ដោយៈគង់ សូរិយា

ភ្នំពេញៈ ក្រុមអ្នកជំនាញបាននិងកំពុងមើលឃើញថា ទីផ្សារដីឡូត៍កាន់តែមានការវិវត្តល្អប្រសើរ ដោយទំហំដីឡូត៍កាន់តែត្រូវពង្រីក ដោយផ្តោតលើដីឡូត៍លំហែរកាយកាន់តែច្រើន។

ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា លោកយិន លាងគង់បានមានប្រសាស​ន៍ឲ្យដឹងកាលពីរសៀលថ្ងៃទី១៣ កក្កដាកន្លងមកថា បច្ចុប្បន្នអ្នកពុះដីឡូត៍កាន់តែច្រើន បានពង្រីក ការធ្វើពិពិធកម្មផលិតផលរបស់ពួកគេ ដោយចាប់ផ្តើមសាងសង់ផ្ទះតម្លៃសមរម្យសំរាប់លក់ និងបាននិងកំពុងពុះដីឡូត៍ធំៗ ដែលផ្តោតលើគំរោងបែបលំហែរកាយ។

លោកបន្តថា “ជំងឺកូវីដ១៩បានធ្វើឲ្យប្រជាជនស្រ្តេសច្រើន ពួកគាត់រកទីកន្លែងសំរាប់់លំហែរកាយកាន់តែច្រើន ស្របពេលការធ្វើដំណើកំសាន្ត នៅក្រៅប្រទេសមិនអាចធ្វើបាន”។លោកបន្តថា “ការសាងសង់ផ្ទះលំហែរកាយជាបឹងហ្កាឡូ ការបោះតង់កាន់តែពេញនិយម នៅតាមបណ្តាខេត្តជាប់តំបន់ឆ្នេរ និងតំបន់ព្រៃភ្នំដែលមានទេសភាព និងខ្យល់អាកាសបរិសុទ្ឋ”។

លោកយិន លាងគង់បានបន្តថា បច្ចុប្បន្នមានគំរោងដីឡូត៍មូយចំនូន នៅជើងភ្នំបូកគោ កំពុងទទួលបានការចាប់អារម្មណ៍ច្រើនពីប្រជាពលរដ្ឋ។ ការទិញដីឡូត៍ សំរាប់សាងសង់ផ្ទះលំហែរ ក(ចូលរួមចំណែកយ៉ាងល្អប្រសើរ ដើម្បីលើកកំពស់ទេសចរណ៍ផង និងចាក់ចូលធនធានក្នុងមូលដ្ឋានផងដែរ។

ការពង្រីកមូលដ្ឋានសេដ្ឋកិច្ច និងប្រាក់ចំណូលដល់ប្រជាពលរដ្ឋនៅមូលដ្ឋាន ជាគោលនយយោបាយមួយរបស់ក្រសួងទេសចរណ៍ ដើម្បីធ្វើយ៉ាងណាឲ្យប្រជាពលរដ្ឋអាច​ចាយវាយសាច់ប្រាក់នៅក្នុងប្រទេសច្រើន ដែលជាការរូមចំណែកកាត់បន្ថយភាពក្រីក្រផងដែរ។

លោកឆម ចំរើនអគ្គនាយកក្រុមហ៊ុនAdsolutionបានមានប្រសាសន៍ថា ការដើរកំសាន្តនៅក្នុងប្រទេស និងការទិញដីឡូត៍សំរាប់លំហែរកាយ បានកើនឡើងខ្ពស់ចាប់តាំងពីមានជំងឺកូវីដមក។ បញ្ហានេះបានជួយធ្វើឲ្យទីផ្សារដីឡូត៍លំហែរកាយ កើនឡើង ប្រជាជនមានធនធាន បានចាប់អារម្មណ៍វិនិយោគដីឡូត៍ ដើម្បីសាងសង់ផ្ទះឬទិញផ្ទះនៅក្នុងគំរោងលំហែរកាយ ដែលបានរៀបចំឡើងដោយអ្នកអភិវឌ្ឍន៍នានា។

