អ្នកជំនាញ៖ ទេសចរជាទូតពាណិជ្ជកម្ម និងសន្តិភាព ដែលជំរុញកំណើនសេដ្ឋកិច្ចដ៏សំខាន់សម្រាប់ប្រទេស

ដោយៈ រ៉ាណេត

ភ្នំពេញៈ ទេសចរណ៍ ជាវិស័យមួយដ៏សំខាន់សម្រាប់ពង្រឹក និងជំរុញកំណើនសេដ្ឋកិច្ចជាតិឱ្យមានភាពល្អប្រសើរ ខណៈដែលគ្រប់បណ្តាប្រទេសនានា នៅលើសាកលលោក បាននិងកំពុងផ្តោតការយកចិត្តទុកដាក់ លើកស្ទួយវិស័យមួយនេះ ឱ្យមានភាពរស់រវើក។

ស្ទើរតែគ្រប់បណ្តាអ្នកទេសចរនានា ដែលធ្វើដំណើរកម្សាន្តឆ្លងប្រទេស ឆ្លងតំបន់ គឺសុទ្ធតែមានគោលបំណង់សំខាន់របស់ខ្លួន បន្ថែមពីលើដំណើរកម្សាន្ត ដែលក្នុងនោះរួមមានដូចជា ស្វែងយល់ពីកត្តាភូមិសាស្ត្រ និងសេដ្ឋកិច្ច ការសិក្សាពីស្ថានភាពអាជីវកម្ម ក៏ដូចជាស្វែងយល់ពីឱកាសវិនិយោគនានាផងដែរ។

ប្រធានសមាគមទេសចរណ៍អាស៊ីប៉ាស៊ីហ្វិក-កម្ពុជា លោក ធួន ស៊ីណាន បានមានប្រសាសន៍កាលចុងសប្ដាហ៍មុនថា មិនមែនសម្រាប់តែប្រទេសកម្ពុជានោះទេ ដែលផ្តោតយ៉ាងសំខាន់ និងយកចិត្តទុកដាក់ខ្ពស់ ទៅលើការពង្រឹងសក្ដានុពល នៃវិស័យទេសចរណ៍ ពោលគឺគ្រប់បណ្តាប្រទេសនានា នៅលើសាកលលោក គឺសុទ្ធតែចាត់ទុកវិស័យមួយនេះ ជាវិស័យអាទិភាពក្នុងការពង្រឹងកំណើនសេដ្ឋកិច្ចជាតិ។

លោកបន្តថា “អ្នកទេសចរគឺជាអ្នកដែលមានលុយ ដូច្នេះរាល់ដំណើរកម្សាន្តរបស់ពួគគេ គឺសុទ្ធតែមានគោលបំណង និងគោលដៅសំខាន់ ដែលអាចទាក់ទងទៅនឹងមុខជំនួញ ឬការងាររបស់ពួកគេ ដែលវាមិនត្រឹមតែជាដំណើរកម្សាន្ត សប្បាយភ្នែកតែមួយមុខនោះទេ”។

លោកបានបន្តទៀតថា “គេចង់ដឹងពីភាពរីកចម្រើនរបស់ប្រទេស ឬតំបន់ដែលគេទៅ ដើម្បីចង់រកឱកាសពីការវិនិយោគ ក្នុងគោលបំណងទទួលបាននូវផលប្រយោជន៍ខ្ពស់ មិនថាជាការសិក្សាពីទីផ្សារ ដើម្បីយកផលិតផលរបស់ខ្លួនចែកចាយទីលើទីផ្សារគោលដៅ ឬទៅទិញផលិតផលមកធ្វើការចែកចាយបន្ត នៅក្នុងទីផ្សារនៃប្រទេសរបស់ខ្លួន”។

ភ្ញៀវទេសចរ ត្រូវបានគេចាត់ទុកថាជាទូតពាណិជ្ជកម្ម និងសន្តិភាព ដែលមានសារសំខាន់បំផុត នៅក្នុងការជួយពង្រឹង និងពង្រីកកំណើនសេដ្ឋកិច្ចជាតិយ៉ាងសំខាន់ សម្រាប់ប្រទេសនីមួយៗ នៅលើសាកលលោក ហើយថែមទាំងអាស្រ័យផលដល់បណ្តាវិស័យផ្សេងៗជាច្រើនទៀត។

ប្រធានសមាគម PATA រូបនេះបានលើកឡើងថា “បើទេសចរមិនរីកចម្រើន មិនមានកំណើនកើនឡើង តើខេត្តសៀមរាបចាំបាច់ មានកំណើនសណ្ឋាគារដូចសព្វថ្ងៃនេះទេ? តើប្រទេសថៃចាប់សាងសង់ សណ្ឋាគារកម្រិតអន្តរជាតិរាប់ពាន់អគារ រាប់សែនបន្ទាប់ធ្វើអ្វី? តើនៅក្រុងសៃហ្គនប្រទេសវៀតណាម ចាំបាច់កសាងអគារពាណិជ្ជកម្ម និងទេសចរណ៍រាប់សិបកន្លែង ដែលបង្ហាញពីភាពរីកចម្រើន និងអភិវឌ្ឍន៍នោះធ្វើអ្វី ? ជាចម្លើយ គឺសុទ្ធតែបណ្តាល់មកពីទេសចរទាំងអស់”។

លោកបានបញ្ជាក់ថា គ្រាន់តែភាពរីកចម្រើន នៃវិស័យបដិសណ្ឋារកិច្ច ដើម្បីបំពេញតម្រូវការភ្ញៀវទេសចរតែមួយមុខ គឺបានបង្ហាញពីភាពរីកចម្រើននៃវិស័យសំណង់ និងអចលនទ្រព្យរួចជាស្រេច ហើយនៅមានវិស័យផ្សេងៗជាច្រើនទៀត ដែលទទួលបានផលពីវិស័យទេសចរណ៍ ដែលក្នុងនោះរួមមានដូចជា វិស័យកសិកម្ម វិស័យពាណិជ្ជកម្ម ជាពិសេសអាចជួយរឹតបណ្តឹងចំណងមិត្តភាព និងវិស័យការទូតលើផ្នែកនយោបាយរបស់ប្រទេសផងដែរ។

យោងតាមរបាយការណ៍របស់គ្រឹះស្ថានអង្គរ នៅថ្ងៃទី១ ខែធ្នូ ឆ្នាំ២០១៩នេះ បានបញ្ជាក់ថា ក្នុងរយៈពេល១១ខែ ឆ្នាំ ២០១៩នេះ គ្រឹះស្ថានអង្គរបានលក់បណ្ណចូលទស្សនាតំបន់អង្គរបានចំនួន១,៩៩៧,២៦៧នាក់ ធ្លាក់ចុះ១៤.០៣ភាគរយ បើធៀបនឹងរយៈពេលដូចគ្នាឆ្នាំ២០១៨ ដោយទទួលបានចំណូល៨៩,៥៥៥,៤៧៤ ដុល្លារ អាមេរិក ធ្លាក់ចុះ ១៤.៣២ ភាគរយ។

ប៉ុន្តែបើគិតតែក្នុងរយៈពេល១ខែវិច្ឆិកា ឆ្នាំ២០១៩ គ្រឹះស្ថានអង្គរបានលក់បណ្ណជូនភ្ញៀវចំនួន១៩៣.២៦០ នាក់ ធ្លាក់ចុះ ១៧.១០ភាគរយ បើធៀបនឹងខែដូចគ្នាឆ្នាំ២០១៨ ដោយទទួលបានចំណូល៨,៨៥៤,១៩០ ដុល្លារអាមេរិក ធ្លាក់ចុះ១៦.៤៧ភាគរយ៕

តើខេត្តព្រះសីហនុមានសក្តានុពលសំខាន់ៗអ្វីខ្លះ?

