនៅតែមានកំណើនពីរខ្ទង់។ ទន្ទឹមនេះឥណទានមិន ដំណើរការក៏បានបន្តកើនឡើងផងដែរ ដែលតម្រូវឱ្យមានការយកចិត្តដាក់ខ្ពស់ លើការត្រួតពិនិត្យធនាគារ ការធ្វើ Stress Test ជាប់ជាប្រចាំ ការតាមដានវាយតម្លៃឱ្យបានស៊ីជម្រៅ លើហានិភ័យប្រទាក់ក្រឡា ក៏ដូចជាទាមទារឱ្យគ្រឹះស្ថានធនាគារ និងហិរញ្ញវត្ថុ មានការប្រុងប្រយ័ត្នខ្ពស់បន្ថែមទៀត។

គិតត្រឹមឆមាសទី១ ឆ្នាំ​២០២៣ កម្ពុជាមានគ្រឹះស្ថានធនាគារពាណិជ្ជចំនួន៥៩ និងធនាគារឯកទេសចំនួន៩ ដែលកំពុងធ្វើប្រតិបត្តិការអាជីវកម្មនៅទូទាំងប្រទេស៕

ដោយ:សហការី
តំបន់អភិវឌ្ឍន៍ប៉ែកខាងត្បូងភ្នំពេញ គឺជាតំបន់មួយកំពុងទទួលបានការចាប់អារម្មណ៍តាមរយៈសកម្មភាពវិនិយោគ និងគម្រោងធំៗដែលលេចវត្តមានជាបន្ដបន្ទាប់ ដូចជា ព្រលានយន្ដហោះតេជោក្រុងតាខ្មៅ ផ្លូវថ្មី៦០ម៉ែត្រឆ្ពោះទៅកាន់ព្រលានយន្ដថ្មីនេះ គម្រោងរថភ្លើងក្រោមដីដែលកំពុងសិក្សាជាដើម។ ដោយឡែក គម្រោងដែលបានលេចចេញជារូបរាងហើយមានដូចជា ផ្សារទំនើបAeon 3 បណ្ដុំលំនៅឋាន ខុនដូ និងគម្រោងបុរីធំៗ ដោយនៅក្នុងនោះគម្រោងលំនៅឋានដ៏មានសក្ដានុពលមួយរបស់បុរីប៉េង ហួត គឺ ដឹស្តា មេរាហ្កាដិន ក៏បានរួមចំណែកធ្វើឱ្យតំបន់នេះកាន់តែលេចធ្លោផងដែរ។ចំណុចគួរឱ្យចាប់អារម្មណ៍នៃគម្រោង ដឹស្តា មេរាហ្កាដិន គឺជាសហគមន៍រស់នៅទំនើបចម្រុះ ដែលមានលំនៅឋានច្រើនជម្រើស រាប់ចាប់ពីវីឡាកូនកាត់ ហ្សបហោស៍ វីឡាភ្លោះ និងវីឡាទោលដ៏សម្បូរបែបទៅតាមតម្រូវការរបស់អតិថិជន។ បើតាមការឱ្យដឹង ផ្ទះនៅក្នុងគម្រោង​ ដឹស្តា​ មេរាហ្កាដិន កំពុងសាងសង់ស្ទើរតែរួចរាល់ទាំងស្រុងទៅហើយ ដែលអតិថិជនអាចទិញភ្លាម ចូលនៅបានឆាប់ៗ មិនរង់ចាំយូរឡើយ។ អ្វីដែលសំខាន់មួយទៀត គឺមានអ្នករើចូលទៅរស់នៅជាច្រើនជាបន្តបន្ទាប់រួចហើយដែរ។ក្រៅពីជម្រើសលំនៅឋានដ៏សម្បូរបែបនេះហើយ គម្រោងស្ថិតនៅលើបណ្ដោយផ្លូវក្រវាត់ក្រុងទី២ (ផ្លូវ៥០ម៉ែត្រ) មួយនេះបានបង្កើត​ផ្សារទំនើបក្នុងគម្រោងផ្ទាល់ គឺ ផ្សារទំនើប ភីអេច មេរាម៉ល ដែលទើបតែបើកដំណើរការសាកល្បងកាលពីពេលថ្មីៗនេះ ហើយក៏បានរៀបចំសកម្មភាពកម្សាន្ដជាច្រើន ធ្វើឱ្យតំបន់នេះកាន់តែអ៊ូអរ ជាពិសេសធ្វើឱ្យអ្នករស់នៅក្នុងគម្រោងបុរីប៉េង ហួតផ្ទាល់ កាន់តែងាយស្រួលជាងមុន មួយជំហានទៅដល់ផ្សារទំនើប មួយជំហានទៅសួនបៃតង កន្លែងហាត់ប្រាណ អាងហែលទឹក និងជិតទីប្រជុំជនផ្សេងៗទៀត កៀកបង្កើយតែម្ដង។មិនតែប៉ុណ្ណោះ គម្រោងមួយនេះមានក្លឹបហោស៍ដ៏ធំនិងទំនើបជាងគេមួយក្នុងតំបន់ ដែលផ្ដល់ភាពងាយស្រួលកាន់តែខ្លាំងទៅដល់អតិថិជនដែលរស់នៅក្នុងគម្រោង មានសន្តិសុខការពារសុវត្ថិភាព 24ម៉ោង ព្រមទាំងសេវាថែទាំក្នុងគម្រោងយ៉ាងសកម្ម ផ្ដល់ជូននូវការរស់នៅដ៏មានផាសុកភាព និងសុភមង្គលគ្រប់ពេលវេលា។

សូមបញ្ជាក់ផងដែរថា ទិញផ្ទះនៅគម្រោង ដឹស្តា មេរាហ្កាដិន មានការផ្ដល់ជូនប្រូម៉ូសិនពិសេស និងអាចជ្រើសរើសទីតាំងល្អៗបានផងដែរ។ ចំណែកសំណង់ អតិថិជនអាចអញ្ជើញទៅមើលដោយផ្ទាល់ ឬអាចអញ្ជើញចូលមើលផ្ទះគំរូបានយ៉ាងងាយស្រួល។

សម្រាប់ព័ត៌មានបន្ថែម សូមទាក់ទងណាត់ជួបសហការីផ្នែកលក់តាមទូរស័ព្ទលេខ៖ 𝟎𝟗𝟖 / 𝟎𝟏𝟔 / 𝟎𝟏𝟕 𝟓𝟗𝟔 𝟕𝟖𝟗 ឬអញ្ជើញសាកសួរព័ត៌មាននៅការិយាល័យលក់គម្រោងផ្ទាល់តែម្ដង។
ចូលរួមជាមួយ 𝐓𝐞𝐥𝐞𝐠𝐫𝐚𝐦 𝐂𝐡𝐚𝐧𝐧𝐞𝐥 https://t.me/boreypenghuoth ។