ដោយ: គង់ លាងហួរ
អន្តរជាតិ: នៅពេលយើងគិតអំពីការធ្វើដំណើរល្បឿនលឿន នោះយើងនឹងគិតមុនគេអំពីយន្តហោះ។ ប៉ុន្តែ យើងក៏នៅមានរថភ្លើងល្បឿនលឿនបំផុតមួយចំនួននៅលើពិភពលោក ដែលអាចសម្រេចបាននូវល្បឿនរហូតដល់៥០០ ទៅ៦០០គីឡូម៉ែត្រក្នុងមួយម៉ោង ដែលឈានជិតដល់ល្បឿនរបស់យន្តហោះផងដែរ។

នៅក្នុងអត្ថបទនេះ យើងនឹងបង្ហាញអំពីរថភ្លើងល្បឿនលឿនបំផុតទាំង៥ នៅលើពិភពលោកក្នុងឆ្នាំ២០២៣នេះ រួមជាមួយនឹងល្បឿនធ្វើដំណើររបស់រថភ្លើងទាំងនោះដូចខាងក្រោម

ទី១) រថភ្លើង L0 Series Maglev
L0 Series Maglev របស់ប្រទេសជប៉ុនបានបំបែកកំណត់ត្រាជារថភ្លើងល្បឿនលឿនបំផុតនៅលើពិភពលោក ដែលអាចធ្វើដំណើរបាន៦០៣គីឡូម៉ែត្រក្នុងមួយម៉ោង។រថភ្លើងនេះគ្រោងចាប់ផ្តើមសេវាដឹកអ្នកដំណើររបស់ខ្លួននៅឆ្នាំ២០២៧ខាងមុខ ហើយវានឹងគ្របដណ្តប់ការធ្វើដំណើរពីទីក្រុងតូក្យូ ទៅកាន់ទីក្រុងអូសាកា ក្នុងរយៈពេលត្រឹមតែ៦៧នាទីប៉ុណ្ណោះ។
ទី២). រថភ្លើង CRRC Qingdao Sifang 2021 Maglev
CRRC Qingdao Sifang 2021 Maglev គឺជារថភ្លើងបន្ទាប់ទី២ ដែលត្រូវបានដាក់បញ្ចូលក្នុងបញ្ជីរថភ្លើងល្បឿនលឿនបំផុតទាំង៥ របស់ពិភពលោក ក្នុងឆ្នាំ២០២៣នេះ ដែលមានល្បឿនធ្វើដំណើរបាន៦០០គីឡូម៉ែត្រ ក្នុងមួយម៉ោង។ គេរំពឹងថា រថភ្លើងនេះនឹងបើកដំណើរការនៅឆ្នាំ២០២៥ ហើយនឹងអាចផ្ទុកអ្នកដំណើរបានចន្លោះពី២០០នាក់រហូតទៅដល់១ពាន់នាក់។
ទី៣). រថភ្លើង TGV POS
រថភ្លើង TGV POS លេខ 4402 បានបំបែកកំណត់ត្រាពិភពលោកក្នុងឆ្នាំ២០០៧ នៅពេលរថភ្លើងនេះបានឈានដល់ល្បឿនអតិបរមា៥៧៤,៨គីឡូម៉ែត្រ នៅក្នុងមួយម៉ោង។ចំណែក នៅឆ្នាំ២០២៣នេះ វាជាប់ចំណាត់ថ្នាក់ជារថភ្លើងល្បឿនលឿនបំផុតទី៣ នៅលើពិភពលោក ហើយរថភ្លើងនេះក៏តភ្ជាប់ប្រទេសបារាំងទៅកាន់ប្រទេសអាល្លឺម៉ង់ និងប្រទេសស្វីសផងដែរ។ទី៤). រថភ្លើង CRH380A Hexie
CRH380A Hexie គឺជារថភ្លើងរបស់ចិនមួយផ្សេងទៀត ដែលត្រូវបានដាក់បង្ហាញក្នុងចំណោមរថភ្លើងល្បឿនលឿនបំផុតរបស់ពិភពលោក ដែលអាចដំណើរការក្នុងល្បឿនជាង៤៨២,៨០គីឡូម៉ែត្រ ក្នុងមួយម៉ោង។ រថភ្លើង CRH380A Hexie មិនផ្អែកលើការឌីហ្សាញបរទេសនោះទេ ប៉ុន្តែមានការចោទប្រកាន់ខ្លះមកថារថភ្លើង នេះផ្អែកលើបច្ចេកវិទ្យា Shinkansen ដោយគ្មានអាជ្ញាប័ណ្ណ។

