ដោយ: លាងហួរ

ប៉េកាំង: ទីភ្នាក់ងារវាយតម្លៃ Moody’s បានរាយការណ៍នៅថ្ងៃសុក្រនេះថា ហានិភ័យចំពោះស្ថិរភាព នៃប្រព័ន្ធហិរញ្ញវត្ថុរបស់ប្រទេសចិនកំពុងកើនឡើង ក្រោយពីមានការបន្តធ្លាក់ចុះ នៃវិស័យអចលនទ្រព្យ និងការធ្លាក់ចុះនៃសេដ្ឋកិច្ច ដែលធ្វើឱ្យធនាគារតូចៗកាន់តែងាយរងគ្រោះ។

វិស័យអចលនៈទ្រព្យរបស់ប្រទេសចិន បានដាំក្បាលចុះយ៉ាងខ្លាំងនៅក្នុងឆ្នាំនេះ បន្ទាប់ពីទីក្រុងប៉េកាំងបានរារាំង ការផ្តល់ប្រាក់កម្ចីច្រើនលើសលប់ពេកដល់អ្នកអភិវឌ្ឍន៍។  ការគៀបសង្កត់នេះ បានបង្កឱ្យមានការធ្លាក់ចុះនៃការវិនិយោគលើអចលនទ្រព្យ ការលក់ និងតម្លៃ និងការខកខានទូទា ត់សងមូលបត្របំណុល។

ទីភ្នាក់ងារ Moody’s បានឱ្យដឹងនៅក្នុងរបាយការណ៍មួយថា ទ្រនាប់សម្រាប់ការពារប្រព័ន្ធហិរញ្ញវត្ថុកំពុងបំផ្លាញ ដែលនឹងបង្កហានិភ័យ ប្រសិ នបើការធ្លាក់ចុះ នៃអចលនទ្រព្យកាន់តែអូសបន្លាយពេលទៅមុខ ហើយការធ្លាក់ចុះ នៃតម្រូវការបានរក្សាទស្សនវិស័យអវិជ្ជមាន សម្រាប់វិស័យអចលនទ្រព្យរបស់ប្រទេសចិន។

ហានិភ័យចំពោះស្ថិរភាព នៃប្រព័ន្ធហិរញ្ញវត្ថុរបស់ប្រទេសចិន កំពុងកើនឡើង ស្របពេលមានការធ្លាក់ចុះ នៅក្នុងវិស័យអចលនទ្រព្យ និងការធ្លាក់ចុះនៃសេដ្ឋកិច្ច។

ចំណែកទីក្រុងប៉េកាំង បានបង្កើនការគាំទ្រក្នុងប៉ុន្មានសប្តាហ៍ថ្មីៗនេះដើម្បីបង្កើនសាច់ប្រាក់ងាយស្រួល ក្នុងវិស័យអចលនទ្រព្យ ដែលជាកត្តាជំរុញកំណើនសេដ្ឋកិច្ចដ៏សំខាន់។

លោកស្រី Lillian Li អនុប្រធាន និងជាមន្ត្រីជាន់ខ្ពស់ផ្នែកឥណទានរបស់ទីភ្នាក់ងារMoody’sបានមានប្រសាសន៍ថា ទោះបីជាក្រុមអាជ្ញាធរចិនបន្តប្រើប្រាស់ឧបករណ៍ជាច្រើន ដើម្បីការពារវិបត្តិហិរញ្ញវត្ថុជាប្រព័ន្ធយ៉ាងណាក្តី ប៉ុន្តែទ្រនាប់ការពារទាំងនោះកំពុងចុះខ្សោយ និងអាចបង្កជាហានិភ័យ ប្រសិនបើការដាំក្បាលចុះ នៃវិស័យអចលនទ្រព្យចិន នៅតែអូសបន្លា យបន្តទៀត៕

ដោយៈ គង់ ម៉ាលីនណា

       ភ្នំពេញៈ មន្រ្តីជាន់ខ្ពស់ក្រសួងសាធារណៈការ បានបើកកិច្ចប្រជុំពិនិ  ត្យលើការងារកែលម្អបរិស្ថាន ក្រុងជុំវិញបឹងទន្លេសាបជំហានទី២ និងគម្រោ​ងអភិវឌ្ឍន៍ច្រករបៀងទី៤ មហាអនុតំបន់មេគង្គ ដើម្បីលើកកម្ពស់អនាម័យ និងគុណភាពនៃការរស់នៅល្អជូនប្រជាពលរដ្ឋ។

