ដោយៈ រ៉ាណេត

ភ្នំពេញៈ ក្រោមការសម្លឹងឃើញពីស្ថានភាពដ៏ល្អប្រសើរ លើការវិនិយោគនៅកម្ពុជាក្រុមហ៊ុនចិនដ៏ធំមួយ បានបង្ហាញពីមហិច្ឆិតារបស់ខ្លួន ក្នុងការបណ្តាក់ទុនវិនិយោគនៅកម្ពុជា រួមមានការបង្កើតកសិដ្ឋានដាំដុះរុក្ខជាតិឱសថ ការបង្កើតវិទ្យាស្ថានពិសោធន៍ រួមជាមួយនឹងការបង្កើតចំរាញ់រុក្ខជាតិឱសថ បម្រើដល់វិស័យសុខាភិបាលក្រោមការគាំទ្រថវិកាពីរដ្ឋាភិបាលចិន។

លោកឧកញ៉ា ឆាវ អ៊ីនទ័រ ដែលបានដឹកនាំប្រតិភូមកពីក្រុមហ៊ុន Khmer Holding Group និង Shanxi Institute of National Medical Biology ចូលជួបរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៦ ខែសីហា ឆ្នាំ២០២០ ដោយបានលើកឡើងពីគោលបំណងចម្បងនៃការបណ្តាក់ទុនវិនិយោគនៅក្នុងកម្ពុជា។

លោកឧកញ៉ាបានមានប្រសាសន៍ថា “ទំនាក់ទំនងរបស់រាជរដ្ឋាភិបាលកម្ពុជា និងចិនក្នុងនាមជាមិត្តដែកថែប បាននាំមកនូវសមទ្ធិផល និងភាពរីកចម្រើនគួរជាទីមោទន ជាពិសេសភាពស្និទ្ធស្នាលរវាងប្រជាជននៃប្រទេសទាំង២”។ លោកបន្តថា “តាមរយៈសមិទ្ធផលនេះ ពិតជាបានមកពីកិច្ចសហប្រតិបត្តិការយ៉ាងពេញលេញ និងគ្រប់ជ្រុងជ្រោយរបស់រដ្ឋាភិបាល”។

លោកបានបញ្ជាក់ថា គោលបំណងសំខាន់នៃកិច្ចជុំនួបនាពេលនេះ ដើម្បីស្នើសុំកិច្ចសហការ និងការគាំទ្រពីក្រសួងកសិកម្ម រុក្ខាប្រមាញ់ និងនេសាទក្នុងការបង្កើតវិទ្យាស្ថានស្រាវជ្រាវ និងបង្កើតរោងចក្រចំរាញ់រុក្ខជាតិឱសថ និងស្វែងរកផ្ទៃដីដំដុះរុក្ខជាតិឱសថ ដែលគម្រោងនេះគាំទ្រថវិកាពីរដ្ឋាភិបាលចិន។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានសម្តែងការស្វាគមន៍ និងគាំទ្រចំពោះគម្រោងវិនិយោគដាំដុះរុក្ខជាតិឱសថ បង្កើតវិទ្យាស្ថាន និងរោងចក្រចំរាញ់រុក្ខជាតិឱសថ នៅកម្ពុជានាពេលអនាគត។ គម្រោងដ៏មានសារសំខាន់នេះ ពិតជាចូលរួមចំណែក កាត់បន្ថយបរិមាណនាំចូលឱសថនាពេលអនាគត។

លោករដ្ឋមន្ត្រីបានណែនាំឱ្យក្រុមហ៊ុនសិក្សាអំពីទីតាំង និងទំហំផ្ទៃដីដាំដុះរុក្ខជាតិឱសថនេះ ជាពិសេសដោយសារគម្រោងវិនិយោគនេះ ត្រូវបានការគាំទ្រពីរាជរដ្ឋាភិបាល​ចិន លោកបានស្នើសុំឱ្យក្រុមហ៊ុនធ្វើការទំនាក់ទំនង ជាមួយស្ថានទូតចិននៅកម្ពុជា ដើម្បីទទួលបានកំណត់ទូតច្បាស់លាស់ ស្នើសុំឱ្យរាជរដ្ឋាភិបាលកម្ពុជា ដែលមានក្រសួងកសិ​កម្ម រុក្ខាប្រមាញ់ និងនេសាទ ជាសេនាធិការផ្តល់កិច្ចសហការឲ្យបានពេញលេញ និងគ្រប់ជ្រុងជ្រោយ។

