ដោយៈ គង់ សូរិយា

    ភ្នំពេញៈ តំណាងវិនិយោគិនអ៊ឺរ៉ុប បានបង្ហាញនូវចំណាប់អារម្ម​ណ៍ជាវិជ្ជមាន ដែលទទួលបានការយកចិត្តទុកដាក់ ពីរាជរដ្ឋាភិបាលកម្ពុជា។

ការបង្ហាញនេះ ធ្វើឡើង ក្នុងពេលលោកឧបនាយករដ្ឋមន្រ្តីស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា រួមជាមួយលោក Igor Driesmans ឯកអគ្គរដ្ឋទូត គណៈប្រតិភូសហភាពអឺរ៉ុបប្រចាំកម្ពុជា បានអញ្ជើញដឹកនាំកិច្ចសន្ទនាលើកទី៣ រវាងរដ្ឋនិងវិស័យឯកជន កម្ពុជា-សហភាពអ៊ឺរ៉ុប ដោយមានការចូលរួមពី លោក Gabriele Faja ប្រធានសភាពាណិជ្ជកម្មអឺរ៉ុបនៅកម្ពុជា(EuroCham) លោក Stefan Messerer ឯកអគ្គរដ្ឋទូតសាធារណរដ្ឋសហព័ន្ធអាល្លឺម៉ង់ប្រចាំនៅកម្ពុជា, តំណាងក្រសួង-ស្ថាប័នពាក់ព័ន្ធ, តំណាងក្រុមប្រឹក្សាធុរកិច្ចសហភាពអ៊ឺរ៉ុប-អាស៊ាន (EU-ABC) វិស័យឯកជន និងមន្ត្រីជំនាញជាច្រើនរូបកាលពីថ្ងៃម្សិលម៉ិញ។

តាមរយៈវេទិកានៃកិច្ចសន្ទនានាព្រឹកនេះ តំណាងវិនិយោគិនអ៊ឺរ៉ុបបានបង្ហាញនូវចំណាប់អារម្មណ៍ជាវិជ្ជមាន ដែលទទួលបានការយកចិត្តទុកដាក់ពីរាជរដ្ឋាភិបាលកម្ពុជា ដោយមានក្រុមប្រឹក្សាអភិវឌ្ឍន៍កម្ពុជា និងក្រសួងស្ថាប័នពាក់ព័ន្ធទាំងអស់ជាសេនាធិការ។

ជាមួយគ្នានេះ ពួកគេក៏បានបង្ហាញនូវសុទិដ្ឋិនិយមខ្ពស់ ចំពោះការទទួលស្តាប់ពីបញ្ហាប្រឈម និងការពិភាក្សាផ្លាស់ប្តូរយោបល់ ពិសេ​សជាមួយនឹងបទពិសោធន៍ ដែលធ្លាប់ទទួលបានការឆ្លើយតប ក៏ដូចជាដំណោះស្រាយនានា បន្ទាប់ពីបានលើកឡើង នៅកិច្ចប្រជុំទាំង២លើកកន្លងមក។

កិច្ចសន្ទនាលើកទី៣ រវាងរដ្ឋនិងវិស័យឯកជន កម្ពុជា-សហភាពអឺរ៉ុប នាព្រឹកនេះ បានប្រព្រឹត្តទៅដោយរលូនតាមរបៀបវារៈ ដែលបានគ្រោងទុក ដោយបានលើកយកប្រធានបទ ជាអាទិភាពមកពិភាក្សាយ៉ាងផុសផុល ពាក់ព័ន្ធនឹងបរិយាកាសវិនិយោគ និងការធ្វើធុរកិច្ចនៅកម្ពុជា របស់វិនិយោគិនអឺរ៉ុប សំដៅបន្តពង្រឹងវឌ្ឍនភាពដែលសម្រេចបាននៅក្នុងកិច្ចប្រជុំពីរលើកកន្លងមក។

