ដោយ: គង់ លាងហួរ

គូឡាឡាំពួរ: ប្រទេសម៉ាឡេស៊ី កំពុងស្វែងរកក្រុមហ៊ុនឯកជន ដើម្បីអភិវឌ្ឍផ្លូវរថភ្លើងល្បឿនលឿន តភ្ជាប់រវាងទីក្រុងគូឡាឡាំពួ និងសិង្ហបុរី ក្រោយពីគម្រោងដែលមានតម្លៃ រាប់ពាន់លានដុល្លារនេះត្រូវបានលុបចោលកាលពីជាង២ឆ្នាំមុន។

កាលពីឆ្នាំ២០២១ ប្រទេសម៉ាឡេស៊ី និងសិង្ហបុរីបានលុបចោលផែនការសាងសង់ផ្លូវដែក ប្រវែង៣៥០គីឡូម៉ែត្រនេះ បន្ទាប់ពីភាគីទាំង២ មិនបានឯកភាពគ្នាទៅលើការផ្លាស់ប្តូរ ដែលត្រូវបានស្នើឡើងជាច្រើនចំពោះគម្រោងនេះ។

នៅពេលនោះ គម្រោងនេះត្រូវបានប៉ាន់ប្រមាណថា មានតម្លៃប្រហែល១៧ពាន់លានដុល្លារ។ ជាក់ស្តែង បណ្តាក្រុមហ៊ុនមកពីប្រទេសចិន ជប៉ុន កូរ៉េខាងត្បូង និងអឺរ៉ុប ក៏ធ្លាប់បានសម្តែងចំណាប់អារម្មណ៍លើកិច្ចសន្យា ដើម្បីសាងសង់ ធ្វើប្រតិបត្តិការ និងផ្តល់ហិរញ្ញប្បទានដល់រថភ្លើងផងដែរ។

យោងតាមសេចក្តីថ្លែងការណ៍មួយ ចេញផ្សាយកាលពីថ្ងៃអង្គារ បានឱ្យដឹងថា ក្រុមហ៊ុន MyHSR Corp ដែលជាអង្គភាពគ្រប់គ្រងដោយរដ្ឋាភិបាលម៉ាឡេស៊ី និងទទួលខុសត្រូវលើគម្រោងនេះ បានអំពាវនាវឱ្យវិស័យឯកជន បានដាក់សំណើដើម្បីអភិវឌ្ឍ និងដំណើរការគម្រោង តាមរយៈគំរូភាពជាដៃគូសាធារណៈ និងឯកជន។

ដំណើរការនេះគឺជាគំនិតផ្តួចផ្តើម របស់រដ្ឋាភិបាលម៉ាឡេស៊ី ក្នុងការធ្វើឱ្យគម្រោងអាចដំណើរការឡើងវិញ តាមរយៈយន្តការផ្តល់មូលនិធិថ្មី និងគំរូនៃការអនុវត្តថ្មី ក្នុងកិច្ចខិតខំប្រឹងប្រែង ដើម្បីកែលម្អបន្ថែមទៀត នូវហេដ្ឋារចនាសម្ព័ន្ធដឹកជញ្ជូនផ្លូវដែក និងដើម្បីជំរុញសេដ្ឋកិច្ចជាតិ។

ទាក់ទិនទៅនឹងរឿងខាងលើនេះដែរ ក្រសួងដឹកជញ្ជូនរបស់ប្រទេសសិង្ហបុរី មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយនោះទេ៕

ដោយ: គង់ លាងហួរ

ភ្នំពេញ: អគ្គនាយកក្រុមហ៊ុន Lucky Realty Co.,Ltd លោកឌិត ចណ្ណាបានមានប្រសាសន៍ថា មុននឹងទិញ ឬលក់អចលនទ្រព្យ យើងត្រូវពិនិត្យមើលទៅលើម្ចាស់ទ្រព្យ ឯកសារ របៀបនៃការទិញ និងអ្នកទិញ។

លោកបានបន្តថា “យើងត្រូវសិក្សាថា តើអ្នកទិញនោះជាអ្នកទិញប្រភេទណា?។ ដូច្នេះហើយ មុននឹងយើងនាំអតិថិជន ទៅទិញអចលនទ្រព្យណាមួយ យើងក៏ត្រូវសិក្សាអំពីប្រវត្តិ របស់ពួកគេផងដែរ និងត្រូវដឹងថាតើ ពួកគេជាអតិថិជនប្រភេទណា?”។

