ដោយៈ ចំណាន

    ភ្នំពេញៈ ក្រុមហ៊ុនGrab Holdings Inc. ប្រទេសសិង្ហបុរីបានបង្ហាញពីឆន្ទៈ ក្នុងការពង្រីកវិសាលភាពវិនិយោគនៅកម្ពុជា ស្របពេលវិស័យដឹកជញ្ជូនសាធារណនៅកម្ពុជា កាន់តែមានការរីកចម្រើន។

ព័ត៌មាននេះត្រូវបានលើកឡើងក្នុតឱកាស លោកស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានទទួលជួបសម្តែងការគួរសម និងពិភាក្សាការងារជាមួយ លោក Alex Hungate ប្រធាន និងជានាយកប្រតិបត្តិការ (COO) នៃក្រុមហ៊ុន Grab Holdings Inc. ប្រទេសសិង្ហបុរី ក្នុងឱកាសដែលលោក កំពុងបំពេញទស្សនកិច្ចការងារនៅកម្ពុជា។

ក្នុងជំនួបប្រកបដោយអត្ថន័យនេះ លោកឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅ ចំពោះលោក Alex Hungate និងគណៈប្រតិភូក្រុមហ៊ុនGrab ដែលជាក្រុមហ៊ុនបច្ចេកវិទ្យាឈានមុខគេមួយក្នុងតំបន់អាស៊ីអាគ្នេយ៍។

លោកបានវាយតម្លៃខ្ពស់ ចំពោះការប្តេជ្ញាចិត្តរបស់ក្រុមហ៊ុន ក្នុងការបន្តវិនិយោគ និងពង្រីកសេវាកម្មទំនើបៗនៅកម្ពុជា ដែលរួមចំណែ​កដល់ការជំរុញសេដ្ឋកិច្ចឌីជីថល ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល។

ជាកិច្ចឆ្លើយតប លោកAlex Hungate បានជម្រាបជូនលោក ឧបនាយករដ្ឋមន្ត្រី អំពីវឌ្ឍនភាព និងបច្ចុប្បន្នភាពនៃប្រតិបត្តិការអាជីវកម្មរបស់ក្រុមហ៊ុនGrab នៅកម្ពុជា។

ខ្លឹមសារសំខាន់ៗនៃកិច្ចពិភាក្សារួមមាន៖ ការពង្រីកវិសាលភាពសេវាកម្ម និងការពិនិត្យលទ្ធភាព ក្នុងការផ្តល់ហិរញ្ញប្បទានដល់ដៃគូសហការរបស់ក្រុមហ៊ុន សំដៅបង្កភាពងាយស្រួល និងពង្រីកវិសាលភាពទីផ្សាររបស់ខ្លួន។

បន្ថែមពីលើនេះ ភាគីទាំងពីរបានផ្លាស់ប្តូរ ទស្សនៈយ៉ាងស៊ីជម្រៅជុំវិញគំនិតផ្តួចផ្តើមបៃតងរបស់កម្ពុជា។ ក្នុងនោះ ក្រុមហ៊ុន Grab ក៏បានបង្ហាញពីឆន្ទៈ និងវិធីសាស្ត្រជាក់ស្តែង ក្នុងការចូលរួមគាំទ្ររាជរដ្ឋាភិបាល ដើម្បីជំរុញការប្រើប្រាស់ថាមពលស្អាត ក្នុងប្រព័ន្ធដឹកជញ្ជូននៅកម្ពុជាផងដែរ។

លោកឧបនាយករដ្ឋមន្ត្រី បានបញ្ជាក់ជាថ្មីនូវការត្រៀមខ្លួនជាស្រេចរបស់ក្រុមប្រឹក្សាអភិវឌ្ឍន៍កម្ពុជា ក្នុងការសម្របសម្រួល និងគាំទ្រដល់គម្រោងវិនិយោគនានារបស់ក្រុមហ៊ុន៕