ទី៥).រថភ្លើង Shanghai Maglev
Shanghai Maglev ធ្លាប់ជារថភ្លើង Maglev ល្បឿនលឿនបែបពាណិជ្ជកម្មដំបូងគេ នៅលើពិភពលោក។ រថភ្លើងនេះដំណើរការនៅក្នុងទីក្រុងសៀងហៃ ប្រទេសចិន និងអាចមានល្បឿនធ្វើដំណើរបានរហូតដល់៤៣១គីឡូម៉ែត្រនៅក្នុងមួយម៉ោង ៕

ដោយ: គង់ លាងហួរ

សេអ៊ូល: ក្រុមនិយតករហិរញ្ញវត្ថុបានអះអាងថា ប្រទេសកូរ៉េខាងត្បូង នឹងបន្ធូរបន្ថយបទប្បញ្ញត្តិកម្ចី សម្រាប់ម្ចាស់ផ្ទះដែលមានការលំបាក ក្នុងការសងប្រាក់បញ្ញើJeonse ដល់អ្នកជួលសម្រាប់រយៈពេលមួយឆ្នាំ ដោយចាប់ផ្តើមពីថ្ងៃព្រហស្បតិ៍នេះទៅ។

Jeonse សំដៅទៅលើគម្រោងជួលផ្ទះ របស់ប្រទេសកូរ៉េខាងត្បូង ដែលជាធម្មតាអ្នកជួលត្រូវដាក់ប្រាក់បញ្ញើ មានតម្លៃរហូតដល់៧០ភាគរយនៃតម្លៃផ្ទះ ដើម្បីរស់នៅដោយមិនបង់ថ្លៃជួល រយៈពេល២ឆ្នាំ រហូតដល់ម្ចាស់ផ្ទះទូទាត់សងប្រាក់ពេញ។

គណៈកម្មការសេវាកម្មហិរញ្ញវត្ថុបានអះអាងថា យោងតាមបទប្បញ្ញត្តិ ដែលត្រូវបានបន្ធូរបន្ថយនេះមានន័យថា សមាមាត្របំណុលធៀបទៅនឹងប្រាក់ចំណូល (DTI) ចំនួន៦០ភាគរយ នឹងដាក់ជំនួសការរឹតបន្តឹងសមាមាត្របំណុល ធៀបទៅនឹងសេវាកម្ម (DSR) ខណៈសមាមាត្រជួលធៀបទៅប្រាក់ចំណូល (RTI) នឹងត្រូវបានបន្ទាបចុះទៅដល់១០០ភាគរយ បើធៀបនឹងអត្រាបច្ចុប្បន្នចន្លោះពី១២៥ ទៅ១៥០ភាគរយ។វិធានការបណ្ដោះអាសន្ននេះ ធ្វើឡើងស្របពេលដែលមានការដាំក្បាលចុះយ៉ាងខ្លាំង នៃតម្លៃផ្ទះនៅប្រទេសកូរ៉េខាងត្បូង ដែលបាននាំឱ្យម្ចាស់ផ្ទះជាច្រើនមានបញ្ហា ក្នុងការខកខានបង់ថ្លៃប្រាក់បញ្ញើរបស់អ្នកជួល ព្រមទាំងបង្កើតឱ្យមានការព្រួយបារម្ភ អំពីទីផ្សារហិរញ្ញវត្ថុ និងការព្រួយបារម្ភអំពីផលប៉ះពាល់សង្គម។

គណៈកម្មការសេវាកម្មហិរញ្ញវត្ថុ វិធានការនេះមានគោលបំណងកាត់បន្ថយការប៉ះទង្គិចទីផ្សារ ឱ្យដល់កម្រិតអប្បបរមា ហើយអាជ្ញាធរនឹងធានាថា ពួកគេមិនបណ្តាលឱ្យមានផលប៉ះពាល់ ដូចជា ការកើនឡើងនៃបំណុលគ្រួសារនោះទេ៕

