លោកហ្សី ជីនពីង៖ គ្មានអ្វីអាចបញ្ឈប់ប្រទេសចិនបានទេ

October 1, 2019

ដោយ Donald Lee

ប៉េកាំង៖ ទីក្រុងប៉េកាំងនៅថ្ងៃអង្គារនេះ បានចាប់ផ្តើមប្រារព្ធខួបលើកទី៧០នៃការបង្កើតសាធារណរដ្ឋប្រជាមានិតចិន ក្រោមវត្តមានទាហានជាង១៥.០០០នាក់បានចូលរួមក្បួនដង្ហែ និងយន្តហោះយោធា ១៦០គ្រឿង។

ថ្ងៃខួបលើកទី៧០នេះ ត្រូវបានប្រារព្ធឡើងជាមួយនឹងការបង្ហាញ អំណាចយោធារបស់ចិនដ៏ធំ។ ជាមួយគ្នានេះ រដ្ឋាភិបាលចិនបានបង្ហាញអាវុធ និងយន្តហោះបច្ចេកវិទ្យាថ្មីបង្ហាញពីកម្លាំងរបស់ខ្លួននៅក្នុងក្បួនព្យុហយាត្រាមួយនៅទីក្រុងប៉េកាំង។

ប្រធានាធិបតីចិន លោក Xi Jinping បានថ្លែងនៅក្នុងសុន្ទរកថា ទៅកាន់ប្រជាជាតិថា “គ្មានកម្លាំងណាអាចធ្វើឱ្យរង្គោះរង្គើគ្រឹះ នៃប្រជាជាតិដ៏អស្ចារ្យនេះបានឡើយ” ។ លោកបន្តថា “គ្មានកម្លាំងណាអាចបញ្ឈប់ប្រជាជនចិន និងប្រជាជាតិចិនដែលឈានមុខគេបានឡើយ”។

លោក Xi បានឡើងកាន់អំណាចក្នុងឆ្នាំ២០១២ ហើយរដ្ឋាភិបាលបានរៀបចំសេចក្តីព្រាងច្បាប់ស្តីពីការកំណត់រយៈពេល ដើម្បីធ្វើឱ្យគាត់ក្លាយជាមេដឹកនាំប្រទេសចិនដោយគ្មានកំណត់៕

ហេតុអ្វីខេត្តកណ្តាលមានសក្តានុពលវិនិយោគលើវិស័យអចលនទ្រព្យ?

October 1, 2019

ដោយ វុត្ថា

ភ្នំពេញ៖ ខេត្តកណ្តាលមានសក្តានុពលយ៉ាងខ្លាំង ចំពោះការវិនិយោគលើវិស័យអចលនទ្រព្យ បើប្រៀបទៅនឹងខេត្តនានាទូទាំងប្រទេស និងជាតំបន់ប៉ូលសេដ្ឋកិច្ចដ៏សំខាន់ផងដែរ ។ ម្យ៉ាងទៀតខេត្តមួយនេះបានហ៊ំព័ទ្ឋជុំវិញ និងនៅមិនឆ្ងាយពីទីក្រុងភ្នំពេញ។

១) ប្លង់គោលត្រូវបានបញ្ចប់ការសិក្សា

លោកបណ្ឌិតវ៉ាន់ វ៉ាត អ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្មនិងសំណង់ខេត្តកណ្តាល ធ្លាប់បានមានប្រសាសន៍ថា ប្លង់គោលអភិវឌ្ឍន៍ក្រុង-ស្រុកទាំងអស់ នៃខេត្តកណ្តាលត្រូវបានសិក្សាចប់ ខណៈដែលថ្នាក់ជាតិបានសម្រេចទទួលស្គាល់២ ថ្នាក់ខេត្តទទួលស្គាល់១ និងផ្សេងទៀតមិនទាន់បានសម្រេច។

យោងតាមគេហទំព័ររបស់សាលាខេត្តកណ្តាលបានឱ្យដឹងដែរថា ការអនុវត្តប្លង់គោលនៅខេត្តកណ្តាល នឹងអាចទាក់ទាញការវិនិយោគបាន និងមានឧស្សាហកម្មខ្នាតតូច មធ្យម នឹងជាខេត្តមានសក្តានុពលយ៉ាងខ្លាំង បើប្រៀបទៅនឹងខេត្តនានាទូទាំងប្រទេស និងជាតំបន់ប៉ូលសេដ្ឋកិច្ចទី២បន្ទាប់ពីរាជធានីភ្នំពេញផងដែរ។ ដូច្នេះពាក់ព័ន្ធនឹងប្លង់គោលនេះ ក៏បានលើកឡើងពីយុទ្ធសាស្ត្រអភិវឌ្ឍន៍ដីធ្លី យុទ្ធសាស្រ្តអភិវឌ្ឍន៍សេដ្ឋកិច្ច សង្គម និងហេដ្ឋារចនាសម្ព័ន្ធ និងគម្រោងអទិភាពផ្សេងៗផងដែរ។

២) ព្រលានយន្តហោះអន្តរជាតិភ្នំពេញថ្មី

រដ្ឋាភិបាលបានគ្រោងនឹងសាងសង់ ព្រលានយន្តហោះអន្តរជាតិភ្នំពេញថ្មី នៅលើផ្ទៃដី៨០០ហិកតា នៃផ្ទៃដីសរុប ២៦០០ហិកតា ដែលមួយផ្នែកនៃព្រលានយន្តហោះនេះស្ថិតនៅក្នុងខេត្តកណ្តាល និងខេត្តតាកែវ។ គំរោងវិនិយោគព្រលានយន្តហោះនេះ គ្រោងចំណាយប្រាក់១៥០០លានដុល្លារ ដែលវិនិយោគដោយក្រុមហ៊ុនគ្រប់គ្រងដោយលោកឧកញ៉ា ពុង ឃាវសែ សហការជាមួយក្រុមហ៊ុនមួយមកពីប្រទេសចិន។

