លោកឧកញ៉ា ម៉ន សុខាៈការវិនិយោគដីធ្លីបន្តរីកចម្រើន ប៉ុន្តែស្ថិតក្នុងដំណើរយឺតៗ

ដោយៈសុជាតា

ភ្នំពេញៈ ក្នុងបរិបទកូវីដ១៩ វិស័យជាច្រើនបានប៉ះពាល់ ប៉ុន្តែវិស័យអចលនទ្រព្យ ជាពិសេសការពុះដីឡូលក់ ក៏បន្តមានសកម្មភាពទិញ លក់ បើទោះបីជាតម្លៃទ្រឹង និងគម្រោងអភិវឌ្ឍន៍ថ្មីជាច្រើនទៀត មិនទាន់ដំណើរការក្តី។

លោកឧកញ៉ា ម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជាបានប្រសាសន៍ឲ្យដឹងកាលពីសប្តាហ៍មុនថា និន្នាការអភិវឌ្ឍអចលនទ្រព្យក្នុងបរិបទកូវីដ១៩ ជាពិសេសការពុះដីឡូត៏ នៅតែកើតមានសម្រាប់អ្នកមានចំណូលមធ្យម និងចំណូលទាប ដែលបានធ្វើអោយវិស័យដីធ្លីបន្តរីកចំរើន ពីខេត្តមួយទៅខេត្តមួយ។

លោកបន្តថា សម្រាប់ឆ្នាំ២០២១នេះ ការទិញ លក់អចលនទ្រព្យ បានបន្តកើនឡើងនៅខេត្តកំពត ជាពិសេសទីក្រុងបូកគោ និងខេត្តកំពង់ឆ្នាំង ពិសេសតំបន់ស្ថិតនៅតាមបណ្តោយផ្លូវជាតិលេខ៥ ចាប់ពីតំបន់ឧត្តុង្គ រហូតដល់ស្រុកបរិបូរណ៍ខេត្តកំពង់ឆ្នាំង។

លោកឧកញ៉ាបន្ថែមទៀតថា “ការវិនិយោគដីធ្លី ទាមទារពេលវេលាពី៣ឆ្នាំទៅ៥ឆ្នាំ ដើម្បីទាញរកផលចំណេញបាន”។ លោកបន្តថា “អតិថិជនត្រូវសិក្សាពីចំណូលរបស់ខ្លូន ព្រមទាំងព័ត៌មានជាក់លាក់ ទាក់ទងនឹងគោលដៅអភិវឌ្ឍន៍ តាមរយៈក្រុមប្រឹក្សាអភិវឌ្ឍកម្ពុជា និងស្ថាប័នព៌តមាននានា ដើម្បីអាចរកផលចំណេញបាន”។

លោកឧកញ៉ាម៉ន សុខាបានលើកឡើងថា ដើម្បីបញ្ចៀសហានិភ័យ អតិថិជនដែលចង់វិនិយោគដីធ្លី ត្រូវទាមទារយកប្លង់រ៉ឹង ដែលជាកម្មសិទ្ធិស្របច្បាប់ និងសិក្សាពីផែនការមេរបស់ម្ចាស់ដីឡូត៏ ដែលបានចុះបញ្ជីរត្រឹមត្រូវនៅក្រសួង ស្ថាប័នពាក់ព័ន្ធ។ ជាងនេះទៀត អតិថិជន ក៏គួរស្វែងរកអ្នកជួយផ្តល់ប្រឹក្សាយោបល់ខាងដីធ្លី និងអ្នកច្បាប់ផងដែរ៕

ក្រុមហ៊ុនឧស្សាកម្មចិនបានរក្សាសេ្ថរភាពលើកំណើនប្រាក់ចំណេញ

ដោយៈសុជាតា

ប្រទេសចិនៈ ក្រុមហ៊ុនឧស្សាហកម្មធំៗរបស់ប្រទេសចិន បានរក្សាកំណើន ប្រាក់ចំណេញនៅរយៈពេល៧ខែជាប់គ្នា ក្នុងឆ្នាំ២០២១នេះ ជាកំនើនសេ្ថរភាពជាមួយនឹងភាព ប្រសើរឡើងនូវដំណើរការអាជីវកម្ម។

ក្រុមហ៊ុនឧស្សាហកម្មធំៗ បានកើនឡើងប្រាក់ចំណូលប្រចាំឆ្នាំ ប្រមាណជិត៥ទ្រីលានយ៉ុន ពោលគឺកើនឡើង៥៧ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

បើប្រៀបធៀបនឹងរយៈពេលដូចគ្នាកាលពីឆ្នាំមុន ប្រាក់ចំណេញពីក្រុមហ៊ុនឧស្សា​ហកម្មធំៗ បានកើនឡើង៤៤,៦ភាគរយគីតរយៈពេល៧ខែឆ្នាំ ២០២១ ខណៈដែលអត្រា កំណើនឆ្នាំ២០២១បានកើនឡើង២០ភាគរយ ធៀបនឹងឆ្នាំ២០២០។ នេះបើយោងតាមការិយាល័យស្ថិតិជាតិរបស់ប្រទេសចិន។

នៅខែកក្កដា តែមួយ ក្រុមហ៊ុនឧស្សាហកម្មធំៗ បានបង្កើនប្រាក់ចំណេញជាង ៧០០ពាន់លានយ៉ុន ពោលគឺកើនឡើង១៦.៤ ភាគរយ។

ខណៈដែរ ដំណើរការអាជីវកម្មនៃក្រុមហ៊ុនឧស្សាហកម្ម បានធ្វើអោយប្រសើរឡើង ប្រាក់ចំណេញវិស័យឯកជនបានកើនឡើងយឺតជាងមុន។