កិច្ចប្រជុំនេះ ដឹកនាំដោយលោករស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងមានការអញ្ជើញចូលរួមពីមន្ត្រីជំនាញក្រសួង ក្រុមការងារទីប្រឹក្សាបច្ចេកទេស និងមន្ត្រីពាក់ព័ន្ធជាច្រើនរូបផងដែរ។

កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ និងពិភាក្សាលើវឌ្ឍនភាពការងារសម្រេចបាន គម្រោងកំពុងសិក្សាសមិទ្ធិលទ្ធភាព និងគម្រោងដែលកំពុងអនុវត្តបន្ត ទាក់ទងនឹងការលើកកម្ពស់ទឹកស្អាត និងអនាម័យ គម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាបជំហានទី២ និងគម្រោងអភិវឌ្ឍន៍ច្រករបៀងទី៤ មហាអនុតំបន់មេគង្គ ដែលទទួលបានឥណទានសម្បទានពីធនាគារអភិវឌ្ឍអាស៊ី(ADB)។

អង្គប្រជុំបានពិភាក្សាយ៉ាងផុសផុល លើបទបង្ហាញស្តីពីគម្រោងលើកកម្ពស់ទឹកស្អាត និងអនាម័យ តាមរយៈការសាងសង់ឱ្យមានប្រព័ន្ធចម្រោះទឹកកខ្វក់ និងទឹកភ្លៀង និងការសាងសង់ទីលានចាក់សំរាម នៅតាមបណ្ដាខេត្តមួយចំនួនរួមមាន ខេត្តកំពង់ធំ ខេត្តកំពង់ចាម ខេត្តបាត់ដំបង ខេត្តសៀមរាប ខេត្តក្រចេះ ខេត្តបន្ទាយមានជ័យ និងខេត្តស្ទឹងត្រែងជាដើម ដើម្បីលើកម្ពស់អនាម័យ ការទុកដាក់សំរាម និងការបញ្ចេញទឹកសំណល់កខ្វក់ពីលំនៅដ្ឋានរបស់ប្រជាពលរដ្ឋ ពិសេសខេត្តជុំវិញបឹងទន្លេសាប និង តាមបណ្ដោយទន្លេមេគង្គ ឱ្យកាន់តែមានការប្រសើរឡើង។

លោករស់ វណ្ណាបានថ្លែងអំណរគុណ ដល់ក្រុមការងារជំនាញក្រសួង រួមទាំងទីប្រឹក្សាបច្ចេកទេស ក្នុងគម្រោងទាំងអស់ ដែលបានខិតខំប្រឹងប្រែងអនុវត្តគម្រោងតាមផែនការ ដែលបានគ្រោងទុករហូតទទួលបាន លទ្ធផលល្អ និងបានជំរុញលើកទឹកចិត្តឱ្យក្រុមការងារបន្ត ខិតខំប្រឹងប្រែងបន្ថែមទៀត ដើម្បីឈានទៅសម្រេចបានគោលដៅរួម ក្នុងការលើកកម្ពស់អនាម័យ និង គុណភាពនៃការរស់នៅរបស់ប្រជាពលរដ្ឋ៕

ដោយ៖ សុផារី

បាត់ដំបង៖ ដើម្បីចូលរួមលើកកម្ពស់កែលំអសោភ័ណភាពទីក្រុងបាត់ដំបង ដែលនឹងក្លាយទៅជាទីក្រុងទេសចរណ៍ដ៏សំខាន់របស់ប្រទេសកម្ពុជា រដ្ឋបាលខេត្តបាត់ដំបង បានគ្រោងនឹងសាងសង់នូវសមិទ្ធផលថ្មីសំខាន់ចំនួន៣បន្ថែមទៀត នៅចំកណ្តាលទីក្រុងបាត់ដំបង ខណៈប្លង់គោលត្រូវបានសិក្សាបញ្ចប់ទាំងស្រុងហើយ ហើយការស្ថាបនាសាងសង់នឹងធ្វើឡើងក្នុងពេលដ៏ខ្លីខាងមុខនេះ។