៣) គម្រោងលំនៅឋាន និងរោងចក្រ

អ្នកជំនាញវិស័យអចលនទ្រព្យថា គម្រោងលំនៅឋានរបស់ក្រុមហ៊ុនធំៗ និងរោងចក្រជាច្រើនបាន នឹងកំពុងបាញ់ឆ្ពោះទៅកាន់ខេត្តកណ្តាល ស្របតាមយុទ្ធសាស្ត្ររបស់រដ្ឋាភិបាលពង្រីកក្រុង និងហេដ្ឋារចនាសម្ព័ន្ធនានា រួមមានផ្លូវប្រវាត់ក្រុងជាដើម។ សម្រាប់ដីនៅតាមបណ្តាស្រុក នៃខេត្តកណ្តាលកំពុងមានភាពទាក់ទាញខ្លាំង ដែលអាចផ្តល់ឱកាសយ៉ាងល្អប្រសើរ ទៅដល់បណ្តាអ្នកវិនិយោគនានា ទាំងការទិញ-លក់ ក៏ដូចជាអ្នកអភិវឌ្ឍលើគម្រោងសំណង់លំនៅដ្ឋាន។

ដ្បិតដីនៅខេត្តជាប់ភ្នំពេញមួយនេះ មានវិសាលភាពធំទូលាយ តម្លៃនៅមានកម្រិត ជាពិសេសមានអំណោយផលពីធម្មជាតិ ដូចជា មានដងទន្លេនៅអមជាមួយដែលផ្តល់បរិយាកាសរស់នៅយ៉ាងគាប់ប្រសើរ និងមានហេដ្ឋារចនាសម្ព័ន្ធដ៏ល្អផងដែរ។

ក្រៅពីនេះ អគ្គនាយកក្រុមហ៊ុន Khmer Foundation Appraisal លោកឧកញ៉ា នួន រិទ្ឋី ធ្លាប់បានឱ្យដឹងដែរថា ខេត្តកណ្តាល ជាខេត្តមួយដែលមានសក្ដានុពលជាងបណ្តាខេត្តមួយចំនួន មានវិសាលភាពធំទូលាយ និងនៅហ៊ុព័ទ្ធជុំវិញរាជធានីភ្នំពេញ ដែលជាមជ្ឈមណ្ឌលពាណិជ្ជកម្មដ៏សំខាន់ប្រចាំប្រទេស។

លោកបន្តថា នៅក្នុងខេត្តកណ្តាលល ជាទឹកដីមានអ្វីៗគ្រប់យ៉ាង ដែលអាចអំណោយផលដល់វិស័យពាណិជ្ជកម្ម និងសេដ្ឋកិច្ច ដូចជា មានតំបន់សេដ្ឋកិច្ចពិសេស មានផ្លូវក្រវ៉ាត់ក្រុងទី៣ មានផែស្ងួត មានរោងចក្រ សហគ្រាសធំៗ ឃ្លាំងផ្ទុកទំនិញនានា ក៏ដូចជាគម្រោងអភិវឌ្ឍលំនៅដ្ឋានប្រណីត និងលំនៅដ្ឋានតម្លៃមធ្យមជាដើម ដែលជួយបង្កើតឱកាសការងារដល់ប្រជាជនជាច្រើនម៉ឺននាក់៕

គម្រោងសាងសង់ផ្លូវជាតិលេខ៧១C គ្រោងនឹងបើកការដ្ឋាននៅត្រឹមចុងឆ្នាំនេះជាមួយនឹងការតភ្ជាប់ឆ្លងទន្លេដ៏សំខាន់

October 1, 2019

ដោយៈ រ៉ាណេត

ភ្នំពេញៈ បន្ទាប់ពីបានបញ្ចប់ការសិក្សាលម្អិត ពីសំណាក់ក្រុមហ៊ុនជំនាញចិន គម្រោងបើកការដ្ឋានសាងសង់ផ្លូវជាតិលេខ ៧១C តភ្ជាប់រវាងខេត្តត្បូងឃ្មុំ និងខេត្តកំពង់ចាម ដោយឆ្លង់កាតស្ពានមិត្តភាព កម្ពុជា -ចិន ស្រុកស្ទឹង និងស្រុកក្រូចឆ្មារ នឹងប្រព្រឹត្តទៅនៅត្រឹមចុងឆ្នាំ២០១៩ឆាប់ៗខាងមុខនេះ។

អ្នកនាំពាក្យក្រសួងសាធារណៈការ និងដឹកជញ្ជូន លោក វ៉ា ស៊ីមសូរិយា បានមានប្រសាសន៍ឱ្យដឹងតាមទូរស័ព្ទ កាលពីសប្ដាហ៍កន្លងទៅនេះថា គម្រោងសាងសង់ផ្លូវជាតិលេខ ៧១C ដែលមានប្រវែង១១៤,៦៨ គីឡូម៉ែត្រ តភ្ជាប់ចេញពីផ្លូវជាតិលេខ៧១ ត្រង់ចំណុចផ្សារចំការលើ ស្រុកចំការលើ ខេត្តកំពង់ចាម ឆ្លងកាត់ស្ពានស្ទឹងត្រង់-ក្រូចឆ្មារ ទៅកាន់ភូមិសាស្ត្រខេត្តត្បូងឃ្មុំ ត្រូវបានបញ្ចប់ការសិក្សារួចរាល់ហើយ នៅឡើយតែចាប់ផ្តើមស្ថាបនាប៉ុណ្ណោះ។

