ដោយ ៖ រ៉ាណេត

ព្រះសីហនុ៖ រាជរដ្ឋាភិបាលកម្ពុជាបានអនុញ្ញាតឱ្យក្រសួងទេសចរណ៍ និងក្រសួង-ស្ថាប័នពាក់ព័ន្ធ សហការជាមួយរដ្ឋបាលខេត្តព្រះសីហនុ រៀបចំពិធីបុណ្យសមុទ្រលើកទី៩ (ជុំទី៣) ឡើងវិញនៅចុងឆ្នាំ២០២១ ខាងមុខនេះក្រោយលើកពេលមួយឆ្នាំនៅឆ្នាំ២០២០ ដោយសារតែរងផលប៉ះពាល់ខ្លាំងពីវិបត្តិជំងឺកូវីដ-១៩ ។

ដើម្បីត្រៀមរៀបចំព្រឹត្តិការណ៍ទេសចរណ៍ដ៏ធំប្រចាំឆ្នាំនេះឱ្យបានល្អប្រសើររលូនទៅបាន លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ រួមជាមួយលោក គួច ចំរើន អភិបាលខេត្តព្រះសីហនុ បានដឹកនាំកិច្ចប្រជុំពិសេសមួយនៅរដ្ឋបាលខេត្តព្រះសីហនុ នាព្រឹកថ្ងៃទី៩ ខែកុម្ភៈ ឆ្នាំ២០២១ ក្នុងគោលបំណងពិភាក្សាជាមួយក្រសួង-ស្ថាប័ន មន្ទីរ អង្គភាពជំនាញត្រៀមកិច្ចការមួយចំនួនបណ្ដើរៗ។

លោករដ្ឋមន្ត្រីបានណែនាំឱ្យក្រុមការងារចាប់ផ្ដើមបង្កើតក្រុមការងារអន្តរក្រសួង ដើម្បីធ្វើកិច្ចការងារតាមមុខព្រួញនីមួយៗ សំដៅរៀបចំពិធីបុណ្យទាំងមូលឱ្យបានរលូនជោគជ័យ។ ក្នុងនោះដែរមានកម្មវិធីសម្ដែងសិល្បៈ ព្រឹត្តិការណ៍កីឡា ការការពារសុខសន្តិភាព ការរៀបចំតុបតែងសោភ័ណភាពនៅតាមទីសាធារណៈ តាមឆ្នេរសមុទ្រ និងទីតាំងសំខាន់មួយចំនួនទៀត បន្ថែមជាមួយនឹងការរៀបចំឱ្យមានវិថីម្ហូបអាហារផងដែរ។

នៅក្នុងពិធីនេះក៏មានការនាំយកផលិតផលកសិកម្ម សិប្បកម្ម ផលិតផលពាណិជ្ជកម្មក្នុងស្រុកមកតាំងបង្ហាញក្នុងពិធីបុណ្យឱ្យបានច្រើនបំផុត។ ក្រៅពីនេះត្រូវផ្សព្វផ្សាយផលិតផលទេសចរណ៍ សក្ដានុពលទេសចរណ៍ដែលមាននៅតាមរមណីយដ្ឋាន សហគមន៍ទេសចរណ៍ តំបន់ទេសចរណ៍ធម្មជាតិ សក្ដានុពលនៅតាមតំបន់ឆ្នេរសមុទ្រ នៅតាមកោះ និងនៅសមុទ្រឱ្យបានទូលំទំលាយនៅក្នុងពិធីបុណ្យនេះ។

លោកបណ្ឌិតថោង ខុន បានបញ្ជាក់ថា ទោះបីរាជរដ្ឋាភិបាលរៀបចំពិធីបុណ្យសមុទ្រលើកទី៩ ជុំទី៣ នេះក៏ពិតមែន ប៉ុន្តែគណៈកម្មការរៀបចំត្រូវតែប្រកាន់ខ្ជាប់ឱ្យបានម៉ឺងម៉ាត់នូវវិធានសុវត្ថិភាពទេសចរណ៍របស់ក្រសួងទេសចរណ៍ ការអនុវត្តតាមវិធានអនាម័យរបស់ក្រសួងសុខាភិបាល ក៏ដូចជាអនុសាសន៍ ៣កុំ និង ៣ការពារ របស់សម្ដេចតេជោ ហ៊ុន សែន នាយករដ្ឋមន្ត្រីជាប់ជានិច្ច ដាច់ខាតត្រូវរួមគ្នាអនុវត្តឱ្យបានហ្មត់ចត់បំផុត។

