ដោយ: លាងហួរ

បាងកក: អ្នកនាំពាក្យរាជរដ្ឋាភិបាលថៃ លោកស្រី Rachada Dhnadirek បានឱ្យដឹងថា រដ្ឋាភិបាលគ្រោងបោះទុនវិនិយោគប្រមាណ៣៨,៩៤ពាន់លានដុល្លារ ដើម្បីប្រែក្លាយច្រករបៀងសេដ្ឋកិច្ចភាគខាងកើត (ECC) របស់ឆ្នេរសមុទ្រភាគខាងកើត ទៅជាមជ្ឈមណ្ឌលហិរញ្ញវត្ថុក្នុងតំបន់ និងជាទីក្រុងឆ្លាតវៃលំដាប់ពិភពលោកនៅឆ្នាំ២០៣៧។

លោក​ស្រី​បន្ត​ថា ក្នុង​រយៈ​ពេល១០ឆ្នាំ​ដំបូង គម្រោងនេះនឹងផ្តោត​លើ​ការ​អភិវឌ្ឍ​ វិស័យ​អាជីវកម្ម និង​ហិរញ្ញវត្ថុ ការិយាល័យ​អាជីវកម្ម​ក្នុង​តំបន់ ការិយាល័យ​រដ្ឋាភិបាល មន្ទីរពេទ្យ និង​មជ្ឈមណ្ឌល​អប់រំ។

លោកស្រីបានបញ្ជាក់ថា ទីក្រុងឆ្លាតវៃ នឹងត្រូវបានគេស្គាល់ថាជា ប្រព័ន្ធបច្ចេកវិទ្យាច្នៃប្រឌិត ដែលគ្របដណ្តប់លើវិស័យសំខាន់ៗចំនួន៧ រួមមាន ការចល័តឆ្លាតវៃ ថាមពលឆ្លាតវៃ បរិស្ថានឆ្លាតវៃ ការរស់នៅឆ្លាតវៃ មនុស្សឆ្លាត សេដ្ឋកិច្ចឆ្លាតវៃ និងអភិបាលកិច្ចឆ្លាតវៃ។

ច្រករបៀងនេះលាតសន្ធឹង លើខេត្តភាគខាងកើតចំនួន៣ រួមមាន ខេត្តឈុនបុរី ខេត្តរ៉ាក់យ៉ង និងខេត្តឆាឈឿងសៅ។

ទំហំនៃការវិនិយោគ​ ប្រមាណ៣៨,៩៤ពាន់លានដុល្លារនេះ នឹងពង្រី​កផលិតផល ក្នុងស្រុកសរុបរបស់ប្រទេសថៃ ប្រហែល៥៧,៧ពាន់លានដុល្លារ នៅក្នុងរយៈពេល១០ឆ្នាំ ហើយទីក្រុងឆ្លាតវៃ EEC ត្រូវបានគេរំពឹងថា នឹងមានប្រជាជនប្រមាណ៣៥ម៉ឺននាក់ មករស់នៅក្នុងឆ្នាំ២០៣២៕

  ដោយៈ គង់ សូរិយា

       ភ្នំពេញៈ ក្រុមមន្រ្តីក្រសួងសាធារណៈការ និងដឹកជញ្ជូននិងក្រុមហ៊ុនចិនបានបើក កិច្ចប្រជុំពិភាក្សាពិនិត្យលទ្ធផល នៃការសិក្សាសមិទ្ធិលទ្ធភាពដំបូងនៃគម្រោងធ្វើឱ្យប្រសើរផ្លូវជាតិលេខ៨ ចាប់ពីព្រែកតាមាក់ រហូតដល់ពញ្ញាក្រែក របស់ក្រុមហ៊ុនសំណង់សៀងហៃ។

កិច្ចប្រជុំកាលពីថ្ងៃទី២៩ ធ្នូកន្លងមកនេះ ដឹកនាំាំដោយលោកលីម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញ ដឹកនាំកិច្ចប្រជុំពិភាក្សា ដើម្បីពិនិត្យលទ្ធផលនៃការសិក្សា សមិទ្ធិលទ្ធភាពដំបូងនៃគម្រោងធ្វើឱ្យប្រសើរផ្លូវជាតិលេខ៨ ចាប់ពីព្រែកតាមាក់ រហូតដល់ពញ្ញាក្រែក របស់ក្រុមហ៊ុនសំណង់សៀងហៃ ដោយមានការចូលរួមពីក្រុមការងារបច្ចេកទេសពាក់ព័ន្ធក្រោមឱវាទក្រសួង។

