ដោយៈ ចំណាន
ភ្នំពេញៈ រយៈពេល៥ទៅ១០ឆ្នាំខាងមុខ ប្រសិនជាកម្ពុជាសម្រេចបានគោលដៅ ក្លាយជាប្រទេសមានប្រាក់ចំណូលមធ្យមកម្រិតខ្ពស់ កម្ពុជានឹងក្លាយជាគោលដៅវិនិយោគជាថ្មី ដោយសារអំណាចនៃការទិញកើនឡើង។
ហេតុនេះសម្រាប់ការវិនិយោគរយៈពេល៥ ទៅ១០ឆ្នាំខាងមុខ អ្នកវិនិយោគគួរផ្តោតលើអចលនទ្រព្យមួយចំនួន ដូចជា ទី១ ផ្តល់អាទិភាពដល់ដីនៅជិតផ្លូវធំៗ ផ្លូវរង្វង់ មជ្ឈមណ្ឌលដឹកជញ្ជូន ឬតំបន់ឧស្សាហកម្ម។
ទី២ ផ្តោតលើដីដែលមានប្លង់រឹង និងផ្លូវច្បាប់ច្បាស់លាស់។ ទី៣ ស្វែងរកតំបន់ដែលទទួលបាន អត្ថប្រយោជន៍ពីកំណើនប្រជាជន ជាជាងពឹងផ្អែកតែលើការប្រកាសនាពេលអនាគត។ ទី៤ ជៀសវាងការបង់តម្លៃខ្ពស់បំផុត នៅក្នុងទីតាំងដែលមានភាពចាស់ទុំរួចហើយ លុះត្រាតែមានឱកាសអភិវឌ្ឍន៍ឡើងវិញច្បាស់លាស់។
ក្នុងចំណោមតំបន់ជាយក្រុងជុំវិញរាជធានីភ្នំពេញ ដូចជា សែនសុខ ឫស្សីកែវ ច្បារអំពៅ និងផ្នែកមួយចំនួននៃកំបូល/ដង្កោ ត្រូវបានគេមើលឃើញជាទូទៅថា មានទស្សនវិស័យរយៈពេលវែង ល្អជាងដីដែលមានលក្ខណៈហួសហេតុពេក។
អ្នកឧកញ៉ាសំ សុខនឿនប្រធានក្រុមប្រឹក្សាភិបាលសម្ព័ន្ធក្រុមហ៊ុនSAM SN Groupបានលើកឡើងកាលពីពេលថ្មីៗនេះថា ការវិនិយោគដីធ្លីពេលនេះ ជាការវិនិយោគរយៈពេលវែង ដែលហេតុនេះអ្នកវិនិយោគគួរសិក្សាលំហូរសាច់ប្រាក់ របស់ខ្លួនឲ្យបានត្រឹមត្រូវ ដោយបែងចែកលុយសន្សំ លុយគ្រួសារ និងលុយសម្រាប់វិនិយោគឲ្យបានច្បាស់លាស់។
អ្នកឧកញ៉ាបានបញ្ជាក់ថា “ការវិនិយោគដីធ្លីក្នុងចម្ងាយ៣០គីឡូម៉ែត្រពីរាជធានី មានឱកាសចំណេញខ្ពស់នាពេលអនាគត ធៀបជាមួយដីកណ្តាលក្រុង ដែលមានតម្លៃខ្ពស់រួចទៅហើយ”។
តាមការសិក្សានៅឆ្នាំ២០៣៥ ខាងមុខ រាជធានីភ្នំពេញនឹងមានមនុស្សរស់នៅ និងចេញចូលប្រចាំថ្ងៃប្រមាណ៤,៥លាននាក់ ដែលនឹងមានការផ្លាស់ប្តូរបែបផែននៃការរស់នៅ និងនគរូបនីយកម្មយ៉ាងខ្លាំង៕
