ដោយៈ វឌ្ឍនៈ

ភ្នំពេញៈ តំបន់ផ្លូវ598 ឬផ្លូវជាសុផារ៉ាជាតំបន់ ដែលមើលឃើញថាមានការអភិវឌ្ឍខ្លាំងគួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះដោយវត្តមានផ្សារទំនើប ហាងល្បីៗ និងលំនៅដ្ឋានបែបអភិជនកំពុងបង្ហាញខ្លួននៅតំបន់នេះ។

អ្នកអភិវឌ្ឍន៍លំនៅឋានមួយចំនួនមើលឃើញថា តំបន់នេះនឹងមានសន្ទុះកាន់តែខ្លាំង និងមានការទាក់ទាញបន្ថែមទៀត នៅរយៈពេល៣ទៅ៥ឆ្នាំខាងមុខនេះ ។

លោកសែម ផេ នាយកផ្នែកប្រតិបត្តិការនៃបុរី Dragon Land 598 បានមានប្រសាសន៍ឲ្យដឹងនាព្រឹកថ្ងៃទី១៤ ធ្នូនេះថា លោកមើលឃើញថាតំបន់នៅតាមបណ្ដោយផ្លូវ៥៩៨ ឬផ្លូវជាសុផារ៉ា ជាតំបន់អភិវឌ្ឍន៍ដែលមានសក្ដានុពលមួយ នៅពេលបច្ចុប្បន្ន និងពេលអនាគត ជាពិសេសនៅ    រយៈពេល៣ទៅ៥ឆ្នាំខាងមុខនេះ តំបន់តាមបណ្ដោយផ្លូវនេះនឹងកាន់តែមានសក្ដានុពលនិងមានការវិនិយោគកាន់តែច្រើន។

លោកបន្តថា ជាការកត់សម្គាល់នៅពេលនេះ មានគម្រោងរដ្ឋធំៗមួយចំនួន ដូចជា អគ្គស្នងការនគរបាលជាតិ ទីស្តីការក្រសួងសាធារណការនិងដឹកជញ្ជូន និងស្ថាប័នរដ្ឋមួយចំនួនទៀត ។ ក្រៅពីនេះក៏មានគម្រោងអភិវឌ្ឍន៍ដោយឯកជនជាច្រើន បានអភិវឌ្ឍន៍នៅតំបន់ផ្លូវ598 នៅតាមបណ្ដោយផ្លូវជាសុផារ៉ា និងមានគម្រោងមួយចំនួន កំពុងសម្លឹងរកការវិនិយោគជាបន្តបន្ទាប់នៅពេលអនាគតខាងមុខនេះ ។

លោករំពឹងថា “នៅឆ្នាំក្រោយនេះ ស្ថានភាពអចលនទ្រព្យនៅក្នុងប្រទេសកម្ពុជា នឹងមានកំណើនល្អប្រសើរឡើងវិញ ហើយក៏ជាពេលវេលាដែលអ្នកអភិវឌ្ឍន៍លំនៅឋាន ត្រូវចាប់ផ្ដើមអភិវឌ្ឍន៍ ដើម្បីផ្គត់ផ្គង់នៅលើទីផ្សារផងដែរ”។

ជាមួយគ្នានេះ លោកឧកញ៉ាខេង អគ្គនាយកនាយកក្រុមហ៊ុនCPL បានមានប្រសាន៍ផងដែរថា តំបន់ប៉ែកខាងជើងរាជធានីភ្នំពេញ ឃើញថាមានសក្ដានុពលគួរឱ្យកត់សម្គាល់ ក្នុងនោះយើងបានឃើញមានការអភិវឌ្ឍហេដ្ឋារចនាសម្ព័ន្ធកាន់តែច្រើន ត្រូវបានអភិវឌ្ឍន៍ឡើង និងជាសក្ដានុពលបន្ថែមទៀត សម្រាប់ទាក់ទាញឱ្យមានការវិនិយោគនៅតំបន់នោះ។

