ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃពុធនេះ ខណៈ​ភាព​មិន​ប្រាកដ​ប្រជា​ ដែល​កើត​ចេញ​ពី​ផែនការ​ពន្ធ​គយរបស់​សហរដ្ឋ​អាមេរិកបានធ្វើឱ្យតម្រូវការមាសកើនឡើង។

តួយ៉ាង តម្លៃមាស Spot Gold បានងើបឡើង០,១៣ភាគរយដល់២៩១៨,៨៦ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៤៩ភាគរយដល់២៩៣៣,១០ដុល្លារក្នុងមួយអោនគិតត្រឹមម៉ោង១០:៤៣នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៥,៥ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៩ ខែមីនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៦,៤២ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម១០៦,៣១ពិន្ទុកាលពីថ្ងៃអង្គារម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៩៧ភាគរយដល់៣២,១៣ដុល្លារក្នុងមួយអោន ខណៈតម្លៃផ្លាទីនបានងើបឡើង០,៥៧ភាគរយដល់៩៧៤,៩០ដុល្លារក្នុងមួយអោន ហើយតម្លៃ palladium បានកើនឡើង១,០៣ភាគរយដល់៩៣២,៥០ដុល្លារក្នុងមួយអោនគិតត្រឹមម៉ោង១០:៤៥នាទីព្រឹក៕

ដោយ: គង់ លាងហួរ
អន្តរជាតិ: យោងតាមកាសែត Reuters បានចុះផ្សាយថា ប្រទេសមីយ៉ាន់ម៉ា និងរុស្ស៊ីបានចុះហត្ថលេខាលើអនុស្សរណៈស្តីពីកិច្ចសហប្រតិបត្តិការវិនិយោគនៅក្នុងតំបន់សេដ្ឋកិច្ចពិសេសនៅទីក្រុង Dawei រួមមានការសាងសង់កំពង់ផែ និងរោងចក្រចម្រាញ់ប្រេង។

អនុស្សរណៈនេះត្រូវបានចុះហត្ថលេខាដោយលោក Maxim Reshetnikov រដ្ឋមន្រ្តីក្រសួងអភិវឌ្ឍន៍សេដ្ឋកិច្ចនៃសហព័ន្ធរុស្ស៊ី និងលោក Kan Zaw រដ្ឋមន្ត្រីក្រសួងវិនិយោគ និងទំនាក់ទំនងសេដ្ឋកិច្ចបរទេសនៃប្រទេសមីយ៉ាន់ម៉ា ក្នុងអំឡុងដំណើរទស្សនកិច្ចរបស់គណៈប្រតិភូជាន់ខ្ពស់រុស្ស៊ីទៅកាន់ប្រទេសអាស៊ានមួយនេះ។

លោក Reshetnikov បានគូសបញ្ជាក់នៅក្នុងសេចក្តីថ្លែងការណ៍ថា យើងកំពុងពិភាក្សាអំពីគម្រោងសាងសង់កំពង់ផែ រោងចក្រថាមពលកំដៅដើរដោយធ្យូងថ្ម និងរោងចក្រចម្រាញ់ប្រេងនៅក្នុងប្រទេសមីយ៉ាន់ម៉ា។

លោក Maxim Reshetnikov បានបន្ថែមថា “ការចម្រាញ់ប្រេងនៅតែជាកិច្ចការដ៏ស្មុគស្មាញបំផុត ហើយយើងមិនទាន់មានការសម្រេចចិត្តចុងក្រោយណាមួយលើការសាងសង់រោងចក្រចម្រាញ់នោះទេ”។

តំបន់សេដ្ឋកិច្ចពិសេស Dawei ជាគម្រោងទំហំ១៩៦គីឡូម៉ែត្រការ៉េនៅសមុទ្រ Andaman ដែលនឹងក្លាយជាតំបន់ឧស្សាហកម្មបច្ចេកវិទ្យាលំដាប់ខ្ពស់ មជ្ឈមណ្ឌលដឹកជញ្ជូន តំបន់បច្ចេកវិទ្យាព័ត៌មាន និងតំបន់កែច្នៃផលិតផលនាំចេញ។