លោកឌិត ចណ្ណាអះអាងទៀតថា ការសិក្សាអំពីប្រវត្តិ និងរបៀបនៃការរកស៊ីរបស់អតិថិជន គឺមានសារៈសំខាន់ណាស់ មិនថាតែអតិថិជនជាជនជាតិខ្មែរ ឬជាជនបរទេសនោះទេ ព្រោះយើងបានមើលឃើញថា មួយរយៈពេលកន្លងមកនេះ ក៏មានជនបរទេសជាច្រើនបានចូលមកទិញអចលនទ្រព្យនៅប្រទេសកម្ពុជាផងដែរ។
ទន្ទឹមគ្នានេះដែរ យើងត្រូវពិនិត្យមើលទៅលើ ប្រភេទម្ចាស់ទ្រព្យផងដែរ។ តើកន្លងមក ម្ចាស់ទ្រព្យនោះឧស្សាហ៍ យកដីរបស់គាត់មួយកន្លែងមក Copy ប្លង់ ដើម្បីដើរទទួលយកប្រាក់កក់ពីគេ ឬយ៉ាងម៉េច? ដូច្នេះ យើងត្រូវចេះប្រុងប្រយ័ត្នចំពោះចំណុចនេះ។លោកបន្ថែមថា“យើងជាអ្នករកស៊ី ក្នុងវិស័យអចលនទ្រព្យ យើងតែងចង់បានអត្ថប្រយោជន៍មួយចំនួន ក្នុងន័យសមស្រប និងស្របច្បាប់ ប៉ុន្តែប្រសិនបើយើងមិនបានប្រុងប្រយ័ត្នទេនោះ យើងអាចប៉ះជាមួយម្ចាស់ទ្រព្យមួយចំនួនដែលមិនល្អ”។ ម្ចាស់ទ្រព្យខូចខិលមួយចំនួន បានយកប្លង់ Copy ដើម្បីដើរទទួលប្រាក់កក់ ពីអតិថិជនម្នាក់ទៅកាន់អតិថិជនម្នាក់ទៀត។

លោកឌិត ចណ្ណាបានបញ្ជាក់ថា ក្នុងនាមជាអ្នកអចលនទ្រព្យដែលមានអាជីព និងជំនាញច្បាស់លាស់ យើងត្រូវការពារទាំងអតិថិជន និងម្ចាស់ទ្រព្យ។ ដូច្នេះ មុននឹងកក់ប្រាក់ យើងត្រូវសុំមើលប្លង់ដើមជាមុនសិន និងត្រូវពិនិត្យថាតើ ប្លង់នោះជាឈ្មោះរបស់ម្ចាស់ទ្រព្យនោះពិតប្រាកដឬក៏យ៉ាងណា ហើយយើងត្រូវផ្ទៀងផ្ទាត់អត្តសញ្ញាណប័ណ្ណដើមជាមួយប្លង់ច្បាប់ដើមផងដែរ។បន្ថែមពីនេះ ក្នុងនាមជាអ្នកជំនាញអចលនទ្រព្យ យើងត្រូវជួយដោះស្រាយបញ្ហាទាំងខាងម្ចាស់ទ្រព្យ និងអតិថិជន ដោយមិនលំអៀ​ងទៅខាងម្ចាស់ ឬអតិថិជននោះទេ ពោលគឺធ្វើជាអ្នកឈរនៅកណ្តាលរវាងភាគីទាំង២។លោកបញ្ជាក់ទៀតថា “ម្យ៉ាងវិញទៀត មុននឹងឱ្យអតិថិជនកក់ប្រាក់ យើងត្រូវតែនាំអតិថិជន ទៅដល់ទីតាំងដីនោះ ហើយត្រូវឱ្យម្ចាស់ ឬតំណាងរបស់ម្ចាស់ទ្រព្យ ចង្អុលប្រាប់អំពីទីតាំងព្រំដីឱ្យបានច្បាស់លាស់”។លើសពីនេះ ទាក់ទិនទៅនឹងកិច្ចសន្យាទិញ លក់ អចលនទ្រព្យ យើងក៏ត្រូវពិនិត្យមើលឱ្យបានច្បាស់លាស់ និងប្រុងប្រយ័ត្នចំពោះឯកសារបែបបទតាមផ្លូវច្បាប់ផងដែរ។

