ដោយៈ វឌ្ឍនៈ

ភ្នំពេញៈ សម្ដេចតេជោហ៊ុន សែននាយករដ្ឋមន្ត្រីនៃកម្ពុជា បានថ្លែងថា ទីក្រុងគឺជាបេះដូងនៃប្រទេស និងតំបន់នីមួយៗ ដោយជាកន្លែងប្រមូលផ្ដុំសកម្មភាពគ្រប់ទិដ្ឋភាព ទាំងផ្នែកសង្គម សេដ្ឋកិច្ច វប្បធម៌ និងនយោបាយ។

សម្ដេចជោហ៊ុន សែនបានមានប្រសាសន៍បែបនេះ ក្នុងពិធីបើកវេទិកាអភិបាលក្រុងអាស៊ាន និងកិច្ចប្រជុំអភិបាលរាជធានី និងរដ្ឋធានីអាស៊ានឆ្នាំ២០២២ កាលពីព្រឹកថ្ងៃទី ០២ ធ្នូ ២០២២។

សម្តេចបន្តថា “ការអភិវឌ្ឍសង្គម សេដ្ឋកិច្ច និងការកសាងសហគមន៍មួយដ៏រឹងមាំ ប្រកបដោយចីរភាព និងបរិយាប័ន្នត្រូវផ្ដើមចេញពីការសាងនិងតភ្ជាប់ទីក្រុងឆ្លាត មានភាពធន់ និងចីរភាព”។

សម្ដេចបានមានប្រសាសន៍បន្តថា វេទិកាអភិបាលក្រុងអាស៊ាន និងកិច្ចប្រជុំអភិបាលរាជធានី រដ្ឋធានី អាស៊ាន ដែលយើងតែងរៀបចំឡើងជាទៀតទាត់ គឺជាយន្តការដ៏សំខាន់ ដែលអនុញ្ញាតឱ្យរដ្ឋបាលមូលដ្ឋានរបស់អាស៊ាន អាចបង្កើនទំនាក់ទំនង ជំរុញកិច្ចសហប្រតិបត្តិការឱ្យកាន់តែទូលំទូលាយ ជាពិសេសចែករំលែកចំណេះដឹង និងបទពិសោធន៍ និងបន្តពង្រឹងសាមគ្គីភាពសុខដុមនីយកម្មរវាងទីក្រុង រាជធានី និងរដ្ឋធានីអាស៊ាន ។

សម្ដេចបន្តថា ស្ថិតនៅក្នុងបរិការណ៍  ដែលអាស៊ាន និងសកលលោក បាន និងកំពុងជួបបញ្ហាប្រឈមជាបន្តបន្ទាប់ ការកសាងទីក្រុងឆ្លាត ដែលមានការប្រើប្រាស់បច្ចេកវិទ្យាឌីជីថល និងភាពបៃតង គឺជាទិសដៅដ៏ត្រឹមត្រូវបំផុត សម្រាប់ពេលបច្ចុប្បន្ន និងទៅថ្ងៃអនាគត ។ ទីក្រុងឆ្លាត មានសក្ដានុពលខ្ពស់ ក្នុងការដោះស្រាយបញ្ហាទូទៅ នៃការរៀបចំនគរូបនីយកម្ម ប្រក​បដោយនវានុវត្តន៍ ពង្រឹងភាពធន់ តទល់នឹងហានិភ័យផ្សេងៗ និងជាពិសេ​សលើកកម្ពសសុខុមានភាព និងវិបុលភាពនៃជីវភាពរស់នៅរបស់ប្រជាជនក្នុងមូលដ្ឋាន តាមគន្លងប្រក្រតីភាពថ្មី។

សម្ដេចតេជោបន្ថែមថា ទីក្រុងឆ្លាតនឹងក្លាយជាប៉ូលយ៉ាងសំខាន់ ក្នុងការជំរុញសកម្មភាពសង្គម សេដ្ឋកិច្ច ធុរកិច្ច ពាណិជ្ជកម្មនិងការវិនិយោគឱ្យ​កាន់តែខ្លាំងឡើងថែមទៀត ព្រមទាំងផ្ដល់ឱកាសការងារ មុខរបរ និងអាជីវកម្ម ដល់ប្រជាជនទូទៅ ក្នុងប្រទេសនិងតំបន់អាស៊ានទាំងមូល ។

កម្ពុជាក៏បាននិងកំពុងជំរុញ ការកសាងទីក្រុងឆ្លាតនៅបណ្ដាខេត្តមួយចំនួនផងដែរ ក្នុងនោះមានខេត្តព្រះសីហនុ និងខេត្តសៀមរាប ដែលខេត្តទាំងពីរនេះ សុទ្ធសឹងតែជាខេត្តមានសក្ដានុពល ក្នុងការវិនិយោគទេស​ចរណ៍ និងមានការចាប់អារម្មណ៍ពីសំណាក់វិនិយោគិនក្នុង និងក្រៅប្រទេស៕

