អារ៉ាប៊ីសាអូឌីតប្តេជ្ញាទប់ទល់នឹងការហក់ឡើងនៃតម្លៃលំនៅដ្ឋានក្នុងប្រទេសរបស់ខ្លួន ក្រោយអនុញ្ញាតឱ្យជនបរទេសអាចទិញផ្ទះ

ដោយ: គង់ លាងហួរ
អន្តរជាតិ: ព្រះអង្គម្ចាស់ Mohammed bin Salman រាជទាយាទ និងជានាយករដ្ឋមន្ត្រីរបស់ប្រទេសអារ៉ាប៊ីសាអូឌីត បានលើកឡើងថា តម្លៃអចលនទ្រព្យនៅប្រទេសនេះកំពុងកើនឡើងលឿនខ្លាំងពេក និងឈានដល់កម្រិតមិនអាចទទួលយកបាន។

ជាមួយគ្នានេះ ព្រះអង្គម្ចាស់ bin Salman បានប្តេជ្ញាចាត់វិធានការកាត់បន្ថយការហក់ឡើងនៃតម្លៃលំនៅដ្ឋាន និងផ្តល់ជម្រើសលំនៅឋានបន្ថែមទៀតសម្រាប់ទាំងប្រជាពលរដ្ឋ និងជនបរទេស។

យ៉ាងណាមិញ ព្រះអង្គម្ចាស់មិនបានលើកឡើងពីគោលនយោបាយលំអិតនោះទេ។ ការអត្ថាធិប្បាយនេះបានធ្វើឡើង ខណៈតម្លៃផ្ទះបានហក់ឡើងខ្ពស់ ជាពិសេសនៅរាជធានីរីយ៉ាដ(Riyadh) ចាប់តាំងពីឆ្នាំ២០១៩។

រដ្ឋាភិបាលអារ៉ាប៊ីសាអូឌីតគ្រោងនឹងអនុញ្ញាតឱ្យជនបរទេសទិញអចលនទ្រព្យចាប់ពីឆ្នាំ២០២៦ តទៅ។ អារ៉ាប៊ីសាអូឌីតក៏បានចាប់ផ្តើមបោះផ្សាយមូលបត្រដែលធានាដោយអចលនទ្រព្យ(mortgage-backed security) ដើម្បីធ្វើឱ្យការផ្តល់កម្ចីទិញផ្ទះកាន់តែមានភាពងាយស្រួល។

ទីក្រុងធំៗមួយចំនួនដូចជា ទីក្រុង Madinah និងទីក្រុង Mecca កំពុងទទួលបានការចាប់អារម្មណ៍កាន់តែច្រើនពីជនបរទេស ដែលមានទ្រព្យសម្បត្តិស្តុកស្តម្ភ។ ការណ៍នេះជំរុញឱ្យមានការអភិវឌ្ឍន៍កាន់តែច្រើន រួមទាំងគម្រោងធំៗដូចជា គម្រោងលំនៅដ្ឋានខ្នាតយក្ស Rua Al Madinah។

ព្រះអង្គម្ចាស់ Mohammed bin Salman អះអាងថា កំណើនសេដ្ឋកិច្ចដ៏រឹងមាំ ដែលអារ៉ាប៊ីសាអូឌីតកំពុងសម្រេចបាន នាពេលបច្ចុប្បន្ននេះត្រូវបានជំរុញដោយសារការកើនឡើងនៃតម្លៃលំនៅដ្ឋាននៅក្នុងតំបន់មួយចំនួនដល់កម្រិតមួយដែលមិនអាចទទួលយកបាន៕ប្រភព: Bloomberg៕

ទីផ្សារលំនៅដ្ឋានរបស់សិង្ហបុរីរំពឹងរក្សាបានសន្ទុះនៃការលក់ផ្ទះថ្មីរហូតដល់ដំណាច់ចុងឆមាសទី២

ដោយ: គង់ លាងហួរ
អន្តរជាតិ: បណ្តាអ្នកអភិវឌ្ឍន៍អចលនទ្រព្យនៅប្រទេសសិង្ហបុរីត្រូវបានគេរំពឹងថា នឹងបន្តសម្រេចបានសន្ទុះនៃការលក់លំនៅដ្ឋាននៅឆមាសទី២ ឆ្នាំ២០២៥ ដោយសារកំណើននៃការអភិវឌ្ឍន៍គម្រោងលំនៅដ្ឋានថ្មី និងកំណើននៃចំណាប់អារម្មណ៍របស់អ្នកទិញ។

