អភិបាលខេត្តកំពង់ស្ពឺ៖ គំរោងសួនកំសាន្តលំដាប់អន្តរជាតិតម្លៃ ៥០០លានដុល្លារនៅតែដំណើរការ

ដោយៈគង់ សូរិយា

កំពង់ស្ពឺៈ ខេត្តកំពង់ស្ពឺ នៃគណៈអភិបាលខេត្តកំពង់ស្ពឺ លោកវ៉ី សំណាង បានថ្លែងថា សួនកំសាន្តលំដាប់អន្តរជាតិនៅខេត្តកំពង់ស្ពឺ ដែលវិនិយោគដោយក្រុមហ៊ុនជាច្រើន នៅតែបន្តដំណើរការ ដោយមិនមានការបោះបង់នោះទេ។

លោកបានមានប្រសាសន៍ឲ្យដឹងកាលពីពេលថ្មីៗនេះថា រហូតមកទល់ពេលនេះ ក្រុមហ៊ុនចម្រុះជាតិសាសន៍ ដែលវិនិយោគគំរោងនេះ បានប្រមូលទិញដីបានអស់រួចរាល់ហើយ។ ការសាងសង់មជ្ឈមណ្ឌលសួនកម្សាន្តលំដាប់ពិភពលោក និងធំជាងគេនៅក្នុងតំបន់អាស៊ី ដែលមានតម្លៃ៥០០លានដុល្លារ កំពុងធ្វើការលើនិតិវិធីច្្បាប់នៅក្រុមប្រឹក្សាអភិវឌ្ឍន៍កម្ពុជា។

លោកបន្តថា គម្រោងវិនិយោគនេះ នឹងអភិវឌ្ឍន៍នៅលើផ្ទៃដីទំហំ ២០៥ហិកតា នៅស្រុកភ្នំស្រួច និងស្រុកសំរោងទង ខេត្តកំពង់ស្ពឺដែលជាការវិនិយោគរួមទុនចម្រុះជាតិសាសន៍មកពី ៣ប្រទេសរួមមាន ចិន ស្វីស និងសិង្ហបុរី ក្រោមឈ្មោះក្រុមហ៊ុន ចូហ្គ្រេន អ៊ិនវេសម៉ិន ឯ.ក (JOE GRAND ECOINVESTMENT Co.LTD)។

គម្រោងវិនិយោគតំបន់ទេសចរណ៍ សួនទឹកដ៏ធំពុំធ្លាប់មាននៅកម្ពុជានេះ នឹងមានដូចជាមជ្ឈមណ្ឌលកម្សាន្តសួនទឹក សួនកសិកម្មទេសចរណ៍ សួនកុមារ សួនសត្វ ផ្ទះលំហែ រមណីយដ្ឋាន និងសណ្ឋាគារជាដើម។

លោក វ៉ី សំណាង បានឲ្យដឹងទៀតថា ក្នុងដំណាក់កាលដំបូង ក្រុមហ៊ុន នឹងចំណាយទឹកប្រាក់ចំនួន២០០លានដុល្លារ ដើម្បីអភិ​វឌ្ឍ​ន៍នៅលើផ្ទៃដីទំហំជាង១០០ហិកតា។លោកបញ្ជាក់ថា បច្ចុប្បន្នគម្រោងនេះ នៅមិនទាន់អាចធ្វើបាននៅឡើយ ដោយសារបញ្ហាជំងឺកូវីដ១៩ និងបញ្ហានីតិវិធីខ្លះទៀត ដែលតម្រូវឱ្យក្រុមហ៊ុនត្រូវមានគម្រោងវិនិយោគ ច្បាស់លាស់បន្ថែមទៀត ដើម្បីងាយស្រួលស្នើសុំគោលការណ៍ពីរាជរដ្ឋាភិបាលសិន។

លោកបន្តថា “គិតមកទល់ពេលនេះ គម្រោងវិនិយោគដ៏ធំនេះ យើងបានពិនិត្យ និងវាយតម្លៃបានពី៩០ទៅ ៩៥ភាគរយហើយ។ យើងនឹងពន្លឿនលើកិច្ចការនេះ ឲ្យរួចរាល់នៅក្នុងខែនេះ”។

លោកអភិបាលខេត្តកំពង់ស្ពឺ មានសុទិដ្ឋនិយមថា ខេត្តកំពង់ស្ពឺនាពេលអនាគត នឹងក្លាយជាគោលដៅទេសចរណ៍ ដ៏ទាក់ទាញទំាងទេសចរជាតិ និងអន្តរជាតិមកពីជុំវិញពភពលោក នៅពេលគម្រោងអភិវឌ្ឍន៍សួនកម្សាន្តដ៏ធំនេះលេចរូបរាងជាផ្លូវការ។

ជាមួយគ្នានេះ អាជ្ញាធរខេត្តបាន និងកំពុងជំរុញការអភិវឌ្ឍតំបន់ទេសចរណ៍សំខាន់ៗផ្សេងទៀត។
បច្ចុប្បន្នខេត្តកំពង់ស្ពឺ មានតំបន់ទេសចរណ៍ទាក់ទាញប្រវត្តសាស្ត្រ ធម្មជាតិ អេកូទេសចរណ៍ និងកែច្នៃ ដូចជា វត្តវាំងចាស់ ឬទីក្រុងឧដុង្គ ឧទ្យានជាតិគិរីរម្យ វីគិរីរម្យផាញរីសត (A2ATown Cambodia) ទឹកធ្លាក់ចំបក់, ទឹកធ្លាក់៧ជាន់ ឬទឹកធ្លាក់ជ្រាវ តេទឹកពុះ និងអំពែភ្នំ ជាដើម៕