  ដោយៈ វឌ្ឍនៈ

ភ្នំពេញៈ មកដល់ចុងឆ្នា២០២២នេះហើយ ស្ថានភាពអចលនវត្ថុកម្ពុជានៅតែមិនទាន់បានប្រសើរ ដូចនឹងឆ្នាំ២០១៩នៅឡើយ តែយ៉ាងណាក្ដីធៀបនឹង២ឆ្នាំមុនឃើញថាចុងឆ្នាំនេះ ស្ថានភាពហាក់បានប្រសើរបន្តិចនិងជាក្ដីរំពឹងសម្រាប់វិស័យនៅឆ្នាំ ២០២៣ខាងមុខនេះ

ប្រធានក្រុមហ៊ុនអចលនទ្រព្យ Century 21 Zillion Holing ប្រចាំខេត្តស្វាយរៀង បានបង្ហាញពីសុទិដ្ឋិនិយម ចំពោះវិស័យអចលនទ្រព្យនៅក្នុងតំបន់របស់ខ្លួនថា នឹងមានភាពប្រសើរឡើងវិញ នៅឆ្នាំ២០២៣ខាងមុខនេះ ។

លោកបានសម្តែងសុទិដ្ឋិនិយមបន្តថា “ដោយមើលឃើញពីស្ថានភាព ហាក់កម្រើកបន្តិចនៅចុងឆ្នាំ២០២២នេះ យើងរំពឹងថានៅឆ្នាំ២០២៣ខាងមុខ ទីផ្សារទិញលក់ និងសកម្មភាព នៃការវិនិយោគនៅក្នុងស្វាយរៀង ជាពិសេសក្រុងបាវិតនឹងល្អប្រសើរជាងឆ្នាំនេះនិង២ឆ្នាំមុន”។

លោកបន្តថា ពេលនេះ មានបណ្ដាវិនិយោគិនជាតិមួយចំនួនបានងាកមកមើលដីធ្លី នៅក្នុងខេត្តស្វាយរៀងខ្លះៗហើយ តែមិនទាន់បានដាក់ទុននៅឡើយ ដោយរង់មើល តែក៏បានបង្ហាញពីសញ្ញាវិជ្ជមានថា ពួកគនឹងបណ្ដាក់ទុន ។

លោកបន្ថែមថា ស្វាយរៀងជាខេត្តជាប់ព្រំដែន នៃប្រទេសវៀតណាម ការដឹកជញ្ជូនពីកម្ពុជា ឆ្លងកាត់ស្វាយរៀងក៏ច្រើន ដូច្នេះចង់មិនចង់នឹងមានការបណ្ដាក់ទុនវិនិយោគរោងចក្រ ឃ្លាំង ស្តុកទំនិញសម្រាប់ត្រៀមនាំចេញទៅវៀតណាមផងដែរ ដូច្នេះនៅឆ្នាំក្រោយនេះយើងគិតថា វិស័ឧស្សាហកម្មនឹងមានការបណ្ដាក់ទុនវិនិយោគបន្ថែម ។

ជាមួយគ្នានេះ លោកតុង ហៃ ប្រធានសាខានៃក្រុមហ៊ុនCentury 21 Zillion Holding ប្រចាំខេត្តប៉ៃលិនបានមានប្រសាសន៍ថា នៅឆ្នាំ២០២៣ខាងមុខនេះលោករំពឹងថា ទីផ្សារអចលនទ្រព្យ និងសកម្មភាពនៃការទិញលក់និងតម្លៃអចលនទ្រព្យ ក្នុងខេត្តប៉ៃលិននឹងមានសន្ទុះ ងើបឡើងវិញ បន្ទាប់ពីឆ្នាំ២០២២នេះ ហាក់មានសញ្ញាវិជ្ជមានច្រើន ។

ចំណែកអ្នកស្រីហ្គ្រេស រចនី អគ្គនាយិកាក្រុមហ៊ុនCentury 21 Cambodia ក៏បានលើកឡើងផងដែរថា នៅចុងឆ្នាំ២០២២នេះតម្លៃអចលនទ្រព្យបានកើនឡើងវិញបន្តិច ធៀបនឹងឆ្នាំ២០២០និងឆ្នាំ២០២១កន្លងទៅ  ហើយក៏ជាសញ្ញាល្អសម្រាប់ឆ្នាំខាងមុខនេះដែរ៕

ដោយៈ សុផារី

ភ្នំពេញៈទីផ្សារជួលការិយាល័យ ក្នុងក្រុងភ្នំពេញ នឹងបន្តសកម្មភាពទ្រឹងនៅក្នុងឆ្នាំ២០២៣បន្តទៀត ខណៈស្ថានភាពទីផ្សារជួលការិយាល័យក្នុងបណ្តាប្រទេសជិតខាងកម្ពុជា នឹងប្រឈមនឹងការធ្លាក់ចុះ ក្នុងរយៈពេល១២ខែ ក្នុងឆ្នាំ២០២៣ខាងមុខនេះ។

