ដោយ៖ សុផារី

ភ្នំពេញ៖ ការវិនិយោគអចលនទ្រព្យ គឺជាមុខរបរមួយ ដែលមានច្រើនទម្រង់ហើយក៏អាចផ្តល់ផលចំណេញខុសៗគ្នា ទៅតាមប្រភេទការវិនិយោគនីមួយៗ។ អ្នកជំនាញអចលនទ្រព្យបានប្រាប់ពីប្រភេទនៃអ្នកវិនិយោគចំនួនបីប្រភេទ និងប្រភេទនៃអចលនទ្រព្យ ដែលសក្តិសមសម្រាប់ការវិនិយោគ នៅក្នុងឆ្នាំ២០២៣នេះ។

លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA បានបែងចែកអ្នកវិនិយោគចេញជាបីប្រភេទ។ អ្នកវិនិយោគប្រភេទទី១ គឺអ្នកវិនិយោគ ដែលសម្លឹងមើលពីហានិភ័យទាប ដូច្នេះផលទទួលបានត្រលប់មកវិញក៏ទាបទៅតាមនោះដែរ។

លោកមានប្រសាសន៍ថា សម្រាប់ប្រភេទនេះ ផលចំណេញ ដែលទទួលបានត្រលប់មកវិញ ប្រហែល៥%ទៅ១៥% គឺមានការកើនឡើងតម្លៃតិច ហើយក៏ទទួលបានប្រាក់ជួលត្រឡប់មកវិញ ដូចជា ខុនដូ ផ្ទះ អាផាតមិន ការិយាល័យ ជាដើម។

លោកបន្តថា ចំណែកឯ ប្រភេទអ្នកវិនិយោគទី២ គឺគាត់សម្លឹងមើលឃើញពីផលចំណេញដែលទទួលបានត្រលប់មកពីចន្លោះ១៥% ទៅ៣០% ។ សម្លឹងមើលនៅតំបន់ ដែលកំពុងអភិវឌ្ឍន៍ ដូចជា តំបន់ជាយក្រុងជាដើម ដែលសុទ្ធតែជាតំបន់មានសក្តានុពលទទួលបានផលចំណេញត្រលប់មកវិញ ប៉ុន្តែការលក់អាចនឹងងាយលក់ ឬរៀងយូរបន្តិចទើបអាចលក់ចេញ អាស្រ័យទៅតាមទីតាំង ហើយអចលនទ្រព្យប្រភេទនឹងជួលអត់សូវបានទេ បើមានការជួលក៏ជួលបានតិចតួចដែរ។

លោកបន្ថែមថា អ្នកវិនិយោគទី៣ គឺសម្លឹងមើលទៅលើការទទួលបានផលចំនេញខ្ពស់ តែក៏មានហានិភ័យខ្ពស់ដូចគ្នាដែរ។ ហានិភ័យលើអចលនទ្រព្យប្រភេទនេះ មិនមែនជាការខាតបង់ទាំងអស់នោះទេ គឺជាហានិភ័យដែលជាប់គាំងលក់អត់ចេញ ត្រូវវិនិយោគយូរឆ្នាំ ទម្រាំគេអភិវឌ្ឍន៍ដល់ ទើបងាយស្រួលក្នុងការលក់ចេញ។

លោកបញ្ជាក់ថា “ភាគច្រើនអ្នកវិនិយោគប្រភេទហ្នឹងគាត់មានព័ត៌មាននៅក្នុងដៃ កន្លែងណា ដែលគេនឹងអភិវឌ្ឍន៍នាពេលអនាគត ហើយអចលនទ្រព្យភាគច្រើនជាប្រភេទ ដី តែជួលមិនសូវបាននោះទេ តែផលចំនេញ ដែលទទួលបានគឺខ្ពស់ ចន្លោះពី៣០% ដល់៥០%”។