ប្រទេសរុស្ស៊ីបានក្លាយជាសម្ព័ន្ធមិត្តជិតស្និទ្ធបំផុតរបស់មីយ៉ាន់ម៉ា ចាប់តាំងពីមានរដ្ឋប្រហារយោធាផ្តួលរំលំរដ្ឋាភិបាលស៊ីវិលជាប់ឆ្នោតរបស់លោកស្រី Aung San Suu Kyi កាលពីខែកុម្ភៈ ឆ្នាំ២០២១។

ទីក្រុងមូស្គូ និងទីក្រុងណៃពីដោបាននិងកំពុងពិភាក្សាគ្នាអំពីកិច្ចសហប្រតិបត្តិការថាមពលកាន់តែស៊ីជម្រៅ រួមទាំងការចូលរួមរបស់រុស្ស៊ីក្នុងការសាងសង់បំពង់បង្ហូរឧស្ម័នទៅកាន់ទីក្រុង Yangon ដែលជាទីក្រុងដ៏ធំមួយក្នុងប្រទេសមីយ៉ាន់ម៉ា។

បន្ថែមលើនេះ ប្រទេសរុស្ស៊ី​ក៏​មាន​គម្រោង​បង្កើត​រ៉េអាក់ទ័រ​ស្រាវជ្រាវ​ថាមពលនុយក្លេអ៊ែរ​នៅក្នុង​ប្រទេស​មីយ៉ាន់ម៉ាផងដែរ៕ប្រភព: Reuters៕

ដោយ: គង់ លាងហួរ
អន្តរជាតិ: គម្រោងជួសជុលកែលម្អព្រែកជីក Tham Luong-Ben Cat-Nuoc Len នៅក្នុងទីក្រុងហូជីមិញនៃប្រទេសវៀតណាមគ្រោងនឹងបញ្ចប់រួចរាល់នៅឆ្នាំ២០២៥នេះ បន្ទាប់ពីចំណាយរយៈពេល២ឆ្នាំ។

ព្រែកជីកនេះមានចម្ងាយជិត៣២គីឡូម៉ែត្រ ដោយឆ្លងកាត់សង្កាត់ចំនួន៧ ក្នុងទីក្រុងហូជីមិញ រួមមានសង្កាត់លេខ១២ សង្កាត់ Binh Tan សង្កាត់ Tan Phu សង្កាត់ Tan Binh សង្កាត់ Go Vap សង្កាត់ Binh Thanh និងសង្កាត់ Binh Chanh។

ព្រែកជីកនេះជាផ្លូវទឹកដ៏សំខាន់ ដោយធ្វើការតភ្ជាប់ទីក្រុងហូជីមិញជាមួយខេត្ត Long An តាមរយៈទន្លេ Cho Dem និងតភ្ជាប់ជាមួយខេត្ត Binh Duong និងខេត្ត Dong Nai តាមរយៈទន្លេ Saigon ។

បន្ទាប់ពីបានចាប់ផ្តើមដំណើរការជួសជុលកែលម្អកាលពីខែកុម្ភៈ ឆ្នាំ២០២៣ គម្រោងនេះត្រូវបានគេប៉ាន់ប្រមាណថា នឹងចំណាយទុនវិនិយោគសរុបប្រមាណ៣៥៣,៤លានដុល្លារអាមេរិក។

ការងារនៃគម្រោងរួមមាន ការបូមខ្សាច់ដើម្បីកែលម្អលំហូរទឹក និងទប់ច្រាំងព្រែកកុំឱ្យបាក់ស្រុត ការសាងសង់ផ្លូវថ្នល់អមសងខាងដើម្បីបង្កើនការដឹកជញ្ជូន និងការដំឡើងប្រព័ន្ធលូ ចំណតទូក និងការបំពាក់ភ្លើងបំភ្លឺ រួមទាំងការដាំដើមឈើដើម្បីបង្កើនសោភណភាពបៃតង។