ទំហំនៃការនាំចេញកសិផលកម្ពុជា ទៅកាន់ប្រទេសចិនកាលពីពេលកន្លងមកនេះរួមមានដូចជា អង្ករ ដំឡូងមីក្រៀម ចេកអំបូងលឿងស្រស់ គ្រាប់ស្វាយចន្ទី និងដំណាប់ស្វាយ។ល។ ជាងនេះទៅទៀត មុខទំនិញមួយចំនួន ក្រសួងកសិកម្ម រុក្ខាប្រមាញ់ និងនេសាទ បាន និងកំពុងសហការជាមួយរដ្ឋបាលគយចិនរៀបចំពិធីសារដើម្បីឈានទៅធ្វើការនាំចេញទៅកាន់ទីផ្សារចិននាពេលអនាគត។ ដោយឡែកចំពោះគម្រោងវិនិយោគបង្កើតវិទ្យាស្ថានស្រាជ្រាវ ដាំដុះ ធ្វើការចំរាញ់រុក្ខជាតិឱសថនៅកម្ពុជា សំដៅចូលរួមប្រើប្រាស់វត្ថុធាតុដើម បង្កើតការងារជូនប្រជាពលរដ្ឋនៅមូលដ្ឋាន បង្កើនចំណូល កាត់បន្ថយបរិមាណនាំចូល៕

ដោយវុត្ថា

        ព្រះសីហនុៈ ឯកអគ្គរាជទូតថៃប្រចាំកម្ពុជាបានចាត់ទុកថា ខេត្តព្រះសីហនុ ជាខេត្តជាប់មាត់សមុទ្រ ប្រកបដោយសក្តានុពល ដែលអាចទាក់ទាញភ្ញៀវទេសចរណ៍ និងអ្នកវិនិយោគ ចូលមកកំសាន្ត និងធ្វើការបណ្តាក់ទុនរកស៊ីនៅក្នុងខេត្តនេះ។

លោក Panyarak Poolthup ឯកអគ្គរាជទូតថៃប្រចំាកម្ពុជា នៅក្នុងជំនួបពិភាក្សាការងារជាមួយលោក គួច ចំរើន អភិបាលខេត្តព្រះសីនុកាលពីម្សិលមិញ បានធ្វើការវាយតម្លៃខ្ពស់លើការរីកចម្រើនយ៉ាងឆាប់រហ័ស របស់ខេត្តព្រះសីហនុ ជាពិសេសក្រោមការដឹកនាំរបស់រាជរដ្ឋាភិបាលបច្ចុប្បន្ននេះ ។

លោកបន្តថា “ការចូលមកវិនិយោគ និងធ្វើទេសចរណ៍ មកកាន់ខេត្តព្រះសីហនុជាផ្នែកមួយ ក្នុងការជួយជម្រុញកំនើនសេដ្ឋកិច្ចជាតិ ក្នុងនោះក៏មានអ្នកវិនិយោគ ជាជនជាតិថៃមួយចំនួនបានមកបណ្តាក់ទុនរកស៊ីនៅទីនេះផងដែរ”។