ក្រុមហ៊ុនឧស្សាហកម្មគ្រប់គ្រងដោយរដ្ឋ បានមើលឃើញប្រាក់ចំណេញកើនឡើង ១០២ភាគរយ ខណៈដែរក្រុមហ៊ុនឯកជនបានកើនឡើង៤០.២ភាគរយ បើប្រៀបធៀនឹងរយៈពេលដូចគ្នាកាលពីមុន។ នេះបើតាមលោក Zhu hong មន្រ្តីជាន់ខ្ពស់ការិយាល័យស្ថិតិ បានលើកឡើង។

ក្រុមហ៊ុនធនធានរ៉ែ និងក្រុមហ៊ុនផលិតធនធានវត្ថុធាតុដើម បានកើនឡើងប្រាក់ចំណេញ២០៣ភាគរយ និង៥០ភាគរយរៀងៗគ្នា។

ការពង្រីកនៃការចាក់វាក់សាំង Covid 19 និង ផលិតផលនៃការចាក់់វាក់សាំង បានជំរុញអោយផ្នែកផលិតឱសថបានកើនឡើង១១០ភាគរយ។

ការបន្តងើបឡើងវិញ នៅក្នុងវិស័យឧស្សាហកម្ម គឺកើនឡើងស្របពេលការរីកចំរើនសេដ្ឋកិច្ចទាំងមូលរបស់ប្រទេសចិន ដែលធ្វើឲ្យទិន្នផលឧស្សហកម្មរបស់ប្រទេសចិនបានផលចំណេញប្រមាណ១៤.៤ ភាគរយ។

លោក Zhu បាននិយាយថា ក្រុមហ៊ុនឧស្សាហកម្ម ស្ថិតនៅប្រឈមមុខនឹងការចំណាយថ្លៃដើមខ្ពស់ ពីតម្លៃវត្ថុធាតុដើមកើនឡើង ដោយតំរូវអោយប្រទេសចិនបានខិតខំប្រឹងប្រែងក្នុងការរក្សាស្ថេរភាពថ្លៃ និងដោះស្រាយភាពលំបាករបស់ក្រុមហ៊ុន៕

ចំណេះដឹងវិនិយោគៈមុនវិនិយោគអចលនទ្រព្យត្រូវគិតចំនុចអ្វីខ្លះ?

ដោយៈវឌ្ឍនៈ

ភ្នំពេញៈ បច្ចុប្បន្ននេះ គេមើលឃើញថាវិស័យអចលនទ្រព្យ នៅក្នុងប្រទេសកម្ពុជាកំពុងទទួលបានការចាប់អារម្មណ៍ ពីសំណាក់វិនិយោគិនទាំងជាតិនិ ងអន្តរជាតិ ហើយវិនិយោគិនលើវិស័យផ្សេងៗ ក៏បានចូលមកប្រឡូកក្នុងវិស័យអចលនទ្រព្យ ជាបណ្ដើរៗផងដែរ ជាពិសេសនៅក្នុងបរិបទកូវីដ១៩នេះ ។

ថ្ងៃនេះយើងនឹងលើកយកចំនុចមួយចំនួន ជាចំណេះដឹងដល់អ្នកវិនិយោគ ដែលទើបចាប់ផ្ដើមវិនិយោគវិស័យអចលនទ្រព្យ ដោយបានដកស្រង់នូវប្រសាសន៍របស់អ្នកជំនាញអចលនទ្រព្យនៅក្នុងប្រទេសកម្ពុជា។

អ្នកជំនាញអចលនទ្រព្យអន្តរជាតិ និងជាគ្រូបង្វឹកប្រចាំក្រុមហ៊ុន Century 21 Zillion Holding លោកវ៉ា វីរៈបានមានប្រសាសន៍ឱ្យដឹងថា ដើម្បីឱ្យការវិនិយោគអចលនទ្រព្យរបស់វិនិយោគិន ទទួលបានជោគជ័យ ត្រូវមានចំណុចជាច្រើនដូចជា ទី១ ត្រូវកំណត់គោលដៅរបស់ខ្លួនជាមុនសិន។ ចំណុចនេះចង់សំដៅ លើការគោលដៅនៃការវិនិយោគថា តើចង់វិនិយោគលើអចលនទ្រព្យប្រភេទណា ដូចជា ចំការ លំនៅឋានឬអាជីវកម្មណាមួយ។

ក្រោយពេលកំណត់គោលដៅរួចហើយ ត្រូវសម្លឹងទៅមើលសក្ដានុពល នៃតម្រូវការទីផ្សារ ថាតើតំបន់ណាមានសក្ដានុពល មានតម្រូវការលើផ្នែកអចលនទ្រព្យដែលបានកំណត់នោះ ។

លោកវីរៈបានបន្តថា នៅក្នុងអភិវឌ្ឍន៍អចលនទ្រព្យ គេក៏មើលទៅលើផ្លូវ បើសិនជាមានផ្លូវ គឺនឹងមានការទៅដល់របស់វិនិយោគិន ហើយតំបន់ណាដែលមានការអភិវឌ្ឍលើហេដ្ឋារចនាសម្ព័ន្ធច្រើន តំបន់នោះនឹងមានការអភិវឌ្ឍអចលនទ្រព្យច្រើនដូចគ្នា។ ក្រៅពីផ្លូវយើងក៏មើលទៅលើ បណ្ដាញអគ្គិសនី បណ្ដាញទឹក បណ្ដាញទូរគមនាគមន៍ ដូចជា សេវាទូរសព្ទ និងអ៊ីនធើណេតជាដើម។ យើងក៏ត្រូវមើលទៅលើនិន្នាការ នៃការអភិវឌ្ឍនៅថ្ងៃអនាគតផងដែរថា តើតំបន់ដែលយើងចង់វិនិយោគនោះ ទៅថ្ងៃអនាគតនឹងមាននិន្នាការអភិវឌ្ឍទៅលើអ្វីខ្លះ ។