ដោយៈ ម៉ាណា

    ភ្នំពេញៈ រដ្ឋមន្រ្តីក្រសួងព័ត៌មាន លោកនេត្រ ភក្ត្រា បានលើកទឹកចិត្តឱ្យប្រព័ន្ធផ្សព្វផ្សាយទាំងអស់ ចូលរួមផលិត និងផ្សព្វផ្សាយខ្លឹមសារដែលមាន គុណភាព មានមូលដ្ឋានលើការពិត មានក្រមសីលធម៌។

ពិសេសព័ត៌មានផ្តោតលើដំណោះស្រាយ ដើម្បីឱ្យប្រជាពលរដ្ឋ ជាពិសេសឪពុក ម្តាយ អាណាព្យាបាល គ្រូបង្រៀន យុវជន និងសហគមន៍ យល់កាន់តែច្បាស់ពីផលប៉ះ ពាល់នៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់។

ការលើកឡើងបែបនេះរបស់រដ្ឋមន្ត្រី នេត្រ ភក្ត្រា បានធ្វើឡើងនៅក្នុងក្នុងសិក្ខាសាលាផ្សព្វផ្សាយស្តីពី “ការបង្ការទប់ស្កាត់ផលប៉ះពាល់ នៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់” នៅទីស្ដីការក្រសួងព័ត៌មាន នាថ្ងៃទី៣០ ខែមេសា ឆ្នាំ២០២៦នេះ។

នាឱកាសនោះដែរ លោករដ្ឋមន្ត្រី នេត្រ ភក្ត្រា ក៏សូមវាយតម្លៃខ្ពស់ចំពោះកិច្ចខិតខំប្រឹងប្រែងទាំងនេះ ព្រោះការងារយេនឌ័រ ការការ​ពារក្មេងស្រី និងការទប់ស្កាត់អាពាហ៍ពិពាហ៍នៅវ័យក្មេង មិនមែនជាការងាររបស់វិស័យណាមួយតែឯងឡើយ ប៉ុន្តែជាបេសកកម្មរួមរបស់រាជរដ្ឋាភិបាល ស្ថាប័នសាធារណៈប្រព័ន្ធផ្សព្វផ្សាយ គ្រួសារ សាលារៀន សហគមន៍ អង្គការដៃគូ វិស័យឯកជន និងសង្គមទាំងមូល។

លោករដ្ឋមន្ត្រី នេត្រ ភក្ត្រា បានបញ្ជាក់ថា “ក្រសួងព័ត៌មានមានតួនាទីសំខាន់ណាស់ក្នុងការជំរុញការ យល់ដឹងសាធារណៈ ការផ្សព្វ​ផ្សាយព័ត៌មានត្រឹមត្រូវ ការបំបែកបទដ្ឋានសង្គមអវិជ្ជមាន និងការលើក កម្ពស់សារព័ត៌មានដែលគោរពសិទ្ធិ សេចក្តីថ្លៃថ្នូរ និងសុវត្ថិភាពរបស់ក្មេងស្រី ស្ត្រី និងកុមារ”។

ទន្ទឹមនឹងនេះដែរ លោករដ្ឋមន្ត្រី នេត្រ ភក្ត្រា បានបន្តថា ក្នុងនាមជាស្ថាប័នដឹកនាំវិស័យព័ត៌មាន ក្រសួងព័ត៌មានមិនត្រឹមតែមានតួនាទីផ្សព្វផ្សាយសារអប់រំប៉ុណ្ណោះទេ ប៉ុន្តែថែមទាំងមានតួនាទីជំរុញឱ្យប្រព័ន្ធផ្សព្វផ្សាយ ក្លាយជាដៃគូយុទ្ធសាស្ត្ររបស់រាជរដ្ឋាភិបាល ក្នុងការផ្លាស់ប្តូរផ្នត់គំនិតសង្គម បំបាត់ការរើសអើង និងលើកកម្ពស់សិទ្ធិរបស់ក្មេងស្រី និងស្ត្រីវ័យជំទង់។

