ដោយៈវឌ្ឈនៈ

ភ្នំពេញៈ គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅស្រុកកណ្ដាលស្ទឹងខេត្តកណ្ដាល ដែលកំពុងមមាញឹកក្នុងការសាងសង់យ៉ាងសកម្ម ទោះស្ថិតនៅក្នុងវិបត្តិកូវីដ១៩ក្ដី បាននិងកំពុងបង្ហាញពីភាពទាក់ទាញ ដល់បណ្ដាវិនិយោគិនក្នុងស្រុកលើវិស័យអចលនទ្រព្យ ជាពិសេសលំនៅឋាននិងពាណិជ្ជកម្ម។

បច្ចុប្បន្ននេះ គេសង្កេតឃើញថាបណ្ដាវិនិយោគិនអចលនទ្រព្យជាច្រើន បានចាប់ផ្ដើមអភិវឌ្ឍន៍ គម្រោងរបស់ខ្លួនជាបន្តបន្ទាប់ ដំណាលគ្នានឹងការអភិវឌ្ឍហេដ្ឋារចនាស ម្ព័ន្ធរបស់រដ្ឋផងដែរ។

ម្ចាស់គម្រោងអភិវឌ្ឍន៍អចលនទ្រព្យជាច្រើន ដែលអនុវត្តន៍គម្រោងរបស់ខ្លួននៅភាគខាងត្បូងរាជធានីភ្នំពេញ ក្បែរគម្រោងព្រលាយន្តហោះអន្តរជាតិភ្នំពេញថ្មី សុទ្ធតែបានបង្ហាញសុទិដ្ឋិនិយមថា ការវិនិយោគរបស់ខ្លួននៅតំបន់ភាគខាងត្បូងរាជធានីភ្នំពេញនឹងទទួលបានជោគជ័យ ខណៈរដ្ឋាភិបាលក៏បាននិងកំពុងសាងសង់ ហេដ្ឋារចនាសម្ព័ន្ធ ថ្មីៗ និងកែលម្អហេដ្ឋារចនាសម្ព័ន្ធចាស់ឱ្យប្រសើរឡើងវិញ ដូច្នេះនៅពេលអនាគត គម្រោងដែលខ្លួនអភិវឌ្ឍន៍នឹងកាន់តែមានសក្ដានុពលបន្ថែមទៀត។

លោកស្រីឃួន លក្ខិណាអគ្គនាយិការងក្រុមហ៊ុនអភិវឌ្ឍន៍លំនៅឋានប្រណីតមួយនៅក្បែរព្រលានយន្តហោះអន្តរជាតិភ្នំពេញថ្មី បានឱ្យដឹងកាលពីម្សិលម៉ិញថា កត្តាដែលជំរុញឱ្យក្រុមហ៊ុន ចាប់អារម្មណ៍លើការអភិវឌ្ឍនៅតំបន់ប៉ែកខាងត្បូង ដោយសារតែកត្តាមួយចំនួន ក្នុងនោះផ្លូវជាច្រើនបានសាងសង់តភ្ជាប់ពីភ្នំពេញ ទៅកាន់តំបន់នោះ ផ្លូវថ្មីៗបន្ថែមទៀតក៏បាននិងកំពុងអភិវឌ្ឍន៍ថ្មីៗ ដែលធ្វើឱ្យការធ្វើដំណើរពីភ្នំពេញ ទៅកាន់គម្រោងអភិវឌ្ឍន៍កាន់តែប្រើពេលវេលាខ្លី ។

