ដោយ: លាងហួរ

បាងកក: យោងតាមរបាយការណ៍របស់ ទីភ្នាក់ងារអចលទ្រព្យJLLបានឱ្យដឹងថា ទីផ្សារខុនដូប្រណីតរបស់ទីក្រុងបាងកក បានងើបឡើងវិញដោយសារមានតម្រូវការពីអ្នកវិនិយោគក្នុងត្រីមាសទី១។

ខណៈពេលដែលតម្រូវការខុនដូពីប្រជាជន ដែលមានទ្រព្យសម្បត្តិខ្ពស់ បានកើនឡើងនៅចុងឆ្នាំ២០២១ ដោយសារក្រុមហ៊ុនអចនទ្រព្យបានលក់បញ្ចុះតម្លៃដ៏ច្រើន បានធ្វើឲ្យយូនីតខុនដូ ដែលមិនបានលក់ដាច់បានថយចុះមកនៅត្រឹម៤,៨% ស្មើនឹង៣៣៤៨យូនីត ដែលមិនទាន់បានលក់ចេញ។

តម្រូវការអាផាតមិនជួល បានថយចុះជាលទ្ធផល នៃកង្វះអ្នកជួលថ្មី និងការខ្វះខាតថវិកា ដោយសារអតីតអ្នកស្រុកមួយចំនួនធំ នៅតែរស់នៅក្នុងស្រុកកំណើត និងប្រទេសកំណើតរបស់ពួកគេ ហើយមិនទាន់បានត្រឡប់ទៅទីក្រុងបាងកកវិញ ទោះបីជាមានការបន្ធូរបន្ថយការបិទខ្ទប់ដោយ​សារជំងឺរាតត្បាតក៏ដោយ។

ទីផ្សារខុនដូប្រណីតក្នុងទីក្រុងបាងកក មានការខ្វះខាតនៅក្នុងត្រីមាសទី១ឆ្នាំ២០២២ ពោលគឺគម្រោងខុនដូ125sathornមានតែ៧៥៦យូនីតប៉ុណ្ណោះ ដោយសារភាពមិនច្បាស់លាស់លើទីផ្សារ ទាក់ទងនឹងជំងឺរាតត្បាត គម្រោងខុនដូដែលបានផ្អាកនៅតែបន្តអសកម្ម។

លើសពីនេះគ្មានអាផាតម៉ិនថ្មីណាមួយ ត្រូវបានបញ្ចប់ការសាងសង់សម្រាប់ពីរត្រីមាសជាប់ៗគ្នា។

ខុនដូដែលមានក្នុងស្តុកត្រៀមលក់ចេញ បានកើនឡើងតិចតួចដល់៦៩.៥៤១យូនីត ដែលក្នុងនោះ រួមមាន អគារខុនដូFour Seasons Private Residences Bangkokចំនួន៣៥៥យូនីត និងអគារខុនដូThe Strand Thonglorចំនួន១៩៨យូនីត៕

ដោយ៖ សុផារី

ភ្នំពេញៈ តម្លៃប្រេងឥន្ធនៈលក់រាយ នៅក្នុងប្រទេសកម្ពុជា ចាប់ពីថ្ងៃនេះ ដល់ថ្ងៃទី០១ ដល់ថ្ងៃទី១០ ខែកក្កដា ឆ្នាំ២០២២ ដោយសាំងធម្មតាលក់ក្នុងតម្លៃ៥.៨០០រៀល និងម៉ាស៊ូតលក់ក្នុងតម្លៃ៦.២០០រៀល។

បើយោងតាមសេចក្តីប្រកាសព័ត៌មាន របស់ក្រសួងពាណិជ្ជកម្មកម្ពុជា នៅថ្ងៃទី០១ ខែកក្កដា ឆ្នាំ២០២២នេះ បានបញ្ជាក់ថា ផ្អែកតាមតម្លៃប្រេងឆៅនៅលើទីផ្សារអន្តរជាតិ តម្លៃលក់រាយប្រេងឥន្ធនៈក្នុងរយៈពេលដូចគ្នាខាងលើ ត្រូវលក់៦.០៦៤រៀល ក្នុងមួយលីត្រ សម្រាប់ប្រេងសាំងធម្មតា EA92 និង ៦.៤៦៤រៀល សម្រាប់ប្រេងម៉ាស៊ូត ក្នុងមួយលីត្រ។

