ដោយៈ និស្ស័យ

        កោះកុងៈ អភិបាលរងខេត្តកោះកុង លោកអន សុធារិទ្ឋបានអញ្ជើញស្វាគមន៍សមាជិកសភា នៃសាធារណរដ្ឋសហព័ន្ធអាល្លឺម៉ង់ និងឯកឧត្តមអគ្គរដ្ឋទូត ចុះទស្សនកិច្ចទីតាំង គម្រោងអភិរក្សឧទ្យានជាតិជួរភ្នំក្រវាញកណ្តាល ខេត្តកោះកុង។

គំរោងនេះអភិរ័ក្សឧទ្យានជាតិភ្នំក្រវាញ ក្នុងខេត្តកោះកុង ទទួលបានគាំទ្រ ដោយសាធារណរដ្ឋសហព័ន្ធអាល្លឺម៉ង់។គម្រោងអភិរក្សឧទ្យានជាតិ ជួរភ្នំក្រវាញកណ្តាល ស្ថិតក្នុងឧទ្យានជាតិ ជួរភ្នំក្រវាញកណ្តាល។ប្រតិភូជាន់ខ្ពស់អាល្លឺម៉ង់ ចុះទស្សនកិច្ចនេះធ្វើឡើងក្នុងគោលបំណងស្វែងយល់ទីតាំងគម្រោង និងវឌ្ឍនភាពនៃការអនុវត្តគម្រោង៕

ដោយៈ តែម សុខុម

សេអ៊ូល: ប្រាក់ឈ្នួលអប្បបរមា នៅប្រទេសកូរ៉េខាងត្បូង សម្រាប់ឆ្នាំ២០២៤ ត្រូវបានកំណត់ដំឡើង ក្នុងចំនួន៧,៨០ដុល្លារអាមេរិក ក្នុងមួយម៉ោងកាលពីថ្ងៃពុធ ទី១៩ ខែកក្កដា ដោយកើនឡើង២,៥%បើធៀបនឹងប្រាក់ឈ្នួល អប្បបរមាណសម្រាប់ឆ្នាំនេះ។

គណៈកម្មាធិការទទួលបន្ទុកប្រាក់ឈ្នួលអប្បបរមា (Minimum Wage Commission) ដែលមានសមាជិកចំនួន២៧រូប ដោយក្នុងនោះ៩រូប តំណាងឱ្យផលប្រយោជន៍សាធារណៈ។ ៩រូបតំណាងឱ្យក្រុមហ៊ុនសហគ្រាស និង៩រូបតំណាងឱ្យសហជីព បានឈានដល់សេចក្ដីសម្រេចនេះ ក្នុងកិច្ចប្រជុំមួយដែលបានចាប់ផ្តើម កាលពីថ្ងៃអង្គារ ទី១៨ ខែកក្កដា ហើយបានបន្តរហូតដល់ព្រឹកថ្ងៃពុធ នៅកណ្តាលទីក្រុង Sejong ។ប្រាក់ឈ្នួលអប្បបរមាថ្មី សម្រាប់ឆ្នាំ២០២៤ គឺខ្ពស់ជាង០,២០ដុល្លារ បើធៀបនឹងប្រាក់ឈ្នួលអប្បបរមា៧,៦០ដុល្លារ ក្នុងឆ្នាំនេះដែលគិតជាប្រាក់ខែ គឺស្មើ១.៦៣៥ដុល្លារ ក្នុងមួយខែ។