ដោយ: គង់ លាងហួរ
ភ្នំពេញ: ក្រសួងសាធារណការ និងដឹកជញ្ជូនកម្ពុជា កំពុងចាត់វិធានការកែលម្អការដឹកជញ្ជូនកសិផលកម្ពុជាទៅកាន់ទីផ្សារនៃប្រទេសចិន ដោយប្រើប្រាស់ផ្លូវដែកល្បឿនលឿនតភ្ជាប់ប្រទេសឡាវ និងប្រទេសចិន។

ក្រសួងបានបន្តអះអាងថា ផ្លូវដែលកម្ពុជាដឹកទំនិញឆ្លងកាត់តាមប្រទេស ថៃ និងវៀតណាម បច្ចុប្បន្នកំពុងបង្ក ជាបញ្ហាប្រឈម និងបង្កើនការចំណាយសម្រាប់ពាណិជ្ជករ។
នេះបើយោងតាមការចុះផ្សាយដោយសារពត៌មាន Laotian Times នៅថ្ងៃសុក្រ ទី២៨ ខែកក្កដា ឆ្នាំ២០២៣នេះ។

លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ថា អ្នកវិនិយោគ និងទីប្រឹក្សាចិនជាច្រើនបានសម្តែងក្តីព្រួយបារម្ភអំពីការកើនឡើងនៃការចំណាយ និងភាពស្មុគស្មាញ ក្នុងការប្រើប្រាស់ប្រទេសជិតខាងជាផ្លូវឆ្លងកាត់សម្រាប់ដឹកទំនិញទៅកាន់ប្រទេសចិន។ដើម្បីឆ្លើយតបនឹងបញ្ហានេះ ក្រសួងកំពុងសម្របសម្រួលផែនការដើម្បីជួយសម្រួលដល់អ្នកវិនិយោគចិនក្នុងការដឹកជញ្ជូនទំនិញកសិកម្មកម្ពុជាទៅកាន់ប្រទេសចិនតាមរយៈប្រទេសឡាវ ដោយប្រើប្រាស់សេវាកម្មរថភ្លើងល្បឿនលឿនថ្មីរបស់ប្រទេសនេះ។ផ្លូវដែលត្រូវបានស្នើឡើងនឹងចាប់ផ្តើមក្នុងរាជធានីភ្នំពេញ និងឆ្លងកាត់ខេត្តកំពង់ចាមត្បូងឃ្មុំ ក្រចេះ និង ស្ទឹងត្រែង មុននឹងឈានចូលទៅកាន់ប្រទេសឡាវ និងបន្តទៅកាន់ប្រទេសចិន ។

លោក គង់ វិមាន បានសង្កត់ធ្ងន់ថា ប្រទេសកម្ពុជា ឡាវ និងចិន បានបង្កើតនីតិវិធី និងកិច្ចព្រមព្រៀងដឹកជញ្ជូនឆ្លងកាត់ព្រំដែនរួចមកហើយ ដោយអាចធានាបាននូវលំហូរទំនិញយ៉ាងរលូន។

តាមរយៈការជ្រើសរើសផ្លូវដែកល្បឿនលឿនតភ្ជាប់ប្រទេសឡាវ និងចិន ជាផ្លូវពាណិជ្ជកម្មថ្មី ក្រុមហ៊ុនចិនរំពឹងថា វានឹងអាចជួយកាត់បន្ថយដល់ការចំណាយ និងបទពិសោធន៍នីតិវិធីសាមញ្ញ មិនដូចឧបសគ្គដែលជួបប្រទះនៅពេលប្រើប្រាស់ផ្លូវថៃ និងវៀតណាមនោះទេ៕

ដោយៈ តែម សុខុម

អូសាកា: ក្រុមវិនិយោគិនសិង្ហបុរី កំពុងសម្រុកទិញអចលនទ្រព្យក្នុងប្រទេសជប៉ុន ខណៈប្រាក់យ៉េនធ្លាក់ថ្លៃ និងមានការរំពឹងទុកថានឹងសម្រេចបានកំណើន ដែលជំរុញដោយវិស័យទេសចរណ៍ក្នុងក្រុងអូសាកា (Osaka) ដែលជាទីក្រុងធំបំផុតទី២ របស់ជប៉ុន។