លោកបន្ថែមថា ចំនុចមួយទៀតដែលពិសេសផងដែរនោះ គឺមុនពេលវិនិយោគអចលនទ្រព្យគឺត្រៀមហិរញ្ញវត្ថុ។ មុនពេលយើងចាប់ផ្ដើមវិនិយោគ លើអចលនទ្រព្យយើងក៏ត្រូវសិក្សាពីហិរញ្ញវត្ថុរបស់ខ្លួនជាមុនសិនថា តើយើងអាចមានលទ្ធភាពកម្រិតណា ហើយអាចយកកម្ចីពីធនាគារបានកម្រិតណា ទៅលើអចលនទ្រព្យ ដែលយើងស្រលាញ់និងចង់ដាក់ទុនវិនិយោគ។

លោកបន្តថា “ការគិតគូបែបនេះនឹងមិនធ្វើឱ្យស្ទះ ដល់ការវិនិយោគឬខាតពេលក្នុងការចរចាជាមួយម្ចាស់អចលនទ្រព្យនោះទេ”។ លោកបន្តថា “ចំនុចសំខាន់មួយទៀតគឺ លំហូរសាច់ប្រាក់របស់យើង ជាពិសេសនៅក្នុងបរិបទកូវីដ១៩នេះថា តើយើងអាចរ៉ាប់រងការបង់ត្រលប់ទៅធនាគារបានដែរទេ ដើម្បីកុំឱ្យជួបបញ្ហានៅពេលយើង សម្រេចដាក់ទុនវិនិយោគរួចហើយ”។

យ៉ាងណាក្ដី សម្រាប់វិនិយោគិនអចលនទ្រព្យ ដែលមានបទពិសោធន៍ និងខ្លាំងពូកែ សុទ្ធតែមានយុទ្ធសាស្ត្រ និងចំណុចខ្លាំង ក្នុងការបណ្ដាក់ទុនវិនិយោគអចលនទ្រព្យ ទោះបីជាមានវិបត្តិ ក៏នៅតែអាចបណ្ដាក់ទុនវិនិយោគបានដដែល និងនៅតែទទួលបានប្រាក់ចំណេញ៕

ក្រសួងចំនួនពីរធ្វើការរួមគ្នាដើម្បីនាំចេញផ្លែមៀនទៅកាន់ទីផ្សារចិន ស្របពេលអគ្គរដ្ឋបាលគយចិនផ្តល់ក្តីសង្ឃឹម

ដោយៈ តារារៈ

ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ និងក្រសួងការបរទេសនិងសហ​ប្រតិបត្តិការអន្តរជាតិ កំពុងធ្វើការរួមគ្នា ក្នុងការនាំផ្លែមៀនទៅកាន់ប្រទេសចិន ជាលទ្ឋផលអគ្គរដ្ឋបាលគយចិន កំពុងផ្តល់ក្តីសង្ឃឹម។

លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានសរសេរលើបណ្តាញទំនាក់ទំនងសង្គមរបស់ខ្លូនកាលពីរសៀលថ្ងៃទី២៧ សីហាកន្លងមកថា សូមជម្រាបជូនសាធារណជនជ្រាបថា ក្រសួងកសិកម្ម រុក្ខាប្រមាញ់ និងនេសាទ បានដាក់សំណើ ចរចាបើកទីផ្សារសម្រាប់ផ្លែមៀនស្រស់ទៅកាន់ ទៅអគ្គរដ្ឋបាលគយនៃសាធា​រណរដ្ឋប្រជាមានិតចិន នៅថ្ងៃទី០៥ ខែមិថុនា ឆ្នាំ២០១៩ ដោយ ភ្ជាប់ជាមួយនូវឯកសារបច្ចេកទេសសម្រាប់ភាគីចិន ធ្វើការវិភាគហានិភ័យសមាសភាពចង្រៃ ដើម្បីស្នើសុំបើកទីផ្សារនាំចេញ ផ្លែមៀនកម្ពុជាទៅកាន់ប្រទេសចិន។

ក្នុងគោលបំណងពន្លឿនការងារចរចារ ពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែមៀនស្រស់កម្ពុជា ទៅកាន់ប្រទេសចិន ក្នុងដំណាក់កាលនៃការរីករាលដាលជាសកលនៃជំងឺកូវិដ១៩ ក្រសួងកសិកម្ម រុក្ខាប្រមាញ់និងនេសាទ បានលើកសំណើផ្ញើរជូនទៅឯកឧត្ដមឧបនាយករដ្ឋមន្តី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាលើកទីពីរ។

ជាកិច្ចឆ្លើយតប នៅថ្ងៃទី២៥ ខែសីហា ឆ្នាំ២០២១ អគ្គរដ្ឋបាលគយចិន ដែលមាននាយកដ្ឋានភូតគាមអនាម័យ និងអនាម័យសត្វ បានគោរពជម្រាបជូនលោកជំទាវ អគ្គរាជទូតកម្ពុជា ប្រចាំនៅសាធារណៈរដ្ឋប្រជាមានិតចិនថា យើងខ្ញុំមានសេក្តីរីករាយសូមជូនដំណឹងជ្រាបថា ការងារវិភាគហានិភ័យផ្លែមៀនកម្ពុជា សម្រាប់នាំចូលមកប្រទេសចិនទទួលបានការវិវត្តមួយកម្រិត។

