ដោយៈ គង់ សូរិយា

        កណ្តាលៈ ក្រុមអ្នកជំនាញបាននិយាយថា តម្លៃដីនៅទូទាំងប្រ​ទេសបានធ្លាក់ចុះ រួមទាំងដីស្ថិតនៅតាមបណ្តោយផ្លូវលេខ៤១ និងផ្កូវ៥១ផងដែរ ប៉ុន្តែតំបន់នេះមានក្តីសង្ឃឹមសម្រាប់អនាគត។

ក្រុមអ្នកជំនាញអចលនទ្រព្យឯករាជ្យបានលើកឡើងថា ស្ថានភាពទីផ្សារ នៅតែមានសភាពស្ងប់ស្ងាត់នៅឡើយ ដោយសារវិបត្តិ​សេដ្ឋកិច្ចជាច្រើនឆ្នាំមកនេះ។ ទីផ្សារបានជាប់គាំងនៅក្នុងវិស័យនេះ ប៉ុន្តែវានៅតែមានសង្ឃឹមសម្រាប់អនាគត។

លោកប៊ុនហ៊ួត ប្រធានក្រុមភ្នាក់ងារអចលនទ្រព្យក្នុងស្រុកមួយរូបដែលបានលក់ដី និងបុរីនៅតំបន់នេះ បានលើកឡើងឲ្យដឹងកាលពី ដើមសប្តាហ៍នេះថា ស្ថានភាពទីផ្សារពិតជាលំបាក សម្រាប់ដីធ្លី ក៏ដូចជាទីផ្សារលំនៅដ្ឋាន។លោកបន្តថា “អ្វីៗមិនទាន់មានសញ្ញាប្រសើរនៅឡើយទេ ប៉ុន្តែយើងនៅតែមានក្តីសង្ឃឹមនាពេលអនាគត”។

អ្នកស្រីតាំង ហួរអគ្គនាយិកាក្រុមហ៊ុនAmatak Property Service, Co, Ltdបានបដិសេធមិនអត្ថាធិប្បាយ ប៉ុន្តែអ្នកស្រីបានលើកឡើងកាលពីសប្តាហ៍មុនថា នៅតែមានតម្រូវការ សម្រាប់អ្នកលក់អចល​នទ្រព្យតម្លៃក្រោ​មទីផ្សារ ដែលអ្នកវិនិយោគទិញដីដើម្បី​សាងសង់ផ្ទះ ឃ្លាំង រោងចក្រ ភោជនីយដ្ឋានជាដើម។

អ្នកស្រីបានបន្តថា “អ្នកទិញបច្ចុប្បន្ន មានគោលបំណងច្បាស់លា​ស់ មិនសូវមានអ្នកទិញដី សម្រាប់ទុកយកចំណេញច្រើនដូចមុននោះទេ”។

អ្នកវិនិយោគមួយរូបបានលើកឡើង ក្នុងលក្ខខ័ណ្ឌមិនបញ្ចេញឈ្មោះថា បច្ចុប្បន្នដីនៅតាមបណ្តោយផ្លូវលេខ៤១ និង៥១ បានធ្លាក់ចុះក្នុងរង្វង់៥០ភាគរយ ប៉ុន្តែតម្លៃនេះអាចដាំក្បាលចុះ តទៅទៀតនៅ​ដើមឆ្នាំ២០២២៤​ខាងមុខ ដែលវាជាពេលវេលាដ៏ល្អ សម្រាប់ការប្រមូលទិញនៅឆ្នាំ២០២៤។

លោកបន្តថា ស្ថានភាពទីផ្សារនៅតែមានឱកាសរីកចម្រើន ប៉ុន្តែតម្លៃដីនឹងធ្លាក់ចុះបន្ថែមទៀត”។សហស្ថាបនិក និងជាអគ្គនាយកគេហទំព័រPropertyarea.asia លោកយិន លាងគង់ដែលបានតាមដានដំណើរវិវត្តន៍ ក្នុងវិស័យនេះបានមានប្រសាសន៍ឲ្យដឹងផងដែរថា ស្ថានភាពនេះ ពិភពលោកក៏ដូចជាកម្ពុជាកំពុងរងវិបត្តិនៅឡើយ ដោយស្ទើរគ្រប់អាជីវកម្មបានរងផល​ប៉ះពាល់ ហេតុនេះការរំពឹងពីការងើបឡើង នៃវិស័យអចលនវត្ថុ ត្រូវការរយៈពេលបន្ថែមទៀត។

