ដោយៈ គង់ ម៉ាលីនណា

        ភ្នំពេញៈ គោលនយោបាយជាតិស្តីពីស្វាយចន្ទី ឆ្នាំ២០២២-២០២៧” ត្រូវបានក្រសួងពាណិជ្ជកម្ម បានដាក់ឱ្យប្រើប្រាស់ជាផ្លូវការហើយកាលពីរសៀលថ្ងៃទី១៤ ខែមិថុនា ឆ្នាំ២០២៣។

គោនយោបាយនេះ នឹងក្លាយជាកម្លាំងចលករ ដ៏មានប្រសិទ្ធភាព សម្រាប់ពង្រឹងផលិតភាព នៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជា ឈានទៅជាអធិរាជស្វាយចន្ទីនាពេលខាងមុខ។

ពិធីផ្សព្វផ្សាយដាក់ឱ្យប្រើប្រាស់ជាផ្លូវការ នូវគោលនយោបាយជាតិស្តីពីស្វាយចន្ទីឆ្នាំ២០២២-២០២៧ នេះរៀបចំឡើង ក្រោមអធិបតីភាព លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងមានវត្តមានចូលរួមពីថ្នាក់ដឹកនាំក្រសួងពាណិជ្ជកម្ម ថ្នាក់ដឹកនាំ និងតំណា​ងក្រសួង-ស្ថាប័ន គណៈអភិបាលរាជធានី-ខេត្តទាំង២៥ ដៃគូអភិវឌ្ឍន៍ សភាពាណិជ្ជកម្មកម្ពុជា សហព័ន្ធស្វាយ​ចន្ទីកម្ពុជា សមាគមស្វា​យចន្ទីកម្ពុជា សមាគមនិងវិស័យឯកជនពាក់ព័ន្ធ សរុបប្រមាណ ២៥០នាក់។លោកប៉ាន សូរស័ក្ដិបានបញ្ជាក់ថា ការដាក់ចេញនូវគោលនយោ​បាយជាតិស្តីពីស្វាយចន្ទី ឆ្នាំ២០២២-២០២៧នេះ នឹងដើរតួជាផែនទីបង្ហាញផ្លូវ និងជាកម្លាំងចលករដ៏មានប្រសិទ្ធភាព សម្រាប់ពង្រឹងផលិតភាពនៃផលិតកម្មដំណាំស្វាយចន្ទី និងលើកកម្ពស់ការប្រកួតប្រជែងទាំងទិន្នផល និងគុណភាព ការធ្វើពិពិធកម្ម ការកែច្នៃ ការនាំចេញ និងការបង្កើនតម្លៃបន្ថែម ដល់ភាគីពាក់ព័ន្ធក្នុងខ្សែច្រវាក់តម្លៃ សំដៅជួយគាំទ្រដល់តួអង្គ ដែលមានស្រាប់ និងទាក់ទាញវិនិយោគបន្ថែម ដោយរក្សាទីផ្សារចាស់ និងស្វែងរកទីផ្សារថ្មីប្រកប​ដោយចីរភាព។

លោកបន្តថា “គោលនយោបាយនេះ នឹងបង្កើតឱកាសការងារនិងតម្លៃបន្ថែមជូនប្រជាពលរដ្ឋ ព្រមទាំងចូលរួមកាត់បន្ថយភាពក្រីក្រ និងចំណាកស្រុក និងជួយជំរុញកំណើនសេដ្ឋកិច្ចជាតិ”។

