ដោយៈ សុខុម

មូស្គូ: ប្រធានាធិបតីរុស្ស៊ី លោកវ្លាឌីមៀ ពូទីន កាលពីថ្ងៃអង្គារ ថ្ងៃទី២១ ខែកុម្ភៈ បានប្រកាសប្តេជ្ញាបន្តធ្វើសង្គ្រាម ដែលបានអូសបន្លាយរាប់ឆ្នាំនៅអ៊ុយក្រែន ដោយមិនរាយថយជាដាច់ខាត។ នេះបើយោងតាមសារព័ត៌មាន CNA ចុះផ្សាយកាលពីថ្ងៃអង្គារ ទី២១ ខែកុម្ភៈ។

ទន្ទឹមនេះលោក ពូទីន ថែមទាំងចោទប្រកាន់សម្ព័ន្ធមិត្ត NATO ដែលដឹកនាំដោយសហរដ្ឋអាមេរិកថា ជាអ្នកបន្ថែមអណ្ដាតភ្លើងសង្គ្រាមឱ្យឆាបកាន់តែសន្ធោសន្ធៅ ក្នុងគោលបំណងវាយផ្ដួលទីក្រុងមូស្គូ ក្នុងករណីឈានដល់ការប្រឈមមុខដាក់គ្នាទូទាំងពិភពលោក។

មុនថ្ងៃខួប១ឆ្នាំ នៃសង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២ ដែលបានបណ្ដាលឱ្យមានការប្រឈមមុខដាក់គ្នាដ៏ធំបំផុតជាមួយលោកខាងលិច ចាប់តាំងសង្គ្រាមត្រជាក់ លោក ពូទីន បញ្ជាក់ថា ប្រទេសរុស្ស៊ី “បានដោះស្រាយបញ្ហាជាបន្តបន្ទាប់” ដែលខ្លួនប្រឈមនៅក្នុងប្រទេសអ៊ុយក្រែន។

លោក ពូទីន បានប្រាប់បណ្ដាឥស្សរជននយោបាយ និងយោធារបស់ប្រទេសរុស្ស៊ីថា ប្រទេសរុស្ស៊ីកំពុងងាកមកទ្វីបអាស៊ី បន្ទាប់ពីលោកខាងលិច បានដាក់ទណ្ឌកម្មមកលើខ្លួនយ៉ាងធ្ងន់ធ្ងរបំផុត នៅក្នុងប្រវត្តិសាស្ត្រនាសម័យទំនើប។

ក្រៅពីការប្ដេជ្ញាបន្តធ្វើសង្គ្រាមនៅអ៊ុយក្រែន និងការព្រមានលោកខាងលិច ថាអាចមានការប្រឈមមុខដាក់គ្នា ទូទាំងពិភពលោក លោក ពូទីន ក៏បានព្យាយាមនិយាយថា រុស្ស៊ី ធ្វើសង្គ្រាមដោយបង្ខំចិត្ត ហើយថាលោកយល់ពីការឈឺចាប់របស់ក្រុមគ្រួសារ នៃអ្នកដែលបានបាត់បង់ជីវិតក្នុងសមរភូមិ។

លោកខាងលិច និងអ៊ុយក្រែន ដែលអនាគតអាចក្លាយជាសមាជិកមួយរបស់អង្គការបក្សសម្ព័ន្ធយោធាNATO បានច្រានចោលការចោទប្រកា​ន់ពីសំណាក់លោក ពូទីន ហើយនិយាយថា ការពង្រីកខ្លួនរបស់NATO ឆ្ពោះទៅភាគខាងកើត ដែលមានប្រទេសហ្វាំងឡង់ និងប្រទេសស៊ុយអែត ដ៏បានដាក់ពាក្យសុំចូល NATO ដែរនោះ មិនមែនដូចអ្វីដែលរុស្ស៊ី និយាយថា ជាការទន្ទ្រានកាន់កាប់ទឹកដីនោះឡើយ៕ Reuter៕

  ដោយៈ ជេស៊ីកា

       ភ្នំពេញៈ គិតត្រឹមដំណាច់ខែមករា ឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគជប៉ុនចំនួន១៥០គម្រោង ក្នុងទំហំទុនវិនិយោគសរុបប្រមាណ២.៩ប៊ីលានដុល្លារ។

