ឥណ្ឌាគ្រោងភ្ជាប់ជើងហោះហើរត្រង់មកកាន់កម្ពុជា

ដោយ: ម៉ាលីស

ព្រះសីហនុ: នៅថ្ងៃទី៣ ខែមីនា ឆ្នាំ២០២២ ក្នុងកិច្ចពិភាក្សាការងារ និងជួបសំដែងការគួរសម រវាង លោកស្រីបណ្ឌិត Devyani Uttam Khobragade ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌាប្រចាំព្រះរាជាណាចក្រកម្ពុជា និងលោក គួច ចំរើន អភិបាល នៃគណៈអភិបាលខេត្តព្រះសីហនុ លោកស្រីបណ្ឌិតបានលើកឡើងពីគោលបំណងចង់ឱ្យមានជើងហោះហើរត្រង់ពីឥណ្ឌាមកកាន់កម្ពុជា។

ក្នុងឱកាសនោះលោក គួច ចំរើន អភិបាលខេត្តព្រះសីហនុ បានជម្រាបជូនលោស្រីបណ្ឌិត ឯកអគ្គរដ្ឋទូតឥណ្ឌា ពីសក្តានុពលខេត្តព្រះសីហនុ ដែលត្រូវរាជរដ្ឋាភិបាលកម្ពុជា កំណត់ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនិរតី ដោយប្រើប្រាស់សក្តានុពលពីធម្មជាតិបង្កើនកំណើនសេដ្ឋកិច្ចជាតិ។

ទន្ទឹមនោះរាជរដ្ឋាភិបាលបានធ្វើការអភិវឌ្ឍ និងវិនិយោគនៅខេត្តព្រះសីហនុជាបន្តបន្ទាប់មានដូចជាកំពង់ផែសមុទ្រទឹកជ្រៅ។ ខេត្តមានអាកាសយានដ្ឋានអន្តរជាតិ ត្រូវបានពង្រីកផ្លូវរត់ប្រវែង ៣,៣០០ម៉ែត្រ។

ខេត្តព្រះសីហនុមានផ្លូវល្បឿនលឿនដំបូងគេនៅកម្ពុជា តភ្ជាប់ពីរាជ ធានីភ្នំពេញ មកកាន់ខេត្តព្រះសីហនុ នឹងបើកឱ្យដំណើរការនៅខែ៧ ឆ្នាំ២០២២ ខាងមុខនេះ។

កន្លងមកខេត្តព្រះសីហនុ ទទួលនាវាកងទ័ពជើងទឹកនៃសាធារណរដ្ឋឥណ្ឌាចូលចតជាបន្តបន្ទាប់មានចំនួន ១១លើក ស្មើនឹង១៦គ្រឿង។ ខេត្តព្រះសីហនុមានកោះ៣២ ឆ្នេរខ្សាច់ប្រវែង១៧៥គីឡូម៉ែត្រ និងមានព្រៃកោងកាងតាមបណ្តោយឆ្នេរ ជាសក្តានុពលបម្រើឱ្យវិស័យទេសចរណ៍ និងការវិនិយោគ។

លោកអភិបាលខេត្ត ក៏បានស្នើឱ្យលោកស្រីជួយផ្សព្វផ្សាយ និងជំរុញអ្នកទេសចរ និងអ្នកវិនិយោគឥណ្ឌាមកកាន់កម្ពុជា ពិសេសមកកាន់ខេត្តព្រះសីហនុឱ្យបានកាន់តែច្រើន។

លោកស្រីឯកអគ្គរដ្ឋទូត នៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា បានថ្លែងអំណរគុណលោកអភិបាល ដែលបានអនុញ្ញាតឱ្យលោកជំទាវបានចូលជួបសំដែងការគួរសម និងពិភាក្សាការងារ ព្រមទាំងបានស្វែងយល់ អំពីសក្តានុពល និងការអភិវឌ្ឍរីកចំរើនក្នុងខេត្តព្រះសីហនុផងដែរ។

លោកស្រីឯកអគ្គរដ្ឋទូត បានលើកឡើងពីគោលបំណងចង់ឱ្យមានជើងហោះហើរត្រង់ពីឥណ្ឌាមកកាន់កម្ពុជា ជាពិសេសមកកាន់ខេត្តព្រះសីហនុ ដើម្បីជួយជំរុញអ្នកទេសចរ និងវិនិយោគឥណ្ឌាមកកាន់ខេត្តព្រះសីហនុ។

លោកស្រី ក៏បានលើកឡើងពីការពិភាក្សាដើម្បីរៀបចំចងសម្ព័ន្ធមេត្រីភាពទីក្រុងបងប្អូន(Sister City) រវាងខេត្តព្រះសីហនុ និងខេត្ត Maharashtra នៃរដ្ឋ Mumbai ប្រទេសឥណ្ឌាផងដែរ។ លោកស្រីក៏បានណែនាំអំពីគម្រោងហិរញ្ញប្បទានលើទឹកប្រាក់ចំនួន $50,000 ដែលផ្តល់ដោយស្ថានទូតឥណ្ឌាប្រចាំកម្ពុជា ជាពិសេសផ្តោតលើការសាងសង់បន្ទប់ទឹកដោយប្រើប្រាស់ប្រព័ន្ធសូឡា។

ជាមួយគ្នានេះ លោកស្រីឯកអគ្គរដ្ឋទូត ក៏បានលើកឡើងពីកិច្ចសហប្រតិបត្តិការទៅលើវិស័យមួយចំនួនមានដូចជា៖ Logistic and Shipping, Medical and Health Care, IT, Education ជាដើម។

ក្នុងឱកាសនោះលោកអភិបាលខេត្ត បានថ្លែងអំណរគុណ និងគាំទ្រនូវគម្រោងរបស់លោកជំទាវឯកអគ្គរដ្ឋទូត ដោយឯកឧត្តមបានចាត់ក្រុមការងាររបស់រដ្ឋបាលខេត្ត ចូលរួមសហការជាមួយស្ថានទូតសាធារដ្ឋឥណ្ឌាដើម្បីបំពេញកិច្ចការខាងលើឱ្យបានជោគជ័យ និងសំនូមពរដល់ស្រីឯកអគ្គរដ្ឋទូត ជួយជម្រុញក្រុមហ៊ុនផលិតឱសថរបស់ឥណ្ឌា ឱ្យមកបណ្តាក់ទុនវិនិយោគដោយបង្កើតរោងចក្រផលិតឱសថព្យាបាលជំងឺកូវីដ នៅខេត្តព្រះសីហនុផងដែរ៕