កាលពីឆមាសទី១ ប្រាក់ចំណេញសុទ្ធរបស់ក្រុមហ៊ុនអចលនទ្រព្យ UOL បានហក់ឡើង៥៨ភាគរយដល់ប្រមាណ១៦០,១៤លានដុល្លារអាមេរិក បន្ទាប់ពីក្រុមហ៊ុននេះបានបើកដំណើរការគម្រោងថ្មី ដូចជា គម្រោង Pinetree Hill គម្រោង Watten House និងគម្រោង Meyer Blue។

ប្រាក់ចំណេញសុទ្ធរបស់ក្រុមហ៊ុន City Developments Ltd (CDL) បានកើនឡើងបន្តិចដល់ចំនួន៩១,២លានដុល្លារសិង្ហបុរី(ប្រមាណ៧១លានដុល្លារអាមេរិក)។ ក្រុមហ៊ុន CDL បានបើកដំណើរការគម្រោងថ្មីៗ ដូចជា គម្រោង Copen Grand គម្រោង The Myst គម្រោង Norwood Grand និងគម្រោង CanningHill Piers។

ចំណែក ប្រាក់ចំណូលរបស់ក្រុមហ៊ុន GuocoLand បានហក់ឡើង២០,៣ភាគរយដល់ចំនួន៩០៦,៣លានដុល្លារសិង្ហបុរី។ ប៉ុន្តែប្រាក់ចំណេញសុទ្ធបានដាំក្បាលចុះ៤៨ភាគរយមកនៅត្រឹម៣២,៤លានដុល្លារសិង្ហបុរី ដោយសារក្រុមហ៊ុននេះជួបបប្រទះការខាតបង់នៅក្នុងប្រទេសចិន។

ចាប់ពីខែមករាដល់ខែកក្កដា ឆ្នាំ២០២៥ ផ្ទះឯកជនថ្មីសរុបចំនួន៥.៥២៧យូនីត ត្រូវបានលក់ចេញ កើនឡើងទ្វេរដងបើធៀបនឹងរយៈពេលដូចគ្នាក្នុងឆ្នាំ២០២៤។ ដោយឡែក នៅក្នុងខែសីហា ផ្ទះចំនួន១.៨០០យូនីតត្រូវបានលក់ចេញ។

ក្រុមអ្នកវិភាគរំពឹងថា សន្ទុះនៃការលក់ផ្ទះនៅប្រទេសសិង្ហបុរីនឹងបន្តកើនឡើង ដោយសារការបើកដំណើរការគម្រោងលំនៅដ្ឋានថ្មីៗ និងភាពសុទិដ្ឋនិយមរបស់អ្នកទិញចំពោះទីផ្សារអចលនទ្រព្យ។

រដ្ឋាភិបាលសិង្ហបុរីគ្រោងដាក់លក់ដីសម្រាប់ការអភិវឌ្ឍន៍លំនៅដ្ឋានតាមរយៈកម្មវិធីលក់ដីរដ្ឋ(Government Land Sales) ដើម្បីជំរុញការសាងសង់គម្រោងលំនៅដ្ឋានថ្មីដោយក្រុមហ៊ុនអភិវឌ្ឍន៍ឯកជន។

សម្រាប់ឆ្នាំ២០២៥នេះ រដ្ឋាភិបាលសិង្ហបុរីមានគោលដៅជំរុញការសាងសង់លំនៅដ្ឋានថ្មីឱ្យបានចំនួន៩.៧៥៥យូនីត ស្ថិតក្រោមកម្មវិធីលក់ដីរដ្ឋ។ តួលេខនេះហក់ឡើង៥០ភាគរយបើធៀបនឹងការផ្គត់ផ្គង់ផ្ទះជាមធ្យមចន្លោះពីឆ្នាំ២០២១ដល់ឆ្នាំ២០២៣៕ប្រភព: The Business Times៕

តើតម្លៃហាងឆេងមាសប្រែប្រួលដូចម្ដេចខណៈការធ្លាក់ចុះនៃទីផ្សារការងារនៅសហរដ្ឋអាមេរិក?

