ដោយៈ វឌ្ឈនៈ

ភ្នំពេញៈ ក្នុងឆ្នាំ២០២២នេះ គម្រោងលំនៅឋាន ត្រូវបានក្រសួងចេញអាជ្ញាបណ្ណអនុញ្ញាតឱ្យសាងសង់ច្រើនជាងគេ ក្នុងចំណោមគម្រោងសាងសង់ទាំងអស់ ដែលមានជាង៣ពាន់៤០០គម្រោង ជាពិសេសក្នុងរយៈពេល១០ខែដំបូងនៃឆ្នាំនេះ។

តាមរយៈការសាងសង់នៃលំនៅឋាន ក្នុងឆ្នាំ២០២២នេះបានបង្ហាញពីតម្រូវការនៃលំនៅឋាននៅតែបន្តមានខ្ពស់ ។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីពេលថ្មីៗនេះឱ្យដឹងថា ក្នុងរយៈពេល១០ខែនៃឆ្នាំ២០២២នេះ ក្រសួងបានចេញលិខិតអនុញ្ញាតសាងសង់ សំណង់សរុបចំនួន៣.៤០៧គម្រោង ធៀបនឹងរយៈពេលដូចគ្នាធ្លាក់ចុះ១៩១គម្រោង ក្នុងនោះសំណង់លំនៅឋានត្រូវបានលិខិតអនុញ្ញាត ឱ្យសាងសង់ចំនួន៣.០១៨គម្រោង ស្មើនឹងប្រមាណ៨៨,៥៨ភាគរយនៃសំណើរសុំសាងសង់សរុប។ គម្រោងសាងសង់នេះ បើធៀបនឹងឆ្នាំមុន ក៏មានការធ្លាក់ចុះប្រមាណ៩១ភាគរយ ។

របាយការណ៍របស់ធនាគារជាតិនៃកម្ពុជា ក៏បានបង្ហាញផងដែរថា ក្នុងឆ្នាំ២០២២នេះឥណទាន ដែលផ្ដល់ទៅអតិថិជនសម្រាប់ទិញផ្ទះ ក៏មានទំហំទឹកប្រាក់ច្រើនជាងគេដែរ ក្នុងចំណោមឥណទានតាមវិស័យផ្សេងៗ

តាមរយៈតួលេខនេះ បានបង្ហាញពីតម្រូវការនិងការទិញ លក់លំនៅឋានក្នុងប្រទេសកម្ពុជានៅតែមានភាពប្រសើរ ។

លោកឧកញ៉ានួន រឹទ្ធី អគ្គនាយកក្រុមហ៊ុនអចលនទ្រព្យ KFA បានលើកឡើងផងដែរថា តម្រូវការលំនៅឋាននៅក្នុងប្រទេសកម្ពុជា នៅតែមានពីព្រោះបើធ្វើការប្រៀបធៀបជាមួយ នឹងកំណើនប្រជាពលរដ្ឋ និងលំនៅឋានមិនទាន់មានភាពស៊ីមេទ្រីគ្នានៅឡើយ។ ជាក់ស្ដែងនៅរាជធានីភ្នំពេញ កំណើនប្រជាពលរដ្ឋ បានកើនឡើងរៀងរាល់ឆ្នាំ ហើយកំណើននៃប្រជាពលរដ្ឋក្នុងរាជធានីភ្នំពេញនេះដែរ នឹងជំរុញឱ្យតម្រូវការនៃលំនៅឋានមានកំណើនផងដែរ។

របាយការណ៍របស់CBRE Cambodia បានបង្ហាញផងដែរថា ក្នុងចំណោមបណ្ដាខណ្ឌ នៅជាយរាជធានីភ្នំពេញឃើញថា មានខណ្ឌពោធិ៍សែនជ័យ ខណ្ឌកំបូល និងខណ្ឌដង្កោ មានការអភិវឌ្ឍលំនៅឋានច្រើន ក្នុងនោះដែរតំបន់ប៉ែកខាងត្បូងភ្នំពេញ មានទាំងការអភិវឌ្ឍលំនៅឋានតម្លៃសរម្យនិងលំនៅឋាន ដែលមានតម្លៃខ្ពស់រាប់សិបម៉ឺនដុល្លារផងដែរ៕

