ដោយៈ ហ្វីអូណា

        ពោធិសាត់់ៈ អនុរដ្ឋលេខាធិការក្រសួងបរិស្ថាន លោក ជួប ប៉ារីស៍ បានឱ្យដឹងថា រាជរដ្ឋាភិបាលកម្ពុជា មានផែនការពង្រីកទំហំផ្ទៃដីព្រៃឈើ ដើម្បីលក់ឥណទានកាបូនឱ្យបាន៤លានហិកតា នៅត្រឹមឆ្នាំ២០២៤។

ជាមួយគ្នានេះ រដ្ឋាភិបាលគ្រោងពង្រីកឱ្យបានផ្ទៃដីគ្រប់ដណ្តប់ព្រៃឈើជាង ២លានហិកតាបន្ថែមទៀត នៅត្រឹមឆ្នាំ២០២៤ ខណៈបច្ចុប្បន្ន បាននិងកំពុងលក់ក្នុងទំហំព្រៃឈើជិត២លានហិកតា ក្នុងតំបន់ការពារធនធានធម្មជាតិ។

លោក ជួប ប៉ារីស៍ បានឱ្យដឹងដូចនេះក្នុងវគ្គបណ្តុះបណ្តាល និងដំណើរទស្សនកិច្ច ក្នុងក្របខ័ណ្ឌនៃយុទ្ធនាការជាមួយ ប្រព័ន្ធផ្សព្វផ្សា​យ និងអ្នកសារព័ត៌មានក្នុងសុក ដើម្បីស្វែងយល់ពីការអនុវត្ត “កម្មវិធីប្រយុទ្ធនឹងការប្រែប្រួលអាកាសធាតុនៅកម្ពុជា” ចាប់ពីថ្ងៃទី១៣ ដល់ថ្ងៃទី១៦ ខែមិថុនា ឆ្នាំ២០២៣ នៅខេត្តពោធិ៍សាត់ ដែលជាខេត្ត បាននិងកំពុងអនុវត្តគម្រោងនិរន្តរភាពបរិស្ថាន គម្រោងរេដបូកនៅតំបន់ជួរភ្នំក្រវាញកណ្តាល និងកម្មវិធីលើកកម្ពស់ជីវភាពសហគមន៍ ដើម្បីបញ្ឈប់ការចូលព្រៃកាប់ឈើ សម្រាប់ជាប្រយោជន៍ទុកលក់ឥណទានកាបូន និងជាជម្រករបស់សត្វព្រៃ។លោកអនុរដ្ឋលេខាធិការ បានបញ្ជាក់ថា ផ្ទៃដីគ្រប់ដណ្តប់ព្រៃឈើ ដែលនឹងត្រូវលក់ឥណទានកាបូន បានបន្ថែមទៀតនៅក្នុងអំឡុងឆ្នាំ២០២៤ មានតំបន់ការពារធម្មជាតិក្រវាញកណ្តាល តំបន់ការពារធម្មជាតិភ្នំសំកុស ក្នុងខេត្តពោធិ៍សាត់ និងតំបន់ការពារធម្មជាតិនៅក្នុងខេត្តព្រះវិហារ។

ចំពោះចំណូល ដែលបានមកពីការលក់ឥណទានកាបូន នឹងត្រូវបានចាក់ចូលទៅសហគមន៍មូលដ្ឋាននានា នៅជុំវិញដែនជម្រកសត្វព្រៃ និងតំបន់ការពារធម្មជាតិ ដើម្បីជំរុញការចូលរួមការពារ និងអភិរក្សធនធានធម្មជាតិ និងសត្វព្រៃ ជាពិសេស ចូលរួមចំណែកដល់ការពង្រឹងសេដ្ឋកិច្ចរបស់ប្រជាសហគមន៍ សំដៅលុបបំបាត់ការចូលព្រៃកាប់ឈើ និងបរបាញ់ ឬដាក់អន្ទាក់ចាប់សត្វព្រៃ។