លោកឧត្តមឧបនាយករដ្ឋមន្ត្រី បានសម្តែងនូវការស្វាគមន៍ទៅកាន់ ឯកឧត្តមឯកអគ្គរដ្ឋទូតនៃគណៈប្រតិភូ សហភាពអឺរ៉ុបប្រចាំកម្ពុជា លោកប្រធាន EuroCham ឯកឧត្តមឯកអគ្គរដ្ឋទូតប្រទេសអាល្លឺម៉ង់ប្រចាំនៅកម្ពុជា តំណាងក្រសួងស្ថាប័ន តំណាងវិស័យឯកជនអឺរ៉ុប ដែលបានអញ្ជើញ ចូលរួមយ៉ាងកុះករនាឱកាសនេះ និងបានថ្លែងអំណរគុណទៅកាន់វិនិយោគិន មកពីសហភាពអឺរ៉ុបទាំងអស់ ដែលបានសម្រេចចិត្តដាក់ទុនវិនិយោគនៅកម្ពុជា និងពង្រីកប្រតិបត្តិការធុរកិច្ច ក៏ដូចជាទំហំវិនិយោគរបស់ខ្លួនជាបន្តបន្ទាប់៕

ដោយៈ គង់ សូរិយា

    ភ្នំពេញៈ រដ្ឋាភិបាលតាមរយៈក្រសួងរៀបចំដែនដី និងក្រសួងសាធារណការ និងដឹកជញ្ជូន បានបើកកិច្ចប្រជុំពាក់ព័ន្ធនឹងការរៀបចំផែនទី បណ្ដាញផ្លូវក្នុងវិស័យសាធារ​ណការ និងដឹកជញ្ជូននៃព្រះរាជាណាចក្រកម្ពុជា។

កិច្ចប្រជុំកាលពីព្រឹកថ្ងៃទី២២ តុលាដឹកនាំដោយសហប្រធាននៃកិច្ចប្រជុំរួមមាន លោកយិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន ទទួលបន្ទុកកិច្ចការបច្ចេកទេសក្រសួងសាធារណការ និងដឹកជញ្ជូន និងលោកសួន សូផា រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ លើកិច្ចការពាក់ព័ន្ធនឹងការរៀបចំផែនទី បណ្ដាញផ្លូវក្នុងវិស័យសាធារ​ណការ និងដឹកជញ្ជូន នៃព្រះរាជាណាចក្រកម្ពុជា ដោយមានការចូលរួមពីមន្រ្តីពាក់ព័ន្ឋ។

ក្នុងជំនួបពិភាក្សានេះ បានផ្លាស់ប្តូរយោបល់ និងសិក្សាស្វែងយល់ពីគ្នាទៅវិញទៅមក ជុំវិញការប្រើប្រាស់ប្រព័ន្ធទិន្នន័យ ភូមិសាស្ត្រគោល នៃព្រះរាជាណាចក្រកម្ពុជា រវាងក្រសួងសាធារណការ និងដឹកជញ្ជូន និងក្រសួងរៀបចំដែនដី នគរូបនីយកម្ម និងសំណង់ ដែលកំពុងប្រើប្រាស់ ដើម្បីអភិវឌ្ឍផែនទីជាតិមួយ ដែលមានទិន្នន័យគ្រប់ជ្រុងជ្រោយ និងត្រឹមត្រូវ។

កិច្ចពិភាក្សាបានបង្ហាញពីការយល់ព្រមរួមគ្នា ក្នុងការបន្តសហការយ៉ាងជិតស្និទ្ធ រវាងក្រសួងសាធារណការ និងដឹកជញ្ជូន និងក្រសួងរៀបចំដែនដី នគរូបនីយកម្ម និងសំណង់ ដើម្បីពង្រឹងការផ្ទៀងផ្ទាត់ទិន្នន័យ និងអភិវឌ្ឍប្រព័ន្ធផែនទីជាតិ សម្រាប់ប្រើប្រាស់រួមរវាងក្រសួ​ង-ស្ថាប័នពាក់ព័ន្ធ៕

ដោយៈ គង់ សូរិយា

    ភ្នំពេញៈ រដ្ឋាភិបាលកម្ពុជាត្រូវការទុនវិនិយោគ ប្រមាណ៨៥០០ពាន់លានដុល្លារ ដើម្បីបញ្ចប់គម្រោងផ្លួវល្បឿនលឿនមុនឆ្នាំ២០៣៥។

ស្ថិតក្នុងចំណោមគម្រោងរយៈពេលខ្លី និងមធ្យមទាំង៣៥គម្រោង មានគម្រោងកំពុងដំណើរការចំនួន៧គម្រោង។ ដោយឡែកគម្រោងចំនួន១០ ត្រូវបានបញ្ចប់រួចរាល់។ មិនតែប៉ុណ្ណោះ មានគម្រោងចំនួន៦ ដែលគ្រោងនឹងអនុវត្តន៍ ដែលកំពុងធ្វើការសិក្សាបុរេសមិទ្ធិលទ្ធភាព ជ្រើសរើសក្រុមហ៊ុនដេញថ្លៃសាងសង់ ឬពុំទាន់មានកិច្ចសន្យា រួមមាន៖