ថ្លែងក្នុងកិច្ចប្រជុំនាឱកាសនេះ លោករដ្ឋលេខាធិការ បានផ្ដល់អនុសាសន៍ណែនាំ ឱ្យក្រុមហ៊ុនសំណង់សៀងហៃ រៀបចំចងក្រងរបាយការណ៍លទ្ធផល នៃការសិក្សាសមិទ្ធិលទ្ធភាពនេះ ឱ្យបានគ្រប់ជ្រុងជ្រោយ ដើម្បីដាក់ជូនថ្នាក់ដឹកនាំក្រសួងពិនិត្យសម្រេច និងសហការឱ្យបានជិតស្និទ្ធជា​មួយមន្ទីរពិសោធន៍សំណង់ និងសាធារណការ ដើម្បីវិភាគបច្ចេកទេសផ្លូវថ្នល់ សំដៅធ្វើយ៉ាងឱ្យគម្រោងនេះ អាចអនុវត្តទៅបានតាមផែនការដែលបានគ្រោងទុក។

គម្រោងធ្វើឱ្យប្រសើរឡើងផ្លូវជាតិលេខ៨ ប្រវែងសរុប១២៣,៦គីឡូ​ម៉ែត្រ ចាប់ពីរង្វង់មូលស្ពានព្រែកតាមាក់ ឃុំព្រែកតាមាក់ ស្រុកខ្សាច់ក    ​ណ្ដាល ខេត្តកណ្ដាល ដល់ចំណុចប្រសព្វផ្លូវជាតិលេខ៧ ត្រង់គីឡូម៉ែត្រលេខ ១៧២+៧០០ ស្ថិតក្នុងឃុំកោងកាង ស្រុកពញ្ញាក្រែក ខេត្តត្បូងឃ្មុំ ឆ្លងកាត់ខេត្តកណ្ដាល ខេត្តព្រៃវែង និងខេត្តត្បូងឃ្មុំ៕

 ដោយៈ វឌ្ឍនៈ

ភ្នំពេញៈ តម្លៃដីធ្លីនៅក្នុងប្រទេសកម្ពុជា បានចាប់ផ្ដើមមានតម្លៃជាបន្តបន្ទាប់ ចាប់តាំងពីប្រទេសទទួលបានសុខសន្តិភាពពេញលេញ ជាពិសេសនៅក្នុងរយៈពេល១ទសវត្សរ៍ចុងក្រោយនេះ តម្លៃដីធ្លីកាន់តែកើនឡើង។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជាថ្លែងថា ប្រទេសមានសុខសន្តិភាពដីធ្លី កាន់តែមានតម្លៃ ហើយវិវាទដីធ្លីក៏កើនឡើងដូចគ្នា ។

សម្តេចបានមានប្រសាសន៍បែបនេះ នៅក្នុងពិធីបូកសរុបការងាររបស់ក្រសួងរៀបចំដែនដី នគរូបនីយកម្ម និងសំណង់ កាលពីពេលថ្មីៗ។

សម្ដេចតេជាបានថ្លែងថា “នៅក្នុងសម័យសង្គ្រាមម្នាក់ៗ រត់យកតែរួចខ្លួន និងមានបាយហូបប៉ុណ្ណោះ គ្មានអ្នកណាចង់បានដីនោះទេ ហើយចូលមកដល់ក្រោយសង្គ្រាមថ្មីៗ ដីធ្លីក៏មិនទាន់មានតម្លៃដែរ”។ សម្តេចបានរំលឹកថា “កាលនោះ រដ្ឋាភិបាលបានសុំឱ្យពលរដ្ឋទៅយកដី នៅតំបន់នេះតំបន់នោះ តែពួកគាត់មិនចង់បានទៅទៀត”។