បន្ថែមពីនេះ លោករដ្ឋមន្ត្រីនេត្រ ភក្ត្រា បានបញ្ជាក់ទៀតថា ប្រព័ន្ធផ្សព្វផ្សាយ អាចក្លាយជាថាមពលវិជ្ជមានដ៏សំខាន់ ក្នុងការផ្លាស់ប្តូរឥរិយាបថគ្រួសារ សហគមន៍ និងយុវជន។ ការផ្សព្វផ្សាយត្រឹមត្រូវ ទាន់ពេលវេលា មានក្រមសីលធម៌ និងមានការទទួលខុសត្រូវ អាចជួយឱ្យសង្គមយល់កាន់តែច្បាស់ថា ការរៀបអាពាហ៍ពិពាហ៍មុនវ័យ មិនមែនជាប្រពៃណី ដែលត្រូវបន្តដោយគ្មាន ការពិចារណានោះទេ ប៉ុន្តែ ជាបញ្ហាដែលអាចប៉ះពាល់ ដល់អនាគតក្មេងស្រី និងអនាគតរបស់ជាតិ។

លោករដ្ឋមន្ត្រី នេត្រ ភក្ត្រា បានគូសបញ្ជាក់ថា អ្នកសារព័ត៌មានគួរចូលរួម ដោយប្រើប្រាស់វិជ្ជាជីវៈរបស់ខ្លួន ដើម្បីបញ្ជាក់ការពិត បំបា​ត់ការយល់ខុស បង្ហាញរឿងរ៉ាវវិជ្ជមានរបស់ក្មេងស្រី ដែលបានបន្តការសិក្សា និងជោគជ័យក្នុងជីវិត ព្រមទាំងលើកឡើងពីសំឡេងរបស់ស្ត្រី ក្មេងស្រី និងគ្រួសារដែលត្រូវការការគាំទ្រ។

លោកនេត្រ ភក្រាបានបញ្ជាក់ថា “ការផ្សព្វផ្សាយមិនគួរបង្កការអៀនខ្មាស មិនគួរបន្ទោសជនរងគ្រោះ និងមិនគួរធ្វើឱ្យក្មេងស្រីណាម្នាក់រងការរើសអើងបន្ថែមឡើយ”។ លោកបន្ថែមថា “ផ្ទុយទៅវិញ សារព័ត៌មាន ត្រូវជួយបង្កើតបរិយាកាសសង្គមមួយ ដែលមានការយោគយល់ការគាំទ្រ និងការផ្តល់ឱកាស”៕

ដោយៈ ចំណាន

    ភ្នំពេញៈ នៅមុនដំណាច់ឆ្នាំ២០២៨ រាជរដ្ឋាភិបាលត្រូវបង្កើតឱ្យបាននូវប្រព័ន្ធគ្រប់គ្រង ការវិនិយោគសាធារណៈរួមមួយ របស់ជាតិ ដែលធានាបាននូវភាពឆ្លើយតប ប្រសិទ្ធភាព ស័ក្ដិសិទ្ធភាព តម្លាភាព គណនេយ្យភាព និងចីរភាពនៃការបែងចែក និងការប្រើប្រាស់ធនធានសាធារណៈ។

គោលនយោបាយនេះ ស្របតាមឧត្ដមានុវត្ដន៍ជាអន្ដរជាតិ និងបរិការណ៍ជាក់ស្ដែងរបស់កម្ពុជា សំដៅរួមចំណែកបង្កើនល្បឿននៃការធ្វើពិពិធកម្មសេដ្ឋកិច្ច និងពង្រឹងសមត្ថភាពប្រកួតប្រជែងដែលជាមូលដ្ឋានគ្រឹះ ក្នុងការធានាបាននូវកំណើនសេដ្ឋកិច្ចខ្ពស់ ប្រកបដោយចីរភាព និងបរិយាប័ន្ន ឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០។

ព័ត៌មាននេះត្រូវបានលើកឡើងដោយលោកប៉ែន ធីរុង្គ រដ្ឋលេខា​

ធិការ នៃក្រសួងសេដ្ឋកិច្ចនិងហិរញ្ញវត្ថុ (ក.ស.ហ.វ.) និងជាអគ្គលេខាធិការរង នៃអគ្គលេខាធិការដ្ឋានគណៈកម្មាធិការ ដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (អ.គ.ហ.) ដែលបានដឹកនាំរៀបចំសិក្ខាសាលាផ្សព្វផ្សាយស្តីពី “យុទ្ធសាស្ដ្រស្ដីពីការកែទម្រ​ង់ប្រព័ន្ធគ្រប់គ្រង ការវិនិយោគសាធារណៈបច្ចុប្បន្នកម្ម ឆ្នាំ២០២៥-២០២៨”។