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃសុក្រនេះ ខណៈចំនួនពលរដ្ឋអាមេរិក ដែលដាក់ពាក្យស្នើសុំជំនួយពីរដ្ឋាភិបាលអាមេរិក ក្នុងកំឡុងពេលអត់ការងារធ្វើបានកើនឡើង២៧.០០០នាក់ដល់ចំនួន២៦៣.០០០នាក់កាលពីសប្តាហ៍មុន។នេះជាសញ្ញាបង្ហាញថា ទីផ្សារការងារអាមេរិកធ្លាក់ចុះ។

តួយ៉ាង តម្លៃមាស Spot Gold បានងើបឡើង០,៤៣ភាគរយដល់៣៦៤៩,៤៧ដុល្លារក្នុងមួយអោន បន្ទាប់ពីបានបិទការជួញដូរត្រឹមទំហំទឹកប្រាក់ប្រមាណ៣៦៣៣,៧៣ដុល្លារក្នុងមួយអោនកាលពីថ្ងៃព្រហស្បតិ៍ម្សិលមិញ។

ជាមួយគ្នានេះ តម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៣៧ភាគរយដល់៣៦៨៧,២ដុល្លារក្នុងមួយអោនគិតត្រឹមម៉ោង៩:២៨នាទីព្រឹកដូចគ្នា។

យោងតាមគេហទំព័រ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩២,៧ភាគរយ ដែលធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៧ ខែកញ្ញា។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៧,៦ពិន្ទុនៅព្រឹកថ្ងៃសុក្រនេះ ក្រោយពេលបានបិទការជួញដូរត្រឹម៩៧,៥៣ពិន្ទុកាលពីថ្ងៃព្រហស្បតិ៍ម្សិលមិញ៕

ក្រុងសៀមរាបស្វាគមន៍វត្តមមានសមិទ្ឋផលស្ពានព្រះរាជដំណាក់ទី២ថ្មី

ដោយៈ និស្ស័យ

សៀមរាបៈ ស្ពានព្រះរាជដំណាក់ទីពីរ មានប្រវែងសរុប៤៦ម៉ែត្រ និងទទឹង៨,២ម៉ែត្រ តភ្ជាប់រវាងក្រុងសៀមរាប និងផ្លូវជាតិលេខ៦ ឆ្ពោះទៅកាន់រាជធានីភ្នំពេញ ត្រូវបានសម្ពោធបើកឱ្យប្រើប្រាស់ជាផ្លូវការ កាលពីថ្ងៃទី០២ ខែមេសា ឆ្នាំ២០១៧។

យោងតាមក្រសួងសារធារណៈការ និងដឹកជញ្ជូនបានឲ្យដឹងថា ស្ពាននេះបានជួយសម្រួល ដល់ការធ្វើដំណើររបស់បងប្អូនប្រជាពលរដ្ឋ និងភ្ញៀវទេសចរជាតិ អន្តរជាតិ ព្រមទាំងលើកម្ពស់សោភ័ណភាពក្រុងសៀមរាប ឱ្យកាន់តែស្រស់ត្រកាលឡើង ដោយនៅលើស្ពានមានការរៀបចំតុបតែងយ៉ាងស្រស់ស្អាត ទៅតាមរដូវកាលនៃពិធីបុណ្យនានា។

មិនត្រឹមតែប៉ុណ្ណោះ អ្វីដែលកាន់តែរំលេចភាពស្រស់ស្អាតនោះ នៅពេលដែលបានធ្វើដំណើរនាពេលយប់ នៅលើស្ពានព្រះរាជដំណាក់ គឺគេបើភ្លើងនៅលើស្ពាន ដែលគេបានតុបតែងនោះ ពិតជាស្រស់ស្រាយអារម្មណ៍ ជួយរំសាយអារម្មណ៍ការតានតឹង និងទាក់ទាញភ្ញៀវទេសចរជាតិ និងអន្តរជាតិមកលេងកម្សាន្ត តំបន់ទេសចរប្រវត្តិសាស្ត្រមួយនេះផងដែរ៕

ក្រុមហ៊ុនហុងកុងធំំមួយចាប់អារម្មណ៍សក្តានុពលវិស័យ អចលនទ្រព្យនៅកម្ពុជា

ដោយៈ សូរិយា

ហុងកុងៈ ក្រុមហ៊ុនធំ និងចំណាស់មួយមានមូលដ្ឋាននៅទីក្រុងហុងកុង បានបង្ហាញចំណាប់អារម្មណ៍ លើសក្តានុពលក្នុងវិស័យអចលនទ្រព្យនៅកម្ពុជា។

ព័ត៌មាននេះ ត្រូវបានលើកឡើងនៅពេលលោកស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជួបពិភាក្សាការងារជាមួយលោក Elton Chan នាយកក្រុមហ៊ុនJardine Matheson។

ក្នុងជំនួបនេះភាគីទាំងពីរ បានផ្លាស់ប្ដូរយោបល់យ៉ាងផុលផុសអំពីសក្ដានុពលរបស់ប្រទេសកម្ពុជា ពិសេសលោក Elton Chan បានមើលឃើញអំពីចំណុច ប្រកួតប្រជែងរបស់កម្ពុជា ជាមួយបណ្ដាប្រទេសជិតខាងរបស់ខ្លួន គឺការប្រើប្រាស់រូបិយប័ណ្ណដុល្លារ និងការបើកចំហរទទួលការវិនិយោគលើគ្រប់វិស័យ។