ភ្នាក់ងារអចលនទ្រព្យអន្តរជាតិ FM Investment និយាយថា ខ្លួន បានមើលឃើញការសាកសួរព័ត៌មាន អចលនទ្រព្យបានកើនឡើង៥ខ្ទង់ចាប់តាំងពីប្រទេសជប៉ុន បើកព្រំដែនរបស់ខ្លួនក្នុងខែតុលា ដោយក្នុងនោះសិង្ហបុរី គ្របដណ្ដប់៧០%នៃការសាកសួរព័ត៌មានចំនួន៨០០នៅចន្លោះពីខែមេសា ដល់ខែមិថុនា ហើយបន្ទាប់មកគឺហុងកុង។ការលក់អចលនទ្រព្យ នៅក្នុងត្រីមាសទី២ បានកើនឡើងទ្វេដងបើធៀបនឹងការលក់ក្នុងឆ្នាំ២០២២ទាំងមូល។
ប្រាក់យ៉េន របស់ជប៉ុន បានធ្លាក់ថ្លៃប្រមាណ៨%ធៀបនឹងដល្លារសិង្ហបុរី និងដុល្លារហុងកុង ក្នុងឆ្នាំនេះ ដោយបង្កើនអំណាចនៃការទិញរបស់អ្នកវិនិយោគអចលនទ្រព្យ ដែលកំពុងស្វែងរកទិញអចលនទ្រព្យធូរថ្លៃនៅក្រៅសិង្ហបុរី និងហុងកុង ដែលជាទីផ្សារថ្លៃបំផុតនៅតំបន់អាស៊ី-ប៉ាស៊ីហ្វិក។បណ្ដាភ្នាក់ងារអចលនទ្រព្យនិយាយថា អ្នកទិញបានចាប់អារម្មណ៍ ជាពិសេសលើក្រុងអូសាកា ទីដែលគេគ្រោងរៀបចំពិព័រណ៍ពិភពលោក (World Expo) បន្ទាប់នៅឆ្នាំ២០២៥ ហើយកាស៊ីណូ និងរីហ្សតមួយ គ្រោងនឹងបើកដំណើរការនៅឆ្នាំ២០២៩។

លោក ជែសុន ឡាំ (Jason Lam) សហស្ថាបនិក និងជានាយកគ្រប់គ្រងក្រុមហ៊ុនអចលនទ្រប្យ Japan Hana Real Estate ដែលមានការិយាល័យនៅក្រុងហុងកុង ក្រុងតូក្យូ និងក្រុងអូសាកា លើកឡើងថា “គម្រោងកាស៊ីណូ និងរីហ្សតនេះ នាំមកនូវការផ្លាស់ប្ដូរដ៏ពិតប្រាកដៗ”។លោកបានបន្ថែមទៀតថា ការលក់អចលនទ្រព្យ បានកើនឡើងទ្វេរដង ចាប់តាំងពីប្រទេសជប៉ុន បើកព្រំដែនឡើងវិញស្វាគមន៍ភ្ញៀវទេសចរកាលពីខែតុលា ហើយការសាកសួរព័ត៌មាន អចលនទ្រព្យពីសំណាក់ប្រទេសសិង្ហបុរី បានកើនឡើង៣ដង។លោកគូសបញ្ជាក់ថា ពិព័រណ៍ពិភពលោក ដែលជាព្រឹត្តិការណ៍អន្តរជាតិ បានរៀបចំឡើងរៀងរាល់៥ឆ្នាំម្តង និងគម្រោងកាស៊ីណូ និងរីហ្សតខាងលើនេះ ត្រូវបានរំពឹងថានឹងជំរុញទេសចរណ៍ ព្រមទាំងតម្រូវការលំនៅដ្ឋាន និងកន្លែងស្នាក់នៅ សម្រាប់ភ្ញៀវទេសចរផងដែរ។ក្រុមហ៊ុន MGM Resorts International កំពុងចាប់ដៃគូជាមួយក្រុមហ៊ុនសេវាកម្មហិរញ្ញវត្ថុជប៉ុន Orix លើគម្រោងនេះ ដែលនឹងមានសណ្ឋាគារ កន្លែងកម្សាន្ត និងមជ្ឈមណ្ឌលសន្និសីទ ហើយនឹងប្រកួតប្រជែងដណ្ដើមភ្ញៀវ ពីបណ្ដាប្រទេសជិតខាងក្នុងតំបន់អាស៊ី ដូចជាកូរ៉េខាងត្បូង និងសិង្ហបុរី ព្រមទាំងម៉ាកាវ ផងដែរ។

