ដោយៈសុខុម

បាងកក: ការកើនឡើងយ៉ាងគំហុក នូវការនាំចេញក្នុងឆ្នាំ២០២១ បានជំរុញកំណើនតម្រូវការលំនៅដ្ឋាន ក្នុងបណ្ដាខេត្តច្រករបៀងសេដ្ឋកិច្ចភាគខាងកើត (EEC) នៃប្រទេសថៃ។

អ្នកជំនាញបង្ហាញសុទិដ្ឋិនិយមថា កំណើននេះនឹងបន្តនៅឆ្នាំនេះបន្តទៀត។ នេះបើយោងតាមបណ្ដាក្រុមហ៊ុនអភិវឌ្ឍន៍អចលនទ្រព្យក្នុងស្រុក។

លោក Meesak Chunharuckchot ប្រធានសមាគមអចលនទ្រព្យខេត្តឈុនប៊ូរី (Chonburi) ថ្លែងថា ទីផ្សារលំនៅដ្ឋានក្នុងខេត្តនេះ មានភាពប្រសើរឡើងក្នុងឆមាសទី២ ឆ្នាំ២០២១ ដែលជំរុញដោយការនាំចេញ ដែលបានឈានដល់កម្រិតខ្ពស់បំផុតមិនធ្លាប់មានក្នុងរយៈពេលប៉ុន្មានឆ្នាំមកនេះ។

លោកលើកឡើងទៀតថា “ប្រសិនបើលុយបាតធ្លាក់ថ្លៃ ការទិញផ្ទះរបស់អ្នក ដែលធ្វើការផ្នែកនាំចេញ ផ្នែកឧស្សាហកម្មនឹងកើនឡើង ខណៈតម្លៃដឹកជញ្ជូនកើនឡើង”។

យោងតាមធនាគារកណ្ដាលថៃបានឱ្យដឹងថា តម្លៃនាំចេញសរុបដែលមិនរាប់បញ្ចូលមាស បានកើនឡើង២៤,៤% កាលពីឆ្នាំមុន ជាមួយនឹងកំណើន២៦,៦% ក្នុងឆមាសទី១ និង២២,៤% ក្នុងឆមាសទី២។

លោក Meesak Chunharuckchot លើកឡើងថា ផ្ទះប្រភេទTownhouse តម្លៃចន្លោះពី៣០.០០០ដុល្លារអាមេរិក ទៅ៦០.០០០ដុល្លារអាមេរិក ក្នុងមួយយូនីតដែលអតិថិជន គោលដៅ ជាអ្នកនៅធ្វើការនៅតាមសួនឧស្សាហកម្ម មានសន្ទុះលក់ដាច់ជាងមុន បន្ទាប់ពីធ្លាក់ចុះ អំឡុងឆ្នាំ២០១៩-២០២០។ អ្នកជំនាញរំពឹងថា សន្ទុះកើនឡើងនេះនឹងបន្តនៅក្នុងឆ្នាំ២០២២ នេះទៀត។

លោក Premsorn Sriviboonchai ប្រធានសមាគមអចលនទ្រព្យ ខេត្តរ៉ាក់យ៉ងបានបង្ហាញសុទិដ្ឋិនិយមថា ទីផ្សារលំនៅដ្ឋានក្នុងខេត្តរ៉ាក់យ៉ង នឹងមានស្ថានភាពល្អប្រសើរ ដូចខេត្តឈុនប៊ូរី ដែរជាមួយនឹងកំណើនវិជ្ជមានបន្តមកពីឆ្នាំមុន។

សួនឧស្សាហកម្មក្នុងស្រុកភ្លួក ឌែង (Pluak Daeng) នៃខេត្តរ៉ាក់យ៉ង មានសន្ទុះធ្លាក់ចុះក្នុងឆ្នាំ២០២០។ ទោះជាយ៉ាងណា ការផលិតរថយន្តបានកើនឡើងកាលពីឆ្នាំមុន បន្ទាប់ពីពិភពលោកមានតម្រូវការរថយន្តឡើងវិញ៕ Bangkok Post៕