មន្រ្តីព្រឹទ្ធសភាសហរដ្ឋអាមេរិកសិក្សាពីការអភិវឌ្ឍសេដ្ឋកិច្ចនៅខេត្តព្រះសីហនុ

ដោយៈគង់ សូរិយា

ព្រះសីហនុៈ មន្រ្តីជាន់ខ្ពស់នៃព្រឹទ្ឋសភាសហរដ្ឋអាមេរិកកាលពីថ្ងៃទី២០ មេសាកន្លងមក បានចុះសិក្សាស្វែងយល់ពីការអភិវឌ្ឍន៍៍ សេដ្ឋកិច្ច សង្គម នៅខេត្តព្រះសីហនុ ដែលជាខេត្តមានការរីកចម្រើនយ៉ាងលឿន ក្នុងរយៈពេលប៉ុន្មានឆ្នាំចុងក្រោយនេះ។

គណៈប្រតិភូអាមេរិក បានដឹកនាំដោយ លោក Paul Grove អគ្គលេខាគណៈកម្មាធិការហិរញ្ញវត្ថុ នៃព្រឹទ្ធសភាសហរដ្ឋអាមេរិក ដោយបានជួបពិភាក្សា​ការងារ និងសម្តែងការគួរសមជាមួយលោកគួច ចំរើនអភិបាល នៃគណៈអភិបាលខេត្តព្រះសីហនុ។

លោក Paul Grove បានថ្លែងអំណរគុណឯកឧត្តមអភិបាលខេត្ត ដែលបានអនុញ្ញាត្តឱ្យលោក និងសហការីចូលជួបពិភាក្សា និងសិក្សាពីការអភិវឌ្ឍសេដ្ឋកិច្ច និងសង្គមរបស់ខេត្តព្រះសីហនុនាពេលបច្ចុប្បន្ន។ លោក Paul Grove បានកោតសរសើរ និងវាយតម្លៃខ្ពស់ចំពោះការអភិវឌ្ឍរីកចម្រើននូវហេដ្ឋារចនាសម្ព័ន្ធ និងជីវភាពរស់នៅរបស់ប្រជាពលរដ្ឋខេត្តព្រះសីហនុផងដែរ។

លោកបានរំលឹកថា កាលពីឆ្នាំ១៩៩៤ លោកបានមកកាន់ខេត្តព្រះសីហនុ ក៏ប៉ុន្តែការមកដល់នាពេលនេះ លោកមើលខេត្តព្រះសីហនុមិនចង់ស្គាល់ ព្រោះមានការអភិវឌ្ឍន៍រីកចម្រើន លឿនគួរឱ្យកត់សំគាល់ ដែលមានសណ្ឋាគារ និងអាគារខ្ពស់ វាបានផ្តល់នូវអត្ថប្រយោជន៍ នូវអាជីវកម្មរីកលូតលាស់កាន់តែច្រើន។

លោកគួច ចំរើន អភិបាលខេត្តព្រះសីហនុ បានស្វាគមន៍ប្រតិភូមកកាន់ខេត្តព្រះសីហនុ ព្រមទាំងបានជម្រាបជូនពីកត្តាភូមិសាស្ត្រ ខេត្តព្រះសីហនុ មានកោះ ៣២ ឆ្នេរសមុទ្រប្រវែង ១៧៥គីឡូម៉ែត្រ ខេត្តមានក្រុងពីរ និងស្រុក៣ ស្មើនឹង២៩ឃុំ-សង្កាត់។

លោកបានរំលឹកថា ក្រោយពីកម្ពុជាទទួលបានឯករាជ្យ សហរដ្ឋអាមេរិកបានជួយកសាងផ្លូវជាតិលេខ៤ តភ្ជាប់ទៅកាន់រាជធានីភ្នំពេញ ធ្វើឱ្យគេស្គាល់ខេត្តព្រះសីហនុ មានកំពង់ផែអន្តរជាតិទឹកជ្រៅ។ បច្ចុប្បន្នរាជរដ្ឋាភិបាលជប៉ុន ជួយគាំទ្រការសាងសង់ពង្រីកកំពង់ ផែក្រុងព្រះសីហនុ ពីមុនមានជំរៅទឹក៩,៥០ម៉ែត្រ។ រដ្ឋាភិបាលជប៉ុនជួយសាងសង់ជំហានទី១ មានជំរៅទឹក១៣ម៉ែត្រ និងបន្តសាងសង់ជំហានទី២ និងទី៣មានជំរៅទឹករហូត១៥ម៉ែត្រ អាចឱ្យនាវានៅលើពិភពលោក៩៧ភាគរយ ចូលចតធ្វើឱ្យតម្លៃដឹកជញ្ជូនតាមផ្លូវទឹកមានការថយចុះ៕

អន្តរក្រសួងគាំទ្រដល់ការបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ

ដោយៈគង់ សូរិយា

ភ្នំពេញៈ ក្រុមមន្រ្តីជាន់ខ្ពស់មកពីបណ្តាក្រសួងពាក់ព័ន្ឋបានគាំទ្រដល់ការបង្កើតតំបន់បេតិកភ័ណ្ឌធម្មជាតិ និងវប្បធ៌មប្រវត្តិសាស្រ្ត នគរភ្នំឈើកាច់បាភ្នំ។

កិច្ចប្រជុំនេះបានធ្វើឡើងកាលពីថ្ងៃទី២០ មេសាកន្លងមកនេះ ក្រោម​ការដឹកនាំដោយលោក សាយ សំអាល់ រដ្ឋមន្ត្រីក្រសួងបរិស្ថាន ដើម្បីពិភា​ក្សាស្តីពី ការសិក្សាកំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ ស្ថិតនៅក្នុងឃុំជើងភ្នំ និងឃុំឈើកាច់ ស្រុកបាភ្នំ ខេត្តព្រៃវែង។