ចាប់ពីឆ្នាំ២០១៦ កម្ពុជារកចំណូលបានប្រមាណ១១,៦លានដុល្លារ ពីការលក់ឥណទានកាបូនពីព្រៃឈើ នៅតំបន់ជួរភ្នំក្រវាញ ដែនជម្រកសត្វព្រៃកែវសីមា នៃខេត្តមណ្ឌលគិរី និងគម្រោងរេដបូកនៅតំបន់ព្រៃឡង់។

យោងតាមសេចក្តីប្រកាសព័ត៌មាន របស់អង្គការសម្ព័ន្ធមិត្តសត្វព្រៃ (WA) បានឱ្យដឹងថា គម្រោងរេដបូក(Redd+) ជួរភ្នំក្រវាញខាងត្បូង បានបង្កើតឱកាសចិញ្ចឹមជីវិត សម្រាប់សហគមន៍មូលដ្ឋាន និងបានជួយគាំទ្រ ជីវភាពរស់នៅរបស់សហគមន៍ចំនួន២៩ ដែលជាទីលំនៅដ្ឋានរបស់ប្រជាពលរដ្ឋប្រមាណ៤ពាន់គ្រួសារ។ ការជួយគាំទ្រនេះរួមមាន ការជួយគាំទ្រដល់វិស័យទេសចរណ៍ធម្មជាតិ កសិកម្ម និងអាហារូបករណ៍ដល់យុវជន និងការអភិវឌ្ឍហេដ្ឋា រចនាសម្ព័ន្ធ ដូចជា អណ្តូងទឹក និងផ្លូវថ្នល់ ជាដើម។កាលពីមុនប្រជាពលរដ្ឋចូលព្រៃ ដើម្បីកាប់ឈើបានលុយ តែឥឡូវប្រជាពលរដ្ឋ បានចូលរួមរក្សាព្រៃឈើដើម្បីបានលុយ និងបានច្រើជាងកាប់ឈើ ហើយក៏ជាប្រភពមិនចេះរីងស្ងួត។ ការរួមគ្នារក្សាព្រៃឈើឈរជាផលប្រយោជន៍ សម្រាប់សហគមន៍នៅតំបន់ការពារធម្មជាតិផ្ទាល់ ក៏ដូចជាសេដ្ឋកិច្ចជាតិទាំងមូល៕

ដោយៈ ហ្វីអូណា

ភ្នំពេញៈ លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក UENO Atsushi ឯកអគ្គរាជទូតជប៉ុនប្រចាំកម្ពុជា នឹងអញ្ជើញចុះហត្ថលេខារួមគ្នា នៅថ្ងៃទី២០ ខែមិថុនា ឆ្នាំ២០២៣ លើលិខិតប្ដូរសារ និងឯកសារពាក់ព័ន្ធមួយចំនួន។

ឯកសារប្តូរសារសំខាន់ៗទាំងនោះមានដូចជា ទី១. ឥណទានសម្បទានប្រាក់យ៉េន ដែលមានទឹកប្រាក់ចំនួន២៣.៦៩២ លានយ៉េន (ប្រមាណ១៧២,៩៣ លានដុល្លារអាមេរិក) សម្រាប់ការអនុវត្ត “គម្រោ​ងកែលម្អ ការតភ្ជាប់ផ្លូវជនបទ”និងទី២ ឥណទានសម្បទានប្រាក់យ៉េន ដែលមានទឹកប្រាក់ចំនួន២.០៨១លានយ៉ន (ប្រមាណ ១៥,១៨ លានដុល្លារអាមេរិក) សម្រាប់ការអនុវត្ត “គម្រោងពង្រីកសមត្ថភាព ផ្គត់ផ្គង់ទឹកស្អាតខេត្តសៀមរាប ដំណាក់កាលទី៣”។
ការផ្តល់ជំនួយខាងលើ បញ្ជាក់ពីការប្តេជ្ញាចិត្តឥតងាកររបស់ជប៉ុនក្នុងការគាំទ្រដល់កិច្ច ខិតខំប្រឹងប្រែងជាបន្តបន្ទាប់របស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសង្គម-សេដ្ឋកិច្ច។