សរុបជារួមមកវិញ យើងត្រូវត្រួតពិនិត្យឱ្យបានច្បាស់លាស់ នូវគ្រប់ចំណុចទាំងអស់ ហើយយើងត្រូវមានទំនុកចិត្ត លើខ្លួនឯងថា ករណីខាងម្ចាស់ទ្រព្យ និងករណីខាងអតិថិជន មានសុវត្ថិភាពរួចរាល់ ហើយឯកសារបបែបបទផ្លូវច្បាប់ ក៏មានសុវត្ថិភាពផងដែរ មុននឹងធ្វើការសម្រេចចិត្ត៕

ដោយៈ តែម សុខុម

ប៉ារីស: បន្ទាប់ពីការរាំងស្ទះជាច្រើនលើក ដោយសារភាពតានតឹងផ្នែកនយោបាយ ទីបំផុតការងារសាងសង់បានចាប់ផ្ដើមដំណើរការហើយ។

គម្រោងព្រែកជីក Seine-Nord Europe Canal (SNEC) នេះគ្រោងនឹងចំណាយប្រាក់៥,៥ពាន់លានដុល្លារ ដែលត្រូវបានរចនាឡើងដើម្បីដោះស្រាយបញ្ហាកស្ទះ នូវផ្លូវដឹកជញ្ជូនដ៏សំខាន់មួយរបស់ទ្វីបអឺរ៉ុប។

គម្រោងព្រែកជីកប្រវែង១០៧គីឡូម៉ែត្រនេះ នឹងតភ្ជាប់ទន្លេ Oise River និងព្រែកជីក Dunkirk-Escaut Canal ដោយបង្កើតបានជាបណ្តាញផ្លូវទឹក ដែលមានសមត្ថភាព ដឹកជញ្ជូនទំនិញយ៉ាងច្រើនរវាងទីក្រុងប៉ារីស នៃប្រទេសបារាំង ប្រទេសបែលហ្ស៊ិក ប្រទេសហូឡង់ និងប្រទេសលុចសំបួរ ដែលបច្ចុប្បន្នការដឹកជញ្ជូនទំនិញធ្វើឡើងតាមផ្លូវគោក ដែលមានការកកស្ទះចរាចរណ៍។យោងតាមផែនការដែលបានគ្រោងទុក ព្រែកជីកនេះគ្រោងនឹងបញ្ចប់ការសាងសង់ និងដាក់ឱ្យដំណើរការនៅឆ្នាំ២០៣០។ព្រែកជីកនេះ នឹងមានសមត្ថភាពទទួលកប៉ាល់ ដែលមានទម្ងន់រហូតដល់ទៅ៤.៤០០តោន ដែលស្មើនឹងរថយន្តដឹកទំនិញធុនធំ២២០គ្រឿង។ ក្រុមហ៊ុនឌីហ្សាញ និងវិស្វកម្ម Arcadis ដែលបានពិគ្រោះយោ​បល់លើគម្រោងនេះអះអាងថា ការដឹកជញ្ជូនទំនិញតាមផ្លូវទឹក អាចកាត់បន្ថយការបំភាយឧស្ម័នកាបូនិច តិចជាងលើផ្លូវថ្នល់ដល់ទៅ៣ដង ហើយព្រែកជីកនេះនៅពេលដំណើរការ អាចកាត់បន្ថយរថយន្តដឹកទំនិញបានចំនួន៧៦០.០០០គ្រឿង ចេញពីផ្លូវថ្នល់ជារៀងរាល់ឆ្នាំ៕ CNN៕

ដោយៈ ជេស៊ីកា

សៀមរាបៈ ផ្ទះលំហែរ កន្លែងបោះតង់ ហាងកាហ្វេ ទីលានបាល់ទាត់ ដើមឈើធំៗត្រូវបានដាំ នៅក្នុងគំរោងបំពេញរាជ ដែលបាននិងកំពុងលើកកំពស់សក្តានុពលទេសចរណ៍ និងការអភិវឌ្ឍនៅក្រុងស្រុកបន្ទាយស្រីខេត្តសៀមរាប។