គិតមកទល់នឹងពេលបច្ចុប្បន្ន​ គម្រោង​នេះ​សម្រេច​បានវឌ្ឍនភាពចំនួន៤៣,៥១ភាគរយ ដោយគ្រោងនឹងបញ្ចប់រួចរាល់ជាស្ថាពរនៅក្នុងឆ្នាំ២០២៥។នេះបើយោងតាមការចុះផ្សាយដោយកាសែតវៀតណាម Tuoi Tre News។

ក្នុងរយៈពេលប៉ុន្មានខែខាងមុខនេះ ក្រុមការងារសាងសង់នឹងផ្តោតទៅលើការពន្លឿនការអភិវឌ្ឍន៍ផ្លូវប្រវែង៣០គីឡូម៉ែត្រអមសងខាងព្រែកជីក ដោយចិញ្ចើមផ្លូវមានទទឹងចាប់ពី៣ម៉ែត្រ។

នៅពេលបញ្ចប់ការជួសជុលរួចរាល់ ព្រែកជីកនេះនឹងកែលម្អប្រព័ន្ធបង្ហូរទឹកសម្រាប់ផ្ទៃដីប្រមាណ១៤.៩០០ហិកតានៅក្នុងតំបន់ជុំវិញ ព្រមទាំងកាត់បន្ថយការជន់លិចនៅផ្នែកកណ្តាល និងភាគពាយ័ព្យនៃទីក្រុងហូជីមិញ និងលើកកម្ពស់លក្ខខណ្ឌបរិស្ថាន៕ប្រភព: Tuoi Tre News៕

រាជធានីភ្នំពេញ៖ នាថ្ងៃអង្គារ ទី២៥ ខែកុម្ភៈ ឆ្នាំ២០២៥ តាមការណែនាំ ឯកឧត្តម សូរ វ៉ិចទ័រ រដ្ឋលេខាធិការ និងជានាយកគ្រប់គ្រងគម្រោង ឯកឧត្តម ស៊ឹង សុគង់ អនុរដ្ឋលេខាធិការ បានដឹកនាំក្រុមការងារបច្ចេកទេសអង្គភាពគ្រប់គ្រងគម្រោង រួមជាមួយក្រុមការងារបច្ចេកទេសអគ្គិសនីកម្ពុជា និងក្រុមហ៊ុនទីប្រឹក្សាបច្ចេកទេស Yooshin JV បានចុះពិនិត្យការដ្ឋានរួមគ្នា ដើម្បីពិនិត្យ និងចង្អុលបង្ហាញបណ្តាញបញ្ជូនថាមពលអគ្គិសនីក្រោមដី ដែលមានបច្ចុប្បន្ន ហើយរងប៉ះពាល់ដោយសារគម្រោងសាងសង់ស្ពានមិត្តភាពកម្ពុជា-កូរ៉េ។

ក្រុមការងារបច្ចេកទេសអគ្គិសនីកម្ពុជាបានបង្ហាញគំនូសប្លង់ទីតាំងបណ្ដាញបញ្ជូនថាមពលអគ្គិសនី ដែលមានស្រាប់ក្នុង និងជុំវិញបរិវេណគម្រោង ជូនក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេស Yooshin JV ដើម្បីមានមូលដ្ឋានក្នុងការរៀបចំគម្រោង។ តាមការពិនិត្យស្ថានភាពជាក់ស្តែង ទីតាំងកប់បណ្ដាញបញ្ជូនថាមពលតំបន់នេះ មានបណ្តាញតង់ស្យុងមធ្យម(MV) នៅកប់ក្រោមដី។ ដោយឡែកនៅត្រើយខាងកើត អាចនឹងមានការប៉ះពាល់ទៅបណ្តាញខ្សែក្រោមដី ឬបង្គោលបណ្តាញអគ្គិសនីរបស់សេវាករ ដែលធ្វើសេវាកម្មផ្គត់ផ្គង់អគ្គិសនី ស្ថិតក្រោមការរគ្រប់គ្រង និងផ្តល់អាជ្ញាបណ្ណដោយអាជ្ញាធរអគ្គិសនីកម្ពុជា។