លោកបន្តថា យ៉ាងណាក៏ដោយ តំបន់ជាប់ផ្លូវលេខ៤១ ផ្លូវលេខ៥១ នៅមានឱកាសរីកចម្រើនបន្ត ដោយសារកត្តាទីតាំងភូមិសាស្រ្ត ប្រជាសាស្រ្ត គោលនយោបាយរបស់រដ្ឋាភិបាល និងជាតំបន់ដែលមានបណ្តាញផ្លូវយ៉ាងច្រើន តភ្ជាប់ទៅកាន់កំពង់ផែក្រុងព្រះសីហនុ និងខេត្តជាប់តំបន់ឆ្នេរនានា៕

        ដោយៈ គង់ សូរិយា

        ភ្នំពេញៈ លោកកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីកម្ពុជា បា​ន​ដាក់ចេញនូវការងារចាំបាច់ និងអាទិភាពមួយចំនួន ដើម្បីលើកកំពស់សេដ្ឋកិច្ចសង្គម។

ការប្រកាសនេះ បានធ្វើឡើងក្នុងពិធីបើកកិច្ចប្រជុំគណៈរដ្ឋមន្រ្តីជាលើកដំបូង នៃរាជរដ្ឋាភិបាលនិតិកាលទី៧ នៃរដ្ឋសភា ក្រោមការដឹកនាំរបស់លោកកិត្តិទេសាភិបាលបណ្ឌិតហ៊ុន ម៉ាណែតនាយករដ្ឋមន្រ្តីនៃកម្ពុជា។

លោកកិត្តិទេសាភិបាលបណ្ឌិត បានប្រកាសដាក់ចេញ ដើម្បីជា​ប្រយោជ​ន៍សម្រាប់ប្រជាពលរដ្ឋនោះ រួមមាន៖ ការធានាចំនួន៥ កម្មវិធីនយោបាអាទិភាពចំនួន៦ និងដោះស្រាយបញ្ហាប្រឈមអាទិភាពចំនួន៥។

ទាក់ទងនឹងគោលយោបាយអភិវឌ្ឍន៍សេដ្ឋកិច្ច សង្គមសម្រាប់រាជរដ្ឋាភិបាលអាណត្តិថ្មី ឯកសារគោលនយោបាយ ដែលបានប្រកា​សកាលពីព្រឹកថ្ងៃទី២៤ សីហាបានបញ្ជាក់ថា រាជរដ្ឋាភិបាលកម្ពុជាធានាបន្តជំរុញអភិវឌ្ឍសេដ្ឋកិច្ច និងសង្គមកម្ពុជា ក្នុងគ្រប់វិស័យ ដោយផ្តោតអាទិ​ភាព ​លើការកែទម្រង់អភិបាលកិច្ច សំដៅពង្រឹងស្ថាប័នសាធារណៈ ដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ រួមបញ្ចូលផងដែរ នូវការពង្រឹងគោលការណ៍នីតិរដ្ឋ និងការពង្រឹងយុត្តិធម៌​ក្នុងសង្គម ព្រមទាំងការបង្កើនប្រសិទ្ធភាព និងការលើកកម្ពស់គុណភាពសវាសាធារណៈ។

ការ​ពង្រឹង​បរិស្ថានម៉ាក្រូសេដ្ឋកិច្ច ដែលមានស្ថិរភាពរឹងមាំ ធន់នឹងវិបត្តិ និងទ្រទ្រង់ដល់កំណើន​ខ្ពស់​ប្រកបដោយចីរភាព បរិយាប័ន្ន និងសមធម៌, ការបន្តផ្តល់អាទិភាពខ្ពស់ទៅ លើ​ការវិនិយោគលើ​មូលធនមនុស្ស ដោយផ្តោតលើការកែទម្រង់វិស័យអប់រំ និងវិស័យសុខា​ភិបាល​, ការលើក​កម្ពស់ និងការបង្កើនការវិនិយោគ ទាំងការវិនិយោគសាធារណៈ ទាំងការវិនិ​យោគឯកជន, លើ​ប្រព័ន្ធហេដ្ឋារចនាសម្ព័ន្ធចាំបាច់នានា, ទាំងផ្នែករឹង ទាំងផ្នែកទន់ ដើម្បីបង្កើន​ភាពទាក់ទាញ និងគាំទ្រដល់សកម្មភាពសេដ្ឋកិច្ច ក៏ដូចជាបម្រើដល់សេចក្តីត្រូវការគ្រប់ ផ្នែករបស់ប្រជាជន ការយកចិត្តទុកដាក់ដល់ការអភិវឌ្ឍសេដ្ឋកិច្ចក្រៅប្រព័ន្ធ និងការបង្កើត​បរិយាកាសអំណោយផល ដល់សហគ្រាសធុនមីក្រូ តូច និងមធ្យម និងធុរកិច្ចថ្មី ឱ្យរីកលូតលាស់​ ការលើកកម្ពស់ភាពជាដៃគូរវាងរដ្ឋ និងវិស័យឯកជន ការបង្កើនភាពស៊ីជម្រៅ និងការ​ពង្រឹងភាពធន់ហិរញ្ញវត្ថុ ព្រមទាំងការពង្រីកបរិយាប័ន្នហិរញ្ញវត្ថុ រួមបញ្ចូលនូវការរៀបចំ និងការ​កែលម្អក្របខ័ណ្ឌ និងយន្តការហិរញ្ញប្បទាន ព្រមទាំងការធ្វើពិពិធកម្មផលិតផល និងសេវា​ហិ​រញ្ញវត្ថុ សំដៅរួមចំណែកជំរុញសកម្មភាពសេដ្ឋកិច្ច និងការវិនិយោគ និងការជំរុញធ្វើបរិវត្ត​កម្ម​ឌីជីថល, ទាំងក្នុងសង្គម និងសេដ្ឋកិច្ច។ល។