ដោយ វុត្ថា

ភ្នំពេញៈ ខេត្តព្រះសីហនុ ជាប៉ូលអភិវឌ្ឍជាតិមួយយ៉ាងសំខាន់ ហើយជាខេត្តដែលមានសក្តានុពលសេដ្ឋកិច្ច ទាក់ទាញវិនិយោគិន និងភ្ញៀវទេសចរមកកម្សាន្តតាមឆ្នេរ សមុទ្រ មានកោះដ៏ស្រស់ស្អាត មានកំពង់ផែអន្តរជាតិ អាកាសយានដ្ឋានអន្តរជាតិ ផ្លូវដែក ផ្លូវគោក និងធនធានធម្មជាតិដ៏សំបូរបែប។

សក្តានុពល និងភូមិសាស្ត្ររបស់ខេត្តព្រះសីហនុ មានកោះ៣២ ឆ្នេរប្រវែង១៧៥គីឡូម៉ែត្រ កំពង់ផែអន្តរជាតិទឹកជ្រៅ មានទំនិញឆ្លងកាត់ជាង៧០ភាគរយ ក្នុងចំណោមសេវាកម្មដឹកជញ្ជូនទូទាំងប្រទេស។ បច្ចុប្បន្នកំពង់ផែរបស់ខេត្តនេះ មាន លទ្ធភាពអាចឱ្យនាវាមានជម្រៅទឹក១០ម៉ែត្រចូលចត និងកំពុងពង្រីកបន្ថែម ដើម្បីឱ្យនាវាមានជម្រៅទឹក ១៣.៥០ម៉ែត្រចូលចតនៅពេលខាងមុខ ដើម្បីកាត់បន្ថយតម្លៃដឹកជញ្ជូន ក៏ដូចជាការប្រកួតប្រជែងជាមួយប្រទេសក្នុងតំបន់ ទន្ទឹមនោះក៏នៅខ្វះផែទេសចរណ៍ផងដែរ។

ខេត្តព្រះសីហនុ មានព្រលានយន្តហោះ ដែលបាននឹងកំពុងធ្វើកិច្ចសហប្រតិបត្តិការពង្រីកព្រលានយន្តហោះនេះ ដោយ ក្រុមហ៊ុនបារាំង ដើម្បីឱ្យយន្តហោះប្រភេទធុនធំចុះចតនៅពេលខាងមុខ និងផ្តល់ភាពងាយស្រួលក្នុងការធ្វើដំណើរតាមផ្លូវអាកាស។

រាជរដ្ឋាភិបាល បានសាងសង់ផ្លូវហាយវេ ល្បឿនលឿនពីភ្នំពេញមកកាន់ខេត្តព្រះសីហនុ និងគ្រោងដាក់ឱ្យដំណើរការនៅចុងឆ្នាំ២០២២។ ជាមួយគ្នានេះផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៩កន្លងមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញបើកការដ្ឋានស្ថាបនាផ្លូវ៣៤ខ្សែ ក្នុងក្រុងព្រះសីហនុ មានប្រវែង៨៤.៥០៥គីឡូម៉ែត្រ ។

រាជរដ្ឋាភិបាលបានកំណត់ខេត្តព្រះសីហនុ ជាតំបន់សេដ្ឋកិច្ចគំរូពហុបំណង ដែលមានតំបន់សេដ្ឋកិច្ច៥កំពុងដំណើរការ ផ្តល់ការងារជូនយុវជនជាង៨ម៉ឺននាក់ និងតំបន់សេដ្ឋកិច្ច៤ទៀតកំពុងសាងសង់ នេះជាសក្តានុពល នៃការអភិវឌ្ឍក្នុងខេត្តព្រះសីហនុ នាពេលបច្ចុប្បន្ន ពិសេសវិស័យសំណង់មានការអភិឌ្ឍយ៉ាងគំហុកគួរឱ្យកត់សំគាល់៕

គំរោងវិនិយោគវីឡាលំហែរកាយបែបទំនើបជាលើកដំបូងនៅខេត្តកំពតបានប្រកាសសាងសង់ជាផ្លូវការ

ដោយស៊ីវ ម៉េង

ភ្នំពេញៈ គំរោងផ្ទះវីឡាលំហែរកាយលើកដំបូង FOREST HAMONY ដែលស្ថិតនៅលើផ្ទៃដីរហូតដល់ ១៣ហិកតា បានចាប់ផ្តើមប្រកាសសាងសង់់ជាផ្លូវការហើយ ក្រោមការបោះទុនវិនិយោគទឹកប្រាក់១៨លានដុល្លារអាមេរិក។

FOREST HAMONY ស្ថិតនៅក្នុងភូមិផារី ឃុំព្រៃថ្នង ស្រុកទឹកឈូ ខេត្តកំពត និងមានចម្ងាយត្រឹម ១៨គីឡូម៉ែត្រប៉ុណ្ណោះពីទីរួមខេត្តកំពត។

គំរោងប្រកបដោយប្រណីតភាពនេះ បាននិងកំពុងជំរុញបន្ថែមទៀតលើសក្តានុពលដែលមានស្រាប់នៅក្នុងខេត្តកំពត ដែលជាតំបន់កំពុងមានការវិនិយោគយ៉ាងច្រើនលើលំនៅដ្ឋាន និងរមណីយដ្ឋានទេសចរណ៍ ប៉ុន្តែទស្សនទាននៃការអភិវឌ្ឍរបស់គំរោង Forest Hamony ជាស្ទីលថ្មីមួយ ដែលផ្តល់ឲ្យអ្នកវិនិយោគទទួលបានប្រាក់ចំណេញនិងសំរាប់ការលំហែរកំសាន្ត ប្រកបភាពស្រស់ស្រាយ។

យោងតាមសេចក្តីប្រកាសព៌តមានរបស់ក្រុមហ៊ុន Forest Hamony បានឲ្យដឹងថា គំរោង Forest Hamony នឹងមានផ្ទះវីឡាលំហែរ ដែលសាងសង់នៅប្របនឹងជើងភ្នំតូចៗ ដែលមានទេសភាពស្រស់បំព្រង ជាមួយនឹងបឹងទំហំ ៤០០០ម៉ែត្រការ៉េ ដែលផ្តល់ឲ្យនូវខ្យល់អាកាសបរិសុទ្ធ ។

គំរោងនេះមានផ្ទះសរុបចំនួន៩០ ដោយផ្ទះនិមួយៗ មានអាងហែលទឹកជាលក្ខណៈផ្ទាល់ខ្លួន មានសួនច្បារផ្ទាល់ខ្លួន ជាមួយទំហំដី២៤គុណនឹង៣០ម៉ែត្រការ៉េ។ដោយផ្តោតលើការសម្របខ្លួន ជាមួយនឹងលក្ខខ័ណ្ឌប្រែប្រួលអាកាសធាតុ គំរោងនេះត្រូវបានស្ថាបត្យករគូរ និងសាងសង់ឡើងដោយឈរលើភាពបៃតង ដែលជួយសន្សំសំចៃអគ្គិសនី ដើម្បីធ្វើឲ្យអ្នករស់នៅមានផាសុខភាព។