កិច្ចប្រជុំនេះមានការអញ្ជើញចូលរួម ពីតំណាងក្រសួងវប្បធម៌ និងវិចិត្រសិល្បៈ ក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដីនគរូបនីយកម្ម និងសំណង់ ក្រសួងកសិកម្ម ក្រសួងរ៉ែ និងថាមពល ក្រសួងទេសចរណ៍ និងតំណាងរដ្ឋបាលខេត្តព្រៃវែង។ កិច្ចប្រជុំបានធ្វើឡើងនាទីស្តីការក្រសួងបរិស្ថាន។

ក្រុមមន្រ្តីអន្តរក្រសួងបានគាំទ្រចំពោះការសិក្សា កំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ ដែលជាទីតាំងដ៏សំខាន់នៅក្នុងប្រវត្តិសាស្ត្រនៃ នគរគោកធ្លក ឬនគរភ្នំ ដើមកំណើតទឹកដីនៃព្រះរាជាណាចក្រកម្ពុជា។

អង្គប្រជុំបានឯកភាពជូនក្រុមការងារអន្តរក្រសួង ស្ថាប័នពាក់ព័ន្ធចុះពិនិត្យ សិក្សាចុងក្រោយលើទីតាំងជាក់ស្ដែង និងកំណត់តំបន់គ្រប់គ្រង ព្រមទាំងដោះស្រាយផលប៉ះពាល់នានា មុននឹងក្រសួងបរិស្ថាន និងក្រសួងវប្បធម៌ និងវិចិត្រសិល្បៈ ស្នើសុំការសម្រេចពីប្រមុខរាជរដ្ឋាភិបាល លើការបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ៕

Plans for New York’s largest ‘all-electric’ skyscraper unveiled

USA: American banking giant JPMorgan Chase has unveiled plans for its new global headquarters: a 60-story skyscraper powered entirely by renewable energy.
Set to complete in 2025, the 1,388-foot-tall tower will become New York’s largest “all-electric” building, according to Foster + Partners, the architects behind the design.

A series of digital renderings, released last week, show the tower’s stepped form soaring over Midtown Manhattan. In a joint press release, JPMorgan Chase and Foster + Partners said the skyscraper will achieve “net zero operational emissions” — in part, by using power from a state hydroelectric plant.

Other energy-efficient design features include triple-glazed windows and systems for storing and reusing water that can reduce usage by 40%. The tower will also make use of “intelligent building technology” by employing sensors to monitor and reduce energy consumption.

Construction work has already commenced at the site, which was once home to the 708-foot Union Carbide Building. The architects say that 97% of the building materials from the tower’s predecessor will be “recycled, reused or upcycled.” The new design also promises more than double the amount of ground-level outdoor space at the address, complete with a public plaza and widened sidewalks.

Foster + Partners’ founder, the celebrated British architect Norman Foster, said in a statement that the tower was a “new landmark that responds to its historic location.”

“The unique design rises to the challenge of respecting the rhythm and distinctive streetscape of Park Avenue, while accommodating the vital transport infrastructure of the city below,” he is quoted as saying. “The result is an elegant solution where the architecture is the structure, and the structure is the architecture, embracing a new vision that will serve JPMorgan Chase now and well into the future.”

The unveiling comes just months after former New York Mayor Bill de Blasio passed a law restricting the use of fossil fuels in all new residential and commercial buildings from next year. The legislation requires that all new buildings in the city are constructed to be fully electric by 2027.

New York legislators are meanwhile considering new state-wide rules through the proposed All-Electric Buildings Act. The bill was introduced in 2021 by New York State senator Brian Kavanagh and assembly member Emily Gallagher, who say it will cut the state’s carbon emissions by millions of tons while ensuring low-income residents can access affordable power.

According to city officials, an estimated 70% of New York’s greenhouse emissions come from buildings.

Amid reports of an exodus from New York City during the pandemic, JPMorgan Chase also appears to be putting its weight behind in-person work: The new tower can house up to 14,000 employees across 2.5 million square feet of floor space — four times the capacity of the old Union Carbide Building.

Source: CNN

ក្រុងញូវយ៉កសាងសង់អគារឆ្លាតវៃធំនិងខ្ពស់បំផុតដែល”ប្រើថាមពលកកើតឡើងវិញសុទ្ធសាធ”

ដោយ៖ សុខុម

ញូវយ៉ក: ធនាគារខ្នាតយក្សរបស់អាមេរិក JPMorgan Chase បានបញ្ចេញប្លង់អគារការិយាល័យកណ្ដាលថ្មីដ៏អស្ចារ្យរបស់ខ្លួន នោះគឺអគារកប់ពពកឆ្លាតវៃកម្ពស់៦០ជាន់ដែលប្រើថាមពលកកើតឡើងវិញសុទ្ធសាធ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃអង្គារ ទី១៩ ខែមេសា។

ក្រុមហ៊ុនស្ថាបត្យកម្មអង់គ្លេស Foster + Partners ដែលជាអ្នកពីក្រោយប្លង់ស្ថាបត្យកម្មនេះនិយាយថា អគារកប់ពពកខាងលើនេះមានកម្ពស់៤២៣ម៉ែត្រនេះ ហើយនៅពេលដំណើរការសាងសង់បញ្ចប់ជាស្ថាពរនៅក្នុងឆ្នាំ២០២៥ តាមការគ្រោងទុក វានឹងក្លាយជាអគារ “ប្រើថាមពលកកើតឡើងវិញសុទ្ធសាធ” ធំបំផុត និងខ្ពស់បំផុតប្រចាំក្រុងញូវយ៉ក។