រដ្ឋាភិបាលក៏ធានាបន្តជំរុញលើកកម្ពស់ និងកែលម្អជីវភាពរបស់ប្រជាជន តាមរយៈការ ផ្តល់ជូន​ដល់ស្រទាប់យុវជន នូវការអប់រំ និងការបណ្តុះបណ្តាលជំនាញវិជ្ជាជីវៈ ប្រកបដោយគុណ​ភាព ព្រមជាមួ​យនឹងឱកាសទទួលបានការងារធ្វើ ការជួយកសិករក្នុងការពង្រីកផលិត- កម្មករ និងការរកទីផ្សារលក់កសិផល ដោយថ្លៃសមរម្យ ​ការបន្តដំឡើងប្រាក់ឈ្នួលអប្បបរមា និងប្រាក់អត្ថប្រយោ​ជន៍ផ្សេងទៀត ព្រម​ជាមួយនឹងការកែលម្អលក្ខខណ្ឌការងារ និងការការពារអាជីព ជូនកម្មករ-និយោជិត។

ការបន្តដំឡើងបៀវត្សអប្បបរមា និងប្រាក់សោធននិវត្តន៍ ជូនមន្ត្រីរាជការសាធារណៈគ្រប់ប្រភេទ ព្រមទាំងនិវត្តជន និងអតីតយុទ្ធជន គួបផ្សំជាមួយ នឹងការរៀបចំប្រព័ន្ធបៀវត្ស និងប្រព័ន្ឋមួយនឹងការកែលម្អលក្ខខណ្ឌការងារ និងការការពារអាជីព ជូនកម្មករ-និយោជិត; ការបន្តដំឡើងបៀវត្សអប្បបរមា និង ប្រាក់សោធននិវត្តន៍ ជូនមន្ត្រីរាជការសាធារណៈគ្រប់ប្រភេទ ព្រមទាំងនិវត្តជន និង អតីតយុទ្ធជន គួបផ្សំជាមួយ នឹងការរៀបចំប្រព័ន្ធបៀវត្ស និងប្រព័ន្ធលើកទឹកចិត្តក្នុងវិស័យសាធារណៈ ឱ្យកាន់តែមាន ប្រសិទ្ធភាព និងភាពគ្រប់ជ្រុងជ្រោយ ដោយផ្អែកលើគុណាធិបតេយ្យ សំដៅលើកកម្ពស់ ផលិតភាពការងារ, សមិទ្ធកម្ម និង ជីវភាពមន្ត្រីសាធារណៈ ឱ្យមានសង្គតិភាព ជាមួយកំណើន សេដ្ឋកិច្ច និងលទ្ធភាពនៃថវិកាជាតិ ។ល។

ជាមួយគ្នានេះ រាជរដ្ឋាភិបាលក៏ធានានូវសុវត្ថិភាពសង្គម និង លំនឹងក្នុងការរស់នៅរបស់ប្រជាជន ទាំងពេលបច្ចុប្បន្ន ក៏ដូចជាទៅអនាគត, តាមរយៈការអភិវឌ្ឍ និងការពង្រឹងប្រព័ន្ធគាំពារសង្គម ដែលរួមបញ្ចូលនូវ របបជំនួយសង្គម និងរបបសន្តិសុខសង្គម ប្រកប​ដោយប្រសិទ្ធភាព និងចីរភាព ដែល​ជួយ​គាំ​ពារប្រជាជនគ្រប់រូប, ជាពិសេស គ្រួសារក្រីក្រ ក្រុមជនងាយរងគ្រោះ និងគ្រួសារ ងាយរងហា​និ​ភ័យ, ពីគ្រោះអាសន្ន និងវិបត្តិនានា ដោយមិនទុកឱ្យប្រជាជនណាម្នាក់ទទួលរងគ្រោះ ដោយ​មិន​​មានការយកចិត្តទុកដាក់នោះឡើយ៕