អាជ្ញាធរក្រុងអូសាកា ប៉ាន់ប្រមាណថា ខ្លួនអាចទាក់ទាញភ្ញៀវទេសចរ បានប្រមាណ២០លាននាក់ក្នុងមួយឆ្នាំ ដែលជួយឱ្យប្រទេសជប៉ុន សម្រេចគោលដៅរយៈពេលវែង ក្នុងការទាក់ទាញភ្ញៀវទេសចរបរទេសប្រចាំឆ្នាំ ឱ្យបាន៦០លាននាក់នៅត្រឹមឆ្នាំ២០៣០។ នេះបើយោងតាមការលើកឡើងរបស់លោកស្រី Angela Hanlee អ្នកវិភាគមកពីសារព័ត៌មានដ៏ល្បីល្បាញ Bloomberg៕ Japan Times៕

ដោយៈ ជេស៊ីកា

        ភ្នំពេញៈ អនុរដ្ឋ​មន្ត្រី​ការប​រទេស ​នៃ​បក្ស​កុម្មុយ​នីស្តបានឲ្យដឹងថា​រដ្ឋាភិបាលចិន បាន​សន្យា​បន្ត​ជួយ​កម្ពុជា​ក្នុង​កិច្ច​អភិ​វឌ្ឍន៍ ការ​បន្ត​ផ្តល់ជំ​នួយ ​ក្នុងន័យ​លើកក​ម្ពស់​ជីវភាព​ប្រជា​ជន​កម្ពុជា ហើយ​ចិន​ប្តេជ្ញា​គាំទ្រ​ជា​និរន្ដរ៍ ​ចំពោះ​អធិប​តេយ្យ​ភាព​ និង​សេចក្តី​ថ្លៃ​ថ្នូរ​កម្ពុជា​ផង​ដែរ​។

ភាគី​ទាំង​២​ក៏​បាន​ប្តេជ្ញា ​ធ្វើឱ្យ​ស៊ីជ​ម្រៅ​បន្ថែម​ទៀត​ នូវ​កិច្ច​សហប្រតិ​បត្តិការ​ ភាព​ជា​ដៃគូ​យុទ្ធ​សាស្ត្រ​គ្រប់​ជ្រុង​ជ្រោយ​ ដែល​មាន​ស្រា​ប់​ក្នុង​បរិ​បទ​យុគ​សម័យ​ថ្មី​។​ការ​សន្យា​របស់​ភាគី​ចិន​ធ្វើ​ឡើង ​ក្នុង​ជំ​នួប​សម្តែង​ការ​គួរសម​រវាង​រដ្ឋ​មន្ត្រី​ការប​រទេស​កម្ពុ​ជា និង​ជា​ប្រធាន​គណៈ​កម្មាធិការ​ម​ជ្ឈិ​ម​បក្ស​ប្រជា​ជន​កម្ពុជា ​លោក​ប្រាក់ សុខុន ​និង​អនុ​រដ្ឋមន្ត្រីក្រ​សួង​ទំនាក់​ទំនង​អន្តរជាតិ​នៃ​បក្ស​កុម្មុយ​នីស្ត​ចិន លោក ​ឈាន ​ហុង​សាន ​នា​ទីស្តីកា​រ​ក្រសួងកា​រប​រទេស​កម្ពុជា​ ថ្ងៃទី​២៤​ ខែកក្កដា​។ នេះ​បើ​យោង​តាម​សេចក្តី​ប្រកាស​ព័ត៌មាន​ពី​ក្រសួង​ការ​បរទេស​។​ក្នុង​ជំនួប​នេះ ​លោក​ឈាន ហុង​សាន បា​ន​អបអរ​ចំពោះ​កម្ពុជា​ពាក់​ព័ន្ធ​ដំណើរ​ការ​រៀប​ចំការ​បោះឆ្នោ​ត ដែលមា​ន​ភាព​រលូន​ សណ្តា​ប់​ធ្នាប់ សេរី យុត្តិ​ធម៌ តម្លា​ភាព និង​សន្តិ​វិធី ខណៈ​មាន​អ្នក​ចូលរួម​បោះ​ឆ្នោត​ក្នុង​អត្រា​ខ្ពស់​រហូត៨៤,​៥៨% ហើយ​លោក​ក៏បាន​កោត​សរសើរ​ពី​វ​ឌ្ឍ​នភាព​ផ្នែក​សេដ្ឋ​កិច្ច ​តាម​រយៈ​ការរីក​លូតលា​ស់ ​នៃ​ជីវភាព​ប្រជា​ជន​។ជា​មួយ​គ្នា​នេះ លោក​ឈាន ហុង​សាន បាន​លើក​ឡើង​ដែរ​ថា ចិន​បន្ត​គាំទ្រ​ជា​និ​រ​ន្ត​រ៍លើ​អធិបតេយ្យ​ សេចក្តី​ថ្លៃថ្នូរ​របស់​ក​ម្ពុ​ជា ព្រម​ទាំង​ស្វែងរ​ក​មាគ៌ា​អភិ​វឌ្ឍន៍ ដើម្បី​លើក​កម្ពស់​ជីវភាព​ប្រជា​ជន​កម្ពុជា ​និង​ស្រប​នឹង​លក្ខខ​ណ្ឌ​ពិសេស​របស់​កម្ពុជា​។​

