ដោយវុត្ថា
ខេត្តព្រះសីហនុ៖ រដ្ឋបាលខេត្តព្រះសីហនុបាននឹងកំពុងរៀបចំឆ្នេរអូរត្រេះ និងឆ្នេរអូរឈើទាល២ (ឆ្នេរអតីតអារីស្តុន) ឱ្យ ក្លាយជាតំបន់ទេសចរណ៍ និងជាឆ្នេរដ៏ស្រស់ស្អាតឡើងវិញ សម្រាប់ប្រយោជន៍សាធារណៈ និងទាក់ទាញភ្ញៀវទេសចរណ៍ឱ្យមកលេងបានកាន់តែច្រើនបន្ថែមទៀត ។
រដ្ឋាភិបាលបានដាក់ចេញផែនការមេអភិវឌ្ឍន៍តំបន់ទេសចរណ៍នានានៅទូទាំងប្រទេសជាពិសេសតំបន់ទេសចរណ៍នៅតំបន់ខេត្តមាត់សមុទ្រឱ្យមានស្រស់បំព្រង និងមានភាពទាក់ទាញដើម្បីឆ្លើយតបទៅនឹងការកើនឡើងភ្ញៀវទេសចរណ៍ វិនិយោគ ពាណិជ្ជកម្ម និងបដិសណ្ឋារកិច្ច។
លោក គួច ចំរើន អភិបាលខេត្តព្រះសីហនុ នៅថ្ងៃទី ២០ ខែមករា ឆ្នាំ ២០២០ នេះ បានដឹកនាំកម្លាំងចុះរៀបចំ និងរុះរើតូបលក់ដូរឆ្នេរអូរត្រេះ ដើម្បីប្រែក្លាយជាឆ្នេរសមុទ្រសាធារណៈ មិនមែនជាកម្មសិទ្ធរបស់បុគ្គល ឬក្រុមណាមួយឡើយ តបតាមការជូនដំណឹងរបស់រដ្ឋបាលខេត្តកាលពីកន្លងទៅវថ្មីៗនេះ ឱ្យមានការរុះរើតូបលក់ដូរនៅជាប់មាត់ឆ្នេរ ដើម្បីរៀបចំឱ្យកាន់តែប្រសើរ។
លោក គួច ចំរើន បន្តថា ការរុះរើនេះ មិនមែនដើម្បីយកទៅឱ្យក្រុមហ៊ុន ឬអង្គភាព អាជីវកម្មឯកជន ណាមួយដើម្បីវិនិយោគឡើយ គឺយកមកអភិវឌ្ឍន៍បម្រើឱ្យប្រយោជន៍សាធារណៈ ព្រោះជាឆ្នេរសាធារណៈរបស់រដ្ឋ។ កន្លងមកអាជីវករទាំងនោះ បានយកឆ្នេរសាធារណៈនេះ ទៅធ្វើអាជីវកម្មផ្ទាល់ខ្លួនជាយូរឆ្នាំមកហើយ ។
លោកបន្ថែមថា វាល្មមដល់ពេលប្រគល់ជូនរដ្ឋវិញដើម្បីអភិវឌ្ឍន៍ ហើយពួកគាត់ទាំងនោះក៏បានរកស៊ីលក់ដូរ និងល្មមមានលទ្ធភាពគ្រប់គ្រាន់ដើម្បីទៅរកកន្លែងលក់ដូរថ្មីហើយដែរ។យើងចង់បានឆ្នេរ ដ៏ស្រស់ស្អាត ហើយក៏ជឿជាក់ថា ប្រជាជនទាំងអស់ ពិតជាគាំទ្រការរៀបចំឆ្នេរ អោយមានរបៀបរៀបរយ និងស្រស់ស្អាត និងមានសោភ័ណភាព ។
លោកអភិបាលខេត្តបន្ថែមថា ក្រោយពេលសំអាត សំរាម អំពីការលក់ដូរ នៅឆ្នេរ អូត្រេះរួច គឺនៅសល់រណ្ដៅ បង្គន់លាមក ចំនួន ១៣៦ រណ្ដៅ មានកកសំណល់សំរាមជាច្រើន ដប អំបែងកែវ ភួយ មុង កប់ក្នុងឆ្នេរ ដែលទាមទារអោយអាជ្ញាធរយើងត្រូវប្រើប្រាស់ពេលវេលាច្រើនទៀត ដើម្បីសំអាតអោយបានស្អាត ទុកអោយប្រជាពលរដ្ឋមកដើរលេងកំសាន្តជាមួយនិងបរិស្ថានល្អប្រសើរ ។
រដ្ឋបាលខេត្តព្រះសីហនុជឿជាក់ថា ចំពោះការរៀបចំឆ្នេរខាងលើនេះឡើងវិញ ពិតជាទទួលបានការគាំទ្រាំទ្រពីប្រជាពលរដ្ឋ ដោយសារថា ការយកឆ្នេរនេះមកវិញមិនមែន ជាកម្មសិទ្ធរបស់បុគ្គល ឬក្រុមណានោះទេ តែជាកន្លែងសាធារណៈ សម្រាប់ប្រជាពលរដ្ឋទូទៅនៅទូទាំងប្រទេស ពេលមកដើរលេងកំសាន្តនៅខេត្តព្រះសីហនុម្តងៗ ហើយអ្វីជាគម្រោងរដ្ឋបាលខេត្តព្រះសីហនុនឹងរៀបចំអោយមានជាបង្គន់សាធារណៈថែមទៀត ដើម្បីរក្សាបរិស្ថាននៅតំបន់ឆ្នេរនេះកាន់តែប្រសើរឡើង ៕