ដោយៈ ហ្វីអូណា

ភ្នំពេញៈ លោកលុយ ដេវីដតំណាងឯកអគ្គរាជទូតកម្ពុជាចំនួន៧រូបបានប្ដេជ្ញា ​ទាក់ទាញវិនិយោគិន និងភ្ញៀវទេសចរបរទេស ឲ្យមកកម្ពុជាបានកាន់តែច្រើន  ដើម្បីបង្កើតការងារនៅក្នុងស្រុក លើកកម្ព​ស់សេដ្ឋកិច្ចប្រជាពលរដ្ឋ និងសង្គមជាតិ។

ការប្ដេជាចិត្ដនេះធ្វើឡើង ក្នុងឱកាសដែលសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឲ្យឯកអគ្គរាជទូត នៃព្រះរាជាណាចក្រកម្ពុជា ទើបតែងតាំងថ្មីចំនួន៧រូប ចូលជួបសម្តែងការគួរសម និងទទួលអនុសាសន៍ មុនពេលអញ្ជើញ ទៅបំពេញបេសកកម្មការទូត ប្រចាំនៅប្រទេសជាមិត្តនានា ព្រឹកថ្ងៃទី២៣ ខែសីហា ឆ្នាំ២០២៣។

លោកលុយ ដាវីត តំណាងឯកអគ្គរាជទូត ទំាងអស់បានប្តេជ្ញា នៅចំពោះមុខ សម្តេចប្រធានព្រឹទ្ធសភា ថានឹងខិតខំបំពេញភារកិច្ចការទូត ប្រកបដោយស្មារតីទទួលខុសត្រូវខ្ពស់ ឱ្យបានសក្តិសមជាតំណាងឲ្យព្រះរាជាណាចក្រកម្ពុជា នៅលើឆាកអន្តរជាតិ។

ឯកអគ្គរាជទូតទំាងអស់បានសន្យាថា នឹងខិតខំអនុវត្តតាម អនុសាសន៍ណែនាំដ៏ខ្ពង់ខ្ពស់ របស់សម្តេច ប្រធានព្រឹទ្ធសភា និងខិតខំផ្សព្វផ្សាយអំពីវឌ្ឍនភាព និងការរីកចម្រើនរបស់ប្រទេសជាតិ ពង្រឹងពង្រីកទំនាក់ទំនង សហប្រតិបត្តិការ ល្អប្រសើរជាមួយនឹងប្រទេសម្ចាស់ផ្ទះ និងឯកអគ្គរាជទូត ឯកអគ្គរដ្ឋទូតប្រទេស ផ្សេងៗទៀត ព្រមទាំងខិតខំទាក់ទាញ វិនិយោគិននិងអ្នកទេសចរ ឲ្យមកកម្ពុជាបានកាន់តែច្រើន ដើម្បីរួមចំណែកអភិវឌ្ឍប្រទេសជាតិ និងលើកកម្ពស់កិត្យានុភាពជាតិ នៅក្នុងក្របខ័ណ្ឌតំបន់ និងលើពិភពលោក។

សម្តេចប្រធានព្រឹទ្ធសភា បានសម្តែងនូវការអបអរសាទរចំពោះឯកឧត្តមទាំង៧រូបដែលត្រូវ បានព្រះមហាក្សត្រតែងតាំង ជាឯកអគ្គរាជទូតប្រចាំប្រទេសជាមិត្តនានា។

សម្តេចបានបន្តថា “ការទៅបំពេញភារកិច្ច ដ៏ខ្ពង់ខ្ពស់នាពេលនេះ ស្របពេលនឹងការវិវត្តន៍ថ្មី នៅកម្ពុជាយើង ដែលរដ្ឋសភាទើបតែ បាន បើកសម័យប្រជុំដំបូងនីតិកាលទី៧ ក្រោមព្រះរាជអធិបតីភាពដ៏ខ្ពង់ខ្ពស់បំផុត របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា”។