ផ្ទះនិមួយៗក្នុងគំរោងនេះ នឹងសាងសង់ឡើងលើផ្ទៃដីធំទូលាយ មានរបងព័ទ្ឋជុំវិញ ដោយមានទំហំចាប់ពី ៣៦០ ទៅ ៧២០ម៉ែត្រការ៉េ កំពស់២ជាន់ និងមានការរៀបចំសួនច្បារយ៉ាងស្រស់ស្អាតសំរាប់ផ្ទះនិមួយៗ។ ចំណែកវីឡាលំហែកាយវិញ ចាប់ផ្តើមពីតម្លៃ១៧ម៉ឺនដុល្លារអាមេរិកដល់ជាង២២ម៉ឺនដុល្លារ ហើយតម្លៃផ្ទះនិមួយៗមានភាពខុសគ្នា អាស្រ័យលើទំហំដី ទីតាំង និងរចនាបទនិមួយៗ។បច្ចុប្បន្នក្រុមហ៊ុន Forest Hamony បាននិងកំពុងទទួលការកក់ប្រាក់ពីអតិថិជនបណ្តើរៗហើយ។

លោក SERAJ Sutton តួនាទីជា COO of Century 21 Cambodia បានមានប្រសាសន៍ឲ្យដឹងក្នុងពិធីសម្ភោធគំរោងកាលពីព្រឹកថ្ងៃទី៣០ វិចិ្ឆកាកន្លងមកថា ខេត្តកំពតកំពុងមានការរីកចម្រើនខ្លាំង និងមានសក្តានុពលជាច្រើន សំរាប់ការអភិវឌ្ឍលើវិស័យសំណង់ និងអចលនទ្រព្យ ដោយសារខេត្តនេះមានភាពអំណោយផលមួយចំនួនដូចជា មានចម្ងាយជិតនឹងរាជធានីភ្នំពេញ មានការកសាងហេដ្ឋារចនាសម្ព័ន្ឋល្អប្រសើរ មានការសាងសង់កំពង់ផែទឹកជ្រៅធំមួយ ដែលជាកំពង់ផែធំមួយបន្ទាប់ពីក្រុងព្រះសីហនុ។

លោកបន្តថា “ជាមួយគ្នានេះថ្នាក់ដឹកនាំខេត្តកំពត មានឆន្ទៈយ៉ាងមុតមាំក្នុងការជួយជំរុញនិងសម្រួលការវិនិយោគនៅក្នុងខេត្តឲ្យមានភាពរីកចម្រើមនខ្លាំង”។លោកបន្តថា “ក្រៅពីមានសក្តានុពលលើទីតាំងភូមិសាស្រ្ត ហេដ្ឋារចនាសម្ព័ន្ឋ វិស័យកសិកម្មរបស់ខេត្តក៏មានភាពល្បីល្បាញ ដូចជាម្រេច ធូរ៉េនជាដើម ពិសេសវិស័យទេសចរណ៍ក្នុងខេត្តក៏មានភាពរីកចម្រើនខ្លាំង”។

លោកច្រឹក សុខនីម អគ្គនាយកក្រុមហ៊ុន Century21 Mekong និងជាសហភាគហ៊ុនិកក្នុងគំរោង FOREST HAMONY បានសម្តែងភាពសប្បាយរីករាយ ដែលបានចូលរួមចំណែកវិនិយោគគំរោងនេះ ពិសេសជាការចូលរួមចំណែកក្នុងការជំរុញការអភិវឌ្ឍវិស័យអចលនទ្រព្យក្នុងខេត្តកំពត ឲ្យកាន់់តែមានភាពរីកចម្រើនបន្ថែមទៀត។

លោកបានមានប្រសាសន៍ថា “នេះជាគំរោងប្រវត្តិសាស្រ្តសំរាប់ខេត្ត ដែលនឹងជួយលើកកំពស់ការអភិវឌ្ឍ ក៏ដូចជាជំរុញឲ្យខេត្តកាន់តែមានភាពទាក់ទាញ ដោយសារគំរោង FOREST HAMONY សាងសង់ឡើងប្រកបដោយបទដ្ឋានអន្តរជាតិ និងផ្តោតលើការរស់នៅប្រកបដោយភាពបៃតង និងការលំហែរប្រកបដោយស្តង់ដាអន្តរជាតិ”៕

គម្រោងបុរីអង្គរលែនម៉ាក្សនឹងជំរុញសក្កានុពលនៃការអភិវឌ្ឍវិស័យអចលនទ្រព្យក្នុងខេត្តសៀមរាប

ដោយ ៖ រ៉ាណេត

សៀមរាប ៖ គម្រោងបុរីអង្គរលែនម៉ាក្ស គឺជាបុរី បែប វប្បធម៌ ទេសចរណ៏ និងធម្មជាតិ ដែលប្រសិទ្ឋនាមថា «ភូមិកំណើត» ដែលមានលំនៅដ្ឋានដ៏ទំនើប និងប្រណីត បង្កប់នូវរចនាបទ វប្បធម៌ អរិយធម៌ខ្មែរដ៏អស្ចារ្យ ក្រោមការរចនាគំរូប្លង់មេដោយ សាស្ត្រាចារ្យ ទូស សាភឿន បច្ចុប្បន្នលោកក៏ជា អគ្គលេខាធិការងគណៈស្ថាបត្យករកម្ពុជា នៅក្រសួងរៀបចំដែនដី នគរោបនីយកម្ម និងសំណង់ និងសាកលវិទ្យាធិការរងសាកលវិទ្យាល័យវេស្ទើន និងជាស្ថាបត្យករអាស៊ាន លោកមានបទពិសោធន៍ជាង២០ឆ្នាំ ដែលកន្លងមកលោកបាន បញ្ចេញស្នាដៃធំៗជាច្រើនរួចមកហើយ ស្នាដៃលេចធ្លោចុងក្រោយរបស់លោកមួយទៀត ដែលយើងគ្រប់គ្នាបានដឹង គឺគម្រោង មជ្ឈមណ្ឌល ពាណិជ្ជកម្ម ថៃ ប៊ុនរ៉ុង កំពស់១៣៣ជាន់ ។

លោកសាស្រ្តាចារ្យបានមានប្រសាសន៍ប្រាប់កាលពីពេលកន្លងទៅថ្មីៗនេះថា វត្តមានរបស់បុរីអង្គរលែនម៉ាក្ស បន្ទាយស្រី នឹងក្លាយជាទីស្ថាន គួរឱ្យចង់រស់នៅ ចាប់អារម្មណ៍ និងទាក់ទាញបំផុត បើយើងបានដឹងពិតប្រាកដនៃទស្សនៈគម្រោងប្លង់មេ ព្រោះប្លង់មេរចនាឡើងតាមបែបសាសនា ដោយគោរពអោយម្ចាស់ទឹកដី ដែលជាអ្នកបង្កើតតំបន់អង្គរ ជាពិសេសផ្សារភ្ជាប់ទៅនិងវត្តមានសំខាន់នៃប្រវត្តប្រាសាទបន្ទាយស្រីតែម្តង។