ដោយៈ សុផារី

ភ្នំពេញៈ គេហទំព័រអន្តរជាតិល្បីល្បាញមួយគឺ Invest Asian បានអះអាងថា ប្រទេសកម្ពុជាជាប្រទេស ដែលអ្នកវិនិយោគបរទេសគួរមកចាប់យកឱកាស ក្នុងការសាងផលចំណេញពីការវិនិយោគនៅក្នុងឆ្នាំ២០២៣។

យោងតាមការចុះផ្សាយរបស់គេហទំព័រនេះ នៅថ្ងៃទី១៤ ខែធ្នូ ឆ្នាំ២០២២ម្សិលមិញ បានឱ្យដឹងថា ឆ្លងកាត់បញ្ហាប្រឈម ក្នុងរយៈពេលប៉ុន្មា​នឆ្នាំចុងក្រោយនេះ ពិភពលោកកំពុងតែប្រឈមនឹងការផ្លាស់ប្តូរ។

ពិចារណាពាក់ព័ន្ធនឹងស្ថានភាពបច្ចុប្បន្ន ដែលមានឥទ្ធិពលក្នុងការសម្រេចចិត្តវិនិយោគ សារព៌តមាននេះបានសរសររថា យើងឃើញថាការកើនឡើងអត្រាការប្រាក់ គឺកើតមានស្ទើនៅទូទាំងពិភពលោក ហើយកម្ចីប្រាក់នឹងបន្តកើនឡើងយ៉ាងខ្លាំងដល់ឆ្នាំ២០២៣។

ទន្ទឹមនឹងនោះ អតិផរណានឹងដើរតួនាទីយ៉ាងសំខាន់ នៅក្នុងប្រទេស ដែលអ្នកអាចវិនិយោគប្រកបដោយប្រសិទ្ធភាពខ្ពស់ផងដែរ។

ដោយផ្អែកលើកំណើនសេដ្ឋកិច្ច និងស្ថិរភាព គេហទំព័រខាងលើបានណែនាំប្រទេសកម្ពុជា “ជាប្រទេសទី១” សម្រាប់អ្នកវិនិយោគិនទាំងឡាយណា ដែលមានបំណងចង់មកវិនិយោគ នៅក្នុងតំបន់អាស៊ីអាគ្នេយ៍។

ដោយជាប់ចំណាត់ថ្នាក់ជាប្រទេស ដែលមានការរីកចម្រើនលឿនបំផុតរបស់ពិភពលោក ក្នុងរយៈពេលពីរទសវត្សរ៍មកនេះ ប្រទេសកម្ពុជាមានការរីកចម្រើនយ៉ាងខ្លាំង ឆ្ពោះទៅរកការអភិវឌ្ឍសេដ្ឋកិច្ច និងសង្គមរបស់ខ្លួន ចាប់តាំងពីទសវត្សរ៍ឆ្នាំ១៩៩០។ បច្ចុប្បន្ននេះ ប្រទេសកម្ពុជា គឺជាប្រទេសមួយក្នុងចំណោមប្រទេស ដែលទទួលបានការវិនិយោគពីបរទេ​សច្រើន ក្នុងតំបន់អាស៊ីអាគ្នេយ៍ផងដែរ។

យ៉ាងណាក្តី ខណៈដែលប្រទេសកម្ពុជា ស្ថិតនៅក្នុងប្រទេសកំពុងអភិវឌ្ឍ បើធៀបនឹងអាស៊ីអាគ្នេយ៍ទាំងមូល ទីផ្សារកម្ពុជាជាទីផ្សារកំពុងស្ទុះងើបខ្លាំង (frontier market) ដ៏ល្អបំផុតមួយក្នុងការវិនិយោគ ដោយកម្ពុជាកំពុងធ្វើការផ្លាស់ប្តូរយ៉ាងរហ័ស ទៅកាន់សេដ្ឋកិច្ចឧស្សាហូបនីយកម្ម។

ជាក់ស្តែង នៅពេលដែលប្រទេសមួយផ្លាស់ប្តូរ ពីពីទីផ្សារកំពុងស្ទុះងើបខ្លាំង (frontier market) ទៅជាទីផ្សារកំពុងអភិវឌ្ឍន៍ខ្លាំង (emerging market) ហើយដោយក្តីសង្ឃឹមក៏មុតមាំថា កម្ពុជានឹងក្លាយទៅជាប្រទេស ដែលមានការអភិវឌ្ឍពេញលេញ ទាមទារឱ្យមានកាតាលីករ ដើម្បីចាប់ផ្តើមជំរុញដំណើរការ នៃកំណើនសេដ្ឋកិច្ចជាមុនសិន៕