អ្នកជំនាញនៃវិស័យអចលនវត្ថុកម្ពុជាជាច្រើន បានបញ្ចេញទស្សនៈស្រដៀងគ្នាថា តំបន់ភាគខាងត្បូង ត្រូវបានមើលឃើញថាកំពុងមានសក្ដានុពល ក្នុងការអភិវឌ្ឍលំនៅឋានពិតមែន។ តំបន់នេះមានការអភិវឌ្ឍ ទៅលើគម្រោងលំនៅឋានជាបណ្ដើរៗ តាំងពីមុន គម្រោងព្រលាយន្តហោះអន្តរជាតិត្រូវបានសាងសង់ ហើយនៅពេលគម្រោងនេះប្រកាសសាងសង់ជាផ្លូវការ ទើបគេមើលឃើញមានគម្រោងជាច្រើន ក៏ចាប់ផ្ដើមពង្រីកការអភិវឌ្ឍរបស់ខ្លួនជាបន្តបន្ទាប់ ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានលើកឡើងថា ការអភិវឌ្ឍអចលនទ្រព្យ ត្រូវបានមើលឃើញថា ស្ទើរតែជុំវិញរាជធានីភ្នំពេញទៅហើយ ប៉ុន្តែតំបន់នីមួយៗមានសក្ដានុពល និងផ្នែកនៃការអភិវឌ្ឍខុសគ្នាតិចតួច ។ នៅតំបន់ខាងត្បូងរាជធានីភ្នំពេញ យើងឃើញមានគម្រោងអភិវឌ្ឍន៍ទៅលើផ្សារទំនើប លំនៅឋានប្រណីតៗ គម្រោងបុរីជាច្រើន ដែលបង្ហាញពីសក្ដានុពលនៃការអភិវឌ្ឍន៍លំនៅឋានខ្ពស់ ។

លោកបន្តថា “តំបន់នេះក៏មានគម្រោងរបស់រដ្ឋកំពុងអភិវឌ្ឍន៍ យ៉ាងផុសផុលផងដែរ ដែលជំរុញឱ្យវិនិយោគិនជាច្រើនកាន់តែចាប់អារម្មណ៍ លើការអភិវឌ្ឍគម្រោងរបស់ខ្លួនផងដែរ”៕

ដោយៈស៊ីវ ម៉េង

ភ្នំពេញៈ សកម្មភាពទិញលក់ដីធ្លី នៅជាយក្រុងភ្នំពេញ នៅតែមានភាពសកម្ម បើទោះបីជាស្ថាបភាពសេដ្ឋកិច្ច មិនសូវមានភាពអំណោយផលក្តី ប៉ុន្តែសកម្មភាពទិញលក់នៅតែបន្តកើនឡើង។

តើកត្តាអ្វីខ្លះ ដែលជម្រុញឲ្យមានចរន្តទិញលក់បែបនេះ? ខណៈពេលរដ្ឋាភិបាលបិទបញ្ចប់ការបិទខ្ទប់ បានធ្វើឲ្យសកម្មភាពទិញលក់ដីធ្លីកើនឡើងវិញ។

ហេដ្ឋារចនាសម្ព័ន្ឋ
ហេដ្ឋារចនាសម្ព័ន្ឋនៅកម្ពុជា បានបង្កើនតម្លៃបន្ថែមក្នុងសេដ្ឋកិច្ច ពិសេសក្នុងវិស័យសំណង់ និងអចលនទ្រព្យយ៉ាងខ្លាំងនៅកម្ពុជា ជាក់ស្តែង ដូចជា តំបន់ផ្លូវក្រវ៉ាត់ក្រុងទី៣ ផ្លូវល្បឿនលឿនភ្នំពេញ ព្រះសីហនុ ផ្លូវជាតិលេខ៤១ ផ្លូវជាតិលេខ៥១ជាដើម សុទ្ឋតែជាតំបន់ដែលមានការរីកចម្រើន និងទាក់ទាញការវិនិយោគ។

គម្រោងសាងសង់ព្រលានយន្តហោះអន្តរជាតិធំៗ ដូចជា ព្រលានយន្តហោះអន្តរជាតិភ្នំពេញថ្មី ព្រលានយន្តហោះអន្តរជាតិថ្មី ខេត្តសៀមរាប ព្រលានតារាសាគរ ខេត្តកោះកុង ក៏បាននិងកំពុងរីកចម្រើនលឿនផងដែរ ពិសេសតម្លៃអចលនទ្រព្យ នៅតំបន់ទាំងនោះបានឡើងថ្លៃ ហើយសកម្មភាពអភិវឌ្ឍន៍បានកើនឡើងជាបន្តបន្ទាប់។

ប្រជាសាស្រ្ត
កត្តាប្រជាសាស្រ្ត ដែលសំដៅលើចំនួនប្រជាពលរដ្ឋ ក៏ជាកត្តាទាក់ទាញផងដែរ ព្រោះនៅតំបន់ណាមានប្រជាពលរដ្ឋរស់នៅច្រើន តំបន់នោះមានការរីកចម្រើនទាំងសេដ្ឋកិច្ច អាជីវកម្ម និងធ្វើឲ្យតម្លៃអចលនទ្រព្យកើនឡើងផងដែរ។