លោកបន្តថា ចាប់ពីពេលនេះ រហូតដល់ពេលអនាគត ទីផ្សារដីឡូត៍លំហែរកាយនឹងមានទីផ្សារកាន់តែច្រើន ខណៈប្រចាពលរដ្ឋមានជីវភាពធូរធារកើនឡើង ពិសេសប្រ​ជា​ពលរដ្ឋខ្មែរ ចូលចិត្តដើរកំសាន្តច្រើនជាងពេលមុន៕

ដោយៈ ម៉ាណេត

ភ្នំពេញៈ រដ្ឋាភិបាលគ្រោងបញ្ចូលគ្នា រវាងសាលារាជធានីភ្នំពេញ ជាមួយនឹងផ្នែកខាងជើង នៃខេត្តកណ្តាល(២ ០០០គីឡូម៉ែត្រក្រឡា) ដើម្បីបង្កើតបានជារាជធានីភ្នំពេញធំមួយ។ នេះបើយោងតាមប្លង់គោលប្រើប្រាស់ដី រាជធានីភ្នំពេញ២០៣៥ ចេញផ្សាយកាលពីថ្មីៗនេះ។

យោងតាមប្លង់គោលប្រើប្រាស់ដីរាជធានីភ្នំពេញ បានឱ្យដឹងដូច្នេះថា ការបញ្ចូលគ្នារវាងសាលារាជធានីភ្នំពេញ ជាមួយនឹងផ្នែកខាងជើងនៃខេត្តកណ្តាល (២០០០គីឡូ​ម៉ែត្រក្រឡា) ឬជាមួយខេត្តកណ្តាលទាំងមូល (៤ ០០០គីឡូម៉ែត្រក្រឡា) ដើម្បីបង្កើតបានជារាជធានីភ្នំពេញធំមួយជាមួយនឹងលក្ខន្តិកៈពិសេសគឺរាជធានី។
រាជធានីនឹងមានស្វយ័ត ភាពហិរញ្ញវត្ថុមួយយ៉ាងធំ ដោយរួមបញ្ចូលទាំងការធ្វើវិនិយោគទុន និងលទ្ធភាពនៃការខ្ចីស្វ័យ័ត ភាពប្រាក់ផងដែរ។

ដំណោះស្រាយដែលមានភាពរលូនបំផុតនេះ នឹងអនុញ្ញាតឱ្យរដ្ឋាភិបាល កណ្ដាលដកខ្លួនចេញ ពីការធ្វើវិនិយោគសាធារណៈនៅរាជធានីភ្នំពេញ ហើយភ្នំពេញអាចរកបាននូវធនធានស្វយ័ត សម្រាប់ការអភិវឌ្ឍរបស់ខ្លួន ជាមួយនឹងសារពើពន្ធមូលដ្ឋានទាំង​ឡាយដែល រាជធានីនឹងគ្រប់គ្រងដោយផ្ទាល់ ហើយក៏អាចមានលទ្ធភាពក្នុងការខ្ចីប្រាក់ដោយផ្ទាល់ពីម្ចាស់ ជំនួយអន្តរជាតិនានា។

រាជធានីភ្នំពេញធំនឹងមានសាមគ្គីភាព ជាមួយខេត្តដទៃៗទៀតនៅក្នុងប្រទេស តាមរយៈសារពើពន្ធជាតិ ដែលករណីនេះបានដំណើរការស្រាប់ទៅហើយ នេះជាដំណោះស្រាយ ដែលត្រូវបានគេប្រើប្រាស់ច្រើនបំផុត សម្រាប់ការគ្រប់គ្រងទីក្រុងធំនានា៕