ធនាគារ JPMorgan Chase និងក្រុមហ៊ុនស្ថាបត្យកម្ម Foster + Partners បានចេញសេចក្ដីប្រកាសព័ត៌មានរួមថា អគារកប់ពពកដែលស្ថិតនៅក្នុងសង្កាត់ Manhattan ក្រុងញូវយ៉ក នេះនឹង “ដំណើរការដោយមិនបំភាយឧស្ម័នចូលទៅក្នុងបរិយាកាសទាំងស្រុង” ដោយមួយអន្លើតាមរយៈការប្រើប្រាស់ថាមពលពីរោងចក្រវារីអគ្គសនីរដ្ឋ។

លក្ខណៈពិសេសផ្សេងៗទៀតនៃការរចនាប្លង់ស្ថាបត្យកម្មដែលសន្សំសំចៃថាមពលនេះរួមមាន បង្អួចកញ្ចក់៣ស្រទាប់ និងប្រព័ន្ធសម្រាប់រក្សាទុក និងប្រើប្រាស់ទឹកឡើងវិញដែលអាចកាត់បន្ថយការប្រើប្រាស់បានដល់ទៅ៤០%ផងដែរ។ ទន្ទឹមនេះអគារនេះក៏នឹងប្រើ “បច្ចេកវិទ្យាអគារឆ្លាតវៃ” (Intelligent Building Technology) ផងដែរ ដោយប្រើប្រព័ន្ធស៊ិនស័រដើម្បីត្រួតពិនិត្យ និងកាត់បន្ថយការប្រើប្រាស់ថាមពល។

ការងារសាងសង់អគារដែលមានផ្ទៃជាន់សរុប២៣២,២៥៧ម៉ែត្រការ៉េនេះបានចាប់ផ្តើមហើយ ហើយវាមានសមត្ថភាពផ្ទុកអ្នកធ្វើការបានរហូតដល់ទៅ១៤.០០០នាក់។ ទោះជាយ៉ាងណា គ្មានការបញ្ជាក់អំពីតម្លៃអគារនេះទេ។

ការបញ្ចេញប្លង់អគារដ៏អស្ចារ្យនេះធ្វើឡើងប៉ុន្មានខែក្រោយពីចៅហ្វាយក្រុងញូវយ៉ក លោក Bill de Blasio បានអនុម័តវិធានរឹតបន្តឹងការប្រើប្រាស់ឥន្ធនៈផូស៊ីលនៅក្នុងគ្រប់អគារលំនៅដ្ឋាន និងអគារពាណិជ្ជកម្មថ្មីៗទាំងអស់ចាប់ពីឆ្នាំក្រោយទៅ។

វិធាននេះតម្រូវការឱ្យអគារថ្មីៗទាំងអស់នៅក្នុងទីក្រុងញូវយ៉ក ត្រូវសាងសង់ឡើងដោយប្រើថាមពលកកើតឡើងវិញសុទ្ធសាធនៅត្រឹមឆ្នាំ២០២៧៕

អ្នកជំនាញ៖ និន្នាការទិញទំនិញតាមផ្សារប្រពៃណីនៅតែខ្ពស់ ស្របពេលការអភិវឌ្ឍផ្សារទំនើបកាន់តែច្រើន

ដោយ៖ វឌ្ឍនៈ

ភ្នំពេញ ៖ ការអភិវឌ្ឍផ្សារទំនើបក្នុងប្រទេសកម្ពុជា ជាពិសេសនៅរាជធានីភ្នំពេញ កាន់តែមានចំនួនច្រើនឡើងៗ ជាពិសេសទៅកាន់តំបន់ដែលមានសក្ដានុពល និងមានប្រជាជនរស់នៅច្រើន។

ការអភិវឌ្ឍផ្សារទំនើបកាន់តែច្រើននេះដែរ ត្រូវបានគិតថានឹងអាចកាត់បន្ថយសកម្មភាពផ្សារប្រពៃណី ដូចជា ផ្សារដើមគរ ទួលទំពូង ជាដើម ប៉ុន្តែជាក់ស្ដែង ផ្សារទាំងនោះនៅតែមានដំណើរការល្អដដែល ទោះបីមានផ្សារទំនើបច្រើនជាងមុនក្ដី។

អ្នកនាង ជិន ច័ន្ទដាលុច្ស អ្នកគ្រប់គ្រងផ្នែកវាយតម្លៃ នៃក្រុមហ៊ុនអចលនទ្រព្យ CBRE Cambodia បានលើកឡើងថា មកដល់ពេលនេះ ផ្សារទំនើបជាច្រើនបានរីកដុះដាល តាំងពីនៅកណ្ដាលក្រុង រហូតដល់តំបន់ជាយក្រុងមួយចំនួន មានទាំងផ្សារទំនើបនាំចូលពីបរទេស និងផ្សារទំនើបបង្កើតក្នុងស្រុកផងដែរ។

យ៉ាងណាក្ដី ទោះជាផ្សារទំនើបទាំងនេះបានរីកចម្រើនខ្លាំងនៅក្នុងប្រទេសកម្ពុជាក្ដី ក៏មិនអាចស្រូបទាញអតិថិជនទាំងស្រុង ឬអាចបន្ថយសកម្មភាពអាជីវកម្មរបស់ផ្សារប្រពៃណី ក្នុងរាជធានីភ្នំពេញបានដែរ។