លោកបានបន្តទៀតថា គម្រោងសាងសង់ផ្លូវជាតិ៧១C នេះ ត្រូវបានសិក្សាដោយក្រុមហ៊ុន សៀងហៃគ្រុប ហើយក៏ជាគម្រោងមួយស្ថិតនៅក្នុងគម្រោងអាទិភាពចុងក្រោយក្នុងចំណោមគម្រោងផ្លូវផ្សេងៗទៀត ដែលបានដាក់ចេញដោយក្រសួងផងដែរ។

បើតាមការឱ្យដឹងពីលោក ទី សេងដឿន មន្ត្រីសាលាស្រុកក្រូចឆ្មារ ខេត្តត្បូងឃ្មុំ បានបង្ហើបប្រាប់ឱ្យដឹងថា នៅក្នុងគម្រោងនៃការសាងសង់ផ្លូវជាតិមួយខ្សែ ខាងលើនេះ នឹងត្រូវស្ថាបនាទ្រូងផ្លូវទំហំ១២ម៉ែត្រ ខណៈដែលផ្លូវរងឬផ្លូវបំបែកចូលភូមិ ឃុំនឹងត្រូវស្ថាបនាទំហំ៩ម៉ែត្រ។ លោកបានបន្តទៀតថា តាមការសិក្សា គម្រោងសាងសង់ផ្លូវជាតិលេខ៧១C នឹងត្រូវចំណាយពេលប្រមាណ៣៦ខែ នៅក្នុងខ្ទង់ថវិកាចំណាយសរុបប្រមាណជាង ១០០លានដុល្លារ។

លោកបានបញ្ជាក់ថា ទីតាំងគោលនៃផ្លូវដែលត្រូវបំបែកចេញពីផ្សារចំការលើ ខេត្តកំពង់ចាម មួយនេះនឹងត្រូវមកបញ្ចប់នៅតំបន់សាលាខេត្តត្បូងឃ្មុំ ស្ថិតនៅក្នុងភូមិត្រពាំងជូរ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ និងមានផ្លូវខ្នែងមួយខ្សែទៀតឆ្ពោះទៅតភ្ជាប់ជាមួយផ្លូវជាតិលេខ៧៣៕

សេដ្ឋកិច្ចវៀតណាមហក់ឡើង ខណៈសេដ្ឋកិច្ចសកលកំពុងដាំក្បាលចុះ

October 1, 2019

ដោយ Donald Lee

វៀតណាម៖ សេដ្ឋកិច្ចវៀតណាមបានកើនឡើងដល់កម្រិតខ្ពស់បំផុតនៅឆ្នាំនេះដោយកើនឡើងជាង៧ ភាគរយក្នុងរយៈពេល៩ខែដំបូងនៃឆ្នាំនេះ ពោលកើនឡើងយ៉ាងខ្ពស់ប្រមាណ៧,៣១% ក្នុងរយៈពេលត្រីមាសទី៣ បើធៀបនឹងត្រីមាសមុន។

ការិយាល័យស្ថិតិទូទៅ (GSO) របស់វៀតណាមបានចេញផ្សាយទិន្នន័យរបស់ខ្លួនកាលពីពេលថ្មីៗនេះបង្ហាញពីកំណើន៦,៩៨ភាគរយ នៅក្នុងឆ្នាំនេះដែលភាគច្រើនកំនើននេះ គឺដោយសារតែវិស័យផលិតកម្មកំពុងរីកចម្រើន និងក្រុមហ៊ុនអន្តរជាតិកំពុងសម្លឹងរកការផ្លាស់ទីលំនៅចេញពីប្រទេសចិន។

យោងតាម GSO ការនាំចេញបានកើនឡើង៨,២ភាគរយ ដែលមានទំហំទឹកប្រាក់រហូតដល់១៩៤,៣ពាន់លានដុល្លារនៅឆ្នាំនេះ។

លោក Nguyen Bich Lam ប្រធានការិយាល័យស្ថិតិទូទៅបាននិយាយនៅក្នុងសន្និសីទកាសែតនៅទីក្រុងហាណូយ កាលពីកន្លងទៅថ្មីៗនេះបានឱ្យដឹងថា “ការផលិតគឺជាកត្តាជំរុញដ៏សំខាន់ នៃកំណើនសេដ្ឋកិច្ចក្នុងរយៈពេល៩ខែដំបូងនៃឆ្នាំនេះ បន្ទាប់មកវិស័យសេវាកម្ម”។

មានក្រុមហ៊ុនជាច្រើនបានចាកចេញពីប្រទេសចិន ទៅកាន់ប្រទេសវៀតណាមចាប់តាំងពីមានការកើនឡើង នូវសង្គ្រាមពាណិជ្ជកម្មរវាងសហរដ្ឋអាមេរិក និងចិននៅឆ្នាំនេះ។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបន្ទាបស្ថានភាពសេដ្ឋកិច្ចពិភពលោកកាលពីខែមុន ដោយសារតែភាពតានតឹងនៃសង្រ្គាមពាណិជ្ជកម្មដែលកំពុងបន្តកើតមានរវាងប្រទេស ដែលមានសេដ្ឋកិច្ចធំជាងគេទាំងពីរនៅលើពិភពលោក។

អង្គការ OECD ដែលមានមូលដ្ឋាននៅទីក្រុងប៉ារីស បានបន្ទាបកំណើនGDP សាកលមកនៅត្រឹម០,៣ ភាគរយដល់២,៩ ភាគរយសម្រាប់ឆ្នាំ២០១៩។ វាក៏បានថយចុះកំណើនផ.ស.សនៅឆ្នាំ២០២០ មកនៅត្រឹម០,៤ ភាគរយដល់៣ភាគរយផងដែរ៕

ចំណេះដឹង! តើធនាគារជាតិប្រើប្រាស់គោលនយោបាយបែបណាលើអត្រាប្តូរប្រាក់?