កាលដើមឡើយប្រាសាទបន្ទាយស្រី មានឈ្មោះថា “ឥសូរបុរៈ” ប្រែថា “បុរីនៃឥសូរ” ប៉ុនែ្តសម័យក្រោយៗមកទៀតគេហៅថា ប្រាសាទបន្ទាយស្រីទៅវិញ ដោយសា តួប្រាសាទមានក្បាច់រចនាយ៉ាងខ្ញង់ឆើតឆាយ មានសន្ទឹកភ្ញីវល្លិវិលវង់ល្អិតឆ្មាស្រស់រស់រវីក ឆ្លាក់លើថ្មព៌ណផ្កាឈូកទៀត ដែលមើលទៅនឹកគិតមានក្តីសង្ស័យថា ” ទេវតានិមិ្មត ” ។ សម័យកសាងប្រាសាទបន្ទាយស្រីនេះជាសម័យនៃការចេះដឹងស្ទាត់ជំនាញដល់កំពូល នៃបុព្វបុរស់ដូនតាខ្មែរនាសម័យនោះ ។

ប្រាសាទបន្ទាយស្រីបានកសាងឡើងក្នុងគ្រិស្តសករាជ ៩៦៧ ក្នុងរជ្ជកាល ព្រះបាទរាជេន្រ្ទវរ្មន័ទី២ មុនការកសាងប្រាសាទអង្គរតូច និងអង្គរធំ ស្ថាបត្យករ រចនាប្លង់ប្រាសាទដោយព្រហ្មម្នាក់ឈ្មោះ យជ្ញវរាហៈ ដែលជាព្រះគ្រូរបស់ព្រះបាទជ័យវរ្មន័ទី៥។ ហេតុដូច្នេះ គម្រោងប្លង់បុរីអង្គរលែនម៉ាក្ស ត្រូវគោរពទៅតាមម្ចាស់ទឹកម្ចាស់ដី ដោយយកការគោរពសាសនាជាគោលគឺ «ព្រហ្មញ្ញសាសនា» តាមទស្សនៈនៃលោកធាតុខ្មែរ «មេបា-ប្រុសស្រី» តំណាងអោយ «ទឹកនិងដី» ជាវត្ថុសក្ការៈត្រជាក់ត្រជុំប្រចាំគ្រួសារ និងក៏ជាពិភពនៃជីវិតមនុស្ស និងក៏ជាទ្រឹស្តីបង្កើតលោកផងដែរ។ ដូច្នេះទម្រង់ទីក្រុងខ្មែរសម័យ

បុរាណគឺទាញយកតាម រូបធាតុ «មេបា»ទាំងអស់។

ដោយឈរលើទស្សនៈលោកធាតុខ្មែរខាងលើ គម្រោងប្លង់មេរបស់បុរីអង្គរលែនម៉ាក្សបន្ទាយស្រី បានរចនាយកតាម ទម្រង់ «ស្បូនស្រ្តី» ដែលជា «ជំរកនៃទីកំណើតដើម៩ខែ២០ថ្ងៃ» របស់មនុស្សទាំងអស់ ហើយគម្រោងប្លង់មេក៏និម្មិតរូបតំណាងដល់ប្រាង្គប្រាសាទបន្ទាយស្រីដែលមានក្បូក្បាច់រចនាស្រស់ស្អាតទន់ភ្លន់ប្រៀបប្រដូចទៅនិងគុណតំលៃរបស់ស្រ្តីផងដែរ។

អ្វីដែលសំខាន់ជាងនេះទៀត បុរីអង្គរលែនម៉ាក្សបន្ទាយស្រី ក៏តំណាងអោយទឹកដីកំណើតរបស់ខ្លួន ដល់បងប្អូនខ្មែរទាំងក្នុងប្រទេស និងក្រៅប្រទេស ចង់មករស់នៅផ្ញើជីវិតលើទឹកដីអច្ជរិយៈមួយនេះ ទោះបី ជាកើតនៅក្នុងតំបន់ខុសៗគ្នាក៏ដោយ។

គម្រោងប្លង់មេបែរទៅរកមុំនៃវត្តមានភ្នំបីសំខាន់ៗ ភ្នំគូលេន ភ្នំបូក និងភ្នំដី គឺជាភ្នំរបស់ព្រះ ផ្តល់ភាពត្រជាក់ត្រជុំ និងកក់ក្តៅដល់កូនចៅដែលបានស្នាក់នៅក្នុងបុរី អង្គរលែនម៉ាក្ស។

លោកសាស្ត្រាចារ្យបានមានប្រសាសន៍បន្តទៀតថា “គម្រោងសំណង់លំនៅដ្ឋាននៅក្នុងបុរីអង្គរលែនម៉ាក្ស ត្រូវបានបែងចែកជាប្រភេទផ្សេងៗគ្នាជាច្រើន ដោយសុទ្ធតែមានបង្កប់នូវរចនាបទបែបខ្មែរទាំងអស់ ដោយប្លង់ផ្ទះនីមួយៗ វិវត្តន៏ចេញពីផ្ទះបុរាណខ្មែរ រៀបចំទៅតាមក្បួនច្បាប់ត្រឹមត្រូវ ដែលក្នុងនោះរួមមានដូចជា ប្រភេទផ្ទះវីឡាខ្មែរចៅសាយ ផ្ទះវីឡាខ្មែរអង្គរតូច ផ្ទះវីឡាខ្មែរអង្គរធំ និងប្រភេទផ្ទះវីឡាខ្មែរក្រវ៉ាន់ ដែលផ្ទះនីមួយៗសុទ្ធតែមានទីធ្លាធំទូលាយ រចនាបែបប៊ូទិក ជាពិសេសមានទីធ្លានៅក្រៅផ្ទះសម្រាប់អង្គុយលេង មើលឃើញទេសភាពតំបន់បៃតងជុំវិញយ៉ាងស្រស់ស្អាត។ លោកសាស្ត្រាចារ្យបានបន្តទៀតថា “យើងបានយកចិត្តទុកដាក់ជាខ្លាំងគឺការរចនាម៉ូដផ្ទះ ដើម្បីងាយស្រួលក្នុងការរស់នៅប្រកបដោយផាសុកភាពខ្ពស់ អោយមានចរន្តខ្យល់អាកាសចេញចូលតាម

ធម្មជាតិ។ លោកបានបន្តទៀតថា “ក្រៅពីមានលំនៅដ្ឋានដ៏ស្រស់ស្អាតគួរជាទីទាក់ទាញបែបលំនៅដ្ឋានខ្មែរ នៅមានការយកចិត្តទុកដាក់ទៅលើការរៀបចំកសាងហេដ្ឋារចនាសម្ព័ន្ធនានាដូចជាផ្លូវថ្នល់ធំទូលាយស្តង់ដារបំផុត មានរៀបសួនកំសាន្តបីកន្លែងធំៗ ដោយមានរូបចំលាក់មេទព័ល្បីៗមានឫទ្ធីអំណាចសម័យអង្គរចំនួន៥អង្គ ឈរអមព្រះបាទជ័យវរ្មន័ទី៧ ដែលរុបនីមួយៗមានកំពស់១២ម៉ែត្រ នៅលើផ្ទៃដីទំហំ២ហិកតា ក្រៅពីសួននៅមានទីកន្លែងហាត់ប្រាណ និងមានគម្រោងសំខាន់ៗជាច្រើនទៀតដែលកំពុងដំណើការស្នើសុំច្បាប់ ដូចជា គម្រោងទីកម្សាន្តលំហែរកាយសួនសត្វសប្បនិម្មិត សួនផ្ការ២ពាន់ពូជ មានប៊ូទិកពីរកន្លែង មានសាលាវេស្ទើនអន្តរជាតិ វិទ្យាស្ថានវរន្ម័ មានផ្សារបណ្តែតទឹកលើកដំបូងប្រចាំនៅក្នុងទឹកដីអង្គរ ដែលបច្ចុប្បន្នកំពុងតែរៀបចំដំណើរការស្នើសុំច្បាប់។