យោងតាមការផ្តល់ឯកសារបច្ចេកទេសរបស់ភាគី កម្ពុជា និងការស្រាវជ្រាវលើឯកសារភាគីចិន បានធ្វើការវាយតម្លៃសមាសភាពចង្រៃ ដែលកើតមានលើ ផ្លែមៀនកម្ពុជា និងជាបឋមយើង បានជ្រើសរើសនូវសមាសភាពចង្រៃចំនួន៨ប្រភេទ ដែលភាគីចិនយកចិត្តទុកដាក់៖ ១. Bactrocera dorsalis, ២) Bactrocera tau. ៣) Paracoccus interceptus, ៤) Planococcus lilacinus, ៥) Planococcus minor, ៦) Dysmiscoccus lepelleyi, ៧) Dysmicoccus lepelleyi, ៨)Pseudococcus jackbeardsleyi ។

ទន្ទឹមនឹងនេះ ភាគីចិនបានស្នើឲ្យភាគីកម្ពុជា ធ្វើបច្ចុប្បន្នភាពបន្ថែមលើការស្រាវជ្រា​វ និងការដាក់ចេញវិធានការណ៍ សម្រាប់ទប់ស្កាត់ និងកម្ចាត់សមាសភាពសត្វចង្រៃទាំង៨មុខខាងលើនេះ។ ភាគីចិនបានសន្យាថានឹងបន្តធ្វើការវាយតម្លៃ នៅពេលភាគីកម្ពុជាឆ្លើយតបមកវិញ។

ភាគគីចិនបានបញ្ជាក់ថា សង្ឃឹមថាភាគីទាំងពីរ បន្តពង្រឹងកិច្ចសហប្រតិបត្តិការរួមគ្នា ដើម្បីជំរុញការងារលក្ខខណ្ឌ តម្រូវភូតគាមអនាម័យ សម្រាប់ការនាំចេញផ្លែមៀនកម្ពុជាទៅកាន់ប្រទេសចិនឲ្យទទួលបានជោគជ័យ៕

រដ្ឋាភិបាលចិនចាប់ផ្ដើមបើកការស៊ើបអង្កេតការគេចពន្ធក្នុងចំណោមអ្នកមានប្រាក់ចំណូលខ្ពស់

ដោយៈសុខុម

ប៉េកាំង: អាជ្ញាធរពន្ធដាររបស់មហាយក្សចិន កំពុងបើកការស៊ើបអង្កេត លើបុគ្គលដែលលាក់បាំងប្រាក់ចំណូលខ្ពស់របស់ខ្លួន ហើយគេចវេះមិនបង់ពន្ធជូនរដ្ឋ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃព្រហស្បតិ៍ ទី២៦ សីហា។

តាមរយៈសេចក្ដីថ្លែងការណ៍មួយ ចេញកាលពីថ្ងៃព្រហស្បតិ៍ អគ្គនាយកដ្ឋានពន្ធដារចិន បានប្តេជ្ញាអនុវត្តគោលការណ៍ណែនាំស្តីពី កំណែទម្រង់ពន្ធដារដាក់ចេញដោយក្រុមប្រឹក្សារដ្ឋកាលពីខែមីនា ដែលបាននិយាយថា ប្រទេសចិន នឹងពង្រឹងការត្រួតពិនិត្យពន្ធដារលើបុគ្គល ដែលមានប្រាក់ចំណូលខ្ពស់ និងបុគ្គលដែលមានទ្រព្យសម្បត្តិច្រើន។

អគ្គនាយកដ្ឋានពន្ធដារនិយាយថា ខ្លួននឹងបន្តបង្កើនការបង្រ្កាបជាប្រចាំ លើការអនុវត្តខុសច្បាប់ទាក់ទងនឹងពន្ធដារ។ ចំពោះបទល្មើសធំៗ ការដាក់ពិន័យនឹងត្រូវប្រកាសជាសាធារណៈ ហើយ Log in ចូលក្នុងកំណត់ត្រាឥណទានរបស់ក្រុមហ៊ុន ឬបុគ្គលដែលត្រូវបានចែករំលែកទូទាំងប្រទេស ក្នុងគោលបំណងលើកកម្ពស់ការបង់ពន្ធ និងបរិយាកាសធ្វើអាជីវកម្មដោយភាពត្រឹមត្រូវ។

ការប្ដេជ្ញាធ្វើការបង្ក្រាបលើការគេចពន្ធនេះធ្វើឡើង ស្របពេលរដ្ឋាភិបាលក្រុងប៉េកាំង កំពុងប្រឹងប្រែងជំរុញកាន់តែខ្លាំងដើម្បី “ភាពរុងរឿងទាំងអស់គ្នា” តាមរយៈការកាត់បន្ថយគម្លាតប្រាក់ចំណូល និងវិសមភាពសង្គម។
ប្រធានាធិបតីចិន លោក ស៊ី ជីនភីង បានចូលរួមជាអធិបតីក្នុងកិច្ចប្រជុំកម្រិតខ្ពស់មួយកាលពីសប្តាហ៍មុន ដែលបានសន្យាគ្រប់គ្រងឱ្យបានកាន់តែប្រសើរ លើប្រភពប្រាក់ចំណូលខ្ពស់។

លោកបានបញ្ជាក់ថា “រដ្ឋនឹងការពារប្រាក់ចំណូល ដែលមានប្រភពស្របច្បាប់ ប៉ុន្តែនឹងធ្វើការបង្ក្រាបលើប្រាក់ចំណូល ដែលខ្ពស់ហួសហេតុ និងគ្មានប្រភពច្បាស់​លាស់”៕

ធនាគារអភិវឌ្ឍន៍អាស៊ីលើកអនុសាសន៍ចំនួន៤ដើម្បីជំរុញសេដ្ឋកិច្ចកម្ពុជារីកចម្រើនប្រកបដោយចីរភាព