October 1, 2019

ដោយ វុត្ថា

ភ្នំពេញៈ គោលនយោបាយអត្រាប្តូរប្រាក់របស់ធនាគារជាតិនៃកម្ពុជា គឺជាឧបករណ៍នយោបាយមួយរបស់គោល នយោបាយរូបិយវត្ថុ ដែលមានគោលដៅចម្បងរក្សាស្ថិរភាពថ្លៃ។

ជាមួយនឹងការអនុវត្តរបបអត្រាប្តូរប្រាក់ អណ្តែតមានការគ្រប់គ្រង ធនាគារជាតិនឹងធ្វើអន្តរាគមន៍លើទីផ្សារប្តូរប្រាក់ ដើម្បីគ្រប់គ្រងនិងរក្សាស្ថិរភាព អត្រាប្តូរប្រាក់ទៅតាមគោលដៅដែលបានកំណត់។

អត្រាប្តូរប្រាក់ផ្លូវការ ជាអត្រាទិញ-លក់រវាងរូបិយវត្ថុជាតិ និងរូបិយប័ណ្ណបរទេសផ្សេងទៀត។ អត្រាប្តូរប្រាក់ផ្លូវការនេះ ត្រូវបានកំណត់ដោយធនាគារជាតិនៃកម្ពុជា និងដាក់ឲ្យប្រើប្រាស់សម្រាប់រាល់ប្រតិបត្តិការ រវាងធនាគារជាតិនៃកម្ពុជាជាមួយនឹងភាគីពាក់ព័ន្ធ ។ លើសពីនេះក្រសួង-ស្ថាប័នរាជរដ្ឋាភិបាល ក៏ដូចជា សាធារណៈជនអាចប្រើប្រាស់អត្រាប្តូរប្រាក់ផ្លូវការនេះ ទៅតាមគោលដៅរៀងៗខ្លួន ហើយអត្រានេះក៏ជា អត្រាប្តូរប្រាក់គោលប្រើដោយវិស័យឯកជនផងដែរ។

ធនាគារជាតិនៃកម្ពុជា កំណត់អត្រាប្តូរប្រាក់ផ្លូវការ ដូចតទៅ ៖

– “គណៈកម្មការកំណត់អត្រាប្តូរប្រាក់ផ្លូវការ” ដែលរួមមានសមាសភាពមកពីនាយកដ្ឋានពាក់ព័ន្ធ ដូចជា នាយកដ្ឋានគ្រប់គ្រងប្តូរប្រាក់ នាយកដ្ឋានបោះផ្សាយនិងឃ្លាំងបេឡា នាយកដ្ឋាន ប្រតិបត្តិការ នាយកដ្ឋានស្ថិតិ និងនាយកដ្ឋានស្រាវជ្រាវសេដ្ឋកិច្ច និងសហប្រតិបត្តិការអន្តរជាតិ គឺជាអ្នកកំណត់អត្រាប្តូរប្រាក់ផ្លូវការ។

– សមាជិកគណៈកម្មការនេះ ជួបប្រជុំគ្នាជារៀងរាល់ព្រឹក ដើម្បីពិភាក្សានិងវិភាគទៅលើសូចនាករសំខាន់ៗមួយចំនួន ដែលត្រូវប្រើប្រាស់ជាមូលដ្ឋាន ក្នុងការកំណត់អត្រាប្តូរប្រាក់ផ្លូវការប្រចាំថ្ងៃ។ បន្ទាប់មកអត្រាប្តូរប្រាក់ផ្លូវការនេះ ត្រូវដាក់ជូនថ្នាក់អគ្គនាយកបច្ចេកទេសសម្រេច និងផ្សព្វផ្សាយជាសាធារណៈ។

– ករណីដែលទីផ្សារមានការប្រែប្រួលខ្លាំង គណៈកម្មការនឹងមានការប្រជុំជាបន្ទាន់ ដើម្បីរកដំណោះស្រាយ និងកំណត់យុទ្ធសាស្ត្រ៕

អ្នកជំនាញអះអាងថា ប្រជាជនកម្ពុជានៅតែបន្តចាប់អារម្មណ៍វិនិយោគអចលនទ្រព្យកាន់តែច្រើន

October 1, 2019

ដោយៈ រ៉ាណេត

ភ្នំពេញៈ ទីផ្សារអចលនទ្រព្យនៅកម្ពុជានាពេលបច្ចុប្បន្ននេះ កំពុងតែបង្ហាញពីសក្ដានុពល និងទាក់ទាញក្នុងការវិនិយោគយ៉ាងច្រើន ជាពិសេសការវិនិយោគទៅលើវិស័យដីធ្លី ដែលឃើញមានស្ទើរគ្រប់តំបន់នៅទូទាំងប្រទេស។