គម្រោងវិនិយោគជប៉ុនដែលលេចធ្លោ មានដូចជា គម្រោងវិនិយោគផ្សារទំនើប គម្រោងវិនិយោគបង្កើតរោងចក្រផ្គុំ និងដំឡើងរថយន្ត គម្រោងវិនិយោគបង្កើតរោងចក្រផលិតម៉ូទ័រខ្នាតតូច គម្រោងវិនិយោគបង្កើតរោងចក្រ ផលិតឧបករណ៍អគ្គិសនី និងគម្រោងវិនិយោកលើវិស័យសំំណង់ និងអាជីវកម្មមន្ទីរពេទ្យជាដើម។

លោកYogo Kanda ប្រធានសមាគមធុរកិច្ចជប៉ុនប្រចាំកម្ពុជា (JBAC) បានលើកឡើងបែបនេះ ក្នុងកិច្ចប្រជុំលើកទី២៥ នៃគណៈកម្មាធិការចម្រុះកម្ពុជា-ជប៉ុន បានប្រព្រឹត្តទៅនាព្រឹកថ្ងៃទី២១ ខែកុម្ភៈ ឆ្នាំ២០២៣ នៅទីស្តីការក្រុមប្រឹក្សាអភិវឌ្ឍន៍កម្ពុជា (CDC) ក្រោមអធិបតីភាពរបស់លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការ CDC និងលោកAtsushi UENO ឯកអគ្គរដ្ឋទូតជប៉ុនប្រចាំកម្ពុជា ដោយមានការចូលរួមពីតំណាងក្រសួង ស្ថាប័នពាក់ព័ន្ធនៃរាជរដ្ឋាភិបាល ទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) អង្គការពាណិជ្ជកម្មក្រៅប្រទេសជប៉ុន (JETRO) និងតំណាងក្រុមហ៊ុនជប៉ុន ដែលមានប្រតិបត្តិការវិនិយោគនៅកម្ពុជា។

លោកបានលើកឡើងពីតម្លាភាព ភាពអាចប៉ាន់ប្រមាណទុកជាមុនបាន និងស្ថិរភាពនយោបាយនៅកម្ពុជា។

លោកលោកYogo Kanda ក៏បានសម្តែងនូវក្តីសោមនស្សរបស់ខ្លួន ក្នុងនាមតំណាងក្រុមហ៊ុនជប៉ុន ដែលកំពុងមានប្រតិបត្តិការធុរកិច្ច និងវិនិយោគនៅកម្ពុជា ដោយបានលើកជូនអង្គប្រជុំ អំពីភាពជោគជ័យរបស់ក្រុមហ៊ុនជប៉ុនមួយចំនួនដូចជា ក្រុមហ៊ុន AEON Mall (Cambodia) Co., Ltd. ដែលបានបើកឱ្យដំណើរការផ្សារទំនើប AEON សាខាទី៣, ក្រុមហ៊ុន MinebeaMitsumi ដែលបានប្រារព្វពិធីអបអរសាទរខួបលើកទី១១ នៃប្រតិបត្តិការរបស់ខ្លួននៅកម្ពុជា និងក្រុមហ៊ុន Sumi Wiring ដែលបានពង្រីកបន្ថែមរោងចក្រទី៣ កាលពីឆ្នាំ២០២២ ជាដើម។

លោកបញ្ជាក់ថា “ភាពជោគជ័យរបស់ធុរជន និងវិនិយោគិនជប៉ុននៅកម្ពុជា នឹងក្លាយជាកាតាលីករដ៏សំខាន់ ក្នុងការទាក់ទាញធុរជន និងវិនិយោ​គិនជប៉ុន មកបណ្តាក់ទុននៅកម្ពុជាបន្ថែមទៀត”៕

ដោយៈ សុផារី

កោះកុងៈ គិតមកដល់ពេលនេះ ការសាងសង់ផ្លូវជាតិលេខ១០ ពីខេត្តកោះកុង ទៅកាន់ខេត្តបាត់ដំបង សម្រេចវឌ្ឍនភាពសាងសង់បានជិត៧០ភាគរយហើយ ហើយគ្រោងនឹងបញ្ចប់នៅឆ្នាំក្រោយ។

នេះបើតាមការបញ្ជាក់របស់លោកជំំទាវ មិថុនា ភូថងអភិបាលនៃគណៈអភិបាលខេត្តកោះកុង ដែលបានថ្លែងក្នុងសន្និសីទសារព័ត៌មាន ស្ដីពី “ភាពជោគជ័យក្នុងរយៈពេល៥ឆ្នាំកន្លងមក” របស់រដ្ឋបាលខេត្តកោះកុង នៅថ្ងៃទី២១ ខែកុម្ភៈ ឆ្នាំ២០២៣។

