ប្រកាន់ខ្ជាប់គោលការណ៍៤យ៉ាងនេះ បើចង់ក្លាយជាភ្នាក់ងារអចលនទ្រព្យជោគជ័យ

ដោយ រ៉ាណេត

ភ្នំពេញ៖ ការក្លាយជាភ្នាក់ងារអចលនទ្រព្យមួយរូប មិនពិបាកទេ តែដើម្បីក្លាយជាអ្នកទទួលបានជោគជ័យ គឺមិនមែនជារឿងសាមញ្ញពេកនោះទេ ប៉ុន្តែការខិតខំប្រឹងប្រែងសិក្សារៀនសូត្រ មានទំនាក់ទំនងល្អ និតអាកប្បកិរិយាល្អជារឿងមិនអាចខ្វះបាន។

គេហទំព័រ Propertyarea.asia សូមលើកយកចំណុចសំខាន់ៗចំនួន៤ ដែលភ្នាក់ងារអចលនទ្រព្យត្រូវមាន មុននឹងសម្រេចចិត្តចូលប្រឡូកក្នុងវិស័យនេះ។

យោងតាមឯកសារបរទេសបានឲ្យដឹងថា ការមានភាពស្មោះត្រង់ មានការទទួលខុសត្រូវ បង្កើតបណ្តាញការងារពិតជាមានសារៈសំខាន់ ដើម្បីកំណត់ភាពជោគជ័យក្នុងការងាររបស់ខ្លួន។

ការទទួលបានអាជ្ញាប័ណ្ណ

ការបង្កើតជំនួញមួយ មិនមែនចេះតែធ្វើនោះទេ តែត្រូវមានក្រុមហ៊ុនមួយដែលត្រូវមានអាជ្ញាប័ណ្ណច្បាស់លាស់ ព្រោះអាជ្ញាប័ណ្ណមានសារៈសំខាន់ណាស់ដើម្បីផ្តល់ទំនុកចិត្តដល់អតិថិជន និងក្រុមហ៊ុនដៃគូរបស់ខ្លួន។

លើសពីនេះ ក្រុមហ៊ុនភ្នាក់ងារនេះ ត្រូវរៀបចំខ្លួនសម្រាប់ការប្រឡងទាក់ទងនឹងវិស័យអចលនទ្រព្យ។

ការបង្កើតក្រុម

បើចង់ទៅលឿន ត្រូវដើរម្នាក់ឯង តែបើចង់ទៅមុខដោយជោគជ័យនិងប្រកបដោយនិរន្តរភាព ត្រូវធ្វើជាក្រុម។ ការងារជាក្រុម និងការបង្កើតបណ្តាញជំនួញជាការងារមួយ ដែលមិនអាចមើលរំលងបាន ដើម្បីពង្រីកការផ្សព្វផ្សាយពីផលិតផលរបស់ខ្លួន និងអាចរួមចំណែកជួយគ្នាទៅវិញទៅមកនៅក្នុងក្រុម។

ដោយសារសេដ្ឋកិច្ចបានឈានដល់បដិវត្តន៍បច្ចេកវិទ្យា ដែលជាដំណាក់កាលទី៤ នៃសេដ្ឋកិច្ច ការបង្កើតបណ្តាញផ្សព្វផ្សាយពីក្រុមហ៊ុន ពីផលិតផលរបស់ខ្លួនតាមរយៈបច្ចេកវិទ្យា ជារឿងដែលមិនអាចធ្វើមិនដឹងមិនលឺឡើយ។ បច្ចុប្បន្នបច្ចេកវិទ្យាកំពុងដើរតួនាទីយ៉ាងសំខាន់ ក្នុងវិស័យជំនួញ ព្រោះបច្ចេកវិទ្យា កំពុងមានការពេញនិយមនៅលើពិភពលោក។

ហេតុនេះការមានវេបយសាយ ឬគេហទំព័រផ្ទាល់ខ្លួន ដើម្បីពង្រីកការផ្សព្វផ្សាយផលិតផលរបស់ខ្លួន ពិតជាមានសារៈសំខាន់មិនអាចខ្វះបានក្នុងការឆ្ពោះទៅមុខ។

ធ្វើទីផ្សារដោយខ្លួនឯង

គ្មានអ្នកណាធ្វើទីផ្សារជំនួសយើងបាននោះទេ ទីផ្សារនៅទីនេះសំដៅលើការបង្កើនកិត្យានុភាពរបស់ក្រុមហ៊ុន ឬធ្វើឲ្យក្រុមហ៊ុនរបស់យើងមានការទទួលស្គាល់ទូលំទូលាយក្នុងស្រទាប់មហាជន និងអតិថិជនគោលដៅ។

ហេតុនេះម្ចាស់ក្រុមហ៊ុន ភ្នាក់ងារអចលនវត្ថុឬក្រុមហ៊ុនជំនួញផ្សេងទៀត ត្រូវ បង្កើតកាលវិភាគសម្រាប់ការស្វែងរកព័ត៌មាននិងអតិថិជន ចូលរួមជួយដល់ការងារក្នុងសហគមន៍។ រក្សាទំនាក់ទំនងល្អជាមួយអតិថិជនចាស់ ព្រោះ 75ភាគរយនៃអាជីវកម្មសម្រាប់ក្រុមហ៊ុនទិញ លក់អចលនទ្រព្យជាទូទៅបានមកពីការណែនាំតៗគ្នា។

ក្នុងនាមជាអ្នកលក់អចលនទ្រព្យ ការលក់ខ្លួនឯងបានសម្រេចគឺជារឿងសំខាន់បំផុត។

ធ្វើជាអ្នកសិក្សាពេញមួយជីវិត

មនុស្សជោគជ័យ មិនដែលបញ្ចប់ការសិក្សានោះឡើយ ព្រោះការបញ្ចប់ការសិក្សាមានន័យថា ធ្វើឲ្យខ្លួនឯងក្រេសក្រិន លែងចង់ដើរទៅមុខទៀត ហេតុនេះ អ្វីដែលត្រូវធ្វើគឺហ៊ុំព័ទ្ធខ្លួនអ្នកជាមួយអ្នកនៅក្នុងវិស័យនេះ។ ការធ្វើការជាមួយមនុស្ស នៅក្នុងវិស័យអចលនទ្រព្យ ផ្ដល់ឱ្យអ្នកនូវបណ្តាញនៃអ្នកជំនាញដើម្បីស្វែងរកអចលនទ្រព្យបានល្អ។

ការសិក្សាដើម្បីពង្រីកចំណេះដឹងរបស់ខ្លួន យើងអាចចូលរួមក្នុងសិក្ខាសាលា។ ចូលសង្កេតនិន្នាការទីផ្សារ និងភាពជាអ្នកជិតខាង: ទីផ្សារអចលនទ្រព្យត្រូវបានផ្លាស់ប្តូរជានិច្ច។ ត្រូវដឹងពីកត្តាដែលប៉ះពាល់ដល់តម្លៃ និងកាលបរិច្ឆេទក្នុងតំបន់របស់អ្នក៕

ចំណេះដឹង! តើអ្វីជាភតិសន្យាហិរញ្ញវត្ថុ?