ក្រុមហ៊ុនកាស៊ីណូនៅកម្ពុជា NagaCorp ប្រកាសផ្អាកគម្រោងល្បែង និងរីហ្សតនៅរុស្ស៊ីក្រោយរងសម្ពាធទណ្ឌកម្ម

ដោយៈសុខុម

ភ្នំពេញ: ការឈ្លានពានរបស់រុស្ស៊ី ចូលប្រទេសអ៊ុយក្រែនបានធ្វើឱ្យលោកខាងលិច និងបណ្ដាសម្ព័ន្ធមិត្តថ្កោលទោសយ៉ាងខ្លាំង ឈានទៅដល់ការដាក់ទណ្ឌកម្មផ្ទួនៗយ៉ាងធ្ងន់ធ្ងរទៅរុស្ស៊ី។

សម្ពាធទណ្ឌកម្មទាំងនេះ បានបណ្ដាលឱ្យក្រុមហ៊ុនអន្តរជាតិធំៗ ជាពិសេសក្រុមហ៊ុនលោកខាងលិច សម្រុកចាកចេញពីប្រទេសនេះ ហើយក្នុងនោះ ក៏មានក្រុមហ៊ុនដ៏ល្បីល្បាញមួយដែលកំពុងវិនិយោគ នៅកម្ពុជាផងដែរ។

ក្រុមហ៊ុនប្រតិបត្តិករកាស៊ីណូ និងល្បែងនៅកម្ពុជា NagaCorp Ltd បានប្រកាសកាលពីថ្ងៃព្រហស្បតិ៍ ទី៣ មីនា ថា ខ្លួននឹងផ្អាកគម្រោងហ្គេម និងរីហ្សតរបស់ខ្លួន នៅក្នុងប្រទេសរុស្ស៊ី បន្ទាប់ពីប្រទេសនេះបញ្ឆេះសង្គ្រាមចូលឈ្លានពានប្រទេសអ៊ុយក្រែន។

ក្រុមហ៊ុននេះ បានប្រើប្រាស់ប្រការករណីប្រធានស័ក្ដិ ទាក់ទិននឹងការអភិវឌ្ឍគម្រោងរីហ្សតរបស់ខ្លួន នៅទីក្រុងVladivostokប្រទេសរុស្ស៊ី ហើយបាននិយាយថា ការអភិវឌ្ឍក្នុងគម្រោងនេះ នឹងត្រូវផ្អាកដោយគ្មានកំណត់ ដែលមិនដឹងជាចាប់ផ្ដើមវិញ នៅពេលណាឱ្យប្រាកដឡើយ។

ជាការពិតណាស់ ការឈ្លានពានរបស់រុស្ស៊ី ចូលប្រទេសអ៊ុយក្រែន ត្រូវបានលោកខាងលិច ដាក់ទណ្ឌកម្មយ៉ាងធ្ងន់ធ្ងរ ទៅលើប្រទេសរុស្ស៊ី និងបានជំរុញឱ្យក្រុមហ៊ុនអន្តរជាតិធំៗយ៉ាងច្រើន បានកាត់ផ្ដាច់ទំនាក់ទំនងជាមួយប្រទេសនេះជាបន្តបន្ទាប់ តាមរយៈការលក់ចេញទ្រព្យសកម្មរបស់ខ្លួន ឬ ផ្អាកការធ្វើប្រតិបត្តិការជាបណ្ដោះអាសន្ន៕  Reuters៕

តម្លៃដីនៅភាគខាងជើងក្រុងភ្នំពេញនឹងកើនឡើងខ្ពស់កម្រិតណា ក្នុងឆ្នាំស៊ីហ្គេម២០២៣?

ដោយ: សុផារី

ភ្នំពេញ: ស្របពេលការរីកដុះដាលយ៉ាងខ្លាំង នៃវិស័យអចលនទ្រព្យ សំណង់លំនៅឋាន បុរី ខុនដូ និងទីផ្សារពាណិជ្ជកម្ម ជាពិសេសការសាងសង់អគារនៃក្រសួងសំខាន់ៗ ភាគខាងជើងក្រុងភ្នំពេញ ក្លាយជាតំបន់នៃចំណាប់អារម្មណ៍របស់វិនិយោគិន។

តម្រូវការដីធ្លីនៅក្នុងតំបន់នេះ មានកំណើនយ៉ាងឆាប់រហ័ស ក្នុងរយៈពេលដ៏ខ្លី បានជម្រុញតម្លៃដីធ្លីឱ្យកើនឡើងខ្ពស់។

លោកស្រី អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ប្រាប់គេហទំព័រ Property Area Asia ថា តម្លៃដីធ្លីនៅតំបន់ភាគខាងជើងនៃក្រុងភ្នំពេញ ជាពិសេសតំបន់ជុំវិញពហុកីឡាដ្ឋានជាតិមរតកតេជោ ស្ថិតនៅចន្លោះពី១៥០ ទៅ៤០០ដុល្លារអាមេរិក ក្នុងមួយម៉ែត្រការ៉េ អាស្រ័យតាមសក្តានុពលទីតាំង។

អ្នកស្រីបន្តថា “ការសម្ភោធដាក់ឱ្យប្រើប្រាស់ ពហុកីឡាដ្ឋានជាតិមរត​ក​តេជោ ស្របពេលការត្រៀមខ្លួន សម្រាប់ភាពជាម្ចាស់ផ្ទះនៃព្រឹត្តិការណ៍កីឡាស៊ីហ្គេមក្នុងឆ្នាំ២០២៣ខាងមុខនេះ បានធ្វើឱ្យតំបន់ភាគខាងជើងក្រុ​ងភ្នំពេញ មានភាពអ៊ូអរលើវិស័យអចលនទ្រព្យ បន្ថែមមួយកម្រិតទៀត”។លោកស្រីបន្តថា “ដោយសារមិនសូវមានតម្រូវការ នៃវិនិយោគិនបរទេស តម្លៃដីធ្លី នៅតាមតំបន់ជាយក្រុងភ្នំពេញមានការកើនឡើង តែកើនឡើងតិចតួចប្រមាណ៥ភាគរយ”។