(១). គម្រោងផ្លូវថ្មីបាត់ដំបង-សៀមរាប (ថវិកាកម្ចីភាគីចិន) ដែលកំពុងសិក្សាសមិទ្ធិលទ្ធភាព

(២). គម្រោងសាងសង់ផ្លូវក្រវាត់ក្រុងសៀមរាប (ថវិកាកម្ចីភាគីកូរ៉េ) ដែលកំពុងជ្រើសរើសក្រុមហ៊ុនទីប្រឹក្សាបច្ចេកទេស

(៣). គម្រោងផ្លូវល្បឿនលឿនភ្នំពេញ-សៀមរាប ប៉ោយប៉ែត (EXB និង EX5),

(៤) .គម្រោងសាងសង់ផ្លូវខ្សែក្រវាត់ក្រុងខ្សែទី២ តភ្ជាប់ពីស្ពានមិត្តភាព កម្ពុជា-កូរ៉េ (ផ្សាររាត្រី-អរិយក្សត្រ) ទៅផ្លូវល្បឿនលឿនភ្នំពេញ-បាវិត ដោយបានបង្កើតនូវក្រុមការងារ អនុវត្តគម្រោងរួចរាល់

(៥). គម្រោងសាងសង់ឡើងវិញផ្លូវជាតិលេខ៨ និង

(៦). គម្រោងផ្លូវជាតិលេខ៥០C និងស្ពានឆ្លងទន្លេសាប ខេត្តកំពង់ឆ្នាំង-កំពង់ធំ ដែលកំពុងស្ថិតក្នុងការសិក្សាសមិទ្ធិលទ្ធភាពដំបូង។

ផែនការមេនេះ មានចក្ខុវិស័យក្នុងការបន្តកែលម្អ និងអភិវឌ្ឍន៍ប្រព័ន្ធដឹកជញ្ជូន និងភស្ដុភារកម្ម ដោយផ្តោតលើការជំរុញការកសាងហេដ្ឋារចនាសម្ព័ន្ធរូបវន្ត និងអរូបវន្ត ឆ្ពោះទៅរកការអភិវឌ្ឍន៍ប្រព័ន្ធដឹកជញ្ជូនអន្តរមធ្យោបាយ មានការតភ្ជាប់ខ្ពស់ និងភាពប្រទាក់ក្រឡា ទាំងផ្ទៃក្នុងប្រទេស និងជាមួយតំបន់ ដែលនឹងបន្តរួមចំណែកជំរុញ និងទ្រទ្រង់កំណើនសេដ្ឋកិច្ចជាតិ ព្រមទាំងបំពេញសេចក្តីត្រូវការសង្គម-សេដ្ឋកិច្ចប្រកបដោយចីរភាព និងបរិយាប័ន្ន៕

(សៀងហៃ-ចិន)៖ លោក ម៉ាង ស៊ីណេត អភិបាលខេត្តព្រះសីហនុ នៅព្រឹកថ្ងៃទី២២ ខែតុលា ឆ្នាំ២០២៥ បានអញ្ជើញជួបសម្តែងការគួរសម និងពិភាក្សាការងារជាមួយតំណាងក្រុមហ៊ុន Shanghai Environmental Protection (Group) co., Ltd. ដែលជាបុត្តសម្ព័ន្ធក្រុមហ៊ុន China Water Investment Group Co., Ltd.។ ក្រុមហ៊ុននេះ ផ្តោតលើការគ្រប់គ្រងប្រតិបត្តិគម្រោងការពារបរិស្ថាន និងការបង្កើតបច្ចេកវិទ្យាថ្មី។

លោក ម៉ាង ស៉ីណេត បានឱ្យដឹងថា អាជីវកម្មស្នូលរបស់ក្រុមហ៊ុននេះគ្របដណ្តប់លើផ្នែកជាច្រើន រួមមាន៖ ការប្រព្រឹត្តកម្មទឹកកខ្វក់ ការប្រើប្រាស់ទឹកឡើងវិញ ការកែច្នៃ និងចាត់ចែងសំណល់រឹង ព្រមទាំងការចែកចាយ ថាមពលថ្មី។