លោកគួច ចំរើន អភិបាលខេត្តព្រះសីហនុ បានថ្លែងអំពីស្ថានភាពភូមិសាស្ត្រ និងវឌ្ឍនភាព នៃការអភិវឌ្ឍន៍ខេត្តព្រះសីហនុ ជាបន្តបន្ទាប់លើវិស័យជាច្រើន ក្រោមការយកចិត្តទុកដាក់ពីប្រមុខនៃរាជរដ្ឋាភិបាល។ លោកបន្តទៀតថា កន្លងមកមាននាវាកងទ័ពជើងទឹករបស់ថៃចំនួន២៦គ្រឿង បានចូលចតនៅកំពង់ផែស្វយ័តខេត្តព្រះសីហនុ ដោយអាជ្ញាធររបស់យើង មានកិច្ចសហប្រតិបត្តិការគ្នាបានយ៉ាងល្អ និងបានធ្វើការចែករំលែកបទពិសោធន៍គ្នាទៅវិញទៅមកផងដែរ។

លោកអភិបាលខេត្ត ក៏បានស្នើ លោក Panyarak Poolthup ឯកអគ្គរាជទូតនៃព្រះរាជាណាចក្រថៃ បន្តការគាំទ្រ និងជំរុញកិច្ចសហប្រតិបត្តិការ បង្ការបង្រ្កាបគ្រឿងញៀន ការពារសុវត្ថិភាពលើផ្លូវសមុទ្រ និងការអភិវឌ្ឍធនធានមនុស្ស ទៅលើវិស័យនេះផងដែរ៕

ដោយវុត្ថា

ភ្នំពេញៈ  ក្រុមហ៊ុនសណ្ឋាគារ Avani Hotel & Resorts  បានប្រកាសត្រៀមដាក់ ឱ្យដំណើរសណ្ឋាគារថ្មីចំនួន១០ នៅតាមប្រទេសក្នុងតំបន់អាស៊ី រួមទាំងសណ្ឋាគារ  Avani FCC Angkor ស្ថិតនៅក្នុងខេត្តសៀមរាបនៃប្រទេសកម្ពុជា បន្ទាប់ពីបានធ្វើការជួសជុលរួចរាល់។

យោងតាមសារព័ត៌មានបរទេស FTNnews ចុះផ្សាយកាលពីថ្ងៃទី ៦ ខែសីហា ឆ្នាំ ២០២០នេះ ឱ្យដឹងថា បើទោះបីពិភពលោក កំពុងជួបប្រឈមទៅការធ្លាក់ចុះសេដ្ឋកិច្ចដែលបង្កឡើងដោយជំងឺCovid-19 ក៏ក្រុមហ៊ុនសណ្ឋាគារ Avani បានបញ្ចប់ការសាងសង់ និងកែលម្អជួសជុល ដោយជោគជ័យនូវគម្រោងរបស់ខ្លួនផងដែរ។

សារព័ត៌មានបន្តថា ការបានបញ្ចប់ការជួលជុលឡើងវិញ នូវដំណាក់កាលទី២ នៃសណ្ឋាគារ Avani FFC Angkor  នៅក្នុងខេត្តសៀមរាបនៃប្រទេសកម្ពុជានោះ ក៏ត្រៀមនឹងដាក់ឱ្យដំណើរការពេលខាងមុខនេះ។ ជាមួយគ្នានេះ ក្រុមហ៊ុនក៏បានបញ្ចប់ការជួសជុលនៃរមណីយដ្ឋានAvani Kalutara នៅក្នុងប្រទេសស្រីលង្កា និងការជួសជុល និងកែលម្អឡើងវិញនៃរមណីយដ្ឋាន Avani Seminyak បាលីប្រទេសឥណ្ឌូនេស៊ី។

លោក Dillip Rajakarier នាយកប្រតិបត្តិសណ្ឋាគារ Minor Hotel បានថ្លែងថា ក្រុមហ៊ុនមានសេចក្តីរីករាយ ដែលដៃគូរបស់យើងបានបញ្ជាក់ពីការប្តេជ្ញាចិត្ត របស់ពួកគេក្នុងការបើកដំណើរការ និងការរីកចំរើនលើវិស័យសណ្ឋាគារជាមួយក្រុមហ៊ុន Avani ។