គំរោងអភិវឌ្ឍន៍នេះ ស្ថិតនៅលើផ្ទៃដីជាង៣០០ហិកតា ដែលបាននិងកំពុងអភិវឌ្ឍន៍ ដោយអ្នកវិនិយោគក្នុងស្រុក ដែលមានគោលដៅគាំទ្រ គោលនយោបាយអភិវឌ្ឍន៍ទេសចរណ៍ នៅក្នុងខេត្តសៀមរាប ក៏ដូចជា លើកកំពស់ការអភិវឌ្ឍន៍វិស័យអចលនទ្រព្យ ក្នុងខេត្តដ៏ល្បីល្បាញនេះផងដែរ។លោកម៉េត មករា ម្ចាស់គំរោងបំពេញរាជបានមានប្រសាសន៍ឲ្យដឹងកាលពីថ្ងៃច័ន្ទ ទី១០ មករាកន្លងមកថា ក្រៅពីសាងសង់ផ្ទះលំហែរ រមណីយដ្ឋានលំហែរកាយ កន្លែងបង្ហាញពីសិល្បៈវប្បធ៌មជាតិ ដល់ភ្ញៀវទេសចរណ៍ជាតិ និងអន្តរជាតិ គំរោងនេះ ក៏បាននិងកំពុងចូលរួមលើកស្ទួយវិស័យកីឡាជាតិ ដែលក្រុមហ៊ុននេះ បាននិងកំពុងសាងសង់ស្តាតចំនួន៣ ក្នុងនោះស្តាតមួយមានសមត្ថភាព អាចផ្ទុកអ្នកទស្សនាចំនួន៤៣០០នាក់ សម្រាប់ជាទីតាំងហាត់សមកីឡាករ ដែលគំរោងនេះ នឹងបញ្ចប់ការសាងសង់ នៅខែមេសាខាងមុខនេះ។

លោកបន្តថា លើសពីនេះ នៅចុងឆ្នាំ២០២៤ ឬដើមឆ្នាំ២០២៥ខាងមុខ អ្នកអភិវឌ្ឍន៍គំរោង “បំពេញរាជ” នឹងសាងសង់ស្តាតថ្មីមួយទៀតតាមស្តង់ដាអន្តរជាតិ ដែលអាចផ្ទុកអ្នកទស្សនា បានចំនួនរហូតដក់២៥,០០០នាក់ ដែលជាតំណាងឲ្យមុខមាត់ និងលើកកំពស់កិត្យានុភាពខេត្តសៀមរាបទាំងមូល។លោកម៉េត មករាបានបន្តទៀតថា “បំពេញរាជ” បាននិងកំពុងលក់ដីលំហែរមួយចំនួន រៀបចំសាងសង់ផ្ទះអាជីវកម្ម រៀបចំរមណីយដ្ឋាន និងសេវាកម្មបំរើសេវាកំសាន្ត និងស្នាក់នៅតាមស្តង់ដាអន្តរជាតិជាច្រើនទៀត។គំរោងនេះ បានទទួលការគាំទ្រពីអភិបាល នៃគណៈអភិបាលខេត្តសៀមរាប លោកទៀ សីហា ដែលលោកតែងតែបានគាំទ្រដល់ការអភិវឌ្ឍន៍របស់វិស័យឯកជន ដើម្បីផ្តល់ការងារដល់ប្រជាពលរដ្ឋ និងចូលរួមកាត់បន្ថយភាពក្រីក្រ របស់ប្រជាជននៅមូលដ្ឋានផងដែរ។

ស្រុកបន្ទាយស្រី ខេត្តសៀមរាប បានក្លាយជាស្រុកដ៏លេចធ្លោមួយក្នុងខេត្តសៀមរាប បន្ទាប់ពីការដឹកនាំរបស់លោកឃឹម ហ្វីណង់អតីតអភិបាលស្រុកនេះ ដែលបច្ចុប្បន្នលោកបានផ្លាស់ប្តូរតួនាទី មកជាអភិបាលរងខេត្តសៀមរាប ខណៈអភិបាលស្រុកថ្មី ក៏ជាបុគ្គលមានឆន្ទៈមោះមុត ក្នុងការរួមចំណែកក្នុងការអភិវឌ្ឍន៍សក្តានុពល និងទាញយកសក្តានុពល ដែលមានស្រាប់មកប្រើប្រាស់ ឲ្យកាន់តែមានប្រសិ​ទ្ឋ​ភាព និងផ្តល់ប្រាក់ចំណូល ដើម្បីបង្កើនមូលដ្ឋានសេដ្ឋកិច្ចដល់ស្រុកនេះផងដែរ។