លោកឧកញ៉ាបន្តថា “តំបន់ណាដែលមានការអភិវឌ្ឍ ហេដ្ឋារចនាសម្ព័ន្ធ នឹងធ្វើឲ្យតំបន់នោះនឹងមានការទាក់ទាញការវិនិយោគបន្ថែម ហើយក៏កាន់តែធ្វើឱ្យតំបន់នោះ មានភាពអ៊ូអរជាងបច្ចុប្បន្នផងដែរ”៕

ដោយ: គង់ លាងហួរ

អន្តរជាតិៈ ធនាគារអភិវឌ្ឍន៍អាស៊ី(ADB)បានឱ្យដឹងថា សេដ្ឋកិច្ចរបស់ប្រទេសអាស៊ីកំពុងអភិវឌ្ឍន៍  អាចនឹងងើបឡើងក្នុងកម្រិតខ្សោយជាងការរំពឹងទុកពីមុន ដែលបានបង្ហាញនៅឆ្នាំ២០២២នេះ  និងនៅឆ្នាំ២០២៣ខាងមុខ។

យោងតាមរបាយការណ៍ របស់ធនាគារដែលមានមូលដ្ឋាន នៅទីក្រុងម៉ានីលប្រទេសហ្វីលីពីន បានឱ្យដឹងក្នុងរបាយការណ៍ចេញផ្សាយ នៅថ្ងៃទី១៤ ធ្នូនេះថា សេដ្ឋកិច្ចរបស់តំបន់អាស៊ី ត្រូវបានគេមើលឃើញថា នឹងកើនឡើង៤,២ភាគរយនៅឆ្នាំនេះ មុនពេលហក់ឡើងដល់៤,៦ភាគរយ ក្នុងឆ្នាំ២០២៣។

ការ​ព្យាករ​ណ៍ថ្មីរបស់ADB បានបង្ហាញពីសញ្ញានៃការធ្លាក់​ចុះ​ពី​កំណើ​ន ដែល​បាន​ព្យាករ​ណ៍ពី​មុន​ គឺ៤,៣ភាគរយ និង៤,៩ភាគរយរៀង​ៗគ្នា។

កំណើនសេដ្ឋកិច្ចរបស់ប្រទេសចិន  ដែលជាមហាអំណាចសេដ្ឋកិច្ចធំជាងគេនៅអាស៊ី  ត្រូវបានគេរំពឹងថានឹងធ្លាក់ចុះដល់៣ភាគរយ ធៀបនឹងកំណើន៣,៣ភាគរយ  ដែលត្រូវបានព្យាករណ៍កាលពីខែកញ្ញា។

ការព្យាករណ៍ដដែលបានបង្ហាញថា ផលិតផលក្នុងស្រុកសរុបរបស់តំបន់អាស៊ីអាគ្នេយ៍  នឹងកើនឡើង៥,៥ភាគរយ នៅឆ្នាំ២០២២នេះ  ធៀបនឹងការព្យាករណ៍ចំនួន៥,១ភាគរយ កាលពីលើកមុន  ដែលកំណើននេះត្រូវបានជំរុញដោយការប្រើប្រាស់ដ៏រ៉ឺងមាំ និងការងើបឡើងវិញនៃវិស័យទេស​ចរណ៍។

ចំណែកការព្យាករណ៍ពីអតិផរណានៅឆ្នាំ២០២២ សម្រាប់បណ្តាប្រទេ​សកំពុងអភិវឌ្ឍន៍នៅតំបន់អាស៊ី ត្រូវបានបន្ទាបចុះបន្តិចមកនៅត្រឹម៤,៤ភាគរយ ពី៤,៥ភាគរយ ប៉ុន្តែអតិផរណានឹងកើនឡើងដល់៤,២ភាគរយ ពី៤ភាគរយសម្រាប់ឆ្នាំ២០២៣៕

ដោយ: លាងហួរ

បាងកក: ប្រតិបត្តិករផ្លូវដែករដ្ឋថៃ (SRT) គ្រោងបោះទុនវិនិយោគប្រហែល៨,៦៦ពាន់លានដុល្លារ បន្ថែមទៀត  សម្រាប់សាងសង់ដំណាក់កាលទី២ នៃគម្រោងផ្លូវដែកល្បឿនលឿនថៃ-ចិន។