លោកនាយកក្រុមហ៊ុន ក៏បានជម្រាបជូនផងដែរថា ក្រោយដំណើរទស្សនកិច្ចរបស់លោកនៅកម្ពុជា លោកបានសម្លឹងមើលឃើញសក្ដានុពល លើវិស័យអចលនទ្រព្យរបស់កម្ពុជា។ បន្ថែមលើព័ត៌មានដែលលោកធ្លាប់ទទួលបាន លោក Elton Chan ក៏បានសាកសួរបន្ថែមអំពីបច្ចុប្បន្នភាពគោលនយោបាយ និងការប្រើប្រាស់រថយន្តអគ្គិសនីនៅកម្ពុជាផងដែរ។

ជាការឆ្លើយតប លោកឧបនាយករដ្ឋមន្ត្រី បានជម្រាបជូនអំពីវឌ្ឍនភាពគួរឱ្យកត់សម្គាល់ នៃចំនួនអ្នកប្រើប្រាស់រថយន្តអគ្គិសនីនាពេលបច្ចុប្បន្ន រីឯគោលនយោបាយលើវិស័យនេះ គឺជាចំណុចអាទិភាពដែលរាជរដ្ឋាភិបាលកំពុងរៀបចំ ដើម្បីជំរុញលើកកម្ពស់ការប្រើប្រាស់រថយន្តអគ្គិសនី ឱ្យបានកាន់តែច្រើនបន្ថែមទៀត។

លោកឧបនាយករដ្ឋមន្ត្រី ក៏បានស្នើសុំឱ្យលោកElton Chan បន្តភ្ជាប់ទំនាក់ទំនងជិតស្និត រវាងក្រុមហ៊ុនជាមួយស្ថាប័ន ក្រុមប្រឹក្សាអភិវឌ្ឍន៍កម្ពុជា ដើម្បីអាចជួយសម្របសម្រួល ចំពោះកិច្ចស្នើសុំវិនិយោគនានា ដែលក្រុមហ៊ុនមានបំណងបណ្ដាក់ទុននាពេលអនាគត។

ក្រុមហ៊ុន Jardine Matheson មានមូលដ្ឋាននៅក្នុងទីក្រុងហុងកុងត្រូវបានបង្កើតឡើងដំបូងក្នុងឆ្នាំ១៨៣២ ដោយ William Jardine និង James Matheson។

ក្រុមហ៊ុនបានពង្រីកខ្លួន ទៅក្នុងវិស័យផ្សេងៗ រួមមាន ការដឹកជញ្ជូន ពាណិជ្ជកម្ម អចលនទ្រព្យ ការលក់រាយ បដិសណ្ឋារកិច្ច វិស្វកម្ម និងហិរញ្ញវត្ថុ ដោយបានក្លាយជាសាជីវកម្ម ពហុជាតិចំណាស់ជាងគេ និងលេចធ្លោមួយក្នុងមូលដ្ឋានក្រុងហុងកុង៕

បញ្ហាប្រឈមធំៗចំនួន១០ក្នុងវិស័យទេសចរណ៍ត្រូវបានលើកយកមកជជែកពិភាក្សាពីមន្រ្តីពាក់ព័ន្ឋ

ដោយៈ ម៉ាណា

ភ្នំពេញៈ បញ្ហាប្រឈមធំៗចំនួន១០ ត្រូវបានលើកយកមកជជែកក្នុងវេទិការដ្ឋ និងវិស័យឯកជន ដើម្បីស្វែងរកការដោះស្រាយ និងលើកសំណើរទៅរដ្ឋាភិបាល។

កិច្ចប្រជុំនេះមានការចូលរួមពីលោកហួត ហាក់ រដ្ឋមន្រ្តីក្រសួងទេសចរណ៍ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួល ក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) បានដឹកនាំសមាជិកសមាជិក ធុរជន និងវិនិយោគិន ផ្នែកឯកជនក្នុងវិស័យទេសចរណ៍ចូលរួម និងជាអធិបតីសហដឹកនាំ ក្នុងកិច្ចប្រជុំក្រុមការងារ “ខ” “ផ្នែកទេសចរណ៍” នៃវេទិការាជរដ្ឋាភិបាល-ផ្នែកឯកជន។