អ្នកស្រីអាន សុធីតាបានបន្តថា ភាគច្រើននៃការវិនិយោគអចលនទ្រព្យគឺពឹងផ្អែកលើវិនិយោគក្នុងស្រុក កម្រិតនៃការវិនិយោគក៏នៅមានកំណត់។ ដូច្នេះ ស្របពេលដីកណ្តាលក្រុងមានលំនឹង មិនឡើងមិនចុះ តម្លៃដីនៅជាយក្រុងមានកំណើនតិចតួច ដោយសារវិបត្តិកូវីដ១៩។

ទាក់ទិននឹងអត្រាតម្លៃដីធ្លីនៅក្នុងតំបន់នេះ លោកស្រី សុធីតា រំពឹងថា ក្នុងឆ្នាំ២០២៣ ដែលជាឆ្នាំដែលកម្ពុជាជាម្ចាស់ផ្ទះ នៃកីឡាស៊ីហ្គេម តម្លៃដីធ្លីនឹងមានការកើនឡើងខ្ពស់ អាចរហូតដល់១០ភាគរយ។

យ៉ាងណាក្តី លោកស្រីថា ការព្យាករណ៍គ្រប់យ៉ាង នៅមិនទាន់មានភាពជាក់លាក់នៅឡើយទេ ដោយសារភាពមិនប្រាកដប្រជា នៃវិបត្តិកូវីដ១៩៕

EU អនុម័តថវិកាជាង១៧២លានដុល្លារអាមេរិកសម្រាប់អភិវឌ្ឍន៍វិស័យសំខាន់បីនៅកម្ពុជា

ដោយៈ សុផារី

ភ្នំពេញៈ សហភាពអឺរ៉ុបបានអនុម័ត នូវកម្មវិធីណែនាំពហុឆ្នាំរបស់សហភាពអឺរ៉ុបថ្មី សម្រាប់ឆ្នាំ២០២១-២០២៧ ដល់កម្ពុជាដោយផ្តោតសំខាន់លើវិស័យអាទិភាពចំនួនបី ក្នុងទំហំប្រមាណ១៧២លានដុល្លារអាមេរិក សម្រាប់ដំណាក់កាលដំបូងឆ្នាំ២០២១-២០២៤។

នៅក្នុងកិច្ចពិភាក្សាអំពីវឌ្ឍនភាព នៃការរៀបចំសេចក្តីព្រាងបឋមនៃយុទ្ធសាស្ត្ររួមរបស់អឺរ៉ុប ឆ្នាំ២០២១-២០២៧ និងកម្មវិធីណែនាំពហុឆ្នាំរបស់សហភាពអឺរ៉ុបថ្មី ឆ្នាំ២០២១-២០២៧ ជាមួយលោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (ត. ជ.នា/ ក.អ.ក) លោកស្រី Carmen Moreno ឯកអគ្គរដ្ឋទូតសហភាពអឺរ៉ុប ប្រចាំកម្ពុជា បានបញ្ជាក់ថា កម្មវិធីណែនាំពហុឆ្នាំនេះ ត្រូវបានគណះកម្មាធិការអឺរ៉ុបអនុម័តនាថ្ងៃទី២១ ខែធ្នូ ឆ្នាំ២០២១។

លោកស្រីបន្តថា “កញ្ចប់ហិរញ្ញប្បទាន ឥតសំណងដែលគណៈកម្មាធិការអឺរ៉ុបបានសម្រេចផ្ដល់ សម្រាប់អនុវត្តកម្មវិធីណែនាំពហុឆ្នាំនេះ មានទំហំប្រមាណ១៥៥លានអឺរ៉ូ ប្រមាណ១៧២លានដុល្លារអាមេរិក សម្រាប់ដំណា​ក់កាលដំបូងឆ្នាំ ២០២១-២០២៤”។

កម្មវិធីណែនាំពហុឆ្នាំនេះ ជាឧបករណ៍ប្រតិបត្តិរវាងសហភាពអឺរ៉ុប និង រាជរដ្ឋាភិបាលកម្ពុជា សម្រាប់អនុវត្តយុទ្ធសាស្ត្ររួមរបស់អឺរ៉ុបស្តីពីកិច្ចសហប្រតិបត្តិការអភិវឌ្ឍន៍កម្ពុជា និងបានគ្រោងផ្តល់ការគាំទ្រដល់វិស័យអាទិភាពចំនួន៣ រួមមាន កំណើនបៃតង និងការងារ ក្នុងទំហំទឹកប្រាក់ចំនួន ៦២ លានអឺរ៉ូ វិស័យអប់រំ និងបណ្តុះបណ្តាលជំនាញវិជ្ជាជីវៈ ក្នុងទំហំទឹកប្រាក់ចំនួន៤៨លានអឺរ៉ូ វិស័យអភិបាលកិច្ច ក្នុងទំហំទឹកប្រាក់ចំនួន៣៧ លានអឺរ៉ូ។

លើសពីនេះ សហភាពអឺរ៉ុបក៏បានត្រៀមធនធាន៨លានអឺរ៉ូ សម្រាប់គាំទ្រដល់ការរៀបចំ និងអនុវត្តគម្រោង ឬសកម្មភាពនានា ក្នុងវិស័យអាទិភាពទាំងបីខាងលើ។

ដោយឡែក សម្រាប់ការអនុវត្តនៅដំណាក់កាលបន្ទាប់ឆ្នាំ ២០២៥-២០២៧ នឹងមានការផ្តល់ហិរញ្ញប្បទានបន្ថែម ដោយផ្អែកលើការវាយតម្លៃនៃការអនុវត្តឆ្នាំ២០២១-២០២៤។