សម្ដេចតេជោហ៊ុន សែនបានបន្តថា លុះដល់បច្ចុប្បន្ននេះ នៅពេលកំណើនប្រជាពលរដ្ឋកាន់តែកើនឡើង តម្រូវការដីធ្លីក៏កាន់តែច្រើន រហូតដល់មានការកាប់ឆ្ការព្រៃ ដើម្បីបានដីបង្កបង្កើនផលនិងតាំងទីលំនៅ ។ មិនតែប៉ុណ្ណោះ នៅពេលដីកាន់តេមានតម្លៃធ្វើឱ្យវិវាទដីធ្លី ក៏បានកើតឡើងជាបន្តបន្ទាប់ផងដែរ រហូតដល់មានបងប្អូនឈ្លោះគ្នាដណ្ដើមដី កូនឈ្លោះឪពុកម្ដាយដណ្ដើមដីគ្នាផងដែរ ។ ករណីនេះបើសិនមានសង្គ្រាម គ្មានអ្នកណាទៅចង់បានដីទេ ព្រោះថាមិនដឹងយកដីមកធ្វើអីបើគិតតែពីសង្គ្រាម។

ស្របនឹងករណីជំលោះដីធ្លីកាន់តែកើតឡើង ជាបន្តបន្ទាប់សម្ដេចតេ​ជោស្នើឱ្យអាជ្ញាធរ ព្យាយាមដោះស្រាយករណីនេះ នៅក្រៅប្រព័ន្ធតុលាការ ពីព្រោះថាពេលចូលដល់តុលាការ គឺមានតែចាញ់និងឈ្នះប៉ុណ្ណោះ។ ក្នុងន័យនេះ សម្ដេចចង់ឱ្យមានសម្របសម្រួលពីគ្រប់ភាគី ដើម្បីទទួលបានលទ្ធផលឈ្នះឈ្នះ ។

បើតាមលោកង៉ែត ជូ អ្នកជំនាញហិរញ្ញវត្ថុ និងជាអ្នកវិនិយោគអចលនទ្រព្យនៅកម្ពុជា បានសរសេរសារក្នុងបណ្ដាញសង្គមហ្វេសប៊ុករបស់ខ្លួនថា វិនិយោគិនអចលនទ្រព្យ ដែលចង់វិនិយោគលើដីធ្លី គួរចាប់ផ្ដើមពីពេលនេះ ព្រោះពេលនេះ ជាឱកាសដ៏ល្អ សម្រាប់រកប្រាក់ចំណេញនៅរយៈពេល១០ឆ្នាំខាងមុខទៀត។

លោកបន្តថា “ការវិនិយោគដីបច្ចុប្បន្ន អាចទុកចំណេញបានតែសម្រាប់១០ឆ្នាំខាងមុខ អ្នកទិញដីគឺចាប់ផ្ដើមអភិវឌ្ឍន៍ហើយ លែងទុកយកចំណេញទៀតហើយ”៕

ដោយៈ សុផារី

ភ្នំពេញៈ សម្តេចតេជោហ៊ុន សែននាយករដ្ឋមន្ត្រីកម្ពុជា និងលោក វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា នឹងអញ្ជើញបើកការដ្ឋានស្តារ និងលើកកម្រិតគុណភាពផ្លូវពីរខ្សែទៀត គឺផ្លូវជាតិលេខ៣១ និងផ្លូវជាតិលេខ​៣៣ ស្ថិតក្នុងខេត្តកំពត និងខេត្តកែប នៅថ្ងៃសុក្រទី៣០ ខែធ្នូ ឆ្នាំ២០២២នេះ។

ផ្លូវជាតិលេខ៣១ មានប្រវែងសរុបជិត៥៤គីឡូម៉ែត្រ ចាប់ពីបែកគុស (ចំណុច ប្រសព្វផ្លូវជាតិលេខ៣) ទៅដល់ទីរួមស្រុកកំពង់ត្រាច (ចំណុចតភ្ជាប់ផ្លូវជាតិលេខ៣៣)។ ផ្លូវនេះត្រូវស្ដារ និងលើកកម្រិតគុណភាពជាប្រភេទផ្លូវក្រាលបេតុងកៅស៊ូ (AC) មានកម្រាស់ ៧សង់ទីម៉ែត្រ និងពង្រីកទទឹងតួផ្លូវរហូតដល់១២ម៉ែត្រ។