អគ្គនាយកក្រុមហ៊ុនអចលនទ្រព្យ Key Real Estate លោក សន សៀប បានមានប្រសាសន៍កាលពីចុងសប្ដាហ៍កន្លងទៅនេះថា បើទោះជានៅចុងឆ្នាំ២០១៩នេះ សកម្មភាពនៃទីផ្សារអចលនទ្រព្យ ហាក់មានភាពថមថយបន្តិចក៏ពិតមែន ប៉ុន្តែសម្រាប់ទំនោរនៃការទិញ-លក់របស់អ្នកវិនិយោគក្នុងស្រុកនៅតែបន្តភាពសកម្មដដែល។

លោកបានបន្តទៀតថា “វិស័យអចលនទ្រព្យនៅកម្ពុជាមានភាពរីកចម្រើនខ្លាំង ជាពិសេសនៅត្រឹមរយៈពេល១០ឆ្នាំចុងក្រោយនេះ ដែលកាន់តែជំរុញឱ្យបណ្តាក្រុមហ៊ុនអន្តរជាតិនានា ងាកមកចាប់អារម្មណ៍វិនិយោគវិស័យមួយនេះ នៅក្នុងប្រទេសកម្ពុជា ដើម្បីទទួលបានផលប្រយោជន៍”។

លោកសន សៀបបានបន្តទៀតថា ជាធម្មតា នៅពេលដែលមានការអភិវឌ្ឍទៅលើគម្រោងធំៗកាន់តែច្រើន វានឹងជំរុញឱ្យតម្លៃអចលនទ្រព្យ ក៏ដូចជាតម្លៃដីធ្លីមានការកើនឡើងដោយស្វ័យប្រវត្តិ ហើយនៅពេលដែលវិស័យមួយផ្តល់ផលល្អ ដល់ការវិនិយោគ ច្បាស់ណាស់ថា នឹងមានមនុស្សកាន់តែច្រើនចាប់អារម្មណ៍ ជាក់ស្ដែងដូចជាវិស័យដីធ្លីនាពេលបច្ចុប្បន្ននេះជាដើម គឺមានសកម្មភាពទិញ-លក់ យ៉ាងផុលផុស និងកើតមានស្ទើរគ្រប់ទីកន្លែងទូទាំងប្រទេស។

អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកស្រី តាំង ហួរ បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី៣០ ខែកញ្ញា នេះផងដែរថា សកម្មភាពនៃការទិញ-លក់របស់អ្នកវិនិយោគក្នុងស្រុក គឺជាចលករយ៉ាងសំខាន់ដែលជួយឱ្យវិស័យនេះភាពល្អប្រសើរ ហើយក៏ជាការទាក់ទាញអ្នកវិនិយោគ នៅក្រៅស្រុកឱ្យចូលមកវិនិយោគរួមគ្នាផងដែរ។

លោកស្រីបន្តថា “ភាគច្រើនអ្នកនៅក្នុងស្រុក ពួកគេធ្វើការវិនិយោគដោយការទិញ-លក់ ដើម្បីទទួលបានចំណេញ ប៉ុន្តែបើអ្នកក្រៅស្រុកចូលមកវិនិយោគ និងអភិវឌ្ឍលើវិស័យសំណង់ក្នុងគម្រោងធំៗ”។លោកស្រីបន្តទៀតថា “មិនថាចំពោះអ្នកវិនិយោគមកពីក្រៅស្រុក ឬការវិនិយោគរបស់អ្នកក្នុងស្រុកនោះទេ គឺសុទ្ធតែជាចំណែកមួយយ៉ាងសំខាន់ ក្នុងការធ្វើឱ្យវិស័យអចលនទ្រព្យមានភាពល្អប្រសើរទាំងអស់”៕

ក្រុងប៉េកាំងព្រមានក្រុងវ៉ាស៊ីតោនដែលកំពុងពិចារណារារាំងរាល់ការវិនិយោគរបស់អាមេរិកនៅក្នុងក្រុមហ៊ុនចិន

September 30, 2019

ដោយ Donald Lee

ប៉េកាំងៈ ទីក្រុងប៉េកាំងបានប្រតិកម្មចំពោះព័ត៌មានរបស់សេតវិមាន ដែលកំពុងពិចារណាអំពីការទប់ស្កាត់ក្រុមហ៊ុនចិន ពីផ្សារហ៊ុនអាមេរិកថាជា “ជំនឿអួតអាង” និង “ ការមើលស្រាលប្រកបដោយគ្រោះថ្នាក់” ចំពោះភាពធន់ និងថាមពលរបស់ខ្លួន”។

ប្រធានាធិបតីអាមេរិក លោក Donald Trump បាននឹងកំពុងពិចារណាអំពីការរាំងខ្ទប់ រាល់ការវិនិយោគរបស់អាមេរិកនៅក្នុងក្រុមហ៊ុនចិន។ នេះបើយោងតាមសេចក្តីរាយការណ៍ ដែលបានផ្សព្វផ្សាយនៅតាមប្រព័ន្ធផ្សព្វផ្សាយនានា កាលពីចុងសប្តាហ៍កន្លងមកនេះ។

ក្រុមអ្នកវិភាគជឿជាក់ថា “សកម្មភាពបែបនេះ នឹងផ្តល់នូវឥទ្ធិពលបន្ថែមដល់លោក Trump នៅក្នុងការចរចាសង្គ្រាមពាណិជ្ជកម្មរវាងសហរដ្ឋអាមេរិក និងចិន”។