លោក​ប្រាក់ សុខុន បាន​ថ្លែងអំ​ណរ​គុណ​ភាគី​ចិន​ ដែល​តែង​ជួយ​គាំទ្រ ​និង​ផ្តល់​ជំនួយ​អភិ​វឌ្ឍន៍​ ដ៏​ធំធេង​ជាច្រើ​ន​ដល់​កម្ពុជា ដែល​បាន​ចូលរួ​មចំណែក​ ដល់​ការកសា​ង​​សេដ្ឋកិ​​ច្ច សង្គម និង​ហេដ្ឋារ​ចនាស​ម្ព័ន្ធ​នៅ​កម្ពុជា​។​លោកបានបញ្ជាក់ថា “​តួនាទី​ដ៏​សំខាន់​របស់​ចិន ដែល​ឈានមុ​ខ​គេ​ក្នុង​នាម​ជា​ម្ចាស់ជំនួយ​ ដៃ​គូ​ពាណិជ្ជ​កម្ម អ្នក​វិនិយោគ និង​ប្រភព​នៃ​អ្នក​ទេសចរ​នៅ​កម្ពុជា ត្រូវបា​ន​ទទួល​ស្គាល់”​។​ក្នុងជំនួបនោះ ភាគី​ទាំង​២ បាន​ពិភាក្សា​ស្វែងរ​ក​មធ្យោ​បាយ​ដើម្បី​បង្កើន​កិច្ច​សហ​ប្រតិ​បត្តិ​ រវាង​គណ​បក្សកា​ន់អំណាច​ ដែល​ដឹកនាំ​ប្រទេស​​ទាំង​​២ ពោលគឺ​រវាង​គណ​បក្ស​ប្រជាជន​កម្ពុជា​(CPP) និង​គណបក្ស​កុម្មុយនី​ស្ត​ចិន​(CPC) លើ​ផ្នែក​អភិ​បាល​កិច្ច ​ការ​អប់រំ ការ​គាំទ្រ សម្រាប់​សហ​គ្រិន និង​អ្នក​ដឹក​នាំ​វ័យ​ក្មេង ​រួមទាំង​ការ​ផ្លាស់​ប្តូរ​វប្ប​ធម៌​។​

លើសពី​នេះ ​ភាគី​ទាំង​២ បាន​ប្តេជ្ញា​រៀងៗ​ខ្លួន​ជា​ថ្មី ក្នុង​ការ​ជំរុញ​ឱ្យ​មាន​ភាព​ស៊ី​ជម្រៅ​បន្ថែម​ទៀត​ នូវ​កិច្ច​សហ​ប្រតិ​បត្តិ​ការ​ភាព​ជា​ដៃគូ​យុទ្ធសា​ស្ត្រ​គ្រប់​ជ្រុង​ជ្រោយ ​ខណៈ​រួមគ្នា​កសាង​សហ​គមន៍​វាសនា​រួម​កម្ពុជា​-​ចិន​ ប្រកប​ដោយ​កម្រិត​ខ្ពស់ ​គុណភា​ព​ខ្ពស់ និង​ស្តង់​ដា​ខ្ពស់​។​