នេះបើយោងតាមការព្យាករណ៍ នៅក្នុងរបាយការណ៍ Asia Pacific Outlook 2023 របស់ក្រុមហ៊ុន Knight Frank ប្រចាំតំបន់អាស៊ីប៉ាស៊ី   ហ្វិក ចេញផ្សាយនៅថ្ងៃទី០២ ខែធ្នូ ឆ្នាំ២០២២នេះ។

របាយការណ៍ខាងលើឱ្យដឹងថា គិតត្រឹមចុងឆ្នាំ២០២១ ផ្ទៃក្រឡាផ្គត់ផ្គង់សរុបនៃទីផ្សារការិយាល័យ នៅក្នុងតំបន់នឹងកើនឡើងដល់១៤៨លានម៉ែត្រក្រឡា ខណៈផ្ទៃ៤លានម៉ែត្រក្រឡា នឹងត្រូវបានបញ្ចប់ការសាងសង់នៅត្រឹមឆ្នាំ២០២២នេះ។

ជាមួយគ្នានេះ Knight Frank ព្យាករណ៍ថា នៅក្នុងឆ្នាំ២០២៣ ទីផ្សារមួយនេះ នឹងចាក់បញ្ចូលការផ្គត់ផ្គង់បន្ថែម ដល់ទៅ១២,៥លានម៉ែត្រក្រឡា ដែលត្រូវជា៨ភាគរយបន្ថែមទៀតទៅក្នុងទីផ្សារ។

ប្រភពដដែលនេះបានព្យាករណ៍ឱ្យដឹងថា នៅក្នុងរយៈពេល១២ខែ នៃឆ្នាំ២០២៣ខាងមុខនេះ ទីផ្សារជួលការិយាល័យនៅក្នុងទីក្រុងភ្នំពេញ នៃប្រទេសកម្ពុជានឹងស្ថិតនៅទ្រឹង ដែលមានភាពល្អប្រសើរជាងស្ថានភាពនៃទីក្រុងបាងកក នៃប្រទេសថៃ និងទីក្រុងហូជីមិញ នៃប្រទេសវៀតណាម ដែលនឹងមានការធ្លាក់ចុះ។

ក្រៅពីទីក្រុងបាងកក និងហូជីមិញ ទីក្រុងម៉ានីល នៃប្រទេសហ្វីលីពីន និងទីក្រុងកូឡាំឡាំពួរ នៃប្រទេសម៉ាឡេស៊ី ក៏ប្រឈមនឹងការធ្លាក់ចុះផងដែរ។ ផ្ទុយទៅវិញ ទីផ្សារការិយាល័យ នៅក្នុងទីក្រុងមួយចំនួននៅក្នុងតំបន់ ក៏ហាក់មានសញ្ញាវិជ្ជមានល្អប្រសើរឡើងផងដែរ ជាអាទិ៍ ប្រទេសសិង្ហបុរី ហុងកុង ជាដើម៕

ដោយៈ សុផារី

ភ្នំពេញៈ ផ្លូវល្បឿនលឿន គឺជាសសៃឈាមសេដ្ឋកិច្ច ដែលជួយសម្រួ​លក្នុងការដឹកជញ្ជូន និងបម្រើឱ្យវិស័យនានា ប៉ុន្តែវាត្រូវបានហំព័ទ្ធ ដែលធ្វើឱ្យកំណើនតម្លៃ អចលនទ្រព្យមិនសូវជាឡើងថ្លៃខ្ពស់ លើកលែងតែទីតាំងច្រកចេញតែប៉ុណ្ណោះ។

យ៉ាងណាមិញ អ្នកជំនាញផ្តល់យោបល់ទាក់ទង នឹងការទាញយកប្រយោជន៍ជាអតិបរមាពីគម្រោងផ្លូវល្បឿនលឿន។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA បានមានប្រសាសន៍ប្រាប់ Property Area Asia នៅថ្ងៃទី២ ខែធ្នូថា គម្រោងផ្លូវល្បឿនលឿន ជាផែនការក្នុងការជំរុញ និងបម្រើឱ្យការដឹកជញ្ជូន មិនដូចជាគម្រោងផ្លូវក្រវាត់ក្រុង ដែលបម្រើឱ្យការដឹកជញ្ជូន ហើយថែមទាំងបានធ្វើ  ឱ្យមានការអភិវឌ្ឍ នៅតាមបណ្តោយផ្លូវនេះទៀតផង។

ផ្ទុយទៅវិញ ដីធ្លីនៅតាមផ្លូវល្បឿនលឿន មិនអាចធ្វើអ្វីបានច្រើន ប៉ុន្តែមិនមែនមានន័យថា មិនអាចធ្វើអ្វីបាននោះទេ។

លោកឧកញ៉ាបានពន្យល់ថា ទោះបីជាគម្រោងផ្លូវល្បឿនលឿនមិនអនុញ្ញាតឱ្យមានផ្លូវចេញចូលឆ្លងកាត់ក្តី ប៉ុន្តែសម្រាប់ទីតាំងដែលនៅជិតនឹងច្រកចេញ ប្រាកដជាទទួលបានផលប្រយោជន៍ខ្ពស់បំផុត ហើយដីធ្លីនៅតាមបណ្តោយផ្លូវល្បឿនលឿន ដែលមានទីតាំងនៅជិតច្រកចេញ ចូលក៏អាចកែច្នែ ជាគម្រោងអចលនទ្រព្យប្រភេទឧស្សាហកម្ម មានដូចជា រោងចក្រ សហគ្រាស ឃ្លាំងស្តុកទំនិញ ។ល។

