ដោយៈ គង់ សូរិយា
ភ្នំពេញៈ អ្នកជំនាញបាននិងកំពុងមើលទៅភាគខាងកើត នៃរាជធានីភ្នំពេញ ប្រកបដោយសុទិដ្ឋិនិយមជាងមុន ដោយសារការកសាង និងត្រៀមវិនិយោគហេដ្ឋារចនាសម្ព័ន្ឋធំៗ។

អគ្គនាយកក្រុមហ៊ុនCentury21 Mekong និងជាអតីតប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងនាព្រឹកថ្ងៃទី១៧ កក្កដានេះថា តំបន់ភាគខាងកើករាជធានីភ្នំពេញ នឹងមានសក្តានុពលខ្លាំង ដោយសារការតភ្ជាប់ លើការអភិវឌ្ឍន៍ទីក្រុងរណបកោះនរា របស់ក្រុមហ៊ុនOCIC ការសាងសង់ទីក្រុងអរិយក្សត្រ និងគំរោងហេដ្ឋារចនាសម្ព័ន្ឋជាច្រើនទៀត។លោកបន្តថា “ការសាងសង់ហេដ្ឋារចនាសម្ព័ន្ឋ កំពុងដំណើរការបន្តិចម្តងៗ ខណៈស្ពានមិត្តភាពកម្ពុជា កូរ៉េនឹងត្រៀមសាងសង់នាពេលខាងមុខ នឹងជួយលើកកំពស់សក្តានុពលតំបន់នេះបន្ថែមទៀត”។លោកបន្តថា “លើសពីនេះ ការសាងសង់ផ្លូវល្បឿនលឿនភ្នំពេញ បាវិត ក៏បាននិងកំពុងជួយលើកកំពស់ក្តានុពលតំបន់នេះផងដែរ”។
ទោះជាយ៉ាងណាតម្លៃដីធ្លីនៅតំបន់នេះ ស្ថិតនៅសភាពទ្រឹងដោយសារបញ្ហារបស់ពិភពលោកមួយចំនួន ដែលកំពុងប៉ះពាល់ដល់កម្ពុជានិងបណ្តាប្រទេសនានា។ នេះបើតាមការលើកឡើងរបស់លោកច្រឹក សុខនីម។

លោកបន្តថា ការសាងសង់បញ្ចប់ផ្លូវក្រវ៉ាត់ក្រុងទី៣ និងត្រៀមសាងសង់ផ្លូវក្រវ៉ាត់ក្រុងទី៣ភាគខាងកើត របស់រដ្ឋាភិបាលនាពេលអនាគត ក៏បាននិងកំពុងលើកកំពស់មុខមាត់តំបន់នេះផងដែរ។
ជាមួយគ្នានេះ លោកឧកញ៉ានួន រិទ្ឋីអគ្គនាយកក្រុមហ៊ុនKFA Foundationបានមានប្រសាសន៍ឲ្យដឹងផងដែរថា ហេដ្ឋារចនាសម្ព័ន្ឋបាននិងកំពុងដើរតួនាទីយ៉ាងសំខាន់ ដល់ការអភិវឌ្ឍក្នុងវិស័យអចលនទ្រព្យ ពិសេសគំរោងផ្លូវក្រវ៉ាត់ក្រុងទី៣ គំរោងសាងសង់ផ្លូវល្បឿនលឿន ការសាងសង់ស្ពានតភ្ជាប់ផ្លូវក្រវ៉ាត់ក្រុងទី៣ នាពេលអនាគត នឹងជម្រុញការរីកចម្រើនតំបន់នេះកាន់តែខ្លាំង។
លោកបន្តថា “គោលនយោបាយដឹកនាំដ៏ត្រឹមត្រូវ របស់សម្តេចតេជោ ពិតជាបាននិងកំពុងហុចដល់ដល់ប្រជាពលរដ្ឋ តាមរយៈការរីកចម្រើនសេដ្ឋកិច្ច និងការវិនិយោគហេដ្ឋារចនាសម្ព័ន្ឋរបស់រដ្ឋាភិបាល”។
ជាមួយគ្នានេះ តំបន់ផ្លូវជាតិលេខ៨ ដែលបានពង្រីកជាបួនគន្លងនៅផ្នែកខ្លះ ក៏បាននិងកំពុងហុចផល ដល់ការអភិវឌ្ឍន៍របស់វិស័យឯកជនផងដែរ។