ទីក្រុងប៉េកាំងបានប្រតិកម្មយ៉ាងខ្លាំង ដោយលើកឡើងថា លោក Trump កំពុងមើលស្រាលកម្លាំង និងភាពធន់របស់សេដ្ឋកិច្ចចិន។

កាសែតរដ្ឋចិនបានអត្ថាធិប្បាយថា “ពួកគេ (អាមេរិក) កំពុងលេងជាមួយភ្លើងហើយមើលស្រាលការអភិវឌ្ឍឧស្សាហកម្ម និងក្រុមហ៊ុនផលិតកម្មរបស់ចិន”។

កាសែតនេះបន្តថា “ជំនឿអួតអាងលើការពិត បង្ហាញពីការមើលស្រាលយ៉ាងខ្លាំងនូវអ្វីដែលសេដ្ឋកិច្ច និងសមត្ថភាពរបស់ក្រុមហ៊ុនចិន ។ បន្ទាប់ពីមានការអភិវឌ្ឍអស់រយៈពេល៧០ឆ្នាំកន្លងមកនេះ ប្រទេសចិនបានបង្កើតឧស្សាហកម្មផលិតកម្ម លំដាប់ពិភពលោក និងមានប្រព័ន្ធឧស្សាហកម្មទំនើប និងឯករាជ្យ”។

ទិន្នន័យរបស់ក្រុមហ៊ុន Moody’s បានបង្ហាញរបាយការណ៍ថា សង្គ្រាមពាណិជ្ជកម្មបានធ្វើឱ្យសេដ្ឋកិច្ចអាមេរិក បង្កើតការងារបានតិចជាង ៣០០,០០កន្លែង ហើយអាចឈានដល់ជិតកន្លះលាននាក់នៅចុងឆ្នាំនេះ។

របាយការណ៍នេះបន្តថា សហរដ្ឋអាមេរិក និងចិនកំពុងបង្កអន្តរាយដល់ខ្លួនឯងនៅពេលពួកគេរុញច្រានគ្នាទៅវិញទៅមក ដោយរំពឹងថានឹងមិនចុះសម្រុងនឹងគ្នាឡើយ។

របាយការណ៍របស់ Moody បាននិយាយថា “ប្រទេសទាំងពីរបានអះអាងថា សេដ្ឋកិច្ចរបស់ពួកគេមានកម្លាំងគ្រប់គ្រាន់ ដើម្បីទប់ទល់នឹងភាពចលាចលពាណិជ្ជកម្ម ប៉ុន្តែពួកគេកំពុងបន្តជំរុញគោលនយោបាយ ដើម្បីទូទាត់ការចំណាយនៃសង្គ្រាម”៕

ភ្ញៀវទេសចរណ៍ជាង ១,៤លាននាក់ចេញដើរលេងកម្សាន្តនៅទូទាំងប្រទេសក្នុងឱកាសបុណ្យភ្ជុំបិណ្ឌ

September 30, 2019

ដោយ នៅ ស៊ីវុត្ថា

ភ្នំពេញៈ ក្រសួងទេសចរណ៍ បានបង្ហាញរបាយការណ៍របស់ខ្លួនថា គិតត្រឹមរយៈពេល៣ថ្ងៃនៃបុណ្យភ្ជុំបិណ្ឌ ចាប់ពីថ្ងៃទី២៧-២៩ ខែកញ្ញាឆ្នាំ២០១៩នេះ ភ្ញៀវទេសចរជាតិ-អន្តរជាតិ បានចេញដើរទស្សនាកម្សាន្តនៅទូទាំងប្រទេស មានចំនួនជាង ១,៤លាននាក់កើនឡើង៣៧.២៥%ធៀបរយៈពេលដូចគ្នាកាលពីឆ្នាំមុន។

លោក ថោង ខុន រដ្ឋមន្ត្រីក្រសួងទេសចរណ៍បានប្រាប់សារព័ត៌មានក្នុងស្រុកនៅថ្ងៃទី៣០ ខែកញ្ញានេះថា ភ្ញៀវទេសចរជាតិ-អន្តរជាតិ និងបងប្អូនប្រជាពលរដ្ឋ ដែលដើរកម្សាន្តនៅតាមរមណីយដ្ឋានទេសចរណ៍នានា ក្នុងឱកាសបុណ្យភ្ជុំបិណ្ឌ២៧-២៩ ខែកញ្ញា ឆ្នាំ២០១៩នេះ មានចំនួន ១,៤៣៧,៩៨៨នាក់ កើនឡើង ៣៧.២៥% ក្នុងនោះភ្ញៀវជាតិមានចំនួន១,៣៦១,២៤០នាក់ កើនឡើង ៣៤.៩១% ចំណែកភ្ញៀវអន្តរជាតិមានចំនួន ៧៦,៧៤៨នាក់កើនឡើង៩៨.១៤%។

លោករដ្ឋមន្ត្រីបន្តថា ចំនួនជាក់ស្តែងអាចច្រើនជាងនេះ ពីព្រោះប្រជាពលរដ្ឋក៏បានទៅកម្សាន្តនៅតាមកន្លែង ដែលមានសក្តានុពលទេសចរណ៍ ដូចជា បឹង ស្ទឹង ប្រឡាយ ទំនប់ និងរមណីយដ្ឋានកែច្នៃខ្នាតតូចនានា។