គណៈកម្មាធិការនេះ បានកំណត់កម្រិតប្រាក់ឈ្នួលអប្បបរមានេះ នៅក្នុងការបោះឆ្នោតមួយ ខណៈភាគីសហជីព និងភាគីក្រុមហ៊ុនសហគ្រាស នៅតែខ្វែងកំនិតគ្នាយ៉ាងខ្លាំង ហើយមិនអាចឈានការសេចក្ដីសម្រេចតាមរយៈកិច្ចព្រមព្រៀង។ដំបូងឡើយភាគីខាងសហជីព បានស្នើដំឡើងប្រាក់ឈ្នួលអប្បបរមា៩,៦៤ដុល្លារ ដោយកើនឡើង២៦,៩% ដោយលើកហេតុផលថា អតិផរណាកើនឡើង ខណៈភាគីខាងក្រុមហ៊ុន សហគ្រាសបានស្នើឱ្យផ្អាកសិន។តាមច្បាប់ គណៈកម្មាធិការនេះ ត្រូវបានតម្រូវឱ្យបង្ហាញប្រាក់ឈ្នួលអប្បបរមាថ្មី ដល់រដ្ឋមន្ត្រីក្រសួងការងារ ដែលនឹងប្រកាសវាជាសាធារណៈ៕ Korea Times៕

ដោយ: គង់ លាងហួរ

អន្តរជាតិ: យោងតាមរបាយការណ៍ របស់អង្គការសហប្រជាជាតិ (UN) បានឱ្យដឹងថា បំណុលសាធារណៈសកល បានហក់ឡើងដល់កំណត់ត្រា៩២ទ្រីលានដុល្លារក្នុងឆ្នាំ២០២២។

ការកើនឡើងនៃបំណុលនេះ ដោយសាររដ្ឋាភិបាលបណ្តាប្រ​ទេសនានា បានខ្ចីប្រាក់ដើម្បីទប់ទល់នឹងវិបត្តិនានា ដូចជាជំងឺរាតត្បា​តកូវីដ-១៩ ដោយបន្ទុកបំណុលបានជះផលប៉ះពាល់ យ៉ាងធ្ងន់ធ្ងរដល់ប្រទេសកំពុងអភិវឌ្ឍន៍។​

បំណុលក្នុងស្រុក និងបំណុលខាងក្រៅទូទាំងពិភពលោកបានហក់ឡើងជាង៥ដង ក្នុងរយៈពេល២ទសវត្សរ៍ចុងក្រោយនេះ ពោលគឺកើនលើសពីអត្រាកំណើនសេដ្ឋកិច្ចទៅទៀត ខណៈផលិតផលក្នុងស្រុកសរុប បានកើនឡើងត្រឹមតែ៣ដងប៉ុណ្ណោះ បើគិតចាប់តាំងពីឆ្នាំ២០០២។ លោក Antonio Guterres អគ្គលេខាធិការអង្គការសហប្រជាជាតិ បានប្រាប់អ្នកយកព័ត៌មានថា “ទីផ្សារ​ប្រហែល​ជា​មិន​សូវ​រងផលអាក្រក់នៅ​ឡើយ​ទេ ប៉ុន្តែមនុស្សកំពុងរងទុក្ខ ហើយប្រទេសក្រីក្របំផុតមួយចំនួននៅលើពិភពលោក កំពុងបង្ខំចិត្តឱ្យជ្រើសរើសរវាងការបម្រើបំណុលរបស់ពួកគេ ឬបម្រើប្រជាជនរបស់ពួកគេ”។

បណ្តាប្រទេសកំពុងអភិវឌ្ឍន៍ ជំពាក់ជិត៣០ភាគរយ នៃបំណុលសាធារណៈសកល ដែលក្នុងនោះ៧០ភាគរយ ត្រូវបានតំណាងដោយប្រទេសចិន ឥណ្ឌា និងប្រេស៊ីល។  បណ្តាប្រទេសកំពុងអភិវឌ្ឍន៍ចំនួន៥៩ ប្រឈមមុខនឹងសមាមាត្របំណុលធៀបទៅនឹង GDP លើសពី៦០ភាគរយ ដែលបង្ហាញពីកម្រិតជំពាក់បំណុលខ្ពស់។របាយការណ៍របស់អង្គការសហប្រជាជាតិបានបន្ថែមថា “បំណុ​លបាន និងកំពុងប្រែក្លាយជាបន្ទុកដ៏ធំ សម្រាប់ប្រទេសកំពុងអភិវឌ្ឍន៍ ដោយសារលទ្ធភាពទទួលបានហិរញ្ញប្បទាន របស់ពួកគេនៅមានកម្រិត ការកើនឡើងថ្លៃដើមលើការខ្ចីប្រាក់ ការធ្លាក់ថ្លៃនៃរូបិយប័ណ្ណ និងកំណើនសេដ្ឋកិច្ចដើរយឺត”៕

