ការតាំងពិព័រណ៍អចលនទ្រព្យ Home & Lifestyle Expo 2023 មានការចូលរួមពីសំណាក់ក្រុមហ៊ុនអភិវឌ្ឍអចលនទ្រព្យ ក៏ដូចជាក្រុមហ៊ុនលក់ផលិតផល និងសេវាកម្មគ្រប់ប្រភេទជាច្រើន ហើយក្នុងនោះ បុរី ប៉េង ហួត ក៏បានចូលរួមតាំងបង្ហាញគេហដ្ឋានដ៏ប្រណីត និងគម្រោងដ៏សម្បើមរបស់ខ្លួន ព្រមជាមួយប្រូម៉ូសិនដែលមិនធ្លាប់មានពីមកផងដែរ។​

នៅក្នុងកម្មវិធីតាំងពិព័រណ៍ដ៏ធំប្រចាំឆ្នាំនេះ បុរី ប៉េង ហួត បានពាំនាំនូវអ្វីដែលពិសេសមិនធ្លាប់មានពីមុនមក ដូចជាការទស្សនាគម្រោងមេ និងផ្ទះគំរូជាច្រើនប្រភេទតាមរយៈបច្ចេកវិទ្យាថ្មី គឺវ៉ែនតា VR ដែលជាបច្ចេកវិទ្យាដំបូងគេសម្រាប់ផ្ដល់ភាពងាយស្រួលដល់អតិថិជនអាចទស្សនាបានផ្ទាល់នៅទីតាំងស្តង់តែម្ដង។
អ្វីដែលកាន់តែពិសេសអស្ចារ្យជាងនេះទៅទៀតនោះគឺ៖

• ការផ្ដល់ជូននូវការបញ្ចុះតម្លៃរហូតដល់ទៅ 30,000$
• បូករួមជាមួយនឹងការបង្វិលកងសំណាងបញ្ចុះតម្លៃបន្ថែមដែលមានទឹកប្រាក់​រហូតដល់ 7000$ ភ្លាមៗ
• សន្លឹកឆ្នោតផ្សងសំណាងឈ្នះដំណើរកម្សាន្តប្រភេទ Business Class ទៅកាន់ប្រទេសបារាំង-ស្វីស ឬប្រទេសជប៉ុន
• Voucher ពិសារអាហារបុហ្វេបែបប្រេស៊ីលលក្ខណៈគ្រួសារ
• ព្រមទាំងប្រូម៉ូសិន Flash Sale រួមជាមួយគោលការណ៍បង់រំលស់ជាមួយធនាគារដៃគូដោយអត្រាការប្រាក់ដ៏ពិសេសបំផុតរហូតដល់ទៅ 3ឆ្នាំឯណោះ។
  គួរបញ្ជាក់ផងដែរ នេះគឺជាឆ្នាំដំបូងដែលបុរី ប៉េង ហួត បានចូលរួមក្នុងកម្មវិធីតាំងពិព័រណ៌ Home & Lifestyle Expo 2023 ហើយការផ្ដល់ជូនដ៏ពិសេស និងការចំណេញសន្ធឹកសន្ធាប់មិនធ្លាប់មាននេះ មានត្រឹមតែរយៈពេលតែ 2ថ្ងៃ​ប៉ុណ្ណោះ គឺនៅថ្ងៃទី12-13 ខែសីហា ឆ្នាំ2023។

ដូច្នេះកុំឱ្យខកខានឱ្យសោះ! សូមអញ្ជើញមកកាន់ស្តង់បុរី ប៉េង ហួត ដើម្បីសាកសួរព័ត៌មាន និងទទួលបានការផ្តល់ជូនខាងលើ​ ព្រមទាំងទទួលបានវត្ថុអនុស្សាវរីយ៍ជាច្រើន ព្រោះនៅសល់តែថ្ងៃនេះមួយថ្ងៃទៀតប៉ុណ្ណោះ ចាប់ពីម៉ោង 10:00 ព្រឹករហូតដល់ 8:00យប់ នៅសាលតាំងពិព័រណ៌កោះពេជ្រ ឬទាក់ទងផ្នែកលក់តាមរយៈលេខទូរសព្ទ៖ 𝟎𝟗𝟖 / 𝟎𝟏𝟔 / 𝟎𝟏𝟕 𝟓𝟗𝟔 𝟕𝟖𝟗 ។