សូមបញ្ជាក់ថា អភិបាលខេត្តព្រះសីហនុ ចាប់តាំពីថ្ងៃទី២១ ដល់ទី២២​ ខែតុលា ឆ្នាំ២០២៥ បានដឹកនាំគណៈប្រតិភូទៅទស្សនកិច្ចនៅប្រទេសចិន និងបានជួបសំដែងការគួសមជាមួយវិនិយោគគិន និងក្រុមហ៊ុ នរួមមាន៖

*ទី១៖ តំណាងក្រុមហ៊ុន Huangshi (Group) Dairy Co., Ltd. ដែលជាសហគ្រាសផលិតទឹកដោះគោរួមបញ្ចូលគ្នាឈានមុខគេមួយរបស់ប្រទេសចិន ដែលបានចុះបញ្ជីជាសាធារណៈនៅលើផ្សារហ៊ុន Shenzhen។

*ទី២៖ តំណាងក្រុមហ៊ុន Shanghai EnSiKai Investment (Group) Co., Ltd. ដែលជារោងចក្រផលិតរថយន្ត និងគ្រឿងចក្រដ៏សំខាន់មួយរបស់ប្រទេសចិន។ ក្រុមហ៊ុននេះផ្តោតលើការវិនិយោគសមធម៌ឧស្សាហកម្ម ការផលិតគ្រឿងម៉ាស៊ីន និងការរួមបញ្ចូលខ្សែសង្វាក់ផ្គត់ផ្គង់ធនធានមូលធនជាមួយនឹងជំនាញបច្ចេកទេស ដើម្បីជំរុញកំណើនឧស្សាហកម្មរយៈពេលវែង។

*ទី៣៖ តំណាងក្រុមហ៊ុន Zhongang Technology Co., Ltd. ដែលជាក្រុមហ៊ុនផលិតរថយន្តអគ្គិសនីដ៏ទូលំទូលាយដែលមានឯកទេសខាងម៉ូតូកង់បីអគ្គិសនី EVs ឧបករណ៍ប្រើប្រាស់ពន្លឺ និងរថយន្តចល័តដែលមានគោលបំណងពិសេស ក្រុមហ៊ុននេះរួមបញ្ចូលការរចនាយានយន្ត ការស្រាវជ្រាវ និងអភិវឌ្ឍន៍ ការផលិតគ្រឿងបន្លាស់ ក្រោមស្តង់ដាររថយន្តពេញលេញ។

*ទី៤៖ នៅថ្ងៃទី២២ ខែតុលា បានអញ្ជើញចូលរួមក្នុងវេទិកាជួបជុំជាមួយវិនិយោគិន ដែលកម្មវិធីនេះធ្វើឡើងក្នុងគោលបំណងបង្កើតបណ្តាញទំនាក់ទំនង ផ្សព្វផ្សាយកាលានុវត្តភាពវិនិយោគ និងទាក់ទាញវិនិយោគិនអន្តរជាតិ មកវិនិយោគនៅកម្ពុជា ជាពិសេសនៅក្នុងខេត្តព្រះសីហនុ៕

ដោយៈ គង់ សូរិយា

    ភ្នំពេញៈ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំំណង់ លោកសាយ សំអាល់បានលើកឡើងថា ផ្លូវជាតិទាំងអស់ចេញពីនៅភ្នំពេញ នឹងពង្រីកបន្ថែមនៅពេលអនាគត។

លោកបញ្ជាក់កាលពីចុងសប្តាហ៍មុនថា បន្ទាប់ពីពង្រីកហើយ ក្រុងភ្នំពេញ ប្រហែលជាមិនចាំបាច់មានភ្លើងស្តប់ចរាចរណ៍ទៀតទេ ខណៈបច្ចុប្បន្នក្រុងភ្នំពេញ កំពុងបង្កើតសួនច្បារសាធារណៈផងដែរ។

លោកបានបញ្ជាក់ថា “ការរៀបចំក្រុងបានត្រឹមត្រូវ អត្រាគ្រឿងញៀន ជំងឺទឹកនោមផ្អែម ចោរកម្ម នឹងថយចុះជាមិនខាន ព្រោះបញ្ហាទាំងនេះទាក់ទងនឹងលម្ហរសាធារណៈ”។ លោកបន្ថែមថា “ក្រុងដែលមិនមានលម្ហរសាធារណៈ គឺមានបញ្ហាជំងឺ គ្រឿងញៀន អំពើហិង្សា និងការបៀតបៀនជាដើម។ អ៊ីចឹងហើយបានជាយើងខ្ញុំ ប្រឹងប្រែងដោះស្រាយអគារមិនរៀបរយនិងអគារចាស់ទ្រុឌទ្រោម”។