លោក សុខ លូ អភិបាលខេត្តបាត់ដំបង បានបញ្ជាក់ថា សមិទ្ធផលសំខាន់ទាំង៣នោះ រួមមាន ទី១.ការស្ថាបនាវិមានឯករាជ្យ ទី២.សួនសម្ដេចក្រឡាហោមវិមានឯករាជ្យ និងទី៣.ផ្សាររាត្រីបាត់ដំបង ហើយទីតាំងស្ថាបនាវិមានឯករាជ្យ និងសួនសម្ដេចក្រឡាហោមវិមានឯករាជ្យ គឺស្ថិតនៅក្នុងបរិវេណនៃសួននាគបាញ់ទឹក និងតំបន់ជំវិញនៃវិថីម្ហូបអាហារ ដែលក្រុមអាជីវករកំពុងប្រកបរបរអាជីវកម្មលក់ដូរនៅទីនោះ នឹងត្រូវធ្វើការផ្លាស់ប្ដូរទីតាំងលក់ដូររបស់ពួកគាត់ទៅផ្សាររាត្រីបាត់ដំបងថ្មី ដែលរដ្ឋបាលខេត្តបាត់ដំបង គ្រោងនឹងធ្វើការសាងសង់នាពេលដ៏ខ្លីខាងមុខនេះ នៅតាមបណ្តោយសួនច្បារផ្លូវភ្លោះខាងកើតដើមពោធិ៍នាគបាញ់ទឹក។ ការរៀបចំបែបនេះគឺដើម្បីឱ្យប្រជាពលរដ្ឋទូទៅធ្វើការដើរលេងកម្សាន្ត និងស្រូបយកខ្យល់អាកាសបរិសុទ្ធជាមួយនឹងការរៀបចំសួនច្បារថ្មី ដែលមានមុខងារច្រើននៅក្នុងសួនច្បារសម្ដេចក្រឡាហោមវិមានឯករាជ្យនោះផងដែរ ។

លោកបានបញ្ជាក់ថា រហូតមកដល់នឹងពេលនេះរដ្ឋបាលខេត្តបាត់ដំបង បានធ្វើការសិក្សា និងគិតគូរជូនអាជីវករបានរួចរាល់ហើយ ពោលគឺរដ្ឋបាលខេត្តនឹងធ្វើការសាងសង់ផ្សាររាត្រីថ្មីមួយកន្លែងទៀត ដើម្បីផ្លាស់ប្ដូរឱ្យអាជីវករលក់ដូរទាំងអស់ទៅប្រកបអាជីវកម្មនៅកន្លែងថ្មី ដោយមិនមែនទុកពួកគាត់ចោលនោះឡើយ ។

លោក សុខ លូ បានសំណូមពរដល់ប្រជាពលរដ្ឋ និងក្រុមអាជីវករមានការយោគយល់ ព្រោះថា ការអភិវឌ្ឍតែងតែមានការប៉ះពាល់ខ្លះ ដែលត្រូវទាមទារឱ្យអាជីវករ ក៏ដូចជាប្រជាពលរដ្ឋយើង មានភាពអត់ធ្មត់ និងចូលរួមជាមួយរដ្ឋបាលខេត្តបាត់ដំបង ដើម្បីឱ្យបានឆាប់រួចរាល់ ព្រោះថាការអភិវឌ្ឍទីក្រុងបាត់ដំបងនាពេលនេះ មានគោលបំណងតែមួយគត់ គឺការគិតគូរបម្រើផលប្រយោជន៍ប្រជាពលរដ្ឋ ដើម្បីលើកកម្ពស់វិស័យសេដ្ឋកិច្ចជាតិ និងការលើកកម្ពស់វិស័យទេសចរណ៍ក្នុងខេត្ត ក្នុងការទាក់ទាញកំណើនភ្ញៀវទេសចរជាតិ និងអន្តរជាតិផងដែរ ។

លោកអភិបាលខេត្តបានបន្ថែមថា តាមរយៈនៃការអភិវឌ្ឍសម្រាប់ការសាងសង់សមិទ្ធផលទាំង៣កន្លែងនេះ អាជីវករទាំងអស់ នឹងបានផលប្រយោជន៍ច្រើនបន្ទាប់ពីទទួលបានគម្រោងថ្មីនេះ នឹងធ្វើផ្សាររាត្រីឱ្យមានភាពទាក់ទាញ ហើយនៅតំបន់ផ្លូវលេខ២កន្លះនឹងរៀបចំឱ្យក្លាយជាផ្លូវ ដែលមានអ្នកទស្សនាច្រើន ព្រមទាំងមាត់ស្ទឹងទាំងអស់នឹងមានរៀបចំកែលំអដូចគ្នា៕

