ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាអចលនទ្រព្យ Colliers បានឱ្យដឹងថា តម្រូវការជួលការិយាល័យនៅប្រទេសសិង្ហបុរីបានហក់ឡើង១២ដងក្នុងរយៈពេល៦ខែដំបូង ឆ្នាំនេះ ដោយនាំមុខគេទូទាំងតំបន់អាស៊ីប៉ាស៊ីហ្វិក។

ក្រុមហ៊ុនប្រឹក្សាអចលនទ្រព្យ Colliers បានគូសបញ្ជាក់ថា បណ្តាក្រុមហ៊ុនជាច្រើននៅទីក្រុងសិង្ហបុរីបានផ្លាស់ប្តូរទីតាំងការងារទៅកាន់អគារការិយាល័យ ដែលទើបបញ្ចប់ការសាងសង់ថ្មីៗ។ប្រការនេះបាន​ជំរុញ​ឱ្យ​​សកម្មភាពជួលការិយាល័យនៅ​សិង្ហបុរី​កើន​ឡើង។

គិតត្រឹមត្រីមាសទី២ តម្លៃជួលការិយាល័យនៅទីក្រុងមជ្ឈមណ្ឌលហិរញ្ញវត្ថុលំដាប់កំពូលមួយនេះបានកើនឡើង១,៣ភាគរយដល់ចំនួន១២,១ដុល្លារសិង្ហបុរី (ប្រហែល៩,៤២ដុល្លារអាមេរិក) ក្នុងមួយហ្វីតការ៉េក្នុងមួយខែ។ នេះបើយោងតាមរបាយការណ៍ដាច់ដោយឡែកពីក្រុមហ៊ុន CBRE។

លោក Mike Davis អ្នកជំនាញនៅក្រុមហ៊ុន Colliers Asia-Pacific បានអះអាងថា “តម្រូវការការិយាល័យនៅសិង្ហបុរីត្រូវបានជំរុញដោយកត្តាស្ថិរភាពម៉ាក្រូសេដ្ឋកិច្ច ការប្រកាន់ជំហរអព្យាក្រឹតក្នុងភាពតានតឹងភូមិសាស្ត្រនយោបាយ និងភាពស័ក្តិសមជាមជ្ឈមណ្ឌលពាណិជ្ជកម្មក្នុងតំបន់”។

លោក Davis បានព្យាករណ៍ថា តម្លៃជួលការិយាល័យនឹងអាចបន្តកើនឡើង ខណៈការផ្គត់ផ្គង់ការិយាល័យក្នុងតំបន់ពាណិជ្ជកម្មកណ្តាល(CBD) របស់ប្រទេសសិង្ហបុរីត្រូវបានគេរំពឹងថា នឹងនៅតែមានកម្រិតទាបក្នុងរយៈពេល២ឆ្នាំខាងមុខ ។

ក្រៅពីប្រទេសសិង្ហបុរី គេសង្កេតឃើញថា ប្រទេសហ្វីលីពីន និងប្រទេសជប៉ុនក៏បានជំរុញកំណើនទីផ្សារការិយាល័យក្នុងតំបន់អាសុីផងដែរ ខណៈតម្រូវការជួលការិយាល័យនៅប្រទេសទាំង២នេះបានហក់ឡើង៥៦ភាគរយ និង៥៥ភាគរយរៀងគ្នា៕ប្រភព: SCMP៕

ដោយ: គង់ លាងហួរ
អន្តរជាតិ: ក្រុមហ៊ុនអចលនទ្រព្យចិន Vanke បានប្រកាសពីការខាតបង់ក្នុងទំហំទឹកប្រាក់យ៉ាងច្រើនកាលពីឆមាសទី១ ទោះបីជាកន្លងមក ក្រុមហ៊ុនអភិវឌ្ឍន៍មួយនេះបានទទួលការគាំទ្រផ្នែកហិរញ្ញវត្ថុពីរដ្ឋបាលក្រុងសុិនជិនយ៉ាងណាក្តី។

ក្រុមហ៊ុន Vanke ដែលមានទីស្នាក់ការកណ្តាលនៅទីក្រុងសុិនជិន បានទទួលរងនូវការខាតបង់ចំនួន១២ពាន់លានយ័ន (ប្រហែល១,៦៧ពាន់លានដុល្លារអាមេរិក) ក្នុងរយៈពេល៦ខែដំបូង ឆ្នាំ២០២៥ បើធៀបនឹងការខាតបង់ចំនួន៩,៩ពាន់លានយ័នក្នុងរយៈពេលដូចគ្នាកាលពីឆ្នាំមុន។

វិបត្តិអចលនទ្រព្យនៅប្រទេសចិនបានបន្តដាក់សម្ពាធទៅលើក្រុមហ៊ុន Vanke ខណៈការលក់ផ្ទះ និងតម្លៃផ្ទះថ្មីបានបន្តធ្លាក់ចុះ។ ទោះជារដ្ឋបាលក្រុងសុិនជិនបានព្យាយាមបង្កើនការគាំទ្រផ្នែកហិរញ្ញវត្ថុយ៉ាងណាក្តី ក៏ក្រុមហ៊ុន Vanke នៅតែមិនអាចងើបចេញផុតពីបញ្ហាសាច់ប្រាក់។