ការគាំទ្រនេះ ក៏នឹងរួមចំណែកផងដែរ ដល់ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការ ដ៏ជិតស្និទ្ធរវាងប្រទេសទាំងពីរ ដែល នាពេលថ្មីនេះៗបានតម្លើងទំនាក់ទំនងទ្វេភាគី ទៅជាកម្រិត “ភាពជាដៃគូយុទ្ធសាស្ត្រគ្រប់ជ្រុងជ្រោយ” ខណៈពេលដែលប្រទេសទាំងពីរកំពុងប្រារព្ធខួប អនុស្សាវរីយ៍លើកទី៧០ឆ្នាំ នៃទំនាក់ទំនងការទូតរវាងប្រទេសទាំងពីរ៕

        ដោយៈ គង់ ហ្វីអូណា

        កំពង់ស្ពឺៈ សម្តេចតេជោ ហ៊ុន សែន នាយករដ្ឋមន្ត្រីកម្ពុជា​ បានថ្លែងថា ប្រទេសខ្លះកំពុងដំឡើងថ្លៃអគ្គិសនី តែសម្រាប់ប្រទេសកម្ពុជាមិនឡើងថ្លៃទេ។​

សម្តេចតេជោបានបន្តថា អគ្គិសនីកម្ពុជាធ្វើអាជីវកម្មមិនចំណេ​ញទេ ហើយបើចំណេញ ក៏ចំណេញតិច ដោយរដ្ឋឧបត្ថម្ភទុន។ សម្តេចបានលើកឡើងដូចនេះ ក្នុងឱកាសអញ្ជើញជួបសំណេះសំ​ណាល​ជាមួយកម្មករនិយោជិត២ម៉ឺននាក់​ នៅស្រុក​គងពិសី ខេត្តកំពង់​ស្ពឺ​ កាលពីចុងសប្តាហ៍មុន ។សម្តេចតេជោ ហ៊ុន សែន ក៏បានបញ្ជាក់ថា​ នៅតាមភូមិជាទូទៅប្រមាណ៩៩ភាគរយ​ មានអគ្គិសនីប្រើ តែមានតែភូមិថ្មីៗដែលទើបតែកើតបួនប្រាំផ្ទះទេ មិនទាន់មានភ្លើងអគ្គិសនីទៅដល់។​ អត់ទាន់មានអគ្គិសនីទៅដល់ពិតមែន ក៏ប៉ុន្តែប្រជាពលរដ្ឋប្រើសូឡា ប្រើអាគុយ មិនដុតចន្លុះទេ ពីមុនសម្តេចជិះយន្តហោះ បើក្រឡេកមើលក្រោមឆ្លងកាត់ប្រទេសជិតខាង ឆ្លងចូលដល់ព្រំដែនកម្ពុជាងងឹតឈឹង មកដល់ភ្នំពេញទើបភ្លឺ ក៏ប៉ុន្តែឥឡូវចេញពីព្រំដែនថៃ ព្រំដែនឡាវចូលមកក្នុងទឹកដីកម្ពុជា តាមភូមិមានភ្លើងភ្លឺ។ មិនដូចពួកចង្រៃខ្លះវាថា ដឹកនាំប្រទេសខ្ទេចខ្ទាំនោះទេ។

សម្តេចតេជោ ហ៊ុន សែន បានលើកឡើងយ៉ាងដូច្នេះថា​ “ស្បថឲ្យងាប់ទាំងម៉ែ ទាំងពូជឯង ទៅថាពិតជាខ្ទេចខ្ទាំមែនទេ?​ គ្មានអ្វីអត់ជាងក្រោយឆ្នាំ១៩៧៩ ក្រោយរំលំប៉ុលពតទេ គ្មានអីស៊ី”។