ដោយ វុត្ថា

ភ្នំពេញៈ ភតិសន្យាហិរញ្ញវត្ថុជាកិច្ចសន្យាកូនកាត់ រវាងការទិញដោយបង់ជាវគ្គៗ និងភតិសន្យាប្រតិបត្តិការ។ តាមនិយមន័យនៃច្បាប់ស្តីពី ភតិសន្យាហិរញ្ញវត្ថុ ដែលប្រកាសឲ្យប្រើដោយព្រះរាជក្រម លេខនស/រកម/០៦០៩/០០៨ ចុះថ្ងៃទី២០មិថុនាឆ្នាំ២០០៩។

ភតិសន្យាហិរញ្ញវត្ថុ គឺជាកិច្ចសន្យាជួលឧបករណ៍រវាងភតិបតី និងភតិកៈដែលភតិកៈមានកាតព្វកិច្ចត្រូវបង់ថ្លៃជួលឧបករណ៍ជាវគ្គៗ ក្នុងរយៈពេលមួយមិនតិចជាងមួយឆ្នាំ ហើយនៅដំណាច់រយៈពេលនៃកិច្ចសន្យា ភតិកៈត្រូវមានសិទ្ធិទិញ ឬមិនទិញឧបករណ៍ដែលជួលនោះ។

ដើម្បីធ្វើឲ្យសម្រេចបានភតិសន្យាហិរញ្ញវត្ថុ មានតួអង្គបីដែលត្រូវដើរតួ គឺ(១) អ្នកផ្គត់ផ្គង់ឧបករណ៍ (២) ភតិបតី និង(៣) ភតិកៈ ហើយត្រូវធ្វើតាមនីតិវិធីដូចមាននៅក្នុងឌីយ៉ាក្រាមខាងក្រោមនេះ។ នៅក្នុងជំហានទី១ ភតិកៈត្រូវចរចាជាមួយអ្នកផ្គត់ផ្គង់ ដើម្បីជ្រើសរើសយកឧបករណ៍ណាដែលខ្លួនពេញចិត្ត សម្រាប់យកមកប្រើប្រាស់ឲ្យត្រូវគោលបំណងនៃអាជីវកម្មរបស់ខ្លួន។

នៅក្នុងជំហានទី២ ភតិកៈត្រូវចរចាសុំចុះភតិសន្យាជួលឧបករណ៍ (ភតិសន្យាហិរញ្ញវត្ថុ) ជាមួយភតិបតីដោយចង្អុលប្រាប់ពីឧបករណ៍ និងអ្នកផ្គត់ផ្គង់ប្រាប់ភតិបតី។

នៅក្នុងជំហានទី៣ ភតិកៈ និងភតិបតីឈានដល់កិច្ចព្រមព្រៀង និងចុះភតិសន្យាហិរញ្ញវត្ថុ។

នៅក្នុងជំហានទី៤ភតិបតី និងអ្នកផ្គត់ផ្គង់ចុះកិច្ចសន្យាទិញលក់ឧបករណ៍សម្រាប់យកមកជួលឲ្យភតិកៈ។

នៅក្នុងជំហានទី ៥ អ្នកផ្គត់ផ្គង់ដឹកជញ្ជូន ឬប្រគល់ឧបករណ៍មកឲ្យភតិកៈ។

នៅក្នុងជំហានទី៦ ភតិកៈចុះហត្ថលេខាទទួលយកឧបករណ៍ រួចចេញសេចក្តីបញ្ជាក់មួយឲ្យ ភតិកៈថាខ្លួនបានទទួលឧបករណ៍ហើយ។ នៅក្នុងជំហានទី ៧ ភតិបតី បង់ថ្លៃទិញឧបករណ៍ឲ្យអ្នកផ្គត់ផ្គង់។

នៅក្នុងជំហានទី៨ អ្នកផ្គត់ផ្គង់ និងភតិកៈចុះហត្ថលេខាលើកិច្ចសន្យាថែទាំ ឧបករណ៍ ជាមួយភតិកៈ (ប្រសិនជាគេចង់ធ្វើដូច្នេះ)៕

អ្នកជំនាញ៖ កុំទិញអចលនទ្រព្យដោយការអូសទាញព្រោះវាប្រឈមនឹងហានិភ័យ

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកស្រីចេវ សុឃុន

ដោយ វុត្ថា

ភ្នំពេញៈ អ្នកជំនាញបានណែនាំដល់អ្នកដែលមានបំណងទិញអចលនទ្រព្យទាំងអស់ ត្រូវប្រុងប្រយ័ត្នឱ្យបានខ្ពស់ ចំពោះការអូសទាញឱ្យទិញអចលទ្រព្យនៅទីតាំង ឬតំបន់ណាមួយដោយពុំបានសិក្សា និងសាក់សួរពីព័ត៌មានឱ្យបានច្បាស់ ពីអ្នកជំនាញដែលបណ្តាលឱ្យមានការជាប់គាំងលំហូរសាច់ប្រាក់ និងហានិភ័យខ្ពស់។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកស្រីចេវ សុឃុន បានឱ្យដឹងតាមទូរស័ព្ទនៅថ្ងៃទី១ ខែតុលា ឆ្នាំ ២០១៩នេះថា ការទិញ-លក់អចលនទ្រព្យ ដើម្បីអោយការទិញធនាបាននូវចរន្តសាច់ប្រាក់នោះ អ្នកទិញត្រូវមានគោលបំណងច្បាស់លាស់ និងមានភាពចាំបាច់ ទើបការទិញលក់ទទួលបានប្រាក់ចំណេញ។

លោកស្រីបន្តថា “ប្រសិនបើការទិញរបស់លោកអ្នក តាមរយៈការអូសទាញ ទិញដោយខ្វះព័ត៌មានច្បាស់លាស់ វានឹងអាចធ្វើអោយលំហូរសាច់ប្រាក់របស់អ្នកជាប់គាំង និងមានហានិភ័យនៅពេលខាងមុខ”។

អ្នកជំនាញរូបនេះពន្យល់ទៀតថា បើទិញអចលនទ្រព្យតាមកាអូសទាញរបស់មិត្តភក្តិ ឬតាមបណ្តាញ ដោយមានការអួតអាងថាទិញវាចំណេញ ហើយខ្វះព័ត៌មានលំអិត នៅពេលដែលទិញរួចរាល់ ហើយមិនដូចគេប្រាប់នឹងធ្វើមានការជាប់គាំង នូវលំហូរសាច់ប្រាក់ បើខ្ចីលុយគេថែមទៀតវានឹងបណ្តាលឱ្យមានការខាតបង់កាន់តែច្រើន។

លោកស្រីចេវ សុឃុនបានពន្យល់ទៀតថា អ្នកដែលទិញសម្រាប់វិនិយោគបន្តគឺទិញមិនទុកយូនោះទេ យ៉ាងហោតណាស់ទុកក្នុងរយៈពេល២ ឬ៣ខែ ហើយលក់វិញទើបបានផលចំណេញ តែបើទិញហើយទុកក្នុងរយៈពេលយូរ នឹងធ្វើឱ្យខាតបង់កាន់តែច្រើនតាមរយៈការបង់ការប្រាក់ទៅធនាគារជាដើម។

លោកស្រីបានអំពាវនាវដល់អ្នកមានបំណងទិញអចលនទ្រព្យ សម្រាប់វិនិយោគបន្តទាំងអស់ទាមទាអោយមានការសិក្សា និងប្រមូលព័ត៌មានឱ្យបានច្បាស់លាស់ ជាពិសេសត្រូវសួរនាំទៅអ្នកជំនាញ និងក្រុមហ៊ុនដែលមានជំនាញជាដើម ពីតំបន់ដែលគ្រោងទិញនោះមានការអភិវឌ្ឍន៍ដែរឬទេ ទើបមិនផុងខ្លួន និងមិនខាតបង់ថវិកាទៅតាមការអូសទាញពីអ្នកលក់៕

មន្ត្រីជំនាញជំរុញឱ្យរដ្ឋាភិបាលដកអជ្ញាប័ណ្ណក្រុមហ៊ុនល្មើសច្បាប់ និងរកស៊ីគ្មានក្រមសីលធម៌ក្នុងវិស័យទេសចរណ៍

ដោយៈ រ៉ាណេត

ភ្នំពេញៈ ស្របពេលចំនួនភ្ញៀវទេសចរណ៍ធ្លាក់ចុះគួរឲ្យបារម្ភនៅខេត្តសៀមរាប មន្រ្តីជំនាញផ្នែកទេសចរណ៍និងពាណិជ្ជកម្មបានជំរុញឲ្យរដ្ឋាភិបាលដកអាជ្ញាប័ណ្ណចំពោះក្រុមហ៊ុនរកស៊ីមិនស្របច្បាប់ និងក្រមសីលធ៌មក្នុងវិស័យនេះ។

នៅក្នុងរបាយការណ៍ដែលចេញ ដោយក្រសួងទេសចរណ៍កាលពីពេលកន្លងទៅនេះបានបង្ហាញថា គិតត្រឹមរយៈពេល៧ខែ ដើមឆ្នាំ២០១៩ ចំនួនភ្ញៀវទេសចរដែលទៅកម្សាន្ត និងទស្សនានៅតំបន់រមណីយដ្ឋានសៀមរាប-អង្គរ មានការថយចុះរហូតជិតដល់១០ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំកន្លងទៅ ដែលជំរុញឱ្យរដ្ឋាភិបាលមានវិធានការ និងការរៀបចំផែនការថ្មីដើម្បីបង្កើនភាពទាក់ទាញ។

ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១ តុលាកន្លងមកដោយបានបង្ហាញពីក្ដីបារម្ភ និងភាពប្រឈមចំពោះមុខចំពោះ ដែលត្រូវតែមានការចូលរួមយ៉ាងសកម្មពីសំណាក់រដ្ឋាភិបាល ក្នុងការជួយកំណែទម្រង់ផ្ទៃក្នុងឱ្យបានស៊ីជម្រៅ ដើម្បីទប់ស្កាត់ការធ្លាក់ចុះ និងបង្កើនភាពទាក់ទាញត្រឡប់មកវិញ។

លោកស្រីបន្តថា “យើងនៅមានពេលគ្រប់គ្រាន់ក្នុងការកែលម្អរ និងបង្កើនភាពទាក់ទាញភ្ញៀវទេសចរឱ្យងាកមកកម្សាន្តនៅកម្ពុជា ប៉ុន្តែត្រូវតែមានការដាក់សំពាធទៅលើជនដែលប្រព្រឹត្តប្រាសចាកពីច្បាប់កំណត់ មិនថាចំពោះតែមន្ត្រីរដ្ឋាភិបាលដែលពាក់ព័ន្ធក្នុងវិស័យនេះ ក៏ដូចជាវិស័យឯកជន ដែលកំពុងអាស្រ័យផលក្នុងនាមជាភ្នាក់ងារ”។

លោកស្រីឆាយ ស៊ីវលីបបានបន្តទៀតថា បច្ចុប្បន្ននេះ ក្រុមហ៊ុនឯកជនដែលកំពុងប្រតិបត្តិការនៅក្នុងវិស័យទេសចរកម្ពុជា មានមិនតិចជាង៦០០ក្រុមហ៊ុននោះទេ ប៉ុន្តែក្នុងនោះចំណោមក្រុមហ៊ុនទាំងនោះ មានអ្នកអនុវត្តស្របតាមវិជ្ជាជីវៈ ហើយអ្នកខ្លះអនុវត្តខុសពីគោលការណ៍កំណត់ ដោយសារតែចង់បានចំណែកទីផ្សារ និងផលប្រយោជន៍ផ្ទាល់ខ្លួនពេក។

ប្រធានសមាគមទីភ្នាក់ងារទេសចរណ៍កម្ពុជារូបនេះបានបន្ថែមថា ពាក់ព័ន្ធទៅនឹងការធ្លាក់ចុះនៃចំនួនភ្ញៀវទេសចរណ៍ កាលពីពេលកន្លងទៅនេះ សមាគមនិងក្រសួងទេសចរណ៍បានចេញសេចក្ដីណែនាំរួចមកហើយ ពាក់ព័ន្ធទៅនឹងការព្រមានចំពោះក្រុមហ៊ុនភ្នាក់ងារទាំងឡាយណា ដែលប្រព្រឹត្តខុសពីគោលការណ៍នឹងត្រូវរងការពិន័យ។

លោកស្រីបន្តទៀតថា “យើងពិតជាមានភាពសោកស្តាយ ចំពោះការបាត់បង់វត្តមានរបស់បណ្តាភ្ញៀវទេសចរណ៍នានាដែលចង់មកកាន់កម្ពុជា។ ជាក់ស្ដែងដូចជាភ្ញៀវដែលមកតាមនាវាទេសចរណ៍ធំៗ ដែលចូលតាមច្រកកំពង់ផែព្រះសីហនុ គឺបានត្រឹមតែមើលពីចម្ងាយតែប៉ុណ្ណោះ ដោយហេតុថាពួកគេធ្លាប់ឮព័ត៌មានមិនល្អពីកម្ពុជា ដូចជាភាពអសុវត្ថិភាព ការបោកបញ្ឆោតភ្ញៀវទេសចរណ៍ ក៏ដូចជាភាពមិនស្មោះត្រង់ក្នុងការលក់ទំនិញក្លែងក្លាយជាដើម។

លោកស្រីបានបន្តទៀតថា “ក្រសួងទេសចរណ៍ គួរតែមានវិធានការតឹងរឹងចំពោះជនល្មើសក្រមសីលធម៌ ព្រមទាំងមានការចាត់ថ្នាក់នៃតម្លៃពាក់ព័ន្ធនានា នៅក្នុងតារាងឱ្យបានត្រឹមត្រូវ ដើម្បីបង្កភាពងាយស្រួលដល់បណ្តាក្រុមហ៊ុន ក៏ដូចជាបណ្តាភ្នាក់ងារក្នុងការទទួលចំណែកភ្ញៀវមក”។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ថា ការធ្លាក់ចុះនៃចំនួនភ្ញៀវទេសចរកាលពីពេលកន្លងទៅនេះ វាគឺជាសញ្ញាអវិជ្ជមានមួយដែលរដ្ឋាភិបាលត្រូវតែបង្កើនការយកចិត្តទុកដាក់ខ្ពស់ ដើម្បីស្ដារនិងលើកកម្ពស់វិស័យមួយនេះឡើងវិញ។

លោកបានបន្តទៀតថា “ទេសចរណ៍ គឺជាឧស្សាហកម្មមួយ ដែលជួយរកចំណូលដល់សេដ្ឋកិច្ចជាតិដោយផ្ទាល់ និងដោយប្រយោល ជាពិសេសអំណោយផលជាច្រើនដល់ប្រជាពលរដ្ឋដែលស្ថិតនៅក្នុងតំបន់កម្សាន្តនានាផងដែរ”។ លោកបន្តទៀតថា “ការធ្លាក់ចុះចំនួនភ្ញៀវទេសចរ គឺបណ្តាលមកពីកត្តាជាច្រើន ប៉ុន្តែអ្វីដែលសំខាន់បំផុតនោះគឺកត្តាមនុស្សដែលជាអ្នកផ្តល់សេវាកម្មតែម្ដង ដែលរួមមានទាំងវិស័យឯកជន និងមន្ត្រីពាក់ព័ន្ធចូលរួមជាប្រព័ន្ធជាមួយគ្នា”។

លោកបានលើកឡើងថា “ជាដំណោះស្រាយ ក្រៅមានផែនការរៀបចំព្រឹត្តិការណ៍កម្សាន្តធំៗ ការរៀបចំទីក្រុងថ្មី និងវិថីអាហារប្រចាំតំបន់នានាទូទាំងប្រទេស រដ្ឋាភិបាលក៏គួរតែមានការកែទម្រង់ផ្ទៃក្នុងស៊ីជម្រៅ ដោយត្រូវតែកំណត់ឱ្យមានការគោរពទៅតាមច្បាប់ ទាំងបណ្តាមន្ត្រីពាក់ព័ន្ធ ក៏ដូចចាវិស័យឯកជន។

លោកថា “ក្រៅពីនេះក្រសួងទេសចរណ៍ ក៏ត្រូវតែបង្កើនការផ្សព្វផ្សាយពីសក្ដានុពលរបស់កម្ពុជា ទៅកាន់បណ្តាប្រទេសនានាទូទាំងសាកលលោក ឱ្យមានទូលំទូលាយផងដែរ”។ បញ្ហាប្រឈមធំមួយទៀត គឺហាងលក់វត្ថុអនុស្សាវរីយ៍នៅខេត្តសៀមរាប សុទ្ឋតែលក់ផលិតផលក្លែងក្លាយ ដែលបញ្ហានវគួរតែក្រសួងទេសចរណ៍ដោះស្រាយ និងដាក់ចេញវិធានការណ៍បន្ទាន់។ បញ្ហាផ្លូវថ្នល់គ្រហុក បញ្ហាអនាម័យ បញ្ហាមគ្គុទេសក៍ទេសចរណ៍យកភ្ញៀវទៅលក់ ដើម្បីបានកម្រៃជើងសារ និងបញ្ហាជាច្រើនទៀតបានកើតឡើង គឺប្រៀបដូចជាដង្កូវចេញពីសាច់ឯង មានន័យថា “អ្នករកស៊ីក្នុងវិស័យនេះ កំពុងសម្លាប់វិស័យនេះដោយខ្លួនឯង”។