អ្នកនាង គឹម គិនកេសា ប្រធានជាន់ខ្ពស់នៃក្រុមហ៊ុនCBRE Cambodiaបានមានប្រសាសន៍ថា មុនពេលសម្រេចចិត្តវិនិយោគ វិនិយោគិនគួរស្វែងយល់អោយបានច្បាស់លាស់លើទីតាំងភូមិសាស្ត្រ និងសេដ្ឋកិច្ច ក្នុងតំបន់នោះ ដោយទីតាំងនីមួយៗអាចមានចលករសេដ្ឋកិច្ចខុសៗគ្នា ហើយត្រូវពិចារណាលើរយៈពេលវិនិយោគក្នុងវិស័យទាំងនេះ អាចមានរយៈពេលមធ្យម និងវែង និងធ្វើការសិក្សានូវនិន្នាការទីផ្សារឱ្យបានល្អិតល្អន់មុនពេលវិនិយោគ៕

ដោយ: គង់ លាងហួរ

ភ្នំពេញ: ក្រសួងសាធារណការ និងដឹកជញ្ជូនកម្ពុជា បានជំរុញឱ្យសមភាគីថៃ ពន្លឿនការសាងសង់អគាររដ្ឋបាល នៅច្រកទ្វារអន្តរជាតិស្ទឹងបត់-បានណងអៀន និងរៀបចំឯកសារពាក់ព័ន្ធ ដើម្បីភាគីទាំងពីរអាចបើកច្រកព្រំដែនទ្វេរភាគីនាពេលខាងមុខ។

ការលើកឡើងនេះ បានធ្វើឡើងក្នុងជំនួបកាលពីថ្ងៃចន្ទដើមសប្តាហ៍នេះ រវាងក្រុមមន្ត្រីរបស់ក្រសួងសាធារណការ និងដឹកជញ្ជូនកម្ពុជា (MPWT) ដឹកនាំដោយលោកទេសរដ្ឋមន្ត្រី ស៊ុន ចាន់ថុល និងគណៈប្រតិភូការទូតថៃ ដឹកនាំដោយលោក Cherdkiat Atthakor ដែលជាឯកអគ្គរាជទូតថៃប្រចាំនៅកម្ពុជា ដើម្បីពិភាក្សាអំពីវឌ្ឍនភាព និងការអភិវឌ្ឍនៃទំនាក់ទំនងមិត្តភាព និងកិច្ចសហប្រតិបត្តិការទ្វេរភាគីលើគ្រប់វិស័យ ជាពិសេសការតភ្ជាប់ហេដ្ឋារចនាសម្ព័ន្ធដឹកជញ្ជូន និងការវិនិយោគ។

លោក ស៊ុន ចាន់ថុល បានបញ្ជាក់ប្រាប់លោក Atthakor ថា “ការសាងសង់ច្រកទ្វារអន្តរជាតិស្ទឹងបត់ថ្មី ក្នុងក្រុងប៉ោយប៉ែត កំពុងដំណើរការទៅតាមផែនការ ហើយរំពឹងថានឹងបើកឱ្យដំណើរការដឹកជញ្ជូនធុនធ្ងន់ រវាងកម្ពុជា និងថៃ ដើម្បីសម្រួលដល់ពាណិជ្ជកម្មទំនិញ ហើយការឆ្លងកាត់នេះនឹងរួមចំណែកកាត់បន្ថយការកកស្ទះ នៅច្រកទ្វារអន្តរជាតិប៉ោយប៉ែត”។

លោក វ៉ាស៊ីម សូរិយា អនុរដ្ឋលេខាធិការនៃក្រសួងសាធារណការ និងដឹកជញ្ជូន បានមានប្រសាសន៍ថា “មន្ត្រីថៃបាននឹងកំពុងធ្វើការជាមួយអ្នកម៉ៅការសំណង់នៅព្រំដែនអន្តរជាតិ Ban Non Ian ក្នុងស្រុក Aranyaprathet នៃខេត្តស្រះកែវរបស់ប្រទេសថៃ”។

លោកបានបន្តថា “តាមអ្វីដែលខ្ញុំដឹង ពួកគេត្រូវពិនិត្យឡើងវិញនូវកិច្ចសន្យាផ្ទៃក្នុងរវាងពួកគេ និងអ្នកម៉ៅការ”។

លោកបានបញ្ជាក់ថា “ប្រហែលជាពួកគេអាចរៀបចំឯកសារ ដើម្បីស្វែងរកក្រុមហ៊ុនថ្មីមួយដើម្បីកាន់កាប់ ឬបន្តការសាងសង់អគាររដ្ឋបាលច្រកទ្វារអន្តរជាតិរបស់ពួកគេ”។

