ថ្ងៃទី០១ ខែវិច្ឆិកា ឆ្នាំ២០២៥៖ ធនាគារ ហត្ថា ដែលជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG មានកិត្តិយសបានចូលរួមការតាំងបង្ហាញពីឱកាសការងារ និងជ្រើសរើសកម្លាំងពលកម្ម នៃព្រឹត្តិការណ៍ពិព័រណ៍ការងារ និងផលិតភាពជាតិ ឆ្នាំ២០២៥ ក្រោមប្រធានបទ “ វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ ”  ក្រោមអធិបតីភាពរបស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមានការអញ្ញើញចូលរួមពី​ដៃគូអភិវឌ្ឍន៍ រោងចក្រ សហគ្រាស កម្មករ និយោជិត​ និងនិយោជក​ ពីគ្រប់មជ្ឈដ្ឋានប្រមាណជាង ១៨០០នាក់។

ក្នុងព្រឹត្តិការណ៍នេះ ធនាគារ ហត្ថា បានរៀបចំស្តង់ពិព័រណ៍ ដើម្បីបានជួបពិភាក្សាដោយផ្ទាល់ជាមួយបេក្ខជន ទទួលពាក្យ និងអាចសម្ភាសន៍ដោយផ្ទាល់ជាមួយពួកគាត់ ដែលកំពុងស្វែងរកការងារ។ ជាមួយគ្នានោះផងដែរ ធនាគារ ហត្ថា មានកិត្តិយសដ៏ខ្ពង់ខ្ពស់ទទួលលិខិតថ្លែងអំណរគុណពីឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ចំពោះការបរិច្ចាគកង់ចំនួន ១០០ គ្រឿង ដល់ក្រសួងដើម្បីលើកកម្ពស់សកម្មភាពផ្សព្វផ្សាយឱកាសការងារក្នុងស្រុក​ និងចុះឈ្មោះជ្រើសរើសបុគ្គលិក។​

លោក អាំង ប៊ុនសេង អគ្គនាយកធនធានមនុស្ស នៃធនាគារ ហត្ថា បានមានប្រសាសន៍ថា “ តាងនាមអោយគណៈគ្រប់គ្រងរបស់ធនាគារ ហត្ថា យើងសង្ឃឹមយ៉ាងមុតមាំថា ការរួមចំណែកឧបត្ថម្ភកង់នៅថ្ងៃនេះ ជាផ្នែកមួយដ៏សំខាន់បំផុតក្នុងការបង្កើតឱកាសការងារ និងចូលរួមផ្សព្វផ្សាយឱកាសការងារផ្សេងៗនៅក្នុងស្រុក ដើម្បីអោយបេក្ខជននិងប្រជាជនដែលកំពុងស្វែងរកការងារទាំងអស់បានទទួលជ្រាប និងចាប់យកឱកាសការងារដើម្បីបង្កើនផលិតភាពក្នុងស្រុក”។

អំពី ធនាគារ ហត្ថា

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្ដល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលរួមមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាជីវកម្មធំៗជាច្រើនទៀត ។ ធនាគារ ហត្ថា គឺជាសមាជិករបស់ MUFG ដែលជាសម្ព័ន្ធហិរញ្ញវត្ថុធំមួយ របស់ប្រទេសជប៉ុន ដែលមានសាខាប្រហែល  ២000 ទីតាំង ស្ថិតនៅក្នុងទីផ្សារជាង ៤០ ប្រទេសក្នុងពិភពលោក។ សម្ព័ន្ធក្រុមហ៊ុនផ្ដល់សេវាកម្មហិរញ្ញវត្ថុ MUFG បានការចុះបញ្ជីនៅលើផ្សារហ៊ុន (Tokyo Stock Exchange), ណាហ្គូយ៉ា (Nagoya Stock Exchange) និងញូវយ៉ក (New York Stock Exchange) ដោយមានតម្លៃទីផ្សាររហូតដល់ ២៤.២៧ កោដិយ៉េន និងប្រាក់ចំណេញសុទ្ធចំនួន ១.៥៩១,១ ពាន់លានយ៉េន នៅត្រឹមចុងខែមីនា ឆ្នាំ ២០២៥។

ដោយៈ គង់ សូរិយា

    ស្វាយរៀងៈ មន្រ្តីជាន់ខ្ពស់ក្រសួងសាធារណការ បានបើកសិក្ខាសាលាផ្សព្វផ្សាយ និងជំរុញការអនុវត្ត “ផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មនៅកម្ពុជា ឆ្នាំ ២០២៣-២០៣៣” លើកទី៣។

សិក្ខាសាលានេះប្រារពធ្វើឡើង ក្រោមអធិបតីភាព លោកហេង ណន រដ្ឋលេខាធិការ តំណាងដ៏ខ្ពង់ខ្ពស់ លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជា គណៈអធិបតី ក្នុងពិធីបើកសិក្ខាសាលាផ្សព្វផ្សាយ និងជំរុញការអនុវត្ត “ផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មនៅកម្ពុជា ឆ្នាំ២០២៣-២០៣៣”។

សិក្ខាសាលានេះ មានការអញ្ជើញចូលរួមពីថ្នាក់ដឹកនាំក្រសួងតំណាងគណៈអភិបាលខេត្ត តំណាងមន្ទីរពាក់ព័ន្ធ តំណាងសភាពាណិជ្ជកម្មទាំង៥ខេត្ត មានដូចជា  ខេត្តកណ្ដាល ខេត្តតាកែវ ខេត្តត្បូងឃ្មុំ ខេត្តស្វាយរៀង និងខេត្តព្រៃវែង និងមន្ត្រីជំនាញពាក់ព័ន្ធ នៃអគ្គនាយកដ្ឋានភស្តុភារកម្ម។