វត្តមាននៃបុរីអង្គរលែនម៉ាក្ស និងក្លាយជាបុរីគំរូគេក្នុងការរក្សារបានរចនាបទលំនៅដ្ឋានបែបខ្មែរ មកឆ្នៃប្រឌិតជាទំនើបទាន់សម័យ ជាពិសេសបានចូលរួមជាមួយគោលនយោបាយអភិវឌ្ឍ មូលដ្ឋាន និងជាតិ តាមរយះការលើកស្ទូយលើវិស័យវប្បធម៌ ទេសចរណ៍ និងធម្មជាតិ៕

ម្ចាស់ពានស្ថាបនិកឆ្នើម បង្ហើបក្បួនធ្វើផែនការអាជីវកម្មទទួលបានប្រាក់ចំណូលខ្ពស់

អត្ថបទ៖ សាន់ ថាវិន

រាជធានីភ្នំពេញ៖ ម្ចាស់ពានស្ថាបនិកឆ្នើម បង្ហើបក្បូនធ្វើផែនការអាជីវកម្មទទួលបានប្រាក់ចំណូលខ្ពស់ ជូនដល់សមាជិកនិងមិនមែនសមាជិកប្រមាណ១៥០នាក់ នៅក្នុងកម្មវិធីបង្វឹកម្ចាស់អាជីវកម្មរបស់ CEO Master Club ដែលបានរៀបចំឡើងរយៈពេល៤ថ្ងៃ ដោយផ្តើមពីថ្ងៃទី ៣០ វិច្ឆិកា-៣ ធ្នូ ២០១៩នេះ នៅសណ្ឋាគារ DYVITH ស្ថិតក្នុងខណ្ឌសែនសុខ។

នៅថ្ងៃទីមួយនៃកម្មវិធីបង្វឹកនេះ លោកគ្រូ អោម សេងបូរ៉ា ស្ថាបនិក CEO Master Club នៃ វិទ្យាស្ថានស៊ីអ៊ីអូ រូបនេះ បានបង្ហាញជូនដល់ម្ចាស់អាជីវកម្មបានស្គាល់ឱ្យកាន់តែស៊ីជម្រៅនូវការរៀបចំផែនការអាជីវកម្ម ព្រមទាំងផ្សារភ្ជាប់ជាមួយនឹងច្បាប់ដ៏ពិសេសចំនួន៧។

ច្បាប់ទាំង៧ រួមមាន៖ ច្បាប់ជោគជ័យកម្រិតកំពូល ច្បាប់២០/៨០ ច្បាប់កាំប្រម៉ា និងច្បាប់ចំណេញ….និងយុទ្ធសាស្ត្រផ្តោតទាំង៧ដើម្បីធ្វើឱ្យអាជីវកម្មជោគជ័យ ជាដើម ដែលច្បាប់ទាំងអស់ បានធ្វើឱ្យសមាជិកនិងមិនមែនសមាជិកទាំងអស់មានការចាប់អារម្មណ៍និងជក់ចិត្តយ៉ាងខ្លាំង និងជឿជាក់ថាអាចផ្លាស់ប្ដូររបៀបរបបក្នុងរៀបចំផែនការ និងក្បួនដឹកនាំអាជីវកម្មដោយមានប្រសិទ្ធភាព ព្រមទាំងអាចបង្កើនប្រាក់ចំណេញបានខ្ពស់នៅក្នុងស្ថាប័ន និងចំណេញពេលវេលា។

លោកគ្រូបង្វឹករូបនេះ ក៏បានលើកឡើងនូវពាក្យមួយឃ្លាដែលចាក់ដោតដល់បេះដូងម្ចាស់អាជីវកម្មទាំងអស់ថា “ ត្រូវយកពិភពលោកធ្វើជាទីផ្សាររបស់អ្នក” ហើយនេះជាគតិបណ្ឌិតដែលធ្វើម្ចាស់អាជីវកម្មចាប់ផ្តើមផ្តាស់ប្តូរការគិតបានកាន់តែធំនិងមើលឃើញអនាគតបានវែងឆ្ងាយ ដោយអាចបង្កើនប្រាក់ចំណេញបានច្រើន ប្រែក្លាយអាជីវកម្មឱ្យស្ដង់ដារ ព្រមទាំងមានផែនទីច្បាស់លាស់សម្រាប់អាជីវកម្មផ្ទាល់ខ្លួន និងស្ថាប័ន ឆ្ពោះទៅរកពិភពលោកបានលឿនឆាប់រហ័យ។

មានតែមេដឹកនាំខ្លាំងប៉ុណ្ណោះទើបធ្វើឱ្យបុគ្គលិកខ្លាំង ហើយអាចដឹកនាំឱ្យអាជីវកម្មរីកចម្រើនបានឆាប់រហ័ស។ ដើម្បីចុះឈ្មោះចូលពង្រឹកសមត្ថភាពឱ្យកាន់តែខ្លាំងនិងឆាប់បានរំដោះខ្លួនចេញពីអ្នកទោសអាជីវកម្ម និងប្រែក្លាយអាជីវកម្មពីលក្ខណៈគ្រួសារទៅស្តង់ដារ សូមទំនាក់ទំនងលេខទូរស័ព្ទ 085 311 183 / 023 6666 999។

កម្ពុជា និងចិនសហការគ្នាអភិវឌ្ឍភូមិគំរូមិត្តភាពកម្ពុជា និងចិននៅខេត្តតាកែវ

ដោយ ប៊ី

ភ្នំពេញ៖ មូលនិធិចិនសម្រាប់សន្តិភាព និងការអភិវឌ្ឍ (CFPD) និងវេទិកាសម្ព័ន្ធសង្គមស៊ីវិលនៅកម្ពុជាបានចុះហត្ថលេខាលើអនុស្សរណៈនៃការយោគយល់គ្នា (MoA) កាលពីថ្ងៃ សុក្រ កន្លងមកនេះដើម្បីធ្វើការរួមគ្នាដើម្បីអភិវឌ្ឍភូមិគំរូមិត្តភាពកម្ពុជា និងចិនសម្រាប់ការកាត់បន្ថយភាពក្រីក្រ។

អនុស្សារណៈនេះត្រូវបានចុះហត្ថលេខាដោយអគ្គលេខាធិការរបស់ CFPD លោក X Jiang Jianguo និងប្រធានវេទិកាសម្ព័ន្ធសង្គមស៊ីវិលលោក Kemreat Viseth។ នេះបើយោងតាមកាសែត Xinhua។ក្រោមកិច្ចព្រមព្រៀងនេះ ភាគីទាំងពីរបានសម្រេចចិត្តជ្រើសរើសភូមិក្រីក្រមួយឈ្មោះតាណនសម្រាប់គម្រោងរយៈពេល ៣ ឆ្នាំ។

ភូមិតាណនមានទីតាំងស្ថិតនៅតំបន់ដាច់ស្រយាលមួយក្នុងស្រុកបាទីខេត្ត តាកែវដែលមានចំងាយ ៦០ គីឡូម៉ែត្រខាងត្បូងរាជធានីភ្នំពេញ។