កិច្ចប្រជុំនេះក៏មានការចូលរួមផងដែរ ពីសំណាក់តំណាងក្រសួងស្ថាប័នរដ្ឋាភិបាល តំណាងសមាគមធុរកិច្ច និងក្រុមហ៊ុនឯកជន ក្នុងវិស័យទេសចរណ៍ ដែលជាសមាជិកនៃក្រុមការងារ “ខ” ទាំងផ្នែករដ្ឋាភីបាល និងផ្នែកឯកជនជាច្រើនផងដែរ។

កិច្ចប្រជុំនេះមានគោលបំណង ដើម្បីពិនិត្យ ពិគ្រោះ ពិភាក្សា និងទទួលយកធាតុចូល យោបល់ លើវិធានការចំនួន រួមមាន:

១. ការព្យាករណ៍ និង ប៉ាន់ស្មានស្ថិតិទេសចរឡើងវិញ

២. សេចក្តីព្រាងវិធានការគន្លឹះ ដើម្បីធានាភាពធន់នៃវិស័យទេសចរណ៍ ក្នុងនោះមានទិសដៅសកម្មភាពជាច្រើន ក្នុងវិស័យទេសចរណ៍ ដើម្បីទទួលបានលទ្ធផលល្អនាពេលខាងមុខ ដែលមានការចូលរួមពីក្រសួង ស្ថាប័នពាក់ព័ន្ធទាំងអស់ ព្រមទាំងវត្តមានវិស័យឯកជនផងដែរ។

កិច្ចប្រជុំបានធ្វើការពិនិត្យ ពិភាក្សា និងដោះស្រាយលើបញ្ហាប្រឈមរបស់ផ្នែកឯកជន ក្នុងវិស័យទេសចរណ៍រួមមាន

ទី១. ស្ថិតិភ្ញៀវទេសចរណ៍អន្តរជាតិក្នុងឆ្នាម២០២៥

ទី២ ការលើកលែងទិដ្ឋាការចំពោះភ្ញៀវទេសចរណ៍សាកល្បង

ទី៣ ការរៀបចំសារវីដេអូពីសំណាក់ប្រមុខរដ្ឋាភិបាល ស្វាគមន៍ភ្ញៀវទេសចរណ៍

ទី៤. បញ្ហាទាក់ទងនឹងរបាយការណ៍ស្ថិតទេសចរណ៍។

ទី៥. ការទទួលព័ត៌មានលម្អិតយីតយ៉ាវ នៃពិព័រណ៍ទេសចរណ៍អន្តរជាតិពីក្រសួង

ទី៦ បញ្ហាទាក់ទងនឹងទិដ្ឋាការ

ទី៧ បញ្ហា Branding

ទី៨. សំបុត្រចូលទស្សនា Culture Pass

ទី៩ សំណើសុំបង្កើតសមាគមក្រុមហ៊ុនអាកាសចរណ៍កម្ពុជា

ទី១០. ការមិនប្រើប្រាស់ភាសាបរទេស ក្នុងការផ្សព្វផ្សាយព័ត៌មានទេសចរណ៍ នៅក្នុង Facebook Page របស់ក្រសួងទេសចរណ៍ រួមនឹងបញ្ហាប្រឈមផ្សេងៗមួយចំនួនផ្សេងទៀតផងដែរ៕

តើមានកត្តាសំខាន់ៗអ្វីខ្លះ ដែលអាចនាំឱ្យគម្រោងសាងសង់អាផាតមុិនថ្មីនៅប្រទេសអូស្ត្រាលីធ្លាក់ចុះ?

ដោយ: គង់ លាងហួរ
អន្តរជាតិ: យោងតាមការសិក្សាថ្មីបង្ហាញថា នៅឆ្នាំ២០២៥ ប្រទេសអូស្ត្រាលីនឹងសាងសង់អាផាតមុិនបានតិចជាងការព្យាករណ៍ពីមុន ខណៈអ្នកអភិវឌ្ឍន៍ជាច្រើនពន្យារពេល ឬលុបចោលគម្រោង ដោយសារការថយចុះនូវប្រាក់ចំណេញ និងការលក់ presale។

ចំនួនអាផាតមុិនដែលបញ្ចប់ការសាងសង់ត្រូវបានគេរំពឹងថា នឹងធ្លាក់ចុះពី៦៤.០៣១យូនីតនៅឆ្នាំ២០២៤ មកនៅត្រឹម៥២.៥០៥យូនីតក្នុងឆ្នាំ២០២៥ បើធៀបនឹងការព្យាករណ៍ពីមុនថា នឹងសម្រេចបានការផ្គត់ផ្គង់ចំនួន៨១.៨៨០យូនីត។