អ្នកនាងបន្តថា “ផ្សារប្រពៃណីមួយចំនួន ដូចជា អូរឬស្សី អូរឡាំពិក និងផ្សារប្រពៃណីមួយចំនួនទៀត មិនត្រឹមតែផ្គត់ផ្គង់ដល់អតិថិជនក្នុងរាជធានីភ្នំពេញប៉ុណ្ណោះ តែក៏ជាផ្សារដែលផ្គត់ផ្គង់ទៅបណ្ដាខេត្តនានាទូទាំងប្រទេសដូច្នេះហើយទើបធ្វើឱ្យផ្សារប្រពៃណីទាំងនោះនៅតែដំណើរការល្អដដែល។ ម្យ៉ាងទៀត ប្រជាជននៅរាជធានីភ្នំពេញ ទាំងអស់ក៏មិនមែនសុទ្ធតែទិញទំនិញពីផ្សារទំនើបមកប្រើប្រាស់ទេ ភាគច្រើនអ្នកដើរចូលផ្សារទំនើបៗ គ្រាន់តែជាការដើរមើលនិងកម្សាន្ត ដូច្នេះពួកគាត់ត្រូវការទិញទំនិញនានានៅតែរកនៅតាមផ្សារប្រពៃណីដដែល”។

អ្នកនាងបញ្ជាក់ថា ការអភិវឌ្ឍផ្សារទំនើបនៅក្នុងប្រទេសកម្ពុជា ជាពិសេសនៅរាជធានីភ្នំពេញ ហាក់ដូចជាលើសពីតម្រូវការជាក់ស្ដែង ហើយបើក្រលេកទៅមើលអ្នកវិនិយោគលើផ្សារទំនើបវិញក៏មិនមានគម្រោងថ្មីៗត្រូវអភិវឌ្ឍន៍ឡើយ តែគម្រោងដែលកំពុងសាងសង់អាចនឹងបន្តការផ្គត់ផ្គង់។

អ្នកនាងថា ”ក្នុងឆ្នាំ២០១៩ ទីធ្លាជួលអាជីវកម្មក្នុងផ្សារទំនើបហាក់មានតម្រូវការខ្ពស់ ក្នុងរង្វង់៧០ភាគរយនៃទំហំដែលមាន តែចូលដល់ឆ្នាំ២០២០ និង២០២១ ទំហំជួលអាជីវកម្មក្នុងផ្សារទំនើបបានថមថយវិញ ក្នុងរង្វង់ត្រឹម៦០ភាគរយ និងបន្តធា្លក់ចុះ ឬក៏នៅទ្រឹងក្នុងឆ្នាំ២០២២នេះ” ។

អ្នកស្រី អាន សុធីតា អគ្គនាយិកាក្រុមហ៊ុន PropNex Cambodia ក៏បានលើកឡើងដែរថា ផ្សារទាំងពីរនេះមានការរៀបចំនិងផ្ដល់សេវាផ្សេងគ្នា។ ផ្សារទំនើបមានការរៀបចំនូវទីតាំងកន្លែងលក់ដូរបែងចែកដាច់ពីគ្នា ហើយអតិថិជនក៏ផ្សេងគ្នាដែរ ដូច្នេះផ្សារទំនើបនិងផ្សារបែបប្រពៃណីមិនអាចមានការប្រកួតប្រជែងគ្នាបានទេ។

អ្នកស្រីបន្តថា នៅពេលអនាគត ផ្សារបែបប្រពៃណីក៏នឹងត្រូវរៀបចំកែលម្អទីតាំងកន្លែងលក់ដូរ ស្អាតជាងពេលបច្ចុប្បន្ននេះដែរ ដើម្បីឱ្យអតិថិជនកាន់តែច្រើន៕

សម្តេចតេជោ៖ អ្នកឧញ៉ាលីយ៉ុងផាត់នឹងសាងសង់ស្ពានបេតុងមួយតភ្ជាប់កោះយ៉ទៅបាក់ខ្លងខេត្តកោះកុង

ដោយ៖ សុផារី

ភ្នំពេញ: សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា មានប្រសាសន៍ថា ប្រទេសកម្ពុជា នឹងសាងសង់ស្ពានបេតុងថ្មីមួយ ជំនួសស្ពានដែក ដើម្បីតភ្ជាប់ពីកោះយ៉ទៅកាន់តំបន់បាក់ខ្លងខេត្តកោះកុង។

នៅក្នុងពិធីសម្ពោធសមិទ្ធផលនានាដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃទី២០ ខែមេសា ឆ្នាំ២០២២នេះ សម្តេចតេជោ ហ៊ុន សែន បានលើកឡើងថា ដើម្បីប្រែក្លាយតំបន់បាក់ខ្លង ខេត្តកោះកុង ជាតំបន់ទាក់ទាញមួយ តាមរយៈស្ពានបេតុងជាង ១០០ម៉ែត្រមួយនឹងត្រូវបានសាងសង់ដោយអ្នកឧញ៉ាលីយ៉ុងផាត់ជាអ្នកចេញថវិកាផ្ទាល់។

សម្តេចតេជោ ហ៊ុន សែន “ព្រែករបស់យើងមានច្រើនណាស់ អញ្ចឹងយើងបង្គើតឱ្យមានស្ពានបេតុង យ៉ាងហោចណាស់ស្ពានបាឡរដែរ។ អ្នកនៅខាងកោះកុងបានសូមកសាងស្ពានពីកោះយ៉ទៅកាន់ ដែលកាលពីមុនខ្ញុំកសាងស្ពានឱ្យ ជាស្ពានដែក”។

សម្តេចតេជោ ហ៊ុន សែន បន្តថា “ខ្ញុំប្រកាសពីទីនេះប្រាប់ថា យើងហ្នឹងផ្តល់ស្ពានបេតុងជំនួសវិញ អ្នកចេញថវិការសាងសង់ គឺអ្នកឧញ៉ាលីយ៉ុងផាត់ ព្រោះស្ពានដែកនេះរអិលពេលមានភ្លៀងធ្លាក់ ធ្វើឱ្យគ្រោះថ្នាក់។ ហើយតំបន់នោះ ក្លាយជាតំបន់ទាក់ទាញមួយតភ្ជាប់ ពីកោះយ៉ទៅបាក់ខ្លងនៅខេត្តកោះកុង ពីមុនយើងធ្វើស្ពានដែក។ ពេលនេះ នឹងធ្វើស្ពានជូនពលរដ្ឋ ដូចជាជាង ១០០ម៉ែត្រ ធ្វើស្ពានឱ្យបានល្អ”។