ផ្លូវជាតិលេខ៣៣ មានប្រវែងសរុបជិត៥៣គីឡូម៉ែត្រ ចាប់ពីក្រុងកំពត (ចំណុចប្រសព្វផ្លូវជាតិលេខ៣) ដល់ច្រកលក (ព្រំដែនកម្ពុជា-វៀតណាម) រួមទាំងផ្លូវតភ្ជាប់ ក្នុងក្រុងកំពត (ផ្លូវក្រុងលេខ ៧០៩)។ ផ្លូវនេះ នឹងត្រូវស្ដារ និងលើកកម្រិតគុណភាពជាប្រភេទផ្លូវ ក្រាលបេតុងកៅស៊ូ (AC) មានកម្រាស់៥សង់ទីម៉ែត្រ និងកម្រាស់៧សង់ទីម៉ែត្រ ព្រមទាំងពង្រីកទទឹងតួផ្លូវរហូតដល់១២ម៉ែត្រ និងមានកំណាត់ផ្លូវចំនួន៤ទីតាំង នឹងត្រូវពង្រីកជា៤គន្លង។

ផ្លូវជាតិទាំងពីរខ្សែនេះ នឹងត្រូវអនុវត្ដការសាងសង់ ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេស ក្វាងចូវវ៉ានអាន។ ផ្លូវទាំងពីរខ្សែគ្រោងប្រើពេលវេលាសាងសង់ចំនួន៤០ខែ ដោយគ្រោងបញ្ចប់ការសាងសង់ នៅក្នុងឆ្នាំ២០២៦។

គម្រោងស្តារ និងលើកកម្ពស់គុណភាពផ្លូវជាតិលេខ៣១ គ្រោងចំណា​យថវិការជាង៦០លានដុល្លារអាមេរិក និងផ្លូវជាតិលេខ៣៣ គ្រោងចំណា​យជាង៦១លានដុល្លារអាមេរិក ដែលជាឥណទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ផ្លូវជាតិលេខ៣១ និងផ្លូវជាតិលេខ៣៣ គឺជាខ្សែផ្លូវតភ្ជាប់គ្នា ដ៏មានសក្តានុពល ស្ថិតនៅតំបន់ប៉ូលសេដ្ឋកិច្ចនៃខេត្តភាគនិរតី។ ក្នុងនោះ ផ្លូវជាតិលេខ៣១ ឆ្លងកាត់ភូមិសាស្រ្តខេត្តតាកែវ និងខេត្តកំពត និងផ្លូវជាតិលេខ៣៣ ឆ្លងកាត់ខេត្តកំពត និងខេត្តកែប។ ផ្លូវជាតិទាំងពីរខ្សែនេះ មានភាពប្រទាក់ក្រឡាជាមួយបណ្តាញខ្សែផ្លូវសំខាន់ៗ ដូចជា តភ្ជាប់ជាមួយផ្លូវជាតិលេខ៣ ចាប់ពីថ្នល់បំបែកបែកគុស ទៅដល់ទីរួមស្រុកកំពង់ត្រាច ខេត្តកំពត ត្រង់ចំណុចប្រសព្វតភ្ជាប់ទៅផ្លូវជាតិលេខ៣៣ និងតភ្ជាប់ទៅកាន់ផ្លូវជាតិលេខ២ផងដែរ តាមរយៈផ្លូវខេត្តលេខ១២៦។

ចំណែកឯផ្លូវជាតិលេខ៣៣វិញ គឺតភ្ជាប់ពីកំពង់ត្រាច ត្រង់ចំណុចប្រសព្វផ្លូវជាតិលេខ៣១ ឆ្ពោះទៅកាន់តំបន់ឆ្នេរធម្មជាតិ និងកំពង់ផែសមុទ្រ នៅខេត្តកែប និងខេត្តកំពត និងទៅកាន់ច្រកលក ព្រមទាំងតភ្ជាប់ទៅផ្លូវជាតិលេខ៣ និងផ្លូវជាតិលេខ៤ ព្រៃនប់ ឆ្ពោះទៅកាន់កំពង់ផែសមុទ្រដែលស្ថិតក្នុងខេត្តព្រះសីហនុផងដែរ។

ក្រោយបញ្ចប់ការសាងសង់ ផ្លូវជាតិទាំងពីរខ្សែនេះ នឹងចូលរួមចំណែកដល់ការតភ្ជាប់រវាងរាជធានីភ្នំពេញ ខេត្តតាកែវ ខេត្តកំពត ខេត្តកែប និងខេត្តព្រះសីហនុ ព្រមទាំងតភ្ជាប់ទៅនឹងតំបន់ឧស្សាហកម្ម កំពង់ផែសមុទ្រ តំបន់ព្រំដែនកម្ពុជា-វៀតណាម និងតំបន់ទេសចរណ៍នានា នៅក្នុងខេត្តកែប និងខេត្តកំពត។