លោកម៉េត មករាបានបន្តថា រហូតមកទល់ពេលនេះ ហេដ្ឋារច​នាសម្ព័ន្ឋនានា ក្នុងគំរោងនេះបានបញ្ចប់បណ្តើរៗ ស្របពេលភ្ញៀវទេសចរណ៍ជាតិ អន្តរជាតិបានមកកំសាន្តជាហូរហែរ ដោយពួកគេអាចមកអង្គុយញាំកាហ្វេ បោះតង់សំរាកលំហែរ ជិះទូកកាយ៉ាក់ ស្ទូចត្រី និងមើលដើមឈើធំៗរាប់រយដើម ដែលយើងបានដាំ ដើម្បីបង្ហាញពីសក្តានុពលគំរោងនេះ ក៏ដូចជា បង្ហាញភ្ញៀវទេសចរណ៍ជាតិ អន្តរជាតិមកសិក្សាស្វែងយល់ ពីធនធានធម្មជាតិដ៏សម្បូរបែបរបស់កម្ពុជា។

ជាមួយគ្នានេះ លោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានស្វាគមន៍ការអភិវឌ្ឍគំរោងបែបនេះ ដោយ​សារក្រៅពីប្រាសាទបុរាណ កម្ពុជាត្រូវការការវិនិយោគពីវិស័យឯកជន ដើម្បីអភិវឌ្ឍន៍រមណីយដ្ឋានកែច្នៃ កាន់តែច្រើនថែមទៀត ធ្វើយ៉ាងណាឲ្យភ្ញៀវទេសចរណ៍អន្តរជាតិ អាចកំសាន្តបានច្រើន និងចំណាយពេលស្នាក់នៅកម្ពុជាកាន់តែយូរជាងមុន។លោកបន្តថា “គោលនយោបាយរបស់រដ្ឋាភិបាល ក៏ដូចជាវិស័យឯកជន គឺចង់បានភ្ញៀវទេសចរណ៍មកទស្សនាកម្ពុជាច្រើន និងស្នាក់នៅកាន់តែយូរ ដើម្បីពួកគេចំណាយប្រាក់ច្រើននៅទីនេះ”៕

ដោយៈ គង់ សូរិយា

        ភ្នំពេញៈ គិតរហូតមកទល់ពេលនេះ ការសាងសង់គំរោងទួលគោកលែន សម្រេចបានប្រមាណ៨០ភាគរយហើយ ខណៈការលក់គំរោងនេះកំពុងមានវឌ្ឍនភាពយ៉ាងប្រសើរ។ចំនែកនៅជាន់ខាងលើដែលជាជាន់Facility ដែលមានអាងហែលទឹក បន្ទប់ហាត់ប្រាណ ស្ទីម សូណា ស្កាយបារ ។ល។ បានជិតរួចរាល់ហើយ។ បច្ចុប្បន្នយើងកំពុងសម្រុកបង្ហើយ ការងារផ្នែកជាន់ទី២១ ដែលជាជាន់លើគេបង្អស់ដែលមានប្រភេទPenthouse។

លោកឌី ណារិទ្ឋ នាយកផ្នែកទីផ្សារនៃគំរោងទួលគោកលែន បានមានប្រ​សាសន៍កាលពីពេលថ្មីៗនេះថា គម្រោងទួលគោកលេនមានកម្ពស់២១ជាន់ ដែលបែងចែកជា៤ប្រភេទ។ ចំណែកជាន់ផ្ទាល់ដី គឺជាប្រភេទShophouse ចាប់ពីជាន់ទី២ ដល់ជាន់ទី១៨គឺជាប្រភេទយូនីតធម្មតា ដែលមានចំនួន២៣យូនិតក្នុង១ជាន់ ក្នុងនោះយើងមានប្រភេទStudio , one bedroom and two bedroom ដែលមានផ្ទៃក្រឡា ចាប់ពីជាង២០ម២ រហូតដល់៥៦ម២។សម្រាប់ជាន់ទី១៩វិញ គឺជាប្រភេទLoft ដែលមានតែមួយគត់ក្នុងតំបន់ទួលគោក នាពេលបច្ចុប្បន្ននេះ មានទាំងអស់២២យូនីតតែប៉ុណ្ណោះ ហើយយើងទើបតែបើកលក់ក្នុងខែនេះទេ តែយើងបានលក់អស់៦យូនិតបាត់ទៅហើយ។ សម្រាប់ជាន់ទី២០ គឺជាជាន់Facilityដែលមានអាងហែលហែលទឹក បន្ទប់ហាត់ប្រាណ បន្ទប់ប្រជុំ ស្ទីម សូណា។ល។ នៅជាន់លើគេបង្អស់គឺជាប្រភេទPenthouse។