លោក Sameer Chopra ប្រធានទទួលបន្ទុកផ្នែកស្រាវជ្រាវប្រចាំតំបន់អាសុីប៉ាស៊ីហ្វិករបស់ក្រុមហ៊ុនប្រឹក្សាអចលនទ្រព្យ CBRE បានលើកឡើងថា ការសិក្សាលទ្ធភាពគម្រោងថ្មីមិនបានកើនឡើងនោះទេ ហើយគម្រោងជាច្រើនត្រូវបានពន្យារពេល។

ចាប់ពីឆ្នាំ២០២៥ដល់ឆ្នាំ២០៣០ ការសាងសង់បញ្ចប់អាផាតមុិនថ្មីសរុបត្រូវបានគេរំពឹងថា នឹងសម្រេចបានចំនួន៥០.០០០យូនីត ទាបជាងការព្យាករណ៍ពីមុន។ ការកើនឡើងនៃថ្លៃដើមសំណង់ និងកង្វះលទ្ធភាពទិញផ្ទះរបស់ពលរដ្ឋអូស្ត្រាលី បានជះផលប៉ះពាល់ដល់ការអនុវត្តន៍គម្រោង។

លោក Chopra បានបញ្ជាក់បន្ថែមថា តម្លៃផ្ទះបានកើនឡើងលឿនជាងថ្លៃដើមសំណង់ចន្លោះពី២ភាគរយទៅ៣ភាគរយ។ ប៉ុន្តែ កំណើននេះនៅមិនទាន់គ្រប់គ្រាន់ទេ។ យើងត្រូវបង្រួមគម្លាតនេះបន្ថែមទៀត។

លោក Richard Temlett អ្នកជំនាញនៅក្រុមហ៊ុនប្រឹក្សាយោបល់អចលនទ្រព្យ Charter Keck Cramer បានលើកឡើងថា ដើម្បីសាងសង់គម្រោងអាផាតមុិនកាន់តែច្រើន ភាគីពាក់ព័ន្ធទាំងអស់ រួមមាន អ្នកអភិវឌ្ឍន៍ រដ្ឋាភិបាល និងស្ថាប័នហិរញ្ញវត្ថុ ត្រូវសម្របសម្រួលធ្វើការជាមួយគ្នា។

ទោះជាយ៉ាងណា បណ្តាអ្នកអភិវឌ្ឍន៍ ដែលចាប់ផ្តើមសាងសង់គម្រោងនាពេលនេះអាចទទួលបានអត្ថប្រយោជន៍នៅពេលក្រោយ។ ក្នុងរយៈពេលប្រហែល៣ឆ្នាំខាងមុខទៀត អ្នកអភិវឌ្ឍន៍នឹងមានប្រៀបក្នុងការកំណត់តម្លៃផ្ទះ ដោយសារកង្វះលំនៅដ្ឋាន៕ប្រភព: AFR៕

បច្ចេកវិទ្យាបញ្ញាសិប្បនិម្មិត AI កំពុងជួយជំរុញតម្រូវការការិយាល័យ និងលំនៅដ្ឋាននៅសហរដ្ឋអាមេរិក និងកាណាដា

ដោយ: គង់ លាងហួរ
អន្តរជាតិ: បច្ចេកវិទ្យាបញ្ញាសិប្បនិម្មិត (AI) កំពុងផ្លាស់ប្តូរទិដ្ឋភាពឧស្សាហកម្មនានាលើពិភពលោក ហើយឥទ្ធិពលរបស់បច្ចេកវិទ្យានេះកំពុងជួយជំរុញតម្រូវការអចលនទ្រព្យ ដូចជា ទីផ្សារការិយាល័យ និងទីផ្សារលំនៅដ្ឋាន។

នៅសហរដ្ឋអាមេរិក និងប្រទេសកាណាដា ចំនួនបុគ្គលិកក្រុមហ៊ុន ដែលមានជំនាញផ្នែកបច្ចេកវិទ្យា AI បានហក់ឡើងជាង៥០ភាគរយដល់ចំនួន៥១៧.០០០នាក់ចាប់ពីពាក់កណ្តាលឆ្នាំមុនរហូតដល់ពាក់កណ្តាលឆ្នាំ២០២៥។

យោងតាមការវិភាគរបស់ក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា បុគ្គលិកក្រុមហ៊ុន ដែលមានជំនាញផ្នែកបច្ចេកវិទ្យា AI ភាគច្រើនរស់នៅក្នុងតំបន់ San Francisco Bay ទីក្រុង New York ទីក្រុង Seattle ទីក្រុង Toronto និងរដ្ឋធានីវ៉ាសុីនតោន។