ដោយៈ គង់ សូរិយា

        ភ្នំពេញៈ និយ័តករអាជីវកម្មអចលនវត្ថុ និងបញ្ចាំបានប្រកាសពីការទទួលពាក្យបណ្តឹង និងសំណើរសុំអន្តរាគមន៍ពាក់ព័ន្ឋ នឹងអាជីវកម្មអភិវឌ្ឍន៍អចលនវត្ថុ។

យោងតាមសេចក្តីប្រកាសរបស់ និយ័តករអាជីវកម្មអចលនវត្ថុ និងបញ្ចាំ (ន.អ.ប.)បានឲ្យដឹងថា សូមជម្រាបជូនសាធារណជនទាំងអស់មេត្តាជ្រាបថា៖ អនុលោមតាមច្បាប់ស្ដីពី ការរៀបចំនិងការប្រព្រឹ​ត្តទៅនៃអាជ្ញាធរសេវាហិរញ្ញវត្ថុ មិនមែនធនាគារ ដែលត្រូវបានប្រកាស ឱ្យប្រើដោយព្រះរាជក្រមលេខ នស/ រកម/ ០១ ២១/០០៣ ចុះថ្ងៃទី១៦ ខែមករា ឆ្នាំ២០២១។

អនុក្រឹត្យលេខ១១៣ អនក្រ.បក ចុះថ្ងៃទី១៤ ខែកក្កដា ឆ្នាំ២០២១ស្តីពី ការរៀបចំនិងការប្រព្រឹត្តទៅ របស់អង្គភាពក្រោមឱវាទរបស់ អាជ្ញាធរសេវាហិរញ្ញវត្ថុមិនមែនធនាគារ និងអនុក្រឹត្យលេខ៥០ អនក្រ.បក ចុះថ្ងៃទី២ ខែមីនា ឆ្នាំ២០២៣ ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ បានផ្ដល់សមត្ថកិច្ចដល់ ន.អ.ប. ជាស្ថាប័នតែមួយគត់ដែលមានតួនាទី និងភារកិច្ចក្នុងការគ្រប់គ្រង និងត្រួតពិនិត្យរាល់សកម្មភាពពាក់ព័ន្ធ អាជីវកម្មអភិវឌ្ឍអចលនវត្ថុ ទទួលពាក្យបណ្តឹង ឬពាក្យស្នើសុំអន្តរាគមន៍ ក្នុងការសម្របសម្រួល និងផ្សះផ្សាវិវាទនានា និងស៊ើបអង្កេតស្រាវជ្រាវ ព្រមទាំងទប់ស្កាត់ រាល់អំពើល្មើសទាំង​ឡាយណា ពាក់ព័ន្ធអាជីវកម្មអភិវឌ្ឍអចលនវត្ថុ តាមគ្រប់រូបភាព ទោះបីមាន ឬគ្មានអាជ្ញាបណ្ណក្តី។