ក្នុងន័យនេះ ដើម្បីឱ្យការសិក្សាមានលក្ខណៈគ្រប់ជ្រុងជ្រោយ និងទាន់តាមផែនការគ្រោងទុក ក្រសួងសាធារណការ និងដឹកជញ្ជូន បានស្នើឱ្យក្រុមហ៊ុនទីប្រឹក្សាបច្ចេកទេសបន្តសហការជាមួយអគ្គិសនីកម្ពុជា អាជ្ញាធរអគ្គិសនីកម្ពុជា និងសេវាករ ដែលធ្វើសេវាកម្មផ្គត់ផ្គង់អគ្គិសនីសិក្សាលម្អិតបន្ថែមទៀតផ្នែកវិស្វកម្មគំនូសប្លង់បច្ចេកទេសពាក់ព័ន្ធបណ្តាញដែលប៉ះពាល់សសរគ្រឹះស្ពាន ដើម្បីធានាថា ពេលអនុវត្តគម្រោងមិនខូចខាត ឬដាច់ខ្សែបណ្តាញចរន្តអគ្គិសនីជាយថាហេតុ។

សូមជម្រាបជូនថា គម្រោងសាងសង់ស្ពានមិត្តភាពកម្ពុជា-កូរ៉េ បច្ចុប្បន្នកំពុងស្ថិតក្នុងដំណាក់កាលសិក្សាលម្អិត ជាគម្រោងទទួលបានហិរញ្ញប្បទានរបស់ធនាគាអាហរ័ណ-នីហរ័ណ នៃសាធារណរដ្ឋកូរ៉េ មានទីតាំងស្ថិតនៅផ្សាររាត្រី-ជ្រោយចង្វារ-អរិយក្សត្រ (ភ្នំពេញ-ក្រុងអរិយក្សត្រ ខេត្តកណ្ដាល)។ ជាប្រភេទស្ពានខ្សែកាប សសរមេមានទម្រង់ជាដៃប្រណម (សំពះ) មានចំនួន២ ឆ្លងទន្លេសាបប្រវែង ១ ០៧០ម ទន្លេមេគង្គប្រវែង ១ ២៦២ម មានទទឹងស្ពាន ២៦,៥ម និងផ្លូវតភ្ជាប់ប្រវែង១១៧៤.៩ម៕

:: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT)
– Facebook: https://www.facebook.com/mpwt.gov.kh
– Telegram: https://t.me/mpwtnews
– TikTok: https://www.tiktok.com/@mpwt.tiktok
– YouTube: https://www.youtube.com/@mpwt.youtube

ដោយ: គង់ លាងហួរ
អន្តរជាតិ: យោងតាមកាសែត Bloomberg បានឱ្យដឹងថា ប្រទេសឥណ្ឌូនេស៊ីគ្រោងនឹងបោះផ្សាយលក់មូលបត្របំណុលរបស់រដ្ឋាភិបាលដើម្បីផ្តល់ហិរញ្ញប្បទានដល់គម្រោងសាងសង់លំនៅដ្ឋានតម្លៃសមរម្យ ខណៈធនាគារកណ្តាលឥណ្ឌូនេសុីបានឯកភាពទិញបំណុលនេះ។

លោកស្រី Sri Mulyani Indrawati រដ្ឋមន្ត្រីក្រសួងហិរញ្ញវត្ថុបានបញ្ជាក់ប្រាប់ក្រុមអ្នកយកព័ត៌មានថា ក្រសួងហិរញ្ញវត្ថុឥណ្ឌូនេសុីនឹងកៀរគរថវិកា តាមរយៈការលក់សញ្ញាបណ្ណ ដើម្បីបោះទុនវិនិយោគលើគម្រោងសាងសង់ផ្ទះតម្លៃសមរម្យ។