ផ្លូវជាតិទាំងពីរខ្សែនេះ ក៏នឹងផ្តល់អត្ថប្រយោជន៍ យ៉ាងធំធេងដល់សេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការសម្រួលដល់ការធ្វើដំណើររបស់ប្រជាពលរដ្ឋ និងការដឹកជញ្ជូនគ្រប់ប្រភេទ ដែលនឹងប្រែក្លាយតំបន់ឆ្នេរឱ្យក្លាយទៅជាតំបន់ ដែលមានហេដ្ឋារចនាសម្ព័ន្ធផ្លូវថ្នល់ល្អប្រសើរ និងប្រទាក់ក្រឡាគ្នា ដើម្បីរួមចំណែកនៅក្នុងការជំរុញការផ្លាស់ប្តូរ ពាណិជ្ជកម្ម ការវិនិយោគ និងទាក់ទាញភ្ញៀវទេសចរបន្ថែមទៀត៕

 ដោយៈ គង់ សូរិយា

       ភ្នំពេញៈ ថ្នាក់ដឹកនាំក្រុមហ៊ុនMega Aset Management Co, Ltd ដែលជាបុត្រសម្ព័ន្ឋមួយ របស់ក្រុមហ៊ុនOCICបាននាំអំណោយ និងជួបសំណេះ​សំណាលជាមួយ ថ្នាក់ដឹកនាំគេហទំព័រPropertyarea.asia និងជូនពរគ្នាទៅវិញទៅមកក្នុងឱកាសឆ្នាំថ្មី។

សហស្ថាបនិក និងជាអគ្គនាយកគេហទំព័រPropertyarea.asiaបា​នលើកឡើងពីការ ចាប់ផ្តើមគេហទំព័រនេះជាផ្លូវការ ការររីកចម្រើន និងបញ្ហាប្រឈម ដែលយើងបានជួបប្រទះកន្លងមក ប៉ុន្តែដោយសារការរីកចម្រើន និងការគាំទ្រពីដៃគូពាណិជ្ជកម្មនានា បានធ្វើឲ្យយើងអាចឈរជើងបានក្នុង  វិស័យនេះរយៈពេលវែង។

លោកបន្តថា “”យើងបានពង្រីកបុគ្គលិកពី៤នាក់ កើនដល់១២នាក់ ដើម្បីបំពេញការងារនៅស្ថាប័នរបស់យើង ដែលយើងបាននិងកំពុងផ្តោត​លើមូលដ្ឋានព៌តមានប្រកបដោយវិជ្ជាជីវៈ អាចទុកចិត្តបាន និងប្រកបដោយ​ក្រមសីលធ៌ម”។ លោកបន្តថា “ការរីកចម្រើនរបស់គេហទំព័រនេះ កើតឡើងបានក៏ដោយសារការគាំទ្រពីសាធារណៈជន និងក្រុមហ៊ុននានា ដែលបាននិងកំពុងជួយគាំទ្រ”។

ជាមួយគ្នានេះ លោកយិន លាងគង់ក៏បានស្វាគមន៍ដៃគូ និងក្រុមហ៊ុនថ្មីៗ ពិសេសក្រុមហ៊ុនOCIC ដែលជាក្រុមហ៊ុនធំមួយ​ ដើម្បីគាំទ្រដល់ដំណើរ​ការរបស់គេហទំព័រផងដែរ។

កញ្ញាLenen Mar PORRAS ប្រធានផ្នែកទីផ្សារនិងភាពច្នៃប្រឌិតនៃ ក្រុមហ៊ុនMaga Asset Management Co, Ltdបានសម្តែងក្តីរីករាយ និងកោតសរសើរដល់គេហទំព័រPropetyarea.asia ដែលជាគេហទំព័រផ្តល់ព៌តមានឈានមុខ ក្នុងចំណោមស្ថាប័នព៌តមានឈានមុខនៅកម្ពុជា។

កញ្ញាបន្តថា “ដោយមើលឃើញការគោរពបាន នូវក្រមសីលធ៌មវិជ្ជាជីវៈ ផ្តល់ព៌តមានលឿន និងអាចទុកចិត្តបាន ក្រុមហ៊ុននឹងផ្តល់កិច្ចសហការ ដល់គេហទំព័រនេះនៅពេលឆាប់ៗខាងមុខនេះ”៕