ដោយៈ សុផារី

ភ្នំពេញៈ តំបន់ប៉ែកខាងជើងរាជធានីភ្នំពេញ កាន់តែបង្ហាញសក្តានុពលខ្ពស់ លើគម្រោងអភិវឌ្ឍលំនៅឋានបែបបុរី វីឡា និងខុនដូឬក្លាយជាតំបន់CBDរួចទៅហើយ។

អ្នកអភិវឌ្ឍន៍ និងអ្នកជំនាញអចលនទ្រព្យមើលឃើញថា នេះជាឱកាសសម្រាប់អ្នកវិនិយោគ លើវិស័យដីធ្លីនៅក្នុងតំបន់នេះ ដើម្បីទទួលបានផលចំណេញនៅពេលក្រោយ។

លោក Jackey Tang CEO គម្រោងបុរីDragon land 598 បានមានប្រសាសន៍កាលពីចុងសប្តាហ៍មុនថា តំបនភាគខាងជើងមានសក្តានុពលខ្ពស់ខ្លាំង លើការវិនិយោគអភិវឌ្ឍន៍ លើគម្រោងលំនៅឋានប្រភេទបុរី វីឡា និងខុនដូ។

អគ្គនាយកក្រុមហ៊ុនចិននេះថា “ការអភិវឌ្ឍលំនៅឋានបែបបុរី វីឡា និងខុនដូ នៅមានសក្តានុពលច្រើន នៅតំបន់ប៉ែកខាងជើងរាជធានីភ្នំពេញ ដោយសារទីតាំងនេះ នៅមិនឆ្ងាយពីរាជធានីភ្នំពេញ ហើយថែមទាំងជិតនឹងតំបន់អភិវឌ្ឍថ្មី ដែលក្បែរនឹងស្តាតមរកតតេជោ ដែលកម្ពុជានឹងធ្វើជាម្ចាស់ផ្ទះនាឆ្នាំក្រោយនេះ គឺកីឡាស៊ីហ្គេម២០២៣”។

លោកបញ្ជាក់ថា តំបន់ភាគខាងជើងនៃរាជធានីភ្នំពេញ នៅតែមានឱកាសច្រើន សម្រាប់ការវិនិយោគ ខណៈពេលដែលតម្រូវការជួល និងទិញខុនដូហាក់មានសន្ទុះឡើងវិញ បន្ទាប់ពីជំងឺកូវីដ១៩បានធូរស្រាល។

ជាមួយគ្នានេះ លោក គាម សៀកឡុង អគ្គនាយកក្រុមហ៊ុន Century 21 Dream Property បានមានប្រសាសន៍កាលពីពេលថ្មីៗនេះថា បើទោះបីមានបញ្ហាជំងឺកូវីដ១៩ នៅក្នុងប្រទេសលក្តី ក៏នៅតំបន់ភាគខាងជើងនៃទីក្រុងភ្នំពេញ នៅតែបន្តទាក់ទាញវិនិយោគិន ដើរស្វែងរកទិញដីធ្លីដដែ​ល ខណៈតម្លៃក៏មិនធ្លាក់ដែរ ម៉្យាងវិញទៀត គម្រោងបុរីនៅតែបន្តរីកសាយភាយ។

បច្ចុប្បន្ននេះ គម្រោងបុរីលំនៅឋានជាច្រើនកំពុងមានវត្តមាន ជាអាទិ៍ បុរីជីបម៉ុង បុរិវិមានភ្នំពេញ បុរី Morgan បុរីឡេងណាវ៉ាត់ត្រា និងគម្រោងអភិវឌ្ឍន៍របស់លោកឧកញ៉ា លីយ៉ុងផាត់ និងគម្រោងធំៗផងដែរ។

លោកមានប្រសាសន៍ថា គម្រោងអភិវឌ្ឍទាំងនេះ បានធ្វើឱ្យតំបន់នេះបន្តសាយភាយ និងជាឱកាសមួយសម្រាប់ប្រជាពលរដ្ឋ ដែលមានធនធានអាចវិនិយោគលើវិស័យដីធ្លីនៅក្នុងតំបន់នេះ ដើម្បីទទួលបានផលចំណេញនៅពេលក្រោយ។ លោកបញ្ជាក់ថា តម្លៃដីធ្លីនៅតំបន់នេះនៅមានតម្លៃធូរថ្លៃនៅឡើយ បើធៀបជាមួយនឹងតំបន់ផ្សេងទៀត ដោយទីតាំងខ្លះមានតម្លៃចំនួន៣០ ទៅ៣៥ដុល្លារអាមេរិកក្នុងមួយម៉ែតការ៉េ។