អភិបាលខេត្តព្រះសីហនុ លោកគួច ចំរើន បានប្ដេជ្ញាអំពីការចូលរួមអនុវត្តកិច្ចការជាមួយក្រសួងទេសចរណ៍ និងក្រសួង ស្ថាប័នពាក់ព័ន្ធ ដោយមានការចាត់ឱ្យមន្ត្រីជំនាញនៅរដ្ឋបាលខេត្ត មន្ទីរ អង្គភាពពាក់ព័ន្ធ ដើម្បីអនុវត្តការងារតាមមុខការរៀងខ្លួន ទាំងការងាររៀបចំទីតាំងពិធីបុណ្យ ការត្រៀមការការពារបញ្ហាសន្តិសុខ សុវត្ថិភាពថ្នាក់ដឹកនាំ អ្នករៀបចំកម្មវិធី ប្រជាពលរដ្ឋ និងភ្ញៀវទេសចរ ការរៀបចំតុបតែងកែលម្អសោភ័ណភាពក្នុងទីក្រុង តាមផ្លូវសាធារណៈជាដើម។

លោកបានលើកឡើងឱ្យមានការតាក់តែងនិពន្ធរឿង ឬសិល្បៈសម្ដែងនៅព្រឹត្តិការណ៍ទេសចរណ៍នេះ ដែលរៀបរាប់ពីប្រវត្តិខេត្តព្រះសីហនុ ឬហៅតាមឈ្មោះចាស់ថា កំពង់សោម ដើម្បីទុកជាសម្បត្តិវប្បធម៌របស់ខេត្ត ក៏ដូចជាសម្រាប់ប្រទេសជាតិផងដែរ។

ការរៀបចំព្រឹត្តិការណ៍ពិធីបុណ្យសមុទ្រលើកទី៩ ជុំទី៣នេះ គឺជាឱកាសផ្សព្វផ្សាយពីគោលដៅទេសចរណ៍តំបន់ឆ្នេរសមុទ្រកម្ពុជាទៅកាន់ទីផ្សារទេសចរណ៍អន្តរជាតិឱ្យកាន់តែល្បីសុះសាយបន្ថែមទៀត ខណៈឆ្នេរសមុទ្រកម្ពុជាទាំងមូល (ព្រះសីហនុ កំពត កែប និងកោះកុង) ត្រូវបានអង្គការឆ្នេរសមុទ្រដែលស្អាតជាងគេលើពិភពលោក ចាត់បញ្ចូលជាឆ្នេរសមុទ្រដែលស្អាតជាងគេនៅលើពិភពលោកកន្លងមក ហើយរាជរដ្ឋាភិបាលកម្ពុជាក៏បានប្រសិទ្ធនាមតំបន់ឆ្នេរសមុទ្រទាំងបួនខេត្តរបស់ខ្លួននេះជា «តារារះនាទិសនិរតី» ទៀតផង។

ចំពោះទីតាំងរៀបចំកម្មវិធីបុណ្យធំៗ និងកម្មវិធីនានាទៀតនោះ ក្រុមការងារនឹងបន្តពិភាក្សាកំណត់ឱ្យបានច្បាស់លាស់បន្ថែមទៀត៕

ដោយ ៖ រ៉ាណេត

ភ្នំពេញ ៖ អចលនវត្ថុដែលកំពុងតែមានសកម្មភាព និងដំណើរការទូទាំងប្រទេសកម្ពុជានៅពេលបច្ចុប្បន្ន ត្រូវបានគេបែងចែកចេញជា៦ប្រភេទផ្សេងៗពីគ្នា ដោយក្នុងនោះ ផ្នែកនីមួយៗមានតម្រូវការជាកស្ដែងមិនដូចគ្នានោះទេ។