លោកបានពន្យល់ថា ការទាញយកប្រយោជន៍ ពីទីតាំងជាប់ផ្លូវល្បឿនលឿន ផ្តល់ផលចំណេញច្រើន សម្រាប់គម្រោងប្រភេទនេះ ដោយសារតម្លៃដីធ្លីនៅមានភាពសមរម្យ ហើយការធ្វើដំណើរមកកាន់ច្រក ចេញចូលមាន    រយៈចម្ងាយជិតជាងទីតាំងនៅទីក្រុងច្រើន។ ដូច្នេះការដឹកជញ្ជូនផលិតផលពីទីតាំងឃ្លាំង ទៅកាន់គោលដៅនឹងកាន់តែងាយស្រួល ហើយចំណាយថវិកាតិចជាង។

ជាមួយគ្នានេះ លោក ច្រឹក សុខនីម  ជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា តម្លៃដីធ្លីនៅតាមបណ្តោយផ្លូវល្បឿនលឿន មិនមានអំណោយផលដល់ការឡើងថ្លៃ គ្រប់កន្លែងនោះទេ ដោយសារផ្លូវមួយនេះជាយន្តការ ដែលជួយសម្រួលដល់ការដឹកជញ្ជូនជាចម្បងច្រើនជាង។

លោកបានបញ្ជាក់ថា “សម្រាប់គម្រោងផ្លូវល្បឿនលឿន ដីធ្លីនៅក្នុងផ្លូវនេះអាចនឹងឡើងថ្លៃ ប៉ុន្តែការឡើងថ្លៃនេះ មិនអំណោយផលគ្រប់កន្លែងនោះទេ ព្រោះផ្លូវល្បឿនលឿនត្រូវបានបិទ និងហ៊ុំព័ទ្ធគ្រប់កន្លែងនៅសងខាងផ្លូវ”។ លោកបន្ថែមថា ៣វាជាចំណែកជួយសម្រួល ក្នុងការធ្វើដំណើរឱ្យកាន់តែលឿន ប៉ុន្តែប្រសិនបើឱ្យដីនៅតំបន់នោះឡើងថ្លៃខ្លាំង គឺមិនច្រើនពេកនោះទេ”៕

ដោយៈ វឌ្ឍនៈ

ភ្នំពេញៈ ការអភិវឌ្ឍនៅតំបន់ប៉ែកខាងត្បូងរាជធានីភ្នំពេញ ឃើញថាបានរីករាលជាបន្តបន្ទាប់ ក្នុងរយៈពេលចុងក្រោយនេះ ជាពិសេសទៅលើសំណង់លំនៅឋានទាំងតម្លៃសមរម្យ និងតម្លៃមធ្យមឡើងទៅ ។

ការអភិវឌ្និងរីកចម្រើនទាំងនេះ ធ្វើឱ្យអ្នកអភិវឌ្ឍន៍លំនៅឋានមួយរូបបង្ហាញពីទស្សនវិស័យផ្ទាល់របស់ខ្លួនថា តំបន់ព្រៃសនឹងក្លាយជាទួលគោកទី២នៅពេលអនាគតដ៏ខ្លីខាងមុខនេះ។

លោកឧកញ៉ា ឈាង រ័ត្ន ម្ចាស់គម្រោងលំនៅឋានបុរី បុស្បាបានមានប្រសាសន៍ឱ្យដឹងនាព្រឹកថ្ងៃទី២ ធ្នូកន្លងមកថា តំបន់ប៉ែកខាងត្បូងរាជធានីភ្នំពេញ មានការអភិវឌ្ឍយ៉ាងលឿន ក្នុងរយៈពេលប៉ុន្មានឆ្នាំនេះ ហើយបើទោះបីជាកម្ពុជា ស្ថិតនៅក្នុងវិបត្តិនៃជំងឺកូវីដ១៩ ក៏ការអភិវឌ្ឍនៅលំនៅឋាននិងសំណង់នានា នៅប៉ែកខាងត្បូងនៅតែបន្តសកម្មភាព យ៉ាងផុសផុលដដែល ។

លោកឧកញ៉ាបន្តថា តាមរយៈការអភិវឌ្ឍនៅប៉ែកខាងត្បូង ជាពិសេសនៅតំបន់ព្រៃស ដូចជា ការអភិវឌ្ឍហេដ្ឋារចនាសម្ព័ន្ធ ផ្លូវធំៗ ប្រព័ន្ធទឹក ភ្លើង លោករំពឹងថាតំបន់នេះ នឹងដូចតំបន់ទួលគោកនាពេលបច្ចុប្បន្ននេះ អញ្ចឹង។ ដូច្នេះហើយទើបបុរីបុស្បា ត្រូវបានអភិវឌ្ឍន៍នៅតំបន់ ដែលមានសក្ដានុពលដូចនេះ ។