សិក្ខាសាលានេះ ត្រូវបានរៀបចំឡើងក្នុងគោល បំណងផ្សព្វផ្សា​យផែនការមេ ដល់គ្រប់ភាគីពាក់ព័ន្ធលើគម្រោង ដែលបានចែងក្នុងផែនការមេសរុបចំនួន១៧៤គម្រោង ដោយបែងចែកជា២ដំណាក់កាលសម្រាប់ការអនុវត្តជា ដូចជា (១) គម្រោងអនុវត្តរយៈពេលខ្លី និងមធ្យម (ចាប់ពីឆ្នាំ២០២៣-២០២៧) និង(២) គម្រោងរយៈពេលវែង (ចាប់ពីឆ្នាំ២០២៨-២០៣៣) និងជំរុញដល់គ្រប់ភាគីពាក់ព័ន្ធសម្រាប់ជួយផ្សព្វផ្សាយបន្តដល់វិនិយោគិន ដើម្បីចាប់យកឱកាសវិនិយោគផងដែរ។

ថ្លែងក្នុងឱកាសនោះ លោករដ្ឋលេខាធិការ មានក្ដីសង្ឃឹមយ៉ាងមុតមាំថា តាមរយៈសិក្ខាសាលានេះ សិក្ខាកាមចូលរួមទាំងអស់ យល់ដឹងពីគោលដៅ ក៏ដូចជាសារៈសំខាន់នៃគម្រោងនានាមានក្នុង “ផែនកា​រមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣” ដើម្បីប្រទេសកម្ពុជា ឆ្ពោះទៅកាន់ចក្ខុវិស័យជាប្រទេស មានចំណូលមធ្យមកម្រិតខ្ពស់ នៅឆ្នាំ២០៣០ និងចំណូលខ្ពស់នៅឆ្នាំ២០៥០៕

ដោយៈ ចំណាន

    កាណាដាៈ  សហគ្រាសផលិតទឹកផ្លែឈើរបស់សម្ព័ន្ធ Lee Li Holdings Group មានមូលដ្ឋាននៅប្រទេសកាណាដា កំពុងស្វែងរកឱកាសវិនិយោគនៅកម្ពុជា ដើម្បីផ្គត់ផ្គង់នៅក្នុងតំបន់។  នេះបើតាមក្រុមប្រឹក្សាអភិវឌ្ឍន៍កម្ពុជា(CDC)។

ព័ត៌មាននេះត្រូវបានលើកឡើង នៅពេលលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំគណៈប្រតិភូកម្ពុជា បំពេញួទស្សនកិច្ចទៅកាន់ សហគ្រាសផលិតទឹកផ្លែឈើរបស់ សម្ព័ន្ធ Lee Li Holdings Group ដែលមានទីតាំងស្ថិតនៅក្នុងទីក្រុងតូរ៉ុនតូ ខេត្តអុនតារីយ៉ូ ប្រទេសកាណាដា នាថ្ងៃទី២៩ ខែតុលា។

ដំណើរទស្សនកិច្ចនេះធ្វើឡើង ដើម្បីស្វែងយល់ឱ្យបានស៊ីជម្រៅ អំពីហេដ្ឋារចនាសម្ព័ន្ធគ្រប់គ្រងការងារ (Operations Management) និងខ្សែចង្វាក់ផលិតកម្មទ្រង់ទ្រាយធំ (Large-scale Production Line) របស់សហគ្រាសដំណើរការដោយបច្ចេកវិទ្យាទំនើប និងស្វ័យប្រវត្តិកម្មខ្ពស់។

គណប្រតិភូCDC គណៈប្រតិភូកម្ពុជា ក៏បានធ្វើការឈ្វេងយល់អំពី ការប្រើប្រាស់បច្ចេកវិទ្យាទំនើប និងស្តង់ដារគុណភាពអន្តរជាតិក្នុងការកែច្នៃផលិតផលភេសជ្ជៈផងដែរ។

CDC បានបញ្ជាក់ថា “ការណ៍នេះ គឺអាចជាគំរូសម្រាប់លើកកម្ពស់វិស័យកែច្នៃម្ហូបអាហារ និងកសិ-ឧស្សាហកម្មនៅកម្ពុជា។ បច្ចុ​ប្បន្ន​ក្រុមហ៊ុន ផលិតទឹកផ្លែឈើរបស់កាណាដានេះ  កំពុងស្វែងរកលទ្ធ​ភាព ក្នុងការបណ្ដាក់ទុនវិនិយោគនៅកម្ពុជា ដើម្បីផ្គត់ផ្គង់នៅក្នុងតំបន់”។​

លោក Lee Q. Shim ដែលជាប្រធាន និងនាយកប្រតិបត្តិនៃសម្ព័ន្ធ Lee Li Holdings Group បានជួបពិភាក្សាការងារជាមួយ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីខែកក្កដា ឆ្នាំ២០២៤។

ក្នុងជំនួបនោះ សម្ព័ន្ធ Lee Li Holdings Group បានបង្ហាញចំណាប់អារម្មណ៍ ក្នុងការវិនិយោគលើវិស័យ សក្តានុពលសំខាន់ៗនៅកម្ពុជា រួមមាន ប្រេងនិងឧស្ម័ន សេវាសុខាភិបាល មជ្ឈមណ្ឌលទទួលស្គាល់សម្រាប់ការនាំចេញ ឧស្សាហកម្មកែច្នៃម្ហូបអាហារ វិស័យភស្តុភារកម្ម និងវិស័យយានយន្ត៕