ជារៀងរាល់ឆ្នាំ រដ្ឋាភិបាលឥណ្ឌូនេសុីបានវិភាជន៍ថវិកាដើម្បីឧបត្ថម្ភធនដល់អ្នកស្វែងរកប្រាក់កម្ចីទិញផ្ទះ ដោយផ្តល់នូវការបង់ប្រាក់កក់ទាប និងអត្រាការប្រាក់ទាបក្នុងរង្វង់៥ភាគរយសម្រាប់អ្នកដែលមានប្រាក់ចំណូលទាប។

ជាមួយគ្នានេះ ធនាគារកណ្តាលឥណ្ឌូនេស៊ី (BI) បានប្រកាសថា ខ្លួននឹងទិញមូលបត្របំណុលរដ្ឋ ដើម្បីបង្ហាញការគាំទ្រដល់គម្រោងផ្គត់ផ្គង់លំនៅដ្ឋានតម្លៃសមរម្យចំនួន៣លានយូនីតក្នុងមួយឆ្នាំ។

ធនាគារកណ្តាលឥណ្ឌូនេស៊ីបានឯកភាពទិញមូលបត្របំណុលរដ្ឋក្នុងទំហំទឹកប្រាក់ជាង៩ពាន់លានដុល្លារនៅឆ្នាំនេះ។ ផលបត្រសញ្ញាបណ្ណរយៈពេល១០ឆ្នាំ(Bond Yield)បានធ្លាក់ចុះប្រហែល០,០២ភាគរយមកនៅត្រឹម៦,៧៧ភាគរយកាលពីថ្ងៃសុក្រ។

យ៉ាងណាមិញ លោក Rajeev De Mello អ្នកគ្រប់គ្រងផលបត្ររបស់ក្រុមហ៊ុន Gama Asset Management SA បានព្រមានថា “ការលក់បំណុលអាចបង្កក្តីបារម្ភដល់អ្នកវិនិយោគបរទេស ហើយវាអាចដាក់សម្ពាធលើរូបិយបណ្ណក្នុងស្រុក។ការណ៍នេះនឹងជះផលប៉ះពាល់ទៅលើស្ថិរភាពហិរញ្ញវត្ថុរយៈពេលវែងរបស់ឥណ្ឌូនេស៊ី”។

នេះជាចំណាត់ការថ្មីចុងក្រោយបង្អស់មួយរបស់ធនាគារកណ្តាលឥណ្ឌូនេសុី ក្នុងការបង្ហាញពីការគាំទ្ររបស់ខ្លួនចំពោះគម្រោងគោលនយោបាយអាទិភាពនានារបស់រដ្ឋបាលប្រធានាធិបតីឥណ្ឌូនេសុីលោក Prabowo Subianto។

ក្រៅពីនេះ ធនាគារកណ្តាលឥណ្ឌូនេសុី (BI) ក៏បានប្រកាសទាញទម្លាក់អត្រាសាច់ប្រាក់តម្កល់ជាកំហិតនៅតាមធនាគារនៅឥណ្ឌូនេសុី ដើម្បីចាក់បញ្ចូលសាច់ប្រាក់ចំនួន៨០ទ្រីលានរូពី (ប្រហែល៤,៩ពាន់លានដុល្លារ)ចូលទៅកាន់ទីផ្សារលំនៅដ្ឋានក្នុងស្រុក៕ប្រភព: Bloomberg៕

ដោយ: គង់ លាងហួរ
អន្តរជាតិ:ទីផ្សារការិយាល័យរបស់ប្រទេសចិននឹងបន្តធ្លាក់ចុះនៅឆ្នាំនេះ ខណៈបណ្តាក្រុមហ៊ុនបរទេសបានចាកចេញពីប្រទេសមួយនេះ ដោយសារតែការកើនឡើងនៃភាពតានតឹងរវាងសហរដ្ឋអាមេរិក និងចិន។