លោក ស៊ុន ចាន់ថុល បានស្នើឱ្យសមភាគីថៃ ធ្វើឱ្យប្រសើរឡើងនូវទទឹងផ្លូវដែកដល់១,៤៣៥ម៉ែត្រ ដើម្បីបង្កើនការដឹកជញ្ជូនឱ្យកាន់តែមានប្រសិទ្ធភាព ដែលនឹងមានភាពងាយស្រួលក្នុងការតភ្ជាប់ និងកាត់បន្ថយការចំណាយពេលវេលា ក្នុងការធ្វើពាណិជ្ជកម្មរវាងប្រទេសទាំងពីរ។

លោកស៊ុន ចាន់ថុល ក៏បានស្នើឱ្យសមភាគីថៃ ពិចារណាលើការសាងសង់ផ្លូវ ដែលនៅសល់មួយគីឡូម៉ែត្រទៀត ក្នុងប្រទេសថៃ នៅក្បែរព្រំដែន ដើម្បីតភ្ជាប់ទៅផ្លូវជាតិលេខ៥៥របស់កម្ពុជាផងដែរ៕

  ដោយៈ គង់ សូរិយា

       ភ្នំពេញៈ​ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានប្រកាសឲ្យដឹងថា អង្គការហ្វាត (FATF) បានសម្រេចដកប្រទេសកម្ពុជា ចេញពីបញ្ជីប្រផេះហើយ។

សម្ដេចស ខេង លើកឡើងបែបនេះ នាឱកាសអញ្ជើញ បើកសន្និបាតត្រួតពិនិត្យលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងមហាផ្ទៃ នាថ្ងៃទី២២ ខែកុម្ភៈ ឆ្នាំ២០២៣។

សម្ដេច ស ខេង មានប្រសាសន៍ថា តាមរបាយការណ៍របស់លោក កើត រិទ្ធ រដ្ឋមន្ដ្រីក្រសួងយុត្តិធម៌ បានឲ្យដឹងថា មហាសន្និបាតនៃអង្គការ FATF កាលពីថ្ងៃទី២១ ដែលកិច្ចប្រជុំត្រៀមបំរុង សម្រាប់ថ្ងៃទី២៤ នោះ គឺបានសម្រេចដកកម្ពុជាចេញពីបញ្ជីប្រផេះ ប៉ុន្ដែប្រកាសជាផ្លូវការ តាមព័ត៌​មាន គេនឹងធ្វើម៉ោង១០ (ម៉ោងនៅកម្ពុជា) នៅថ្ងៃទី២៣ ខែមីនា ឆ្នាំ២០២៣ យើងរងចាំព័ត៌មាននេះទាំងអស់គ្នា។

សម្តេចបញ្ជាក់ថា “ដំណឹងនេះពិតជាដំណឹងររីករាយ សម្រាប់កម្ពុជាហើយ ប៉ុន្តែស្របពេ​លជាមួយនឹងអ្វីដែលទទួលនេះ ក៏មិនត្រូវភ្លេចខ្លួនផងដែរ ក្នុងការបន្តការពារកម្ពុជាក្នុងកិច្ចសហការជាមួយអង្គការ FATF”។

សម្ដេចក្រឡាហោមបានបន្ដថា “បន្ទាប់មកទៀត គឺមិនត្រូវភ្លេចខ្លួន ក្នុងការកិច្ចសហប្រតិបត្តិការនានានោះទេ។ ផ្ទុយទៅវិញ គឺខិតខំប្រឹងប្រែង​បន្ថែមទៀត ព្រមទាំងរួមសាមគ្គីគ្នា ទាំងថ្នាក់ជាតិ និងថ្នាក់ក្រោមជាតិ ដើម្បីបន្ដការពារឲ្យបានដាច់ខាត នូវ​លទ្ធផលដែល​ខិតខំជាមួយអង្គការ FATFនេះ។