  ដោយៈ គង់ សូរិយា

       ភ្នំពេញៈ ក្នុងភាពជាអ្នកដឹកនាំផ្នែកកាទូត និងជាតារាជើងចាស់ម្នាក់ក្នុងឆាកនយោបាយ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបាននិងកំពុងលេចធ្លោនៅអឺរ៉ុប ក្នុងនាមជាប្រធានអាស៊ាន និងជានាយករដ្ឋមន្រ្តីនៃកម្ពុជា។

ក្លាយជារដ្ឋមន្រ្តីកាបរទេសវ័យក្មេងជាងគេនៅកម្ពុជា និងពិភពលោក​ក្នុងវ័យ២៧ឆ្នាំាំ សម្តេចតេជោបានដឹកនាំប្រទេសកម្ពុជា ឆ្លងកាត់សម័យកាលជាច្រើន ហើយបាននាំនាវាកម្ពុជាទៅកាន់ពិភពលោក តាមរយៈការស​មាហរណកម្មខ្លួនឯងក្នុងកម្រិតតំបន់ អន្តរជាតិ និងពិភពលោក។

ក្នុងដំណើរទស្សនកិច្ចទៅកាន់សហគមន៍អឺរ៉ុប ក្នុងសប្តាហ៍នេះសម្តេចតេជោហ៊ុន សែននាយករដ្ឋមន្រ្តីនៃកម្ពុជា បានជួបជាមួយបងប្អូនប្រជាពលរដ្ឋខ្មែរ ជួបជាមួយប្រធានាធិបតីបារាំង ជួបពិភាក្សាការងារជាមួយនាយករដ្ឋមន្រ្តីវៀតណាម ឡាវ ប្រធានាធិបតីហូឡង់ និងមេដឹកនាំអឺរ៉ុបដ៏មានសក្តានុពលផ្សេងៗទៀត ពិសេសបានចូលរួមចេញសេចក្តី ថ្លែងការណ៍ជាមួយមេដឹកនាំបារាំង លោកអេម៉ានូអែល ម៉ាក្រុង ដើម្បីអំពាវនាវឲ្យរុស្ស៊ីបញ្ឈប់ការបាញ់ម៉ីស៊ីល នៅក្នុងប្រទេសអ៊ុយ ក្រែន ដែលបានបង្កទុក្ខវេទនាដល់ប្រជាជនស៊ីវិលអ៊ុយ ក្រែនយ៉ាងរន្ឋត់។

ធ្លាប់ជាមេដឹកនាំដែលឆ្លងកាត់ភ្នក់ភ្លើងសង្រ្គាម ចូលរួមប្រយុទ្ឋក្នុងសង្រ្គាម និងបានដាក់ចេញគោលនយោបាយឈ្នះ ឈ្នះ ដើម្បីបញ្ចប់សង្រ្គា​មស៊ីវិលដ៏រ៉ាំរ៉ៃ នៅកម្ពុជានៅឆ្នាំ១៩៩៨ សម្តេចបានក្លាយជាមេដឹកនាំលេចធ្លោ លើឆាកអន្តរជាតិ និងបានក្លាយជាតួអង្គនៃមេដឹកនាំខ្លាំងមួយរូបនៅលើពិភពលោក ដែលបានកាន់អំណាចយូរ ក្នុងចំណោមមេដឹកនាំកាន់អំណាចជាងគេនៅលើពិភពលោក៕

ដោយ៖ វឌ្ឍនៈ

ភ្នំពេញ ៖ ធៀបនឹងឆ្នាំ២០២១កន្លងទៅ ស្ថានភាពវិនិយោគនៅក្នុងប្រទេសកម្ពុជារយៈពេលជិត១ឆ្នាំ២០២២មកនេះ បានបង្ហាញពីកំណើនខ្ពស់ និងមានភាពល្អប្រសើរ។ យោងតាមរបាយការណ៍ស្ថិតិពីក្រសួងសេដ្ឋកិច្ច និងហិរញ្ញវត្ថុ បានបង្ហាញថា ការវិនិយោគមានកំណើនរហូតដល់ជាង១៣០ភាគរយធៀបនឹងឆ្នាំ២០២១កន្លងទៅ។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ក្នុងរយៈពេលជិត១ឆ្នាំនៃឆ្នាំ២០២២នេះ គម្រោងវិនិយោគឯកជនក្រៅតំបន់សេដ្ឋកិច្ចពិសេស មានចំនួន១១៦គម្រោង មានការកើនឡើង២៤គម្រោង ដែលមានទំហំទឹកប្រាក់ជិត៣ពាន់លានដុល្លារអាមេរិក។