លោក គាម សៀកឡុង បន្តទៀតថា “នៅពេលដែលមានគម្រោងបុរីទៅច្រើនត្រឹម២ ឬ៥គីឡូម៉ែត្រពីគម្រោងនោះ គឺមានឱកាសចំណេញច្រើនណាស់ ព្រោះមិនយូរមិនឆាប់គម្រោងបុរីនឹងទៅដល់ទីនោះ វាធ្វើឱ្យតម្លៃកើនឡើង។ ធម្មតាគម្រោងបុរី វានឹងបន្តរីកបន្តទៀត”៕

ដោយៈ សុខុម

រីយ៉ាដ: មន្ត្រីថ្នាក់កំពូលអះអាងថា NEOM មិនកំពុងប្រឈមការលំបាក ឬឧបសគ្គរារាំងគម្រោងទីក្រុងឆ្លាតវៃដ៏មហស្ចារ្យ The Line មិនឱ្យដំណើរការទៅមុខឡើយ ខណៈអារ៉ាប៊ីសាអូឌីត ប្តេជ្ញាសម្រេចវាឱ្យក្លាយជាការពិត។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃអាទិត្យ ទី៤ ខែធ្នូ។

ក្នុងបទសម្ភាសន៍ផ្តាច់មុខជាមួយសារព័ត៌មាន Arab News នៅខាងក្រៅកិច្ចប្រជុំកំពូល នៃក្រុមប្រឹក្សាទេសចរណ៍ពិភពលោក (WTTC) កាលពី២សប្ដាហ៍មុននៅទីក្រុងរីយ៉ាដ ប្រទេសអារ៉ាប៊ីសាអូឌីត លោក Peter Fitzhardinge ប្រធានទីផ្សារទេសចរណ៍នៃគម្រោង NEOM បញ្ជាក់ថា ការងារសាងសង់ក្នុងគម្រោង NEOM កំពុងតែបន្តដំណើរការទៅមុខជាលំដាប់ ហើយគម្រោងThe Line ដែលមានតម្លៃ៥០០ពាន់លានដុល្លារ នឹងក្លាយជាការពិតយ៉ាងប្រាកដ។

ប្រធានទីផ្សាររូបនេះបន្តថា “ការអភិវឌ្ឍកំពុងតែដំណើរការ ហើយ NEOM នឹងក្លាយជាការពិត។ ខ្ញុំរស់នៅក្នុងគម្រោង NEOM ហើយខ្ញុំឃើញការវិវឌ្ឍជារៀងរាល់ថ្ងៃ។ អ្នកត្រូវតែមកកាន់ NEOM ដើម្បីមើលរបៀបរស់នៅបែបថ្ងៃអនាគត”។

គាត់បន្ថែមទៀតថា “ខ្ញុំបានធ្វើដំណើរទៅកាន់គម្រោង The Line។ ខ្ញុំយល់ថា មិនមានឧបសគ្គរាំងស្ទះដល់គម្រោង The Line ឡើយ ព្រោះយើងមានចក្ខុវិស័យ ឆន្ទៈ និងការតាំងចិត្តយ៉ាងមោះមុត។ The Line នឹងក្លាយជាចំណុចស្នូល នៃគម្រោងដែលលាតសន្ធឹង លើផ្ទៃដី២៦.០០០គីឡូម៉ែត្រការ៉េនេះ”។

ក្នុងប្រជុំកំពូលខាងលើ លោក Nadhmi Al-Nasr នាយកប្រតិបត្តិរបស់ NEOM លើកឡើងថា “ក្នុងគម្រោង The Line យើងចង់ឱ្យមនុស្សម្នាមកមើលពីរបៀប ដែលគេសាងសង់ពហុកីឡដ្ឋាន និងកន្លែងដែលគេសាងសង់វា។ ពហុកីឡដ្ឋានកីឡាក្នុងទីក្រុង NEOM នឹងមានកម្ពស់៣០០ម៉ែត្រ”។