សម្តេចវិបុលសេនាភក្តី សាយ ឈុំ ក៏បានផ្តាំផ្ញើចំពោះឯកឧត្តម     ឯកអគ្គរាជទូតទាំង៧រូប ត្រូវយកចិត្តទុកដាក់ពង្រឹងពង្រីកទំនាក់ទំនង និងកិច្ចសហប្រតិបត្តិការឲ្យបានល្អប្រសើរ ដើម្បីផលប្រ យោជន៍ ទៅវិញទៅមករវាងព្រះរាជណាចក្រកម្ពុជា និងប្រទេសជាមិត្តដែលខ្លួនតាំង នៅទាំងពេលបច្ចុប្បន្ន និងតទៅអនាគតយូរអង្វែង។

សម្តេចបញ្ជាក់ថា “ដើម្បីសម្រេចគោលបំណងនេះ ត្រូវយកចិត្តទុកដាក់កសាងទំនាក់ទំនងល្អ ជាមួយនឹងបណ្តាស្ថាប័ន និងជាមួយប្រជាជននៃប្រទេសនីមួយៗឲ្យបានល្អប្រសើរ”។សម្តេចបន្ថែមថា “ទន្ទឹមនឹងនេះ ត្រូវយកចិត្តទុកដាក់គិតគូរ ដល់ផលប្រយោជន៍របស់ប្រជាពលរដ្ឋខ្មែរ និងពលករខ្មែរ ដែលកំពុងរស់នៅប្រកបអាជីវកម្ម និងធ្វើការងារនៅប្រទេសដែលខ្លួនតាំងនៅ”។

សម្តេចវិបុលសេនាភក្តី សាយ ឈុំ បានផ្តល់អនុសាសន៍សំខាន់ៗ មួយចំនួនជូនដល់ឯកឧត្តម ឯកអគ្គរាជទូត ទំាងអស់ត្រូវសកម្មផ្សព្វផ្សាយ និងបកស្រាយពន្យល់អំពីសភាព ការណ៍ពិត និងការអនុវត្តនូវលទ្ធិប្រជាធិបតេយ្យ នៅកម្ពុជាជូនដល់សាធារណៈ មតិជាតិ និងអន្តរជាតិ ជាពិសេស នៅប្រទេសដែលកំពុង បំពេញភារកិច្ច។ ត្រូវផ្តល់ព័ត៌មានឲ្យបានរហ័ស ចំពោះសភាពការណ៍ជាក់ស្តែងរបស់កម្ពុជា និងត្រូវយកចិត្តទុកដាក់ផ្សព្វផ្សាយ ក្នុងការទាក់ទាញវិនិយោគិន និងភ្ញៀវទេសចរបរទេស មកទស្សនាកម្ពុជាឲ្យបានកាន់តែច្រើន ព្រមទាំងសកម្មផ្សព្វ ផ្សាយអំពីវប្បធម៌ ប្រពៃណី និងទំនៀមទំលាប់ដ៏ល្អរបស់កម្ពុជាយើងផងដែរ៕

        ដោយៈ គង់ សូរិយា

        ភ្នំពេញៈ នាយករដ្ឋមន្រ្តីថ្មីនៃកម្ពុជា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានដាក់ចេញកម្មវិធីគោលនយោបាយអាទិភាពទាំង៦ សម្រាប់ការចាប់ផ្តើមអនុវត្តភ្លាមៗក្នុងឆ្នាំ២០២៣។

ការដាក់ចេញនូវគោលនយោបាយនេះ បានធ្វើឡើងក្នុងឱកាសដែល ឯកឧត្តមថ្លែងឧទ្ទេសនាមស្តីពី “យុទ្ធសាស្ត្របញ្ចកោណ-ដំណាក់កាលទី១” និង “វិធានការគន្លឹះរបស់រាជរដ្ឋាភិបាល នីតិកាលទី៧ នៃរដ្ឋសភា” ក្នុងអង្គប្រជុំលើកដំបូង នៃគណៈរដ្ឋមន្ត្រី នៅវិមានសន្តិភាព ព្រឹកថ្ងៃទី២៤ សីហា ២០២៣។

ឯកឧត្តមបានមានប្រសាស​ន៍ថា ក្នុងតួនាទីជារបៀបវារៈគោលនយោបាយសង្គម-សេដ្ឋកិច្ច កម្មវិធីនយោបាយរបស់រាជរដ្ឋាភិបាល នីតិកាលទី ៧ នៃរដ្ឋសភា យុទ្ធសាស្ត្របញ្ចកោណ-ដំណាក់កាលទី១ នឹងជំរុញការអនុវត្ត កម្មវិធីគោលនយោបាយអាទិភាពទាំង៦ ដែលត្រូវចាប់អនុវត្ត ក្នុងឆ្នាំ២០២៣ នេះតែម្ដង រួមមានទី១ ការពង្រីកសេវាថែទាំសុខភាព ឆ្ពោះទៅរកការគ្របដណ្តប់សុខភាពជាសកល។