ទន្ទឹមនឹងនេះ សម្រាប់ការផ្តល់ហិរញ្ញប្បទាន នៅដំណាក់កាលបន្ទាប់ លោករដ្ឋមន្ត្រីប្រតិភូ បានស្នើសហភាពអឺរ៉ុប ពិនិត្យផ្តល់ការគាំទ្រលើការអភិវឌ្ឍសេដ្ឋកិច្ចឌីជីថល ដែលជាអាទិភាពចម្បងមួយរបស់ រាជរដ្ឋាភិបាលកម្ពុជា។

លោកស្រីអគ្គរដ្ឋទូតបានគូសបញ្ជាក់ថា ភាគីអឺរ៉ុបគ្រោងនឹងស្នើសុំរៀបចំកិច្ចប្រជុំរវាងក្រុមប្រឹក្សាអភិវឌ្ឍន៍កម្ពុជា និងសហភាពអឺរ៉ុប រួមទាំងប្រទេសជាសមាជិក ក្នុងកំឡុងខែមេសាខាងមុខ ដើម្បីពិនិត្យ និងពិភាក្សាលើយុទ្ធសាស្ត្ររួមរបស់អឺរ៉ុបស្តីពី កិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ ។

ភាគីទាំងពីរបានបង្ហាញជំហរយ៉ាងមុតមាំ និងសង្ឃឹមជឿជាក់ថាទំនាក់ទំនង កិច្ចសហប្រតិបត្តិការ និងភាពជាដៃគូក្នុងកិច្ចសហប្រតិបត្តិការអភិវឌ្ឍន៍ កម្ពុជា-សហភាពអឺរ៉ុប នឹងត្រូវបានបន្តពង្រឹង និងពង្រីកកាន់តែល្អប្រសើរបន្ថែមទៀតនាពេលអនាគត៕

ពួកអ្នកមានរុស្ស៊ី សម្រុកទិញគ្រឿងអលង្ការ និងនាឡិកាប្រណីតៗទុកអំឡុងទណ្ឌកម្មហ៊ុមព័ទ្ធប្រទេសរុស្ស៊ី

ដោយៈសុខុម

អន្តរជាតិ: ខណៈការដាក់ទណ្ឌកម្មលើប្រទេសរុស្ស៊ី បានធ្វើឱ្យតម្លៃរូបិយប័ណ្ណរុស្ស៊ីRuble ដាំក្បាលចុះខ្លាំង និងធ្វើឱ្យទីផ្សារភាគហ៊ុនឈានដល់​ការបិទទ្វារ ពួកអ្នកមានរុស្ស៊ី កំពុងសម្រុកទិញគ្រឿងអលង្ការ និងនាឡិ​កាប្រណីតៗ ដើម្បីទុកបង្ការការខាតបង់។ នេះបើយោងតាមសារព័ត៌មាន Aljazeera ចុះផ្សាយកាលពីថ្ងៃទី០២ មីនា។

នាយកប្រតិបត្តិក្រុមហ៊ុនគ្រឿងអលង្ការល្បីរបស់អ៉ីតាលី Bulgari SpA បានអះអាងថា ការលក់របស់ក្រុមហ៊ុនលោកនៅតាមហាង Bulgari SpA ក្នុងប្រទេសរុស្ស៊ី បានកើនឡើងខ្លាំងគួរឱ្យកត់សម្គាល់ ក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីការឆ្លើយតបរបស់អន្តរជាតិ ចំពោះការបញ្ឆេះសង្គ្រាមដោយរុស្ស៊ី ចូលឈ្លានពានប្រទេសអ៊ុយក្រែន បានរឹតបន្តឹងយ៉ាងខ្លាំងលើការធ្វើចរាចរសាច់ប្រាក់។

ទោះបីជាប៊្រែនទំនិញប្រើប្រាស់ល្បីៗ រាប់ចាប់ពីក្រុមហ៊ុន Apple Inc. ដល់ក្រុមហ៊ុន Nike Inc. និងក្រុមហ៊ុនថាមពលធំៗ ដូចជា ក្រុមហ៊ុន BP Plc ក្រុមហ៊ុន Shell Plc និង ក្រុមហ៊ុន Exxon Mobil Corp ជាដើមបានសម្រុកចាកចេញពីប្រទេសរុស្ស៊ី យ៉ាងណាក្ដី ក៏រហូតមកដល់ពេលនេះប៊្រែនប្រណីតធំៗបំផុតរបស់អឺរ៉ុប កំពុងព្យាយាមបន្តដំណើរការ នៅក្នុងប្រទេសនេះ។

ក្រៅពី Bulgari ដែលជាប៊្រែនមួយរបស់ LVMH SE ក៏មានប៊្រែន​បារាំង Cartier ដែលកំពុងបើកលក់គ្រឿងអលង្ការ និងនាឡិកាប្រណីតៗដូចជានាឡិកា Omega និង Rolex ជាដើមផងដែរ។

ស្រដៀងនឹងមាសដែរ ក្នុងករណីមានអតិផរណាកើតឡើង នាឡិកា និងគ្រឿងអលង្ការប្រណីតៗ អាចទប់ការខាតបង់ធ្ងន់ធ្ងរ ដោយវាអាចរក្សាតម្លៃ ឬសូម្បីកើនឡើងតម្លៃទៀតផង នៅពេលមានចលាចលសេដ្ឋកិច្ច ដែលបណ្តាលមកពីសង្គ្រាម និងជម្លោះ។

អ្នកជំនាញនិយាយថា នាឡិកាល្បីៗពេញនិយម អាចលក់នៅលើទីផ្សារបានតម្លៃខ្ពស់ដល់ទៅ៣ ឬ៤ដង នៃតម្លៃដើមទៀតផង ទើបបានជាពួកអ្នកមានរុស្ស៊ី សម្រុកទិញវាទុកដើម្បីបង្ការហានិភ័យ៕ Aljazeera៕

គេហទំព័រ Propertyarea ស្វាគមន៍សំណេរ និងអត្ថបទរបស់សាធារណៈជន

ដោយៈជេស៊ីកា

ភ្នំពេញៈ គេហទំព័រ Propertyarea.asia សូមប្រកាសទទួលយកសំណេរ និងអត្ថបទវិភាគ ឬទស្សនទាននានារបស់សាធារណៈជន ទាក់ទងនឹងវិស័យអចលនទ្រព្យ ក៏ដូចជាទិដ្ឋភាពទូទៅនៃសេដ្ឋកិច្ចជាតិ។