ដោយ: គង់ លាងហួរ
ក្រុងឡុងដ៍: ផលិតកម្មឧស្សាហកម្មនៅប្រទេសអាល្លឺម៉ង់ ដែលជាប្រទេសមានសេដ្ឋកិច្ចធំជាងគេបំផុតរបស់អឺរ៉ុបបានធ្លាក់ចុះ១,៥% នៅក្នុងខែមិថុនាធៀបនឹងខែឧសភា ដោយសារវិស័យរថយន្តធ្លាក់ចុះអស់៣,៥%។

ការធ្លាក់ចុះនៃទិន្នផលឧស្សាហកម្មរបស់អាល្លឺម៉ង់ មានភាពចោតខ្លាំងជាងការព្យាកររបស់អ្នកសេដ្ឋកិច្ច និងបង្កើនហានិភ័យដែលថា ការផលិតធន់ធ្ងន់នឹងធ្លាក់ចុះម្តងទៀតនៅឆ្នាំនេះ ដែលអាចធ្វើឱ្យអាល្លឺម៉ង់ធ្លាក់ចូលទៅក្នុងវិបត្តិសេដ្ឋកិច្ចវិញ។

យោងតាមការិយាល័យស្ថិតិរបស់ប្រទេសអាល្លឺម៉ង់បានបង្ហាញថា ទិន្នផលរបស់វិស័យសំណង់ដែលបានធ្លាក់ចុះ២,៨% ក៏បានជះឥទ្ធិពលអវិជ្ជមានទៅលើផលិតកម្មឧស្សាហកម្មទាំងមូលផងដែរ។

ជាក់ស្តែង ប្រទេសអាល្លឺម៉ង់ទើបតែបានងើបចេញពីវិបត្តិសេដ្ឋកិច្ចក្នុងអំឡុងខែមេសាដល់ខែមិថុនាប៉ុណ្ណោះ ដោយសារផលិតផលក្នុងស្រុកសរុប (GDP) បានស្ថិតនៅទ្រឹងបើធៀបនឹងត្រីមាសទី១ ប៉ុន្តែទិន្នន័យបណ្តោះអាសន្នចុងក្រោយបង្អស់បង្ហាញថា ភាពប្រសើរឡើងបន្តិចបន្តួចនៃជោគវាសនារបស់សេដ្ឋកិច្ចអាល្លឺម៉ង់ប្រហែលជាមិនស្ថិតស្ថេរនោះទេ។

លោក Franziska Palmas សេដ្ឋវិទូជាន់ខ្ពស់អឺរ៉ុបប្រចាំនៅក្រុមហ៊ុន Capital Economics បានសរសេរក្នុងកំណត់ត្រាមួយថា “យើងរំពឹងថា ការធ្លាក់ចុះនៃទិន្នផលឧស្សាហកម្មគឺជាកត្តាមួយ ដែលអាចបណ្តាលឱ្យមានការធ្លាក់ចុះជាថ្មីនៃផលិតផលក្នុងស្រុកសរុបរបស់ប្រទេសអាល្លឺម៉ង់នៅក្នុងឆមាសទីពីរនៃឆ្នាំនេះ”។ឧស្សាហកម្មរថយន្ត ដែលគ្របដណ្តប់ប្រហែល៥% នៃសេដ្ឋកិច្ចអាល្លឺម៉ង់កំពុងពិបាកកម្រើកឡើងវិញពីការវាយប្រហារដោយសារវិបត្តិជំងឺរាតត្បាតកូវីដ និងការជាប់គាំងនៃខ្សែសង្វាក់ផ្គត់ផ្គង់៕