ថ្លែងក្នុងកំឡុងពេលដំណើរទស្សនកិច្ចទៅកាន់ភូមិរយៈពេលមួយថ្ងៃមុនការចុះហត្ថលេខាលើអនុស្សរណៈយោគយល់គ្នា លោក Xu បានថ្លែងថា គម្រោងនេះត្រូវបានរៀបចំឡើងដើម្បីជួយកាត់បន្ថយភាពក្រីក្រនៅក្នុងភូមិជនបទមួយនេះ។

លោកបានមានប្រសាសន៍ថា “យើងបានជ្រើសរើសភូមិនេះសម្រាប់គម្រោងកាត់បន្ថយភាពក្រីក្ររបស់យើង ហើយយើងនឹងប្រែក្លាយវាទៅជាភូមិគំរូមិត្តភាពកម្ពុជា និងចិននាពេលខាងមុខនេះ” ។

លោក Xu មានជំនឿថា គម្រោងនេះនឹងរួមចំណែកបន្ថែមទៀតដើម្បីលើកកម្ពស់មិត្តភាពទៅវិញទៅមកនិងលើកកម្ពស់ការផ្លាស់ប្តូរប្រជាជន និងប្រជាជន និងកិច្ចសហប្រតិបត្តិការរវាងប្រទេសទាំងពីរ។

លោកជា មុនីរិទ្ធ ប្រធានផ្នែកផែនការ និងជាប្រធានគម្រោងនៃវេទិកាសម្ព័ន្ធសង្គមស៊ីវិលនៅកម្ពុជា បានថ្លែងថា គម្រោងនេះនឹងចាប់ផ្តើមនៅខែក្រោយ ហើយរំពឹងថានឹងបញ្ចប់នៅឆ្នាំ ២០២២។

លោកបានប្រាប់កាសែត Xinhua ថា “គម្រោងនឹងផ្តោតជាចម្បងលើការរចនា និងកែលម្អផ្លូវក្នុងភូមិការផ្តល់ទឹកស្អាតដល់គ្រួសារ ការគាំទ្រសុខភាព ការអភិវឌ្ឍវិស័យកសិកម្មរួមមានការចិញ្ចឹម ធ្វើឱ្យសិប្បកម្មប្រពៃណីធ្វើឱ្យប្រសើរឡើងនូវបរិស្ថានសាធារណៈ ក៏ដូចជាការបណ្តុះបណ្តាលវិជ្ជាជីវៈ”៕

រដ្ឋាភិបាលនឹងអភិវឌ្ឍក្រុងព្រះសីហនុក្លាយជាមជ្ឈមណ្ឌលភស្តុភារកម្មដ៏ធំ

ដោយ វុត្ថា

ភ្នំពេញ៖ រដ្ឋាភិបាលកម្ពុជាកម្ពុជានឹងអភិវឌ្ឍក្រុងព្រះសីហនុក្លាយជាមជ្ឈមណ្ឌលភស្តុភារកម្មដ៏ធំនៅកម្ពុជា ខណៈក្រុមទីប្រឹក្សាស្ថាប័នអាជីវកម្មហរិញ្ញវត្ថុ IFC របស់ធនាគារពិភពលោក កំពុងសិក្សាបុរេសមិទ្ធិលទ្ធភាពលើគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុនេះ ។

យោងតាមកិច្ចប្រជុំរវាមន្ត្រីជាន់ខ្ពស់នៃក្រសយងសាធារណៈ និងដឹកជញ្ជូន និង ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុរបស់ធនាគារពិភពលោក កាលពីថ្ងៃទី ២៩ ខែវិច្ឆិកា ម្សិលមិញនេះ បានឱ្យដឹងថាគម្រោងនេះមានគោលបំណងក្នុងការអភិវឌ្ឍក្រុងព្រះសីហនុក្លាយជាមជ្ឈមណ្ឌលភស្តុភារកម្មដ៏ធំមួយនៅកម្ពុជា ធានាដល់ការអភិវឌ្ឍសេដ្ឋកិច្ច ប្រកបដោយចីរភាព ធានាឱ្យមានការគាំទ្រផ្នែកហេដ្ឋារចនាសម្ព័ន្ធចាំបាច់ដើម្បីជំរុញការប្រកួតប្រជែងក្នុងការដឹកជញ្ជូន។

ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោក បានធ្វើបទបង្ហាញអំពីបច្ចុប្បន្នភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ដោយផ្តោតជាសំខាន់លើការវិភាគស្ថានភាពច្បាប់ និងស្ថាប័នដែលគាំទ្រដល់រចនាសម្ព័ន្ធភាពជាដៃគូរដ្ឋ និងឯកជន (Public-Private Partnership) និងស្ថានភាពទីតាំងសមស្របមួយ ដែលជាទីតាំងសម្រាប់មជ្ឈមណ្ឌលភស្តុភារកម្មក្រុងព្រះសីហនុ។

លោក ឈៀង ពេជ្រ អគ្គនាយក នៃអគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន បានជំរុញឱ្យសមាជិកសមាជិកានៃគណៈកម្មាធិការជាតិភស្តុភារកម្ម និងភាគីពាក់ព័ន្ធ ធ្វើការសិក្សា និងអនុវត្តគម្រោងនេះក្នុងពេលឆាប់ៗឱ្យទទួលបានលទ្ធផលល្អប្រសើរ និងដាក់ជូនថ្នាក់ដឹកនាំក្រសួងធ្វើការពិនិត្យ ឈានទៅបង្កើតមជ្ឈមណ្ឌលភស្តុភារកម្មក្រុងព្រះសីហនុប្រកបដោយជោគជ័យ៕

ចិនកំពុងមានសម្ពាធក្នុងការចុះហត្ថលេខាលើកិច្ចព្រមព្រៀងពាណិជ្ជកម្ម ខណៈពេលកំណត់ជិតមកដល់

ដោយ Donald Lee

ភ្នំពេញ៖ ទីក្រុងប៉េកាំងកំពុងរងសម្ពាធក្នុងការចុះហត្ថលេខាលើកិច្ចព្រមព្រៀងពាណិជ្ជកម្ម មុនថ្ងៃផុតកំណត់នៃពន្ធគយរដ្ឋអាមេរិកនៅថ្ងៃទី ១៥ ខែ ធ្នូ ចូលជាធរមានដែលនឹងជះឥទ្ធិពលដល់ការនាំចូលចិនដែលមានតម្លៃ ១៥៦ ពាន់លានដុល្លារ។ ពន្ធគយកំណត់គោលដៅលើទូរស័ព្ទចល័ត កុំព្យូទ័រយួរដៃ និងទំនិញប្រើប្រាស់ដែលមានតម្លៃខ្ពស់។

ទោះយ៉ាងណាការចុះហត្ថលេខាច្បាប់ចំនួនពីរដែលត្រូវបានសរសេរដើម្បីគាំទ្រដល់ស្វ័យភាពរបស់ហុងកុងនិងក្រុមបាតុករដែលគាំទ្រលទ្ធិប្រជាធិបតេយ្យរបស់ប្រធានាធិបតីអាមេរិកលោក Donald Trump បានធ្វើឱ្យទីក្រុងប៉េកាំងថាតើត្រូវសងសឹក ឬធ្វើប្រងើយចំពោះសកម្មភាពរបស់វ៉ាស៊ីនតោន។

លោក Geng Shuang អ្នកនាំពាក្យក្រសួងការបរទេសចិនបាននិយាយកាលពីថ្ងៃសុក្រថា “ចិនប្រឆាំងដាច់ខាតនឹងច្បាប់ហុងកុង។ យើងបានធ្វើការតំណាងដ៏ម៉ឺងម៉ាត់ និងការតវ៉ាយ៉ាងខ្លាំងចំពោះអាមេរិក។