សហស្ថាបនិក និងជាអគ្គនាយកគេហទំព័រ Propertyrea.asia លោក​យិន លាងគង់ បានមានប្រសាសន៍ឲ្យដឹង កាលពីថ្ងៃទី៣ មិនាកន្លងមកថា ក្នុងដំណើរការលើវិស័យសារគមនាគមន៍៍ រយៈពេលជាង៤ឆ្នាំកន្លងមក យើងបានធ្វើដំណើរយ៉ាងឆ្ងាយ ជាមួយសាធារណៈជន ពិសេសមិត្តអ្នក​អាន និងអ្នកទស្សនា ជាមួយអត្ថបទដ៏សម្បូរបែប និងអត្ថបទវិភាគពីសេដ្ឋកិច្ច នយោបាយមួយចំនួន។

លោកបន្តថា “ដោយសារឈរលើក្រមសីលធ៌មវិជ្ជាជីវៈ ផ្តល់ព៌តមានពិត ឥតលំអៀង និងជំនាញវិជ្ជាជីវៈយើងទទួលបានការគាំទ្រ ពីសាធារណៈជនជាតិ និងអន្តរជាតិ”។ លោកបន្តថា “ជាមួយនឹងការវិវត្តន៍រីកចម្រើននេះ ខ្ញុំគិតថា ការផ្តល់ឱកាសដល់សាធារណៈជន និស្សិត បញ្ញវ័ន្ត អ្នកប្រាជ្ញានានាគួរជារឿងមួយមិនគួរមើលរំលង និងមានតម្លៃមិនអាចកាត់ថ្លៃបាន ក្នុង​ការចែករំលែកចំណេះដឹងដល់សាធារណៈជនបន្ថែមទៀត”។

លោកយិន លាងគង់ បានបន្តថា កន្លងមកមានបញ្ញវ័ន្តមួយចំនួនបានផ្ញើរអត្ថបទ ឬផ្តល់ជាអនុសាសន៍ជាច្រើន ចូលមកកាន់ផេករបស់គេហទំព័រ ប៉ុន្តែដោយសារព៌តមានមិនគ្រប់ជ្រុងជ្រោយ យើងសម្រេចចិត្តមិនផ្សព្វផ្សា​យ​ជូន។ លោកបន្តថា ហេតុនេះ ចាប់ពីពេលនេះតទៅ យើងស្វាគមន៍រាល់សំណេរបេស់​លោក អ្នកដោយមេត្រីភាព ប៉ុន្តែសំណេរដែលមានលក្ខណៈរិះគន់ រដ្ឋាភិបាល ដោយគ្មានមូលដ្ឋានច្បាស់លាស់ ឬមានចេតនាអាក្រក់ណាមួយ យើងបដិសេធមិនទទួលយកមកចុះផ្សាយឡើយ។

លោកបន្តថា លើសពីនេះ ថ្នាក់ដឹកនាំគេហទំព័រ Propertyarea.asia សូមរក្សាសិទ្ឋក្នុងការកែសម្រួលអត្ថបទ និងពាក្យពេជន៍មួយចំនួន មុនធ្វើការចុះផ្សាយ ក្នុងគេហទំព័ររបស់យើងខ្ញុំ ដើម្បីបញ្ចៀសនូវការបំភ្លៃ បំភ្លើស ឬបំប៉ោងព៌តមានក្លែងក្លាយជាដើម។

អាស្រ័យហេតុនេះ សាធារណៈជន បញ្ញវ័ន្ត អ្នកស្រាវជ្រាវ និងអ្នកប្រាជ្ញនានាអាចផ្ញើរអត្ថបទមកយើងខ្ញុំបាន តាមរយៈ Telegram លេខ០៨៦ ៤៨៥ ៥៦៦​, 078 959 567៕

Moung Khoun Island Reconstruction in Luang Prabang 90% Complete

By Manyphone Vongphachanh

A project is underway to rebuild the sacred Moung Khoun Island in Chomphet District, Luang Prabang, following its disappearance after the construction of the Xayaboury Dam.

Chairman of the Provincial Front for National Development and head of the construction project, Mr. Soukan Bounyong, observed progress early this week.

The newly constructed island, located in the middle of the Mekong River, will be 330 meters long and 50 meters wide.

Prior to the advent of the Xayaboury hydroelectric dam, the island had been an important cultural and religious site for local people.

The island was traditionally used as a place to build sand stupas and launch bamboo rockets during new year festivities.

However, the Xayaboury Dam affected water levels in the river, causing the island to be submerged.

Now, the island is being rebuilt in a construction project that commenced last year by CH Karnchang (Thailand), and is 90% complete, Lao Post reports.

The island reconstruction project is running ahead of schedule and is expected to be handed over in March.

Mr. Soukan urged Luang Prabang and Chomphet administrators to improve scenery along the Mekong River in an orderly manner and prepare to plan for the island to stay beautiful and sustainable.

Source: Laotian Times

តើអ្នកណាជាស្ថាបត្យករគូរបង់អគារ Tower Of The Arab ដែលមានរាងដូចជាក្តោង?

ដោយៈជេស៊ីកា

ភ្នំពេញៈ ការនឹកស្រម៉ៃ នឹងច្នៃប្រឌិតហួសហេតុ ទំនងមិនមែនជាសមិទ្ឋផលនៃស្ថាបត្យកម្មអស្ចារ្យទេ ជាក់ស្តែងអគារល្បីៗលើពិភពលោក សុទ្ឋតែជាអគារ ដែលសាងសង់មានរូបរាងយកលំនាំតាមសត្វ ធម្មជាតិ និងតាមរូបរាងឧបករណ៍ប្រើប្រាស់។

ជាក់ស្តែងលោក Tom Wright ដែលជាអ្នកឌីហ្សាញអគារដ៏ល្បីឈ្មោះ Tower of the Arabs ក្នុងទីក្រុងឌូបៃ គឺលោកបានឌីសាញអគារមានរូបរាងដូចជាក្តោង។