តែម សុខុម
បាងកក: ប្រទេសថៃ កំពុងតែឈឺក្បាលពិបាកដោះស្រាយ ខណៈបំណុលគ្រួសារដែលខូច (Bad Household Debt) សម្រាប់ត្រីមាសទី២ ដើមឆ្នាំនេះបានកើនឡើងលើសពី១ទ្រីលានបាត ឬ ២៨,៥ពាន់លានដុល្លារអាមេរិក។

ធនាគារកណ្តាលថៃ (BOT) បានពង្រីកការគ្របដណ្តប់នៃទិន្នន័យបំណុលគ្រួសារនេះដើម្បីរួមបញ្ចូលប្រាក់កម្ចីពីមូលនិធិកម្ចីសម្រាប់និស្សិត (Student Loan Fund) ប្រមាណ១៣,៧៥ពាន់លានដុល្លារអាមេរិក និងកម្ចីសហករណ៍៧,៥៥ពាន់លានដុល្លារអាមេរិក ផងដែរ។ នេះបើយោងតាមកាសែត The Nation ចុះផ្សាយកាលពីថ្ងៃពុធ ទី៩ សីហា។

បំណុលកម្ចីទិញផ្ទះទូទាំងប្រទេសថៃ នៅពេលនេះក៏ត្រូវបានបញ្ចូលទៅក្នុងបំណុលគ្រួសារផងដែរ ហើយជាលទ្ធផលធ្វើឱ្យបំណុលគ្រួសារចុងក្រោយបំផុតនៅក្នុងប្រទេសថៃ ឡើងដល់១៧,៦២ទ្រីលានបាត ឬ ៥០១,៤ពាន់លានដុល្លារអាមេរិក។ទោះជាយ៉ាងណា ដោយស្ថិតនៅក្រោមទិន្នន័យថ្មីរបស់ធនាគារកណ្ដាលថៃ (BOT) មានតែ៧០%នៃបំណុលគ្រួសារថៃ ប៉ុណ្ណោះដែលត្រូវបានគ្របដណ្តប់ ខណៈ៣០%ទៀតគ្មានការពិនិត្យតាមដាន។ ដូច្នេះការគ្របដណ្តប់ទិន្នន័យដែលមានលក្ខណៈល្អប្រសើរ គឺមានសារៈសំខាន់សម្រាប់ការដោះស្រាយបំណុលដ៏ទូលំទូលាយ។

យោងតាមលោក ស៊ូរ៉ាពុល អូប៉ាសាទៀន (Surapol Opasatien) នាយកប្រតិបត្តិនៃការិយាល័យឥណទានជាតិ (National Credit Bureau) បានឱ្យដឹងថា បំណុលគ្រួសារសរុបនាពេលបច្ចុប្បន្នមានចំនួន១៧,៦២ទ្រីលានបាត ឬ ៥០១,៤ពាន់លានដុល្លារអាមេរិក ដែលស្មើប្រមាណ៩០,៦%នៃផលទុនជាតិសរុប (GDP)។

ក្នុងចំណោមបំណុលខូច២៨,៥ពាន់លានដុល្លារអាមេរិក មាន៥,៧ពាន់លានដុល្លារអាមេរិក ជាកម្ចីទិញរថយន្ត ៥,១២ពាន់លានដុល្លារអាមេរិក ជាកម្ចីទិញផ្ទះ ៧,១២ពាន់លានដុល្លារអាមេរិក ជាកម្ចីផ្ទាល់ខ្លួន ជាមួយនឹងបំណុលកសិកម្មមានចន្លោះពី១៧ពាន់លានដុល្លារអាមេរិក ទៅ២២,៨ពាន់លានដុល្លារអាមេរិក៕ The Nation៕