ក្នុងរយៈពេល១០ខែ នៃឆ្នាំ២០២២នេះ គម្រោងដែលទទួលបានការអនុញ្ញាតសាងសង់សរុបមានចំនួន៣.៤០៧គម្រោង ធៀបនឹងឆ្នាំ២០២១ គឺមានការថមថយប្រមាណ១៩០គម្រោង និងមានតម្លៃវិនិយោគប្រមាណ២.១៩០លានដុល្លារអាមេរិក ធ្លាក់ចុះជាងពាក់កណ្ដាល។ ក្នុងនោះ ប្រភេទសំណង់លំនៅឋានមានចំនួនជាង៣ពាន់គម្រោង ស្មើនឹងប្រមាណជាង៨៨,៥៨ភាគរយ នៃសំណើរសុំសាងសង់សរុប  ធៀបនឹងឆ្នាំមុនថមយប្រមាណ៩០គម្រោង។

អ្នកជំនាញអចលនទ្រព្យកម្ពុជាបានមើលឃើញថា ការវិនិយោគនៅក្នុងឆ្នាំ២០២២នេះ ភាគច្រើនបានមកពីការវិនិយោគរបស់វិនិយោគិនក្នុងស្រុក ខណៈការវិនិយោគពីបរទេសនៅមិនទាន់មានភាពល្អប្រសើរឡើងនៅឡើយទេ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា បានថ្លែងនាពេលថ្មីៗនេះថា ក្នុងអំឡុងពេល ដែលវិនិយោគិនបរទេសមិនមានទាន់ការបណ្ដាក់ទុនវិនិយោគនៅកម្ពុជា ក៏មានវិនិយោគិនក្នុងស្រុកបានបណ្ដាក់ច្រើនទៅវិញ ហើយការវិនិយោគរបស់វិនិយោគិនក្នុងស្រុកនេះដែរ ក៏បានធ្វើឱ្យសកម្មភាពវិនិយោគនៅតែបន្តដំណើរការ។

លោកបន្តថា ស្ថានភាពវិនិយោគអចលនទ្រព្យ នៅក្នុងប្រទេសកម្ពុជា នឹងមានភាពល្អ ដូចនឹងឆ្នាំ២០១៩ ឬមុនពេលកូវីដ១៩ លុះត្រាតែមានការវិនិយោគពីក្រៅប្រទេសច្រើន ពីព្រោះវិស័យនេះនៅពឹងលើការវិនិយោគពីបរទេស ទោះបីជាមានការវិនិយោគពីក្នុងស្រុកច្រើនក៏ដោយ៕

 ដោយៈ គង់ សូរិយា

       ភ្នំពេញៈ គោលនយោបាយសំខាន់ៗនៃប្រព័ន្ធភស្ដុភារកម្មកម្ពុជា ត្រូវបានលើកយកមកពិភាក្សាក្នុងកិច្ចប្រជុំពិនិត្យលើកទី២ របស់គណៈកម្មការរួមសម្របសម្រួល គម្រោងរបស់អន្តរក្រសួង លើដំណើរការនៃការអនុវត្តគម្រោងធ្វើឱ្យប្រសើរឡើង ប្រព័ន្ធភស្ដុភារកម្មប្រទេសកម្ពុជាជំហានទី២។

កិច្ចប្រជុំនេះត្រូវបានដឹកនាំលោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានគណៈកម្មការគ្រប់គ្រងគម្រោងធ្វើឱ្យប្រសើរឡើង ប្រព័ន្ធភស្ដុភារកម្មនៃប្រទេសកម្ពុជា ជំហានទី២ (PMU) និងលោកស្រី MIYAHARA Ai តំណាងជាន់ខ្ពស់នៃទីភ្នាក់ងារសហប្រតិបត្តិការអន្តរជាតិជប៉ុន (JICA)ប្រចាំកម្ពុជា បានអញ្ជើញជាសហប្រធានដឹកនាំកិច្ចប្រជុំពិនិត្យលើកទី២ របស់គណៈកម្មការរួមសម្របសម្រួលគម្រោងរបស់អន្តរក្រសួង ដើម្បីពិនិត្យ និងពិភាក្សាលើដំណើរការនៃការអនុវត្ត គម្រោងធ្វើឱ្យប្រសើរឡើងនូវប្រព័ន្ធភស្ដុភារកម្ម នៃប្រទេសកម្ពុជា ជំហានទី២ (PMU) ។