លោកថាន់ ចាន់ណាអគ្គនាយកបុរីចាន់ណាលែន បានមានប្រសាសន៍ឲ្យដឹងផងដែរថា តំបន់វិហារសួគ៌ កំពុងមានការរីកចម្រើនលឿន ខណៈប្រជាពលរដ្ឋមករស់នៅតំបន់នេះ កាន់តែច្រើន ដោយសារការវិនិយោគរបស់រដ្ឋាភិបាល លើហេដ្ឋារចនាសម្ព័ន្ឋកើនឡើងជាប្រចាំ។
លោកបន្តថា “បច្ចុប្បន្នការសាងសង់បុរី កំពុងដំណើរការទៅមុខ ហើយអ្នកវិនិយោគជាច្រើនទៀត បាននិងកំពុងសម្លឹងមកកាន់តំបន់នេះ”៕

ដោយ: គង់ លាងហួរ
ភ្នំពេញ: កម្ពុជាបានកំណត់ក្តីសង្ឃឹមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេរភាគី (FTAs) ដើម្បីជំរុញការនាំចេញទំនិញសម្លៀកបំពាក់ ស្បែកជើង និងទំនិញធ្វើដំណើរ (GFT) របស់ខ្លួន។

ប្រធានសមាគមស្បែកជើងកម្ពុជា លោក លី ឃុនថៃ មានប្រសាសន៍ថា កម្ពុជាមានការកើនឡើងគួរឱ្យកត់សម្គាល់ ក្នុងការនាំចេញស្បែកជើងទៅកាន់ប្រទេសចិន និងកូរ៉េខាងត្បូងចាប់តាំងពីកិច្ចព្រមព្រៀង RCEP និង FTAs ទ្វេរភាគីរបស់កម្ពុជាជាមួយចិន និងកូរ៉េខាងត្បូងបានចូលជាធរមានកាលពីឆ្នាំមុន។លោកបន្តទៀតថា “មានប្រទេសជាច្រើនស្ថិតនៅក្រោមកិច្ចព្រមព្រៀង RCEPនេះ ហើយជាមួយការអនុគ្រោះពន្ធ យើងរំពឹងថា កម្ពុជានឹងទទួលបានការបញ្ជាទិញបន្ថែមទៀតចំពោះផលិតផល GFT ពីបណ្តាប្រទេសជាសមាជិកកិច្ចព្រមព្រៀង RCEP ទាំងនោះ”។ទីផ្សារសំខាន់ៗនាពេលបច្ចុប្បន្នសម្រាប់នាំចេញទំនិញ GFT របស់កម្ពុជាគឺអឺរ៉ុប សហរដ្ឋអាមេរិក និងកាណាដា។ការអត្ថាធិប្បាយរបស់លោក លី ឃុនថៃបានកើតឡើង បន្ទាប់ពីកម្ពុជាបានកត់ត្រាការធ្លាក់ចុះស្ទើរតែមួយភាគប្រាំនៃការនាំចេញផលិតផល GFT ក្នុងអំឡុងពេលឆមាសទីមួយនៃឆ្នាំ២០២៣នេះ។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករបានបង្ហាញថា កម្ពុជាបាននាំចេញទំនិញ GFT ដែលមានតម្លៃ៥,២៦ពាន់លានដុល្លារអាមេរិក ចាប់ពីខែមករារហូតដល់ខែមិថុនា ឆ្នាំនេះ ពោលគឺធ្លាក់ចុះ១៨,៧ភាគរយពី៦,៤៧ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ឧស្សាហកម្មទំនិញ GFT គឺជាប្រភពរកប្រាក់ចំណូលពីបរទេសដ៏ធំបំផុតសម្រាប់កម្ពុជា។  វិស័យនេះមានរោងចក្រ និងសាខាប្រហែល១.១០០កន្លែង និងមានបុគ្គលិកធ្វើការប្រហែល៧៥០.០០០នាក់ ដែលភាគច្រើនជាស្ត្រី។

អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ មានប្រសាសន៍ថា កិច្ចព្រមព្រៀង RCEP និង FTAs ទ្វេរភាគីរបស់កម្ពុជាជាមួយចិន និងកូរ៉េខាងត្បូង គឺជាអ្នករួមចំណែកដ៏សំខាន់ក្នុងការជំរុញការនាំចេញរបស់ប្រទេសកម្ពុជាយើង។លោកបានប្រាប់សារពត៌មាន Xinhua កាលពីថ្ងៃអាទិត្យកន្លងទៅថា “កិច្ចព្រមព្រៀងពាណិជ្ជកម្មសេរីទាំងនេះបានផ្តល់ ហើយនឹងបន្តផ្តល់ការជំរុញដល់កំណើននៃការនាំចេញរបស់យើងក្នុងរយៈពេលវែង”។

លោក ប៉ែន សុវិជាតិ បានរំលឹកឡើងវិញថា កិច្ចព្រមព្រៀងពាណិជ្ជកម្មទាំងនេះនឹងជួយឱ្យកម្ពុជាបញ្ចប់ពីឋានៈជាប្រទេសមានការអភិវឌ្ឍតិចតួចនៅឆ្នាំ២០២៧ សម្រេចបាននូវគោលដៅប្រកបដោយមហិច្ឆិតា ក្នុងការក្លាយជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសដែលមានចំណូលខ្ពស់នៅឆ្នាំ២០៥០៕

ដោយ: គង់ លាងហួរ
អន្តរជាតិ: ទីក្រុងសៀមរាបបានជាប់ចំណាត់ថ្នាក់នៅក្នុងបញ្ជីទីក្រុងដ៏ល្អបំផុត ឬទីក្រុងសំណព្វចំនួន១៥ នៅតំបន់អាស៊ី ដែលត្រូវបានជ្រើសរើសដោយអ្នកអានទស្សនាវដ្តី Travel+Leisure របស់សហរដ្ឋអាមេរិក។