បើតាមការលើកឡើងរបស់សម្តេច ការកសាងនេះជាការកសាង ក្រោមការខិតខំប្រឹងប្រែងរបស់រាជរដ្ឋាភិបាល ដោយការប្រើប្រាស់នូវទុនផ្ទាល់ និងការស្វះស្វែងរកទុនវិនិយោគពីបរទេសមក។

ឆ្នេរបាក់ខ្លង ដែលស្ថិតនៅក្នុងដែនរដ្ឋបាល ឃុំមណ្ឌលសីមា ស្រុកមណ្ឌលសីមា ខេត្តកោះកុង ជារមណីយដ្ឋានទេសចរណ៍បែបធម្មជាតិ មានចំងាយប្រមាណជា៨គីឡូម៉ែត្រពីទីរួមខេត្តកោះកុង សម្រាប់លំហែកម្សាន្ត មានឆ្នេរខ្សាច់ស្រស់ស្អាត ស្រូបខ្យល់បរិសុទ្ធ ស្តាច់សំលេងទឹកសមុទ្របាន៕

សម្តេចតេជោ៖ ការតភ្ជាប់ហេដ្ឋារចនាសម្ព័ន្ធធ្វើឱ្យប្រជាពលរដ្ឋមិនចាំបាច់ធ្វើដំណើរបកក្រោយ

ដោយ៖ សុផារី

ភ្នំពេញ: សម្តេចតេជោហ៊ុនសែន នាយករដ្ឋមន្ត្រីនៃកម្ពុជា បានថ្លែងថា ហេដ្ឋារចនាសម្ព័ន្ធគឺជាអាទិភាពមួយ ក្នុងការកសាងអភិវឌ្ឍន៍របស់រាជរដ្ឋាភិបាលកម្ពុជា ដែលការតភ្ជាប់ហេដ្ឋារចនាសម្ព័ន្ធធ្វើឱ្យប្រជាពលរដ្ឋមិនចាំបាច់ធ្វើដំណើរបកក្រោយឡើយ។

នៅក្នុងពិធីសម្ពោធសមិទ្ធផលនានាដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃទី២០ ខែមេសា ឆ្នាំ២០២២នេះ សម្តេចតេជោ គូសបញ្ជាក់ថា ការតភ្ជាប់ហេដ្ឋារចនាសម្ព័ន្ធធ្វើឱ្យប្រជាពលរដ្ឋមិនចាំបាច់ធ្វើដំណើរបកក្រោយឡើយ។

សម្តេចបានមានប្រសាសន៍ថា “ធ្លាប់តែឆ្លងសាឡាងនៅព្រែកក្តាម ឥលូវមិនឆ្លងទៀតទេ ព្រែកតាមាក់ក៏លែងឆ្លង កំពង់ចាម-ទន្លេបិទ អ្នកលឿង ក្រូចឆ្មារ-ស្ទឹងត្រង់ លែងឆ្លងសាឡាងទៀតហើយ”។

សម្តេចតេជោមានប្រសាសន៍បន្តថា “ការតភ្ជាប់របៀបរបស់យើងធ្វើឱ្យប្រជាពលរដ្ឋយើងធ្វើដំណើរ ដោយមិនចាំបាច់ធ្វើដំណើរបកក្រោយ។ ឡើងទៅលេងរតនគិរី មណ្ឌលគិរី ស្ទឹងត្រែងហើយ បង្ហួសទៅកាន់ព្រះវិហារតាមផ្លូវជាតិលេខ៩បាត់។ អញ្ចឹងកត្តា ដែលយើងខំវិនិយោគដោយខ្លួនឯង រកទុនពីបរទេស មកដើម្បីធ្វើផ្លូវធ្វើស្ពាន បានសម្រួលដល់ប្រជាពលរដ្ឋ”។

សម្តេចថ្លែងបន្តថា “ពីមុនមានឡានធ្វើដំណើរពិតមែន ប៉ុន្តែមិនអាចធ្វើដំណើរទៅរួច ដោយសារអត់មានសាឡាងឆ្លង អត់មានស្ពាន ត្រូវឆ្លងសាឡាង ឬមិនមានស្ពាន។ អញ្ចឹងយើងខិតខំប្រឹងប្រែងបង្កើតឱ្យមានស្ពាន យ៉ាងហោចណាស់ក៏មានស្ពានបាឡេដែរ”៕

សម្តេចតេជោ៖ កត្តា៦យ៉ាងផ្តល់លទ្ធភាពឱ្យប្រជាពលរដ្ឋលេងកម្សាន្តសប្បាយក្នុងឱកាសបុណ្យចូលឆ្នាំថ្មី ឆ្នាំ២០២២

ដោយ៖ សុផារី

ភ្នំពេញ៖ សម្តេចតេជោ ហ៊ុន សែន បានថ្លែងថា មានកត្តា៦យ៉ាង ដែលផ្តល់លទ្ធភាពឱ្យប្រជាពលរដ្ឋលេងកម្សាន្តសប្បាយក្នុងឱកាសបុណ្យចូលឆ្នាំថ្មី។