ទន្ទឹមគ្នានេះ លោកបានលើកឡើងអំពីសក្តានុពល នៃដំណាំស្វាយចន្ទីកម្ពុជា ដែលជាដំណាំកសិ-ឧស្សាហកម្ម និងជាដំណាំអាទិភាពមួយក្នុងចំណោមដំណាំអាទិភាព ដែលរាជរដ្ឋាភិបាលបាននិងកំពុងផ្តោតការយកចិត្តទុកដាក់ លើការបង្កើនផលិតភាព និងការប្រកួតប្រជែង តាមរយៈគុណភាព ការកែច្នៃ និងការនាំចេញដែលទទួលបានតម្លៃខ្ពស់។លោកប៉ាន សូស័ក្តិបានបន្តថា ការរៀបចំ និងដាក់ចេញគោលនយោបាយជាតិស្តីពី ស្វាយចន្ទីឆ្នាំ២០២២- ២០២៧ ពិតជាមានសារៈសំខាន់ ទើបក្រសួងពាណិជ្ជកម្ម សហការជាមួយក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធ បានផ្តួចផ្តើមរៀបចំសេចក្តីព្រាងគោលនយោបាយនេះតាំងពីឆ្នាំ២០១៩ ដោយបានឆ្លងកាត់ការរៀបចំកិច្ចប្រជុំពិភាក្សា និងពិគ្រោះយោបល់ចំនួន៤០លើក ជាមួយក្រសួង-ស្ថាប័ន ដៃគូអភិវឌ្ឍន៍ និងវិស័យឯកជនពាក់ព័ន្ធ រហូតទទួលបានការឯកភាពពីគណៈរដ្ឋមន្រ្តី ក្នុងសម័យប្រជុំពេញអង្គ នាពីថ្ងៃទី១៣ ខែមករា ឆ្នាំ២០២៣ កន្លងទៅនេះ។

តាមប្រភពពីក្រសួងកសិកម្ម រុក្ខាប្រមាញ់ និងនេសាទ ផលិតកម្មស្វាយចន្ទីឆ្នាំ២០២២ មានផ្ទៃដីដាំដុះ៤៣៥,៧៣៣ហិកតា ផ្ទៃដីប្រ មូលផលមានទំហំ៣៣០,៦១ហិកតា បរិមាណទិន្នផលមាន៥០៨, ២៨៣តោន ហើយការនាំចេញគ្រាប់ស្វាយចន្ទីឆៅ បានចំនួន៤៧១ ៥២០តោន និងការនាំចេញគ្រាប់ស្វាយចន្ទីកែច្នៃ បានចំនួន១៥៥៧តោន៕

ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា នៅព្រឹកថ្ងៃទី១៥ ខែមិថុនា ឆ្នាំ២០២៣នេះ បានរៀបចំសិក្ខាសាលាមួយ ដើម្បីផ្សព្វផ្សាយអនុក្រឹត្យ ស្តីពីការកែសម្រួលអត្រាពន្ធ និងអាករ លើមុខទំនិញមួយចំនួន ខណៈអនុក្រឹត្យនេះ នឹងចាប់ផ្តើមអនុវត្តនៅថ្ងៃទី១ ខែកក្កដា ឆ្នាំ២០២៣ខាងមុខ ដោយក្នុងនោះអត្រាពន្ធអាករ លើទំនិញជាង១.៤០០ប្រភេទ នឹងត្រូវបានកែសម្រួល ដោយភាគច្រើនមានការបន្ធូបន្ថយអត្រាពន្ធអាករ និងភាគតិចដំឡើងអត្រាពន្ធអាករ។

លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា មានប្រសាសន៍ថា ការកែសម្រួលអត្រាពន្ធ និងអាករលើកនេះ គឺមានលក្ខណៈទូលំទូលាយ ដែលមានមុខទំនិញ១.៤៤៣ប្រភេទ បានធ្វើការកែសម្រួល។ ឯកឧត្តមបន្តថា ការកែសម្រួលនេះ គឺជាការគិតគូរ ពីសំណាក់រាជរដ្ឋាភិបាល ដើម្បីកាត់បន្ថយអត្រាអតិផរណា ដែលកំពុងកើតមានក្នុងប្រទេសកម្ពុជា ដោយសារតែវិបត្តិសកលជំងឺកូវីដ-១៩ និងសង្គ្រាមរុស្ស៊ី-អ៊ុយក្រែន។លោកបណ្ឌិត បានបញ្ជាក់ថា ការកែសម្រួលអត្រាពន្ធអាករនេះ នឹងមានផលប៉ះពាល់ដល់ចំណូលរបស់គយ និងរដ្ឋាករផងដែរ។ ប៉ុន្តែយ៉ាងណាក៏ដោយ តាមការព្យាករណ៍ ការកែសម្រួលនេះ នឹងជម្រុញឲ្យមានការនាំចូល និងការប្រើប្រាស់ ច្រើនជាងមុន។
លោក គុណ ញឹម ឲ្យដឹងដែរថា វិស័យយានយន្ត (រថយន្ត ម៉ូតូ គ្រឿងចក្រ ម៉ាស៊ីន) ជាវិស័យមួយធំ ដែលស្រូបយកពន្ធ ដោយបានគ្រប់ដណ្តប់រហូតដល់៥៣ភាគរយ នៃចំណូលសរុប។ វិស័យនេះ គឺមានការយកចិត្តទុកដាក់ ពីសំណាក់ក្រសួងសេដ្ឋកិច្ច និងហិរញ្ញវត្ថុ និងគយ និងរដ្ឋាករ។

អនុប្រធានសភាពាណិជ្ជកម្មកម្ពុជា ឧកញ៉ា គួច ផេង ជឿជាក់ថា អត្រាពន្ធ ទាំងនាំចូលនិងនាំចេញ នឹងជួយសម្រួលច្រើន ដល់វិស័យឯកជន ជាអ្នកប្រកបអាជីវកម្ម និងជាពិសេសសម្រាប់អ្នកប្រើប្រាស់ចុងក្រោយ។
ឧកញ៉ាបន្ថែមថា ការកែសម្រួលនេះ នឹងលើកកម្ពស់វិស័យកសិកម្ម និងការចិញ្ចឹមសត្វ នៅកម្ពុជា កាន់តែប្រសើរ។ ជាមួយគ្នានោះ ចំពោះការបន្ធូរបន្ថយអត្រាពន្ធអាករ លើរថយន្តគ្រួសារ ប្រភេទ Hybrid នឹងចូលរួមចំណែក ក្នុងការធ្វើឲ្យកម្ពុជា ក្លាយទៅជាសង្គមប៉ៃតង ស្របតាមគោលនយោបាយ របស់រាជរដ្ឋាភិបាលផងដែរ។
បើតាមប្រសាសន៍លោក គុណ ញឹម អតិផរណា នៅកម្ពុជា នាពេលបច្ចុប្បន្ន មានប្រមាណ២.៥ភាគរយ ដែលចំនួននេះ ជាអត្រាទាប មានភាពល្អប្រសើរ បើធៀបប្រទេសជិតខាង ខណៈឡាវ មានអតិផរណា ជាង៤០ភាគរយ និងវៀតណាម មានជាង៥ភាគរយ ខណៈថៃ មានអតិផរណា ប្រហាក់ប្រហែលកម្ពុជា។

សូមជម្រាបថា អនុក្រឹត្យស្តីពីការកែសម្រួលអត្រាពន្ធ និងអាករ លើមុខទំនិញមួយចំនួន មានការកែសម្រួលអត្រាពន្ធគយ ចំនួន៨ចំណុច, ការកែសម្រួលអត្រាអាករពិសេស ចំនួន២៣ចំណុច និងការកែសម្រួលអត្រាអាករនាំចេញ ចំនួន៩ចំណុច។ ក្នុងជំពូកទី៨៧ យានយន្ត មានការបញ្ចុះអត្រាអាករពិសេស ពី៥០ភាគរយ មកត្រឹម៤៥ភាគរយ សម្រាប់រថយន្តគ្រួសារប្រភេទ Hybrid (not plug-in) មានកម្លាំងលើស១០០០សេសេ និងបញ្ចុះ ពី៥០ភាគរយ មកត្រឹម៤០ភាគរយ សម្រាប់រថយន្តគ្រួសារ ប្រភេទ Hybrid (plug-ing) មានកម្លាំងលើស១០០០សេសេ៕