ចំណាក់ថ្នាក់របស់ទីក្រុងទាំង១៥ ត្រូវបានវាយតម្លៃដោយផ្អែកទៅលើលក្ខណៈវិនិច្ឆ័យដូចជា ទេសភាព/កន្លែងសម្គាល់ វប្បធម៌ អាហារ ភាពរាក់ទាក់ ការដើរទិញឥវ៉ាន់(Shopping) និងតម្លៃ។ក្នុងនោះ ទីក្រុងសៀមរាបទទួលបានពិន្ទុពីអ្នកអានទស្សនាវដ្តី Travel+Leisure ចំនួន៨៨,៨០ពិន្ទុ បើធៀបទៅនឹងពិន្ទុពេញចំនួន១០០។ខាងក្រោមនេះគឺជាឈ្មោះទីក្រុងដ៏ល្អបំផុតចំនួន១៤ផ្សេងទៀត នៅក្នុងតំបន់អាសុី ដែលបានជាប់ចំណាត់ថ្នាក់ក្នុងបញ្ជីរបស់ទស្សនាវដ្តីអាមេរិកខាងលើ៖
ចំណាត់ថ្នាក់ទី១៖ ទីក្រុង Udaipur ប្រទេសឥណ្ឌា ទទួលបានពិន្ទុពីអ្នកអានចំនួន៩៣,៣៣ពិន្ទុ
ចំណាត់ថ្នាក់ទី២៖ ទីក្រុង Kyoto ប្រទេសជប៉ុន ទទួលបានពិន្ទុពីអ្នកអានចំនួន៩២,០៦ពិន្ទុ
ចំណាត់ថ្នាក់ទី៣៖ ទីក្រុង Ubud ប្រទេសឥណ្ឌូនេស៊ី ទទួលបានពិន្ទុពីអ្នកអានចំនួន៩១,៧៣ពិន្ទុ
ចំណាត់ថ្នាក់ទី៤៖ ទីក្រុងតូក្យូ ប្រទេសជប៉ុន ទទួលបានពិន្ទុពីអ្នកអានចំនួន៩០,៣០ពិន្ទុ
ចំណាត់ថ្នាក់ទី៥៖ ទីក្រុងបាងកក ទទួលបានពិន្ទុពីអ្នកអានចំនួន៨៩,៩៩ពិន្ទុ
ចំណាត់ថ្នាក់ទី៦៖ ទីក្រុងMumbai ប្រទេសឥណ្ឌា ទទួលបានពិន្ទុពីអ្នកអានចំនួន៨៩,៧៩ពិន្ទុ
ចំណាត់ថ្នាក់ទី៧៖ ទីក្រុងឈៀងម៉ៃ ទទួលបានពិន្ទុពីអ្នកអានចំនួន៨៩,៤៩ពិន្ទុ
ចំណាត់ថ្នាក់ទី៨៖ ទីក្រុងហ្លួងព្រះបាងប្រទេសឡាវ ទទួលបានពិន្ទុពីអ្នកអានចំនួន៨៩,៤៤ពិន្ទុ
ចំណាត់ថ្នាក់ទី១០៖ ទីក្រុងសិង្ហបុរី ទទួលបានពិន្ទុពីអ្នកអានចំនួន៨៨,៧៨ពិន្ទុ
ចំណាត់ថ្នាក់ទី១១៖ ទីក្រុងអូសាកា ប្រទេសជប៉ុន ទទួលបានពិន្ទុពីអ្នកអានចំនួន៨៨,០៥ពិន្ទុ
ចំណាត់ថ្នាក់ទី១២៖ ទីក្រុង Jaipur ប្រទេសឥណ្ឌា ទទួលបានពិន្ទុពីអ្នកអានចំនួន៨៧,៩៥ពិន្ទុ
ចំណាត់ថ្នាក់ទី១៣៖ ទីក្រុងវៀតណាម Hoi An ទទួលបានពិន្ទុពីអ្នកអានចំនួន៨៧,៨៦ពិន្ទុ
ចំណាត់ថ្នាក់ទី១៤៖ ទីក្រុងហូជីមិញទទួលបានពិន្ទុពីអ្នកអានចំនួន៨៧,៦៤ពិន្ទុ
ចំណាត់ថ្នាក់ទី១៥៖ ទីក្រុងសេអ៊ូល ទទួលបានពិន្ទុពីអ្នកអានចំនួន៨៦,៧៣ពិន្ទុ៕

តែម សុខុម

ភ្នំពេញ: យោងតាមរបាយការណ៍របស់ធនាគារជាតិនៃកម្ពុជា កាលពីថ្ងៃអាទិត្យ ទី១៦ កក្កដា បង្ហាញថា ប្រទេសកម្ពុជា ទាក់ទាញការវិនិយោគផ្ទាល់ពីបរទេស (FDI) បានចំនួន៤៥,៨ពាន់លានដុល្លារអាមេរិក ពីឆ្នាំ១៩៩៤ គិតមកទល់នឹងត្រីមាសទី១ ដើមឆ្នាំ២០២៣។

របាយការណ៍ដដែលបង្ហាញថា ប្រភពមូលធនសំខាន់ៗគឺបានពីប្រទេសចិន កូរ៉េខាងត្បូង សិង្ហបុរី ជប៉ុន វៀតណាម ម៉ាឡេស៊ី ថៃ និងអង់គ្លេស។របាយការណ៍នេះបញ្ជាក់ថា “រំហូរនៃការវិនិយោគត្រូវបានចាក់បញ្ចូលទៅក្នុងវិស័យសំខាន់ៗនៃសេដ្ឋកិច្ចរួមសកម្មភាពហិរញ្ញវត្ថុ ផលិតកម្ម អចលនទ្រព្យ កន្លែងស្នាក់នៅ កសិកម្ម វារីអគ្គិសនី និងសំណង់”។លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍មានប្រសាសន៍ថា ទំនាក់ទំនងដ៏ល្អប្រសើរ កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) គឺជាកត្តាដ៏សំខាន់ដែលលើកទឹកចិត្តបន្ថែមទៀតឱ្យអ្នកវិនិយោគចិន មកបោះទុនវិនិយោគនៅកម្ពុជា។