ដោយៈ សុផារី

ភ្នំពេញៈ ទំនាក់ទំនងរវាងកម្ពុជា ចិនកាន់តែមានភាពល្អប្រសើរថែមទៀត បន្ទាប់ពីប្រមុខរដ្ឋាភិបាលប្រទេសទាំងពីរ បានជួបសន្ទ​នាគ្នាតាមទូរស័ព្ទ។

កិច្ចពិភាក្សាគ្នា ដែលបានធ្វើឡើ់ងនៅរសៀលថ្ងៃសុក្រ ទី១៨ ខែមីនា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានជួបពិភាក្សាការងារតាមទូរស័ព្ទជាមួយឯកឧត្តម ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិន ដោយប្រមុខដឹកនាំប្រទេសទាំងពីរ បានលើកឡើងនូវចំណុចវិជ្ជមា​នជាច្រើន។

ក្នុងជំនួបនេះ មេដឹកនាំទាំងពីរបានពិភាក្សាទៅលើចំណុចជាច្រើន នៅក្នុងកម្រិតទ្វេភាគី តំបន់ និងបញ្ហារបស់ពិភពលោកផងដែរ។ កិច្ចពិភាក្សានេះ បានជជែកច្រើនលើទំនាក់ទំនងទ្វេភាគីរវាងកម្ពុជា និងចិន។

លោកប្រធានាធិបតីចិន បានលើកឡើងថា បច្ចុប្បន្នកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន បានចូលជាធរមាន ដូច្នេះ ចិននឹងនាំចូលអង្ករ ឱ្យបានកាន់តែច្រើនជាងមុន ព្រមទាំងផលិត​ផលកសិកម្មមួយចំនួនទៀត ដូចជា ផ្លែចេក ស្វាយ និងផ្លែមៀនជាដើម ដើម្បីរួមចំណែកកាត់បន្ថយភាពក្រីក្រនៅកម្ពុជា។

លោកប្រធានាធិបតីចិន ក៏បានប្រកាសគាំទ្រដល់គម្រោងអភិវឌ្ឍទាំងឡាយនៅកម្ពុជា ជាពិសេសការអភិវឌ្ឍន៍លើហេដ្ឋារចនាសម្ព័ន្ធ។ លោកប្រធានាធិបតីចិន ក៏បានប្រកាសផ្តល់ជំនួយជាថ្មីនូវវ៉ាក់សាំងបង្ការជំងឺកូវីដ-១៩ ចំនួន២០លានដូស។ ក្នុងចំណោម ២០លានដូសនោះ ៥លានដូសនឹងមកដល់កម្ពុជា នៅចុងខែមីនា ឆ្នាំ២០២២នេះ។

ប្រធានាធិបតីចិន ស៊ី ជិនពីង បានប្រកាសធ្វើការរួមគ្នាជាមួយកម្ពុជា ក្នុងការបង្កើតរោងចក្រផលិតវ៉ាក់សាំងនៅកម្ពុជា នាពេលខាងមុខផងដែរ។ លោកស៊ី ជិនពីង ក៏បានមានប្រសាសន៍ជំរុញបង្កើតជើងហោះហើររវាងប្រទេសទាំងពីរ។ ពាក់ព័ន្ធបញ្ហាអាស៊ាន-ចិន វិញ ដោយសារតែអាស៊ាន និងចិន ទើបនឹងដំឡើងកម្រិតទំនាក់ទំនងរបស់ខ្លួន ទៅជាដៃគូយុទ្ធសាស្ត្រគ្រប់ជ្រុងជ្រោយ កាលពីឆ្នាំ២០២១នោះ ប្រធានាធិបតីចិន បានប្រកាសគាំទ្រកម្ពុជា ក្នុងការធ្វើជាប្រធានអាស៊ាននៅឆ្នាំ២០២២នេះ។ ជាពិសេសគាំទ្រតួនាទីប្រធានអាស៊ានរបស់កម្ពុជា លើបញ្ហានៅក្នុងតំបន់ និងលើពិភពលោក។