ដោយ: លាងហួរ

វ៉ាស៊ីនតោន: យោងតាមក្រុមហ៊ុន S&P Global និង Morgan Stanley បានឱ្យដឹងថា ប្រទេសឥណ្ឌានឹងវ៉ាដាច់ប្រទេសជប៉ុន និងអាល្លឺម៉ង់ ដើម្បីក្លាយជាប្រទេសមហាអំណាចសេដ្ឋកិច្ចធំជាងគេបំផុតទី៣ នៅលើពិភពលោក។ នេះបើយោងតាមការចេញផ្សាយដោយសារពត៌មាន CNBC កាលពីថ្ងៃទី០១ ខែធ្នូ ឆ្នាំ២០២២។

ក្រុមហ៊ុន S&P បានព្យាករណ៍បែបនេះដោយផ្អែកលើកំណើនផលិតផលក្នុងស្រុកសរុបបន្ទាប់បន្សំ (Nominal GDP) ប្រចាំឆ្នាំរបស់ប្រទេសឥណ្ឌា ដែលនឹងមានជាមធ្យម៦,៣ភាគរយ រហូតដល់ឆ្នាំ២០៣០។

ស្រដៀងគ្នានេះដែរ ក្រុមហ៊ុនសេវាកម្មហិរញ្ញវត្ថុសកល Morgan Stanley បានព្យាករណ៍ថា GDP របស់ឥណ្ឌាអាចនឹងកើនឡើងទ្វេរដង ពីកម្រិតបច្ចុប្បន្ន នៅក្នុងឆ្នាំ២០៣១ខាងមុខ។

ក្រុមអ្នកវិភាគនៅក្រុមហ៊ុន Morgan Stanley ដឹកនាំដោយលោក Ridham Desai និងលោកស្រី Girish Acchipalia បានសរសេរ នៅក្នុងរបាយការណ៍នេះថា ប្រទេសឥណ្ឌាមានលក្ខខណ្ឌជាច្រើន សម្រាប់ការរីកចំរើនផ្នែកសេដ្ឋកិច្ច ដែលជំរុញដោយការនាំចេញ ការវិនិយោគក្នុងការផលិត ការផ្លាស់ប្តូរថាមពល និងហេដ្ឋារចនាសម្ព័ន្ធឌីជីថលទំនើបរបស់ប្រទេសនេះ ហើយកត្តាជំរុញទាំងនេះនឹងធ្វើឱ្យឥណ្ឌាក្លាយជាប្រទេសមានសេដ្ឋកិច្ច និងទីផ្សារភាគហ៊ុនធំជាងគេទីបីរបស់ពិភពលោក នៅមុនចុងបញ្ចប់នៃទសវត្សរ៍នេះ។

ប្រទេសឥណ្ឌាបានប្រកាសពី កំណើនសេដ្ឋកិច្ចរបស់ខ្លួនចំនួន៦,៣ភាគរយសម្រាប់ត្រីមាសខែកក្កដាដល់ខែកញ្ញា ពោលគឺខ្ពស់ជាងការព្យាករណ៍ ក្នុងការស្ទង់មតិរបស់សារពត៌មាន Reuters។

នៅមុននេះ សេដ្ឋកិច្ចរបស់ប្រទេសឥណ្ឌាបានកើនឡើងរហូតទៅដល់១៣,៥សម្រាប់ខែមេសា ដល់ខែមិថុនា បើប្រៀបធៀបទៅនឹងឆ្នាំមុន ដោយកំណើនដ៏ខ្ពស់នេះត្រូវបានជំរុញ ដោយតម្រូវការក្នុងស្រុកដ៏រឹងមាំនៅក្នុងវិស័យសេវាកម្ម។