ការរីកចម្រើននៃសេដ្ឋកិច្ច សង្គម បាននិងកំពុងទាក់ទាញការអភិវឌ្ឍ និងវិនិយោគពីវិនិយោគិនេះជាតិ និងអន្តរជាតិ ដែលធ្វើឲ្យប្រជាជនចូលមករស់នៅតាមតំបន់ទីប្រជុំជននិងតំបន់ជាយក្រុងកាន់តែចច្រើន។

នគរូបនីយកម្ម
នគរូបនីយកម្ម គឺជាប់ទាក់ទងគ្នាមិនអាចកាត់ផ្តាច់បាន និងប្រជាជន។ ហេតុនេះការរីកចម្រើន សេដ្ឋកិច្ច សង្គម បានជម្រុញឲ្យមានការរីកចម្រើន ផ្នែកនគរូបនីយកម្មផងដែរ។

ការរីកចម្រើន នគរូបនីយកម្មតែងតែផ្សារភ្ជាប់នឹងជីវិត សេដ្ឋកិច្ចសង្គម។ ហេតុនេះទើបទីក្រុងភ្នំពេញកាន់តែរីកធំ ហេដ្ឋារចនាសម្ព័ន្ឋនា នាត្រូវបានរដ្ឋាភិបាលយកចិត្តទុកដាក់វិនិយោគជាបន្តបន្ទាប់ ដើម្បីឆ្លើយតបនឹងតម្រូវការរបស់ប្រជាពលរដ្ឋ។

ការពង្រីកទីក្រុង
រាជរដ្ឋាភិបាលកម្ពុជា តែងតែសម្លឹងមើលពីនិន្នាការរីកចម្រើនរបស់ទីក្រុង ទាំងហេដ្ឋារចនាសម្ព័ន្ឋ ចំនួនប្រជាពលរដ្ឋ ចំនួនយានយន្ត ការកកស្ទះចរាចរណ៍ជាដើម។

ហេតុនេះរៀងរាល់៥ឆ្នាំម្តង រដ្ឋាភិបាលតែងតែគិតគូពីការអភិវឌ្ឍ និងពង្រីកទីក្រុង ដើម្បីឆ្លើយតបនឹងកំណើនប្រជាពលរដ្ឋ កាត់បន្ថយការកកស្ទះចរាចរណ៍ និងពង្រីកការអភិវឌ្ឍន៍កាន់តែធំទូលាយទៅកាន់ទីជនបទ មានន័យថា “បង្ខិតទីក្រុងឲ្យកៀកនឹងជនបទ។

ឥទ្ឋិពល
តាមធម្មតា ការរីកចម្រើនរបស់រដ្ឋធានីមួយ ឬរាជធានីរបស់ប្រទេសមួយ តែងតែសាយភាយ និងជះឥទ្ឋិពលជាវិជ្ជមានដល់តំបន់ស្ថិតនៅក្បែរ។

ឧទាហរណ៍ជាក់ស្តែង ការរីកចម្រើនរាជធានីភ្នំពេញ បានជះឥទ្ឋិពលដល់ខេត្តកណ្តាល ជះឥទ្ឋិពលដល់ខេត្តកំពង់ស្ពឺ ដោយសារខេត្តទាំងនេះ មានហេដ្ឋារចនាសម្ព័ន្ឋតភ្ជាប់គ្នា មានលំហូរប្រជាពលរដ្ឋទៅវិញទៅមក ដែលបានធ្វើឲ្យអ្នកវិនិយោគជាតិ អន្តរជាតិស្វែងរកឱកាស វិនិយោគលើហេដ្ឋារចនាសម្ព័ន្ឋផង អចលនទ្រព្យផង និងសេវាកម្មជាច្រើនទៀតផង៕

ដោយៈគង់ សូរិយា

ភ្នំពេញៈ ក្រៅពីការប្រកបរបរអាជីវកម្ម ដើម្បីស្វែងរកប្រាក់ចំណេញ ប្រជាពលរដ្ឋទូទៅ ក៏ពេញនិយមយកប្រាក់ទៅវិនិយោគលើអចលនទ្រព្យផងដែរ ប៉ុន្តែការទទួលបាន​ផលចំណេញពីការវិនិយោគ គេត្រូវការវិធីសាស្រ្តច្បាស់លាស់ និងត្រឹមត្រូវ។