សិក្ខាសាលាផ្សព្វផ្សាយនេះ ត្រូវបានរៀបចំឡើងដោយមានការអញ្ជើញចូលរួមផ្ទាល់ និងតាមប្រព័ន្ធអនឡាញ ពីលោក លោកជំទាវ លោក លោកស្រី តំណាងក្រសួង ស្ថាប័ន រដ្ឋបាលរាជធានី ខេត្ត សហគ្រាសសាធារណៈ គ្រឹះស្ថានសាធារណៈរដ្ឋបាល អគ្គនាយកដ្ឋាន/អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ, រដ្ឋបាលរាជធានី ខេត្ដ, មន្ទីរជំនាញពាក់ព័ន្ធ តំណាងដៃគូអភិវឌ្ឍន៍គន្លឹះៗ, ព្រមទាំងមន្ត្រីជំនាញជាន់ខ្ពស់ និងមន្ត្រីជំនាញ នៃអ.គ.ហ. សរុបប្រមាណ ៤០០រូប។

សិក្ខាសាលានេះ បានរៀបចំឡើងក្នុងគោលបំណងផ្សព្វផ្សាយ លើកកម្ពស់ការយល់ដឹង និងជំរុញការអនុវត្តយុទ្ធសាស្ត្រស្ដីពី ការកែទម្រង់ប្រព័ន្ធ គ្រប់គ្រងការវិនិយោគសាធារណៈបច្ចុប្បន្នកម្ម ឆ្នាំ២០២៥-២០២៨ ជូនដល់ក្រសួង ស្ថាប័ន អគ្គនាយកដ្ឋាន/អង្គភាពស្ថិតក្រោមឱវាទក្រសួងសេដ្ឋកិច្ចនិងហិរញ្ញវត្ថុ (ក.ស.ហ.វ.), សហគ្រាសសាធារណៈ គ្រឹះស្ថានសាធារណៈរដ្ឋបាល និងរដ្ឋបាលរាជធានី ខេត្ដ ដើម្បីចូលរួមអនុវត្ដយុទ្ធសាស្ដ្របច្ចុប្បន្នកម្មនេះ ប្រកបដោយការយកចិត្ដទុកដាក់ និងបុរេសកម្ម ដើម្បីឆ្លើយតបទៅនឹងចក្ខុវិស័យ គោលបំណង និងគោលដៅនៃយុទ្ធសាស្ដ្របច្ចុប្បន្នកម្មនេះ។

សិក្ខាសាលាផ្សព្វផ្សាយនេះ ប្រព្រឹត្តទៅដោយមានការធ្វើបទបង្ហាញចំនួន៣ ដោយមន្ត្រីជំនាញជាន់ខ្ពស់ នៃ អ.គ.ហ. តំណាងក្រសួងបរិស្ថាន និងតំណាងអគ្គនាយកដ្ឋានសេដ្ឋកិច្ចឌីជីថល ដូចជា៖ ១) យុទ្ធសាស្ដ្រស្ដីពីការកែទម្រង់ប្រព័ន្ធគ្រប់គ្រង ការវិនិយោគសាធារណៈបច្ចុប្បន្នកម្មឆ្នាំ២០២៥-២០២៨។ ២) វឌ្ឍនភាព និងទិសដៅការងារពាក់ព័ន្ធការគ្រប់គ្រងការវិនិយោគសាធារណៈ របស់ក្រសួងបរិស្ថាន និង៣) ក្របខ័ណ្ឌនិម្មាបនកម្មប្រព័ន្ធអេកូឡូស៊ីឌីជីថល សម្រា​ប់ការគ្រប់គ្រងគម្រោងវិនិយោគសាធារណៈ៕