ក្រសួងបានបញ្ជាក់បន្ថែមថា ដើម្បីជួយសម្រួល់ដល់ជីវភាពរបស់ប្រជាជន និងដោយមានការរួមចំណែក ពីក្រុមហ៊ុនចែកចាយប្រេងឥន្ធនៈនៅកម្ពុជា សម្តេចនាយករដ្ឋមន្រ្តី បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន៦,៥សេនដុល្លារ ក្នុងមួយលីត្រ។

វិបត្តិតម្លៃប្រេងឡើងថ្លៃបានកើតឡើងជាបន្តបន្ទាប់ក្រោយពីរុស្ស៊ីបានបើកការវាយប្រហារលើប្រទេសអ៊ុយក្រែន ហើយលោកខាងលិចដឹកនាំដោយអាមេរិកបានដាក់ទណ្ឌកម្មជាបន្តបន្ទាប់លើថាមពលពីរុស្ស៊ីដែលកាត់បន្ថយការនាំចេញ ហ្គាស និងប្រេងពីរុស្ស៊ីទៅកាន់ពិភពលោក។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃសុក្រ ទី០១ ខែកក្កដា ឆ្នាំ២០២២នេះ បានសុំការអភ័យទោសពីប្រជាពលរដ្ឋចំពោះតម្លៃប្រេងសាំងដែលបានឡើងថ្លៃ ដោយសារជាបញ្ហាសកលហើយនាពេលនេះ៕

ដោយ: លាងហួរ

ប្រទេសចិន: កិច្ចប្រជុំប្រតិបត្តិក្រុមប្រឹក្សារដ្ឋដឹកនាំ ដោយនាយករដ្ឋមន្ត្រី លីខឺឈាង បានសម្រេចកាលពីថ្ងៃពុធថា ប្រទេសចិននឹងបង្កើនការគាំទ្រផ្នែកហិរញ្ញប្បទាន សម្រាប់គម្រោងសំខាន់ៗរបស់ខ្លួន តាមរយៈឧបករ​ណ៍ហិរញ្ញវត្ថុ ផ្អែកលើគោលនយោបាយ និងការអភិវឌ្ឍន៍។

យោងតាមកិច្ចប្រជុំបានឱ្យដឹងថា ការផ្តល់នូវការគាំទ្របែបនេះ ប្រទេសចិន មានគោលបំណងជំរុញការវិនិយោគ ប្រកបដោយប្រសិទ្ធភាព ការងារ និងការប្រើប្រាស់ក្នុងស្រុក។

កិច្ចប្រជុំបានសម្រេចចិត្ត ប្រមូលប្រាក់រហូតដល់៣០០ពាន់លានយន់ (ប្រហែល ៤៤,៧ពាន់លានដុល្លារអាមេរិក) តាមរយៈមធ្យោបាយ ដូចជាការចេញមូលបត្របំណុលហិរញ្ញវត្ថុ សម្រាប់ការបំពេញបន្ថែមដើមទុន។  គម្រោងធំៗ រួមទាំងហេដ្ឋារចនាសម្ព័ន្ធថ្មី ឬស្ពានផ្តល់ហិរញ្ញប្បទានសម្រាប់គម្រោងបំណុលពិសេស។

រដ្ឋាភិបាលកណ្តាលនឹងរៀបចំការបញ្ចុះតម្លៃ ការប្រាក់សម្រាប់រយៈពេល២ឆ្នាំ ស្របតាមចំនួនជាក់ស្តែង នៃការវិនិយោគភាគហ៊ុន។ កិច្ចប្រជុំបានគូសបញ្ជាក់ពីសារៈសំខាន់ នៃកិច្ចខិតខំប្រឹងប្រែង ដើម្បីដាក់ឱ្យដំណើរការកម្មវិធីជំនួយសង្គ្រោះការងារ ក្នុងអំឡុងពេលអនុវត្តន៍គម្រោងធំៗ ដែលទន្ទឹមនឹងធានាឱ្យបានគុណភាព និងសុវត្ថិភាពគម្រោង។

កិច្ចប្រជុំនេះបានឱ្យដឹងទៀតថា ការវិនិយោគជាច្រើន គួរតែផ្តោតលើវិស័យដឹកជញ្ជូន ដើម្បីអភិវឌ្ឍន៍គាំទ្រការងារ និងការប្រើប្រាស់ និងផ្តល់ការគាំទ្រកាន់តែច្រើន សម្រាប់ការអភិវឌ្ឍសេដ្ឋកិច្ចសង្គម។