ទី២ ការបណ្តុះបណ្តាលជំនាញវិជ្ជាជីវៈ និងបច្ចេកទេស ជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ទី៣ ការធ្វើស្ថាបនូបនីយកម្ម កម្មវិធីជាតិជំនួយសង្គម សម្រាប់គ្រួសារក្រីក្រ, ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យ នៅក្នុងគ្រាមានវិបត្តិសេដ្ឋកិច្ច និងគ្រាមានគ្រោះអាសន្ន។

ទី៤ ការដាក់ចេញយុទ្ធសាស្ត្រស្ដីពី ការអភិវឌ្ឍសេដ្ឋកិច្ចក្រៅប្រព័ន្ធ ឱ្យមានលទ្ធភាព ចូលរួមក្នុងសេដ្ឋកិច្ចក្នុងប្រព័ន្ធ និងអាចទទួលបានផលប្រយោជន៍ពីប្រព័ន្ធគាំពារសង្គមផ្លូវការ ទី៥ ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន សំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ ទី៦ ការដាក់ពង្រាយមន្ត្រីបច្ចេកទេសកសិកម្ម ទៅគ្រប់ឃុំ-សង្កាត់ ដែលមានសកម្មភាពកសិកម្ម នៅទូទាំងប្រទេស និងការរៀបចំឱ្យមានសមាគមកសិករនៅតាមថ្វីជនបទ៕

ដោយៈ គង់ ហ្វីអូណា

ភ្នំពេញៈ ​សមាគមអ្នកផលិតម៉ាកសម្គាល់ ភូមិសាស្ត្រទំនិញអំបិ​លកំពត-កែប គ្រោងនាំចេញអំបិល ដែលជាផលិតផលចុះបញ្ជីម៉ាកសម្គាល់ភូមិសាស្ត្រទំនិញ (GI) ជាលើកដំបូង ទៅកាន់ទីផ្សារអន្តរជាតិ នៅចុងឆ្នាំ២០២៣នេះ។

គំរោងនេះធ្វើឡើងបន្ទាប់ ពីកម្ពុជាបានចុះបញ្ជី​ម៉ាកសម្គាល់ភូមិសាស្ត្រ ចំពោះផលិតផលអំបិល កំពត-កែប កាលពីខែមេសាកន្លងទៅ។

លោក ប៊ុន ណារិន ប្រធានសមាគមអ្នកផលិតម៉ាកសម្គាល់ភូមិសាស្ត្រទំនិញអំបិល កំពត-កែប បានមានប្រសាសន៍ឲ្យដឹងថា នៅចុងឆ្នាំ២០២៣នេះ​ ​សមាគមនឹងសាកល្បងនាំចេញអំបិល​GI​ ជាលើកដំបូងទៅកាន់ទីផ្សារ​អឺរ៉ុប ក្នុងបរិមាណតិចតួចសិន ក្នុងរង្វង់ប្រមាណពី៥ ទៅ២០តោន ដែលជាប្រភេទអំបិល គ្រួស ផ្កាអំបិល និងអំបិលស្លឹក។

លោកបន្ថែមថា សមាគមបានយកគម្រូអំបិល ផ្ញើរទៅទីផ្សារ​ប្រទេសក្នុងតំបន់អឺរ៉ុបនេះហើយ ​ហើយគេបានទាក់ទងមកវិញផងដែរ ដោយរង់ចាំការបញ្ជាក់ជាចុងក្រោយសិន”។ លោកបន្តថា “ជាមួយគ្នានេះ ក្រៅពីទីផ្សារអឺរ៉ុប លោកថែមទាំងបានយកប៉ាន់ ឬគម្រូទៅប្រទេសផ្សេងទៀតផងដែរ ដូចជាសហរដ្ឋអាមេរិកជាដើម”។

លោកបន្ថែមថា មុនពេលដែលអំបិលកំពត-កែប ចុះបញ្ជី GI ក៏​ធ្លាប់មានក្រុមហ៊ុនមួយចំនួន បាននាំចេញទៅក្រៅប្រទេសផងដែរ និងទទួលបានគាំទ្រច្រើន។

ប្រធានសមាគមរូបនេះបានឲ្យដឹងថា បច្ចុប្បន្នអំបិលដែលផលិតត្រូវតាមស្តង់ដារ ​GI​ មានប្រមាណ៥ពាន់តោន ដែលបានផលិតលើផ្ទៃប្រមាណជាង ២០០ហិកតា នៅក្នុងខេត្តកំពត និងខេត្តកែប។