អង្គការ FATF ដែលមានមូលដ្ឋាននៅទីក្រុងប៉ារីស ប្រទេសបារាំង កាលពីថ្ងៃទី៤ ខែមីនា ឆ្នាំ២០២២ បានសម្រេចបន្តដាក់​កម្ពុជាស្ថិតក្នុងបញ្ជីប្រផេះ នៃក្រុមប្រទេសមានហានិភ័យ​ខាង អំពើលាងលុយកខ្វក់​ដែល​ពិភពលោក​ត្រូវបង្កើនការតាមដាន៕

ដោយៈ Property Area

កោះកុងៈ គម្រោងលើកកម្ពស់កម្រិតផ្លូវជាតិលេខ៤៨ ភ្ជាប់ពីផ្លូវជាតិលេខ៤ ត្រង់ស្រុកស្រែអំបិល ដល់ក្រុងខេមរភូមិន្ទនៃខេត្តកោះកុង សម្រេចវឌ្ឍនភាពការសាងសង់ចំនួន១៨ភាគរយហើយ។

នេះបើតាមប្រសាសន៍របស់លោកស្រី មិថុនា ភូថង នៅក្នុងសន្និសីទសារព័ត៌មាន ស្ដីពីភាពជោគជ័យក្នុងរយៈពេល៥ឆ្នាំកន្លងមក របស់រដ្ឋបាលខេត្តកោះកុង នៅថ្ងៃទី២១ ខែកុម្ភៈ ឆ្នាំ២០២៣។

ផ្លូវជាតិលេខ៤៨ មានប្រវែងសរុប១៤៨គីឡូម៉ែត្រ ចាប់ផ្ដើមពីចំណុចប្រសព្វផ្លូវជាតិលេខ៤ ត្រង់គីឡូម៉ែត្រលេខ១៤១+៧៥០ មានទីតាំងស្ថិត ក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង។

លោកស្រីអភិបាលបានមានប្រសាសន៍ថា “ផ្លូវជាតិលេខ៤៨ត្រូវបានកំពុងកែលំអកម្រិតគុណភាព ដោយក្រាលកៅស៊ូបេតុង AC និងបេតុងត្រង់ផ្លូវប្រសព្វ និងផ្លូវចំណោទ សម្រេចបាន១៧,៩៧ភាគរយហើយ”។

គម្រោងសាងសង់ផ្លូវជាតិលេខ៤៨នេះ គ្រោងបញ្ចប់ការសាងសង់នៅខែមិថុនា ឆ្នាំ២០២៤ ចំណាយថវិកាសរុបប្រមាណ៦៥លានដុល្លារអាមេរិក សាងសង់ដោយក្រុមហ៊ុនកូរ៉េ ILSUNG & HANIL Joint Venture និងត្រួតពិនិត្យបច្ចេកទេសដោយក្រុមហ៊ុន KCI & KECC Joint Venture៕

  ដោយៈ គង់ សូរិយា

       ភ្នំពេញៈ អភិបាលខេត្តកោះកុង លោកជំទាវមិថុនា ភូថងបានមានប្រ​សាសន៍ឲ្យដឹងថា ក្នុងមូលដ្ឋានខេត្ដកោះកុង មានតំបន់ការពារធម្មជាតិចំនួន១០តំបន់ ដែលមានផ្ទៃដីទំហំជាង១លានហិកតា។

តើតំបន់ការពារធម្មជាតិ និងឧទ្យានជាតិទាំង១០នោះមានឈ្មោះអ្វីខ្លះ? ទី១ ឧទ្យានជាតិជួរភ្នំក្រវាញខាងត្បូង ត្រូវបានបង្កើតឡើងដោយអនុក្រឹត្យលេខ៨៩ អនក្រ.បក ចុះថ្ងៃទី០៩ ខែឧសភា ឆ្នាំ២០១៦។ គ្របដណ្តប់លើ៤ខេត្តគឺ កោះកុង ពោធិ៍សាត់ កំពង់ស្ពឺ និងព្រះសីហនុ មានផ្ទៃដីសរុប ៤១០,៣៩២ហិកតា។ គ្របដណ្តប់លើខេត្តកោះកុងទំហំ ៣៦០,៥៩៤ហិកតា។