ស្តាប់មគ្គុទេសក៍ទេសចរណ៍និយាយពីបញ្ហាពិត៖

1.វីសារមិនបានលើកលែងឲ្យអ្នកទេសចរមកពីប្រទេសអ្នកមាន អ្នកទេសចរខ្លះមកពីលោកខាងលិចបានសួរថាហេតុអ្វីបានជានៅកម្ពុជា រដ្ឋយកវីសារពីអ្នកទេសចរ? វាអាចធ្វើឲ្យចំនួនអ្នកទេសចរកើនឡើងយឺតបំផុត។

នៅប្រទេសថៃគេមានភ្ញៀវច្រើនណាស់ប្រមាណជាជាង 30នាក់ បន្ទាប់ពីគេទស្សនាប្រទេសថៃគេត្រលប់មកទស្សនប្រទេសនេះជាច្រើនដងទៀត ដោយគេសប្បាយចិត្តពីព្រោះថៃមិនបានថ្លៃវីសារពីទេសចរ។

2.អាជ្ញាធម៌អន្តោប្រវេសន៍នៅព្រលានយន្តហោះ និងព្រុំដែន តែងតែរកលេះសួរនេះសួរនោះដើម្បីប្រព្រឹត្តពុករលួយធ្វើឲ្យមានការយឿតយ៉ាវដល់ភ្ញៀវទេសចរ នាំឲ្យគេមានអារម្មណ៍មិនសប្បាយចិត្ត។ ភ្ញៀវខ្លះបានសរសេរមកប្រាប់ខ្ញុំពីរឿងនេះនៅច្រកប៉ោយប៉ែត។

3.បើកឲ្យបេនឡានសួជីង+1ទៀតរកស៊ីមិនត្រឹមត្រូវ បង្ខំភ្ញៀវឲ្យទិញសំបុត្រពីក្រុមហ៊ុនខ្លួនដើម្បីអាចធ្វើដំណើរតាមគោលដៅបាន។ បើចង់មកសៀមរាបឬ ក៏កន្លែងផ្សេងទៀតភ្ញៀវត្រូវតែទិញសំបុត្រពីក្រុមហ៊ុនទាំង2ខាងលើ មិនដឹងថាលោកណា1អនុញ្ញាតទេ ភ្ញៀវដែលធ្លាប់បានឆ្លងកាត់កន្លែងនេះគេមិនយល់សោះពីរបៀបរកស៊ីនេះ។

4.ក្រុមហ៊ុនឡាន1ចំនួនបានបង្ខំឲ្យភ្ញៀវបង់លុយបន្ថែមដើម្បីមកដល់គោលដៅសៀមរាបឬ ផ្សេងទៀត ពេលភ្ញៀវចូលដល់ក្នុងឡាន។ បើមិនបង់បន្ថែមទេ គេទំលាក់ភ្ញៀវតាមដងផ្លូវនៅឆ្ងាយពីគោលដៅ។

តាក់ស៊ីខ្លះក៏ធើស៊ីភ្ញៀវដែរដោយបង្ខំភ្ញៀវទៅដេកតាមសណ្ឋាគារដែលខ្លួនស្គាល់ដើម្បីបានទឹកតែ តែភ្ញៀវមិនព្រម ធ្វើឲ្យមានរឿងរ៉ាវខឹងប្តឹងផ្តល់គ្នាយ៉ាងច្រើន។ តាមពិតភ្ញៀវគេបានកក់សណ្ឋាគាររួចរាល់ហើយ មុនគេឈានជើងចូលមកដល់កម្ពុជា តែតៃកុងតាក់ស៊ីប្រាប់ថាមិនស្គាល់ ឬគេបឹទសណ្ឋាគារនិងហើយ។

5.សូវេនៀរ (Sovenir) ក្លែងក្លាយមានលក់រាប់សិបឆ្នាំនៅក្នុងតំបន់ តែគេនៅតែបើកបានរហូតដល់សព្វថ្ងៃ។ បើមានភ្ញៀវប្តឹងគេអាចដូរឈ្មោះផ្សេងដើម្បីបន្តលក់ទៀត ហើយគ្មានការចាត់វិធានការពីអជ្ញាធម៌ឡើយ។

6.នៅក្នុងតំបន់ Pub street (ផាប់ស្ត្រីត) មានរឿងក៏ច្រើនដែរ ដូចជាមានបរទេសបោកបរទេស បន្លំខ្លួនជាខ្មែរ ហើយបង្ខំឲ្យលេងបៀរ ឬ ក៏ល្បែង ផ្សេងៗ ហើយក៏ចាញ់អស់លុយ រួចក៏ប្តឹងផ្តល់គ្នា ហើយសមត្ថកិច្ចក៏មិនសូវខ្វល់រកហេតុផលប៉ុន្មានទេ។

មានតៃកុង tuktuk ខ្លះពេលភ្ញៀវស្រវឹងស្រាឬ ក៏ភ្លេចខ្លួនក៏មានឱកាសលួចរបស់របភ្ញៀវ ធ្វើឲ្យគេប្រាប់ តៗ គ្នាថាមានចោរកម្មក្នុងក្រុងសៀមាប។

7.guide & driver យកក្បាលឡាន និង បង្ខំភ្ញៀវឲ្យទិញអីវ៉ាន់ វារឿងដែលយើងត្រូវតែខ្វល់។ បើតៃកុងខ្លះអត់ខ្វល់ចង់រកតែក្បាលឡានពីហាង ចឹងត្រូវបង្ខំភ្ញៀវឲ្យចូលហាង។8.យើងមិនបានផ្សព្វផ្សាយពីទេសចរណ៍តាមមេឌៀរ ធំៗ អំពី ប្រាសាទ Pyramid & ប្រាសាទបុរាណ temples ខ្មែរយើងឲ្យបានទូលំទូលាយ ដូចជា CNN BBC និង បណ្តាញផ្សេងៗ ទៀត។

យើងក៏ត្រូវមានក្រុមហ៊ុនខ្មែរទៅចុះផ្សព្វផ្សាយនៅបរទេសដល់គោលដៅឲ្យគេស្គាល់តំបន់ទេសចរណ៍ក្នុងប្រទេសឲ្យបានច្រើនទើបល្អ។

9.ស្ថានទូតនៅគ្រប់ប្រទេសមិនបានជួយផ្សាយបន្ថែមទេពីវិស័យទេសចរក្នុងប្រទេស។ ភ្ញៀវខ្លះបានប្រាប់ថា បើសរសេរទៅស្ឋានទូតខ្មែរគេអត់ឆ្លើយតបទៅភ្ញៀវទាន់ពេលទេ គេឆ្លើយតបយឺតបំផុត។

10.បញ្ឈប់ឲ្យមាន guide នៅទន្លេសាបចុងឃ្នៀស និង ការបញ្ឈប់ការលក់អង្កររបស់ guide សួជីង។ពូកនេះក៏បំផ្លាញមុខមាត់ទេសចរណ៍ខ្លាំងើស់។

11.ការបើកប្រាសាទឲ្យភ្ញៀវទេសចរចូលទស្សនាយឿតយួរ ក៏ជារឿងធ្វើឲ្យភ្ញៀវគេមិនសប្បាយចិត្តដែរ គឺគេចង់បានតំបន់មួយវាមានលក្ខណៈពិសេស ឬ unique ជាងគេនៅក្នុងលោក។ ឥឡូវគេបើកប្រាសាទរហូតដល់ម៉ោង7កន្លះលើកលេងតែអង្គរវត្ត ប្រែរូប និង ភ្នំបាខែង ដែលយើងអាចមើលថ្ងៃរះបាន៕

ក្រុងហុងកុងស្ថិតក្រោមការគំរាមកំហែងនៅពេលដែលកងទ័ពចិនប្រមូលផ្តុំគ្នានៅឯព្រំដែន

ដោយ Donald Lee

ហុងកុង៖ ទីក្រុងប៉េកាំងបាននឹងកំពុងរៀបចំ ពិធីអបអរសាទរពិធីប្រារព្ធខួបលើកទី ៧០ ដ៏ធំនៃការបង្កើតសាធារណរដ្ឋប្រជាមានិតចិន ខណៈក្រុមបាតុករគាំទ្រលទ្ធិប្រជាធិបតេយ្យហុងកុង បានរៀបចំការប្រមូលផ្តុំគ្នានៅទូទាំងទីក្រុង និងបានប៉ះទង្គិចជាមួយប៉ូលីសពេញមួយថ្ងៃនៅថ្ងៃអង្គារនេះ។