ដោយៈគង់ សូរិយា

ភ្នំពេញៈ ធនាគារអភិវឌ្ឍន៍អាស៊ី (ADB) បានលើកឡើងថា បើកម្ពុជាចង់មានកំណើនសេដ្ឋកិច្ចដែលស្ថេរភាព និងចីរភាព ក្នុងរយៈពេលវែង រដ្ឋាភិបាលគួរជំរុញឱ្យមានការវិនិយោគបៃតង និងការផលិតថាមពលស្អាត ក្នុងស្រុកឱ្យបានច្រើនជាងមុន។

យោងតាមអត្ថបទវិភាគនេះ ដែលនិពន្ឋឡើងដោយនាយកប្រតិបត្តិធនាគារអភិវឌ្ឍន៍អាស៊ីប្រចាំប្រទេសកម្ពុជា អ្នកស្រី Sunniya Durrani-Jamal និងសេដ្ឋវិទូផ្នែកថាមពល Darren Byers ដោយចេញផ្សាយកាលពីថ្ងៃទី ២៥ សីហា កន្លងទៅនេះបានផ្តល់នូវអនុសាសន៍សំខាន់ៗចំនួន៤។

អត្ថបទបានរំលេចនៅវិធីសាស្ត្រសំខាន់ៗ៤ ដើម្បីឱ្យរាជរដ្ឋាភិបាលកម្ពុជា និងភាគីពាក់ព័ន្ធ គួរពិចារណាអនុវត្តន៍ដូចជា ទី១ ការកាត់បន្ថយការកាប់បំផ្លាញព្រៃឈើ ការដាំដើមឈើឡើងវិញ និងការលើកកម្ពស់ការគ្រប់គ្រងធនធាន និងឥន្ធនៈស្អាត។ គោលនយោបាយទាំងនេះ មិនត្រឹមតែជួយកាត់បន្ថយ ការបញ្ចេញឧស្ម័នពុលនៅកម្ពុជាប៉ុណ្ណោះទេ តែថែមទាំងជួយកាត់បន្ថយគ្រោះធម្មជាតិ និងចំណាយស្តារហេដ្ឋារចនាសម្ព័ន្ធខូចខាតពីគ្រោះធម្មជាតិទាំងនោះទៀតផង។

ទី២ កម្ពុជាគួរពិចារណាបន្ថែមចំណាយ លើការវិនិយោគដែលបញ្ចេញឧស្ម័នពុលខ្លាំង ឬពន្យល់ឱ្យងាយយល់ គឺការគិតលុយលើរាល់ការបញ្ចេញឧស្ម័នពុល ពីរោងចក្រនានា។ គោលនយោបាយនេះត្រូវមានការចូលរួមទាំងរដ្ឋ ឯកជន និងអ្នកប្រើប្រាស់ទូទៅ។ ជាក់ស្ដែង គោលនយោបាយស្រដៀងគ្នានេះ ត្រូវបានអនុវត្តខ្លះហើយ ដូចជាការលក់ឥណទានកាបូនជាដើម។

ទី៣ ការពិចារណាយកពន្ធ លើការបញ្ចេញឧស្ម័នពុលរបស់រោងចក្រនានា ដើម្បីជំរុញឱ្យពួកគេអនុវត្តបច្ចេកវិទ្យាថ្មី កាត់បន្ថយការបញ្ចេញឧស្ម័នពុលរបស់ពួកគេ។

ទី៤ ការងាកពីការប្រើប្រាស់រោងចក្រថាមពលដុតធ្បូងថ្ម មកប្រើថាមពលបៃតងឬថាមពលកកើតឡើងវិញ។ តម្លៃនៃបច្ចេកវិទ្យា ក្នុងការវិនិយោគថាមពលកកើតឡើងវិញ ដូចជាថាមពលសូឡា និងថាមពលខ្យល់ បានធ្លាក់ថ្លៃជាបន្តបន្ទាប់ ដូច្នេះកម្ពុជាគួរពិចា​រណាជំនួសរោងចក្រថាមពលដុតធ្យូងថ្ម ដោយថាមពលបៃតងវិញ។

ការអនុវត្តគោលនយោបាយទាំងនេះ គឺរឿងលំបាករបស់រដ្ឋាភិបាល ព្រោះត្រូវចំណាយខ្ពស់ ប៉ុន្តែ ADB ចង់ឲ្យរដ្ឋាភិបាលគិតគូរវែងឆ្ងាយជាងមុន។ ទោះបីជាការវិនិយោគបៃតង មានចំណាយខ្ពស់ជាងការវិនិយោគធម្មតាពិតមែន ប៉ុន្តែវាបង្កផលល្អទៅអនាគត បើវិភាគតាមទស្សនវិស័យ នៃវដ្តជីវិតពេញលេញ ក្រោមសេណារីយ៉ូថ្លៃកាបូន ផលចំណេ​ញផ្នែកហិរញ្ញវត្ថុនិងសេដ្ឋកិច្ច និងផលប្រយោជន៍សង្គម៕

ក្រសួងសុខាភិបាលៈអ្នកធ្លាប់ចាក់វ៉ាកើសាំងចិនទាំងពីរប្រភេទពីរលើករួច មិនចាំបាច់ចាក់វ៉ាក់សាំងដូសទី៣ក៏បាន

ដោយៈគង់ សូរិយា

ភ្នំពេញៈ ក្រសួងសុខាភិបាលបានបញ្ជាក់ថា អ្នកធ្លាប់ចាក់វ៉ាក់សាំង Sinovac ឬ Sinopharm កន្លងមក ពុំចាំបាច់ចាក់វ៉ាក់សាំង AstraZeneca ជាដូសជំរុញក៏បាន ដោយអាចប្រើវ៉ាក់សាំង Sinovac ឬ Sinopharm ដដែលនេះបាន។