អំបិលកំពតកែប ត្រូវបានក្រសួងពាណិជ្ជកម្ម សម្រេចចុះបញ្ជីម៉ាកសម្គាល់ភូមិសាស្ត្រទំនិញ​ រួមគ្នាជាមួយផលិតផលកម្ពុជា ពីរប្រភេទទៀត គឺ ទឹកត្រីកំពតកែប និងបង្កងតាកែវ នៅថ្ងៃទី ២៦ មេសា ឆ្នាំ២០២៣​ ក្នុងទិវាកម្មសិទ្ធិបញ្ញាពិភពលោក​។

បន្ទាប់ពីផលិតផលអំបិល កំពត-កែប បានចុះបញ្ជី​ម៉ាកសម្គាល់ភូមិសាស្ត្រកាលពីខែមេសា លោកកត់សម្គាល់ថា មានតែកសិករប្រមាណ១០ក្រុមប៉ុណ្ណោះ ដែលមានលទ្ធភាពផលិតតាមស្តង់ដារអំបិល​ GI ​ដោយសារការផលិតអំបិល​ GI ត្រូវការបច្ចេកទេសនៃ​ការផលិតខ្ពស់ជាង​អំបិលធម្មតា ​ខណៈបច្ចុប្បន្ននេះមាន​អ្នកផលិត៥ក្រុមហើយ ដែលដាក់បានពាក្យចូលជាសមាជិក សមាគមអ្នកផលិតម៉ាកសម្គាល់ភូមិសាស្ត្រទំនិញអំបិល កំពត-កែប។

លោកលើកឡើងថា នៅឆ្នាំក្រោយ អាចនឹងមានអ្នកសុំចុះបញ្ជីផលិតអំបិលស្តង់ដារ ​GI​ បន្ថែមទៀត ដោយសមាគមនឹងបន្ថែមការចុះផ្សព្វផ្សាយ ណែនាំ និងបណ្តុះបណ្តាលឱ្យពួកគាត់ ឲ្យយល់ពីសៀវ​ភៅបន្ទុក ​នៃការផលិតអំបិលតាមស្តង់ដារលក្ខណៈនៃ​GI​។ ​

សម្រាប់អំបិលGI អាចនឹងតម្លៃលើសពីអំបិលធម្មតា ពី៥០% ទៅ១០០% ពោលគឺប្រសិនបើអំបិលធម្មតាក្នុងមួយបេ (ចំណុះ៥០គីឡូក្រាម) មានតម្លៃ២០០០០រៀល អំបិលGI នឹងលក់ក្នុងតម្លៃ ចាប់ពី ៣០០០០រៀលទៅ។

បច្ចុប្បន្ននេះ អ្នកផលិតអំបិលនៅខេត្តកំពត និងកែប មានប្រមា​ណ​១៣៩ក្រុម។ នៅឆ្នាំនេះ ការផលិតអំបិលបាន​ជាង៧ម៉ឺនតោន ដោយសារការផលិត ជួបឧបសគ្គមួយចំនួន ​ព្រោះតែភ្លៀងបានចាប់ផ្តើមធ្លាក់តាំងពីខែមេសា ដែលធ្វើឱ្យកសិករខកខាន ក្នុងការប្រមូលផល៕

ដោយ: គង់ លាងហួរ

ហុងកុង: ផ្សារទំនើបថៃ Big C Supercenter គ្រោងឈានជើងចូលទីផ្សារទីក្រុងហុងកុង នៅខែកញ្ញាខាងមុខ ហើយក៏ស្វែងរកការចុះ​បញ្ជី​លក់មូលបត្រព្រមគ្នានៅហុងកុង និងប្រទេសថៃ (Dual Listing) ឱ្យបានលឿនត្រឹមត្រីមាសទី៤ផងដែរ។

លោក Aswin Techajareonvikul នាយកប្រតិបត្តិ និងជាប្រធា​នក្រុមហ៊ុន Big C Retail Corp បានថ្លែងក្នុងបទសម្ភាសន៍ផ្តាច់មុខមួយជាមួយកាសែត South China Morning Post ថា “Big C Supercenter បានទិញយកហាងចំនួន២៤ទីតាំង របស់ខ្សែសង្វាក់គ្រឿងទេស AbouThai នៅហុងកុង ហើយយើងនឹង​ប្តូរ​ឈ្មោះ​ពួកគេទៅជា Big C ចាប់​ពី​ខែ​ក្រោយនេះ”។