កិច្ចប្រជុំក៏បានសម្រេចចិត្តបង្កើតកម្មវិធីសាកល្បង ដើម្បីបង្កើនការផ្លាស់ប្តូរសមិទ្ធិផលស្រាវជ្រាវផ្នែកព្យាបាល នៅមន្ទីរពេទ្យកម្រិតខ្ពស់មួយចំនួន និងគាំទ្រដល់ការសាងសង់វេទិកា និងមូលដ្ឋានស្រាវជ្រាវ។

ដើម្បីបំពេញតម្រូវការមូលដ្ឋានរបស់សាធារណៈជន សម្រាប់សេវាវេជ្ជសាស្រ្ត និងការពារព័ត៌មានផ្ទាល់ខ្លួន ស្ថាប័នវេជ្ជសាស្ត្រ មិនគួរបដិសេធអ្នកជំងឺដែលមានជំងឺធ្ងន់ធ្ងរទេ ហើយការរំលោភបំពានលើការព្យាបាលសុខភាព គួរតែត្រូវបានស៊ើបអង្កេតយ៉ាងធ្ងន់ធ្ងរ និងផ្តន្ទាទោសតាមច្បាប់៕

ដោយៈ សុខុម

អន្តរជាតិ: អង្គការ NATO បានចុចឈ្មោះមហាយក្សចិន នៅក្នុងគោលនយោបាយអាទិភាព ជាយុទ្ធសាស្ត្រមួយរបស់ខ្លួន ជាលើកដំបូងមិនធ្លាប់មានក្នុងប្រវត្តិសាស្ត្រ ដោយអះអាងថា មហិច្ឆតាដ៏ធំ និង”គោលនយោ​បាយបង្ខិតបង្ខំ” របស់ក្រុងប៉េកាំង បានគំរាមកំហែងដល់ “ផលប្រ​យោ​ជន៍ សន្តិសុខ និងគុណតម្លៃ” របស់ប្លុកលោកខាងលិច។

ផែនការថ្មី ឬគោលគំនិតយុទ្ធសាស្ត្រ (Strategic Concept) របស់អង្គការបក្សសម្ព័ន្ធយោធា NATO ដែលដាក់ចេញនូវគោលនយោបាយអាទិភាពរបស់ខ្លួន សម្រាប់ទសវត្សរ៍ក្រោយនេះ ត្រូវបានអនុម័តនៅឯកិច្ចប្រជុំកំពូលក្នុងប្រទេសអេស្ប៉ាញ កាលពីថ្ងៃពុធ ទី២៩ ខែមិថុនា ឆ្នាំ២០២២ នេះ។

ខ្លឹមសារនៅឯកសារនេះ បានប្រើពាក្យពេចន៍ធ្ងន់ៗបំផុត បាញ់ឆ្ពោះទៅរកប្រទេសរុស្ស៊ី ដែលខ្លួនចាត់ទុកថាជា “ការគំរាមកំហែងដ៏ធំ និងដោយផ្ទាល់បំផុត” ចំពោះសន្តិភាព និងសន្តិសុខរបស់សម្ព័ន្ធមិត្ត ប៉ុន្តែនៅក្នុងនោះក៏បានបញ្ជាក់ដែរថា “មហិច្ឆតាយោធារបស់ក្រុងប៉េកាំង ការបញ្ចេញវោហាសាស្ត្រ ប្រឈមមុខដាក់កោះតៃវ៉ាន់ និងទំនាក់ទំនងកាន់តែស្អិតរមួតរបស់ក្រុងប៉េកាំង ជាមួយក្រុងមូស្គូ បានបង្កជា “បញ្ហាប្រឈមជាប្រព័ន្ធ”។

លោក Jens Stoltenberg អគ្គលេខាធិការអង្គការ NATO បានថ្លែងទៅកាន់ក្រុមអ្នកយកព័ត៌មានថា “ប្រទេសចិន កំពុងកសាងកងកម្លាំងយោធារបស់ខ្លួនយ៉ាងធំសម្បើម រួមទាំងអាវុធនុយក្លេអ៊ែរផងដែរ ដោយសម្លុត គំរាមកំហែងបណ្ដាប្រទេសជិតខាង។ គំរាមកំហែងកោះតៃវ៉ាន់ ឃ្លាំមើល តាមដាន និងគ្រប់គ្រងពលរដ្ឋរបស់ខ្លួន តាមរយៈបច្ចេកវិទ្យាជឿនលឿន និងជួយពង្រីកការកុហកភូតភរ និងការផ្សព្វផ្សាយព័ត៌មានមិនពិតរបស់រុស្ស៊ី”។