ការប្រយុទ្ធគ្នានៅតាមដងផ្លូវ បានកើនឡើងរវាងក្រុមអ្នកតវ៉ា និងប៉ូលីសនៅក្នុងតំបន់ Wong Tai Sin ក្នុងសង្កាត់ Kowloon និងតំបន់ New Town Plaza ក្នុងសង្កាត់ Shatin ក្នុងគោលបំណងបំផ្លាញការប្រារព្ធខួបលើកទី៧០ នៃការបង្កើតសាធារណរដ្ឋប្រជាមានិតចិន។

ក្រុមប៉ូលីសបានបាញ់ឧស្ម័នបង្ហូរទឹកភ្នែក ទៅលើក្រុមអ្នកតវ៉ា ដែលបានរុះរើរបាំងដែលដាក់ដោយអាជ្ញាធរហុងកុង ដើម្បីរេរាំងក្រុមបាតុករ។ ចំណែកប្រព័ន្ធផ្សព្វផ្សាយហុងកុងបានរាយការណ៍ថា អាវយឺតខ្មៅរាប់ម៉ឺនត្រូវបានពាក់ ដោយក្រុមបាតុករដើរក្បួនពីតំបន់ Causeway Bay ឆ្ពោះទៅកាន់ Central។

សារព័ត៌មានរ៉យទ័របានរាយការណ៍ថា ទីក្រុងប៉េកាំងបានបង្កើនចំនួនទាហាននៅតាមព្រំដែនហុងកុងពី៣.០០០ ទៅ៥,០០០ រហូតដល់១០,០០០ – ១២,០០០នាក់ ខណៈនៅថ្ងៃអង្គារនេះ គឺជាការចាប់ផ្តើមនៃការប្រារព្ធខួបលើកទី៧០ នៃការបង្កើតសាធារណរដ្ឋប្រជាមានិតចិន៕

ការសិក្សា៖ តម្លៃនៃការចំណាយសម្រាប់ការរស់នៅក្នុងប្រទេសកម្ពុជាថ្លៃជាងប្រទេសវៀតណាម

ដោយ Donald Lee

ភ្នំពេញៈ ការស្ទង់មតិថ្មីមួយបានបង្ហាញថា តម្លៃលើការចំណាយផ្សេងសម្រាប់រស់នៅក្នុងប្រទេសកម្ពុជា មានតម្លៃថ្លៃជាងប្រទេសវៀតណាមនៅឆ្នាំ២០១៩នេះ។

យោងតាមសន្ទស្សន៍ Numbeo Cost of Living Index 2019 បានចាត់ចំណាត់ថ្នាក់ប្រទេសកម្ពុជា ដែលជាប្រទេសនៅក្នុងតំបន់អាស៊ីអាគ្នេយ៍ មានតម្លៃថ្លៃជាងគេពោលស្ថិតនៅក្នុងតារាងទី៤ បន្ទាប់ពីប្រទេសសិង្ហបុរី ប្រទេសថៃ និងប្រទេសមីយ៉ាន់ម៉ា។

ការស្ទង់មតិនេះ បានចងក្រងទិន្នន័យផ្អែកលើតម្លៃនៃការជួល ឧបករណ៍ប្រើប្រាស់ ម្ហូបអាហារ និងការដឹកជញ្ជូន ដោយក្នុងនោះការចំណាយលើការរស់នៅរបស់ប្រទេសកម្ពុជាមានតម្លៃថ្លៃជាងប្រទេសវៀតណាម ប្រទេសម៉ាឡេស៊ី ប្រទេសហ្វីលីពីន និងប្រទេសឥណ្ឌូនេស៊ី។

ការស្ទង់មតិបានលើកឡើងថា“ការចំណាយថ្លៃដើម នៃការរស់នៅក្នុងប្រទេសវៀតណាម គឺទាបជាងនៅកម្ពុជាប្រមាណ១៩,៧០ ភាគរយ ។ តម្លៃនៃការជួលនៅក្នុងប្រទេវៀតណាមគឺទាបជាងនៅកម្ពុជា ៨,៩៧ ភាគរយ”។

ការស្ទង់មតិនេះបានរកឃើញថាតម្លៃម្ហូបអាហារ និងថ្លៃជួលនៅទូទាំងប្រទេសកម្ពុជាមានតម្លៃថ្លៃខ្ពស់ជាងប្រទេសវៀតណាម។

ការស្ទង់មតិបានលើកឡើងថា “អំណាចទិញក្នុងស្រុកនៅទីក្រុងហូជីមិញ គឺខ្ពស់ជាងទីក្រុងភ្នំពេញ៧៩,៤៨ ភាគរយ។ តម្លៃទំនិញប្រើប្រាស់នៅទីក្រុងហូជីមិញ គឺទាបជាងទីក្រុងភ្នំពេញ១៧.៩៣ភាគរយ។

ប្រទេសកម្ពុជា ត្រូវបានជាប់ចំណាត់ថ្នាក់ជាប្រទេស ដែលថ្លៃជាងគេបំផុតលំដាប់ទី ៦៥ ក្នុងការរស់នៅក្នុងពិភពលោក។ សម្រាប់ប្រទេសវៀតណាមជាប់ចំណាត់ថ្នាក់ទី៩៥ ៕

មន្ត្រីជាន់ខ្ពស់ IMF កោតសសើរពីការរីកចំរើនសេដ្ឋកិច្ចកម្ពុជា

ដោយ វុត្ថា

ភ្នំពេញ៖ មន្ត្រីជាន់ខ្ពស់មូលនិធិរូបិយវត្ថុអន្តរជាតិ (IMF) បានកោតសសើរចំពោះការរីករីកចំរើនសេដ្ឋកិច្ចរបស់កម្ពុជា និងចំណូលជាតិរឹងមុំាខណៈចុះចុះបំពេញបេសកកម្ម សម្រាប់រយៈពេល២សប្តាហ៍នៅកម្ពុជា ដើម្បីសិក្សា និងវាយតម្លៃក្របខ័ណ្ឌម៉ាក្រូសេដ្ឋកិច្ចកម្ពុជា ។

លោក Jarkko Turunen ក្រុមការងារបេសកកម្ម Article IV របស់មូលនិធិរូបិយវត្ថុអន្តរជាតិ (IMF) បានឱ្យដឹងយ៉ាងដូច្នេះ នៅក្នុងជំនួបពិភាក្សាការងារជាមួយលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ៣០ ខែកញ្ញា ម្សិលមិញនេះ បានឱ្យដឹងថា បេសកកម្ម របស់ក្រុមការងារ Article IV មានគោលបំណង៖

១) វាយតម្លៃអំពីស្ថានភាពសេដ្ឋកិច្ចសកល តំបន់ និងនយោបាយភូមិសាស្រ្ត មកលើក្របខ័ណ្ឌម៉ាក្រូសេដ្ឋកិច្ចកម្ពុជា

២) វាយតម្លៃ និងផ្តល់អនុសាសន៍គន្លឹះ សម្រាប់ពិចារណាលើវិធានការ គោលនយោបាយជាយុទ្ធសាស្រ្ត និងអាទិភាព ដែលរាជរដ្ឋាភិបាលកម្ពុជា បានកំពុងអនុវត្ត និងត្រៀមនឹងដាក់ចេញសម្រាប់ជំហ៊ានបន្ទាប់

៣) ការប៉ាន់ស្មានតម្រូវការ និងប្រភពហិរញ្ញប្បទាន ក្នុងការគាំទ្រក្របខ័ណ្ឌគោលដៅអភិវឌ្ឍន៍ ប្រកបដោយចីរភាព របស់កម្ពុជា (CSDGs) និង