ដោយៈស៊ីវ ម៉េង

បាត់ដំបងៈ គំរោងវិនិយោគលើហេដ្ឋារចនាសម្ព័ន្ឋស្នូល ដែលមានគោលដៅធ្វើពិពិធកម្ម និងទាញតម្លៃបន្ថែមផ្នែកសេដ្ឋកិច្ចរបស់រដ្ឋាភិបាល និងការវិនិយោគពីវិស័យឯកជនកំពុងជំរុញ និងលើកស្ទួយសក្តានុពលខេត្តបាត់ដំបង។

ផ្លូវជាតិលេខ១០
បច្ចុប្បន្នផ្លូវជាតិជាប្រវត្តិសាស្រ្ត ដែលតភ្ជាប់ពីស្រុកសំឡូត ខេត្តបាត់ដំបង ទៅកាន់ខេត្តពោធិសាត់ និងតភ្ជាប់ទៅកាន់ខេត្តកោះកុង សម្រេចបានប្រមាណ៦០ភាគរយហើយ ខណៈវាជាផ្លូវប្រវត្តិសាស្រ្ត ដែលតភ្ជាប់តំបន់ភូមិភាគពាយ័ព្យ ទៅកាន់តំបន់ឆ្នេរជាលើកដំបូង។

ផ្លូវជាតិ១ខ្សែ ដែលទទួលបានហិរញ្ញប្បទានពីរដ្ឋាភិបាលចិននេះ ជាផ្នែកមួយនៃការដឹកជញ្ជូនកសិផលដ៏សម្បូរបែបពីភូមិភាគពាយ័ព្យ ទៅកាន់តំបន់ឆ្នេរ ដើម្បីនាំចេញទៅកាន់ប្រទេសទី៣ ដែលជាផ្នែកមួយនៃការពង្រឹងឯករាជ្យភាពផ្នែកសេដ្ឋកិច្ចកម្ពុជា សមាហរណកម្មផ្ទៃក្នុង និងលើកកំពស់សេដ្ឋកិច្ចជាតិ។ នេះបើតាមការឲ្យដឹងពីលោកវ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូន។

ការស្តារព្រលានយន្តហោះ
រដ្ឋាភិបាលតាមរយៈក្រុមការងារអន្តរក្រសួង បានសិក្សាលើផែនការស្តារឡើងវិញនូវព្រលានយន្តហោះខេត្តបាត់ដំបង ដែលបានបោះបង់ចោលអស់រយៈពេលរាប់ទសវត្សរ៍ឡើងវិញ ដើម្បីសម្រួលដល់ការតភ្ជាប់ការដឹកជញ្ជូនផ្នែកផ្លូវអាកាស​ ក៏ដូចជាជម្រុញសក្តានុពលរបស់ខេត្តដែលមានស្រាប់នេះ។

ទោះជាយ៉ាងណាការសិក្សា លទ្ឋភាពស្តារឡើងវិញនូវព្រលាននេះ ក្នុងទំហំកម្រិតណា និងចំណាយអស់ទឹកប្រាក់ប៉ុន្មាន មិនទាន់មានរបាយការណ៍សិក្សាបញ្ជាក់លំអិតទេ ដោយសារបញ្ហាជំងឺកូវីដ១៩ ដែលកំពុងសបន្លាយ។
អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹងកាលពីពេលថ្មីៗនេះថា ការសិក្សាលទ្ឋភាពស្តារឡើងវិញ នូវព្រលានយន្តហោះខេត្តបាត់ដំបង ត្រូវបានផ្អាកដោយសារបញ្ហារីករាលដាលជំងឺកូវីដ១៩។

ផ្លូវតភ្ជាប់ពីខេត្តសៀមរាប
កាលពីពេលថ្មីៗនេះ លោកវ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ថា រដ្ឋាភិបាលមានផែនការសាងសង់ផ្លូវមួយខ្សែ តភ្ជាប់ពីក្រុងសៀមរាប មកកាន់ក្រុងបាត់ដំបង ដែលផ្កូវនេះមានប្រវែងប្រមាណ៦០គីឡូម៉ែត្រ។