លោកបន្តថា យ៉ាងហោចណាស់សណ្ឋាគារថ្មីចំនួន៧ ក្រោមស្លាកAvani ត្រៀមនឹងដាក់ឱ្យដំណើរការនៅចុងឆ្នាំ២០២១ ជាមួយនឹងគម្រោងជាច្រើនទៀតរំពឹងថា នឹងត្រូវបញ្ចប់ក្នុងរយៈពេល២ឆ្នាំខាងមុខ៕

ដោយ ៖ រ៉ាណេត 

កណ្តាល ៖ រោងចក្រផលិតថាមពលអគ្គិសនីដើរដោយប្រេងខ្មៅ ដែលមានអនុភាពរហូតដល់៤០០មេហ្គាវ៉ាត់ នៅក្នុងខេត្តកណ្តាល នឹងក្លាយជាសមិទ្ធផលថ្មីមួយទៀតរបស់អាជ្ញាធរអគ្គិសនីកម្ពុជា បន្ទាប់ពីបើកដំណើរការនៅត្រឹមចុងខែសីហា ឆ្នាំ២០២០ខាងមុខនេះ។ 

អភិបាលខេត្តកណ្តាល លោក គង់ សោភ័ណ្ឌ បានមានប្រសាសន៍បញ្ជាក់ប្រាប់កាលពីពេលកន្លងទៅថ្មីៗនេះថា គម្រោងរោងចក្រអគ្គិសនីដែលដើរដោយប្រេងខ្មៅ និងឧស្ម័នអានុភាព ៤០០ម៉េហ្កាវ៉ាត់ ដែលស្ថិតនៅក្នុងស្រុកនៅល្វាឯម ខេត្តកណ្តាល រហូតមកដល់ពេលនេះការសាងសង់ និងតម្លើងសម្ភារៈបច្ចេកទេសសម្រេចជាង៩០ភាគរយ ហើយ ដោយគ្រោងនឹងដាក់ដំណើរការចុងខែសីហា ឆ្នាំ២០២០។

លោក គង់ សោភ័ណ្ឌ បានបញ្ជាក់ទៀតថា គម្រោងរោងចក្រអគ្គិសនីដែលមានអានុភាព ៤០០មេហ្កាវ៉ាត់មួយនេះ គឺសម្រាប់បម្រើដល់ការផ្គត់ផ្គង់ប្រើប្រាស់ និងចែកចាយទៅតាមបណ្តាខេត្តមួយចំនួនដែលស្ថិតនៅជិតគ្នា ហើយនៅមាន អនុស្ថានីយ ១កន្លែងទៀត ផ្តល់អនុភាព ២៣០គីឡូវ៉ុល សម្រាប់ផ្គត់ផ្គង់ក្នុងខេត្តកណ្តាលទាំងមូល។

គម្រោងរោងចក្រអគ្គិសនីខាងលើនេះ ត្រូវបានសាងសង់ឡើងលើផ្ទៃដីសរុប ៤៣ហិកតា មានតម្លៃវិនិយោគប្រមាណ ៣៨០ លានដុល្លារអាមេរិក ចែកចេញជាពីរគម្រោងធំៗ ទី១ គឺ ការសាងសង់រោងចក្រម៉ាស៊ីនភ្លើង អនុភាពទំហំ២០០មេហ្គាវ៉ាត នាំចូលពីប្រទេសហ្វាំងឡង់ និងសាងសង់ដោយក្រុមហ៊ុនចិន China Gezhouba Group Corporation និង ទី២ គឺជាការសាងសង់រោងចក្រម៉ាស៊ីនភ្លើងអនុភាព២០០មេហ្គាវ៉ាត នាំចូលពីប្រទេសអាឡឺម៉ង់ នឹងត្រូវសាងសង់ដោយក្រុមហ៊ុនចិន China National Heavy Machinery Corporation៕

ដោយ៖ ប៊ី

ភ្នំពេញ៖ ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានតម្លៃ ២,៨៩ ពាន់លានដុល្លារនៅឆមាសទីមួយនៃឆ្នាំនេះកើនឡើង ១៥,៨ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យពីការិយាល័យជំរឿនសហរដ្ឋអាមេរិក នៅក្នុងសប្តាហ៍នេះ។