៤) យុទ្ធសាស្រ្តអភិវឌ្ឍន៍សមត្ថភាពមន្រ្តីជំនាញកម្ពុជា ដែលរួមមាន ជំនាញវិភាគ និងស្តង់ដារគ្រប់គ្រងនិងផ្សព្វផ្សាយ ទិន្នន័យ ។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី បានថ្លែងអំណរគុណ និងវាយតម្លៃខ្ពស់ចំពោះ មូលនិធិរូបិយវត្ថុអន្តរជាតិ ដែលជានិច្ចកាលតែងតែពង្រឹងកិច្ចសហប្រតិបត្តិការយ៉ាងជិតស្និទ្ធ ក្នុងការចូលរួម យ៉ាងសកម្ម ក្នុងការអភិវឌ្ឍប្រទេសកម្ពុជា បន្តរួមចំណែករក្សានូវស្ថិរភាពម៉ាក្រូសេដ្ឋកិច្ច និងលើកកម្ពស់សមត្ថភាពស្ថាប័ន និងមន្រ្តីជំនាញរបស់កម្ពុជា លើការវាយតម្លៃហានិភ័យក្នុងនិងក្រៅ និងប្រែក្លាយបញ្ហាប្រឈម និងភាពមិនប្រាកដប្រជាទាំងឡាយ ឲ្យទៅជាកាលានុវត្តភាពសម្រាប់កម្ពុជា តាមរយៈការដាក់ចេញនូវវិធានការកែទម្រង់ជាយុទ្ធសាស្រ្ត និងជាកញ្ចប់ ក្នុងរយៈពេលខ្លី មធ្យម និងវែង ប្រកប ដោយភាពបុរេសកម្ម, ភាពប្រទាក់ក្រឡា និងភាពគ្រប់ជ្រុងជ្រោយ។

លោក Jarkko Turunen ប្រធានបេសកកម្ម បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលកំណើនសេដ្ឋកិច្ចខ្ពស់ និងចំណូលជាតិប្រកបដោយភាពរឹងមាំនិងផ្លែផ្កា។

លោកក៏បានថ្លែងអំណរគុណ ដល់ក្រសួងសេដ្ឋកិច្ច និងហិរញ្ញវត្ថុ ដែលបន្តរៀបចំផ្តល់កិច្ចសហការយ៉ាងសកម្ម សម្រាប់ក្រុមការងារបេសកកម្ម Article IV ក្នុងការវាយតម្លៃក្របខ័ណ្ឌម៉ាក្រូសេដ្ឋកិច្ចកម្ពុជា និងពិភាក្សាដោយផ្ទាល់ ជាមួយអគ្គនាយកដ្ឋាន / ស្ថាប័នពាក់ព័ន្ធ ក្នុងឱកាសបំពេញការងារបេសកកម្មនេះ។

លោកអគ្គបណ្ឌិតសភាចារ្យ ក៏បានគូសបញ្ជាក់ផងដែរថា ក្របខ័ណ្ឌប៉ាន់ស្មានតម្រូវការ និងប្រភពហិរញ្ញប្បទាន ក្នុងការគាំទ្រគោលដៅអភិវឌ្ឍន៍ប្រកបដោយចីរភាពរបស់កម្ពុជា គួរត្រូវគិតគូរ និងផ្សារភ្ជាប់ជាមួយ ក្របខ័ណ្ឌយុទ្ធសាស្រ្ត ថវិកា, ផែនការយុទ្ធសាស្រ្ត និងប្រព័ន្ធគ្រប់គ្រងហិរញ្ញវត្ថុរយៈពេលមធ្យម ដែលបានអនុម័តរួច។

ទន្ទឹមនេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី បានថ្លែងសេចក្តីសោមនស្សរីករាយ ចំពោះក្រុមការងារបេសកកម្ម Article IV របស់មូលនិធិរូបិយវត្ថុអន្តរជាតិ (IMF) ដែលតែងតែលើកកម្ពស់ ភាពជាដៃគូ និងភាពជាម្ចាស់ការ, ផ្តល់ការគាំទ្រ និងផ្តល់អនុសាសន៍ពិតប្រាកដតាមរយៈការចុះសង្កេត និងធ្វើការវាយតម្លៃក្របខ័ណ្ឌម៉ាក្រូសេដ្ឋកិច្ចកម្ពុជាដោយផ្ទាល់ ចូលរួមចំណែកតម្រង់ និងតម្រឹមគោលនយោបាយ អភិវឌ្ឍន៍វិស័យសេដ្ឋកិច្ច, សង្គម, សារពើពន្ធ និងហិរញ្ញវត្ថុរបស់រាជរដ្ឋាភិបាលកម្ពុជា ប្រកបដោយប្រសិទ្ធភាព ចីរភាព និងបរិយាប័ន្ន។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី បានជូនពរលោក Jarkko Turunen ព្រមទាំងសហការី ឲ្យទទួលបាននូវភាពជោគជ័យ ក្នុងឱកាសបំពេញការងារបេសកកម្មរបស់ខ្លួននៅកម្ពុជា និងសង្ឃឹមយ៉ាងមុតមាំថា ក្រុម ការងារនឹងផ្តល់អនុសាសន៍គន្លឹះបន្ថែម សម្រាប់ចូលរួមការអភិវឌ្ឍកម្ពុជា៕

ស្ថានភាពទីផ្សារអចលនទ្រព្យនៅខេត្តសៀមរាបកំពុងស្រអាប់ នៅពេលចំនួនភ្ញៀវទេសចរដាំក្បាលចុះ

ដោយៈ រ៉ាណេត

សៀមរាបៈ ភាពថមថយនៃចំនួនភ្ញៀវទេសចរនៅខេត្តសៀមរាប បាននិងកំពុងជះឥទ្ឋពលដល់ទីផ្សារអចលនទ្រព្យនៅក្នុងខេត្តទេសចរណ៍មួយនេះ ខណៈការសាងសង់ ព្រលានយន្តហោះថ្មីដំណើរការយឺតៗជាងការគ្រោងទុក។

នាយកក្រុមហ៊ុនអចលនទ្រព្យ Gold Property Service លោក ចៅ សេងថៃ ដែលកំពុងតែប្រតិបត្តិការយ៉ាងសកម្មភាព នៅក្នុងខេត្តសៀមរាបបានមានប្រសាសន៍តាមទូរស័ព្ទកាលពីព្រឹកថ្ងៃទី១ខែតុលា ឆ្នាំ២០១៩នេះថា ផ្អែកតាមទិដ្ឋភាពជាក់ស្ដែងនាពេលបច្ចុប្បន្ននេះ ឥទ្ធិពលនៃការធ្លាក់ចុះចំនួនភ្ញៀវទេសចរ ពិតជាបានប៉ះពាល់ដល់វិស័យអចលនទ្រព្យមែន ប៉ុន្តែមិនមានទំហំធំធេងពេកនោះទេ។

លោកបានបន្តទៀតថា “ខ្ញុំទទួលស្គាល់ថាពិតជាមានផលប៉ះពាល់មែន ប៉ុន្តែវាគ្រាន់តែជាចំណែកមួយតូចតែប៉ុណ្ណោះ ជាពិសេសប៉ះពាល់ទៅទៅលើវិស័យសណ្ឋាគារ ផ្ទះសំណាក់ និងអាហារដ្ឋានមួយចំនួន”។

លោកចៅ សេងថៃបានបន្តទៀតថា សៀមរាប គឺជាខេត្តដែលផ្តោតសំខាន់ទៅលើវិស័យទេសចរណ៍ ដែលមិនមែនសម្រាប់វិស័យឧស្សាហកម្ម ឬពាណិជ្ជកម្មចំរុះ ដូចជានៅតាមបណ្តាខេត្តផ្សេងៗនោះទេ។ ដោយឡែកបើនិយាយពីស្ថានភាពជាក់ស្ដែង នៃសកម្មភាពទីផ្សារអចលនទ្រព្យ និងការអភិវឌ្ឍ គឺនៅតែបន្តភាពល្អប្រសើរមិនខុសពីឆ្នាំកន្លងទៅនោះទេ”។

លោកបានបញ្ជាក់ថា “បច្ចុប្បន្ននេះ ក្រៅពីសកម្មភាពនៃការទិញ-លក់ ដីធ្លី សម្រាប់សកម្មភាពសាងសង់សំណង់លំនៅដ្ឋាន នៅតាមតំបន់ជាយក្រុងសៀមរាប និងស្រុកមួយចំនួន ដូចជាស្រុកសូទ្រនិគម និងស្រុកប្រាសាទបាគង គឺមានមិនក្រោម២០គម្រោងនោះទេ”។លោកបន្តថា “ដូច្នេះខ្ញុំគិតថា វិស័យអចលនទ្រព្យនៅក្នុងខេត្តមួយនេះហាក់មិនទទួលរងនូវផលប៉ះពាល់ធ្ងន់ធ្ងរនោះទេ”។