ដោយ: គង់ លាងហួរ

ភ្នំពេញ: ព្រឹត្តិបត្រផ្លូវការបានបង្ហាញនៅថ្ងៃពុធនេះថា រដ្ឋាភិបាលកម្ពុជា បានកត់ត្រាភាគហ៊ុនបំណុលសាធារណៈ ក្នុងចំនួនសរុបចំនួន១០,២៧ពាន់លានដុល្លារអាមេរិក នៅចុងត្រីមាសទីមួយ ឆ្នាំនេះ ដែលកើនឡើង២,៨ភាគរយ ពីមួយត្រីមាសទៅមួយត្រីមាស។

យោងតាមព្រឹត្តិបត្រស្ថិតិបំណុលសាធារណៈរបស់កម្ពុជា ចេញផ្សាយដោយក្រសួងសេដ្ឋកិច្ច និងហិរញ្ញវត្ថុបានឱ្យដឹងថា បំណុលសាធារណៈមាន៦៧ភាគរយ មកពីដៃគូអភិវឌ្ឍន៍ទ្វេរភាគី(DPs) និង៣៣ភាគរយមកពី DPs ពហុភាគី។

ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកអូន ព័ន្ធមុនីរ័ត្នសមាសភាពនៃភាគហ៊ុនបំណុលសាធារណៈ រួមមាន រូបិយប័ណ្ណបរទេស ដែលក្នុងនោះ៤៣ភាគរយ ជាប្រាក់ដុល្លារអាមេរិក ២១ភាគរយជា SDR (សិទ្ធិគូរពិសេស) ១២ភាគរយជាប្រាក់យ័ន CNY ១១ភាគរយជាប្រាក់យ៉េន JPY ៧ភាគរយជាប្រាក់អឺរ៉ូ និង៦ភាគរយទៀតជារូបិយប័ណ្ណក្នុងស្រុក និងរូបិយប័ណ្ណដទៃទៀត”។

កាលពីត្រីមាសទី១ រដ្ឋាភិបាលកម្ពុជាបានចុះហត្ថលេខា លើប្រាក់កម្ចីសម្បទានថ្មីជាមួយ DPs សម្រាប់ចំនួនទឹកប្រាក់សរុបចំនួន៤៨៨,៣លានដុល្លារអាមេរិក ដែលស្មើនឹង២១,២៤ភាគរយនៃកម្រិតពិដានបំណុលអតិបរមា ដែលអនុញ្ញាតដោយច្បាប់។

យោងតាមព្រឹត្តិបត្រខាងលើនេះបានឱ្យដឹងទៀតថា “សរុបមក ប្រាក់កម្ចីទាំងអស់ មានសម្បទានខ្ពស់ ជាមួយនឹងធាតុអំណោយជាមធ្យមប្រហែល៣៨ភាគរយ”។

ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកអូន ព័ន្ធមុនីរ័ត្នបានមានប្រសាសន៍ថា កម្ចីទាំងអស់ត្រូវបានប្រើប្រាស់សម្រាប់ផ្តល់ហិរញ្ញប្បទាន ដល់គម្រោងវិនិយោគសាធារណៈក្នុងវិស័យអាទិភាពនានា ដែលគាំទ្រដល់កំណើនសេដ្ឋកិច្ច ប្រកប​ដោយនិរន្តរភាពរយៈពេលវែង និងបង្កើនផលិតភាពសេដ្ឋកិច្ច។

លោកបានឱ្យដឹងបន្ថែមនៅក្នុងព្រឹត្តិបត្រព័ត៌មានថា ស្ថានភាពបំណុលសាធារណៈរបស់កម្ពុជា នៅតែបន្តប្រកបដោយនិរន្តរភាព និងបង្កហានិភ័យទាបនៃវិបត្តិបំណុល៕