លោកបន្តថា ផ្លូវមួយខ្សែនេះ តាមគំរោងនឹងសាងសង់ស្ពានឆ្លងកាត់ទន្លេសាប ដើម្បីសាងសង់ប៉មធំមួយ សំរាប់ឲ្យភ្ញៀវទេសចរណ៍សំរាកលំហែរកាយ និងគយគន់ទេស​ភាពទន្លេសាប ដែលគំរោងបែបនេះត្រូវបានរៀបចំនៅប្រទេសកូរ៉េ ជប៉ុន ទីក្រុងហុងកុងរួចហើយ។

លោកបន្តថា “ការសាងសង់ផ្លួវនេះជាផែនការអាទិភាពមួយ ដែលឯកឧត្តមទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូនលោកចង់បានណាស់”។

ការលើកស្ទួយទេសចរណ៍
នៅក្នុងការរៀបចំផែនការមេតភ្ជាប់ខ្សែចង្វាក់ទេសចរណ៍ ដើម្បីឲ្យភ្ញៀវទេសចរណ៍អន្តរជាតិចំណាយប្រាក់កាន់តែច្រើន និងស្នាក់នៅកាន់តែយូរនៅកម្ពុជា រដ្ឋាភិបាលមានគោលដៅលើកស្ទួយទេសចរណ៍ខេត្តបាត់ដំបង ដោយធ្វើយ៉ាងណាទាក់ទាញភ្ញៀវពីក្រុងសៀមរាប មកទស្សនា​និងស្នាក់នៅខេត្តបាត់ដំបង តាមរយៈផ្លូវជាតិមួយខ្សែដែលតភ្ជាប់ពីក្រុងសៀមរាប មកកាន់ក្រុងបាត់ដំបងនាពេលខាងមុខ។

ប៉ុន្តែទោះជាយ៉ាងណា ការសាងសង់ផ្លូវមួយខ្សែនេះចេញពីតំបន់ណា មកភ្ជាប់នៅខេត្តបាត់ដំបងនៅតំបន់ណា មិនទាន់មានការបញ្ជាក់ឲ្យដឹងនៅឡើយទេ ខណៈវាស្ថិតនៅ​ក្នុងផែនការនៅឡើយ។

ផ្លូវជាតិលេខ៥
ផ្លូវជាតិលេខ៥ ដែលមានប្រវែងដ៏វែង និងតភ្ជាប់ពីព្រំដែនប្រទេសថៃ កាត់វាលទំនាបកណ្តាលប្រទេសកម្ពុជា និងឆ្ពោះទៅកាន់ប្រទេសវៀតណាម ដែលទទួលបានហិរញ្ញប្បទានសម្បទាន ពីរដ្ឋាភិបាលជប៉ុនជាង៥០០លានដុល្លារ នឹងក្លាយជាសសៃឈាមសេដ្ឋកិច្ចដ៏សំខាន់មួយ ក្នុងការលើកស្ទួយសេដ្ឋកិច្ចតំបន់។

ផ្លូវជាតិមួយខ្សែនេះ ក៏តភ្ជាប់ជាមួយនឹងផែនការអភិវឌ្ឍន៍នៃយុទ្ឋសាស្រ្តត្បូង ត្បូងរបស់អាស៊ាន ដែលផ្លូវនេះត្រូវបានចាត់ទុកថា ជាផ្លូវហាយវេរបស់អាស៊ាន ដែលនឹងជួយសម្រូលលំហូរពាណិជ្ជកម្ម ទេសចរណ៍ ឧស្សាហកម្មផងដែរ ដែលធ្វើឲ្យខេត្តស្ថិតនៅស្របតាមផ្លួវនេះ ទទួលបានផលប្រយោជន៍ផ្នែកសេដ្ឋកិច្ច និងទាញតម្លៃបន្ថែមផ្នែកសេដ្ឋ​កិច្ចមួយកម្រិតទៀត។