ទីក្រុងឆ្លាតវៃThe Line នឹងត្រូវបានសាងសង់ឡើង ជាទម្រង់ខ្សែបន្ទា​ត់មួយ ដែលគ្របដណ្ដប់ដោយកញ្ចក់ជុំវិញ។ អគារនេះនឹងកម្ពស់៥០០ម៉ែត្រ ទទឹង២០០ម៉ែត្រ និងប្រវែង១៧០គីឡូម៉ែត្រ ហើយអាចឱ្យមនុស្សស្នាក់នៅបានរហូតដល់ទៅ៩លាននាក់៕ Arab News៕

ដោយ: លាងហួរ

បាងកក: ធនាគារលំនៅដ្ឋានរដ្ឋ(GHB) របស់ប្រទេសថៃរកប្រាក់បានជាង ៣,៥ពាន់លានបាត (ប្រហែល១០០,៨លានដុល្លារ) ពីការលក់ដេញថ្លៃអចលនទ្រព្យ ដែលត្រូវបានរឹបអូសក្នុងរយៈពេល១១ខែដំបូង នៃឆ្នាំ២០២២នេះ។

លោក Saksit Jittanoon នាយករងគ្រប់គ្រងរបស់ធនាគារ GHB បានមានប្រសាសន៍ថា ធនាគារនេះរកប្រាក់បាន៥៥០លានបាត(ប្រហែល១៥,៨៤លានដុល្លារ) ពីការដេញថ្លៃអចលនទ្រព្យចំនួន៤៩៥ កាលពីថ្ងៃសៅរ៍ ទី០៣ ខែធ្នូ។

លោកបានបន្តថា ក្នុងចំណោមអចលទ្រព្យសរុប ក្នុងនោះអចលនទ្រព្យចំនួន១១៩មានតម្លៃ១២៦លានបាត មានទីតាំងនៅតំបន់ Greater Bangkok ហើយអចលទ្រព្យចំនួន៣៧៦ផ្សេងទៀត មានតម្លៃ៤២៤លានបាត ដែលមានទីតាំងនៅតំបន់ផ្សេងទៀតនៃប្រទេសថៃ។

ធនាគារGHBរំពឹងថា នឹងទទួលបានចំណូលយ៉ាងហោចណាស់៤ពាន់លានបាតនៅឆ្នាំនេះ និង៤,៥ពាន់លានបាតនៅឆ្នាំ២០២៣ ពីការដេញថ្លៃអចលនទ្រព្យទាំងនោះ។

លោក Saksit បានបន្ថែមថា ធនាគារ GHB គ្រោងបង្កើតកម្មវិធីស្មាតហ្វូនមួយ ដើម្បីសម្រួលដល់ការទិញអចលនទ្រព្យ ឱ្យបានកាន់តែងាយស្រួល។

ធនាគារ GHB ក៏គ្រោងដាក់លក់ដេញថ្លៃលើអចលនទ្រព្យមួយចំនួនទៀត ដែលត្រូវបានរឹបអូសនៅទីក្រុងបាងកកក្នុងឆ្នាំនេះ ដើម្បីរក្សាសាច់ប្រាក់ងាយស្រួលរបស់ធនាគារ និងត្រៀមរៀបចំខ្លួនសម្រាប់វិបត្តិសេដ្ឋកិច្ចនៅឆ្នាំ២០២៣ខាងមុខ៕

ដោយ: សុផារី

ភ្នំពេញ: ទោះបីជាស្ថានភាពទីផ្សារដីឡូត៍ ក្នុងរយៈពេល៣ឆ្នាំចុងក្រោយនេះប្រឈមនឹងការលក់ធ្លាក់ចុះក្តី តែទីផ្សារមួយនេះនៅតែអាចបន្តសកម្មភាពយូរឆ្នាំទៅមុខទៀត ហើយក្នុងពេលឆាប់ៗនេះ នឹងមានភាពល្អប្រសើរឡើងវិញ។

លោកបណ្ឌិតគីម ហ៊ាង ប្រធាន KW Cambodia បានមានប្រសា សន៍ នៅថ្ងៃទី៣ ខែធ្នូថា អាជីវកម្មដីឡូត៍ នឹងនៅតែបន្តដំណើរការ១០ ទៅ២០ឆ្នាំទៀត។ អតិថិជនដែលទិញដីឡូត៍នៅកម្ពុជា គឺប្រជាជនវ័យក្មេង ដែលមិនទាន់មានលទ្ធភាពគ្រប់គ្រាន់ក្នុងការទិញផ្ទះ ឬខុនដូ។