សម្តេចតេជោ ហ៊ុន សែន បានប្រាប់កម្មករថា​ អាចសួរជីដូនជីតាថា ពីមុនយ៉ាងម៉េចលំបាកយ៉ាងម៉េច ប្រហែលជាឪពុកម្ដាយរបស់ក្មួយៗខ្លះជាកុមារជំនាន់ប៉ុលពត៕

ដោយៈ សុខុម

ហាណូយ: កាសែតអនឡាញ Vietnamnet បានចុះផ្សាយថា ប្រាក់ចំណូលជាមធ្យម របស់មន្ត្រីសាធារណៈនៅវៀតណាម គឺទាបជាងប្រទេសជាសមាជិកអាស៊ានជាច្រើន និងទាបជាងមន្រ្តីកម្ពុជាផងដែរ។

ស្ថិតិបានបង្ហាញថា ប្រាក់ចំណូលជាមធ្យមរបស់មន្ត្រីសាធារណៈនៅវៀតណាម គឺទទួលបានក្នុងមួយខែ ខ្ទង់៤២៥ដុល្លារអាមេរិក បើធៀបនឹង២.៤១០ដុល្លារអាមេរិកនៅប្រទេសថៃ ១.២៣០ដុល្លារអាមេរិកនៅម៉ាឡេស៊ី និង៧២៣ដុល្លារអាមេរិកនៅកម្ពុជា(សំរាប់មន្រ្តីជាន់ខ្ពស់)។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃសុក្រ ទី១៦ ខែមិថុនា។

លោកស្រី Vu Thi Luu Mai អនុប្រធានគណៈកម្មាធិការហិរញ្ញវត្ថុ និងថវិកានៃរដ្ឋសភាវៀតណាម លើកឡើងថា និស្សិតទើបបញ្ចប់ការសិក្សាថ្មី ដែលចូលបម្រើការងារក្នុងវិស័យសាធារណៈ ទទួលបានប្រាក់ចំណូលជាមធ្យម ត្រឹមតែ១៤៥ដុល្លារអាមេរិកប៉ុណ្ណោះ នៅប្រទេសវៀតណាម។

លោកស្រីបានធ្វើការកត់សម្គាល់ថា រដ្ឋាភិបាលចាំបាច់ត្រូវយកចិត្តទុកដាក់បន្ថែមទៀត ចំពោះគោលនយោបាយប្រាក់ឈ្នួល។

ប្រាក់ចំណូលសម្រាប់មន្ត្រីសាធារណៈ គួរតែត្រូវបានចាត់ទុកថាជាការវិនិយោគលើធនធានមនុស្ស។

លោកស្រី Vu Thi Luu Mai ថ្លែងថា “ប្រទេសរបស់យើងមិនខ្វះអ្នកដែលមានទេពកោសល្យនោះទេ។ យើងមិនខ្វះអ្នកសាទរដែលចង់រួមចំណែកឡើយ ប៉ុន្តែយើងត្រូវការគោលនយោបាយកាន់តែប្រសើរ ដើម្បីបង្កើតការលើកទឹកចិត្តសម្រាប់មន្ត្រីសាធារណៈ”។

កាសែតអនឡាញ Vietnamnet បានចុះផ្សាយថា បញ្ហានេះត្រូវបានលើកឡើង អស់ជាច្រើនទសវត្សរ៍មកហើយ ប៉ុន្តែគ្មានដំណោះស្រាយប្រកបដោយប្រសិទ្ធភាពនោះឡើយ។

យោងតាមក្រសួងមហាផ្ទៃវៀតណាម ឱ្យដឹងថា ក្នុងឆ្នាំ២០១៩ ចំនួនប្រជាពលជន ដែលទទួលបានប្រាក់ខែ និងប្រាក់ឧបត្ថម្ភពីថវិការដ្ឋ រួមទាំងអ្នកទទួលផលគាំពារសង្គមផងដែរនោះ មានប្រមាណ១១លាននាក់។  ក្នុងចំណោមនោះមានមន្ត្រីរាជការ និងមន្ត្រីសាធារណៈប្រមាណ២,៨លាននាក់ដែលទទួលបានប្រាក់ខែ និងប្រាក់ឧបត្ថម្ភពីថវិការដ្ឋ។