តើលោក Tom Wright មានប្រវត្តិបែបណា? លោកកើតថ្ងៃទី 18 ខែកញ្ញា ឆ្នាំ១៩៥៧ ជាស្ថាបត្យករជនជាតិអង់គ្លេស ដែលត្រូវបានគេស្គាល់ថាជាអ្នកឌីហ្សាញអគារដ៏ល្បីឈ្មោះ Burj Al Arab (Tower of the Arabs) ក្នុងទីក្រុងឌូបៃ ប្រទេសអារ៉ាប់រួម។

លោក Wright បានសិក្សានៅសាលា Royal Russell ហើយបន្ទាប់មកបន្តការសិក្សានៅសាលា Kingston Polytechnic school of Architecture។

លោក Wright បានចូលជាសមាជិកនៃស្ថាប័ន Royal Institute of British Architects ក្នុងឆ្នាំ១៩៩៣ ​និងបានក្លាយជាស្ថាបត្យករអាជីពនៅឆ្នាំដដែល ហើយបានក្លាយជាប្រធានផ្នែកស្ថាបត្យកម្ម របស់ក្រុមហ៊ុន Atkins ក្នុងឆ្នាំ១៩៩១។

លោក Wright បានក្លាយជានាយកឌីហ្សាញ (design director) សម្រាប់គម្រោងរមណីយដ្ឋាន Jumeirah Beach Resort ក្នុងទីក្រុងឌូបៃ ហើយបានឌីហ្សាញអគារ Burj Al Arab (Tower of the Arabs) ក្នុងពេលនោះផងដែរ។

អគារ Burj Al Arab (Tower of the Arabs) ត្រូវបានបង្កើតឡើងដើម្បីជានិមិត្តរូបតំណាង អត្តសញ្ញាណឱ្យទីក្រុងឌូបៃ ដូចទៅនឹងអគារ Sydney Opera House បញ្ជាក់អត្តសញ្ញាណឱ្យទីក្រុងស៊ីដនី ហើយអគារ Eiffel Tower បញ្ជាក់អត្តសញ្ញាណឱ្យទីក្រុងប៉ារីសជាដើម។

អគារនេះត្រូវបានសាងសង់ឡើង ដោយបំផុសគំនិតពីរូបរាងនាវានៃប្រពៃណីអារ៉ាប់ឈ្មោះ dhow ដើម្បីឆ្លុះបញ្ចាំងពីបេតិកភណ្ឌសមុទ្រ របស់ទីក្រុងឌូបៃ ដោយរួមបញ្ចូលជាមួយ នឹងទិដ្ឋភាពទំនើបឆ្ពោះទៅអនាគត។

អគារ Burj Al Arab (Tower of the Arabs) គឺជាសណ្ឋាគារដ៏ប្រណិតបំផុតមួយ នៅក្នុងពិភពលោក និងទទួលឈ្មោះជាសណ្ឋាគារលំ​ដាប់ផ្កាយ៧ ដំបូងគេដែលមានទីតាំងនៅទីក្រុងឌូបៃ ប្រទេសអារ៉ាប់រួម។

វាត្រូវបានចាប់ផ្តើមសាងសង់ក្នុងឆ្នាំ 1994 នៅលើកោះសិប្បនិមិត្តនិងបើកជាសាធារណៈ ក្នុងឆ្នាំ១៩៩៩មានកម្ពស់៣២១ម៉ែត្រដោយចំណាយទឹកប្រាក់អស់ប្រមាណ១០០០លានដុល្លារ។

លោក Tom Wright បានរស់នៅក្នុងទីក្រុងឌូបៃ កំឡុងពេលឌី ហ្សាញ និងសាងសង់គម្រោងអគារដ៏ល្បីនេះ ក្នុងនាមជានាយកឌីហ្សាញរបស់ក្រុមហ៊ុន Atkins។

ក្នុងឆ្នាំ២០១៣ លោក Tom Wright, លោក Geku George និង លោក Hakim Khennouchi បានចាកចេញពីក្រុមហ៊ុន Atkins ដើម្បីបង្កើតក្រុមហ៊ុនថ្មីមួយ ដែលមានឈ្មោះថា WKK មានទីស្នាក់ការនៅក្រុង Epsom តំបន់ Surrey ភាគអាគ្នេយ៍នៃប្រទេសអង់គ្លេស៕

រដ្ឋាភិបាលឡាវកំពុងសម្រុកសាងសង់ឡើងវិញនូវកោះដ៏ពិសិដ្ឋ Moung Khoun នៅកណ្ដាលទន្លេមេគង្គ

ដោយៈសុខុម

ប្រទេសឡាវៈ ពេលនេះប្រទេសឡាវ កំពុងសម្រុកសាងសង់ឡើងវិញនូវកោះ Moung Khoun ដ៏ពិសិដ្ឋនៅកណ្ដាលទន្លេមេគង្គ ស្ថិតក្នុងភូមិសា ស្ត្រស្រុក Chomphet ខេត្តហ្លួងព្រះបាង បន្ទាប់ពីកោះនេះបានលិចបាត់ទៅក្រោមផ្ទៃទឹក ក្រោយការសាងសង់ទំនប់សាយ៉ាប៊ូរី (Xayaboury Dam)។

លោក Soukan Bounyong ប្រធានរណសិរ្សភិវឌ្ឍន៍ខេត្ត និងជាប្រធានគម្រោងសាងសង់កោះនេះ បានចុះពិនិត្យមើលការងារសាងសង់នៅដើមសប្តាហ៍នេះ ហើយឃើញថា ការងារសាងសង់សម្រេចបាន៩០%ហើយ។ នេះបើយោងតាមសារព័ត៌មានឡាវ Laotian times ចុះផ្សាយកាលពីថ្ងៃព្រហស្បតិ៍ ទី៣ មីនា។

លោក Soukan Bounyong បានបញ្ជាក់ថា កោះកណ្ដាលទន្លេមេគង្គ ដែលសាងសង់ឡើងវិញនេះ នឹងមានបណ្តោយ៣៣០ម៉ែត្រ និងទទឹង៥០ម៉ែត្រ។ មុនពេលសាងសង់ទំនប់វារីអគ្គិសនីសាយ៉ាប៊ូរី កោះនេះធ្លាប់ជាទីតាំងវប្បធម៌ និងសាសនាដ៏សំខាន់មួយសម្រាប់ប្រជាជនមូលដ្ឋាន។