យោងតាមប្រភព SRT ដដែលបានឱ្យដឹងថា ប្លង់ផ្លូវដែកប្រវែង៣៥៦គីឡូម៉ែត្រ នៃដំណាក់កាលទី២  ដែលលាតសន្ធឹងពីខេត្ត Nakhon Ratchasima ទៅកាន់ខេត្តព្រំដែន Nong Khai ត្រូវបានបញ្ចប់រួចរាល់ហើយ។

ចំណែកការវាយតម្លៃផលប៉ះពាល់បរិស្ថាន (EIA)  នឹងត្រូវបានដាក់ជូនការិយាល័យគោលនយោបាយ និងផែនការធនធានធម្មជាតិ និងបរិស្ថាន (ONEP) ក្នុងពេលឆាប់ៗនេះ។

ប្រភពដដែលបានឱ្យដឹងថា សំណើថវិកាចំនួន៣០០ពាន់លានបាត នឹងត្រូវដាក់ជូនក្រុមប្រឹក្សាភិបាលរបស់ SRT ដើម្បីពិចារណា ក្នុងអំឡុងខែមករា ដល់ខែកុម្ភៈ ឆ្នាំ២០២៣ មុនពេលប្រគល់ទៅកាន់គណៈរដ្ឋមន្ត្រី ដើម្បីអនុម័តនៅពេលក្រោយ។

ប្រភពបានបន្ថែមថា ការដេញថ្លៃដើម្បីស្វែងរកអ្នកឈ្នះ នឹងធ្វើឡើងនៅចុងឆ្នាំក្រោយ ប្រសិនបើសំណើនេះត្រូវបានអនុម័ត ដោយគណៈរដ្ឋមន្ត្រីក្នុងខែឧសភា ឆ្នាំ២០២៣។

ការ​សាងសង់​ត្រូវ​បាន​គេ​រំពឹង​ថា​ នឹង​ចាប់​ផ្តើម​នៅ​ឆ្នាំ២០២៤ ដោយ​មាន​កិច្ច​សន្យា​សរុប​ចំនួន១៣ ដែល​កិច្ចសន្យាចំនួន១២ ទាក់ទង​នឹង​ការ​សាងសង់ និង​មួយ​ទៀត​ទាក់ទង​នឹង​ប្រព័ន្ធ​ផ្តល់​សញ្ញា​ផ្លូវដែក ហើយគម្រោ​ងនេះអាចនឹងបញ្ចប់ក្នុងរយៈពេល៤ឆ្នាំ។

ដំណាក់​កាល​ទី​២​នៃ​គម្រោង​នេះ នឹង​ត្រូវ​សាង​សង់​នៅ​ក្នុង​ខេត្ត​ភាគ​ឦសាន​មួយ​ចំនួន​រួម​មាន ខេត្តនគររាជសីមា ខេត្តខនខេន ខេត្តអ៊ូដនថានី និង​ខេត្តណងខៃ។

ប្រតិបត្តិការផ្លូវដែករដ្ឋ (SRT) មានទំនុកចិត្តថា គម្រោងដំណាក់កាលទី២ នឹងមិនត្រូវបានពន្យារពេល ដូចដំណាក់កាលទី១ ដែលតភ្ជាប់ ពីក្រុងបាងកក ទៅដល់ ខេត្តនគររាជសីមានោះទេ ។

គម្រោងផ្លូវរថភ្លើងល្បឿនលឿននេះ ចែកចេញជា៣ដំណាក់កាល ដោយផ្នែកចុងក្រោយតភ្ជាប់ ពីទីក្រុងណងខៃទៅទីក្រុងវៀងច័ន្ទ ប្រទេសឡាវ រួចបន្តទៅទីក្រុង Kunming ក្នុងខេត្ត Yunnan ភាគខាងត្បូងប្រទេសចិន៕