លោកបន្តថា ចំពោះតម្លៃវិញបច្ចុប្បន្ននេះ យើងមានចាប់ពីតម្លៃជាង៤ម៉ឺនដុល្លាឡើង ទៅសម្រាប់យូនីតធម្មតា និងជាង៦ម៉ឺនដុល្លាឡើងទៅសម្រាប់ប្រភេទ Loft។ អាចនិយាយបានថា ទួលគោកលេនគឺជាគម្រោង ដែលមានតម្លៃពិសេសជាងគេ ក្នុងពេលបច្ចុប្បន្ននេះ ជាមួយតម្លៃចាប់ផ្តើមពីជាង១៣០០ដុល្លា/ការ៉េតែប៉ុណ្ណោះ។ គិតត្រឹមដើមខែមិថុនានេះ គម្រោងទួលគោកលេនយើងបានសម្រេចការលក់រហូត ដល់ជិត២០០យូនីត ដែលស្មើនឹងជាង៥០% នៃយូនិតសរុប។ ហើយយើងរំពឹងការលក់របស់យើង នឹងនៅតែបន្តកើនឡើង ដោយគ្រោងនឹងលក់ឲ្យអស់ ត្រឹមដើមខែតុលាខាងមុខនេះ។ និយាយទៅយើងនឹងលក់ឲ្យអស់មុនថ្ងៃប្រគល់ផ្ទះតែម្តង។

លោកឌី ណារិទ្ឋបានបន្តថា សក្តានុពលជុំវិញទួលគោកលេនមានដូចជា ទី១.ផ្នែកហិរញ្ញវត្ថុ៖ តាមបណ្តោយផ្លូវ២៨៩ និង ៥១៦ គឺជាបណ្តុំនៃធនាគារសឹង តែទាំងអស់នៃប្រទេសកម្ពុជា យើងគ្រាន់តែដើរចេញក្រៅមិនដល់៣នាទី គឺមកដល់ធនាគារដែលយើងត្រូវការប្រើប្រាស់សេវាកម្ម។ទី២. ផ្នែកអប់រំ៖  តំបន់នេះមានសាលារដ្ឋ និងឯកជនជាច្រើននៅជិតគម្រោងរបស់យើង ជាពិសេសសាលាអន្តរជាតិធំៗ ស្ថិតនៅតាមបណ្តោយផ្លូវ៣១៥ និងតាមផ្លូវតូចៗជាច្រើនទៀត ដែលងាយស្រួលមែនទែនដល់អតិថិជនទួលគោកលេន ដែលមានកូនតូចៗដែលត្រូវចូលមត្តេយ្យសិក្សា ឬកូនៗដែលរៀនថ្នាក់បថម ឬអនុវិទ្យាល័យអីជាដើម។

ទី៣.ការកម្សាន្ត៖ ធ្វើដំណើរដោយថ្មើរជើងត្រឹមតែ៣នាទី ពីទួលគោកលេន ទៅដល់TKAvenue ដែលជាបន្តុំនូវផ្សារទំនើប ភោជនីយដ្ឋានចម្រុះជាតិសាសន៍ ហាងកាហ្វេល្បីៗ រោងកុន។ល។  រីឯនៅខាងកើតទួលគោកលេន ធ្វើដំណើរតាមរយៈយានយន្ត មិនដល់៥នាទីផងយើងនឹងទៅដល់ផ្សារទំនើប Khalendle mall និង​Eden garden ដែលមានទំហំធំជាងTK avenue រហូតដល់ទៅ៣ដងឯណោះ។ ក្រលេកមកខាងលិច និងខាងជើងទួលគោកលេនវិញ គ្រាន់តែធ្វើដំណើរតាមយានជំនះប្រហែល១០នាទី យើងនឹងមកដល់ផ្សារម៉ាក្រូ ជីបម៉ុង Mall , Aeon sensok ជាដើម ដូច្នេះពួកគាត់មិនបាច់បារម្មណ៍ថា ត្រូវធ្វើដំណើរឆ្ងាយសម្រាប់ការដើរផ្សារ ក៏ដូចជារកកន្លែងកម្សាន្តផ្សេងៗតាមចិត្តចង់។