យោងតាមរបាយការណ៍របស់មន្ទីរទេសចរណ៍រាជធានី-ខេត្ត ក្រុមការងារសង្កេតឃើញថា៖ ការរៀបចំរមណីយដ្ឋាន និងគោលដៅទេសចរណ៍មានការរីកចម្រើនកាន់តែប្រសើរ ដែលធ្វើឲ្យចំនួនភ្ញៀវទេសចរមានការកើនឡើង ទោះបីជាតំបន់ខ្លះមានភ្លៀងធ្លាក់ក៏ដោយ។ អាចទប់ស្កាត់ការដំឡើងថ្លៃហួសហេតុលើម្ហូបអាហារ និងសេវាកម្មទេសចរណ៍ ដោយមានការបិទតម្លៃជម្រាបជូនភ្ញៀវជាមុនបានត្រឹមត្រូវ ស្របតាមសារាចរណែនាំរបស់ក្រសួងទេសចរណ៍។

;បើទោះបីនៅតែជាបញ្ហាស្មុគស្មាញ តែបញ្ហាបរិស្ថានអនាម័យល្អប្រសើរជាងមុន ដោយភ្ញៀវទេសចរ និងប្រជាពលរដ្ឋមានការយល់ដឹងនិងភ្ញាក់រលឹក ដោយមានការចុះអប់រំណែនាំពីមន្ត្រីជំនាញ និងអាជ្ញាធរពាក់ព័ន្ធ។* បញ្ញាសន្តិសុខសុវត្ថិភាពក៏មានភាពល្អប្រសើរ ដោយមន្ទីរទេសចរណ៍បានសហការណ៍យ៉ាងជិតស្និទ្ធ ជាមួយកម្លាំងមានសមត្ថកិច្ច ចាត់តាំងក្រុមការងារប្រចាំការនៅតាមគោលដៅទេសចរណ៍សំខាន់ៗ និងមានការលើកស្លាកសញ្ញាគ្រោះថ្នាក់នៅតាមតំបន់ដែលងាយរងគ្រោះ។

លោក ថោង ខុន បានបន្ថែមថា កត្តាដែលជំរុញឱ្យមានកំណើនទេសចរណ៍នេះ គឺកត្តាសន្តិភាព ស្ថិរភាពនយោបាយ ដែលជាមូលដ្ឋាននៃការអភិវឌ្ឍ នាំមកនូវការរីកចម្រើនខាងជីវភាពរស់នៅរបស់ប្រជាពលរដ្ឋកាន់តែប្រសើរឡើង៕

CDC អនុម័តគម្រោងវិនិយោគទឹកប្រាក់ ៣១៩លានដុល្លារលើគំរោងចំនួន៨

September 30, 2019

ដោយ វុត្ថា

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC)បានអនុម័តគម្រោងវិនិយោគចំនួន៨មានទឹកប្រាក់៣១៩.៥លានដុល្លារ និងផ្តល់ការងារជូនប្រជាពលរដ្ឋរាប់រយកន្លែង នេះបើតាមរបាយការណ៍កក់ត្រា គំរោងវិនិយោគគិតតែនៅក្នុងខែកញ្ញានេះ។

យោងតាមការផ្សព្វផ្សាយរស់ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី២ ខែកញ្ញា ឆ្នាំ ២០១៩ ម្សិលមិញនេះបានឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី១ ក្រុមហ៊ុន “ MEKO LIGHTING (CAMBODIA) CO., LTD” គម្រោងបង្កើតរោងចក្រផ្គុំដំឡើងអំពូលភ្លើង និងសម្ភារៈបរិក្ខាអគ្គិសនីគ្រប់ប្រភេទ ដែលមានទីតាំងវិនិយោគស្ថិតនៅភូមិចមពល ឃុំពពេល ស្រុកត្រាំកក់ ខេត្តតាកែវ មានទុនវិនិយោគប្រមាណ២,៣លានដុល្លារអាមេរិក និងអាចបង្កើតការងារបានចំនួន ៣០៦កន្លែង។

ទី២ ក្រុមហ៊ុន- “SILVER BEAUTY (CAMBODIA) ELECTRONIC AND LIGHTING CO., LTD” គម្រោងបង្កើតរោងចក្រផលិតអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិទួលត្បែង ឃុំ ព្រៃវិហារ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,២លានដុល្លារអាមេរិក និងអាចបង្កើតការងារបានចំនួន១៧៩កន្លែង។

ទី៣ ក្រុមហ៊ុន “SINE PLASTIC (CAMBODIA) INDUSTRY CO., LTD” គម្រោងបង្កើតរោងចក្រផលិតបំពង់ទឹកជ័រ ដែលមានទីតាំងវិនិយោគស្ថិតនៅភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន១៤០កន្លែង។ ទី៤ ក្រុមហ៊ុន“HONG CHHING (CAMBODIA) INDUSTRIAL DEVELOPMENT CO., LTD” គម្រោងបង្កើត រោងចក្រផលិតសម្ភារៈសំណង់គ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងស្គន់ ឃុំត្រពាំងរាំង ស្រុកជុំគិរី ខេត្តកំពត មានទុនវិនិយោគប្រមាណ ៥,៣លានដុល្លារអាមេរិក និងអាចបង្កើតការងារបានចំនួន ១៤៤កន្លែង។

ទី៥ក្រុមហ៊ុន- “MIKOL STONE CO., LTD” គម្រោងបង្កើតរោងចក្រកែច្នៃថ្មម៉ាបផលតិជាគ្រឿងសង្ហារឹម និងសម្ភារៈបរិក្ខារផ្សេងៗ ដែលមានទីតាំងវិនិយោគស្ថិតនៅភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្ត ព្រះសីហនុ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២៥៧កន្លែង។