ក្រសួងសុខាភិបាលកម្ពុជាបានឱ្យដឹងថា ចំពោះមន្ត្រីជួរមុខ និងបុគ្គលអាយុចាប់ពី ៦០ឆ្នាំឡើងទៅ ឬអ្នកមានប្រព័ន្ធភាពស៊ាំខ្សោយ អាចចាក់ដូសជំរុញបានក្រោយចាក់ពីរដូសដំបូងបាន ៤-៦ខែ។

អ្នកធ្លាប់ចាក់វ៉ាក់សាំង Sinovac ឬ Sinopharm នៅតែអាចប្រើវ៉ាក់សាំង ដែល ដោយមិនចាំបាច់ប្ដូរ ប្រភេទវ៉ាក់សាំងនោះទេ។ បន្ថែមពីលើនេះ អ្នកក៏អាចចាក់វ៉ាក់សាំង Pfizer និង Modena បានដែរ។

រាជរដ្ឋាភិបាលកម្ពុជា រួមទាំងក្រសួងសុខាភិបាល មិនទាន់អនុម័តឱ្យមានការប្រើប្រាស់វ៉ាក់សាំងដូសជំរុញណាផ្សេង ក្រៅពីAstraZeneca របស់អង់គ្លេសឡើយ។ ប៉ុន្តែពេលនេះ ក្រសួងបានយល់ព្រមឱ្យប្រើប្រាស់ ប្រភេទវ៉ាក់សាំងដដែល សម្រាប់អ្នកធ្លាប់ចាក់វ៉ាក់សាំងរបស់ចិនទាំង២គឺ Sinovac និង Sinopharm។

ដោយឡែក អ្នកដែលធ្លាប់ចាក់វ៉ាក់សាំង AstraZeneca ឬ វ៉ាក់សាំង Johnson & Johnson ពីមុនមករួចរាល់ ក៏អាចចាក់វ៉ាក់សាំងប្រភេទដដែល ឬអាចចាក់វ៉ាក់សាំងប ច្ចេកវិទ្យា mRNA បានគឺ Pfizer និង Modena៕

រដ្ឋាភិបាលអនុម័តអនុម័តគម្រោងវិនិយោគថ្មីចំនួន៣ជាមួយទំហំទទឹកប្រាក់ជិត១៥លានដុល្លារ

ដោយៈលក្ខិណា

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) ទើបសម្រេចអនុម័តគម្រោងវិនិយោគថ្មី ចំនួន៣ថែមទៀត សរុបទុនវិនិយោគជិត១៥លានដុល្លារ និងបង្កើតការងារជាង៤ពាន់កន្លែង។ នេះបើតាមក្រុមប្រឹក្សាអភិវឌ្ឍន៍កម្ពុជាអនុម័ត បានបង្ហោះនៅលើ Facebook ផ្លូវការរបស់ខ្លួន។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុ ជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម ទី១ ក្រុមហ៊ុនSHINING FASHION INDUSTRIAL CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគ ស្ថិតនៅភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល មានទុនវិនិយោគប្រមាណ៣,៤លានដុល្លារអាមេរិក និងអាចបង្កើតការងារបានចំនួន៩៤៧កន្លែង។

ទី២ ក្រុមហ៊ុន MELYO PLASTIC TECHNOLOGY CO., LTD. គម្រោងបង្កើតរោងចក្រផលិតធុងទឹកកក និងធុងជ័រ ដែលមានទីតាំងវិនិយោគ ស្ថិតនៅភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មានទុនវិនិយោគប្រមាណ៤,៧លានដុល្លារអាមេរិក និងអាចបង្កើតការងារបានចំនួន ១៦៧កន្លែង។

ទី៣ ក្រុមហ៊ុន KICYN (CAMBODIA) CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគ ស្ថិតនៅភូមិត្រពាំងក្រសាំង ឃុំត្រពាំងក្រសាំ ង ស្រុកបាទី ខេត្តតាកែវ មានទុនវិនិយោគប្រមាណ៦,៧លានដុល្លារអាមេរិក និងអាចបង្កើតការងារបានចំនួន២.៩៤៧កន្លែង៕

គម្រោងអភិវឌ្ឍន៍ផ្លូវមួយខ្សែក្នុងខេត្តកោះកុងបានធ្វើឲ្យតម្លៃដីធ្លីហក់ឡើងខ្ពស់ មិនគួរឲ្យជឿ

ដោយៈវឌ្ឈនៈ

កោះកុងៈ គម្រោងអភិវឌ្ឍន៍ផ្លូវលំមួយខ្សែ ក្នុងខេត្តកោះកុងតភ្ជាប់ពីតំបន់ដាច់ស្រយា​លទៅកាន់តំបន់ទីក្រុងនៃខេត្តកោះកុង បានធ្វើឱ្យតម្លៃដីធ្លីនៅតាមបណ្ដោយផ្លូវថ្មីហក់ឡើងខ្ពស់មិនគួរឱ្យជឿ ពោលគឺឡើងជាង១០ដង ធៀបនឹងមុនពេលចាប់ផ្ដើមសាងសង់ផ្លូវលំថ្មីមួយនេះ ។

គម្រោងផ្លូវលំដែលមានឈ្មោះថា “ផ្លូវលំជនបទភ្ជាប់និស្ស័យ សម័យកូវីដមរតកតេជោហ៊ុនសែន” មានប្រវែង៣៩គីឡូម៉ែត្រទទឹង៩ម៉ែត្រ ដែលជាផ្លូវតភ្ជាប់ពីស្រុកមណ្ឌ​ល​សីមា ទៅកាន់ស្រុកគីរីសាគរនិងភ្ជាប់ទៅកាន់ក្រុងខេមរៈភូមិន្ទ ។