ក្នុងចំណោមនោះ ទីក្រុងញូវយ៉កទទួលបានចំនួនបុគ្គលិកក្រុមហ៊ុន ដែលមានជំនាញលើបច្ចេកវិទ្យា AI ច្រើនជាងគេបំផុតចំនួន២០.០០០នាក់កាលពីឆ្នាំមុន។នេះបើយោងតាមការវិភាគរបស់ក្រុមហ៊ុនប្រឹក្សាយោបល់អចលនទ្រព្យ CBRE។

ជាមួយគ្នានេះ ចំនួនបុគ្គលិកក្រុមហ៊ុន ដែលមានជំនាញលើបច្ចេកវិទ្យា AI នៅទីក្រុង Atlanta ទីក្រុង Chicago ទីក្រុង Dallas-Fort Worth ទីក្រុង Toronto និងទីក្រុងវ៉ាសុីនតោនបានហក់ឡើងយ៉ាងតិចក្នុងរង្វង់៧៥ភាគរយ។

ឥទ្ធិពលរបស់បច្ចេកវិទ្យា AI កំពុងរីករាលដាលឆ្ពោះទៅកាន់ទីក្រុង និងឧស្សាហកម្មជាច្រើន ជាពិសេសសេវាកម្មហិរញ្ញវត្ថុ ធានារ៉ាប់រង និងអចលនទ្រព្យ។តម្រូវការនេះកំពុងជំរុញការជួលការិយាល័យ និងអាផាតមុិននៅសហរដ្ឋអាមេរិក និងកាណាដា។

បច្ចុប្បន្ន បណ្តាក្រុមហ៊ុនហិរញ្ញវត្ថុកំពុងជួលបុគ្គលិក ដែលមានជំនាញ AI ដើម្បីរក្សាការប្រកួតប្រជែងជាមួយបណ្តាក្រុមហ៊ុនបច្ចេកវិទ្យាហិរញ្ញវត្ថុ (fintech)។ នៅឆមាសទី១ ឆ្នាំនេះ បណ្តាក្រុមហ៊ុនបច្ចេកវិទ្យាគ្របដណ្តប់ចំណែក១៧ភាគរយនៃការជួលការិយាល័យសរុបនៅសហរដ្ឋអាមេរិក បើធៀបនឹងចំណែក១០ភាគរយនៅចុងឆ្នាំ២០២២។

លើសពីនេះ កំណើននៃចំនួនបុគ្គលិកជំនាញផ្នែក AI ក៏កំពុងជួយជំរុញតម្រូវការជួលអាផាតមុិនផងដែរ។ នេះបើយោងតាមការចុះផ្សាយដោយកាសែតអាមេរិក CNBC។

ចាប់ពីឆ្នាំ២០២១ ដល់ឆ្នាំ២០២៤ ការជួលអាផាតមុិននៅសង្កាត់ Manhattan បានហក់ឡើងជាង១៤ភាគរយ ខណៈការជួលអាផាតមុិននៅទីក្រុង Washington បានកើនឡើង៧ភាគរយ៕ប្រភព: CNBC៕

អ្នកឧកញ៉ាសុខ គង់បង្ហាញពីក្រុមហ៊ុនWATGសម្រាប់សិក្សាលើគំរោងអភិវឌ្ឍន៍ទីក្រុងបូកគោតើក្រុមហ៊ុននេះមានប្រវត្តិបែបណា?

ដោយៈ គង់ សូរិយា

កំពតៈ អ្នកឧកញ៉ា សុខ គង់ ប្រធានក្រុមហ៊ុនសូគីម៉ិច អ៊ិនវេសមេន គ្រុប បានជ្រើសរើសក្រុមហ៊ុន WATG (Wimberly Allison Tong & Goo) ដើម្បីធ្វើការសិក្សាទៅលើ គម្រោងអភិវឌ្ឍន៍ក្រុងបូកគោលើវិស័យសំខាន់ៗមួយចំនួន ដើម្បីរួមចំណែកក្នុងការជំរុញកំណើនសេដ្ឋកិច្ចជាតិ។

ក្រុមហ៊ុនWATGជាក្រុមហ៊ុនរចនា ពហុវិស័យមានកេរ្តិ៍ឈ្មោះល្បីល្បាញនៅលើសកលលោក ដែលត្រូវបានបង្កើតឡើងនៅទីក្រុងហូណូលូលូ សហរដ្ឋអាមេរិក ឆ្នាំ១៩៤៥ ហើយមានឯកទេសខ្ពស់ក្នុងវិស័យសណ្ឋាគារ កម្សាន្ត អភិវឌ្ឍន៍ទីក្រុង និងគម្រោងលំនៅដ្ឋានប្រណីត។