ផ្ទុយពីការលើកឡើងខាងលើនេះ លោកសាស្ត្រាចារ្យទួស សាភឿន ដែលជាអ្នកអភិវឌ្ឍវិស័យលំនៅដ្ឋាន និងវិស័យសណ្ឋាគារបានលើកឡើងថា ពេលនេះសម្រាប់ទីផ្សារអចលនទ្រព្យនៅក្នុងខេត្តសៀមរាប បាននិងកំពុងតែជួបបញ្ហា។ រាល់ហេដ្ឋារចនាសម្ព័ន្ធនានាដែលជាផ្នែកមួយនៅក្នុងវិស័យអចលនទ្រព្យ សុទ្ធតែត្រូវបានធ្វើឡើងដើម្បីឆ្លើយតបទៅនឹងតម្រូវការនៃកំណើនទេសចរនៅក្នុងខេត្តទាំងស្រុង។

លោកថា “នៅពេលមានកំណើនភ្ញៀវទេសចរ គឺមានតម្រូវការស្នាក់នៅខ្ពស់។ នៅពេលមានតម្រូវការខ្ពស់ គឺមានការអភិវឌ្ឍសំណង់បន្ថែម។ នៅពេលមានការសាងសង់បន្ថែម ចាំបាច់ត្រូវមានការទិញ-លក់ដីធ្លី ដែលកាន់តែជំរុញឱ្យតម្លៃមានដង្ហើម។ ប៉ុន្តែបើកំណើនភ្ញៀវទេសចរធ្លាក់ចុះ ការអភិវឌ្ឍក៏ត្រូវតែធ្លាក់ចុះដូចគ្នា”។

លោកទួស សាភឿនបានបញ្ជាក់ថា ក្រសួងទេសចរណ៍បានធ្វើការព្យាករណ៍ពីការរំពឹងទទួលបានកំណើនភ្ញៀវទេសចរជាលំដាប់ រួមជាមួយនឹងគម្រោងកសាង និងអភិវឌ្ឍហេដ្ឋារចនាសម្ព័ន្ធនានា រួមមានផ្លូវថ្នល់ និងតំបន់កម្សាន្តមួយចំនួនទៀតជាដើម។ ប៉ុន្តែជាក់ស្ដែង មានតែគម្រោងមិនមានការអនុវត្តនោះទេ។

លោកបានបញ្ជាក់ថា “ជាខេត្តមានសក្តានុពលលើទេសចរណ៍ ចាំបាច់គឺពឹងផ្អែកលើវិស័យទេសចរណ៍ ក្នុងការបង្កើនកំណើនសេដ្ឋកិច្ចក្នុងតំបន់។ ចុះបើភ្ញៀវទេសចរធ្លាក់ចុះ តើអាចទទួលបានចំណូលមកពីប្រភពណា”។ លោកបានលើកឡើងពីភាពជាក់ស្ដែងថា “រាល់ឆ្នាំចាប់ពីអំឡុងខែកញ្ញា រហូតដល់ចុងខែធ្នូ សណ្ឋាគាររបស់ខ្ញុំមានការទទួលកក់បន្ទប់ពេញទាំងអស់ ប៉ុន្តែសព្វថ្ងៃនេះក្នុងមួយយប់សណ្ឋាគាររបស់ខ្ញុំ មានភ្ញៀវចូលស្នាក់ត្រឹម៣-៥ បន្ទប់តែប៉ុណ្ណោះ ហើយសណ្ឋាគារខ្លះទៀត ស្ទើរតែគ្មានអ្នកចូលស្នាក់នៅក៏មានដែរ”។

ជាមួយនឹងការធ្លាក់ចុះនៃចំនួនភ្ញៀវទេសចរណ៍ ដែលបណ្តាលប៉ះពាល់ដល់វិស័យអចលនទ្រព្យនាពេលនេះ លោកបានទទូចឱ្យរដ្ឋាភិបាលបង្កើន ការយកចិត្តទុកដាក់លើវិស័យមួយនេះឱ្យកាន់តែខ្លាំង ដើម្បីបញ្ចៀសហានិភ័យផ្សេងៗ ដែលអាចនឹងកើតមានជាបន្តបន្ទាប់ទៀត៕

តំបន់ស្ថិតនៅតាមបណ្តោយផ្លូវជាតិលេខ៥១ និង៤១ មានសន្ទុះរីកចំរើនខ្លាំង

ដោយ វុត្ថា

ភ្នំពេញៈ អចលចនទ្រព្យនៅតាមបណ្តោយផ្លូវជាតិលេខ៥១ និងផ្លូវជាតិលេខ៤១ ស្ថិតនៅក្នុងខេត្តកំពង់ស្ពឺ នៃភាគខាងលិចទីក្រុងភ្នំពេញ មានសន្ទុះរីកចំរើនយ៉ាងខ្លាំងក្នុងរយៈពេលប៉ុន្មានឆ្នាំកន្លងមកនេះ ដោយសារកំណើនរោងចក្រសហគ្រាស ឃ្លាំង និងប្រជាពលរដ្ឋទៅសម្រុកទៅរស់នៅទីនោះ ព្រមទាំងហេដ្ឋារចនាសម្ព័ន្ធល្អប្រសើរ។

លោកចក់ ស៊ីណាន អនុប្រធានសមាគមអ្នកជំនាញអចលនទ្រព្យកម្ពុជាបានឱ្យដឹងតាមទូរស័ព្ទនៅថ្ងៃទី១ ខែតុលា ឆ្នាំ ២០១៩ នេះ ថា អចលនទ្រព្យតាមបណ្តោយផ្លូវជាតិលេខ៥១ និង៤១នេះ មានសក្តានុពលដូចគ្នាតែផ្លូវជាតិលេខ៥១ មានសន្ទុះខ្លំាងជាង មានតម្លៃថ្លៃជាង ដោយសារតែមានរោងចក្រឧស្សាហកម្មច្រើន មានប្រជាជនរស់នៅច្រើន និងជាផ្លូវសេដ្ឋកិច្ចចន្លោះផ្លូវជាតិលេខ៤ និងលេខ៥។

សម្រាប់ផ្លូវជាតិ៤១ វិញ ចេញពីផ្លូវជាតិលេខ៤ ទៅកាន់ខេត្តកំពតគឺមានប្រវែងវែងដែលធ្វើឱ្យតម្លៃដីនៅចន្លោះ ដែមានផ្សារមានតម្លៃខ្ពស់ ហើយបន្ទាប់ពីនោះមានតម្លៃទាប ឬទៅតាមប្រភេទឬទំហំនៃដីធ្លី ហើយបើចេញពីផ្លូវជាតិលេខ៤ ប្រមាណ៥ ទៅ១០មានតម្លៃ ចាប់ពី១០០ ទៅ២០០ ដុល្លារក្នុងមួយម៉ែត្រការ៉េ ហើយចេញកាន់តែឆ្ងាយមានតម្លៃចាប់ពី៨០ ទៅ១៥០ ដុល្លារក្នុងរមួយម៉ែត្រការ៉េទៅតាមប្រភេទដី។

លោកស៊ីណាតបានបញ្ជាក់ទៀតថា សម្រាប់ដីធ្លីនៅតាមបណ្តោផ្លូវជាតិលេខ៥១ មានតម្លៃចមានតម្លៃទៅតាមប្រភេទ និងទំហំដីតែបើទំហំដីមានចាប់ពី ១០០០ការ៉េឡើងមានតម្លៃចន្លោះពី ៨០ដុល្លារ ទៅ ១២០ដុល្លារក្នុងមួយម៉ែត្រការ៉េ ពោលអាចនិយាយបានតម្លៃដីនៅតំបន់នេះ មានតម្លៃកើនឡើងស្ទើតែ១០០ភាគរយ ចាប់តាំងពីឆ្នាំ២០១៨កន្លងមកនេះ។

លោក ហ៊ត ដុល្លារ អ្នករកស៊ីពុះដីឡូតិ៍លក់នៅតាមផ្លូវជាតិលេខ៥១ បានឱ្យដឹងដែរថា អចលនទ្រព្យនៅតាមបណ្តោយទាំងពីរនេះ នៅតែមានសន្ទុះរីកចម្រើនខ្លាំង និងមានសក្តានុពលខ្ពស់ ដោយសារនៅតាមបណ្តោយផ្លូវនេះ គោរពបាននូវគោលការអភិវឌ្ឍន៍របស់រាជរដ្ឋាភិបាល ដោយបានជំរុញរោងចក្រសហគ្រាសធំៗជាច្រើន មកបោះទីតំាងនៅតាមបណ្តោយផ្លូវទាំងនេះ។