ដោយ: គង់ លាងហួរ
ហុងកុង: ការជួលផ្ទះនៅទីក្រុងហុងកុងបានកើនឡើងដល់កម្រិតខ្ពស់រយៈពេល១៨ខែ ក្នុងខែកក្កដា ខណៈសិស្ស និស្សិត និងអ្នកជំនាញបានវិលត្រឡប់មកកាន់ទីក្រុងនេះវិញ ហើយអត្រាការប្រាក់ខ្ពស់បានបន្តរារាំងអ្នកជួលមិនឱ្យក្លាយជាអ្នកទិញ។

នេះបើយោងតាមសារពត៌មាន South China Morning Post ចុះផ្សាយនៅថ្ងៃសុក្រ ទី១១ ខែសីហា ឆ្នាំ២០២៣។យោងតាមសន្ទស្សន៍នៃការជួល Centa-City ដែលចងក្រងដោយក្រុមហ៊ុន Centaline Property បានឱ្យដឹងថា សន្ទស្សន៍នៃការជួលបានកើនឡើង១,១៥ភាគរយក្នុងខែកក្កដាដល់១១៤,០២ពិន្ទុ បើធៀបនឹងខែមិថុនា។ សន្ទស្សន៍នេះបានកើនឡើង៥,៤៥%ក្នុងរយៈពេល៦ខែចាប់ពីខែមករា។

លោក Yeung Ming-yee នាយករងជាន់ខ្ពស់នៃក្រុមហ៊ុន Centaline Property Research បានបញ្ជាក់នៅក្នុងរបាយការណ៍មួយថា “អតិថិជនបានផ្លាស់ប្តូរពីការទិញមកជាការជួលវិញ ហើយលំហូរចូលនៃនិស្សិត និងអ្នកជំនាញបានបង្កើនតម្រូវការអចលនទ្រព្យសម្រាប់ជួល”។

លោកបានបន្តថា“ទីផ្សារលំនៅដ្ឋានឯកជនបានឈានចូលដល់រដូវកាលកំពូលនៃការជួល ហើយចំនួនករណីជួលបានកើនឡើង ដែលនាំឲ្យមានការកើនឡើងជាលំដាប់នៃការជួល ពោលគឺទីផ្សារជួលនៅតែបន្តមានភាពសកម្ម”។ក្រុមហ៊ុន Centaline រំពឹងថា សន្ទស្សន៍នៃការជួលអាចកើនឡើង១,៧៤ភាគរយទៀតរហូតដល់១១៦ពិន្ទុ នៅក្នុងត្រីមាសទី៣ ដែលជាកម្រិតមិនធ្លាប់បានឃើញមានចាប់តាំងពីខែតុលា ឆ្នាំ២០២១។ការជួលផ្ទះនៅក្នុងទីក្រុងហុងកុងបានកើនឡើង ចាប់តាំងពីដើមឆ្នាំនេះមកម្ល៉េះ ដោយសារការហូរចូលនៃអ្នកជំនាញ និងនិស្សិតបញ្ចប់ការសិក្សានៅប្រទេសចិនដីគោក៕

តែម សុខុម

ញូវយ៉ក: ក្រសួងរតនាគារអាមេរិក នឹងស្នើឱ្យបង្កើតច្បាប់មួយដែលនឹងបញ្ចប់សកម្មភាពទិញផ្ទះប្រណីតដោយអនាមិកដើម្បីបិទចន្លោះប្រហោង ដែលក្រសួងនេះនិយាយថាអនុញ្ញាតឱ្យក្រុមមហាសេដ្ឋីពុករលួយ ភេរវករ និងឧក្រិដ្ឋជនផ្សេងៗទៀតលាក់បាំងលុយដែលពួកគេរកបានដោយមិនសុចរិត។