លោកបានបន្ថែមថា “ប្រទេសចិន មិនមែនជាសត្រូវរបស់យើងទេ ប៉ុន្តែយើងត្រូវតែសម្លឹងមើលឱ្យច្បាស់ នូវបញ្ហាប្រឈមដ៏ធ្ងន់ធ្ងរ ដែលប្រទេសនេះបង្ហាញចេញមក”។

ជាការឆ្លើយតប ប្រទេសចិន បាននិយាយកាលពីថ្ងៃព្រហស្បតិ៍ ទី៣០ ខែមិថុនា ថា ខ្លួនប្រឆាំង “ដាច់ខាត” ចំពោះការប្រកាសរបស់អង្គការ NATO ដោយចាត់ទុកការប្រកាសនេះថា ជាការព្រមាន “ឥតប្រយោជន៍គ្មានបានការ”។

លោក Zhao Lijian អ្នកនាំពាក្យក្រសួងការបរទេសចិន បានថ្លែងថា “ឯកសារគោលគំនិតយុទ្ធសាស្ត្រថ្មីរបស់អង្គការ NATO មិនគោរពការពិត បំភាន់ “ស”ទៅជា “ខ្មៅ” ហើយបង្ខូចគោលនយោបាយ ការបរទេសរបស់ប្រទេសចិន”៕ Aljazeera៕

ដោយៈគង់ ម៉ាលីន

បន្ទាយមានជ័យៈ អ្នកធុរកិច្ចវ័យក្មេង និងកំពុងមានក្រុមហ៊ុនជាច្រើននៅក្រុងប៉ោយប៉ែត បានសម្តែងការបារម្ភ ដោយសារទីក្រុងប៉ោយប៉ែតកំពុងមានកង្វះខាតកំលាំងពលកម្មធ្ងន់ធ្ងរ។

លោកសួង សុខហ៊ាងប្រធានក្រុមប្រឹក្សាភិបាលក្រុមហ៊ុនBright HTLបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃទី៣០ មិថុនាថា ក្រុងប៉ោយប៉ែត ចាប់ផ្តើមមានសកម្មភាពសេដ្ឋកិច្ច មានភាពល្អប្រសើរឡើងវិញ ប៉ុន្តែអ្វីដែលជាបញ្ហាប្រឈមធ្ងន់ធ្ងរនោះ គឺក្រុងមួយនេះកំពុងខ្វះកំលាំងពលកម្ម ជំនាញ និងពលកររាប់ពាន់នាក់។

លោកបន្តថា “កាស៊ីណូជាង២០នៅទីក្រុងនេះ ទើបបានបើកដំណើរការតែ៤ប៉ុណ្ណោះ ចំណែកកាស៊ីណូដទៃទៀត មិនអាចដំណើរការបាន ដោ​យសារខ្វះកំលាំងពលកម្ម”។ លោកបន្តថា “សូម្បីតែក្រុមហ៊ុនខ្ញុំក៏កំពុងខ្វះកំលាំងពលកម្មជំនាញដែរ ដែលស្ថានភាពបែបនេះ កំពុងតែកើតមានស្ទើរគ្រប់ផ្នែក និងក្រុមហ៊ុននានា”។

លោកសួង សុខហ៊ាងបានបន្តថា អ្នកមានជំនាញរដ្ឋបាល ធនធានមនុស្ស ជំនាញខាងគណនេយ្យប្រាក់ខែ ទទួលបានចន្លោះពី៥០០ទៅ៧០០ដុល្លារអាមេរិក និងទទួលបានកន្លែងស្នាក់នៅ និងអាហារពីរពេលផង​ដែរ ប៉ុន្តែយើងនៅតែពិបាក និងរកមិនបាននៅឡើយ។

លោកបន្តថា “បើតាមខ្ញុំប៉ាន់ស្មាន ក្រុងប៉ោយប៉ែតខ្វះធនធានមនុស្សប្រមាណ២០,០០០នាក់នាពេលបច្ចុប្បន្ននេះ ដែលចំនួននេះរាប់បញ្ចួលទាំងធនធានមនុស្សជំនាញ និងពលករ ដែលអាចមកធ្វើការនៅតាមរោងចក្រ សហគ្រាសនានា៕