ការព្យាករណ៍របស់ក្រុមហ៊ុន S&P គឺពឹងផ្អែកលើការបន្តសេរីភាវូបនីយកម្មពាណិជ្ជកម្ម និងហិរញ្ញវត្ថុរបស់ប្រទេសឥណ្ឌា កំណែទម្រង់ទីផ្សារការងារ ក៏ដូចជាការវិនិយោគលើហេដ្ឋារចនាសម្ព័ន្ធ និងធនធានមនុស្សរបស់ប្រទេសនេះផងដែរ៕

   ដោយៈ វឌ្ឍនៈ

ភ្នំពេញៈ អ្នកធុរកិច្ចជប៉ុនជាអ្នកវិនិយោគដ៏ធំមួយ នៅក្នុងប្រទេសកម្ពុជា និងមានគម្រោងលេចធ្លោមួយចំនួនទទួលបានការគាំទ្រពី ប្រជាពលរដ្ឋកម្ពុជាផងដែរ ខណៈបច្ចុប្បន្ននេះមានក្រុមហ៊ុនជប៉ុនជាច្រើន កំពុងចង់មកបណ្ដាក់ទុនវិនិយោគជាច្រើនថែមទៀត។

សម្ដេចតេជោហ៊ុនសែន នាយករដ្ឋមន្ត្រីនៃកម្ពុជា បានថ្លែងនៅក្នុងពិធីគម្រប់ខួប១១ឆ្នាំនៃ ក្រុមហ៊ុនMinebeaកាលពីថ្ងៃទី១ ធ្នូ២០២២ ថា មុនជប៉ុនចូលមកវិនិយោគគេសួរតែពីរសំនួរប៉ុណ្ណោះ។

សម្ដេចតេជោបានមានប្រសាសន៍ថា បើនិយាយពីជប៉ុនមកវិនិយោគនៅក្នុងប្រទេសកម្ពុជា ចំណុចសំខាន់គឺមានតែពីរទេដែលជប៉ុនសួរមុនគេ ទី១ តើតម្លៃអគ្គិសនីយ៉ាងម៉េច ? រឿងនេះ វាទាក់ទងនឹងផលចំណេញរបស់អ្នកវិនិយោគ ដែលគេត្រូវគិតគូរឱ្យបានច្បាស់ មុននឹងចូលមកវិនិយោគ។ចំណុចទី២ ទាក់ទិននឹងពលកម្មជំនាញ ឬធនធានមនុស្ស។

សម្ដេចបន្តថា ទាក់ទងនឹងចំណុចទាំងនេះ ទើបកម្ពុជាបានខិតខំបណ្ដុះបណ្ដាលធនធានមនុស្ស ឱ្យកាន់តែច្រើនបន្ថែមទៀត ដើម្បីបំពេញតម្រូវការជាក់ស្ដែង ក្រុមហ៊ុនជប៉ុនមួយMinebea មានបុគ្គលិករហូតដល់ជាង៦០០០នាក់ទៅហើយ ហើយក្រុមហ៊ុននេះលឺថា គ្រោងនឹងពង្រីកបន្ថែមទៀតនៅថ្ងៃខាងមុខ ។ ក្រៅពីក្រុមហ៊ុនជប៉ុនមួយនេះ ក៏មានក្រុមហ៊ុនជប៉ុនផ្សេងទៀត ក៏ដូចជា ក្រុមហ៊ុនបរទេសនិងក្នុងស្រុកជាច្រើនទៀត ។

នៅក្នុងពិធីគម្រប់ខួប Minebea នេះដែរសម្ដេចមានប្រសាសន៍ថា ក្រុមហ៊ុននេះ មិនមែននៅជាមួយយើងត្រឹម១០ ឬ២០ឆ្នាំ ឬក៏៣០ឆ្នាំនោះទេ តែក្រុមហ៊ុននេះនឹងនៅរហូត តកូនតចៅ ដូច្នេះយើងមានក្រុមហ៊ុនជប៉ុនធំមួយដែលនៅជាមួយយើង និងអាចពង្រីកអាជីវកម្មបន្តបន្ទាប់ទៀត។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានលើកឡើងថាជប៉ុនជាវិនិយោគិនមួយ ដែលមានភាពស្មោះត្រង់ និងជាវិនិយោគិន ដែលមានគោលដៅច្បាស់លាស់ ហើយប្រទេសណាក៏ចង់បានជប៉ុនទៅ បណ្ដាក់ទុនវិនិយោគប្រទេសរបស់ពួកគេដែរ៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានមានប្រសាសន៍ថា ស្ថិតក្នុងបរិការណ៍ដែលអាស៊ាន និងសកលលោកបាននិងកំពុងជួបប្រទះនឹងបញ្ហាប្រឈមជាបន្តបន្ទាប់ ការកសាងទីក្រុងឆ្លាត ដែលមានការប្រើប្រាស់បច្ចេកវិទ្យាឌីជីថល និងភាពបៃតង គឺជាទិសដៅដ៏ត្រឹមត្រូវបំផុត សម្រាប់ពេលបច្ចុប្បន្ន និងទៅថ្ងៃអនាគត។