គំរោងអភិវឌ្ឍន៍ទំហំ៥០០ហិកតា
ជាមួយនឹងផែនការប្រកបដោយមហិច្ឆតា អ្នកឧកញ៉ាឡេង ណាវ៉ាត្រាបាននិងកំពុងវិនិយោគលើផ្ទៃដី៥០០ហិកតា នៅកៀកក្រុងបាត់ដំបង ដើម្បីសាងសង់រមណីយដ្ឋាន លំនៅដ្ឋាន សេវាកម្មលំហែរកាយ មជ្ឈមណ្ឌលពាណិជ្ជកម្មនៅខខេត្តនេះផងដែរ។

គំរោដ៏ធំនេះ កំពុងធ្វើឲ្យតម្លៃដីធ្លីនៅក្រុងបាត់ដំបង ឡើងថ្លៃមួយកម្រិតទៀត ពិសេ​សការប្រកាសស្តារឡើងវិញ នូវព្រលានយន្តហោះក្រុងបាត់ដំបង បានធ្វើឲ្យទីក្រុងនេះកាន់តែទាក់ទាញការវិនិយោគកាន់តែ​ច្រើន ពីវិនិយោគិនជាតិ និងអន្តរជាតិ៕

ដោយៈគង់ សូរិយា

ភ្នំពេញៈ ចិនបានក្លាយជាអ្នកវិនិយោគឈានមុខគេនៅកម្ពុជា ដោយសារទំនាក់ទំនងល្អរវាងរដ្ឋាភិបាលប្រទេសទាំងពីរ ដោយសារកំនើនសេដ្ឋកិច្ច និងដោយសារមូល ដ្ឋានច្បាប់នានា ដែលផ្តល់ការលើកកំពស់បេរិយាកាសវិនិយោគនៅកម្ពុជា។

ប៉ុន្តែអ្នករកស៊ី ឬអ្នកវិនិយោគជនជាតិចិន មិនមែនជាអ្នកវិនិយោគដែលងាយស្រួលសហការនោះឡើយ បើទោះជាពួកគេចូលមកច្រើននៅប្រទេសយើងក្តី ហេតុនេះការសិក្សាពីប្រពៃណី ទំនៀមទំលាប់ និងវិធីធ្វើជំនួញរបស់ជនជាតិចិនជារឿងចាំបាច់ ដើម្បីអាចសហការជាមួយពួកគេបាន។

កំណើនរបស់អតិថិជនចិន
ប្រជាជនចិនមានទ្រព្យសម្បត្តិមធ្យមៗ មិនសូវវិនិយោគដូចអ្នកមានលុយច្រើនទេ តែជនជាតិចិន ដែលមានទ្រព្យសម្បត្តិស្តុកស្តម្ភខ្លាំងទៅវិញទេ ដែលចាប់អារម្មណ៍ខ្លាំងលើឱកាសវិនិយោគក្រៅស្រុក។

-នៅប្រទេសចិន អ្នកមានជីវភាពមធ្យមមាន៧២០លាននាក់ (ឆ្នាំ ២០២៤) ក្រុមអ្នកមាន (HNW Chinese) មាន៦លាននាក់ (ឆ្នាំ ២០២៥) និងអ្នកមានខ្លាំង (Affluent Chinese)  ៥៦ លាននាក់ (ឆ្នាំ ២០២២) ។
តាមការព្យាករណ៍ការដោះដូរ (Transaction) ទិញលក់អចលនទ្រព្យនៅក្រៅប្រទេសរបស់ចិន នឹងកើនដល់២២០ពាន់លានដុល្លារ នៅឆ្នាំ២០២០ នេះ ហើយ៦៥% ចូលចិត្តទូទាត់ជាលុយសុទ្ធ។