កត្តាទាំងនោះរួមមាន សុខសន្តិភាព ការតភ្ជាប់ហេដ្ឋារចនាសម្ព័ន្ធ មានមធ្យោបាយធ្វើដំណើរកាន់តែច្រើន ប្រាក់ចំណូល ការកើតឡើងថ្មីនៃតំបន់ទេសចរណ៍ និងការមានភាពសាំសហគមន៍ដែលបានពីការចាក់វ៉ាក់សាំងបង្ការជំងឺកូវីដ១៩។

សម្តេចបានថ្លែងដូច្នេះ នៅក្នុងពិធីសម្ពោធសមិទ្ធផលនានាដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃទី២០ ខែមេសា ឆ្នាំ២០២២នេះ។

សម្តេចតេជោ ហ៊ុន សែន បានលើកឡើងថា ទី១ សុខសន្តិភាព ដែលជាកត្តាសំខាន់បំផុត “ប្រសិនបើគ្មានសន្តិភាពទេ កុំសង្ឈឹមថាះអ្នកអាចទៅលេងនៅឯណាបាន កុំនិយាយពីសិទ្ធិមនុស្ស និយាយពីប្រជាធិបតេយ្យ”។ នៅថ្ងៃ១៧ ខែមេសា កាលពី៤៧ឆ្នាំមុន ប្រជាជនកម្ពុជានាំគ្នាសំរុកចេញពីទីក្រុង ឯ៤៨ឆ្នាំក្រោយ ប្រជាជនសំរុកចូលទីក្រុងភ្នំពេញវិញ ដោយសារតែគាត់វិលត្រឡប់ពីការដើរកំសាន្តសប្បាយ នៅតាមបណ្ដាខេត្តនានា។

ទី២ ការតភ្ជាប់ហេដ្ឋារចនាសម្ព័ន្ធ ដែលមានផ្លូវ មានស្ពាន ដើម្បីងាយស្រួលធ្វើដំណើរពីតំបន់មួយទៅតំបន់មួយ។ ហេដ្ឋារចនាសម្ព័ន្ធគឺជាអាទិភាពមួយ ក្នុងការកសាងអភិវឌ្ឍន៍របស់រាជរដ្ឋាភិបាលកម្ពុជា ដែលការតភ្ជាប់ហេដ្ឋារចនាសម្ព័ន្ធធ្វើឱ្យប្រជាពលរដ្ឋមិនចាំបាច់ធ្វើដំណើរបកក្រោយឡើយ។

ទី៣ មធ្យោបាយធ្វើដំណើរកាន់តែច្រើន ដែលប្រជាពលរដ្ឋខ្លះ មានឡាន មានម៉ូតូផ្ទាល់ខ្លួន ហើយក្រៅពីនោះ ក៏មានរថយន្តឈ្នួល រថយន្តតាក់ស៊ី អាចធ្វើដំណើរពីកន្លែងមួយទៅកន្លែងមួយដោយងាយស្រួល។

ទី៤ ប្រាក់ចំណូល៖ បើទោះបីជាជំងឺកូវីដ-១៩ បានវាយប្រហារក្តី ប្រាក់ចំណូលរបស់ប្រជាពលរដ្ឋ ប្រាក់ត្រូវបានផ្ទេរពីវណ្ណៈកណ្ដាល ទៅប្រជាពលរដ្ឋក្រីក្រយ៉ាងច្រើន តាមរយៈការដើរកំសាន្ត ហើយពួកគាត់ទិញសម្ភារៈប្រើប្រាស់ ទិញចំណីអាហារបរិភោគជាដើម។

សម្តេចតេជោ ហ៊ុន សែន បន្ថែមថា”យើងគិតជាមធ្យមភាគ តម្លៃសាំង តម្លៃទទួលទាន តម្លៃស្នាក់នៅ៣ថ្ងៃនេះ អញ្ចឹងមានការផ្ទេរប្រាក់ ពីវណ្ណៈអ្នកមាន ទៅកាន់អ្នកក្រីក្រ នៅតាមជនបទមានចំនួនច្រើន ដែលធ្វើឱ្យចរន្តសេដ្ឋកិច្ចរបស់យើង មានចំនួនវិល ហើយពលរដ្ឋទទួលបានថវិការទាំងនោះ”។

ទី៥ ការកើតឡើងថ្មីនៃតំបន់ទេសចរណ៍៖ សម្តេចតេជោថ្លែងឱ្យក្រសួងពាក់ព័ន្ធ រួមមាន ក្រសួងទេសចរណ៍ និងក្រសួងបរិស្ថាន ពង្រីកសហគមន៍ទេសចរណ៍ផ្សារភ្ជាប់ទឹកដី ឱ្យបានគ្រប់ទីកន្លែង ដើម្បីទាក់ទាញភ្ញៀវទេសចរ ក្នុងគោលដៅរួមចំណែកផ្តល់ចំណូលដល់ពលរដ្ឋមូលដ្ឋាន។

សម្តេចតេជោ ថ្លែងក្នុងសម្តីដើមដូច្នេះ ”ធ្វើម៉េចឱ្យប្រជាពលរដ្ឋរបស់យើង ធ្វើទេសចរដែលផ្សារភ្ជាប់ជាមួយទឹកដី ការស្រឡាញ់បរិស្ថាន ហើយប្រើប្រាស់បរិស្ថាននេះ ដើម្បីទាក់ទាញយកលុយ ជាជាងកាប់ឈើ ជាជាងបាញ់សត្វ ដែលវាធ្វើឱ្យហិនហោចទៅដល់បរិស្ថាន”។

កត្តាទី៦ ការមានភាពស៊ាំសហគមន៍ដែលបានពីការចាក់វ៉ាក់សាំងបង្ការជំងឺកូវីដ១៩៖ សម្តេចតេជោ ហ៊ុន សែន បានថ្លែងថា ការចាក់វ៉ាក់សាំងបើចាក់ពាសវាលពាសកាល មិនអាចបង្កើតភាពស៊ាំ សហគមន៍បាននោះឡើយ។ បើភាពស៊ាំក្នុងសហគមន៍កាន់តែរឹងមាំ នោះពលរដ្ឋមិនចាំបាច់ពាក់ម៉ាស់ទេ៕