លោកបានប្រាប់ទីភ្នាក់ងារព័ត៌មានស៊ិនហួ ថា “កិច្ចព្រមព្រៀងពាណិជ្ជកម្មសេរីទាំងនេះរួមជាមួយនឹងច្បាប់វិនិយោគអំណោយផលរបស់កម្ពុជា សន្តិភាព និងស្ថិរភាពនយោបាយ បានផ្តល់ឱកាសដ៏ល្អសម្រាប់អ្នកវិនិយោគបរទេស ជាពិសេសជនជាតិចិន ក្នុងការវិនិយោគនៅកម្ពុជា”។

លោកមានប្រសាសន៍ថា “ការវិនិយោគរបស់ចិន មិនត្រឹមតែនាំមកនូវមូលធន និងបច្ចេកវិទ្យាថ្មីៗប៉ុណ្ណោះទេ ប៉ុន្តែថែមទាំងបានបង្កើតការងារថ្មីៗសម្រាប់ពលរដ្ឋកម្ពុជា ផងដែរ”៕ Xinhua៕

តែម សុខុម

ប៉េកាំងៈ ទិន្នន័យគយរបស់ប្រទេសចិន បានបង្ហាញកាលពីថ្ងៃព្រហស្បតិ៍ ទី១៣ ខែកក្កដា ថា ការនាំចូល និងការនាំចេញទំនិញសរុបរបស់សេដ្ឋកិច្ចធំបំផុតទី២ របស់ពិភពលោកមួយនេះបានកើនឡើង២,១%គិតជាប្រាក់យ័ន ក្នុងឆមាសទី១ ដើមឆ្នាំ ២០២៣។

យោងតាមអគ្គនាយកដ្ឋានគយចិន បង្ហាញថា ការនាំចូល និងនាំចេញរបស់ប្រទេសចិន បានកើនលើសពី២០ទ្រីលានយ័ន (ប្រមាណ២,៨ទ្រីលានដុល្លារអាមេរិក) ជាលើកដំបូងអំឡុងខែមករា ដល់ខែមិថុនា។

ទិន្នន័យបានបង្ហាញថា ការនាំចេញបានកើនឡើង៣,៧%ឈានដល់១១,៤៦ទ្រីលានយ័ន (១,៦ទ្រីលានដុល្លារអាមេរិក) ខណៈការនាំចូលបានធ្លាក់ចុះ០,១%ធៀបនឹងឆ្នាំមុនមកនៅត្រឹម៨,៦៤ទ្រីលានយ័ន (១,២១ទ្រីលានដុល្លារអាមេរិក)។

លទ្ធផលសេដ្ឋកិច្ចរបស់ប្រទេសចិន បានកើនឡើងជារួម ទោះបីជាបរិយាកាសខាងក្រៅមានសភាពធ្ងន់ធ្ងរ និងស្មុគស្មាញខ្លាំងយ៉ាងណាក្ដី ខណៈបរិមាណ និងគុណភាពនៃពាណិជ្ជកម្មក្រៅប្រទេសរបស់ខ្លួនមានភាពប្រសើរឡើងជាលំដាប់ និងស្របតាមការរំពឹងទុកក្នុងរយៈពេល៦ខែដើមឆ្នាំនេះ។

ទិន្នន័យក៏បានបង្ហាញផងដែរថា ពាណិជ្ជកម្មក្រៅប្រទេសរបស់ប្រទេសចិន បានរក្សាទិសដៅកើនឡើងក្នុងឆមាសទី១ ដើមឆ្នាំនេះ។ការនាំចូល និងការនាំចេញដែលបានកត់ត្រាក្នុងត្រីមាសទី២ គឺខ្ពស់ជាងត្រីមាសទី១ ដល់ទៅ៦%៕ Xinhua៕