អ្នកជំនាញនៅក្នុងវិស័យអចលនទ្រព្យកម្ពុជា លោកវ៉ា វីរៈ អគ្គនាយកក្រុមហ៊ុន Century21 Fortuna Investment បានមានប្រសាសន៍កាលពីពេលកន្លងទៅថ្មីៗនេះថា អចលនវត្ថុដែលកំពុងមានសកម្មភាព នៅលើទីផ្សារកម្ពុជានាពេលបច្ចុប្បន្នត្រូវបានគេបែងចែកចេញជា៦ប្រភេទផ្សេងៗពីគ្នា ហើយសម្រាប់តម្រូវការ និងតម្លៃដែលត្រូវបានដាក់លក់ ជួល នៅលើទីផ្សារក៏មានកម្រិតខុសគ្នាផងដែរ។

លោក វ៉ា វីរៈ បានពន្យល់ថា អចលនវត្ថុទាំង៦ប្រភេទដែលត្រូវបានបែងចែកដូចការលើកឡើងខាងលើនេះរួមមានដូចជា ទី១ អចលនវត្ថុបម្រើផ្នែកលំនៅដ្ឋានសម្រាប់ស្នាក់នៅ ទី២ អចលនវត្ថុបម្រើផ្នែកលំនៅដ្ឋាន ឬផ្ទះអាជីវកម្ម ទី៣ អចលនវត្ថុបម្រើផ្នែកទីតាំងជួល ឬលក់រាយ ទី៤ អចលនវត្ថុបម្រើផ្នែកឧស្សាហកម្ម ទី៥ អចលនវត្ថុបម្រើផ្នែកកសិកម្ម និងទី៦ អចលនវត្ថុបម្រើផ្នែកសេវាកម្មផ្សេងៗដូចជាការិយាល័យជួល និងទេសចរណ៍។

-ទី១ អចលនវត្ថុបម្រើផ្នែកលំនៅដ្ឋានសម្រាប់ស្នាក់នៅ ៖ អចលនវត្ថុប្រភេទនេះ គឺមានតម្រូវការច្រើនជាងគេនាពេលបច្ចុប្បន្ន ហើយនឹងនៅបន្តទៅថ្ងៃខាងមុខទៀត ខណៈដែលតម្រូវការទីផ្សារនៅមានក្នុងកម្រិតខ្ពស់សម្រាប់ប្រជាជនកម្ពុជា។ អចលនវត្ថុប្រភេទនេះ រួមមានផ្ទះល្វែង ផ្ទះវីឡា ដែលស្ថិតនៅជាន់ផ្ទាល់ដី ក៏ដូចជាផ្ទះសហកម្មសិទ្ធិ ឬជាប្រភេទខុនដូ។

-ទី២ អចលនវត្ថុបម្រើផ្នែកលំនៅដ្ឋាន ឬផ្ទះអាជីវកម្ម ៖ សម្រាប់អចលនវត្ថុប្រភេទនេះគឺមានតម្លៃថ្លៃ និងច្រើនស្ថិតនៅជាប់ផ្លូវធំ ជួរមុខ ដែលក្រៅពីសម្រាប់ស្នាក់នៅក៏មានភាពងាយស្រួលក្នុងការប្រកបអាជីវកម្មផ្សេងៗ មិនជាការបើហាងអាហារដ្ឋាន ហាងកាហ្វេ ឬជាអាជីវកម្មប្រចាំគ្រួសារជាច្រើនប្រភេទទៀត។

-ទី៣ អចលនវត្ថុបម្រើផ្នែកទីតាំងជួល ឬលក់រាយ ៖ អចលនវត្ថុប្រភេទនេះ គឺបម្រើដល់ការជួល ឬទីតាំងលក់រាយនៅក្នុង Supper Market, Mall , Shopping Mall ឬ Mart ជាដើម។

-ទី៤ អចលនវត្ថុបម្រើផ្នែកឧស្សាហកម្ម ៖ សម្រាប់បម្រើជាទីតាំងសាងសង់រោងចក្រ សហគ្រាស ឃ្លាំង ជាពិសេសតំបន់សេដ្ឋកិច្ចពិសេស ដែលស្ថិតនៅក្នុងវិស័យឧស្សាហកម្ម។