ដោយៈគង់ សូរិយា

       ភ្នំពេញៈ ផលិតផលម្សៅទឹកដោះគោBalactan បាននិងកំពុងផ្តល់ជម្រើសដ៏ប្រសើ​រ សំរាប់មាតា បិតាគ្រប់រូប ដើម្បីឲ្យខួរក្បាលទារក និងកុមារមានលការលូតលាស់បានល្អ​ប្រសើរ។

លោកប៊ូ​ ខេមរិន្ទ្រ ប្រធានផ្នែកលក់ និងទីផ្សារក្រុមហ៊ុន MTSL Investment Co., Ltdបានមានប្រសាសន៍ឲ្យដឹងថា បច្ចុប្បន្នផលិតផលម្សៅទឹកដោះគោ Balactan បានបន្ថែមសារធាតុDHA សម្រាប់ផលិតផលថ្មីរបស់យើង ដែលសារធាតុនេះជួយដល់ ការអភិវឌ្ឍលូតលាស់ខួរក្បាលក្មេងឲ្យចងចាំបានល្អ រៀនសូត្រចាប់បានលឿន រហ័ស និងចងចាំបានយួរ ពិសេសពួកគាត់អាចប្រើប្រាស់ខួរក្បាលបានល្អ។

លោកបន្តថា “អ្វីកាន់តែពិសេសពេលកុមារទទួលបានសារធាតុDHA បានច្រើនរហូតដល់អាយុ៦ឆ្នាំ ធ្វើឲ្យពួកគាត់រៀនសូត្របានចេះចាំលឿន ពិសេសពេលពួកគាត់មានវ័យចាស់ ក៏មិនមានភាពរង្វេងផងដែរ”។ លោកបន្តថា “នៅកម្ពុជាមានផលិតផលទឹកដោះគោ ដែលមានសារធាតុDHAផងដែរ ប៉ុន្តែគេលក់តម្លៃថ្លៃ តែសារធាតុDHAនៅមានកម្រិត បើធៀបនឹងផលិតផលរបស់យើង”។

ផលិតផលទឹកដោះគោBalactan បាននិងកំពុងចរាចរណ៍លើទីផ្សារយ៉ាងទូលំទូលាយនៅកម្ពុជា និងកំពុងទទួលបានការគាំទ្រច្រើនពីសំណាក់មាតា បិតា អាណាព្យា​បាលកុមារនៅទូទាំងប្រទេស។

អគ្គនាយិការងក្រុមហ៊ុន ​​​MTSL Investment Co., Ltd លោកជំទាវថេង  សុខលីបានមានប្រសាសន៍ថា ដោយសារមាននិស្ស័យស្រលាញ់កុមារ ទើបលោកជំទាវបានសម្រេចសំរេចជ្រើសរើសផលិតផលម្សៅទឹកដោះគោ ប្រកបដោយភាពសំរិតសំរាំង យកមកចែកចាយនៅកម្ពុជា ព្រោះចង់ឃើញទារក និងកុមារនៅកម្ពុជាមានសុខភាពល្អ និងបញ្ញាឆ្លាតវៃ ដូចកុមារនៅតាមបណ្តាប្រទេសជឿនលឿនមួយចំនួន។

លោកជំទាវបានបន្តថា “ហេតុនេះ មុនសម្រេចចិត្តជ្រើសរើសផលិត​ផលណាមួយ សំរាប់ទារក និងបុត្រធីតារបស់ សូមពិចារណាទៅលើសារធាតុផ្សំ និងជាផលិតផលលំដាប់ISO ដូចជា Balactan”។លោកជំទាវបន្តថា “ការសំរិតសំរាំងផលិតផលមានគុណភាព សុវត្ថិភាព ជាការជ្រើសរើសក្តីស្រលាញ់សំរាប់បុត្រ ធីតារបស់ខ្លួន ដែលនាងខ្ញុំផ្ទាល់ក៏បានជ្រើសរើសBalactan សំរាប់កូនរបស់ខ្ញុំផងដែរ”៕