ច្បាប់ដែលគេទន្ទឹងរង់ចាំជាយូរមកហើយនេះ ត្រូវបានរំពឹងថានឹងតម្រូវឱ្យក្រុមអ្នកជំនាញផ្នែកអចលនទ្រព្យដូចជាក្រុមហ៊ុនធានារ៉ាប់រងលើកម្មសិទ្ធិអចលនទ្រព្យជាដើម រាយការណ៍អំពីអត្តសញ្ញាណរបស់ម្ចាស់ក្រុមហ៊ុនដែលទិញអចលនទ្រព្យដោយទូទាត់ជាសាច់ប្រាក់ ទៅកាន់បណ្តាញអនុវត្តន៍ច្បាប់ប្រឆាំងបទល្មើសហិរញ្ញវត្ថុ (FinCEN) នៃក្រសួងរតនាគារអាមេរិក។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃសុក្រ ទី១១ សីហា។

ប្រភពច្បាស់ការបានទម្លាយឱ្យដឹងថា បណ្តាញអនុវត្តន៍ច្បាប់ប្រឆាំងបទល្មើសហិរញ្ញវត្ថុ (FinCEN) គ្រោងនឹងស្នើច្បាប់នេះនៅខែសីហា នេះបើយោងតាមរបៀបវារៈបទប្បញ្ញត្តិរបស់ខ្លួន។ក្រុមអ្នកតស៊ូមតិប្រឆាំងអំពើពុករលួយ និងក្រុមសមាជិកសភាអាមេរិក បាននិងកំពុងជំរុញឱ្យមានច្បាប់ នេះដែលនឹងជំនួសប្រព័ន្ធរាយការណ៍បច្ចុប្បន្ន។

លោកស្រី ជេណេត យេឡេន (Janet Yellen) រដ្ឋមន្ត្រីក្រសួងរតនាគារអាមេរិក បានលើកឡើងកាលពីខែមីនា ថា ឧក្រិដ្ឋជនបានលាក់កំបាំងប្រាក់ដែលពួកគេរកបានដោយមិនសុចរិត និងអាថ៌កំបាំងជាច្រើនទសវត្សរ៍មកតាមរយៈការវិនិយោគលើអចលនវត្ថុ ហើយថា លុយកខ្វក់ចំនួន២,៣ពាន់លានដុល្លារ ត្រូវបានគេលាងតាមរយៈការវិនិយោគលើអចលនទ្រព្យនៅសហរដ្ឋអាមេរិក ចន្លោះឆ្នាំ២០១៥ ដល់ឆ្នាំ២០២០៕ Reuters៕

ដោយ: គង់ លាងហួរ
អន្តរជាតិ: សារពត៌មាន Bloomberg បានរាយការណ៍ថា លោកស្រី Yang Huiyan ប្រធានក្រុមហ៊ុនអចលនទ្រព្យខ្នាតយក្ស Country Garden បានខាតបង់ទ្រព្យសម្បត្តិអស់ច្រើនជាងមហាសេដ្ឋីនានានៅលើពិភពលោកនៅក្នុងរយៈពេល២ឆ្នាំចុងក្រោយនេះ។

ទ្រព្យសម្បត្តិសុទ្ធរបស់លោកស្រី Yang បានដាំក្បាលចុះ៨៤% ចាប់តាំងពីខែមិថុនា ឆ្នាំ២០២១ ឬស្មើនឹងទំហំទឹកប្រាក់ចំនួន២៨,៦ពាន់លានដុល្លារអាមេរិក។ នេះបើយោងតាមសន្ទស្សន៍មហាសេដ្ឋី Bloomberg ។

ទ្រព្យសម្បត្តិសុទ្ធរបស់លោកស្រី Yang បច្ចុប្បន្នស្ថិតក្នុងរង្វង់៥,៥ពាន់លានដុល្លារអាមេរិក។ លើសពីនេះ កាលពីថ្ងៃអង្គារដើមសប្តាហ៍កន្លងទៅ ប្រធានក្រុមហ៊ុនអចលនទ្រព្យរូបនេះបានខាតបង់លុយអស់រហូតដល់ទៅ៤៩០លានដុល្លារ។ នៅពេលនេះ លោកស្រី Yang បានធ្លាក់មកឈរនៅលំដាប់លេខរៀងទី៤៧៥ ក្នុងតារាងចំណាត់ថ្នាក់មហាសេដ្ឋីដែលចងក្រងដោយកាសែត Bloomberg។