-ទី៥ អចលនវត្ថុបម្រើផ្នែកកសិកម្ម ៖ សម្រាប់បម្រើដល់ការដាំដុះ ការបង្កបង្កើនផល អាចប្រភេទកសិដ្ឋានលក្ខណៈគ្រួសារ ឬសហគមន៍ ក៏ដូចជាកសិដ្ឋានកម្រិតខ្ពស់សម្រាប់ធ្វើការនាំចេញ។

-ទី៦ អចលនវត្ថុបម្រើផ្នែកសេវាកម្មផ្សេងៗ ៖ អចលនវត្ថុប្រភេទនេះ រួមមានដូចជាការិយាល័យជួល សណ្ឋាគារដែលបម្រើផ្នែកបដិសណ្ឋារកិច្ច និងទេសចរណ៍ ក៏ដូចជាតំបន់អភិវឌ្ឍជាមជ្ឈមណ្ឌលកម្សាន្តជាដើម។

គ្រប់ប្រភេទអចលនវត្ថុទាំងអស់ដូចបានរៀបរាប់ខាងលើនេះ បច្ចុប្បន្នគឺសុទ្ធតែមានសកម្មភាព និងតម្រូវការទីផ្សារទាំងអស់ ហើយមានកម្រិតតម្លៃផ្សេងៗពីគ្នា អាស្រ័យទៅតាមទីតាំង និងភាពមានតម្រូវការចាំបាច់ជាក់ស្ដែង៕

ដោយ: សុខុម

ភ្នំពេញ: លោកHoward J Klein អ្នកវិភាគឯករាជ្យប្រចាំក្រុមហ៊ុន Smartkarma ដែលជាបណ្ដាញស្រាវជ្រាវការវិនិយោគ បានលើកឡើងថានេះជាពេលវេលាដ៏ល្អគួរ “ទិញ” ភាគហ៊ុនរបស់ក្រុមហ៊ុនល្បែង និងសណ្ឋាគារNagaCorp ដែលចុះបញ្ជីនៅហុងកុង និងដែលជាម្ចាស់កាស៊ីណូ Naga World នៅប្រទេសកម្ពុជា ឱ្យបានមុនក្រុមហ៊ុននេះចេញរបាយការណ៍ប្រាក់ចំណូលប្រចាំឆ្នាំសារពើពន្ធ ឆ្នាំ២០២០ របស់ខ្លួន។

អ្នកវិភាគដដែលបានគូសបញ្ជាក់ថា យោងតាមការស្រាវជ្រាវបង្ហាញថា អាជីវកម្មរបស់ក្រុមហ៊ុននេះ ទទួលបានលទ្ធផលល្អប្រសើរ អំឡុងពេលឆ្លងរាតត្បាតវីរុសកូវីដ-១៩ ហើយតាមការរំពឹងទុកថា នឹងងើបឡើងយ៉ាងឆាប់រហ័សនៅក្នុងឆ្នាំ២០២១នេះ។ នេះបើយោងតាមគេហទំព័រ ASGAM ចុះផ្សាយកាលពីថ្ងៃទី៨ ខែកុម្ភៈ ឆ្នាំ០២១។

ដោយលើកឡើងពីទស្សនៈប្រយ័ត្នប្រយែង ជ្រុលរបស់វិនិយោគិន ចំពោះភាគហ៊ុនរបស់ក្រុមហ៊ុន NagaCorp ដែលពេលនេះបានធ្លាក់ថ្លៃ៣ដុល្លារហុងកុង ពីតម្លៃ១២,៤០ដុល្លារហុងកុង ដែលជាកម្រិតខ្ពស់បំផុត ក្នុងរយៈពេល៥២សប្ដាហ៍មក នៅត្រឹម៩,១៨ដុល្លារហុងកុង លោក Howard J Klein បានពន្យល់ថា ក្រុមហ៊ុននេះកំពុងស្ថិតក្នុងស្ថានភាពងើបឡើងវិញ ហើយវាជាពេលដ៏ល្អ គួរទិញយកភាគហ៊ុនរបស់ក្រុមហ៊ុននេះ ក្រោយតម្លៃបានធ្លាក់ចុះជាង៥ដុល្លារហុងកុង ដោយសារការឆ្លងរាតត្បាតវីរុសកូវីដ១៩។