លោកទុយ ប៉ោហេង ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តកោះកុងបានមានប្រសាសន៍ឲ្យដឹងថា មុនពេលដែលផ្លូវថ្មីនេះ ចាប់ផ្ដើមស្ថាបនា តម្លៃដីនៅតាមបណ្ដោយផ្លូវថ្មីនេះ ដាក់លក់ប្រហែល៥ពាន់ដុល្លារអាមេរិកក្នុងមួយហិចតា ប៉ុន្តែនៅពេលផ្លូវនេះ ចាប់ផ្ដើមសាងសង់បានរយៈប៉ុន្មានខែ តម្លៃដីធ្លីនៅតាមបណ្ដោយផ្លូវថ្មី ស្រាប់តែហក់ឡើងដល់៦ដុល្លារអាមេរិក ក្នុងមួយម៉ែត្រការ៉េឬ៦ម៉ឺនដុល្លារអាមេរិកក្នុងមួយហិចតា ពោលគឺបានហក់ឡើងដល់ជាង១០ដង នៃតម្លៃមុនស្ថាបនាផ្លូវថ្មី ។

លោកបន្តថា “បើទោះបីជាតម្លៃដីនៅតាមបណ្ដោយផ្លូវនេះ បានហក់ឡើងបែបនេះ តែក៏មានអ្នកវិនិយោគជាច្រើន បានប្រមូលទិញដីនៅតាមបណ្ដោយផ្លូវថ្មីមួយ ដោយរំពឹងទុកពីផលចំណេញខ្ពស់នៅពេលខាងមុខ ខណៈខេត្តកោះកុងក៏ទទួលបានវិនិយោគិនបរទេសជាច្រើន ចូលបណ្ដាក់ជាបន្តបន្ទាប់ ជាពិសេសវិនិយោគិនជនជាតិចិន ដែលប្រមូលផ្ដុំនៅតំបន់មួយនៃខេត្តកោះកុងគឺតំបន់តារាសាគរ”។

លោកបន្ថែម តាមរយៈផ្លូវមួយនេះដែរ នៅថ្ងៃអនាគតភ្ញៀវជាតិ និងអន្តរជាតិដែលមកសម្រាកនៅកោះស្ដេច ក៏អាចចូលមកលេងនៅក្រុងខេមរភូមិន្ទបាន ដោយសារតែមានផ្លូវស្រូល ហើយអនាគតទៅផ្លូវនេះ ក៏អាចចាក់បេតុងឬកៅស៊ូដើម្បីកាន់តែងាយស្រួលក្នុងការដំណើរផងដែរ ពីព្រោះជាផ្លូវសំខាន់ក្នុងការតភ្ជាប់ពីតំបន់មួយទៅមួយ ។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងផងដែរថា ទីណាមានការអភិវឌ្ឍហេដ្ឋារចនាសម្ព័ន្ធទីនោះ នឹងទទួលបានការវិនិយោគ ហើយនឹងជំរុញសក្ដានុពលតម្លៃដីធ្លី នៅតំបន់នោះបានមួយកម្រិតទៀតផងដែរ ។ ដើម្បីទាក់ទាញដល់ការវិនិយោគនានា រដ្ឋាភិបាលលោកបានខិតខំប្រឹងប្រែងសាងសង់ និងស្ថាបនាហេដ្ឋារចនាសម្ព័ន្ធ ជាពិសេសផ្លូវកាន់តែច្រើន ដើម្បីសម្រួលការវិនិយោគផង និងសម្រួលដល់ការធ្វើដំណើររបស់ប្រជាពលរដ្ឋ ក្នុងតំបន់ផងដែរ៕

រដ្ឋាភិបាលកម្ពុជាកំពុងចាត់វិធានការបន្តចំពោះម្ចាស់ទំនិញប្រើប្រាស់រូបអង្គរវត្ត

ដោយៈគង់ សូរិយា

ភ្នំពេញ

មន្រ្តីអ្នកនាំពាក្យក្រសួងពាណិជ្ជកម្មបានបញ្ជាក់ថា មកទល់ពេលនេះទីប្រឹក្សាពាណិជ្ជកម្ម ប្រចាំស្ថានរាជទូតកម្ពុជានៅសហរដ្ឋអាមេរិក កំពុងស្វែងរកជួបម្ចាស់ផលិតទំនិញដែលប្រើប្រាស់រូបអង្គរវត្ត ដោយបំពាន និងគ្មានការអនុញ្ញាតត្រឹមត្រូវ ខណៈដែលអ្នកនាំចូលចែកចាយសន្យាថា នឹងបញ្ឈប់ការលក់ទំនិញទាំងនោះ។

លោកប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ឲ្យដឹងកាលពីព្រឹកថ្ងៃទី២៦ សីហាកន្លងមកថា ក្រោយទទួលបានព័តមាន ឃើញថាផលិតផលដែលមានឈ្មោះ Nam Vang Noodle ដែលមានរូបប្រាសាទអង្គវត្ត និងឈ្មោះរាជធានីភ្នំពេញ កំពុងចរាចរលក់នៅលើទីផ្សារសហរដ្ឋអាមេរិក ក្រុមការងាររបស់ស្ថានទូតកម្ពុជានៅទីនោះ ក៏បានចុះត្រួតពិនិត្យភ្លាម និងរាយការណ៍ថា បានរកឃើ​ញក្រុមហ៊ុនចំនួន២ នាំចូលនិងចែកចាយលក់ផលិតផលទាំងនេះ។