ផ្សារទំនើបបោះដុំនិងរាយកាន់តែច្រើនបោះទីតាំងនៅក្នុងខណ្ឌសែនសុខ

     ដោយៈវឌ្ឍនៈ

ភ្នំពេញៈ សែនសុខត្រូវបានចាត់ទុកជាតំបន់ ដែលមានការទាក់ទាញ ទៅលើតំបន់ពាណិជ្ជកម្មមួយ នៅក្នុងចំណោមតំបន់នានានៃរាជធានីភ្នំពេញ ហើយបច្ចុប្បន្ននេះផ្សារទំនើបបោះដុំ និងរាយកាន់តែច្រើនបានបោះទីតាំងនៅក្នុងតំបន់ខណ្ឌសែនសុខនៃរាជធានីភ្នំពេញ។

បើតាមការសិក្សាស្រាវជ្រាវ របស់ក្រុមហ៊ុនអចលនទ្រព្យមួយបានបង្ហើបឱ្យដឹងថា តំបន់សែនសុខ គឺជាតំបន់ដែលមានការទាក់ទាញលើការអភិវឌ្ឍលំនៅឋាន និងទាក់ទាញអ្នកមានកម្រិតជីវភាព ថ្នាក់កណ្ដាលឡើងទៅច្រើន ដែលធ្វើឱ្យមានការផ្គត់ផ្គង់ទំនិញនិងផ្សារទំនើបៗកាន់តែច្រើន ។

អ្នកនាងជិន ច័ន្ទដាលុច្ស ប្រធានគ្រប់គ្រងផ្នែកវាយតម្លៃ នៃក្រុមហ៊ុនអចលនទ្រព្យCBRE Cambodia បានមានប្រសាសន៍តាមទូរសព្ទនៅព្រឹកថ្ងៃទី២០មេសា ២០២២នេះឱ្យដឹងថា នៅតំបន់ខណ្ឌសែនសុខយើងបានមើលឃើញថា មានផ្សារទំនើបៗទាំងក្នុងស្រុក និងបរទេសជាច្រើន ដូចជាផ្សារទំនើបអ៊ីអនម៉លសែនសុខ ផ្សារទំនើប ម៉ាក្រូ គ្លូប៊លហៅស៍ ផ្សារទំនើបក្នុងស្រុកជីបម៉ុង និងផ្សារទំនើបៗតូចៗជាច្រើនទៀត ។

អ្នកនាងបន្តថា “កត្តាដែលធ្វើឱ្យខណ្ឌសែនសុខ ទាក់ទាញនូវផ្សារទំនើបៗទាំងនេះ ដោយសារតែតំបន់មួយនេះ មានប្រជាពលរដ្ឋដែលមានជីវភាពថ្នាក់កណ្ដាលឡើងកាន់តែច្រើន ទើបធ្វើឱ្យការផ្គត់ផ្គង់ទំនិញសម្រាប់ប្រជាពលរដ្ឋកម្រិតនេះ ក៏កាន់តែច្រើនដែរ ហើយដូចយើងបានឃើញស្រាប់បុរីលំនៅឋានតម្លៃខ្ពស់ៗជាច្រើន គម្រោងក៏មានទីតាំងនៅតំបន់ខណ្ឌសែនសុខនៃរាជធានីភ្នំពេញ”។

យ៉ាងណាក្ដីអ្នកនាងដាលុច្សបានលើកឡើងថា រហូតមកដល់ពេលនេះយើងបានមើលឃើញថា ផ្សារទំនើបៗនៅក្នុងតំបន់សែនសុខ មានច្រើនហើយ ដូច្នេះនៅពេលអនាគត នឹងមិនមានគម្រោងផ្សារទំនើបថ្មី វិនិយោគនៅតំបន់នោះទៀតឡើង លើកលែងតែផ្សារទំនើបដែលមានគម្រោងអភិវឌ្ឍន៍រួចហើយ និងផ្សារទំនើបកំពុងសាងសង់ ។

អ្នកឧកញ៉ា ពុងឃាវសែ ប្រធានក្រុមប្រឹក្សាភិបាលនៃក្រុមហ៊ុនOCIC បានលើកឡើងនាពេលកន្លងមកថា កម្រិតនៃជីវភាពរបស់ប្រជាពលរដ្ឋកម្ពុជាមានកំណើនឡើង បានធ្វើឱ្យមានការផ្គត់ផ្គង់ផ្សារទំនើបកាន់​តែច្រើន ហើយប្រជាពលរដ្ឋដែលមានជីវភាពធូរធា និងធ្លាប់ធ្វើដំណើរទៅក្រៅប្រទេសទិញទំនិញនៅផ្សារទំនើបក្រៅប្រទេស ក៏អាចដើរផ្សារទំនើបក្នុងស្រុកយើងបានដែរ ។

អ្នកឧកញ៉ាបានលើកឡើងថា ផ្សារទំនើបៗដែលមានការអភិវឌ្ឍបែបនេះ វានឹងអាចវាយលុកផ្សារប្រពៃណីយើងបានផងដែរ ដូចជាផ្សារអូរឬស្សី ផ្សារអូរឡាំពិក ផ្សារទួលទំពូង និងផ្សារប្រពៃណីជាច្រើនទៀត ដូច្នេះផ្សារប្រពៃណីទាំងនោះត្រូវការធ្វើទំនើបកម្ម និងកែលម្អដើម្បីទាក់ទាញអតិថិជនឡើងវិញ៕