ក្រុមហ៊ុនស្រាវជ្រាវការវិនិយោគSmartkarma ជឿជាក់ថា អាចមានដំណឹងវិជ្ជ​មានអំពីប្រាក់ចំណូល នៅពេលរបាយការណ៍ហិរញ្ញវត្ថុ ប្រចាំឆ្នាំសារពើពន្ធ២០២០ របស់ក្រុមហ៊ុន NagaCorp ត្រូវបានបញ្ចេញ។

មុននេះក្រុមហ៊ុនNagaCorp បានប្រកាសចំណូលមុនពេលកាត់ពន្ធ EBITDAចំនួ​ន៨៨,៧លានដុល្លារអាមេរិក និងប្រាក់ចំណេញ២០,៦លានដុល្លារអាមេរិក ក្នុងឆមាសទី១ ដើមឆ្នាំ២០២០ ទោះបើខ្លួនបិទទ្វារផ្អាកដំណើរការ ជាបណ្ដោះអាសន្នរយៈពេល៣ខែ ពីខែមេសា ដល់ខែកក្កដាក្ដី។

ក្រោយមកក្រុមហ៊ុននេះបានបញ្ជាក់ថា ចំណូលសរុបបានពីល្បែង (Gross Gaming Revenue (GGR)) របស់ខ្លួនទទួលបាន៩១ភាគរយ បើធៀបនឹងកម្រិតមុនពេលផ្ទុះវិបត្តិកូវីដ-១៩ នៅត្រឹមដំណាច់ត្រីមាសក្នុងខែកញ្ញា ឆ្នាំ២០២០។

ទោះជាយ៉ាងណា លោក Howard J Klein រំពឹងថា ក្រុមហ៊ុននេះនឹងទទួលបានកំណើនប្រមាណ១២ភាគរយ ត្រឹមត្រីមាសទី៤ នៃឆ្នាំ២០២១៕

ដោយគង់ សូរិយា

ភ្នំពេញៈ គេហទំព័រ Propertyarea.asia បានចុះអនុស្សរណៈនៃការយោគយល់គ្នាជាមួយសារព៌តមាន The Cambodia China Times (CCTIMES) ដើម្បីសហការគ្នាលើការផ្លាស់ប្តូរព៌តមាន និងការសហការគ្នាក្នុងភាពជា​ដៃគូលើការលក់ពាណិជ្ជកម្មរួមគ្នា។

ស្ថាប័នព៌តមានឈានមុខគេទាំងពីរនេះ មានការផ្សព្វផ្សាយលើទម្រង់ព៌តមានស្រដៀងគ្នា ដោយផ្តោតភាគច្រើនលើវិស័យសេដ្ឋកិច្ច រួមមាន ហិរញ្ញវត្ថុ អចលនទ្រព្យ និងទិដ្ឋភាពទូទៅនៃសេដ្ឋកិច្ចកម្ពុជា។

យោងតាមកិច្ចព្រមព្រៀងនៃអនុស្សរណៈនេះ បានចែងលើចំណុចមួយចំនួនដូចជាទី១ ស្ថាប័នព៌តមានទាំងពីរ នឹងជួយលើការផ្សព្វផ្សាយពីសកម្មភាពនៃស្ថាប័ន និងការផ្សព្វផ្សាយពាណិជ្ជកម្មរបស់គ្នាទៅវិញទៅមក ទី២ ស្ថាប័នទាំងពីរនឹងផ្តល់ផលប្រយោជន៍ជូនគ្នាទៅវិញទៅមក តាមរយៈការលក់ពាណិជ្ជកម្មសំរាប់គ្នា ដោយភាគីនិមួយៗបានទទួលកម្រៃជើងសារ២០ភាគរយ នៃតម្លៃពាណិជ្ជកម្ម ដែលភាគីទាំងពីរផ្តល់ឲ្យគ្នាទៅវិញទៅមក។
ទី៣ ភាគីទាំងពីរនឹងជួយផ្សព្វផ្សាយ ពីសកម្មភាពរបស់គ្នាទៅវិញទៅមក សំដៅបង្កើនកេរ្ត៍ឈ្មោះ និងកិត្យានុភាពរវាងស្ថាប័នរបស់់យើងទាំងពីរ និងទី៤ ភាគីទាំងពីរនឹងរួមចំណែកជួយគ្នា លើការបណ្តុញបណ្តាល និងការជួយគ្នាលើការងារផ្សេងៗ ដើម្បីពង្រីកសក្តានុពល និងឧត្តមភាពនៃក្រុមហ៊ុនទាំងពីរ។