ទី២ ឧទ្យានជាតិជួរភ្នំក្រវាញកណ្តាល ត្រូវបានបង្កើតឡើងដោយអនុក្រឹត្យលេខ៨១ អនក្រ.បក ចុះ ថ្ងៃទី០៩ ខែឧសភា ឆ្នាំ២០១៦។ គ្របដណ្តប់លើ៣ខេត្តគឺ កោះកុង ពោធិ៍សាត់ និងកំពង់ស្ពឺ មានផ្ទៃដីសរុប ៤០១,៣១៣ហិកតា។ គ្របដណ្តប់លើខេត្តកោះកុង ទំហំ២៣១,៦០៧ហិកតា។

ទី៣៖ ដែនជម្រកសត្វព្រៃតាតៃ ត្រូវបានបង្កើតឡើងដោយអនុក្រឹត្យលេខ៨០ អនក្រ.បក ចុះថ្ងៃទី០៩ ខែឧសភា ឆ្នាំ២០១៦ គ្របដណ្តប់លើ៤ស្រុក និង១ក្រុង នៃខេត្តកោះកុង គឺ កោះកុង បុទុមសាគរ មណ្ឌលសីមា ថ្មបាំង និងក្រុងខេមរភូមិន្ទ មានផ្ទៃដីសរុប ១៤៤,២៧៥ហិកតា។

ទី៤ របៀងអភិរក្សជីវៈចម្រុះប្រព័ន្ធតំបន់ការពារធម្មជាតិ (ជួរភ្នំក្រវាញ) ត្រូវបានបង្កើតឡើងដោយអនុក្រឹត្យលេខ ០៧ អនក្រ.បក ចុះថ្ងៃទី២៦ ខែមករា ឆ្នាំ២០១៧ មានផ្ទៃដីសរុប ១៦៩,៤៦៩ហិកតា គ្របដណ្តប់លើខេត្តកោះកុងទំហំដី១៣,១២១ហិកតា។

ទី៥ ឧទ្យានជាតិសមុទ្រកោះរ៉ុង ត្រូវបានបង្កើតឡើងដោយអនុក្រឹត្យលេខ១៤ អនក្រ.បក ចុះថ្ងៃទី០៨ ខែកុម្ភៈ ឆ្នាំ២០១៨ គ្របដណ្តប់លើ២ខេត្តគឺ កោះកុង និងព្រះសីហនុ មានផ្ទៃដីសរុប៥២,៤៤៨ហិកតា។

ទី៦ ឧទ្យានជាតិបុទុមសាគរ ត្រូវបានបង្កើតឡើងដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣ គ្របដណ្តប់លើ៣ស្រុក នៃខេត្តកោះកុងគឺ គិរីសាគរ កោះកុង និងបុទុមសាគរ មានផ្ទៃដីសរុប១៧១,២៥០ហិកតា។

ទី៧ តំបន់ប្រើប្រាស់ច្រើនយ៉ាងដងពែង ត្រូវបានបង្កើតឡើងដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣ គ្របដណ្តប់លើ២ស្រុក នៃខេត្តកោះកុងគឺ ស្រែអំបិល និងបុទុមសាគរ មានផ្ទៃដីសរុប២៧,៧០០ហិកតា។

ទី៨ ដែនជម្រកសត្វព្រៃពាមក្រសោប ទី៩ តំបន់រ៉ាមសារកោះការពិ ត្រូវបានបង្កើតឡើងដោយព្រះរាជក្រឹត្យ ចុះថ្ងៃទី ០១ ខែវិច្ឆិកា ឆ្នាំ១៩៩៣។ គ្របដណ្តប់លើ២ស្រុក និង១ក្រុង នៃខេត្តកោះកុងគឺ មណ្ឌលសីមា កោះ​កុង និង ក្រុងខេមរភូមិន្ទ មានផ្ទៃដីសរុប២៣,៧៥០ហិកតា។

ទី១០ ដែនជម្រកសត្វព្រៃភ្នំសំកុស ត្រូវបានបង្កើតឡើងដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣។ គ្របដណ្តប់លើ២ខេត្តគឺ កោះកុង និងពោធិ៍សាត់។ គ្របដណ្តប់លើខេត្តកោះកុង ទំហំដីសរុប១៦,៦៧០ហិកតា៕