ដោយ: គង់ លាងហួរ

បាងកក: សាកលវិទ្យាល័យសភាពាណិជ្ជកម្មថៃ (UTCC) រំពឹងថា ប្រទេសថៃនឹងប្រឈមមុខនឹងការពន្យារពេលយូរ ក្នុងការជ្រើសរើសនាយករដ្ឋមន្ត្រី និងការបង្កើតរដ្ឋាភិបាលថ្មី។អ្នកជំនាញនៅសាកលវិទ្យាល័យនេះបានព្រមានថា “ប្រសិនបើកើតមានការតវ៉ាបែបអំពើហិង្សា នោះវានឹងជះផលប៉ះពាល់យ៉ាងខ្លាំងដល់ចំណូលពីវិស័យទេសចរណ៍ និងGDP”។

លោក Thanavath Phonvichai ប្រធាន UTCC បានអះអាងថា ការបោះឆ្នោតជ្រើសរើសនាយករដ្ឋមន្ត្រី ត្រូវបានចាត់ទុកជាសូចនាករដ៏សំខាន់មួយ ចំពោះការងើបឡើងវិញ នៃសេដ្ឋកិច្ចរបស់ប្រ​ទេសថៃ។លោក ក៏បានលើកឡើងពីការស្ទង់មតិអាជីវកម្មនាពេលថ្មីៗនេះ ដែលបានឆ្លុះបញ្ចាំងឱ្យឃើញពីការព្រួ​យ​បារម្ភ ចំពោះការបង្កើតរដ្ឋាភិបាលថ្មី ដែលអាចពន្យារពេលក្នុងការអនុវត្តគោលនយោបាយសេដ្ឋកិច្ចថ្មីផងដែរ។លោក Thanavath បានមានប្រសាសន៍ថា “ទាំងអ្នកជំនួញ និងអ្នកប្រើប្រាស់កំពុងឃ្លាំមើលយ៉ាងដិតដល់ នូវការបោះឆ្នោតជ្រើសរើសនាយករដ្ឋមន្ត្រីថៃថ្មី ដែលអាចទាមទារសំឡេង នៃការបោះឆ្នោតគាំទ្រជាច្រើន”។

ទន្ទឹមគ្នានេះ UTCC បានព្យាករណ៍ថា សេដ្ឋកិច្ចថៃអាចរងផលប៉ះពាល់តិចតួច ប្រសិនបើការជ្រើសរើសនាយករដ្ឋមន្ត្រី និងការបង្កើតរដ្ឋាភិបាលថ្មីកើតឡើង នៅក្នុងខែសីហា ឬខែកញ្ញាខាងមុខ។ប៉ុន្តែ ប្រសិនបើ​ការ​បង្កើត​រដ្ឋាភិបាល​ថ្មី បន្តអូសបន្លាយ​ហួស​ពី​ខែ​តុលា នោះដំណើរការ​ថវិកា​អាច​នឹង​ត្រូវ​ពន្យារពេល ​ទៅ​ដល់ត្រីមាស​ទីពីរ​ឆ្នាំ​ក្រោយ និងអាច​រារាំង​ដល់​ការ​ពង្រីក​ នៃកំណើនសេដ្ឋកិច្ច។

លោក Thanavath បានបញ្ជាក់ថា “ប្រសិនបើការជ្រើសរើសនាយករដ្ឋមន្ត្រី និងការបង្កើតរដ្ឋាភិបាល ដំណើរការបានដោយរលូន និងគ្មានការតវ៉ាខ្លាំងក្លា វានឹងអាចអនុញ្ញាតឱ្យមានការអនុវត្តគំនិតផ្តួចផ្តើមវិនិយោគ នោះសេដ្ឋកិច្ចថៃអាចកើនឡើង៤% នៅឆ្នាំ២០២៣នេះ” ។