លោកបន្តថា បើនិយាយពីពេលយប់វិញ សឹងតែគ្រប់ផ្លូវនៅជុំវិញទួលគោកលេនគឺមានផាប់ និងក្លឹបកម្សាន្តជាច្រើនផងដែរ។ ដូច្នេះពួកគាត់មិនបាច់ភ័យព្រួយ អំពីការធ្វើដំណើរឆ្ងាយ ឬបារម្មណ៍ពីសុវត្ថិភាពក្នុងការធ្វើដំណើរទាំងទៅទាំងមកវិញផងដែរ។

ទី៤.វិស័យសុខាភិបាល៖ នៅជិតៗមានឱសថស្ថាន ក៏ដូចជាក្លីនិកឯកជនជាច្រើន ឬធ្វើដំណើរប្រហែលតែ១០នាទីប៉ុណ្ណោះ ទៅដល់មន្ទីរពេទ្យកាល់ម៉ែត្រ ឬមកទៅខាងមន្ទីរពេទ្យព្រះកុសុមៈ(ពេទ្យលោកសង្ឍ)ក៏បាន ។​ ​

គិតត្រឹមឆមាសទី១ ក្នុងឆ្នាំ២០២៣នេះ ទីផ្សារខុនដូហាក់មានភាពល្អប្រសើរច្រើន បើប្រៀបធៀបទៅនឹងរយៈពេលដូចគ្នា ក្នុងឆ្នាំ២០២១ ២០២២ ជាពិសេសការកើនឡើងអតិថិជន ដែលជាជនជាតិខ្មែរតែម្តង។ ក៏ប៉ុន្តែសម្រាប់ត្រីមាសទី៣នេះ អាចនឹងមានការថមថយបន្តិចបន្តួចវិញ ដោយសារតែកៀកនឹងថ្ងៃបោះឆ្នោត ធ្វើឲ្យអ្នកទិញមួយចំនួនមានការភ័យខ្លាចច្រើន ទៅលើវិស័យអចលនទ្រព្យទាំងមូ​ល មិនថាខុនដូ ឬវិស័យអចលទ្រព្យដទៃទៀត ប៉ុន្តែចំពោះដំណើ​​រការក្នុងទិញលក់ នឹងនៅតែមានសភាពធម្មតា។លោកបន្តថា “យើងរំពឹងថាបន្ទាប់ពីការបោះឆ្នោតរួច កំណើននៃការទិញលក់អចលនទ្រព្យ ជាពិសេសគឺខុនដូនឹងរិតតែប្រសើរទ្វេរឡើង”។ សម្រាប់ទួលគោកលេនយើង គឺជួយសម្រួលដល់អតិថិជនជាច្រើនទៅលើការបង់ប្រាក់។ នៅទីនេះ អតិថិជនគ្រាន់តែទំលាក់ទឹកប្រាក់មុន៣០% គឺយើងនឹងផ្តល់កាដូពិសេស ជាគ្រឿងសង្ហាររឹមមួយឆុត និងបរិក្ខាអគ្គិសនីមួយឆុតផងដែរ។

មិនត្រឹមតែប៉ុណ្ណោះ យើងមានការផ្តល់ជូនការរំលស់ឥតការប្រាក់រហូតដល់ទៅ១៨ខែបន្ថែមទៀត។ ជាពិសេស អតិថិជនអាចបង់រំលស់ ជាមួយធនាគារជាដៃគូរបស់យើង បានរហូតដល់៦០%នៃតម្លៃផ្ទះទាំងមូល ជាមួយអត្រាការប្រាក់ប្រកួតប្រជែងផងដែរ៕