សហស្ថាបនិក និងជាអគ្គនាយកគេហទំព័រ Propertyarea.asia លោកយិន លាងគង់បានមានប្រសាសន៍ ក្នុងពិធីចុះហត្ថលេខាជាមួយលោកផ្លុង វិចិត្រអគ្គនាយកសារព៌តមាន The Cambodia China Times នាព្រឹកថ្ងៃទី៩ កុម្ភៈនេះថា ការសហការគ្នានេះជាផ្នែកមួយយ៉ាងសំខាន់ ក្នុងការជម្រុញការរីកចម្រើនរបស់គ្នាទៅវិញទៅមក ដោយយើងឈរលើមូលដ្ឋាននៃភាពឈ្នះ ឈ្នះទាំងអស់គ្នា។

លោកបន្តថា “ការប្រកួតប្រជែងមិនធ្វើឲ្យយើងរីកចម្រើនទេ គឺមានតែការសហការប៉ុណ្ណោះទើបយើងអាចដើរទៅ​មុខបានឆ្ងាយ និងរីកចម្រើនរួមគ្នា”។ លោកបន្តថា “ដោយហេតុនេះហើយ យើងនឹងបង្កើតតម្លៃកញ្ចប់ពាណិជ្ជកម្មរួមគ្នា ដើម្បីផ្តល់ជម្រើសដល់អតិថិជនដៃគូរបស់យើង អាចប្រើប្រាស់សេវាកម្មរបស់យើង បានគ្រប់ជ្រុងជ្រោយ​និងមានប្រសិទ្ឋភាពខ្ពស់”។

ជាមួយគ្នានេះ លោកផ្លុង វិចិត្រអគ្គនាយកសារព៌តមាន The Cambodia China TIMES បានមានប្រសាសន៍ថា ការរីកចម្រើនរួមគ្នា ក្នុងភាពជាដៃគូ យើងសង្ឃឹមថានឹងផ្តល់ផលប្រយោជន៍ជូនគ្នាទៅវិញទៅមក សំដៅរួមចំណែកផ្សព្វផ្សាយព៌តមាន មានលក្ខណៈវិជ្ជមានដល់ប្រជាពលរដ្ឋ និងជួយដៃគូពាណិជ្ជកម្មរបស់យើង អាចផ្សព្វផ្សាយព៌តមានបានទូលំទូលាយក្នុងវិស័យសេដ្ឋកិច្ច ហិរញ្ញវត្ថុ អចលនទ្រព្យនៅកម្ពុជា។

លោកបន្តថា“យើងសង្ឃឹមថាឆ្នាំ២០២១ ក្រោយចូលឆ្នាំប្រពៃណីចិន ដែលនឹងមកដល់នាពេលខាងមុខ យើងនឹងអាចមើលឃើញភាពរីកចម្រើនរួមគ្នា និងជោគជ័យទាំងអស់គ្នា”។

The Cambodia China Times(CCTIMES) ជាស្ថាប័នព៌តមានដែលមានជាកាសែតបោះពុម្ពជាភាសាចិន ទស្សនាវដ្តីជាភាសាចិន និងសារព៌តមានអនឡាញដែលដាក់ឈ្មោះលើបណ្តាញទំនាក់ទំនងសង្គមស៊ីស៊ីថាមស៍៕