លោកឧកញ៉ាបញ្ជាក់ថា “ដូចបានឃើញស្រាប់ នៅជុំវិញបុរី និងតំបន់ព្រៃសទាំងមូលសុទ្ធតែមានផ្លូវធំៗ ហើយផ្លូវទាំងនេះ ក៏គ្រោងនឹងពង្រីកបន្ថែមទៀត ទៅតាមកំណើនប្រជាជនមករស់នៅតំបន់ទាំងនោះ”។

លោកសាស្រ្តាចារ្យវណ្ណ ម៉ូលីវណ្ណ បិតាស្ថាបត្យករកម្ពុជាមួយរូបបានបន្សល់ទុកនូវបណ្ដាំថា ការអភិវឌ្ឍនៅរាជធានី ភ្នំពេញគួរតែបែរទៅទិសខាងត្បូងរាជធានីភ្នំពេញ ពីព្រោះទិសខាងត្បូងជាតំបន់ ដែលងាយនឹងរំដោះទឹក មានប្រព័ន្ធធារាសាស្ត្រខ្វាត់ខ្វែង ងាយនឹងរំដោះទឹកទៅកាន់ទន្លេ៕

ដោយ: សុផារី

ព្រៃវែង: ព្រៃវែងជាខេត្តដែលមានចម្ងាយមិនឆ្ងាយប៉ុន្មានឡើយ ពីរាជធានីភ្នំពេញ អ្នកជំនាញមូលដ្ឋានលើកឡើងថា បច្ចុប្បន្ននេះខេត្តព្រៃវែងមានការអភិវឌ្ឍ មិនចាញ់បណ្តាខេត្តមួយចំនួន ដែលនៅជាប់នឹងក្រុងភ្នំពេញឡើយ ទាំងគម្រោងឧស្សាហកម្ម ទេសចរណ៍ កសិកម្ម និងជាពិសេសអចល​នទ្រព្យ។

ក្នុងចំណោមស្រុកទាំង១២ នៃខេត្តព្រៃវែង មានស្រុកចំនួនពីរទទួល​បានការទិញលក់ដីធ្លី និងការអភិវឌ្ឍលើអចលនទ្រព្យច្រើនជាងគេ។

ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រៃវែង បានមានប្រសាសន៍នៅក្នុងសប្តាហ៍នេះថា ក្នុងចំណោមស្រុកទាំងអស់ នៅក្នុងខេត្តព្រៃវែង មានតំបន់ចំនួនពីរមានចរន្តទិញលក់ដីធ្លី និងការអភិវឌ្ឍច្រើនជាងគេ។ក្នុងនោះរួមមាន ដីធ្លីនៅក្នុងស្រុកពារាំង និងស្រុកពាមរក៍ នៅតាមបណ្តោយផ្លូវជាតិលេខ១១ ជាតំបន់ដែលពេញនិយមបំផុតសម្រាប់ការទិញលក់ដីធ្លី។

លោកបញ្ជាក់ថា “កត្តាដែលជំរុញឱ្យតំបន់ទាំងពីរនេះ ទទួលបានការចាប់អារម្មណ៍ ពីសំណាក់អ្នកវិនិយោគច្រើន ដោយសារស្រុកពារាំងទទួលបានការអភិវឌ្ឍ ប្រព័ន្ធហេដ្ឋារចនាសម្ព័ន្ធផ្លូវថ្នល់ច្រើន”។ លោកបន្តថា “មានទីតាំងកៀកនឹងភ្នំពេញជាងគេ ជាពិសេសវានៅជាប់នឹងផ្លូវក្រវាត់ក្រុងទី៤ ដែលកំពុងតែគ្រោងនឹងសាងសង់ និងនៅជាប់នឹងស្រុកល្វាឯម ដែលកំពុងតែរៀបចំបង្កើតជាក្រុងដ៏ធំមួយនាពេលអនាគត”។

លោកបន្តថា ចំណែក តំបន់ផ្លូវជាតិលេខ១១ ដែលចេញពីខេត្តព្រៃវែងទៅអ្នកលឿងមានការទិញលក់ច្រើន សម្រាប់ការអភិវឌ្ឍជាស្ថានីយ៍ប្រេងឥន្ធនៈ និងជាឃ្លាំងស្តុកទំនិញ៕

    ដោយៈ គង់ សូរិយា

       ព្រះសីហនុៈ អំពូលភ្លើងលំអរនានា ត្រូវបានបំពាក់តាមចដើមឈើ និងបង្គោលអគ្គិសនីនានា ដើម្បីលើកកំពស់សោភ័ណភាព ក្នុងទីក្រុងព្រះសីហនុ ជាការត្រៀមខ្លួនធ្វើជាម្ចាស់ផ្ទះពិធីបុណ្យសមុទ្រនៅចុងឆ្នាំនេះ។