ក្រុមអ្នកវិភាគនៅស្ថាប័ន Bloomberg Intelligence បានអះអាងថា ការគាំទ្រផ្នែកហិរញ្ញវត្ថុពីក្រុមហ៊ុន Shenzhen Metro ស្ថិតក្រោមការគ្រប់គ្រងរបស់រដ្ឋបាលក្រុងសុិនជិន ដែលជាម្ចាស់ភាគហ៊ុនធំជាងគេបំផុតរបស់ក្រុមហ៊ុន Vanke ទំនងជាមិនអាចជួយសម្រាលភាពតានតឹងផ្នែកសាច់ប្រាក់របស់ក្រុមហ៊ុននេះបានទេ។

ក្រុមហ៊ុនអចលនទ្រព្យ Vanke បានគូសបញ្ជាក់ថា ការខាតបង់ក្នុងទំហំទឹកប្រាក់យ៉ាងច្រើនសន្ធឹកសន្ធាប់បែបនេះបណ្តាលជា​ចម្បង​មក​ពី​ការ​ដាំក្បាលចុះ​នៃ​ការ​លក់​លំនៅដ្ឋាន និង​​ប្រាក់​ចំណេញ​ដុលសរុប។

ទំហំប្រាក់ចំណូល(Revenue) របស់ក្រុមហ៊ុន Vanke បានដាំក្បាលចុះ២៦ភាគរយមកនៅត្រឹមទំហំទឹកប្រាក់ចំនួន១០៥,៣ពាន់លានយ័ន។ ជាមួយគ្នានេះ ទំហំសាច់ប្រាក់សរុប (Total cash) បានធ្លាក់ចុះមកនៅត្រឹមចំនួន៦៩,៤ពាន់លានយ័ន។

ចំណែកឯ ចំនួនលំនៅដ្ឋាន ដែលមិនទាន់បញ្ចប់ការសាងសង់រួចរាល់របស់ក្រុមហ៊ុន Vanke មានទំហំទឹកប្រាក់ប្រហែល២៥៧ពាន់លានយ័នគិតត្រឹមដំណាច់ខែមិថុនា ឆ្នាំ២០២៥។

នៅឆ្នាំនេះ ក្រុមហ៊ុន Shenzhen Metro របស់រដ្ឋបាលក្រុងសុិនជិនបានផ្តល់ប្រាក់កម្ចីសរុបប្រមាណ២៣,៩ពាន់លានយ័ន ដើម្បីជួយដល់ក្រុមហ៊ុន Vanke ក្នុងការទូទាត់សងទាំងប្រាក់ដើម និងអត្រាការប្រាក់ចំពោះមូលបត្របំណុល ដែលក្រុមហ៊ុន Vanke បានបោះផ្សាយលក់ជាសាធារណៈ៕ប្រភព: Bloomberg៕

ដោយ: គង់ លាងហួរ
អន្តរជាតិ: ទីផ្សារអចលនទ្រព្យពាណិជ្ជកម្មរបស់ប្រទេសម៉ាឡេស៊ីត្រូវបានគេរំពឹងថា នឹងធ្លាក់ចុះ បន្ទាប់ពីការដំឡើងពន្ធលើការលក់ និងសេវាកម្ម (SST) បានចាប់ផ្តើមចូលជាធរមានកាលពីថ្ងៃទី១ ខែកក្កដា ឆ្នាំ២០២៥។នេះបើយោងតាមក្រុមហ៊ុនប្រឹក្សាអចលនទ្រព្យ JLL Malaysia ។

ការកំណត់ពន្ធលើសេវាកម្មក្នុងអត្រា៨ភាគរយត្រូវបានអនុវត្តន៍ចំពោះការជួលអចលនទ្រព្យពាណិជ្ជកម្ម ដូចជា ការិយាល័យ ផ្សារទំនើប ហាង និងឃ្លាំង។ ជាមួយគ្នានេះ អត្រាពន្ធ៦ភាគរយត្រូវបានបូកបន្ថែមទៅលើសេវាកម្មសំណង់ ដែលពីមុនត្រូវបានលើកលែងពន្ធ។

ក្រុមហ៊ុនប្រឹក្សាយោបល់អចលនទ្រព្យ JLL Malaysia បានព្យាករណ៍ថា ការដំឡើងពន្ធលើការលក់ និងសេវាកម្ម (SST) អាចធ្វើឱ្យតម្រូវការ និងតម្លៃជួលអចលនទ្រព្យពាណិជ្ជកម្មក្នុងប្រទេសម៉ាឡេសុីធ្លាក់ចុះ។