ដោយ: លាងហួរ

ភ្នំពេញ: យោងតាមព្រឹត្តិបត្រស្ថិតិ បំណុលសាធារណៈរបស់កម្ពុជា  ដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុកាលពីថ្ងៃអង្គារ ទី១៣ ខែធ្នូ បានឱ្យដឹងថា បំណុលសាធារណៈសរុប របស់កម្ពុជាមានចំនួន៩,៤៧ពាន់លានដុល្លារអាមេរិក គិតត្រឹមខែកញ្ញា ឆ្នាំ២០២២នេះ។

ក្នុងចំណោមបំណុលសាធារណៈសរុប មាន៦៨ភាគរយ ទទួលបានពីដៃគូអភិវឌ្ឍន៍ទ្វេរភាគី (DPs) និង៣២ភាគរយទៀតពី DPs ពហុភាគី។

សមាសភាពនៃបំណុលសាធារណៈ រួមមាន រូបិយប័ណ្ណបរទេស  ដែលក្នុងនោះ៤៣ភាគរយ ជាប្រាក់ដុល្លារអាមេរិក ២០ភាគរយគឺជាSDR (សិទ្ធិដកប្រាក់ពិសេស)  ១២ភាគរយគឺជាCNY (ប្រាក់យ័នចិន) ១០ភាគរយគឺជា JPY (ប្រាក់យ៉េនជប៉ុន រីឯ៦ភាគរយគឺជាប្រាក់អឺរ៉ូ ហើយចំនួនដែលនៅសល់ គឺជារូបិយប័ណ្ណក្នុងស្រុក  និងរូបិយប័ណ្ណផ្សេងទៀត។

នៅក្នុងអំឡុងខែមករា ដល់ខែកញ្ញាឆ្នាំ២០២២នេះ រដ្ឋាភិបាលកម្ពុជាបានចុះហត្ថលេខា លើប្រាក់កម្ចីសម្បទានថ្មីជាមួយ DPs ក្នុងទំហំទឹកប្រាក់សរុបចំនួន១,២១ពាន់លានដុល្លារអាមេរិក ។

គោលបំណងនៃប្រាក់កម្ចី  ដែលបានចុះហត្ថលេខាថ្មីទាំងនេះ គឺដើម្បីផ្តល់ហិរញ្ញប្បទាន ដល់គម្រោងវិនិយោគសាធារណៈ នៅក្នុងវិស័យអាទិភាព  ដែលគាំទ្រ ដល់កំណើនសេដ្ឋកិច្ច ប្រកបដោយនិរន្តរភាពរយៈពេលវែង  និងបង្កើនផលិតភាពសេដ្ឋកិច្ច។

យោងតាមព្រឹត្តិបត្ររបស់ក្រសួងខាងលើនេះបានឱ្យដឹងថា នៅក្នុងរយៈពេល៩ខែដំបូងនៃឆ្នាំ២០២២នេះ  រដ្ឋាភិបាលបានបង់សេវាបំណុលដល់ DPs ចំនួន៤០៤,៥លានដុល្លារ  ដែលក្នុងនោះ៣១១,៦លានដុល្លារជា DPs ទ្វេរភាគី និង៩២,៩លានដុល្លារជា DPs ពហុភាគី។

របាយការណ៍ខាងលើបានអះអាងថា ស្ថានភាពបំណុលសាធារណៈ របស់ប្រទេសកម្ពុជា នៅតែមាននិរន្តរភាព  និងហានិភ័យទាប  នៃវិបត្តិបំណុ​ល ទោះបីជាប្រទេសនេះបានរងផលប៉ះពាល់ ដោយជំងឺរាតត្បាត និងកត្តាខាងក្រៅផ្សេងទៀតក៏ដោយ៕

 ដោយៈ គង់ ម៉ាលីនណា

       ភ្នំពេញៈ អគ្គនាយកដ្ឋានពន្ឋដាសម្រេចបាននូវចំណូលប្រសើរ ដោយ​ក្នុងរយៈពេល១១ខែឆ្នាំ២០២២ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានចំនួន៣ ២១៤.០៦ លានដុល្លារ ស្មើនឹង១១៣.៩៩% នៃផែនការច្បាប់ស្តីពី ហិរញ្ញវត្ថុប្រចាំឆ្នាំ២០២២។