លោកស្រីអភិបាលខេត្តបានឱ្យដឹងថា “ការសាងសង់ផ្លូវជាតិលេខ១០ ដែលចេញលាតសន្ធឹងពីខេត្តកោះកុង ខេត្តពោធិ៍សាត់ ខេត្តបាត់ដំបង មានប្រវែង១៩៧,៣៧គីឡូម៉ែត្រ ទទឹងតួផ្លូវសរុបចំនួន៩ម៉ែត្រ ប្រភេទផ្លូវកៅស៊ូពីរស្រទាប់ (DBST) កំពុងបន្តការសាងសង់ និងសម្រេចបានប្រ​មាណ៦៩,២៨%”។

ជាមួយគ្នានេះ លោក សុខ លូ អភិបាលខេត្តបាត់ដំបងបានបញ្ជាក់កាលពីពេលថ្មីៗនេះថា ផ្លូវជាតិលេខ១០ នឹងក្លាយជាផ្លូវដ៏សំខាន់មួយជួយសម្រួល ដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយប្រទេសជិតខាងផងដែរ។

ផ្លូវជាតិលេខ១០នេះ មានប្រវែងសរុបជាង១៩៧គីឡូម៉ែត្រ ដែលនឹងត្រូវចំណាយថវិកា សរុបប្រមាណ១៨៨លានដុល្លារអាមេរិក ក្រោមហិរញ្ញប្បទានពីរដ្ឋាភិបាលចិន ត្រូវបានបើកការដ្ឋានសាងសង់កាល ពីថ្ងៃទី៩ ខែមីនា ឆ្នាំ២០២០ ក្រោមអធិបតីភាពរបស់សម្តេចតេជោហ៊ុន សែន៕

ដោយៈ សុផារី

ភ្នំពេញៈ លោកទេសរដ្ឋមន្ត្រី ស៊ុន ចាន់ថុល បានស្នើសុំឱ្យប្រទេសថៃពិភាក្សាក្នុងការតភ្ជាប់ហេដ្ឋារចនាសម្ព័ន្ធផ្លូវថ្នល់ ដែលនៅសល់ត្រឹមតែមួយគីឡូម៉ែត្រទៀតប៉ុណ្ណោះ ដើម្បីភ្ជាប់មកផ្លូវជាតិលេខ៥៥របស់កម្ពុជា និងលើកកម្រិតផ្លូវដែកបច្ចុប្បន្នឱ្យទៅជាផ្លូវដែក ដែលមានខ្នាតទទឹងវែង ដើម្បីតភ្ជាប់ប្រទេសទាំងពីរ។

ការស្នើសុំនេះធ្វើឡើងក្នុងឱកាស ដែលលោកទេសរដ្ឋមន្ត្រីជួបពិភា​ក្សាជាមួយលោក Cherdkiat ATTHAKOR ឯកអគ្គរាជទូតថៃ ប្រចាំនៅកម្ពុជា នៅថ្ងៃទី២០ ខែកុម្ភៈ ឆ្នាំ២០២៣។

លោកស៊ុន ចាន់ថុល ក៏បានសំណូមពរឱ្យភាគីថៃ ពិនិត្យលទ្ធភាព ជំរុញការតភ្ជាប់ហេដ្ឋារចនាសម្ព័ន្ធផ្លូវថ្នល់ ដែលនៅសល់ត្រឹមតែមួយគីឡូ​ម៉ែត្រទៀតប៉ុណ្ណោះ ដើម្បីភ្ជាប់មកផ្លូវជាតិលេខ៥៥ របស់កម្ពុជា។

លោកទេសរដ្ឋមន្ត្រីក៏បានសំណូមពរឱ្យភាគីថៃ ពិនិត្យលទ្ធភាព ក្នុងការលើកកម្រិតផ្លូវដែកបច្ចុប្បន្ន ឱ្យទៅជាផ្លូវដែក ដែលមានខ្នាតទទឹងប្រវែង១.៤៣៥មីលីម៉ែត្រ ដើម្បីសម្រួលដល់ការដឹកជញ្ជូន ឱ្យកាន់តែមានប្រសិទ្ធភាព ងាយស្រួលក្នុងការតភ្ជាប់ និងកាត់បន្ថយការចំណាយពេលវេលាច្រើន ស្របពេលដែលកម្ពុជា កំពុងស្វែងរកដៃគូវិនិយោគ ការសាងសង់ផ្លូវដែកល្បឿនលឿនពីភ្នំពេញ ទៅប៉ោយប៉ែត ដែលមានតម្លៃជាង៤ពាន់លានដុល្លារ មានចម្ងាយ៣៨២គីឡូម៉ែត្រ ខណៈបច្ចុប្បន្នគម្រោងផ្លូវដែកនេះ បានសិក្សាសមិទ្ធលទ្ធភាពចប់សព្វគ្រប់ហើយ។