តាមប្រពៃណី កោះនេះត្រូវបានប្រជាជនប្រើប្រាស់ ជាកន្លែងសម្រាប់សង់ចេតិយខ្សាច់ និងបាញ់រ៉ុក្កែតឫស្សី (Bamboo Rocket) អំឡុងបុណ្យចូលឆ្នាំថ្មី។

ទោះជាយ៉ាងណា ទំនប់សាយ៉ាប៊ូរី បានធ្វើឱ្យប៉ះពាល់ដល់កម្រិតទឹកក្នុងទន្លេដែលធ្វើឱ្យកោះនេះ លិចបាត់ទៅក្រោមផ្ទៃទឹក។

សារព័ត៌មានឡាវ Lao Post បានចុះផ្សាយថា បច្ចុប្បន្នកោះនេះកំពុងត្រូវបានសាងសង់ឡើងវិញ ដោយក្រុមហ៊ុន CH Karnchang (ប្រទេសថៃ) ហើយការងារសម្រេចបាន៩០%ហើយ ក្រោយចាប់ផ្ដើមការសាងសង់កាលពីឆ្នាំមុន។ ផ្អែកតាមការរំពឹងទុក គម្រោងនេះនឹងបញ្ចប់ជាស្ថាពរនៅខែមីនា នេះ។

លោក Soukan Bounyong បានជំរុញឱ្យរដ្ឋបាលខេត្តហ្លួងព្រះបាង និង Chomphet កែលម្អសោភ័ណភាពទេសភាពតាមដងទន្លេមេគង្គ ធ្វើយ៉ាងណាឱ្យមានរបៀបរៀបរយ ហើយត្រៀមផែនការរក្សាឱ្យកោះនេះ នៅតែមានសោភ័ណភាពប្រកបដោយនិរន្តរភាព៕ Laotian Times៕

តើបុរី១០០ខ្នងមានប្រវត្តិបែបណានិងមានទស្សនទានអភិវឌ្ឍន៍ដូចម្តេច?

ដោយៈគង់ សូរិយា

ភ្នំពេញៈ បុរី១០០ខ្នង ដែលបច្ចុប្បន្នស្ថិតក្នុងសង្កាត់ទឹកថ្លា បាននិងកំពុងបាត់រូបរាងបណ្តើរៗ ប៉ុន្តែកេរ្ត៍ឈ្មោះ និងទីតាំងនេះនៅតែស្ថិតនៅយ៉ាង​រសរវើក។

បុរី១០០ខ្នង ជាស្នាដៃរបស់បិតាស្ថាបត្យករខ្មែរ ដ៏ល្បីឈ្មោះលោក វណ្ណ ម៉ូលីវណ្ណ។ សំណង់បុរី ១០០ខ្នងគឺជាស្នាដៃ របស់បិតាស្ថាបត្យករខ្មែរ បានសាងសង់ចាប់ពីឆ្នាំ១៩៦៥ ដល់១៩៦៧។

យោងតាមឯកសារប្រវត្តិបុរីនេះធនាគារជាតិ នៃកម្ពុជាបានជ្រើសរើសយកលោកវណ្ណ ម៉ូលីវណ្ណ ដើម្បីអនុវត្តគម្រោងឯកជនមួយ គឺសាងសង់លំនៅឋាន សម្រាប់បុគ្គលិករបស់ខ្លួននៅទឹកថ្លា តាមបណ្ដោយផ្លូវទៅកាន់អាកាសយានដ្ឋានអន្តរជាតិភ្នំពេញ។

ពាក្យថាបុរី១០០ខ្នង គឺកើតចេញពីការសាងសង់ផ្ទះ ចំនួន១០០ខ្នងនៅលើផ្ទៃដីទំហំ៦.៥ហិកតា។ បុរី ១០០ខ្នងផ្តល់នូវប្រភេទសំណង់លំនៅឋានសម័យថ្មី បែបផ្ទះល្វែង។ ប្លង់ផ្ទះធ្វើទៅតាមលំនាំផ្ទះឈើ បែបខ្មែរ ដែលមានបន្ទប់គេងតូចមួយ មានបន្ទប់ទទួលភ្ញៀវធំ ដែលខណ្ឌដាច់ពីបន្ទប់ផ្សេងៗទៀត ដូចជាផ្ទះបាយ និងបន្ទប់ទឹកដោយយ៉មួយ។ ដំបូលលៀនចេញពីជញ្ជាំងផ្ទះដើម្បីការពារភ្លៀង និងថ្ងៃ។

សំណង់បុរីនេះ មានសសរធ្វើឲ្យផ្ទះខ្ពស់ពីដី ចៀសផុតទឹកជំនន់ និងធ្វើឲ្យមានម្លប់នៅខាងក្រោមផ្ទះ។ ផ្ទះនីមួយៗ ក្នុងចំណោមផ្ទះទាំងអស់ គឺដូច​ៗគ្នា និងមានព្រំកំណត់ច្បាស់លាស់។ ដំបូលធ្វើយ៉ាងណាឲ្យមានខ្យល់ចូលតាមក្រោម ហើយចេញទៅវិញតាមប្រឡោះមួយនៅខាងលើ។ នេះបើតាមប្រវត្តិរបស់បុរី ១០០ខ្នងដែលត្រូវបានចងក្រង ដោយស្ថាបត្យករជំនាន់ក្រោយ ក្រោមគម្រោងវណ្ណ ម៉ូលីវណ្ណ។

លក្ខណៈពិសេសមួយទៀត គឺនៅទីធ្លាផ្ទះគឺត្រូវមានស្រះទឹកមួយ ដែលនេះ ជាការគិតគូរទៅដល់អាងស្តុកទឹកភ្លៀង និងកន្លែងស្តុកទឹកសម្រា​ប់ប្រើប្រាស់។