អង្គប្រជុំបានផ្តោតការពិភាក្សា លើរបាយការណ៍លទ្ធផលការងារ បញ្ហាប្រឈម និងដំណោះស្រាយចំពោះគម្រោង និងការវិវឌ្ឍថ្មីៗទាក់ទងនឹងច្រកទ្វារព្រំដែនអន្តរជាតិរវាងកម្ពុជា-ថៃ និងវៀតណាម ព្រមទាំងបង្ហាញពីវឌ្ឍនភាព ក្នុងការរៀបចំបង្កើតឡើងគោលនយោបាយ ផែនការសកម្មភា​ពនានា ដែលក្រុមការងារកំពុងរៀបចំរួមមាន ទី១ គោលនយោបាយភស្ដុភារកម្មបៃតង (Green Logistics Policy) ទី២ គោលនយោបាយរក្សាទំនិញត្រជាក់ (Cold Chain Policy) និងទី៣ គោលនយោបាយទំនើបកម្មរថយន្ដដឹកទំនិញ (Truck Modernization Policy) គោលការណ៍ណែនាំរៀបចំមជ្ឈមណ្ឌលភស្តុភារកម្ម ក៏ដូចជា ការធ្វើបទបង្ហាញអំពីការត្រួតពិនិត្យ និងវាយតម្លៃគម្រោងផែនការមេ ប្រព័ន្ធភស្តុភារកម្មកម្ពុជា ការបង្កើតឡើង ប្រព័ន្ធទិន្នន័យប្រព័ន្ធទំនាក់ទំនង និងការសិក្សាទីផ្សារភស្តុភារកម្ម និងបទបង្ហាញអំពីវឌ្ឍនភាពនៃការរៀបចំ សាងសង់ហេដ្ឋារចនាសម្ព័ន្ធចាំបាច់មួយចំនួនសម្រាប់សម្រួល និងធ្វើឱ្យប្រសើរឡើងចរាចរណ៍ ឆ្លងកាត់នៅច្រកទ្វារព្រំដែនបាវិត និងប៉ោយប៉ែត និងការជួយសម្របសម្រួលការងារបើកប្រតិបត្តិការដឹកជញ្ជូន ឆ្លងកាត់ព្រំដែនជាបណ្តោះអាសន្ន ច្រកទ្វារស្ទឹងបត់-បានណងអៀន (កម្ពុជា-ថៃ)។

អង្គប្រជុំក៏បានស្តាប់បទបង្ហាញ និងជជែកពិភាក្សាគ្នាផងដែរលើការសិក្សា និងអនុសាសន័របស់ទីភ្នាក់ងារ JICA ទៅលើគំហើញកត្តាមួយចំនួនដែលកើតឡើង និងសំណើស្វែងរកដំណោះស្រាយ ការកកស្ទះនៅច្រកទ្វារព្រំដែនបាវិត រវាងកម្ពុជា-វៀតណាម។

ថ្លែងក្នុងឱកាសនោះ លោកជំទាវរដ្ឋលេខាធិការប្រធានអង្គប្រជុំ បានថ្លែងអំណរគុណយ៉ាងជ្រាលជ្រៅ ដល់ក្រុមជំនាញការជប៉ុន ក្រុមការងាររបស់ក្រសួងសាធារណការ និងដឹកជញ្ជូន និងក្រុមការងារនៃគណៈកម្មការគ្រប់គ្រងគម្រោងធ្វើឱ្យប្រសើរឡើង ប្រព័ន្ធភស្ដុភារកម្មជំហានទី២ និងសមា​ជិកគណៈកម្មការរួមសម្របសម្រួលគម្រោង ដែលបានខិតខំប្រឹងប្រែងបំពេ​ញការងារយ៉ាងសកម្ម និងការចូលរួមពីគ្រប់ស្ថាប័ន និងភាគីពាក់ព័ន្ធទទួលលទ្ធផលបានល្អប្រសើរ។

លោកជំទាវរដ្ឋលេខាធិការ ក៏បានសំណូមពរផងដែរ ឱ្យក្រុមការងារទាំងអស់បន្តសហការបន្ថែមទៀត ដើម្បីលើកកម្ពស់វិស័យដឹកជញ្ជូន និងភស្ដុភារកម្មនៅកម្ពុជា ឱ្យកាន់តែមានការរីកចម្រើនថែមទៀត និងអាចបញ្ចប់គម្រោងដោយជោគជ័យ ក្នុងអំឡុងខែមិថុនា ឆ្នាំ២០២៣ខាងមុខ៕