កិច្ចសហប្រតិបត្តិការនេះ គឺជាគន្លឹះសំខាន់ក្នុងការអភិវឌ្ឍន៍រយៈពេលវែងនៃឧទ្យានជាតិព្រះមុនីវង្សបូគោ នៅខេត្តកំពត ក្នុងព្រះរាជាណាចក្រកម្ពុជា។

ផែនការគោលដៅសំខាន់ផ្តោតលើការ ការពារបរិស្ថាន អភិវឌ្ឍន៍លំនៅដ្ឋាន ពាណិជ្ជកម្ម វិស័យអប់រំ ស្ថាប័នផ្សេងៗទៀត ដើម្បីធានាអភិវឌ្ឍន៍ប្រកបដោយចីរភាព។

ដោយមានគោលនយោបាយគាំទ្រ ពីរាជរដ្ឋាភិបាល សន្តិភាព ស្ថិរភាពនយោបាយប្រកបដោយចីរភាព ក្រុមហ៊ុននឹងបន្តពង្រឹងការវិនិយោគ ដោយចូលរួមដ៏សំខាន់ ក្នុងការលើកកម្ពស់សេដ្ឋកិច្ចទាំងក្នុងតំបន់ និងសេដ្ឋកិច្ចជាតិ៕

ការសិក្សាថ្មី: មជ្ឈមណ្ឌលទិន្នន័យ និងទីផ្សារអចលនទ្រព្យផ្នែកដឹកជញ្ជូនក្លាយជាទីផ្សារដ៏មានសក្តានុពលក្នុងតំបន់អាសុី

ដោយ: គង់ លាងហួរ
អន្តរជាតិ: បណ្តាអ្នកវិនិយោគនៅតំបន់អាស៊ីប៉ាស៊ីហ្វិកកំពុងចាប់អារម្មណ៍កាន់តែខ្លាំងលើមជ្ឈមណ្ឌលទិន្នន័យ និងទីផ្សារអចលនទ្រព្យផ្នែកដឹកជញ្ជូន។ ប៉ុន្តែ ភាពមិនច្បាស់លាស់នៃបទប្បញ្ញត្តិ និងកង្វះកម្មករជំនាញអាចជះផលប៉ះពាល់ដល់ផលចំណេញត្រឡប់មកវិញ។

យោងតាមការស្ទង់មតិថ្មីមួយបានរកឃើញថា ទីផ្សារអចលនទ្រព្យផ្នែកភស្តុភារ ផ្នែកឧស្សាហកម្ម មជ្ឈមណ្ឌលទិន្នន័យ និងលំនៅដ្ឋានត្រូវបានគេវាយតម្លៃថា ជាទីផ្សារដ៏មានសក្តានុពលសម្រាប់ទាក់ទាញការវិនិយោគ។

លោក Chris Day ប្រធានក្រុមហ៊ុន Vistra Fund Solutions ប្រចាំតំបន់អាសុីប៉ាសុីហ្វិក បានលើកឡើងថា យើងសង្កេតឃើញមានចំណាប់អារម្មណ៍លើការវិនិយោគលើទីផ្សារអចលនទ្រព្យ ដែលមានតម្លៃបន្ថែមខ្ពស់ ជាពិសេសនៅក្នុងផ្នែកដឹកជញ្ជូន និងហេដ្ឋារចនាសម្ព័ន្ធផ្ទុកទិន្នន័យ។

យោងតាមការស្ទង់មតិបានបង្ហាញបន្តទៀតថា បណ្តាប្រទេស ដែលមានសក្តានុពលខ្ពស់បំផុតក្នុងទីផ្សារអចលនទ្រព្យ រួមមានប្រទេសសិង្ហបុរី អូស្ត្រាលី និងជប៉ុន និងទីផ្សារដែលកំពុងរីកចម្រើនលឿនរហ័ស ដូចជា ប្រទេសឥណ្ឌា និងវៀតណាម។

ក្នុងចំណោមនោះ សិង្ហបុរីជាប់ឈ្មោះជាទីផ្សារអចលនទ្រព្យ ដែលមានឱកាសវិនិយោគខ្ពស់ និងមានការិយាធិបតេយ្យតិចតួច។ ចំនួនប្រមាណ៨៨ភាគរយនៃអ្នកចូលរួមការស្ទង់មតិសរុប បានជ្រើសរើសសិង្ហបុរីជាមូលដ្ឋានចម្បងនៃការវិនិយោគរបស់ពួកគេ ដោយសារស្ថិរភាពនយោបាយ និងភាពច្បាស់លាស់នៃប្រព័ន្ធច្បាប់៕ប្រភព: The Business Times៕

1...232233234...3,343 Page 233 of 3,343