កាលពីសប្តាហ៍មុន ឯកអគ្គរដ្ឋទូតចិនប្រចាំកម្ពុជា លោកវ៉ាង វិនធានក៏បានលើកឡើងផងដែរថា ប្រទេសចិននឹងបន្តជួយជ្រោមជ្រែង​កម្ពុជា ក្នុងការកសាងសហគមន៍ នៃជោគជោគវាសនារួម រវាងប្រទេសទាំងពីរក្នុងរយៈពេល១០ឆ្នាំបន្តទៀត ដែលវានឹងនាំមកនូវការរីកចម្រើនសេដ្ឋកិច្ចកម្ពុជា និងវិបុលភាពសម្រាប់ប្រទេសនេះ។អគ្គ​លេខាធិ​ការ​រាជ​បណ្ឌិត្យ​សភាក​ម្ពុជា លោកបណ្ឌិតយ៉ង់ ពៅបានមានប្រសាសន៍ថា ទំនាក់​ទំនង​កម្ពុជា​ ចិន កា​ន់​តែ​ស្អិត​ល្មួត​រហូត​ដល់​កិច្ច​សហ​ប្រ​តិបត្តិការ​ត្បូង​ពេ​ជ្រ ​នៅ​ឆ្នាំ​២០២៣នេះ​ ដោយ​ប្រទេស​ទាំង​២ មាន​ទំនាក់​ទំនង​ល្អ​ ជា​យូ​រលង់​ស្រាប់​រយៈ​ពេល​៦៥ឆ្នាំ ហើយ​ជំនួប​រវាង​អនុរ​ដ្ឋមន្ត្រី​ ការ​បរទេស​បក្ស​កុម្មុយ​នីស្ត​ចិន ​និង​រដ្ឋ​មន្ត្រី​ការ​បរ​ទេស​កម្ពុជា នៅ​ក្រោយ​ការ​បោះឆ្នោ​ត​នេះ កាន់តែ​​បញ្ជាក់​បន្ថែម​ទៀត​។​

លោក​បន្តថា “​ទំនាក់ទំ​នង​ស្អិត​ល្មួត​រវាង​ប្រទេស​ទាំង​២ នេះ​ស្តែង​ឡើង ​តាមរ​យៈ​ការជួ​យជ្រោ​មជ្រែង​គ្នាក្នុង​ផ្នែក​ការ​ទូត​។ នៅ​ក្នុង​សេដ្ឋកិច្ច ក៏​ដូច​គ្នា​ដែរ ​ហើយ​ទៅលើ​ការ​អភិវឌ្ឍ​នៅ​កម្ពុជា​វិញ ក​ម្ពុជា​មិនអាច​កាត់​ផ្តាច់​ជំនួយ​ពី​ចិន​”​។លោកបណ្ឌិតយ៉ង់ ពៅបានបន្តទៀតថា កម្ពុជា​បាន​ស្គាល់​ពីសម្ទុះ​ការ​អភិវឌ្ឍ​សេដ្ឋកិច្ច និង​ហេដ្ឋារ​ច​នាសម្ព័ន្ធ​រូប​វន្ត​។​ ក​ម្ពុជា​ផ្អែកលើ​​ផលប្រយោជ​ន៍​ជាតិ ​នៅក្នុង​ទំនាក់​ទំនង​ការ​ទូត​ជា​គោល ​ដែល​មិន​ផ្អែក​តែ​ទៅ​លើ​ចិន​នោះទេ​ ខណៈ​កម្ពុជា​តែង​ប្រកាន់​យក​នយោបា​យ​ការទូត​ចម្រុះ​ពណ៌ ​ហើយ​តែង​បើក​ភ្លើង​ខៀវ ​សម្រាប់​ប្រទេស​ដទៃ​។លោកបញ្ជាក់​ថា “​កម្ពុជា​ស្និទ្ធ​ស្នាល​ជា​មួយ​ចិន ​ពីព្រោះ​ចិន​ផ្តល់​ប្រយោជន៍​ធំ​ដល់​កម្ពុជា​”។កម្ពុជា​និង​ចិន​បាន​ឈាន​ដល់​កម្រិត ​ទំនាក់​ទំនង​​ត្បូង​ពេ​ជ្រ​ក្នុង​ឆ្នាំ​២០២៣​នេះ​ នៅក្នុង​ខួប​អ​នុ​ស្សា​វ​រី​យ៍​ការទូ​ត​ លើក​ទី​៦៥ឆ្នាំ​នៃ​ប្រទេស​ទាំង​២៕