ដោយៈ សុខុម

ហុងកុង: កូវីដ-១៩មិនត្រឹមតែកែប្រែទម្លាប់យើងធ្វើការ និងទិញអីវ៉ាន់ប៉ុណ្ណោះទេ ប៉ុន្តែវាក៏ជំរុញឱ្យមនុស្សកាន់តែច្រើន គិតចង់រើផ្ទះផងដែរ តាមរយ:ការទិញផ្ទះថ្មី នៅទីតាំងកណ្តាលក្រុង ដែលពួកគេអាចទទួលបានស្តង់ដាររស់នៅកាន់តែប្រសើរ និងចំណាយពេលតិចក្នុងការធ្វើដំណើរ។

យោងតាមសារព័ត៌មាន South China Morning Post ចុះផ្សាយកាលពីថ្ងៃពុធ ទី១៤ ខែធ្នូ ឱ្យដឹងថា ការសង្កេតនេះ គឺធ្វើឡើងដោយផ្អែកលើការស្ទង់មតិថ្មី ដោយក្រុមហ៊ុនអចលនទ្រព្យអាមេរិកCBRE ទៅលើមនុស្សជាង២០.០០០នាក់ នៅទូទាំងពិភពលោក ដើម្បីស្វែងយល់ពីរបៀបដែលពួកគេរស់នៅ រៀបធ្វើការ និងទិញទំនិញនាពេលអនាគត។

ទន្ទឹមនេះ អ្នកឆ្លើយសំណួរចំនួន៩.០០០នាក់ ដែលមកពីទូទាំងអាស៊ី-ប៉ាស៊ីហ្វិក ក៏ត្រូវបានរាប់បញ្ចូលនៅក្នុងការស្ទង់មតិនេះផងដែរ។

គ្រួសារពលរដ្ឋអាស៊ី ជាទូទៅជំពាក់បំណុលតិចជាង និងមានជំហរហិរញ្ញវត្ថុរឹងមាំជាងគ្រួសារពលរដ្ឋលោកខាងលិច។

លោក Henry Chin នាយកផ្នែកស្រាវជ្រាវទីផ្សារអាស៊ី-ប៉ាស៊ីហ្វិក នៅក្រុមហ៊ុន CBRE លើកឡើងថា ជាទូទៅពលរដ្ឋអាស៊ី យល់ឃើញថា អចលនទ្រព្យជាការវិនិយោគរយៈពេលវែង។

អ្នកជំនាញរូបនេះបានគូសបញ្ជាក់ថា “ខណៈទីផ្សារអចលនទ្រព្យក្នុងទីផ្សារមួយចំនួននៅអាស៊ី ពេលនេះកំពុងធ្វើការកែតម្រូវ ដើម្បីឆ្លើយតបទៅនឹងការដំឡើង អត្រាការប្រាក់កាលពីពេលថ្មីៗនេះ អ្នកទិញកំពុងសញ្ជឹងរង់ចាំមើលស្ថានភាពទីផ្សារ ដើម្បីក្ដាប់ឱកាសទិញ នៅពេលឱកាសល្អហុចឱ្យ”។

ការសិក្សាបានរកឃើញថា មនុស្ស៦៦%នៅពេលនេះ ចាត់ទុកសុខភាព និងសុវត្ថិភាពសំខាន់ជាងតម្លៃ នៅពេលជ្រើសរើសទិញផ្ទះថ្មី។ នេះមានន័យថា ពួកគេមិនសូវសូញសាញ រឿងតម្លៃប៉ុន្មានឡើយ ឱ្យតែផ្ទះថ្មីដែលពួកគេទិញផ្ដល់ផាសុកភាព និងសុវត្ថិភាពខ្ពស់។

លោកស្រី Ada Choi ប្រធានផ្នែកស្រាវជ្រាវ និងគ្រប់គ្រងទិន្នន័យសម្រាប់អាស៊ី-ប៉ាស៊ីហ្វិក នៅក្រុមហ៊ុនCBRE លើកឡើងថា “ចំនួនអ្នកទិញផ្ទះដែលចង់បានលក្ខខណ្ឌបែបនេះ កើនឡើងកាន់តែច្រើន ជាពិសេសក្នុងចំណោមជនជាតិចិនដីគោក”៕ South China Morning Post៕