ប្រសិនបើអ្នកចូលនិវត្តន៍ និងអ្នកផ្សេងទៀតដែលទទួលបានប្រាក់ខែ និងប្រាក់ឧបត្ថម្ភត្រូវបានរាប់បញ្ចូល នោះចំនួននេះអាចឡើងដល់៧,៥លាននាក់ដែលស្មើនឹង៨,៣% នៃចំនួនប្រជាជនសរុបរបស់ប្រទេសនេះ៕ Vietnam News៕

ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ឧស្សាហកម្មធុនធ្ងន់ ជារោងចក្រផលិតស៊ីម៉ង់ត៍ នឹងវត្តមាននៅលើទឹកដីខេត្តកំពង់ស្ពឺនាពេលខាងមុខបន្ថែមទៀត ខណៈដែលខេត្តនេះ មានរោងចក្រ សហគ្រាសរហូតដល់ ៣៨៥រោងចក្រ និងមានកម្មករេហូតដល់ជាង ១៥ម៉ឺននាក់នោះ។

ក្នុងឱកាសបន្តអញ្ជើញចុះជួបសំណេះសំណាលជាមួយកម្មករ និយោជិតសរុប ១៨ ០១២នាក់ មកពីរោងចក្រ សហគ្រាសចំនួន៧ ដែលកំពុងដំណើរការអាជីវកម្មក្នុងស្រុកសំរោងទង និងស្រុកគងពិសី ខេត្តកំពង់ស្ពឺ ដែលធ្វើឡើង នៅភូមិចាស់ ឃុំព្រៃញាតិ ស្រុកគងពិសី ខេត្តកំពង់ស្ពឺ នាព្រឹកថ្ងៃទី១៧ ខែមិថុនា ឆ្នាំ២០២៣ សម្ដេចតេជោ ហ៊ុន សែន បានថ្លែងថា បន្តិចទៀតមិនយូរប៉ុន្មានទេ ខេត្តកំពង់ស្ពឺនឹងមានឧស្សាហកម្មធុនធ្ងន់ នោះគឺរោងចក្រផលិតស៊ីម៉ង់ត៍ ដែលរោងចក្រផលិតស៊ីម៉ង់ត៍ នឹងវត្តមាននៅទឹកដីខេត្តកំពង់ស្ពឺ ហើយធ្វើឱ្យខេត្តកំពង់ស្ពឺក្លាយទៅជាខេត្តមួយ ដែលផ្គត់ផ្គង់ស៊ីម៉ង់ត៍ សម្រាប់ការសាងសង់នៅទូទាំងប្រទេស។ បើយោងទៅលើអ្នកវិនិយោគដែលបានទៅជួបសម្ដេចថា សមត្ថភាពនៃការផលិតស៊ីម៉ង់ត៍នេះ គឺមានប្រហែល ប្រមាណជា២លានតោន ក្នុងមួយឆ្នាំ។
សម្ដេចតេជោបានបន្តថា ប្រទេសរបស់យើងមានសមត្ថភាពផលិតស៊ីម៉ង់ត៍ដោយខ្លួនឯងបានប្រមាណជា ៩ លានតោងក្នុងមួយឆ្នាំ ប៉ុន្តែតម្រូវការនៃការប្រើប្រាស់ ក្នុងប្រទេសរបស់យើងមានចំនួនកាន់តែច្រើន ដែលម្ខាងគឺការកសាងអគារផ្ទះសម្បែង តែម្ខាងទៀតការកសាងផ្លូវថ្នល់នានាមួយចំនួន ដែលបច្ចុប្បន្ននេះ គឺបានចាប់ផ្ដើមប្រើស៊ីម៉ង់ត៍ចាក់ជាផ្លូវបេតុង។