លោក បានបន្តថា “វាជាការអនុវត្តជាក់ស្តែងដ៏ចម្លែកមួយដែលមានការជ្រៀតជ្រែកយ៉ាងខ្លាំងក្នុងកិច្ចការហុងកុងដែលជាកិច្ចការផ្ទៃក្នុងរបស់ចិន។ ចិននឹងចាត់វិធានការទប់ស្កាត់ខ្លាំង”។ ច្បាប់ចែងថា រដ្ឋាភិបាលអាមេរិកត្រូវតែផ្ទៀងផ្ទាត់ស្វ័យភាពរបស់ហុងកុងជារៀងរាល់ឆ្នាំសម្រាប់ខ្លួនក្នុងការរក្សាការពិចារណាពាណិជ្ជកម្មពិសេសរបស់អាមេរិក។

ច្បាប់ទី ២ បានហាមឃាត់ការលក់ហ្គាសបង្ហូរទឹកភ្នែក និងគ្រាប់កាំភ្លើងកៅស៊ូទៅឱ្យអាជ្ញាធរប៉ូលីសនៅហុងកុង។ពាណិជ្ជកម្មសម្រាប់ទាំងអាមេរិក និងចិនបានធ្លាក់ចុះនៅឆ្នាំនេះ ដោយសារតែសង្រ្គាមពាណិជ្ជកម្មដែលកំពុងកើតមាន។

ការនាំចេញចិនទៅកាន់អាមេរិកបានធ្លាក់ចុះ ៥៣ ពាន់លានដុល្លារ ហើយការនាំចេញអាមេរិកទៅកាន់ចិនបានធ្លាក់ចុះ ១៤,៥ ពាន់លានដុល្លារ បើប្រៀបធៀបទៅនឹងឆ្នាំមុន។ នេះបើយោងតាមរបាយការណ៍សេដ្ឋកិច្ចរបស់អង្គការ សហប្រជាជាតិចេញផ្សាយក្នុងខែនេះ។

អង្គការសហប្រតិបត្តិការនិងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្គ្រាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏អស្ចារ្យកាលពី ១០ ឆ្នាំមុន។

របាយការណ៍បានកែប្រែការព្យាករណ៍កំណើនផលិតផលសរុបក្នុងស្រុកឆ្នាំ ២០១៩ របស់ខ្លួនដល់ ២,៩ ភាគរយនិង ៣ ភាគរយសម្រាប់ឆ្នាំក្រោយ។ ការព្យាករណ៍ពីកំណើនសម្រាប់ឆ្នាំ ២០២០ និង២០២១ បានបង្ហាញកំណើនខ្សោយបំផុតមួយចាប់តាំងពីវិបត្តិហិរញ្ញវត្ថុដ៏ធំក្នុងឆ្នាំ ២០០៩។

ប្រព័ន្ធផ្សព្វផ្សាយរដ្ឋចិនបានចេញសេចក្តីថ្លែងការណ៍ថ្កោលទោសយ៉ាងខ្លាំងចំពោះសកម្មភាពរបស់អាមេរិកដែលឈានដល់ការចុះហត្ថលេខាលើកិច្ចព្រមព្រៀងពាណិជ្ជកម្ម។ ក្រុមអ្នកវិភាគបានបារម្ភថា ភាពតានតឹងបច្ចុប្បន្ននឹងនាំទៅរកការឈានទៅរកការធ្លាក់ចុះនៃសេដ្ឋកិច្ចធំបំផុតទាំងពីររបស់ពិភពលោក។

ការអត្ថាធិប្បាយមួយនៅក្នុងប្រព័ន្ធផ្សព្វផ្សាយគ្រប់គ្រងដោយចិន បានឱ្យដឹងថា “នេះមិនមែនជាពិភពលោកដូចពីកាលពីមុនទេ បន្ទាប់ពីបញ្ចប់នៃសង្គ្រាមត្រជាក់។ អាមេរិកមិនអាចកាត់ផ្តាច់ទំនាក់ទំនងរបស់ចិនជាមួយពិភពលោកបានទេ”។

ការអត្ថាធិប្បាយ បានបន្ថែមថា “បើទោះបីអាមេរិកផ្តាច់ទំនាក់ទំនងជាមួយចិន សម្ព័ន្ធមិត្តរបស់អាមេរិកនឹងមិនធ្វើតាមអាមេរិក ហើយប្រទេសភាគច្រើននឹងនៅតែបន្តអភិវឌ្ឍទំនាក់ទំនងជាមួយចិនដដែល។ ប្រសិនបើអាមេរិកទទូចដោយឯកតោភាគីនិយម អាមេរិកកំពុងជ្រើសរើសការធ្លាក់ចុះដែលមិនអាចត្រឡប់វិញបានសម្រាប់ខ្លួនឯង”៕

ក្រុមហ៊ុនអចលនទ្រព្យចិនធំៗចំនួន២ បោះទុនវិនិយោគលើវិស័យអចលនទ្រព្យ និងសំណង់នៅក្នុងខេត្តកំពង់ស្ពឺ

ដោយ ៖ រ៉ាណេត

កំពង់ស្ពឺ ៖ ក្រុមហ៊ុនអចលនទ្រព្យមកពីប្រទេសចិនធំៗចំនួន២ បានមកធ្វើការសិក្សា និងស្វែងយល់បន្ថែមពីសក្ដានុពលនៅក្នុងខេត្តកំពង់ស្ពឺ រួមជាមួយនឹងគោលបំណងបណ្តាក់ទុនវិនិយោគនៅក្នុងវិស័យអចលនទ្រព្យ និងវិស័យសំណង់នៅក្នុងខេត្តមួយនេះ។

ជាមួយនឹងភាពល្អប្រសើរនៃកត្តាភូមិសាស្ត្រ រួមជាមួយសេដ្ឋកិច្ចនៅក្នុងតំបន់ ខេត្តកំពង់ស្ពឺបានក្លាយជាចំណុចគោលដៅវិនិយោគពីសំណាក់បណ្តាអ្នកជំនួញជាតិ និងអន្តរជាតិនានាជាច្រើនដែលមកពីប្រទេសកូរ៉េ ជប៉ុន អាមេរិក ជាពិសេស ប្រទេសចិនតែម្ដង ។

អភិបាលនៃគណៈអភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣០ ខែវិច្ឆិកា ឆ្នាំ២០១៩នេះថា ជាមោទនភាពចំពោះខេត្តកំពង់ស្ពឺទទួលបានចំណាប់អារម្មណ៍វិនិយោគជាច្រើន ខណៈដែលវិស័យហេដ្ឋារចនាសម្ព័ន្ធនានានៅទូទាំងខេត្ត ត្រូវបានយកចិត្តទុកដាក់ស្ថាបនាសាងសង់ពីសំណាក់រាជរដ្ឋាភិបាលកម្ពុជា ។

លោកបានមានប្រសាសន៍បញ្ជាក់ថា “ខេត្តកំពង់មានភាពអំណោយផលជាច្រើន ជាពិសេសកត្តាភូមិសាស្ត្រតែម្ដងដែលមានផ្លូវជាតិសំខាន់ៗក្នុងការដឹកជញ្ជូន ដូចជាផ្លូចជាតិលេខ៣ ផ្លូវជាតិលេខ៤ និងផ្លូវជាតិលេខ៥”។