ក្រុមហ៊ុនផ្តល់សេវាផ្នែកច្បាប់ Cleary Gottlieb Steen & Hamilton របស់សហរដ្ឋអាមេរិកស្ថិតក្នុងចំណោមបណ្តាក្រុមហ៊ុនអាមេរិកដទៃទៀត ដែលបានដកខ្លួនចេញពីប្រទេសចិន។ ក្រុមហ៊ុននេះនឹងបិទការិយាល័យរបស់ខ្លួននៅក្នុងអគារ Fortune Financial Center ស្ថិតក្នុងតំបន់ពាណិជ្ជកម្មកណ្តាលនៃទីក្រុងប៉េកាំង។

កាលពីពេលថ្មីៗនេះ ក្រុមហ៊ុនវិនិយោគអាមេរិក BlackRock បានប្រគល់អគារការិយាល័យចំនួន២របស់ខ្លួនស្ថិតក្នុងសង្កាត់ Lujiazui នៃទីក្រុងសៀងហៃទៅកាន់ធនាគារ Standard Chartered បន្ទាប់ពីខកខានមិនបានទូទាត់សងប្រាក់កម្ចីចំនួន៧៨០លានដុល្លារអាមេរិក ដែលត្រូវបានរំកិលអស់រយៈពេលជាង១ឆ្នាំ។

ក្រៅពីក្រុមហ៊ុន Cleary Gottlieb និងក្រុមហ៊ុន BlackRock គេសង្កេតឃើញមានបណ្តាក្រុមហ៊ុនអន្តរជាតិជាច្រើនទៀត ដែលបានកាត់បន្ថយវត្តមានរបស់ពួកគេនៅក្នុងប្រទេសចិន ដោយសារភាពតានតឹងពាណិជ្ជកម្មរវាងចិនជាមួយសហរដ្ឋអាមេរិក។ ជាមួយគ្នានេះ ឱកាសបានធ្លាក់ចុះ ស្របពេលសេដ្ឋកិច្ចរបស់ប្រទេសចិនកំពុងជួបការលំបាក។

លោកស្រី Guo Shan ដៃគូនៅក្រុមហ៊ុនផ្តល់សេវាប្រឹក្សាយោបល់ឯករាជ្យ Hutong Research បានអះអាងថា “ការធ្លាក់ចុះនៃប្រាក់ចំណេញជាមូលហេតុមួយ ដែលបណ្តាក្រុមហ៊ុនពហុជាតិសាសន៍សម្រេចដកខ្លួនចេញពីប្រទេសចិន”។

លោកស្រីបានគូសបញ្ជាក់ថា ប្រាក់ចំណេញរបស់បណ្តាក្រុមហ៊ុនឧស្សាហកម្មបរទេសនៅប្រទេសចិនបានធ្លាក់ចុះ១,៧ភាគរយកាលពីឆ្នាំមុន បន្ទាប់ពីបានធ្លាក់ចុះ៦,៧ភាគរយ និង៩,៥ភាគរយរៀងគ្នាក្នុងឆ្នាំ២០២៣ និងឆ្នាំ២០២២។នេះបើយោងតាមទិន្នន័យពីការិយាល័យស្ថិតិជាតិចិន។

តម្លៃជួលការិយាល័យនៅ​ក្នុង​តំបន់​ពាណិជ្ជកម្ម​កណ្តាល​នៃទីក្រុង​ប៉េកាំងបានធ្លាក់ចុះមកនៅក្រោមតម្លៃ៣០០យ័ន(ប្រហែល៤១,៣ដុល្លារអាមេរិក)ក្នុងមួយម៉ែត្រការ៉េក្នុងមួយខែនាពេលបច្ចុប្បន្ន បើធៀបនឹងតម្លៃ៣៦៥យ័នមុនពេលផ្ទុះជំងឺរាតត្បាត៕ប្រភព: SCMP៕