អ្នកជំនាញអចលនទ្រព្យរូបនេះ បង្ហាញសុទិដ្ឋិនិយមចំពោះអនាគតទីផ្សារដីឡូត៍ ដោយលើកឡើងថា ដីឡូត៍នឹងដំណើរការល្អឡើងវិញ នៅពេលដែលសេដ្ឋកិច្ចជាតិមានលំនឹង ជាពិសេសទីផ្សារឧស្សាហកម្ម និងសេវាកម្ម ក្នុងប្រទេសដំណើរការល្អប្រសើរឡើងវិញ ដោយសារតែអតិថិជនដែលទិញដីឡូត៍ ភាគច្រើនជាក្រុមអ្នកធ្វើការនៅក្នុងទីផ្សារទាំងនេះ។

លោកបណ្ឌិតគូសបញ្ជាក់ថា “នៅពេលសណ្ឋាគារ ភោជនីយដ្ឋាន រង្គសាល រោងចក្រ សហគ្រាស ក្រុមហ៊ុន ដំណើរការល្អ មនុស្សដែលធ្វើការនៅក្នុងវិស័យទាំងនេះមានការងារធ្វើ មានចំណូលថេរ ស្ថានភាពសេដ្ឋកិច្ចគាត់ដើរ នោះគាត់មានលុយ នឹងទិញដីឡូត៍ទៀតហើយ”។

យ៉ាងណាក្តី លោកបណ្ឌិតមើលឃើញថា នាពេលបច្ចុប្បន្ននេះស្ថានភាពដីឡូត៍នៅមានភាពតានតឹងបន្តិច ដោយសារស្ថានភាពទីផ្សារសេវាកម្មទើបតែបើកដំណើរការដោយការប្រុងប្រយ័ត្នខ្ពស់ ហើយអ្នកធ្វើការក្នុងវិស័យនេះ មិនទាន់អាចមានស្ថិរភាពចំណូល ដែលធ្វើឱ្យគាត់សម្រេចចិត្តទិញដីឡូត៍នៅឡើយទេ៕

ដោយៈ សុផារី

ភ្នំពេញៈ អ្នកវិនិយោគ មិនថា វិនិយោគលើចំណេះដឹង អចលនទ្រព្យ អាជីវកម្ម ។ល។ តែងតែមានគោលដៅទទួលបានចំណូល ហើយអាចរស់នៅដោយសុខស្រួល នៅពេលខ្លួនមានវ័យចាស់។

អ្នកជំនាញសេដ្ឋកិច្ច និងវិនិយោគបានចែករំលែកយុទ្ធសាស្ត្រវិនិយោគចំនួន៤យ៉ាង  ដើម្បីឆាប់សំរេចបាននូវសេរីភាពហិរញ្ញវត្ថុ។

លោកង៉ែត ជូ អ្នកវិភាគសេដ្ឋកិច្ច និងជាអ្នកជំនាញហិរញ្ញវត្ថុ បានមានប្រសាសន៍នៅក្នុងវេទិកាសាធារណៈមួយនៅក្នុងរសៀលថ្ងៃទី០៣ ខែធ្នូ ឆ្នាំ២០២២ ស្តីអំពីយុទ្ធសាស្ត្រវិនិយោគ៤យ៉ាង ដើម្បីឆាប់សំរេចបាននូវសេរីភាពហិរញ្ញវត្ថុ។

យុទ្ធសាស្ត្រទី១ លោក ង៉ែត ជូ លើកទឹកចិត្តឱ្យចាប់ផ្តើមវិនិយោគពីវ័យក្មេង ជាពិសេសនៅពេលចាប់ផ្តើម មានប្រាក់ខែនៅពេលណា ត្រូវចាប់  ផ្តើមសន្សំ ដើម្បីវិនិយោគក្នុងពេលនោះតែម្តង។

យុទ្ធសាស្ត្រទី២ លោកលើកឡើងថា យើងត្រូវវិនិយោគលើអ្វី ដែលយើងមានចំណេះដឹងលើផ្នែកនោះ ហើយស្របពេលកំពុងតែវិនិយោគផង យើងត្រូវរៀនសូត្របន្ថែមជាប់ជាប្រចាំផង ដើម្បីបង្កើនចំណេះដឹង។

យុទ្ធសាស្ត្រទី៣ អ្នកវិនិយោគត្រូវពិចារណាជ្រើសរើសវិនិយោគលើអ្វី ដែលផ្តល់ផលចំណេញ ឬកំណើនតម្លៃ (Capital Gain) ឬទាំងចំណេញនិងកំណើនតម្លៃ ចាប់ពី២០ក្នុង១ឆ្នាំឡើងទៅ។