កន្លងមក រាជរដ្ឋាភិបាលថៃ បានផ្តល់ជំនួយលើការអភិវឌ្ឍវិស័យហេ ដ្ឋារចនាសម្ព័ន្ធខេត្ត ស្ថិតនៅតាមខ្សៃបន្ទាត់ព្រំដែន ដូចជា ផ្លូវជាតិលេខ៤៨ លេខ៦៧ និងលេខ៦៨ ជាដើម ដែលរក្សាបាននូវសន្តិសុខសណ្តាប់ធ្នាប់តាមបណ្តោយព្រំដែន និងបម្រើឱ្យផលប្រយោជន៍របស់ប្រជាជន និងប្រទេ​សទាំងពីរ៕

ដោយៈ ច្រាយ ចំណាន

ភ្នំពេញៈ លោកជំទាវមិថុនា ភូថង អភិបាលខេត្តកោះកុង បានអះអាងថា អាកាសយានដ្ឋានអន្ដរជាតិតារាសាគរ ស្ថិតក្នុងស្រុកបុទុមសាគរ ខេត្តកោះកុង នឹងបើកការហោះហើរខ្លួនជាផ្លូវការ នៅពាក់កណ្ដាលឆ្នាំ២០២៣នេះ ដោយមិនពន្យារពេលទៀតនោះឡើយ។

លោកជំទាវបានថ្លេងបែបនេះ ក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ស្ដីពី “ភាពជោគជ័យរយៈពេល៥ឆ្នាំ របស់រដ្ឋបាលខេត្តកោះកុង” ។

លោកស្រីមិថុនា ភូថងបានគូសបញ្ជាក់ថា “បច្ចុប្បន្ននេះអាកាសយានដ្ឋានអន្ដរជាតិតារាសាគរ បានសាងសង់រួចរាល់ទាំងស្រុង១០០ភាគរយហើយ រង់ចាំតែពេលវេលាបើកការហោះហើរប៉ុណ្ណោះ”។

អភិបាលខេត្តកោះកុង បានថ្លែងយ៉ាងដូច្នេះថា ព្រលានយន្ដហោះនៅតារាសាគរ គឺសាងសង់រួចរាល់១០០ភាគរយហើយ។ ក្រុមហ៊ុនបានបញ្ជាក់ថា នឹងកំណត់ការហោះហើរនៅពាក់កណ្ដាលឆ្នាំ២០២៣ ដោយមិនពន្យាពេលទៀតនោះឡើយ។

​អាកាសយានដ្ឋានអន្តរជាតិតារាសាគរ ស្ថិតក្នុងស្រុកបុទមសាគរ ខេត្តកោះកុង ជាវិនិយោគដោយក្រុមហ៊ុនចិន Union Development Group ​ក្នុងទំហំទឹកប្រាក់២០០លានដុល្លារ (ដំណាក់កាលទី១) ជាការវិនិយោគសម្រាប់គាំទ្រ ដល់ពហុបំណង វិស័យទេសចរណ៍។

អាកាសយានដ្ឋាននេះ មានសមត្ថភាពផ្តល់ការចុះចតប្រភេទយន្តហោះលំដាប់4E បាន ដូចជា យន្តហោះប្រភេទ Boeing-777 និង Airbus A-340/A-350។

អ្នកនាំពាក្យ និងជាអនុរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹងកាលពីពេលថ្មីៗនេះផងដែរថា ក្រុមហ៊ុនពិតជាបានជូនដំណឹងពីការបញ្ចប់ និងគ្រោង​បើកដំណើរការព្រលានយន្តហោះនេះ នៅខែមិថុនា ខាងមុខពិតប្រា​កដមែន ប៉ុន្តែប្រសិនជាមានការប្រែប្រួលបែបណាទៀត យើងមិនអាចបញ្ជាក់ជាមុនបាននោះទេ៕