សេចក្តីប្រកាសបានបន្តថា ក្នុងន័យនេះ ន.អ.ប. សូមជម្រាបជូនដល់សាធារណជនទាំងអស់មេត្តាជ្រាបថា ក្នុងករណីមានវិវាទ ឬអប្រក្រតីភាពណាមួយ កើតឡើងពាក់ព័ន្ធការលក់ទិញ ឬជួលអចលនវត្ថុ ភាគីនៃកិច្ចសន្យា ឬភាគីពាក់ព័ន្ធណាមួយអាច ដាក់ពាក្យបណ្ដឹង ឬសំណើសុំអន្តរាគមន៍មក ន.អ.ប. ដែលមានអាសយដ្ឋាននៅអគារ១៦៨F (ជាន់ទី៧) ផ្លូវ៥៩៨ សង្កាត់ច្រាំងចំនេះ១ ខណ្ឌប្ញស្សីកែវ រាជធានីភ្នំពេញ ឬទំនាក់ទំនងតាមតេឡេក្រាមលេខ ០១១ ៥៩៨ ៣៧២ និង ៧១៨៦។២ ០៦៩ ៥១៧ ១៨៦។

និយ័តករអាជីវកម្មអចលនវត្ថុ និងបញ្ចាំ អគារ១៦៨F (ជាន់ទី៧)ផ្លូវ៥៩៨ សង្កាត់ច្រាំងចំនេះ១ ខណ្ឌឬស្សីកែវ រាជធានីភ្នំពេញ កម្ពុជា Building 168F (Floor), Street 598, Sangkat Chraing Chamrch 1, Khan Russey Keo, Phnom Penh, Cambodia៕

ដោយៈ គង់ សូរិយា

        ភ្នំពេញៈ រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោកជា វ៉ាន់ដេត បានបញ្ជាក់ឲ្យដឹងថា ក្រសួងនឹងធ្វើការផាកពិន័យ ចំពោះក្រុមហ៊ុនប្រតិបត្ដិករទូរស័ព្ទចល័តណា ដែលបម្រើសេវាមិនបានល្អដល់ប្រជាពលរដ្ឋ។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក ជា វ៉ាន់ដេត អញ្ជើញចូលរួមក្នុងពិធីបញ្ចុះបឋមសិលា បើកការដ្ឋានសាងសង់អគារមជ្ឍមណ្ឌលទិន្នន័យជាតិ នាព្រឹកថ្ងៃទី១៩ ខែកក្កដា ឆ្នាំ២០២៣។ ពិធីនេះរៀបចំធ្វើឡើង នាទីស្ដីការក្រសួងប្រៃសណីយ៍ និងទូរគមនាគមន៍។

លោកជា វ៉ាន់ដេត បានបញ្ជាក់ថា “ក្រសួងបានខិតខំប្រឹងប្រែងណាស់ ហើយក្រសួងបានចេញMPTC Speed Test ដើម្បីឲ្យអ្នកប្រើប្រាស់ទាំងអស់ ប្រើទូរស័ព្ទនៅទីណាក៏ដោយ បើទូរស័ព្ទអត់មានសេវា គឺអាចប្ដឹងមកក្រសួង ក្រសួងនឹងហៅក្រុមហ៊ុនមក ហើយនៅពេលនោះនឹងមើលឃើញទាំងអស់គ្នា”។បន្ថែមពីនោះទៀត រដ្ឋមន្ដ្រីក្រសួងប្រៃសណីយ៍ និងទូរគ​មនាគមន៍ បានគូសបញ្ជាក់ថា “នៅពេលដែលទីតាំងណាមួយ មានអ្នកប្ដឹងមកក្រសួងជាច្រើនដង ហើយទីតាំងនោះពិតជាគ្មានសេវាមែន ក្រសួ​ងអាចនឹងហៅក្រុមហ៊ុនមក រួចហើយអាចនឹងមានការពិន័យ ចំពោះក្រុមហ៊ុន។