លោកបញ្ជាក់ថា “ពេលនៅក្មេង ពោលគឺអាយុក្រោម៤៥ឆ្នាំ កុំទាន់គិតពីចំណូលអកម្ម ព្រោះចំណូលអកម្ម គឺសមស្របសម្រាប់មនុស្សចូលនិវត្តន៍ប៉ុណ្ណោះ។ ពោលគឺគួរផ្តោតឱ្យខ្លាំងលើការវិនិយោគ ដើម្បីបង្កើនទ្រព្យ”។

យុទ្ធសាស្ត្រទី៤ អ្នកវិនិយោគត្រូវបន្ថែមលើការសន្សំ ដើម្បីវិនិយោគ គឺគួរចេះប្រើដើមទុនពីប្រភពដទៃ ដែលមានថ្លៃដើមទាប ដើម្បីបង្កើនលទ្ធភាពនៃផលចំណេញ។ លោកណែនាំថា គួរប្រើយ៉ាងហោចណាស់៥០% នៃចំណូលដែលរកបាន ដើម្បីវិនិយោគ ហើយបន្តវិនិយោគរៀងរាល់ឆ្នាំឱ្យបានជាប់ជាប្រចាំ៕

ដោយ: លាងហួរ

ហុងកុង: លោក Hui Ka Yan ប្រធានក្រុមហ៊ុនអភិវឌ្ឍន៍អចលនទ្រព្យ China Evergrande Group បានមានប្រសាសន៍ក្នុងកិច្ចប្រជុំផ្ទៃក្នុងកាលពីថ្ងៃសុក្រ ទី០២ ខែធ្នូថា ក្រុមហ៊ុននឹងសម្រេចបាននូវគោលដៅផ្ទេរអចលនទ្រព្យ ទៅឱ្យអតិថិជនរបស់ខ្លួនសម្រាប់ឆ្នាំ២០២២នេះ។

តាមរយៈសេចក្តីថ្លែងការណ៍ ដែលដកស្រង់សម្តីរបស់លោក Hui KaYan  បានបង្ហាញថាក្រុមហ៊ុនEvergrande គ្រោងផ្ទេរលំនៅដ្ឋានចំនួន៣០០.០០០យូនីតនៅឆ្នាំនេះ ក្រោយពីក្រុមហ៊ុននេះ បានផ្ទេរលំនៅដ្ឋានចំនួន២៥៦.០០០យូនីត ទៅកាន់អតិថិជនរបស់ខ្លួនកាលពីចន្លោះខែមករាដល់ខែវិច្ឆិកា។

លោក Hui Ka Yan បានឱ្យដឹងនៅក្នុងសេចក្តីថ្លែងការណ៍ថា យើងត្រូវផ្ទេរលំនៅដ្ឋាន ចំនួន៤៤.០០០យូនីតបន្ថែមទៀត ទៅកាន់អតិថិជននៅក្នុងខែធ្នូនេះ ដោយពេលវេលានៅសេសសល់ ត្រឹមតែ២៩ថ្ងៃទៀតប៉ុណ្ណោះ​។

យ៉ាងណាមិញក្រុមហ៊ុន Evergrande បាន​នឹងកំពុង​រៃអង្គាស​ប្រាក់​ដែល​ខ្លួន​ត្រូវ​ការ ​ដើម្បី​ទូទាត់សងឱ្យ​ម្ចាស់បំណុល និង​អ្នក​ផ្គត់ផ្គង់​ជា​ច្រើន​របស់​ខ្លួន។

ក្រុមម្ចាស់មូលបត្របំណុលរបស់ Hengda Real Estate ដែលជាក្រុមហ៊ុនបុត្រសម្ព័ន្ធក្នុងស្រុកមួយរបស់ Evergrande បានយល់ព្រមលើការពន្យារពេលសងបំណុល និងការបង់អត្រាការប្រាក់ លើមូលបត្របំណុលមួយ ក្នុងចំណោមមូលបត្របំណុលសរុបក្នុងស្រុករបស់ខ្លួន។

ចំណែកកាលបរិច្ឆេទនៃការទូទាត់សងប្រាក់វិញ នឹងត្រូវបានពន្យារពេលពីថ្ងៃទី៥ ខែធ្នូ រហូតដល់ថ្ងៃទី០៥ ខែមិថុនា ឆ្នាំ២០២៣ខាងមុខនេះ៕