ទោះជាយ៉ាងនេះក្តី ប្រសិនបើដំណើរការជ្រើសរើស និងការបង្កើតរដ្ឋាភិបាលប្រឈមនឹងបាតុកម្មធ្ងន់ធ្ងរ ដែលធ្វើឱ្យរដ្ឋបរទេសនានាចេញសេចក្តីព្រមាន អំពីការធ្វើដំណើរនោះចំនួនភ្ញៀវទេសចរបរទេសនៅក្នុងឆមាសទី២ នៃឆ្នាំនេះអាចនឹងធ្លាក់ចុះ១០លាននាក់ និងនាំឱ្យបាត់បង់ប្រាក់ចំណូល ពីវិស័យទេសចរណ៍ចំនួន៥០០ពាន់លានបាត និងមានការថយចុះ១%នៃផលិតផលក្នុងស្រុកសរុប៕

ដោយៈ គង់ ម៉ាលីនណា

        ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានស្នើឱ្យអគ្គរាជទូតបារាំងប្រចាំកម្ពុជា ជួយទាក់ទាញភ្ញៀវទេសចរជនជាតិបារាំងមកលេងកម្ពុជាកាន់តែច្រើន។

សម្តេចតេជោបានអំពាវនាវបែបនេះ ក្រោយពីវិមានរំលឹកដល់យុទ្ធជនស្ម័គ្រចិត្តខ្មែរ និងបារាំងចំនួន១៩៨រូប ដែលបានពលីជីវិតក្នុងសង្គ្រាមលោកលើកទី១ ពីឆ្នាំ១៩១៤ ដល់ឆ្នាំ១៩១៨ ត្រូវបានសាងសង់រួចហើយសម្ពោធ ជាផ្លូវការនៅថ្ងៃសុក្រទី១៤ ខែកក្កដា ឆ្នាំ២០២៣។

សម្តេចបានឲ្យដឹងថា វិមានដែលសាងសង់ឡើង ដើម្បីរំលឹកដល់វិញ្ញាណក្ខន្ធយុទ្ធជនស្ម័គ្រចិត្តខ្មែរ និងបារាំងដែលចូលរួមក្នុងការប្រយុទ្ធ ក្នុងសម័យសង្គ្រាមលោកលើកទី១ ហើយបានពលីជីវិត គឺជាការដាស់តឿន ដល់កុលបុត្រខ្មែរគ្រប់រូប ឱ្យស្គាល់តម្លៃនៃសន្តិភាព ដែលជាគុណតម្លៃសាកលនៃមនុស្សជាតិ។សម្តេចតេជោបានស្នើឱ្យអគ្គរាជទូតបារាំង ប្រចាំកម្ពុជាជួយទាក់ទាញភ្ញៀវទេសចរជនជាតិបារាំង មកលេងកម្ពុជាកាន់តែច្រើន ដោយអញ្ជើញមកដាក់កម្រងផ្កា និងអុជធូបដើម្បីគោរពវិញ្ញានក្ខន្ធ ដល់ជនជាតិបារាំង និងខ្មែរបានបូជាជីវិត ក្នុងសម័យសង្គ្រាមលោកលើកទី១។សម្តេចបានបញ្ជាក់ថា “នេះជាចំណុចល្អនៃទំនាក់ទំនងល្អរបស់យើងដែលជាផ្នែកមួយនៃទំនាក់ទំនងរវាងប្រជាជន និងប្រជាជន”។

ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានលើកឡើងថា វិមានរំលឹកវិញ្ញាណក្ខន្ធដល់អ្នកពលីជីវិត ក្នុងសម័យលោកលើកទី១ ដែលស្ថិតនៅទល់មុខស្ថានទូតបារាំង ប្រចាំកម្ពុជានេះ មានកម្ពស់១២,៣ម៉ែត្រសាងសង់ឡើងពីបេតុង ស្ពាន់ និងថ្មក្រានីត។លោកបន្តថា “វិមាននេះសាងសង់ឡើងវិញ តាមលំនាំដើមបែរមុខទៅទិសខាងកើត ដែលជាទិសមានជ័យភូមិល្អ ដោយមានទន្លេស្ថិតនៅខាងមុខផង”៕