លោកស៊ី ជិនពីង បានគូសរំលេចថា អាស៊ាន និងចិន ត្រូវធ្វើយ៉ាងណារួមចំណែករក្សាសន្តិភាព ស្ថេរភាព ការអភិវឌ្ឍ និងវិបុលភាពនៅក្នុងតំបន់ ជាពិសេសធ្វើយ៉ាងណាពង្រីក នូវកិច្ចសហប្រតិប​ត្តិការរវាងអាស៊ាន និងចិន។

ប្រធានាធិបតីចិន ក៏បានគាំទ្រការធ្វើដំណើរទស្សនកិច្ចរបស់សម្តេចតេជោនាយករដ្ឋមន្ត្រី ទៅកាន់ប្រទេសមីយ៉ាន់ម៉ា កាលពីខែមករា កន្លងទៅនេះ។ លោកបានចាត់ទុកដំណើរទស្សនកិច្ចរបស់សម្តេចតេជោ មានសារៈសំខាន់ក្នុងចូលរួមចំណែក ដោះស្រាយបញ្ហារបស់មីយ៉ាន់ម៉ា ដែលជាមធ្យោបាយចូលរួម ដំណោះស្រាយតាមផ្លូវអាស៊ាន។

ក្នុងជំនួបពិភាក្សានេះ សម្តេចតេជោ ហ៊ុន សែន បានអញ្ជើញលោកប្រធានាធិបតីចិន មកបំពេញទស្សនកិច្ចនៅកម្ពុជាក្នុងពេលវេលាសមស្របណាមួយ។ លោកប្រធានាធិបតីចិន បានទទួលយកនូវការអញ្ជើញនេះ ហើយនឹងធ្វើការងារជាភាគីពាក់ព័ន្ធ ដើម្បីទស្សនកិច្ចនៅកម្ពុជា។

លោកប្រធានាធិបតីចិន ក៏បានអញ្ជើញសម្តេចតេជោ ហ៊ុន សែន ទស្សនកិច្ចនៅប្រទេសចិន ក្នុងពេលវេលាសមស្របណាមួយ ជាពិសេសក្រោយការរាតត្បាតជំងឺកូវីដ-១៩៕

ដោយ: ម៉ាលីស

ភ្នំពេញ: សួនសហគមន៍កុមារមេត្រី ឬហៅថាសួនលូ៥ តម្លៃជិត៧ម៉ឺនដុល្លាអាមេរិក ដែលទទួលបានការឧបត្ថម្ភពីស្ថានទូតចិនប្រចាំនៅកម្ពុជា ត្រូវបានបើកសម្ភោធឱ្យដំណើរការជាផ្លូវការ ដើម្បីបម្រើជាកន្លែងហាត់ប្រាណរបស់បងប្អូនប្រជាពលរដ្ឋ នៅតំបន់ស្ទឹងមានជ័យ។

សួននេះបានស្ថាបនាឡើង ក្រោមការជួយឧបត្ថម្ភពីស្ថានទូតចិនប្រចាំនៅកម្ពុជានិងត្រូវបានបើកសម្ពោធដាក់ឱ្យប្រើប្រាស់ជាផ្លូវការនៅព្រឹកថ្ងៃទី១៨ ខែមីនា ឆ្នាំ២០២២នេះ ក្រោមអធិបតីភាព លោក នួន ផារ័ត្ន អភិបាលរងរាជធានីភ្នំពេញ តំណាង លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោក ឆាង ជាន អគ្គទីប្រឹក្សានៃស្ថានទូតចិន។

លោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ បានមានប្រសាសន៍ថា សួនសហគមន៍កុមារមេត្រីឬសួនលូ៥ មានទីតាំងស្ថិតនៅភូមិដំណាក់ធំ២ សង្កាត់ស្ទឹងមានជ័យទី៣ មានផ្ទៃដីសរុប២៧៧៥ម៉ែត្រក្រឡា មានបណ្តោយប្រវែង២២៩ម៉ែត្រ ទទឹង១០ម៉ែត្រ និងទទឹងប្រឡាយទឹកក្រោមដី៥ម៉ែត្រ។