ខេត្តដែលមានការអភិវឌ្ឍយ៉ាងលឿននេះ ក៏នឹងរៀបចំមហាសន្និបាតក្លឹបឆ្នេរសមុទ្រស្អាតជាងគេលើពិភពលោក ក្នុងពេលដំណាលគ្នានេះផងដែរ។

លោក ឡុង ឌីម៉ង់ អភិបាលរងខេត្តព្រះសីហនុអញ្ជើញនាំកិច្ចប្រជុំពិភាក្សាណែនាំ ស្ដីពីការប្រគុំតន្ត្រី តាំងពិព័រណ៍ និងបាញ់កាំជ្រួចនៅក្នុងឱកាសបុណ្យសមុទ្រ លើកទី១៩ ជុំទី៣ និងមហាសន្និបាតក្លឹបឆ្នេរសមុទ្រដែលស្អាតជាងគេលើពិភពលោកឆ្នាំ២០២២ ជាមួយអាជ្ញាធរ មន្ទីរ-អង្គភាពពាក់ព័ន្ធ និងភាគីម្ចាស់សំណើ តាមរយៈប្រព័ន្ធប្រជុំ zoom។

លោក ឡុង ឌីម៉ង់ អភិបាលរងខេត្តព្រះសីហនុ បានធ្វើការណែនាំឱ្យក្រុមហ៊ុនម្ចាស់សំណើទាំងអស់ យកចិត្តទុកដាក់ជាពិសេស និងមានទំនួលខុសត្រូវ លើការគ្រប់គ្រងអនាម័យបរិស្ថាន សន្តិសុខ សណ្ដាប់ធ្នាប់ របៀបរៀបរយ នៅអំឡុងពេល និងក្រោយព្រឹត្តិការណ៍ ធ្វើយ៉ាងណាធានាឱ្យបាននូវសោភណ្ឌភាព និងកេរ្តិ៍ឈ្មោះដ៏ល្អរបស់ខេត្តព្រះសីហនុ។

ពិធីបុណ្យលើកទី៩ជុំទី៣ ចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ និងមហាសន្និបាតក្លឹបឆ្នេរសមុទ្រ ស្អាតជាងគេលើពិភពលោក ក្រោមប្រធានបទ” ឆ្នេរនៃសន្តិភាព ឆ្នេរនៃក្តីសង្ឃឹម” ចាប់ពីថ្ងៃទី៩ ដល់ថ្ងៃទី១៤ ខែធ្នូ ឆ្នាំ២០២២នៅខេត្តព្រះសីហនុ៕

 ដោយៈ គង់ សូរិយា

       ភ្នំពេញៈ អ្នកវិនិយោគនានាតែងតែមើលឃើញឱកាស និងសក្តានុពលតំបន់និមួយៗខុសៗគ្នា អាស្រ័យលើការគិត និងបណ្តាញព៌តមានដែលពួកគេទទួលបាន។

អ្នកជំនាញបង្ហើបទីតាំងសំខាន់ៗចំនួន៤ ក្នុងរាជធានីភ្នំពេញ និងតំបន់ជាយក្រុង ដែលត្រូវបានមើលឃើញថា នឹងមានតម្លៃដីខ្ពស់ជាងមុនបន្ថែមទៀត ព្រមទាំងអាចផ្តល់ផលចំណេញខ្ពស់ ដល់ការវិនិយោគក្នុងរយៈពេលមធ្យម។​

អគ្គនាយកក្រុមហ៊ុនភ្នាក់ងារអចលនទ្រព្យ Century 21 Advance លោក ឡុង គីមសួគ៌បានមានប្រសាសន៍ឲ្យដឹងកាលពីពេលថ្មីៗនេះថា នៅក្នុងកំឡុងពេលនេះ ខណ្ឌសែនសុខ និងខណ្ឌច្បារអំពៅ ជាខណ្ឌចំនួនពីរ ដែលតម្លៃអចលនទ្រព្យនឹងមានការកើនឡើងខ្ពស់ នាពេលអនាគត។

ទីតាំងទី១

ខណ្ឌសែនសុខ ជាខណ្ឌដែលមានការអភិវឌ្ឍ លើប្រព័ន្ធហេដ្ឋារចនាសម្ព័ន្ធនានា ហើយតម្លៃដីថ្លីនៅក្នុងខណ្ឌមួយនេះ នៅមានឱកាសអាចឡើងថ្លៃបានទៀត។

លោកបញ្ជាក់ថា “ខ្ញុំគិតថា តម្លៃដីដែលអាចទិញលក់ចំណេញ បានល្អ គឺនៅក្នុងខណ្ឌសែនសុខ”។

ទីតាំងទី២

ខណ្ឌច្បារអំពៅ ជាទីតាំងប្រមូលផ្តុំ ដោយការរស់នៅរបស់ប្រជាជនជាច្រើន។ ជាពិសេស ជាទីតាំងប្រមូលផ្តុំដោយគម្រោងធំៗ ទាំងគម្រោងរដ្ឋាភិបាល និងគម្រោងឯកជន ជាក់ស្តែងគម្រោង កោះនរាហ៍ គម្រោងផ្សារទំនើបរបស់ប៉េង ហ៊ួត ជាដើម។