ទិន្នន័យ បានបង្ហាញថា ការនាំចេញរបស់កម្ពុជាទៅទីផ្សារអាមេរិកមានទំហំទឹកប្រាក់ ២,៧៥ពាន់លានដុល្លារនៅឆមាសទី១ ឆ្នាំ២០២០ នេះ  ២៣ ភាគរយ បើធៀបនឹងទំហំទឹកប្រាក់ ២,២៤ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

កំណើននេះត្រូវបានគាំទ្រដោយការដឹកជញ្ជូនផលិតផល ដែលទាក់ទងនឹងការធ្វើដំណើរ ដូចជាកាបូបដៃ កាបូបស្ពាយ និងវ៉ាលី ដែលត្រូវបានអនុគ្រោះពន្ធ ដោយប្រព័ន្ធអនុគ្រោះពន្ធរបស់សហរដ្ឋអាមេរិក ដែលបានចូលជាធរមានកាលពីខែកក្កដាឆ្នាំ ២០១៦ ។ ចាប់តាំងពីពេលនោះមក ការនាំចេញរបស់កម្ពុជាទៅកាន់សហរដ្ឋអាមេរិកទទួលបានកំណើនគួរឱ្យកត់សម្គាល់ជារៀងរាល់ឆ្នាំ។

ទោះយ៉ាងណា ផលិតផលសម្លៀកបំពាក់ និងស្បែកជើងផលិតនៅកម្ពុជាមិនត្រូវបានរាប់បញ្ចូលក្នុងប្រព័ន្ធអនុគ្រោះពន្ធរបស់អាមេរិកនេះ។

ជាមួយគ្នានេះដែរ ទិន្នន័យបានបង្ហាញថា ប្រទេសកម្ពុជាបាននាំចូលទំនិញពីអាមេរិកមានតម្លៃ ១១៤,៦លានដុល្លារក្នុងរយៈពេល ៦ ខែគិតត្រឹមថ្ងៃទី ៣០ ខែមិថុនា ធ្លាក់ចុះ ៤៥,៤៣ ភាគរយ។

របាយការណ៍របស់ធនាគារជាតិនៃកម្ពុជា ចេញផ្សាយនៅថ្ងៃទី ៤ ខែមីនា បាននិយាយថា ឱនភាពពាណិជ្ជកម្មរបស់កម្ពុជាជាមួយបណ្តាប្រទេសផ្សេងទៀតនៅលើពិភពលោកបានបន្តកើនឡើងដល់ ៧,៧៦ ពាន់លានដុល្លារកាលពីឆ្នាំមុន ដែលជាការកើនឡើងជាង ៣១ ភាគរយ បើប្រៀបធៀបទៅនឹងឆ្នាំមុនមួយទៀត។

កាលពីឆ្នាំមុនកម្ពុជាបាននាំចូលទំនិញមានតម្លៃ ២២,៣៤ ពាន់លានដុល្លារ ខណៈនាំចេញតែ ១៤,៦៣ ពាន់លានដុល្លារប៉ុណ្ណោះ។

តួលេខរបស់ធនាគារកណ្តាល បានបង្ហាញថា អត្រាកំណើនប្រចាំឆ្នាំពីមួយឆ្នាំទៅមួយឆ្នាំក្នុងការនាំចូលមានចំនួន ១៨,៦ ភាគរយកាលពីឆ្នាំមុន ខណៈការនាំចេញបានធ្លាក់ចុះ ១២,៧ ភាគរយ។

របាយការណ៍ បានឱ្យដឹងថា ប្រទេសកម្ពុជាបាននាំចេញវាយនភ័ណ្ឌ ស្បែកជើង អង្ករ និងកង់ ហើយបាននាំចូលប្រេង យានយន្ត គ្រឿងសំណង់ ចំណីអាហារ ភេសជ្ជៈ និងវត្ថុធាតុដើមសម្រាប់វិស័យផលិតកម្ម៕