លោកបន្តថា “ក្រុមអ្នកវិនិយោគបរទេសជាច្រើន បាននឹងកំពុងសាងសង់រោងចក្រសហគ្រាសគ្រប់ប្រភេទ ហើយការអភិវឌ្ឍន៍ហេដ្ឋារចនាសម្ព័ន្ធល្អ”។ លោកបន្តថា “សំរាប់ផ្លូវជាតិលេខ ៤១ វិញជាផ្លូវសេដ្ឋកិច្ចដ៏សំខាន់ផងដែរ សម្រាប់ដឹកជញ្ជូនទំនិញផ្សេងៗ ទៅកាន់កំពង់ផែខេត្តកំពតជាដើម ដែលធ្វើឱ្យទីផ្សារអចលនទ្រព្យកាន់តែមានសន្ទុះ និងមានសក្តានុពល់ខ្ពស់”។

រដ្ឋបាលរាជធានីភ្នំពេញកាលពីដើមឆ្នាំនេះ បានជំរុញឲ្យរោងចក្រ សហគ្រាសនានាចាកចេញពីទីក្រុងភ្នំពេញ ឆ្ពោះទៅតំបន់ជាយក្រុងដើម្បីរៀបចំសណ្តាប់់ធ្នាប់ និងតំបន់ឧស្សាហកម្មថ្មី ដែលមិនស្ថិតនៅក្នុងរាជធានីភ្នំពេញ៕

បុរី ប៉េង ហួត នៅបន្តការបញ្ចុះតម្លៃដ៏សម្បើមរហូតដល់ ១០ម៉ឺនដុល្លារ លើ១០គម្រោងព្រមគ្នា

ដោយ រតនៈ

ភ្នំពេញៈ ដោយមានការគាំទ្រយ៉ាងខ្លាំងក្លា និងដើម្បីឆ្លើយតបតាមសំណើររបស់អតិថិជន បុរីប៉េង ហួត នៅបន្តធ្វើការផ្តល់ជូនការបញ្ចុះតម្លៃដ៏សម្បើម រហូតដល់១០ម៉ឺនដុល្លារ លើ១០គម្រោងព្រមគ្នា រហូតដល់ថ្ងៃទី១៩ ខែ តុលា នេះតែប៉ុណ្ណោះ។

ជាមួយនឹងបទពិសោធន៍ជិត15ឆ្នាំ ក្នុងនាមក្រុមហ៊ុនអភិវឌ្ឍអចលនទ្រព្យឈានមុខគេមួយ ក្នុងប្រទេសកម្ពុជា បុរី ប៉េង ហួត បានអភិវឌ្ឍគម្រោងលំនៅឋានជាច្រើន លើទីតាំងផ្សេងៗគ្នា ដែលពោរពេញដោយសក្តានុពលខ្លាំង។ ជាពិសេសគម្រោងទាំង១០ ខាងលើនេះស្ថិតនៅតាមតំបន់អភិវឌ្ឍផ្សេងៗគ្នា ជុំវិញរាជធានីភ្នំពេញ ដែលរួមមាន តំបន់ទីក្រុងរណប៦០ម៉ែត្រ តំបន់បឹងស្នោ និងតំបន់ជ្រោយចង្វារ ; សុទ្ធសឹងតែជាតំបន់ប្រមូលផ្តុំទៅដោយលំនៅដ្ឋាន និងពាណិជ្ជកម្ម ដែលមានសក្ដានុពលខ្លាំង សម្រាប់ការវិនិយោគ និងរស់នៅផងដែរ។

-ជាក់ស្តែងតំបន់ទីក្រុងរណបផ្លូវ៦០ម៉ែត្រ បន្តការទាក់ទាញវិនិយោគិនធំៗជាច្រើន មកអភិវឌ្ឍក្នុងតំបន់នេះ ដែលមានការរៀបចំហេដ្ឋារចនាសម្ព័ន្ធរួចជាស្រេច មានផ្លូវថ្នល់ធំៗខ្វាត់ខ្វែង ជាច្រកសេដ្ឋកិច្ច តភា្ជប់ទៅកាន់ផ្លូវជាតិលេខ២ និង លេខ៣ បានយ៉ាងលឿន។ មិនត្រឹមតែគម្រោងអភិវឌ្ឍលំនៅស្ថានប៉ុណ្ណោះទេ យើងសង្កេតឃើញថា សូម្បីតែសាលាអន្តរជាតិ ISPP និង ក្រុមហ៊ុន Star Auto Cambodia (Marcedes-Benz) ផ្សារទំនើប ភីអេច ដាយមិនផ្លេស ក៏បានឈានជើងចូលមកក្នុងតំបន់អភិវឌ្ឍដ៏មានប្រជាប្រិយភាពមួយនេះដែរ។

-ចំណែកឯ តំបន់តាមបណ្តោយផ្លូវជាតិលេខ ១ ចាប់ពីស្ពានព្រះមុនីវង្ស ដល់តំបន់បឹងស្នោ កំពុងតែរីកដុះដាលទៅដោយគម្រោងអភិវឌ្ឍលំនៅដ្ឋានជាច្រើន រួមទាំងផ្សារទំនើប ធនាគារ សាលារៀន មន្ទីរពេទ្យ ភោជនីយដ្ឋាន ហាងទំនិញ បានក្លាយជាទីតាំងប្រជុំជននិង ជាតំបន់ពាណិជ្ជកម្មមួយផងដែរ ជាពិសេសតំបន់បឹងស្នោរផ្ទាល់តែម្តង។ តំបន់បឹងស្នោ ក៏លែងស្ងប់ស្ងាត់ដូចកាលពីមុនឡើយ ក្រោយពេលគម្រោងដ៏ធំមួយរបស់បុរី ប៉េង ហួត ដែលមានឈ្មោះថា ហ្រ្គេនស្តាផ្លាទីនីម បានលេចរូបរាងឡើងលើផ្ទៃដីជាង២០០ហិចតា ហើយគម្រោងដ៏ធំនេះបានប្រែក្លាយតំបន់បឹងស្នោ ជាទីក្រុងរណបមួយដ៏សម្បូរបែប ដែលរួមមានសួនកម្សាន្តបែបអឺរ៉ុប សាលារៀនអន្តរជាតិ កីឡាដ្ឋាន ស្ថានីយពន្លត់អគ្គីភ័យ ខុនដូ និងផ្សាទំនើប ថែមទៀតផង។ ក្រៅតែពីភាពសម្បូរបែបខាងលើ ក្នុងគម្រោងដ៏ធំនេះផងដែរក៏បានបែងចែកតំបន់សម្រាប់រស់នៅ និងតំបន់ពាណិជ្ជកម្ម ជាច្រើនប្រភេទ។

– សម្រាប់តំបន់តាមបណ្តោយផ្លូវជាតិលេខ៦Aវិញ ក៏កំពុងតែអភិវឌ្ឍឥតឈប់ឈរដែរ នាពេលបច្ចុប្បន្ន និងនាពេលអនាគត ជាពិសេសតំបន់ព្រែកលាបដែលកំពុងតែរីកដុះដាលទៅដោយ ផ្សារទំនើប ធនាគារ សាលារៀន មន្ទីរពេទ្យ ភោជនីយដ្ឋាន ហាងទំនិញ ជាច្រើន បានក្លាយជាទីតាំងប្រជុំជន អំណោយផលទៅដល់ការធ្វើអាជីវកម្ម និងរស់នៅ។

សូមបញ្ជាក់ផងដែរថាគ្រប់ប្រភេទវីឡា ក្នុងគម្រោងទាំង១០ខាងលើ សុទ្ធសឹងតែ រចនាម៉ូដឡើង ដ៏ល្អឯកដែលផ្អែកទៅលើគុណតម្លៃនៃសោភណ្ឌភាព ជាមួយភាពសមស្របឥតខ្ចោះនៃការរួមបញ្ចូលរចនាបថខ្មែរ និងអឺរ៉ុប ដោយផ្តល់ជូននូវភាពប្រណិតទាន់សម័យ និងផាសុកភាពក្នុងការស់នៅធ្វើអោយជីវិតលោកអ្នកកាន់តែមានន័យ។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: sale@penghuoth.com ឬចូលទៅកាន់គេហទំព័រ Facebook: www.facebook.com/boreypenghuoth ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