លោកបានបន្តទៀតថា “ភាពរីកចម្រើន និងអភិវឌ្ឍន៍ទាំងនេះ គឺកើតចេញពីការខិតខំរបស់រាជរដ្ឋាភិបាលកម្ពុជា ដែលបានកៀងគរ និងសម្របសម្រួលគ្រប់វិធីសាស្ត្រដើម្បីកៀងគរប្រមូលបណ្តាអ្នកវិនិយោគអន្តរជាតិឱ្យមកកាន់កម្ពុជា ជាក់ស្ដែកាលពីសប្ដាហ៍មុនមានគណៈប្រតិភូវិនិយោគចិនចំនួន៣៥ចូលមកសិក្សាពីឱកាសវិនិយោគនៅក្នុងខេត្តកំពង់ស្ពឺ ហើយល្ងាចម្សិលមិញនេះ មានក្រុមហ៊ុនអចលនទ្រព្យចិនធំៗចំនួន២បន្ថែមទៀតក៏បង្ហាញពីចំនាប់អារម្មណ៍ចូលមកវិនិយោគនៅក្នុងខេត្តដែរ”។

ក្រុមហ៊ុនអចលនទ្រព្យចិន ដែលបង្ហាញពីចំណាប់អារម្មណ៍វិនិយោគនៅក្នុងខេត្តកំពង់ស្ពឺទាំង២ខាងលើនេះរួមមានក្រុមហ៊ុន China Realm Investment និង Qianxun SL។ ជាមួយនឹងគោលបំណងខាងលើនេះ ក្រុមហ៊ុនទាំង២នឹងនាំមកនូវផលិតផលដែលជាបច្ចេកវិទ្យាចុងក្រោយរបស់ប្រទេសចិន ដោយប្រើប្រាស់ប្រព័ន្ធ 5G ( ALIBABA RESOURCES ) ដែលជាឧបករណ៍បំពាក់លើសំណង់អគារ។

បច្ចុប្បន្ន នៅក្នុងខេត្តកំពង់ស្ពឺមានក្រុមហ៊ុនជាច្រើនកំពុងដំណើរការ ហើយក្រុមហ៊ុនមួយចំនួនទៀតរត់ការឯកសារស្នើសុំដើម្បីបានចាប់ប្រតិបត្តិការ ជាក់ស្ដែងសម្រាប់តែវិស័យរោងចក្រមានកំណើនយ៉ាងគំហុករហូតដល់ចំនួន ២៦១រោងចក្រដែលផ្តល់ឱកាសការងារបានចំនួនជាង១៣ម៉ឺនកន្លែង ជាមួយនឹងចំណូលផលិតផលក្នុងស្រុកសរុបជាង ១៧០០ដុល្លារក្នុងម្នាក់៕

របកកំហើញថ្មី៖ តើសំណង់សម័យអណានិគមបារាំងនៅកម្ពុជាជាកម្មសិទ្ធិរបស់នរណា?

ដោយ វុត្ថា

ភ្នំពេញ៖ នៅក្នុងសម័យអាណានិគមបារាំង ប្លង់អគាររាជធានីភ្នំពេញ និងទីក្រុងនៅតាមខេត្តនានា មានរាងជាក្រឡាចត្រង្គ ហើយសំណង់ទាំងនោះ ច្រើនជាអគាររដ្ឋបាល ឬជាលំនៅឋានរបស់មន្ត្រីជាន់ខ្ពស់ និងមន្ត្រីជាជនជាតិបារាំងដែលធ្វើការនៅស្រុកខ្មែរ ។

នៅក្នុងសិក្ខាសាលាជាតិ ស្ដីពី «ការវិវត្តនៃរចនាបថ និងសំណង់ស្ថាបត្យកម្មប្រាសាទខ្មែរ ពីសម័យឧដុង្គដល់សម័យបច្ចុប្បន្ន» កាលពីថ្ងៃទី២៩ ខែវិច្ឆិកា ឆ្នាំ២០១៩នេះ លោក សេង សុវណ្ណដារ៉ា អ្នកសិក្សាស្រាវជ្រាវអក្សរសិល្ប៍នៃសាកលវិទ្យាល័យភូមិន្ទភ្នំពេញ បានឱ្យដឹងថា សំណង់អគារទាំងនោះ មានទម្រង់ជាអគារ ឬសំណង់យកតាមលំនាំវប្បធម៌អឺរ៉ុបនៅសម័យក្លាស៊ីក ឬណេអូក្លាស៊ីក ដូចជានៅតាមតំបន់រដ្ឋបាលផ្សេងៗជាដើម។

លោកបន្តថា សំណង់ដែលត្រូវបានកសាងថ្មីៗនៅក្នុងសម័យអាណាព្យាបាលបារាំង គឺមានទាំងសំណង់បែបទំនើប និងសំណង់ដែលមានតាមបែបប្រពៃណីខ្មែរ។

តួយ៉ាងដូចជាសំណង់នៅក្នុងព្រះបរមរាជវាំង គឺនៅតែរក្សាតាមបែបប្រពៃណី ដោយគ្រាន់តែក្រោយមកមានសំណង់មួយចំនួនដែលមានឥទ្ធិពលស្ថាបត្យកម្មប្រទេសលោកខាងលិច ពិសេសគឺសំណង់ប្រាសាទណាប៉ូឡេអុងជាដើម ដែលជាព្រះរាជអំណោយរបស់ព្រះចៅអធិរាជបារាំងថ្វាយសម្ដេចព្រះនរោត្ដមនៅក្នុងឆ្នាំ១៩៧៦។

លោកបន្ថែមថា សំណង់ដែលគួរឱ្យចាប់អារម្មណ៍មួយទៀតនោះគឺ សំណង់សារមន្ទីរជាតិ ដែលបានកសាងនៅឆ្នាំ១៩១៧ តាមរចនាបថខ្មែរ។ ក្រៅពីនោះមានសំណង់អគារមួយចំនួន ដែលបានសាងសង់ទៅតាមរចនាបថសិល្បៈទំនើប ដូចជា រាជាយស្ម័យយាន ផ្សារធំថ្មី និងព្រះវិហារ សាំង ចូសែហ្វ ជាដើម។

ទោះជាយ៉ាងណា លោក សេង សុវណ្ណដារ៉ា ក៏បានគូសបញ្ជាក់បន្ថែមផងដែរថា សំណង់អគារតាមបែបបារាំង គឺជាសម្បត្តិបេតិកភណ្ឌជាតិសម័យទំនើបរបស់កម្ពុជា ដែលទាមទារឱ្យមានការថែរក្សានិងអភិរក្សឱ្យបានល្អប្រសើរ។

បើតាមការលើកឡើងរបស់លោក សេង សុវណ្ណដារ៉ា ដដែល ក្រោយសម័យអាណានិគមបារាំង លោក វណ្ណ មូលីវណ្ណ បានរួមចំណែកក្នុងុការធ្វើទំនើបកម្មរាជធានីភ្នំពេញក្នុងសម័យសង្គមរាស្ត្រនិយម ដែលចលនាស្ថាបត្យកម្មរបស់លោក ត្រូវបានគេទទួលស្គាល់ថាជា «ស្ថាបត្យកម្មខ្មែរសម័យទំនើប» ដែលក្នុងនោះរួមមានសំណង់ពហុកីឡដ្ឋានអូឡាំពិក មហោស្រពចតុមុខ វិមានរដ្ឋចំការមន និងវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញជាដើម៕