ដោយ៖ លក្ខិណា

ភ្នំពេញ៖ កម្ពុជាទទួលបានទុនវិនិយោគពីវិស័យសំណង់ទូទាំងប្រទេសចំនួនប្រមាណ៦០,៨៧ពាន់លានដុល្លារអាមេរិក ចាប់តាំងពីឆ្នាំ២០០០ ដល់ដំណាច់ឆ្នាំ២០២០ ខណៈគម្រោងសាងសង់សរុបទូទាំងប្រទេសមានចំនួន៥៣ ២៨៧គម្រោង នៅលើផ្ទៃក្រឡាសរុបចំនួន១៥៣,៦២លានម៉ែត្រក្រឡា។ នេះបើតាមរបាយការណ៍ចុងក្រោយរបស់ក្រសួងរៀបចំដែនដី នគរូបនីយកម្ម និងសំណង់។

យោងតាមរបាយការណ៍នខាងលើបានបង្ហាញថា គម្រោងអគារខ្ពស់ៗចាប់ពី៥ជាន់ឡើងនៅទូទាំងប្រទេសមានចំនួន២ ១៨០អគារ ក្នុងនោះខេត្តព្រះសីហនុ មាន៦១៥អគារ។

អគារខ្ពស់ៗចាប់ពី៥ជាន់ ដល់៩ជាន់ មានចំនួន១ ១៧៦អគារ ហើយអគារចាប់ពី១០ជាន់ ទៅ១៩ជាន់ មានចំនួន៦២៥អគារ អគារកំពស់ពី២០ជាន់ ដល់២៩ជាន់ មានចំនួន២០៧អគារ កំពស់ពី៣០ជាន់ ដល់៣៩ជាន់ មាន១២២អគារ និងអគារកំពស់ចាប់ពី៤០ជាន់ឡើង មានចំនួន៥០អគារ។

ក្រៅពីសំណង់អគារខ្ពស់ៗ កម្ពុជាក៏មានការវិនិយោគច្រើនទៅលើបុរីលំនៅឋានផងដែរ ដោយក្នុងនោះ គម្រោងបុរីលំនៅឋាន និងបណ្ដុំលំនៅឋានមានលក្ខណៈជាបុរីមានចំនួន៣៩៣គម្រោង។

ដោយឡែកគិតចាប់ពីឆ្នាំ២០០៨ ដល់ដំណាច់ឆ្នាំ២០២០ សំណង់សណ្ឋាគារវិញមានចំនួន១ ៩៣៧គម្រោង សំណង់អគារពាណិជ្ជកម្មមានចំនួន ២ ៦៥១គម្រោង សំណង់អគាររោងចក្រមានចំនួន១០ ៤២២គម្រោង និងសំណង់អគារពហុមុខងារ មានចំនួន២០៧គម្រោង។

អ្នកជំនាញក្នុងវិស័យអចលវត្ថុនៅកម្ពុជាបានលើកឡើងថា កម្ពុជានៅតែមានសក្ដានុពលខ្ពស់ក្នុងការវិនិយោគលើវិស័យសំណង់ និងអចលនទ្រព្យ ហើយបណ្ដាខេត្តមួយចំនួន ដូចជាខេត្តព្រះសីហនុ និងខេត្តសៀមរាប កំពុងទាក់ទាញខ្លាំងលើវិស័យសំណង់ និងអចលនទ្រព្យ ដោយសារតែរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធជាច្រើនខ្សែ ដើម្បីទាក់ទាញ និងសម្រួលដល់ការវិនិយោគរបស់វិនិយោគិនក្នុង និងក្រៅប្រទេស។

ក្រុមហ៊ុនព្រីនស៍រៀលអ៊ីស្ទេត ដែលជាក្រុមហ៊ុនអភិវឌ្ឍន៍សំណង់ធំមួយនៅក្នុងប្រទេសកម្ពុជា បានប្រកាសថា ខ្លួនជ្រើសរើសយកភ្នំពេញជាចំណុចស្នូលនៃការអភិវឌ្ឍរបស់ខ្លួន ហើយយកខេត្តព្រះសីហនុ និងសៀមរាបជាស្លាបទាំងពីរនៃការវិនិយោគរបស់ខ្លួនផងដែរ៕