លោកបន្តថា ក្រុមហ៊ុនចំនួន១ បានសន្យាបញ្ឈប់ការនាំចូលមកលក់ ហើយនិងស្នើសុំលក់ឲ្យអស់ផលិតផល ដែលមាននៅលើទីផ្សារ។ តំណាងពាណិជ្ជកម្មនៅក្រៅប្រទេស បានជម្រាបជូនម្ចាស់ហាង ដែលចែកចាយលក់បន្តថា ប្រសិនបើមិនបញ្ឈប់ទេ នឹងមានវិធានការផ្លូវច្បាប់ តាមរយៈស្ថានទូត ហើយក្រុមហ៊ុនក៏យល់ព្រមនឹងបញ្ឈប់ ដោយស្នើមកវិញថា សុំលក់ទំនិញដែលសេសសល់ពីការនាំចូលនាពេលកន្លងមក។

លោកប៉ែន សុវិជាតិបានបន្តថា ពេលនេះតំណាងពាណិជ្ជកម្មកម្ពុជា នៅសហរដ្ឋអាមេរិក កំពុងទាក់ទងក្រុមហ៊ុនមួយទៀតដែលស្ថិតនៅញ៉ូវញក ពីព្រោះនៅទីនោះក៏មានលក់ទំនិញរបៀបនេះដែរ ហើយយើងព្យាយាមឲ្យអស់ពីសមត្ថភាព ធ្វើម៉េចការពារអត្តសញ្ញាណជាតិខ្មែរ កុំឲ្យមានការប្រើរូបអង្គរវត្ត ដែលគ្មានការអនុញ្ញាតទៅដាក់លើកញ្ចប់នំដែលមិនមែនជាផលិតផលខ្មែរ យើងក៏មិនចង់ឲ្យប្រើពាក្យគុយទាវភ្នំពេញដែរ ព្រោះថា Nam Vang Noodle លើសម្បកវេចខ្ចប់ ប្រែថាគុយទាវភ្នំពេញ ហើយម៉ាកគុយទាវភ្នំពេញ យើងក៏ប្រើប្រាស់ជាម៉ាក សមូលហភាពរួចហើយនៅកម្ពុជា ដោយយើងចង់រក្សាម៉ាកខ្មែរផងដែរ។

លោកបានលើកឡើងថា  អ្នកជំនាញខាងកម្មសិទ្ធិបញ្ញា ក៏ប្រឹងប្រែងស្រាវ​ជ្រាវរកប្រភព ដើម្បីសុំណែនាំដោយផ្ទាល់ ថាប្រភពណាជាអ្នកផលិត ដើម្បីធ្វើម៉េចណែនាំឲ្យក្រុមហ៊ុនបញ្ឈប់ ផលិតប្រើប្រាស់ស្រោមសម្បក ប្រើប្រាស់រំលោភបំពានអត្តសញ្ញាណជាតិ និងប្រើប្រាស់រូបសញ្ញាជាតិ ដែលមិនសមរម្យទៅលើទំនិញនានា ដោយសារគាត់ធ្វើឡើង ដោយគ្មានការអនុញ្ញាតពីយើងដែលជាម្ចាស់ប្រទេស ដូចដឹងហើយថា លើទង់ជាតិខ្មែរក៏មានរូបអង្គរវត្ត ហើយជារូបអត្តសញ្ញាណជាតិមួយរបស់យើង ដែលត្រូវការពារ ហើយក៏ត្រូវបានការពារទៅតាមផ្លូវច្បាប់ ក្រោមអនុសញ្ញាទីក្រុងប៉ារីស។

លោក ប៉ែន សុវិជាតិ បានបន្ថែមថា ចំពោះការងារខាងលើនេះ ក្រសួងពាណិជ្ជកម្មនឹងបន្តសហការ ជាមួយស្ថានរាជទូតកម្ពុជានៅបរទេស ដើម្បីពិនិត្យតាមដានបន្តទៅទៀត កុំឲ្យមានករណីបំពានរបៀបនេះកើតឡើងជាថ្មី។ ទន្ទឹមនេះ ក្រសួងស្នើសុំកិច្ចសហការផងដែរ ពីវិស័យឯកជននិងអ្នកប្រើប្រាស់ អោយជួយពិនិត្យតាមដាន និងផ្តល់ពត៌មានទាន់ពេលវេលាអំពីករណីរំលោភបំពានរបៀបនេះ ដើម្បីចូលរួមការពាររូបសញ្ញា ដែលជានិមិត្តរូបរបស់ជាតិ និងការរំលោភបំពានផ្សេងទៀត ទៅលើអត្តសញ្ញាណជាតិ និងកម្មសិទ្ធបញ្ញារបស់កម្ពុជាលើផលិតផលមី Nam Vang Noodle។

ពាក់ព័ន្ធការក្លែងបន្លំដូចគ្នាខាងលើនេះ កាលពីខែកក្កដាកន្លងទៅ រដ្ឋាភិបាលកម្ពុជា តាមរយៈស្ថានឯកអគ្គរាជទូតប្រចាំប្រទេសឥណ្ឌា បានចាត់វិធានការទៅលើក្រុមហ៊ុនអង្ករឥណ្ឌា ឈ្មោះ Voyage India ឱ្យបញ្ឈប់ការប្រើប្រាស់ឈ្មោះ និងរូបប្រាសាទអង្គរវត្ត នៅលើសម្បកវេចខ្ចប់ អង្កររបស់ខ្លួន ដែលបានប្រើឈ្មោះ Angkor Wat Thai Hom Mali Jasmin Rice ដោយពុំមានការអនុញ្ញាតពីអាជ្ញាធរកម្ពុជា ដែលទង្វើនោះកម្ពុជាចាត់ទុកថា ប្រាសចាកនឹងច្បាប់ស្តីពី ម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ ព្រមទាំងរំលោភលើអនុសញ្ញាទីក្រុងប៉ារីសស្តីពី កិច្ចការពារកម្មសិទ្ធិឧស្សាហកម្ម៕