កាលពីមុនសួនលូ៥នេះគឺជាប្រឡាយទឹកស្អុយបើកចំហ ដែលមានគម្របបេតុងនិងក្រាលក្បឿងពីលើ ហើយសួននេះជាទីតាំងសំខាន់មួយក្នុងតំបន់ស្ទឹងមានជ័យ ដែលអ្នករស់នៅអាចដើរហាត់ប្រាណនិងក្មេងលេងកម្សាន្តបាន។

សួននេះសាងសង់ដោយប្រើប្រាស់រយៈពេល០៦ខែ ដោយចាប់ផ្តើមពីថ្ងៃទី០៩ ខែកញ្ញា ឆ្នាំ២០២១ រហូតដល់ថ្ងៃទី២៥ ខែមករា ឆ្នាំ២០២២ ចំណាយថវិកាសរុប៦៧,៤៩៧ដុល្លារ ដោយរដ្ឋបាលរាជធានីភ្នំពេញ បានដាក់បំពាក់ឧបករណ៍សម្រាប់ហាត់ប្រាណអស់ថវិកាចំនួន៦,០០០ដុល្លារ សរុបថវិកាចំណាយទាំងអស់ចំនួន៧៥,៤៩៧ដុល្លារ។

លោកនួន ផារ័ត្ន បានលើកឡើងថា សួនសហគមន៍កុមារមេត្រី នេះមិនត្រឹមតែលើកសោភណភាពក្នុងរាជធានីភ្នំពេញប៉ុណ្ណោះទេ តែវាជាកន្លែងមួយផ្ដល់ឱ្យប្រជាពលរដ្ឋនៅតំបន់នេះបានហាត់ប្រាណដើម្បីសុខភាព។

លោក ឆាង ជាន ក៏បានលើកឡើងផងដែរថា ការស្ថាបនាសួនសហគមន៍កុមារមេត្រីមិនត្រឹមតែបានឱ្យក្មេងៗបានលេងប៉ុណ្ណោះទេ តែក៏បានលើកសោភណភាពរាជធានីភ្នំពេញឱ្យកាន់តែស្រស់ស្អាត ហើយវាក៏ជាកន្លែងសម្រាប់ឱ្យបងប្អូនប្រជាពលរដ្ឋបានហាត់ប្រាណផងដែរ៕

ដោយ:ម៉ាលីស

បាត់ដំបង: លោកសុខ លូ អភិបាលខេត្តបាត់ដំបងនៅព្រឹកថ្ងៃទី១៨ មិនានេះ បានអញ្ជើ​ញចូលរួមក្នុងកិច្ចប្រជុំ គណៈកម្មាធិការចម្រុះលើកទី៣ (JCC) សម្រាប់ គម្រោងការសិក្សាផែនការមេ សម្រាប់អភិវឌ្ឍទីក្រុងវៃឆ្លាត ក្នុងខេត្តបាត់ដំបង ជាមួយនិងក្រសួងដែនដី ហេដ្ឋារចនា សម្ព័ន្ធគម នាគមន៍ និងទេសចរណ៍នៃរដ្ឋាភិបាលជប៉ុន តាមរយៈប្រព័ន្ធវីដេអូ។