សម្ដេចតេជោ ហ៊ុន សែន បានលើកឡើងនៅព្រឹកថ្ងៃទី០២ ខែធ្នូ ឆ្នាំ២០២២នេះ បានអញ្ជើញជាអធិបតីភាពបើកកិច្ចប្រជុំអភិបាលរាជធានី និងរដ្ឋធានីអាស៊ាន (MGMAC 2022) និងវេទិកាអភិបាលក្រុងអាស៊ាន ឆ្នាំ២០២២។

សម្តេចតេជោ ហ៊ុន សែន ទីក្រុងឆ្លាតមានសក្តានុពលខ្ពស់ ក្នុងការដោះស្រាយបញ្ហាទូទៅនៃការរៀបចំនគរូបនីយកម្ម ប្រកបដោយនវានុវត្តន៍ ពង្រឹងភាពធន់តទល់នឹងហានិភ័យផ្សេងៗ និងជាពិសេសលើកកម្ពស់ សុខុមាលភាព និងវិបុលភាពនៃជីវភាពរស់នៅរបស់ប្រជាជនក្នុងមូលដ្ឋានតាមគន្លងប្រក្រតីភាពថ្មី។

សម្តេចបានបន្ថែមថា ទីក្រុងឆ្លាតនឹងក្លាយជាប៉ូលយ៉ាងសំខាន់ ក្នុងការជំរុញសកម្មភាពសង្គមសេដ្ឋកិច្ច ធុរកិច្ច ពាណិជ្ជកម្ម និងការវិនិយោគ ឱ្យកាន់តែខ្លាំងឡើងថែមទៀត ព្រមទាំងផ្ដល់ឱកាសការងារមុខរបរ និងអាជីវកម្មដល់ប្រជាជនទូទៅក្នុងប្រទេស និងតំបន់អាស៊ានទាំងមូល។

សម្តេចបានបន្តថា ការកសាងទីក្រុងឆ្លាតមានភាពធន់ និងមានចីរភាព ត្រូវមានការចូលរួមពីគ្រប់ភាគីពាក់ព័ន្ធ ទាំងរដ្ឋបាលមូលដ្ឋាន វិស័យឯកជន ដៃគូអភិវឌ្ឍន៍ ស្ថាប័នជាតិ និងអន្តរជាតិ និងជាពិសេសពីប្រជាជនដែលរស់នៅក្នុងមូលដ្ឋានផ្ទាល់តែម្ដង។

ក្នុងន័យនេះ រដ្ឋបាលក្រុង រាជធានី និងរដ្ឋធានីអាស៊ាន ដែលស្ថិតនៅជាប់ផ្ទាល់ជាមួយប្រជាជន ត្រូវលើកកម្ពស់ការយល់ដឹង និងសមត្ថភាពក្នុងមូលដ្ឋានរបស់ខ្លួន ក្នុងការចាប់យកបច្ចេកវិទ្យាឌីជីថល ព្រមទាំងការចាប់ផ្តើមយកចិត្តទុកដាក់លើសេដ្ឋកិច្ចវិលជុំ និងសេដ្ឋកិច្ចបៃតង។ ជាមួយគ្នានេះ រដ្ឋបាលក្រុង រាជធានី និងរដ្ឋធានីអាស៊ាន ក៏ត្រូវបង្កបរិយាកាសងាយស្រួលដល់ការធ្វើការអាជីវកម្ម ធុរកិច្ច ពាណិជ្ជកម្ម និងការវិនិយោគ និងដោះស្រាយបញ្ហាចំពោះមុខផ្សេង ដែលប៉ះពាល់ដល់ជីវភាពរស់នៅប្រចាំថ្ងៃរបស់ប្រជាជន៕