ការបញ្ជាក់ពីកំណើននៃការប្រមូលចំណូលពន្ធនេះ ធ្វើឡើងក្នុងកិច្ចប្រជុំបូកសរុបលទ្ធផល ប្រមូលចំណូលពន្ធប្រចាំខែវិច្ឆិកា និងសម្រាប់រយៈពេល ១១ខែ ឆ្នាំ២០២២ ព្រមទាំង ទិសដៅសម្រាប់អនុវត្តបន្ត ដែលរៀបចំតាមប្រព័ន្ធអនឡាញ (Zoom Meeting) ក្រោមអធិបតីភាពលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ។

លោកបានលើកឡើងថា អគ្គនាយកដ្ឋានពន្ធដារ បានអនុវត្តការងារដោយស្មារីបុរេសកម្ម និងជានិច្ចជាកាលតែងតែបំផុស នូវគំនិតផ្តួចផ្តើមថ្មីៗ ដោយតែងតែ គោរពប្រតិបត្តិតាមអភិក្រមទាំង៥របស់ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ព្រមទាំងអភិក្រមការងារ៤ប្រការ របស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ១.អនុវត្តការងារប្រកបដោយវិជ្ជាជីវៈ និងគោរពក្រមសីលធម៌វិជ្ជាជីវៈ ២.អនុវត្តការងារជាក្រុម ៣.អនុវត្តការងារដោយ ប្រកាន់ខ្ជាប់ស្មារតីបុរេសកម្ម និងគោលការណ៍ប្រសិទ្ធភាពថវិកា និង៤.មិនត្រូវមើលរំលងកំហុសខ្លួនឯង។

លោកគង់ វិបុលបានលើកឡើងថា ស្ថានភាពនៃសេដ្ឋកិច្ចកម្ពុជាបាន និងកំពុងឆ្លងកាត់ដំណាក់កាលលំបាក និងរងផលប៉ះពាល់នៃវិបត្តិជំងឺកូវីដ-១៩ ដែលមិនទាន់ស្រាកស្រាន្តទាំងស្រុងនៅឡើយ ភាពតានតឹងផ្នែកភូមិសាស្ត្រនយោបាយ រវាងប្រទេសមហាអំណាច វិបត្តិថ្មីៗនៃសង្គ្រាមរវាងរុស្ស៊ី និងអ៊ុយក្រែននៅតែកំពុងបន្ត ស្ថានភាពនៃអតិផរណា ដែលនេះក៏បានប៉ះពាល់ដល់ការងារគ្រប់គ្រងប្រមូលចំណូលពន្ធផងដែរ។

អគ្គនាយកដ្ឋានពន្ធដារ ត្រូវបន្តពង្រឹងការគ្រប់គ្រងប្រមូលចំណូលពន្ធ ដោយពិនិត្យមើលនូវលទ្ធភាព និងសក្តានុពលនៃប្រភពចំណូល ហើយទន្ទឹមនឹងគ្នានោះត្រូវពិនិត្យលទ្ធភាព ក្នុងការកាត់បន្ថយរាល់ចំណាយ ដែលមិនចាំបាច់ និងអាចគ្រប់គ្រងបាន និងជំរុញការអនុវត្តការងារ តាមរយៈការប្រើប្រាស់តាមប្រព័ន្ធបច្ចេកវិទ្យា ដើម្បីបន្តកែប្រែរដ្ឋបាលសារពើពន្ធទៅជា E-Administration។

យោងតាមសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៣ បានតម្រូវឱ្យអគ្គនាយកដ្ឋានពន្ធដារ ប្រមូលឱ្យបាននូវចំណូលពន្ធផ្ទៃក្នុងចំនួន៣៥៧១.៧០លានដុល្លារ កើនឡើង២៦.៧០% ធៀបនឹងផែនការច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២២ ដែលកំណត់ឱ្យពន្ធដារប្រមូលចំណូលឲ្យបាន ២ ៨១៩.៥៥លានដុល្លារ)៕