ចំនួន-៦១% នៃអ្នកមានខ្លាំង ឬសេដ្ឋី (Affluent Chinese) វិនិយោគអចលនទ្រព្យនៅក្រៅប្រទេសតាមវិធីជាច្រើន ដើម្បីយកប្រាក់ចំណេញត្រឡប់មកវិញ។

ចំនួន៥៦% នៃអ្នកមានចិន (HNW Chinese) បានធ្វើចំណាកស្រុក ឬមានគម្រោងទៅរស់នៅក្រៅប្រទេស។
ចំនួន៤ភាគរយ នៃអ្នកមានចិន (HNW Chinese) ទិញដើម្បីរស់នៅពេលចូលនិវត្តន៍។
ចំនួន-ជនជាតិចិនដីគោកត្រឹមតែ១ភាគរយប៉ុណ្ណោះ ចេះនិយាយអង់គ្លេសស្ទាត់ជំនាញ។
ចំនូនអ្នកមានចិន (HNW Chinese) ៨០% ប្រើ Wechat ដើម្បីទាក់ទង -អ្នកមានខ្លាំងបំផុត ឬសេដ្ឋី (Affluent Chinese) ៩១% ប្រើអ៊ីនធឺណិតរាល់ថ្ងៃ។
ចំនួនប្រជាជនចិន៩១លាននាក់ រកមើលអចលនទ្រព្យតាមអនឡាញជាប្រចាំ។

-៨៩៧ លាននាក់ប្រើអ៊ីនធឺណិតនៅលើទូរស័ព្ទដៃ

ជនជាតិចិនស្វែងរកចលនទ្រព្យដោយវិធីណា? 
ជនជាតិចិនប្រើមធ្យោបាយច្រើនរបៀប តាមដែលអាចធ្វើទៅបាន ដើម្បីរកទិញអចលនទ្រព្យក្រៅស្រុក ដូចជា ពិនិត្យមើលការចុះបញ្ជីលក់អចលនទ្រព្យ (Listing) ក្រុមហ៊ុនលក់អចលនទ្រព្យ ច្បាប់អចលនទ្រព្យរបស់ប្រទេសទាំងនោះ  លក្ខខណ្ឌរបស់ជនអន្តោប្រវេសន៍ ស្តង់ដារអប់រំ និងពិនិត្យមើលកត្តាផ្ទាល់ខ្លួនជាច្រើនទៀត។
ពួកអ្នកមានទាំងនោះ ចូលចិត្តស្វែងរកមើលអចលនទ្រព្យ តាមរយៈឈ្មោះក្រុមហ៊ុនល្បីៗ ( បែបចិន ឬលោកខាងលិច) ឬក្រុមហ៊ុនដែលមានវិជ្ជាជីវៈ និងកេរ្តិ៍ឈ្មោះបោះសម្លេងនៅលើឆាកអន្តរជាតិ។

តើគេលក់អចលនទ្រព្យទៅឲ្យអ្នកទិញជនជាតិចិនដោយរបៀបណា?
សម្រាប់ជនជាតិចិន សម្លឹងមើលអចលនទ្រព្យក្នុងប្រទេសណា ដែលអាចផ្ដល់របៀបរស់នៅមានភាពទាក់ទាញ ស៊ីវិល័យ ងាយស្រួលសម្រាប់ការវិនិយោគ លក្ខខណ្ឌរបស់ជនអន្តោប្រវេសន៍ល្អ និងឱកាសអប់រំជាដើម។ អ្នកទាំងនេះ ជាក្រុមអ្នកទិញអចលនទ្រព្យដ៏ធំបំផុតនៅលើពិភពលោក  ហើយចំនួននេះកើនមិនឈប់ទេ។