លោកជា វ៉ាន់ដេត បានឲ្យដឹងផងដែរថា ដើម្បីចាត់វិធានការនេះ ក្រសួង ក៏បានចេញនូវសេចក្ដីប្រកាសអំពីគុណភាពសេវា ដែលសម្ដេ​ចតេជោ ហ៊ុន សែននាយករដ្ឋមន្ដ្រីនៃកម្ពុជា បានឯកភាពរយៈពេល៨ខែមកហើយ ដោយទុករយៈពេល៨ខែ ដើម្បីឲ្យក្រុមហ៊ុនធ្វើការបង្កើនគុណភាពសេវា។រដ្ឋមន្ដ្រី ជា វ៉ាន់ដេត បានសង្កត់ធ្ងន់ថា បន្ទាប់ពីរយៈពេល៨ខែនេះទៅ បើសិនជាក្រុមហ៊ុនណា មិនបានបង្កើនគុណភាពសេវាបានល្អ គឺក្រសួងនឹងធ្វើការផាកពិន័យ ដែលនេះគឺជាវិធានការ ដើម្បីធ្វើឲ្យសេវាទូរស័ព្ទល្អ”។

កម្មវិធី MPTC Speed Test នេះ ងាយស្រួលប្រើ ហើយបង្ហាញលទ្ធផលច្បាស់លាស់ អំពីល្បឿនទាញយក (Download Speed) ល្បឿនបង្ហោះឡើង (Upload Speed) ភាពយឺតយ៉ាវ (Latency) ភាពរំខាន (Jitter) និងកម្រិតគុណភាពនៃការមើលវីដេអូ តាមយូធូបជាដើម ដែលជាព័ត៌មានចាំបាច់ សម្រាប់ការប្រើប្រាស់អ៊ីនធឺណិតប្រចាំថ្ងៃ។

មិនតែប៉ុណ្ណោះ លទ្ធផលនៃការវាស់ស្ទង់ របស់អ្នកប្រើប្រាស់នឹងក្លាយជាទិន្នន័យចាំបាច់ សម្រាប់យកទៅវិភាគ និងរកដំណោះស្រាយ សំដៅពង្រឹងគុណភាពសេវាទូរគមនាគមន៍ ឲ្យកាន់តែប្រសើរ។

កម្មវិធី MPTC Speed Test ត្រូវបានបង្កើតឡើង ដោយក្រសួងប្រៃសណីយ៍ និងទូរគមនាគមន៍ ក្នុងគោលបំណងការពារសិទ្ធិ និងផលប្រយោជន៍របស់អ្នកប្រើប្រាស់ ក្នុងការទទួលបានសេវាទូរគមនា​គមន៍ ប្រកបដោយគុណភាព និងដើម្បីលើកកម្ពស់តម្លាភាព នៃការផ្តល់ទិន្នន័យ និងព័ត៌មានជាក់លាក់អំពីស្ថានភាពអ៊ីនធឺណិត និងសេវាទូរសព្ទរបស់អ្នកប្រើប្រាស់។

គិតត្រឹមខែកុម្ភៈ ឆ្នាំ២០២៣ កម្ពុជាមានអ្នកប្រើប្រាស់សេវាអ៊ីនធឺណិតចល័តជាង១៧លានស៊ីម និងសេវាអ៊ីនធឺណិតអចល័តជាង៣១ម៉ឺន ប្រតិបត្តិករផ្តល់សេវាអ៊ីនធឺណិតចំនួន៣៨ប្រតិបត្តិករ។ក្រុមហ៊ុនដែលបាននិងកំពុងមានបញ្ហាច្រើនជាងគេ គឺក្រុមហ៊ុនSmart ដែលប្រជាពលរដ្ឋមានការរអ៊ូរទាំ ពាសពេញបណ្តាញទំនាក់ទំនងសង្គម ប៉ុន្តែជាលទ្ឋផលក្រុមហ៊ុននេះ មិនបានបំពេញកាតព្វកិច្ចទទួលខុសត្រូវ ក្នុងនាមជាក្រុមហ៊ុន​មានវិជ្ជាជីវៈ និងក្រមសីលធ៌មនៅឡើយ៕