សម្តេចតេជោនាយករដ្ឋមន្ត្រីបានមានប្រសាសន៍ ដោយមោទកភាពអំពីការរីកចម្រើនជាច្រើនរបស់កម្ពុជាជារួម និងដោយឡែកខេត្តកំពង់ស្ពឺ កាលពី២០ឆ្នាំមុនបានគិតថានឹងបានក្លាយជាខេត្ត លេខ២នៃការអភិវឌ្ឍរីកចម្រើនទេ ជាពិសេសខាងវិស័យឧស្សាហកម្ម ។ប៉ុន្តែឥឡូវនេះខេត្តកំពង់ស្ពឺមានរោងចក្រសហគ្រាសរហូតដល់ ៣៨៥រោងចក្រ និងមានកម្មករេហូតដល់ជាង ១៥ម៉ឺននាក់។ សម្តេចតេជោបានមានប្រសាសន៍ទៀតថា ខេត្តកំពង់ស្ពឺ បច្ចុប្បន្ន គឺបានក្លាយជាខេត្តលំដាប់លេខ២នៃការអភិវឌ្ឍជាបន្តបន្ទាប់ ជាពិសេសវិស័យឧស្សាហកម្ម។ ដូច្នេះស្នើឱ្យបងប្អូនកម្មករនិយោជិត ក៏ដូចជាជនរួមជាតិទាំងអស់ ត្រូវថែរក្សានូវសុខសន្តិភាពនេះឱ្យខាងតែបាន ខណៈមានសន្តិភាពគឺមានការអភិវឌ្ឍ គ្រប់បែបយ៉ាង ជាក់ស្តែងដូចសព្វថ្ងៃនេះរោងចក្រសហគ្រាសបានកំពុងរីកចម្រើជាបន្តបន្ទាប់។
សម្តេចតេជោ ហ៊ុន សែន ថ្លែងសង្កត់ធ្ងន់ថា កត្តាសុខសន្តិភាព និងស្ថិរភាពនយោបាយ ផ្តល់ឱកាសឱ្យកម្ពុជាយើងទាក់ទាញវិនិយោគពីបរទេស ដើម្បីមកផលិតនៅក្នុងស្រុកបម្រើការនាំចេញទៅក្រៅប្រទេស ។ដូច្នេះ បងប្អូនទាំងអស់ត្រូវរក្សាសន្តិភាពនេះឱ្យបាន មិនថាកាលៈទេសៈណានោះទេ។
បើតាមរបាយការណ៍ របស់ អ៊ិត សំហេង រដ្ឋមន្ត្រីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា រោងចក្រ សហគ្រាសទាំង៧ ដែលអនុញ្ញាតឱ្យកម្មករ កម្មការិនីជួបសំណេះសំណាល ជាមួយសម្តេចតេជោ រួមមាន រោងចក្រកាត់ដេរចំនួន៣, ផលិតផលធ្វើដំណើរ និងកាបូបចំនួន៤។ ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ដូចជាសហគមន៍ អឺរ៉ុប សហរដ្ឋអាមេរិក ចិន និងអូស្ត្រាលី។ល។

នៅឆ្នាំ២០២៣នេះ ខេត្តកំពង់ស្ពឺ មានរោងចក្រ សហគ្រាសចំនួន៣៨៥ មាន កម្មករ និយោជិតជាង ១៥ម៉ឺន ៥ពាន់ នាក់ ដែលមានប្រាក់ឈ្នួលមធ្យមសរុបជាង ៤៨១លានដុល្លារក្នុងមួយឆ្នាំ។ ក្នុងនោះរោងចក្រ សហគ្រាសវិស័យកាត់ ដេរ ចំនួន១៩១ មានកម្មករនិយោជិត សរុបជាង ១៤ម៉ឺន ៥ពាន់នាក់ ដែលមានប្រាក់ឈ្នួលមធ្យមសរុបជាង ៤៥១លានដុល្លារក្នុងមួយឆ្នាំ។ ខេត្តកំពង់ស្ពឺ ជាខេត្តទី២ ដែលមានការអភិវឌ្ឍរោងចក្រ សហគ្រាសច្រើនជាងគេ៕