នេះជារបៀបវាយតម្លៃអចលនទ្រព្យមុននឹងទិញ ដើម្បីប្រាកដក្នុងចិត្តថាអចលនទ្រព្យរបស់អ្នក នឹងផ្តល់ផលចំណេញក្នុងរយៈពេលខ្លីខាងមុខ
១. ជ្រើសរើសទីតាំង
ទីតាំងអចលនទ្រព្យ គឺសំខាន់ណាស់ដែលវានឹងជះឥទ្ធិពល ដល់តម្លៃនៃអចលនទ្រព្យរបស់អ្នក ដោយត្រូវជ្រើសរើសទីតាំងដែលស្ថិតនៅជាប់នឹងផ្លូវធំ ហើយមានមនុស្សជិះកាត់ចេញចូលច្រើន សូមកុំរើសទីតាំងមានផ្លូវទាល់។អ្នកអាចសាកសួរអាជ្ញាធរ ពីគម្រោងអភិវឌ្ឍន៍នៅរយៈពេល ៣ឬ៥ឆ្នាំខាងមុខទៀត ដើម្បីដឹងថា តំបន់នោះនឹងមានការអភិវឌ្ឍឆាប់រហ័ស។

២. ប្រភេទសំណង់អាគារ
ថ្វីត្បិតថាបើអ្នកជ្រើសរើសទីតាំងបានល្អហើយ តែបើអ្នកមិនចេះត្រួតពិនិត្យមើលគុណភាពនៃសំណង់អាគារ ច្បាស់ណាស់ថាមិនយូរមិនឆាប់ អ្នកនឹងត្រូវចំណាយលុយច្រើនដើម្បីជួសជុលវាឡើងវិញ។

៣. បៀបធៀបតម្លៃអចលនទ្រព្យដែលនៅជិតគ្នា
មុននឹងសម្រេចចិត្តទិញខុនដូ ផ្ទះ ដី អ្នកគួរធ្វើការប្រៀបធៀបតម្លៃអចលនទ្រព្យដែលនៅជិតគ្នាសិន តើកន្លែងដែលអ្នកទិញមានតម្លៃទាបជាង ឬថ្លៃជាងគេ? ចុះបើថ្លៃជាងគេ តើវាបណ្តាមកពីមូលហេតុអ្វី? បើទិញអចលនទ្រព្យដែលមានតម្លៃថ្លៃជាងគេ ច្បា​ស់ណាស់ថា អ្នកនឹងពិបាកនៅពេលដែលលក់ចេញទៅវិញ។

៤. ត្រួតពិនិត្យមើលប្លង់ តើអចលនទ្រព្យដែលអ្នកទិញមានប្លង់រឹងដែរឬទេ?
អ្នកត្រូវដឹងថា បច្ចុប្បន្នអ្នកណាក៏ចង់ទិញអចលនទ្រព្យ ដែលមានប្លង់រឹងដែរ។ បើអ្នកទិញអលចនទ្រព្យ ដែលមិនមានប្លង់ត្រឹមត្រូវ អ្នកនឹងត្រូវប្រឈមជាមួយនឹងហានិភ័យច្រើនយ៉ាង។

៥. ហេដ្ឋារចនាសម្ព័ន្ធ
អ្នកត្រូវដឹងថាតើតំបន់ដែលអ្នកចង់ទិញ មានផ្លូវថ្នល់ សាលារៀន មន្ទីរពេទ្យ ឬមានទឹកលិចឬអត់? បើអ្នកមិនបានសង្កេតមើលចំណុចនេះទេ វានឹងបង្កជាហានិភ័យខ្លាំង ពិបាកទាំងការរស់នៅ ហើយអចលនទ្រព្យក៏ត្រូវជាប់គាំងនិងមិនអាចលក់ចេញដែរ។

នៅមានចំណុចជាច្រើនទៀតដែលអ្នកគួររៀនសូត្រ និងចេះពីរបៀបថ្លឹងថ្លែងមុននឹងសម្រេចចិត្តទិញអចលនទ្រព្យនៅទីតាំងណាមួយ ពាក្យមួយគេនិយាយថា “មើល ១០០ ទិញ ១” មានន័យថាត្រូវមើលកន្លែងឲ្យគ្រប់ជ្រុងជ្រោយ ឬដើរមើលឲ្យច្រើនកន្លែងមុននឹងសម្រេចចិត្តទិញ៕