ទី៦ក្រុមហ៊ុន- “KAM CHING (CAMBODIA) CRAFTS & GIFTS CO., LTD” គម្រោងបង្កើតរោងចក្រផលិតទៀនគ្រប់ប្រភេទ ដែលមានទីតាំងវិនិយោគស្ថិតនៅភូមិកណ្តឹងធំ ឃុំកណ្តឹង ស្រុកបាទី ខេត្តតាកែវ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ៣២០កន្លែង។

ទី៧ក្រុមហ៊ុន- “CUI ZHEN YUAN FOOD CO., LTD.” គម្រោងបង្កើតរោងចក្រកែច្នៃផ្លែឈើគ្រប់ប្រភេទ (ស្វាយ ចេក ម្នាស់ ស្វាយចន្ទី…) ដែលមានទីតាំងវិនិយោគស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៦,៤លានដុល្លារអាមេរិក និងអាចបង្កើតការងារបានចំនួន ១៧៧កន្លែង។

និងទី៨ក្រុមហ៊ុន- “ZHENG HENG (CAMBODIA) CO., LTD” គម្រោងអភិវឌ្ឍន៍មជ្ឈមណ្ឌលទេសចរណ៍ “តារាសាគរ ឈូងសមុទ្រវែង” រួមមាន៖ សណ្ឋាគារថ្នាក់ផ្កាយ៥ ចំនួន៧០០បន្ទប់ មជ្ឈមណ្ឌលពាណិជ្ជកម្ម រមណីយដ្ឋានទេសចរណ៍ សួនកំសាន្ត ហេដ្ឋារចនាសម្ព័ន្ធ និងគម្រោងផ្សេងៗមួយចំនួនទៀត ដែលមានទីតាំងវិនិយោគស្ថិតនៅឃុំកោះស្តេច ស្រុកគិរីសាគរ ខេត្តកោះកុង មានទុនវិនិយោគប្រមាណ ២៩២លានដុល្លារអាមេរិក និងអាចបង្កើតការងារបានចំនួន២.១១៦កន្លែង៕

មេដឹកនាំហុងកុងនឹងទៅចូលរួមបុណ្យជាតិរបស់ប្រទេសដោយមិនអើពើនឹងភាពអនាធិបតេយ្យនៅក្នុងទីក្រុង

September 30, 2019

ដោយ Donald Lee

ហុងកុងៈ មេដឹកនាំហុងកុង លោកស្រី Carrie Lam នឹងធ្វើដំណើរទៅកាន់ទីក្រុងប៉េកាំង ដើម្បីចូលរួមពិធីរំលឹកបុណ្យខួបលើកទី៧០ នៃការបង្កើតសាធារណរដ្ឋប្រជាមានិតចិន ខណៈប្រជាជនហុងកុងកំពុងតវ៉ាប្រកបដោយអនាធិបតេយ្យនៅសប្តាហ៍នេះ។

ក្រុមអ្នកគាំទ្រលទ្ធិប្រជាធិបតេយ្យរបស់ប្រជាជនហុងកុង នឹងរៀបចំធ្វើកូដកម្ម និងប្រមូលផ្តុំជាលក្ខខណៈទ្រង់ទ្រាយធំ នៅក្នុងសប្តាហ៍នេះ ដើម្បីធ្វើឱ្យទីក្រុងប៉េកាំងមានការខ្មាស់អៀន ស្របពេលដែលប្រារព្ធខួបលើកទី៧០នៃការបង្កើតប្រទេស។

ក្រុមអ្នកតវ៉ា និងប៉ូលីសបានប៉ះទង្គិតគ្នានៅតាមដងផ្លូវ នៅក្នុងទីក្រុងហុងកុងម្តងទៀតកាលពីចុងសប្តាហ៍មុន ដែលធ្វើឱ្យអាជីវកម្មជាច្រើនទីតាំងបានបិទការិយាល័យ។ ហាងនានានៅក្នុងទីក្រុង ជាប់ទៅដោយអំបែងដបកែវ ដែលខូចពីស្រាក្រឡុក molotov និង grafitti ដែលត្រូវបានក្រុមអ្នកតវ៉ាជះ និងលាបពាសពេញអគាររដ្ឋាភិបាលរួច។

ប៉ូលីសហុងកុងបានចេញសេចក្តីថ្លែងការណ៍មួយដោយនិយាយថា មន្រ្តីម្នាក់បានបាញ់ឡើងលើដើម្បីការពារខ្លួន និងព្រមានចំពោះក្រុមអ្នកតវ៉ា ខណៈពេលដែលមានការប្រឈមមុខដាក់គ្នាកាលពីថ្ងៃអាទិត្យម្សិលមិញនេះ។

សេចក្តីថ្លែងការណ៍នោះបាននិយាយថា“ មន្រ្តីប៉ូលីសត្រូវបានឡោមព័ទ្ធ និងវាយប្រហារដោយក្រុមបាតុករដ៏ឃោរឃៅមួយក្រុមធំ”។

សប្តាហ៍នេះនឹងក្លាយជាការសាកល្បងដ៏ធំបំផុតថ្មីមួយទៀត សម្រាប់ការពិសោធន៍ចំពោះប្រទេសចិនដែលជា “ប្រទេសមួយមានប្រព័ន្ធគ្រប់គ្រងពីរ” ដែលបានផ្តល់ទៅអោយទីក្រុងហុងកុងនូវសេរីភាព និងសិទ្ធិ ដែលមិនត្រូវបានបែងចែកប្រជាជនរាប់ពាន់លាននាក់ដែលកំពុងរស់នៅលើចិនដីគោក៕