Country Garden ដែលធ្លាប់តែជាក្រុមហ៊ុនអភិវឌ្ឍដ៏ធំបំផុតរបស់ប្រទេសចិន បានខកខានការទូទាត់អត្រាការប្រាក់លើមូលបត្របំណុលចំនួន២ជាប្រាក់ដុល្លារអាមេរិក ដែលធ្វើឲ្យអ្នកវិនិយោគមានការព្រួយបារម្ភ ខណៈវិស័យអចលនទ្រព្យចិនកំពុងស្ថិតក្នុងស្ថានភាពមិនល្អប្រសើរនៅឡើយ។

ទាក់ទិននឹងបញ្ហានេះ សារពត៌មាន CNN នៅមិនទាន់អាចទាក់ទងទៅកាន់ក្រុមហ៊ុន Country Garden ដើម្បីសុំការធ្វើអត្ថាធិប្បាយបាននៅឡើយទេ៕

ដោយ: គង់ លាងហួរ
រីយ៉ាដ: យោងតាមរបាយការណ៍ថ្មីមួយបានបង្ហាញថា វិស័យលំនៅដ្ឋាននៅទីក្រុងឌូបៃកំពុងស្ថិតនៅលើផ្លូវឆ្ពោះទៅបំបែកកំណត់ត្រាឆ្នាំដ៏មមាញឹកបំផុតនៅឡើយ ខណៈចំនួនប្រតិបត្តិការទិញលក់អចលនទ្រព្យបានហក់ឡើងដល់កម្រិតខ្ពស់បំផុតមិនធ្លាប់មាន។

យោងតាមរបាយការណ៍ចេញផ្សាយដោយក្រុមហ៊ុនផ្តល់សេវាអចលនទ្រព្យសកលលោក Savills បានបង្ហាញថាប្រតិបត្តិការអចលនទ្រព្យនៅក្រុងឌូបៃបានហក់ឡើង៤៤ភាគរយនៅក្នុងឆមាសទី១ រហូតដល់៥៧.៧០០យូនីត បើធៀបទៅនឹងឆ្នាំមុន។

របាយការណ៍ដដែលបានបង្ហាញ ឱ្យដឹងទៀតថា ក្នុងចំណោមប្រតិបត្តិការចំនួន៥៧.៧០០យូនីតនេះ ក្នុងនោះមាន អាផាតមុិន ចំនួន៤៦.១០០យូនីត និង វីឡាចំនួន១១.៦០០យូនីត ដែលបានលក់ចេញក្នុងឆមាសទី១។

លោក Swapnil Pillai នាយករងនៃការស្រាវជ្រាវតំបន់មជ្ឈិមបូព៌ាប្រចាំក្រុមហ៊ុន Savills បានលើកឡើងថា “បើគិតតាមប្រវត្តិសាស្ត្រ ខែរដូវក្តៅនៅប្រទេស UAE ត្រូវបានគេដឹងថាមានភាពយឺតយ៉ាវ ខណៈអ្នកស្រុកជាច្រើនធ្វើដំណើរក្នុងកំឡុងពេលសម្រាកសិក្សា”។

លោកបានបន្ថែមថា “ទោះជាយ៉ាងណាក្តី និន្នាការនេះហាក់ដូចជាកំពុងផ្លាស់ប្តូរក្នុងពេលថ្មីៗនេះ ដោយសារអចលនទ្រព្យនៅទីក្រុងឌូបៃនៅតែបន្តទទួលបានការពេញចិត្តក្នុងចំណោមអ្នកស្រុក និងទស្សនិកជនអន្តរជាតិ ដែលស្វែងរកស្ថិរភាព ស្របពេលបរិយាកាសសេដ្ឋកិច្ចមិនច្បាស់លាស់”៕