បន្ទាប់ពីការធ្វើបទបង្ហាញ ពីគម្រោងផែនការមេសម្រាប់ការអភិវឌ្ឍទីក្រុងឆ្លាតក្នុង ខេត្តរួចមក លោក សុខ លូ អភិបាលខេត្តបាត់ដំបង បានមានប្រសាសន៍ថា រដ្ឋបាល ខេត្តបាត់ដំបងសង្ឃឹមថា រដ្ឋាភិបាលជប៉ុន នឹងបន្តជួយគម្រោងនេះ ឱ្យចេញជាសមិទ្ធផល ជាក់ស្ដែង ហើយរដ្ឋបាលខេត្តបាត់ដំបង នឹងបន្តចូលរួមសហការជាមួយរដ្ឋាភិបាល ជប៉ុនជានិច្ច ក្នុងន័យដើម្បីចូលរួមអភិវឌ្ឍន៍ខេត្តបាត់ដំបង ឱ្យក្លាយជាទីក្រុងឆ្លាត ដើម្បីទាក់ទាញវិនិយោគិនក្នុងស្រុក និងក្រៅស្រុកមកវិនិយោគកាន់តែច្រើនឡើង និងជាពិសេសដើម្បីឱ្យភ្ញៀវទេសចរជាតិ អន្តរជាតិ មកទស្សនាខេត្តបាត់ដំបង កាន់តែច្រើនឡើងៗ។

លោកបានបន្តទៀតថា ទន្ទឹមនឹងនេះ រដ្ឋបាលខេត្តបាត់ដំបង ស្នើសុំដល់ រដ្ឋាភិបាលជប៉ុន បន្តផ្សព្វផ្សាយដល់វិនិយោគិនក្នុងប្រទេសជប៉ុនឱ្យមកវិនិយោគក្នុង ខេត្តបាត់ដំបងឱ្យកាន់តែច្រើនឡើង ឬបង្កើតជាតំបន់សេដ្ឋកិច្ចពិសេសក្នុងខេត្តមួយ ព្រោះខេត្តបាត់ដំបងមានផ្ទៃដីធំទូលាយ ដែលបង្កលក្ខណៈងាយស្រួលក្នុងការបង្កើតតំបន់ សេដ្ឋកិច្ចពិសេស ដែលអាចបង្កើតជារោងចក្រផ្សេងៗ ពិសេសរោងចក្រកែច្នៃផលិតផល កសិកម្ម ព្រោះខេត្តបាត់ដំបងជាខេត្តកសិកម្ម ហើយផលិតផលកសិកម្មជាច្រើន មិនទាន់មានរោងចក្រកែច្នៃ វេចខ្ចប់បានល្អច្រើននោះទេ។

លោកបន្តទៀតថា បច្ចុប្បន្ននេះរដ្ឋបាលខេត្ត កំពុងតែខិតខំប្រឹងប្រែងក្នុងការ រៀបចំសណ្ដាប់ធ្នាប់ក្នុងក្រុង បរិស្ថាន អនាម័យសាធារណៈ ដោយក្នុងនោះ ខេត្តបាត់ដំបង មានអាងសំរាម ដែលមានលក្ខណៈស្ដង់ដារនៅឃុំតាគ្រាម នៃស្រុកបាណន់ រៀបចំ ប្រព័ន្ធលូទឹកកខ្វក់ និងប្រព័ន្ធលូទឹកភ្លៀងដាច់ដោយឡែកពីគ្នា និងបង្កើតអាងប្រព្រឹត្តិ កម្មទឹកកខ្វក់ឱ្យបានសមស្រប ដើម្បីប្រមូលនិងធ្វើប្រព្រឹត្តកម្មសម្អាតទឹកកខ្វក់ មុននឹងបង្ហូរ ចូលទៅក្នុងប្រភពទឹកធម្មជាតិ និងធ្វើការរៀបចំសណ្ដាប់ធ្នាប់ក្នុងក្រុង ការទប់ស្កាត់ការរំលោ​ភយកដីចំណីផ្លូវរបស់រដ្ឋ ការរៀបចំសណ្ដាប់ធ្នាប់ជុំវិញផ្សារក្នុងក្រុងជាដើម៕

TOKYO: Japan will accelerate its efforts to develop offshore wind power projects, its industry minister said on Friday.

Officials in the resource-poor Japan are concerned Russia’s invasion of Ukraine and the ensuing surge in oil prices could hit economic growth, although they say there has been no immediate major disruption to energy supply.

Industry minister Koichi Hagiuda told reporters the government will revamp the public tender process for picking wind farm operators, taking into account not only the prices bid but also how early systems can be installed.

Source: Reuters