លោកក៏បានលើកឡើងថា ប៉មស្ថានីយអង់តែនផ្សាយទូរទស្សន៍ជាតិកម្ពុជាដែលគេស្គាល់ជាទូទៅថា អង់តែនទួលគោកនៅខណ្ឌទួលគោក នឹងត្រូវរុះរើចេញ ដើម្បីពង្រីកផ្លូវក្នុងគោលបំណងកាត់បន្ថយការកកស្ទះចរាចរណ៍នៅទីនោះ ព្រោះបច្ចុប្បន្ននៅម្ដុំនោះមានការកកស្ទះចរាចរណ៍ជាខ្លាំង ដោយសារតែផ្លូវមានលក្ខណៈតូចចង្អៀត។

លោកបានលើកឡើងពីការចូលរួមរៀបចំក្រុង និងទីប្រជុំជន ដើ​ម្បីការរស់នៅ របស់ប្រជាជនមានភាពប្រសើរឡើង។

លោកបានបានបញ្ជាក់ថា លោកបានសហការជាមួយក្រសួងពាក់ព័ន្ធ ជាពិសេសក្រសួងព័ត៌មាន បានពិភាក្សាគ្នាលើការរុះរើប៉មអង់តែនទួលគោកចេញ ដើម្បីពង្រីកផ្លូវកាត់បន្ថយការកកស្ទះរំហូរចរាចរណ៍។

លោកខោល ផន អ្នកមើលការខុសត្រូវប៉មស្ថានីយអង់តែនផ្សាយទូរទស្សន៍ជាតិកម្ពុជាបាននិយាយថា លោកបានដឹងពីគម្រោងរុះរើប៉មអង់តែនទួលគោក ជាតម្រូវការរបស់រដ្ឋាភិបាល តែលោកមិនដឹងច្បាស់ពីពេលវេលាត្រូវរុះរើ និងរុះរើក្នុងគោលបំណងអ្វីដែរ។ លោកបន្ថែមថា ប៉មស្ថានីយអង់តែនផ្សាយទូរទស្សន៍ជាតិកម្ពុជា នឹងដំឡើងថ្មីនៅតំបន់ភ្នំរាបស្ថិតនៅខណ្ឌព្រែកព្នៅ។

ជាមួយគ្នានេះ លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) បានបង្ហាញការគាំទ្រ ចំពោះការរុះរើប៉មស្ថានីយអង់តែនផ្សា​យ​ទូរទស្សន៍ជាតិកម្ពុជា ដើម្បីពង្រីកផ្លូវកាត់បន្ថយការកកស្ទះចរាចរ​ណ៍នៅទីនោះ ព្រោះលោកបានកត់សម្គាល់ឃឃើញថា ផ្លូវម្ដុំនោះពិតជាមានការកកស្ទះចរាចរណ៍ខ្លាំងពិតមែន។

លោកបន្តថា “ប្រសិនបើមានរៀបចំពង្រីកផ្លូវនៅទីនោះ បានប្រសើរជាងស្ថានភាពបច្ចុប្បន្ន គឺជារឿងល្អទាំងការលើកកម្ពស់បរិស្ថាន ការកាត់បន្ថយការកក់ស្ទះចរចារណ៍ និងការរួមចំណែកកាត់បន្ថយគ្រោះថ្នាក់ចរាចរណ៍ទៀតផង”។

លោកបានបន្ថែមថា ការពង្រីកផ្លូវបែបនេះ គឺជាការងារដ៏សំខាន់មួយដែលស្របគ្នា នឹងការអនុវត្តផែនការសកម្មភាព កាត់បន្ថយគ្រោះថ្នាក់ចរាចរណ៍ដែលកំពុងទទួលជោគជ័យ ទោះអត្រាអ្នកស្លាប់និងរបួស ដោយសារគ្រោះថ្នាក់ចរាចរណ៍ នៅមានចំនួនខ្ពស់នៅឡើយក៏ដោយ ប៉ុន្តែវាមានការថយចុះជាងមុន៕