លោកលើកឡើងថា “ប្រសិនបើយើងមើលពីរបាយប្រជាជន រស់នៅ ខណ្ឌច្បារអំពៅ មានប្រជាជនច្រើនជាងគេហើយកកស្ទះជាងគេ។ លើសពីនេះ មានគម្រោងអភិវឌ្ឍន៍ធំៗ ជាច្រើននៅជុំវិញខណ្ឌមួយនេះ ដូចជា គម្រោ​ងអភិវឌ្ឍន៍កោះនរាហ៍ ផ្សារទំនើបក្រុមហ៊ុនប៉េងហួត ស្ពានមិត្តភាពកម្ពុជាកូរ៉េ ភ្នំពេញ-អរិយក្សត្រ ជាដើម”។

លោកបន្តថា កត្តាចំនួនពីរបានជំរុញឱ្យតម្លៃអចលនទ្រព្យ មានការកើនឡើង រួមមាន ទី១ ស្ថិតិប្រជាជន ទី២ ដំណើរការអាជីវកម្ម និងការអភិវឌ្ឍនៅក្នុងតំបន់។

លោកបញ្ជាក់ថា “តំបនណាមានប្រជាជនរស់នៅច្រើន មានសកម្ម​ភាពអាជីវកម្មខ្លាំង បូករួមការអភិវឌ្ឍ នោះតំបន់នោះនឹងមានការឡើងថ្លៃអចលនទ្រព្យ”។

ចំណែកលោក ខាត់ សុវណ្ណ សមាជិកក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារចលនវត្ថុកម្ពុជា បានមានប្រសាសន៍នៅថ្ងៃដដែលថា តំបន់ជាយក្រុង នឹងនៅតែទទួលបានផលចំណេញខ្ពស់ ពីការវិនិយោគដីធ្លី ដូចជា តំបន់ព្រលានយន្តហោះអន្តរជាតិភ្នំពេញថ្មី តំបន់ផ្លូវជាតិលេខ១ តំបន់ផ្លូវជាតិលេខ២ តំបន់ផ្លូវជាតិលេខ៥ តំបន់ផ្លូវជាតិលេខ៦ តំបន់អរិយក្សត្រ ។ល។

លោកបន្ថែមថា “នៅជុំវិញភ្នំពេញ នៅតែមានឱកាស នៅប៉ែកផ្លូវជាតិលេខ៥ លេខ៦ លេខ១ លេខ២ ព្រោះហេដ្ឋារចនាសម្ព័ន្ធ នៅតាមបណ្តោយផ្លូវមួយចំនួន នៅមិនទាន់មាននៅឡើយទេ។ នៅក្នុងរយៈពេល៣ទៅ៥ឆ្នាំទៀត មានឱកាសច្រើន”។

លោកសុវណ្ណលើកឡើងថា តំបន់ទាំងឡាយខាងលើនេះ អាចផលចំណេញខ្ពស់ក៏ពិតមែន តែចំនួននៃអ្នកឈានជើងចូល ទៅវិនិយោគក៏មានចំនួនច្រើនផងដែរ។ ដូច្នេះ អ្នកដែលមានបំណងចង់ប្រឡូក ក្នុងវិស័យនេះ ត្រូវសិក្សាស្វែងយល់ពីកំណើបតម្លៃ និងអត្រាតម្លៃដីធ្លីនៅក្នុងតំបន់ទាំងនោះ៕

ដោយៈ គង់ សូរិយា

       ភ្នំពេញៈ រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ បានដាក់ចេញគោលការណ៍សំខាន់ៗមួយចំនួន ក្នុងការធ្វើអត្តសញ្ញាណកម្ម និងជ្រើសរើសគម្រោង ដើម្បី​អាច​អនុវត្តតាមយន្តការភាពជាដៃគូរវាងរដ្ឋ និង​ឯកជន។​

ព៌តមាននេះ ត្រូវបានបង្ហាញក្នុងសិក្ខាសាលាស្តីពី “នីតិវិធីគ្រប់​គ្រង​ប្រតិបត្តិ​ការរួម សម្រាប់គម្រោងភាពជាដៃគូរវាងរដ្ឋ និង​ឯកជន​” ​ឬ ហៅកាត់ថា “SOP for PPP Projects”​ កាលពីថ្ងៃទី២៨ ខែវិច្ឆិកា ឆ្នាំ២០២២។

លោក ឈីម សូចរស្មី ប្រធាននាយកដ្ឋានអភិវឌ្ឍន៍គម្រោង នៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា គោលការណ៍ណែនាំនេះ ដាក់ចេញក្នុងគោលបំណងកំណត់ និងជ្រើសរើសនូវ​គម្រោង​ជាអាទិភាព តាម​រយៈ​​វិធីសាស្ត្រ​ស្តង់ដារមួយ ដែលប្រើប្រាស់ក្នុងការវាយតម្លៃលើគម្រោង ជាមួយ​នឹង​លក្ខណៈ​វិនិច្ឆ័យមួយចំនួនថា ​តើ​​គម្រោង​នោះអាចធ្វើលទ្ធកម្ម សម្រាប់អនុវត្តតាមយន្តការភាពដៃគូរវាងរដ្ឋ និងឯកជនបាន ឬអត់។