ដោយ: គង់ លាងហួរ

ភ្នំពេញ: យោងតាមសេចក្តីថ្លែងការណ៍ របស់រដ្ឋលេខាធិការដ្ឋានអាកាសចរស៊ីវិល នៅថ្ងៃព្រហស្បតិ៍នេះ បានឱ្យដឹងថា អាកាសយានដ្ឋានអន្តរជាតិសៀមរាប-អង្គរ ដែលស្ថិតនៅភាគពាយព្យនៃខេត្តសៀមរាប នឹងចាប់ផ្តើមប្រតិបត្តិការនៅក្នុងខែតុលាខាងមុខនេះ។

នេះបើយោងតាមការចុះផ្សាយឱ្យដឹង ដោយសារពត៌មាន Xinhua នៅថ្ងៃព្រហស្បតិ៍ ទី២៧ ខែកក្កដា ឆ្នាំ២០២៣កន្លងមកនេះ។សេចក្តីថ្លែងការណ៍ខាងលើបានបន្តថា ព្រលានយន្តហោះនេះគ្រោងនឹងបើកសម្រាប់ប្រតិបត្តិការ ចាប់ពីថ្ងៃទី១៦ ខែតុលា ឆ្នាំ២០២៣នេះតទៅ។សេចក្តីថ្លែងការណ៍ដដែលបានឱ្យដឹងទៀតថា អាកាសយានដ្ឋានអន្តរជាតិសៀមរាបអង្គរនឹងរៀបចំ និងដំណើរការជើងហោះហើរសាកល្បងមិនមែនពាណិជ្ជកម្ម និងមិនរកផលចំណេញមួយចំនួនចាប់ពីថ្ងៃទី៥ រហូតដល់ថ្ងៃទី១៥ ខែតុលា។លើសពីនេះ ជើងហោះហើរពាណិជ្ជកម្មទាំងអស់ និងទំនិញនៅអាកាសយានដ្ឋានអន្តរជាតិសៀមរាបចាស់ នឹងត្រូវផ្ទេរទាំងស្រុងទៅកាន់អាកាសយានដ្ឋានអន្តរជាតិ សៀមរាប-អង្គរចាប់ពីថ្ងៃទី ១៦ ខែតុលា។

អាកាសយានដ្ឋានអន្តរជាតិសៀមរាបអង្គរ ត្រូវបានវិនិយោគដោយក្រុមហ៊ុន Angkor International Airport Investment (Cambodia) Co., Ltd.។លោក តឹករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រី និងជាប្រធានគណៈកម្មាធិការដឹកនាំ ការសាងសង់អាកាសយានដ្ឋានអន្តរជាតិសៀមរាប-អង្គរ បានមានប្រសាសន៍ថា អាកាសយានដ្ឋាននេះ ជាអាកាសយានដ្ឋានអន្តរជាតិកម្រិត4E ដែលមានផ្លូវរត់ប្រវែង៣.៦០០ម៉ែត្រ និងអាចទទួលការចុះចតបាន នូវយន្តហោះគ្រប់ប្រភេទ។ លោកបានបន្ថែមទៀតថា “វាជាសមិទ្ធិផលថ្មីមួយទៀត ដែលមិនត្រឹមតែរួមចំណែកយ៉ាងសំខាន់ ក្នុងការអភិវឌ្ឍវិស័យទេសចរណ៍ និងសេដ្ឋកិច្ចរបស់កម្ពុជាប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍ដោយផ្ទាល់ទៅដល់ប្រជាជន ដែលរស់នៅជុំវិញតំបន់នេះផងដែរ”៕