លោក Aswin បានមានជំនួបដាច់ដោយឡែកពីគ្នា ជាមួយលេ​ខា​ធិការហិរញ្ញវត្ថុរបស់ទីក្រុងហុងកុង គឺលោកPaul Chan Mo-po និងលោក Nicolas Aguzin នាយកប្រតិបត្តិក្រុមហ៊ុន Hong Kong Exchanges and Clearing (HKEX) ដើម្បីពិភាក្សាគ្នាអំពីផែនការក្នុងការចុះបញ្ជីផងដែរ។

លោក​ Aswin បាន​មាន​ប្រសាសន៍​ថា “យើង​ទាំង​អស់​គ្នា​មានការជឿជាក់​ទៅលើ​ការ​រំពឹង​ទុក និង​សក្ដានុពល​នៃ​កំណើន​របស់​ទីក្រុង​ហុងកុង”។ លោកបន្តថា “ទោះបីជាមានបញ្ហាប្រឈមមួយចំនួន ក្នុងអំឡុងវិបត្តិកូវីដយ៉ាងណាក្តី ទីក្រុងនេះ អាចស្ទុះងើបឡើងមកវិញយ៉ាងឆាប់រហ័ស ហើយហុងកុង​ជា​មជ្ឈមណ្ឌល​ហិរញ្ញវត្ថុ ​ឈានមុខ​គេ​នៅ​តំបន់អាស៊ី​ ដែល​តភ្ជាប់​ទីផ្សារ​អាស៊ីអាគ្នេយ៍​ជាមួយ​ចិន​ដីគោក”។

Big C កំពុងដំណើរការហាងលក់រាយ ប្រហែល២.០០០ទីតាំង ដោយប្រើឈ្មោះផ្សេងៗដូចជា Big C Supercenter Big C Market Big C Foodplace និងMini Big C brands នៅក្នុងទីផ្សារនៃប្រទេសថៃ ឡាវ កម្ពុជា និងវៀតណាម៕

ដោយ: គង់ លាងហួរ

អន្តរជាតិ: គ្រប់យានជំនិះទាំងអស់ លើកលែងតែរថយន្តដែលមានទម្ងន់លើសពី២០តោន ត្រូវបានអនុញ្ញាតឱ្យឆ្លងកាត់ស្ពានម៉ុងសេន Mong Sen ដែលស្ថិតនៅលើផ្លូវល្បឿនលឿន តភ្ជាប់រវាងទីក្រុងហាណូយ និងទីក្រុងSa Pa ចាប់ពីថ្ងៃអង្គារម្សិលមិញនេះ។

ស្ពាននេះស្ថិតក្នុងខេត្ត Lao Cai និងត្រូវបានបើកឱ្យធ្វើចរាចរលើមូលដ្ឋានសាកល្បង បន្ទាប់ពីចំណាយពេលសាងសង់អស់ជាងពីរឆ្នាំ។ ស្ពានម៉ុងសេនមានប្រវែង៦១២ម៉ែត្រ មានបង្គោលទ្រចំនួន៥ មានទទឹង១៤ម៉ែត្រ និងមានគន្លងចំនួន៤។ ស្ពានម៉ុង​សេន គឺជា​ស្ពាន​ឆ្លងកាត់​តំបន់​គោក ​ដែលមាន​បង្គោល​ខ្ពស់​ជាងគេ​បង្អស់ ​នៅក្នុងប្រទេស​វៀតណាម។ការងារសាងសង់គម្រោង បានចាប់ផ្តើមក្នុងខែមករា ឆ្នាំ២០២១ ក្នុងទុនវិនិយោគចំនួន៤៥០ពាន់លានដុង (ប្រហែល១៩,៨លានដុល្លារអាមេរិក)។

យោងតាមមន្ទីរដឹកជញ្ជូនខេត្ត Lao Cai បានឱ្យដឹងថា អ្នកវិនិយោគនឹងធ្វើការវាយតម្លៃ ដោយសង្ឃឹមថា ស្ពានម៉ុងសេននឹងត្រូវបានបើកសម្ពោធដាក់ឱ្យប្រើប្រាស់ ជាផ្លូវការនៅចុងខែសីហានេះ។

យោងតាមសារពត៌មាន VNexpress បានចុះផ្សាយថា ស្ពាននេះ នឹងជួយកាត់បន្ថយការធ្វើដំណើរ ចម្ងាយ៣០គីឡូម៉ែត្រពីទីប្រជុំជន Lao Cai ទៅកាន់ទីក្រុងទេសចរណ៍ Sa Pa ចំនួន២,៥គីឡូម៉ែត្រ ហើយអ្នកបើកបរអាចជៀសវាងផុត ពីកំណាត់ផ្លូវជាតិលេខ 4D ដែលមានជម្រាលភ្នំ និងតែងតែទទួលរងនូវការរអិលបាក់ដីជាញឹកញាប់៕