ម្យ៉ាងវិញទៀត ម្ចាស់អចលនទ្រព្យ និងបណ្តាអ្នកអភិវឌ្ឍន៍អាចផ្តល់ការលើកទឹកចិត្ត ឬការបញ្ចុះតម្លៃជួលបន្ថែមទៀត ក្នុងគោលបំណងដើម្បីទាក់ទាញអ្នកជួល។ ការវិនិយោគក៏អាចថយចុះផងដែរ ដោយសារតម្លៃ និងប្រាក់ចំណេញប្រែប្រួល។

ជាមួយគ្នានេះ បណ្តាអ្នកអភិវឌ្ឍន៍អាចប្រឈមមុខនឹងការកើនឡើងនៃថ្លៃដើមសំណង់ និងការថយចុះនូវប្រាក់ចំណេញ។ ចំណែក បណ្តាអ្នកវិនិយោគអាចប្រកាន់ជំហរប្រុងប្រយ័ត្នខ្ពស់ ដោយសារអត្រាផលចំណេញត្រឡប់ពីការវិនិយោគ(Yield)ថយចុះ។

លើសពីនោះ បណ្តាក្រុមហ៊ុនអភិវឌ្ឍន៍អចលនទ្រព្យមួយចំនួនអាចនឹងពន្យារពេលក្នុងការសាងសង់គម្រោងធំៗ ឬកាត់បន្ថយទំហំនៃគម្រោងវិនិយោគរបស់ពួកគេ៕ប្រភព: The Edge Malaysia៕

ដោយ: គង់ លាងហួរ
អន្តរជាតិ: រដ្ឋាភិបាលកូរ៉េខាងត្បូងបានប្រកាសឱ្យដឹងថា គ្រប់អតិថិជនបរទេសទាំងអស់ មិនថា បុគ្គលមកពីបរទេស ក្រុមហ៊ុនបរទេស និងអង្គភាពរបស់រដ្ឋាភិបាលបរទេស ត្រូវស្នើសុំការយល់ព្រមពីរដ្ឋបាលមូលដ្ឋានរបស់កូរ៉េខាងត្បូង មុនពេលទិញអចលនទ្រព្យនៅទីក្រុងសេអ៊ូល។

ចំណាត់ការខាងលើក៏អនុវត្តន៍ចំពោះសង្កាត់ចំនួន៧ក្នុងទីក្រុង Incheon ព្រមទាំងក្រុង-ស្រុកចំនួន២៣ ក្នុងខេត្ត Gyeonggi ជាប់រដ្ឋធានីសេអ៊ូល។នេះបើយោងតាមការចុះផ្សាយដោយសារព័ត៌មាន Korea Times។

វិធានការនេះមានគោលបំណងទប់ស្កាត់ការទិញអចលនទ្រព្យក្នុងគោលបំណងវិនិយោគដោយជនបរទេស និងការពារស្ថិរភាពទីផ្សារ។

គណៈកម្មាធិការរៀបចំផែនការទីក្រុងនៃក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនកូរ៉េខាងត្បូងបានអនុម័តច្បាប់ស្តីពីរបាយការណ៍ប្រតិបត្តិការអចលនទ្រព្យ។ ច្បាប់នេះបានចូលជាធរមានកាលពីថ្ងៃទី១៩ ខែសីហា ឆ្នាំ២០២៥។

យោងតាមច្បាប់ថ្មីបានចែងថា អតិថិជនបរទេសត្រូវតែផ្លាស់ចូលទៅរស់នៅក្នុងផ្ទះ ដែលខ្លួនបានទិញក្នុងរយៈពេល៤ខែ ក្រោយពេលទទួលបានការយល់ព្រមពីរដ្ឋបាល ឬអាជ្ញាធរមូលដ្ឋាន និងត្រូវស្នាក់នៅផ្ទះនោះឱ្យបានយ៉ាងតិច២ឆ្នាំ មុនពេលលក់ចេញ(Resale)។

ច្បាប់ថ្មីនេះអនុញ្ញាតឱ្យជនបរទេសអាចទិញអចលនទ្រព្យក្នុងតំបន់ទាំងឡាយណា ដែលអាជ្ញាធរបានកំណត់ប៉ុណ្ណោះ។ ជនបរទេសក៏ត្រូវរៀបចំផែនការហិរញ្ញប្បទាន និងបង្ហាញប្រភពមូលនិធិ និងប្រភេទទិដ្ឋាការរបស់ពួកគេ។

លោក Lee Sang-kyeong អនុរដ្ឋមន្ត្រី​ក្រសួង​ដែនដី​កូរ៉េខាងត្បូងបាន​អះអាង​ថា​ “វិធានការ​នេះមានគោលដៅដើម្បី​ទប់ស្កាត់​ការ​ទិញអចលនទ្រព្យក្នុងគោលបំណងវិនិយោគដោយ​​ជនបរទេស​នៅលើ​ដី​របស់​យើង​ ដោយ​ប្រើ​លុយ​បរទេស​ និងរំខាន​ដល់​ទីផ្សារ​អចលនទ្រព្យ​កូរ៉េខាងត្បូង”៕ប្រភព: Korea Times៕