ដំណើរការទិញលក់អចលនទ្រព្យ ក្រៅស្រុកមិនលឿនដូចក្នុងស្រុកទេ។ វាត្រូវការពេលយូរសម្រាប់ជនជាតិចិន   ដោយសារកត្តាភាសាផង  បញ្ហាគ្រប់គ្រងដើមទុន ការរឹតបណ្ដឹងរបស់រដ្ឋាភិបាលចិន លើការផ្ទេរប្រាក់ បញ្ហាច្បាប់របស់ប្រទេសនីមួយៗ បញ្ហាពន្ធ ក៏ដូចជាកង្វះ និងការរឹតត្បិតព័ត៌មានជាដើម ព្រោះនៅចិនការប្រើប្រាស់ Google, Youtube, Facebook និង Instagram មិនត្រូវបានអនុញ្ញាតទេ៕

ដោយៈ សាវុធ

ភ្នំពេញៈ ដើម្បីក្លាយជាភ្នាក់ងារអចលនទ្រព្យ ដែលជោគជ័យម្នាក់ វាមិនមែនជាងាយស្រួល ដែលភ្នាក់ងារអាចធ្វើបាននោះទេ ខណៈដែលវាទាមទការការតស៊ូ អត់ធ្មត់ និងមានចិត្តចង់ធ្វើជាភ្នាក់ងារអចលនទ្រព្យប្រាកដ និងត្រៀមខ្លួនពីការអត់ចំណូលរហូតដល់១ឆ្នាំទៅ២ឆ្នាំ។

ថ្ងៃនេះគេហទំព័រ Propertyarea.asia នឹងលើកយកពីសកម្មភាពប្រចាំថ្ងៃ របស់ភ្នាក់ងារអចលនទ្រព្យជោគជ័យដូចជា

ទី១) ជ្រើសរើសធ្វើសកម្មភាពត្រឹមត្រូវ
នៅពេលដែលអាជីពជាភ្នាក់ងារអចលនទ្រព្យរបស់យើង កំពុងតែរីកចម្រើនទៅមុខ ការជ្រើសរើសសកម្មភាព សម្រាប់ប្រតិបត្តិប្រចាំថ្ងៃឱ្យបានត្រឹមត្រូវនោះ វាក៏ជាឧប​សគ្គមួយដែរ។

ការងារជាច្រើនប្រជែងគ្នា​ ចូលមកដណ្ដើមពេលវេលា និងការយកចិត្តទុកដាក់របស់យើងក្នុងមួយថ្ងៃៗ យើងក៏បានចំណាយពេលវេលា និងការយកចិត្តទុកដាក់ជាច្រើន ជាមួយនឹងការងារទាំងនោះ ដូច្នេះយើងត្រូវតែជ្រើសរើសយកការងារណា ដែលត្រឹមត្រូវ និងអាចហុចផលវិជ្ជមានត្រលប់មកវិញ។

ទី២) សកម្មភាព
នៅពេលដែលសម្រេចចិត្តថា ជ្រើសរើសសកម្មភាពមួយណា ដែលត្រូវធ្វើយើងត្រូវតែធ្វើយ៉ាងលម្អិត និងត្រូវផ្ដោតការយកចិត្តទុកដាក់បំផុតទៅលើវា។ ចង់ធ្វើជាភ្នាក់ងារអចលនទ្រព្យ ដែលជោគជ័យ គឺត្រូវតែផ្ដោតលើការងារអចលនទ្រព្យ បើសិនជាធ្វើលេងៗនោះទេ ក្នុងមួយឆ្នាំៗយើងប្រាកដបិទការលក់ បានតិចណាស់ឬស្ទើរតែពុំមានផង។

ទី៣) រង្វាស់លទ្ធផលនៃការងារ (KPI)
នៅពេលដែលយើង ធ្វើផែនការសកម្មភាពរួចរាល់ហើយនោះ ចំណុចសំខាន់បផុតក្នុងវិស័យអចលនទ្រប្យ គឺរង្វាស់លទ្ធផលនៃការងារនេះឯង។