ចំពោះទិដ្ឋភាពប្លង់រួមបុរី ១០០ខ្នង គឺវាមានលក្ខណៈពិសេសយ៉ាងខ្លាំង ដោយសារតែជួរផ្ទះរត់ឆ្លះគ្នា ដែលធ្វើឲ្យមានលំហូរចរន្តខ្យល់ រត់កាត់ទៅតាមទីតាំងនីមួយៗ។ ការរចនានេះវាបានធ្វើឲ្យពន្លឺធម្មជាតិ ជ្រៀតចូលទៅក្នុងផ្ទះ ព្រោះមិនមានផ្ទះដែលនៅជិតបាំងឡើយ ហើយវាបានជួយរក្សាឯកជនភាពរបស់ម្ចាស់ផ្ទះដែរ ព្រោះនៅពេលដែលបើកបង្អួច គឺមិនឃើញបង្អួចផ្ទះដែលនៅជិតបានដោយផ្ទាល់ទេ។

ផ្ទះនីមួយៗ មានបណ្ដោយទំហំប្រមាណ១១ម៉ែត្រ និងទទឹង៨ម៉ែត្រ។ ចំណែកការរចនា ផ្ទះនេះវិញ គឺផ្អែកទៅលើគោលគំនិតផ្ទះឈើប្រពៃណីខ្មែរ ដែលមានជាន់ លើសង់លើសសរខ្ពស់ផុតពីដី និងមានផ្នែកទូលាយនៅជាន់ផ្ទាល់ដី ដោយធ្វើទំនើបកម្មផ្ទះបុរាណខ្មែរ និងច្នៃប្រឌិតឲ្យសមស្របទៅនឹងបរិបទខ្មែរសម័យទំនើបផងដែរ។

គោលគំនិតទាំងអស់នោះមានដូចជា ការប្រើប្រាស់បេតុងជាគ្រឿងបង្គុំសំខាន់ ជំនួសឲ្យឈើធ្វើឲ្យគុណភាព សំណង់គង់វង្សបានយូរ។ ការរចនាបង្អួចអោយមានទំហំធំជាងមុន ដើម្បីឲ្យពន្លឺនិងខ្យល់ធម្មជាតិចូលក្នុងលំហផ្ទះគ្រប់គ្រាន់ផងដែរ។

ទម្រង់ដំបូលមានរាងប្លែកលក្ខណៈជាដំបូលប៉ិត។ ផ្នែកដំបូលនេះក៏បានដើរតួយ៉ាងសំខាន់ផងដែរ ក្នុងការរក្សាសីតុណ្ហភាពខាងក្នុងផ្ទះ ឲ្យត្រ​ជាក់ ព្រោះជាធម្មតាខ្យល់ក្តៅ តែងតែនៅលើខ្យល់ត្រជាក់ ដូចនេះធ្វើឲ្យកម្តៅមានច្រើននៅផ្នែកខាងដំបូល ហើយបានធ្វើឲ្យលំហខាងក្នុងផ្ទះកើនឡើងកម្តៅ។

លោកវណ្ណ ម៉ូលីវណ្ណបានរចនាដំបូល ឲ្យមានប្រហោងស្លាបព្រិលឈើនៅផ្នែកចុងដំបូល ដើម្បីឲ្យខ្យល់ក្តៅហូរចេញបាន។ លើសពីនេះទៀតគម្លាតដំបូលមានប្រវែង វែងជាងគម្លាតដំបូលផ្ទះធម្មតា ដែលការរចនានេះបានកាត់បន្ថយកម្តៅ ពីព្រះអាទិត្យដោយផ្ទាល់ ដែលជ្រាបចូលទៅខាងក្នុងផ្ទះ។ នៅលើដំបូលក៏ត្រូវបានបំពាក់បំពង់ផ្សែង នៅលើផ្ទះបាយដើម្បីអាចស្រូបយកផ្សែងនិងក្លិនដែលចម្អិនអាហារចេញពីផ្ទះផងដែរ។

ការរចនារៀបចំមុខងារ នៅខាងក្នុងផ្ទះបានបែងចែក លំហជាពីរផ្នែកគឺ៖ ផ្នែកចម្បងនិងផ្នែកធម្មតា។ លំហផ្នែកចម្បងគឺមានកន្លែងដូចជា បន្ទប់ជួបជុំគ្រូសារ បន្ទប់គេង និងមានជណ្តើរសម្រាប់ផ្នែកនេះផងដែរ ហើយវាក៏ខ្ពស់ជាងផ្នែកធម្មតាហើយត្រូវបានក្រាលដោយឈើធម្មជាតិ។

ចំណែកឯផ្នែកធម្មតាគឺមានកន្លែងដូចជា បន្ទប់ទឹក បន្ទប់ចម្អិនអាហារ រានហាល និងមានជណ្តើរសម្រាប់ផ្នែកនេះផ្ទាល់ដែរ ដោយសារតែផ្នែកនេះងាយប៉ះពាល់នឹងទឹកដូចនេះលោក វណ្ណ ម៉ូលីវណ្ណ បានប្រើបេតុងជំនួសវិញ ព្រោះតែបេតុងអាចធន់នឹងទឹកបាន។

ផ្នែកទាំងពីរនេះ មានជណ្តើររៀងៗខ្លួន ដែលការរចនានេះបានបញ្ជាក់ឲ្យយើងឃើញពីការគិតគូរ ទៅលើភាពងាយស្រួលក្នុងការប្រើប្រាស់។ ចំណុចដែលគួរឲ្យចាប់អារម្មណ៍មួយទៀតនោះ គឺការដាក់បង្អួចមិនឲ្យចំគ្នា គឺដើម្បីឲ្យចរន្តខ្យល់ធម្មជាតិ បានរត់កាត់ពាសពេញលំហ ខាងក្នុងផ្ទះបានល្អ។

បច្ចុប្បន្នសំណង់បុរី១០០ខ្នងមួយចំនួនធំ គឺត្រូវបានផ្លាស់ប្តូររូបរាងដើមអស់ទៅហើយ។ ទោះជាយ៉ាង ណាក៏ដោយធាតុដើមនៃសំណង់បុរី ១០០ខ្នង គឺជាបុរីគំរូចំណាស់មួយ ដែលបានគិតគូរយ៉ាងល្អខ្លាំង ទៅលើការប្រើប្រាស់ មុខងារ សោភ័ណភាព ការឆ្លើយតបទៅនឹងអាកាសធាតុក្នុងប្រទេសកម្ពុជា និងបានបង្ហាញពីអត្តសញ្ញាណខ្មែរផងដែរ៕

ប្រភព ArchCambodia