តាមរយៈបទបង្ហាញលោកប្រធាននាយកដ្ឋាន លក្ខណៈវិនិច្ឆ័យក្នុងការកំណត់ និងជ្រើសរើសប្រភេទគម្រោង​ភាព​ជា​ដៃគូ រវាងរដ្ឋ និងឯកជន ចែកជា២ដំណាក់កាល រួមមាន៖

ក. ដំណាក់កាលទី១

• គម្រោងត្រូវតែស្របនឹងយុទ្ធសាស្ត្រជាអាទិភាព របស់រាជរដ្ឋាភិបាល ជាពិសេសគម្រោងហេដ្ឋារចនាសម្ព័ន្ធ។
• គម្រោងដែលមានការចំណាយជាអប្បបរមា និង/ឬ មិនសាំញាំច្រើនក្នុងការធ្វើលទ្ធកម្ម។
• គម្រោងដែលទទួលបានការគាំទ្រ ពីដៃគូពាក់ព័ន្ធ ដោយផ្អែកលើការពិគ្រោះយោបល់ជាមុនជាសាធារណៈ។
• ការគាំទ្រ ការប្តេជ្ញាចិត្ត និងឆន្ទៈក្នុងការអនុវត្តគម្រោងរបស់ស្ថាប័នសាមី ត្រូវបានដាក់ឆ្លងក្រសួង​សេដ្ឋ​កិច្ច និង​ហិរញ្ញ​វត្ថុ។
• គម្រោងដែលមិនជាប់ពាក់ព័ន្ធនឹងការរំលោភដីធ្លី ការផ្លាស់ទីលំនៅ បញ្ហាសង្គម និងបញ្ហាបរិស្ថាន។
• គម្រោងដែលអាចអនុវត្តតាមយន្តការភាពជាដៃគូរវាងរដ្ឋ និងឯកជន ដូចជាគម្រោងដែលបានធ្វើលទ្ធកម្មពី មុន ដោយប្រើប្រាស់ហិរញ្ញប្បទាន និងអ្នកជំនាញរបស់វិស័យឯកជន​ទាំងជាតិ និងអន្តរជាតិ។
• គម្រោងភាពជាដៃគូរវាងរដ្ឋ និងឯកជន ដែលស្នើឡើងដោយវិស័យឯកជន ដែលមិនទាមទារ​ជំនួយ​ហិរញ្ញប្ប​ទាន​ពីរដ្ឋាភិបាល ក្នុងទម្រង់ជាការធានា ឧបត្ថម្ភធន ប្រាក់ជំនួយ ឬជំនួយផ្នែកហិរញ្ញវត្ថុប្រភេទ។ផ្សេងទៀត។

  

ខ. ដំណាក់កាលទី២

• គម្រោងមានតម្រូវការផ្នែកទីផ្សារ
• គម្រោងដែលមានយន្តការទូទាត់/ ប្រមូលចំណូលមានភាពស្ថិតស្ថេរ អាចប៉ាន់ស្មានដឹង ព្រមជាមួយ​​នឹង​ការ​ទាក់ទាញនូវហិរញ្ញវត្ថុ
• គម្រោងមានតម្លៃដល់សង្គម និងសេដ្ឋកិច្ច
• មានគោលការណ៍សមរម្យក្នុងការទទួលបន្ទុកហានិភ័យរបស់គម្រោង។
• ទ្រព្យសកម្មសរុបរបស់គម្រោងដែលអាចគ្រប់គ្រងបាន។
• គម្រោងអាចអនុវត្តបានស្របតាមច្បាប់ និងលិខិតបទគតិយុត្តពាក់ព័ន្ធ។

នៅក្នុងដំណាក់កាលទី២នេះ លក្ខណៈវិនិច្ឆ័យទាំង៦នេះ ត្រូវបានវិនិច្ឆ័យមួយកម្រិតទៀត និងផ្តល់ជាពិន្ទុខុសគ្នាៗ ​ទៅ​​​តាមប្រភេទគម្រោងដោយក្រសួងសេដ្ឋកិច្ច និងហិរញ្ញវត្ថុ។

វិធីសាស្ត្រក្នុងការធ្វើអត្តសញ្ញាណកម្ម និងជ្រើសរើសគម្រោងភាពជាដៃគូរវាងរដ្ឋ និងឯកជន ត្រូ​វ​បាន​លម្អិតក្នុងឧបសម្ព័ន្ធ របស់អនុក្រឹត្យលេខ ១៧៤ អនក្រ.បក ចុះថ្ងៃទី៣១ ខែសីហា ឆ្នាំ២០២២ ស្តីពីការដាក់ឱ្យប្រើ​នីតិវិធីគ្រប់គ្រងប្រតិបត្តិការរួម សម្រាប់គម្រោងភាពជាដៃគូរវាងរដ្ឋ និងឯកជន៕