បើយើងមិនខិតខំធ្វើវានោះទេ យើងនឹងមិនទទួលបានលទ្ធផលអ្វីឡើង ផ្ទុយទៅវិញដៃគូប្រកួតប្រជែង យើងដែលគេធ្វើជាប្រចាំនោះ នឹងទទួលផលក្នុងពេលតែមួយ។ KPI នេះពិតជាសំខាន់ណាស់ដែលយើងត្រូវតាមដាន និងចាំមើលនៅពេលវេលាណាមួយសមស្របដូចជាកន្លះឆ្នាំម្ដង ឬមួយឆ្នាំម្ដង នោះវានឹងធ្វើឱ្យដឹងពីសមត្ថភាពរបស់យើងរីកលូតលាស់កម្រិតណា ។

ទី៤) ផ្សាភ្ជាប់ការអនុវត្តជាមួយនឹងផែនការ
មនុស្សជាច្រើនចូលចិត្តជជែក និងលើកឡើងពីផែនការ ប៉ុន្តែពួកគេមិនចង់អនុវត្តន៍ផែនការទាំងនោះទេ ពីព្រោះនៅពេលលើកយកផែនការមកអនុវត្ត យើងនឹងដឹងថាការអនុវត្តជាក់ស្ដែង ដែលបានលើកឡើង វាមានការលំបាកខ្លាំងប៉ុណ្ណា។

ការគិតរបៀបនេះ វាតែងតែកើតឡើងចំពោះបុគ្គលគ្រប់រូប ដែលចាប់ផ្ដើមអនុវត្តផែនការដំបូង ដូច្នេះនៅពេលដែលវាកើតឡើងចំពោះយើង ត្រូវចងចាំថា វាគ្មានអ្វីធំជាងការអត់ធ្មត់ និងតស៊ូព្យាយាមនោះទេ។

ទី៥) កាលវិភាគប្រចាំថ្ងៃ
ភ្នាក់ងារអចលនទ្រព្យជោគជ័យ ឬអ្នកជោគជ័យ គេតែងតែមានកាលវិភាគប្រចាំថ្ងៃរបស់គេរៀងៗខ្លួន។ គ្រាន់តែកាលវិភាគរបស់គេបង្ហាញសកម្មភាពខុសគ្នា ដូចជាការហាត់ប្រាណ សម្ដែងការគួរសមទៅកាន់មិត្តភក្ដិ ឬអ្នកជិតស្និទ្ធិតាមបណ្ដាញសង្គម ប្រអប់សារ ម៉ោងធ្វើការ ម៉ោងមាសប្រាក់របស់គេ ពេលវេលាចូលរួមកម្មវិធី និងពេលវេលាសម្រាប់សម្រាករបស់គេជាដើម។

មានអ្នកជោគជ័យជាច្រើនទៀត ដែលបានបង្ហាញពីសកម្មភាព និងការងារប្រចាំថ្ងៃរបស់ពួកគេ។ ដូច្នេះទើបមានរឿងនិទាននិយាយពីបុរសអ្នកក្រ ទៅសង់ខ្ទមក្បែរបុរសអ្នកមាន ដើម្បីតាមដានពីសកម្មភាពរបស់អ្នកមាន និងអនុវត្តតាមអ្នកមានរហូតក្លាយជាអ្នកមានដែរ។ ទាំងនេះ គ្រាន់តែជាគន្លឹះមួយចំនួន សម្រាប់អនុវត្តន៍ចំពោះអ្នកចង់ក្លាយជាភ្នាក់ងារអចលនទ្រព្យតែប៉ុណ្ណោះ។ យ៉ាងណាក៏ដោយ នៅមានចំណុចជាច្រើនសម្រាប់ផ្ដល់ជូនអ្នកអានបន្តបន្ទាប់ទៀតផងដែរ៕