កូរ៉េកាត់ផ្តាច់ការហោះហើរទៅកាន់ជប៉ុនស្របពេលសង្គ្រាមពាណិជ្ជកម្មមានកំដៅកាន់តែខ្លាំង

August 21, 2019

ដោយ Donald Lee

សេអ៊ូល៖ ក្រុមហ៊ុនអាកាសចរណ៍លំដាប់ទីមួយរបស់ប្រទេសកូរ៉េខាងត្បូងបានធ្វើការប្រកាសដែលមិនធ្លាប់មានពីមុនមកថា ខ្លួននឹងកាត់បន្ថយជើងហោះហើរទៅកាន់ជប៉ុន ចំពេលមានសង្គ្រាមពាណិជ្ជកម្មរវាងកូរ៉េខាងត្បូង និងជប៉ុនដែលបានធ្វើឱ្យសេដ្ឋកិច្ចតំបន់អាស៊ីធ្លាក់ចុះអស់រយៈពេលជាច្រើនខែ។

ក្រុមហ៊ុនអាកាសចរណ៍កូរ៉េ Air Lines Co ប្រកាសថា ខ្លួននឹងផ្អាកផ្លូវចាប់ពីខែក្រោយនេះ ព្រោះប្រជាជនកូរ៉េខាងត្បូងរាប់លាននាក់បានចូលរួមធ្វើពហិការទំនិញ និងសេវាកម្មរបស់ជប៉ុនជុំវិញសំណងសម្រាប់ឧក្រិដ្ឋកម្មសម័យសង្គ្រាមលោកលើកទី ២ ប្រឆាំងនឹងមនុស្សជាតិ។

អ្នកនាំពាក្យរបស់ក្រុមហ៊ុនអាកាសចរណ៍កូរ៉េបានថ្លែងទៅកាន់ប្រព័ន្ធផ្សព្វផ្សាយនៅទីក្រុងសេអ៊ូលថា “ដើម្បីទូទាត់តម្រូវការទាបទៅជប៉ុន ក្រុមហ៊ុននឹងបង្កើនចំនួនជើងហោះហើរទៅកាន់ទីផ្សារជំនួសដូចជាប្រទេសចិនតំបន់អាស៊ីអាគ្នេយ៍ និងអូសេអានីដូចជាប្រទេស Guam អូស្ត្រាលី និងណូវែលហ្សេឡង់”។

ទីភ្នាក់ងារព័ត៌មានយ៉ុនហាប់ដែលមានមូលដ្ឋាននៅទីក្រុងសេអ៊ូលបានរាយការណ៍ថា ផ្លូវអាកាសជាង ៦០ ទៅកាន់ជប៉ុននឹងរងផលប៉ះពាល់។កាលពីថ្ងៃអង្គារ ក្រុមហ៊ុន Korean Air បានប្រកាសផ្អាកផ្លូវអាកាសប៊ូសានទៅកាន់អូសាកាដែលចាប់ផ្តើមនៅពាក់កណ្តាលខែ កញ្ញា។

ផ្លូវអាកាសកោះជេជូ-កោះអូសាកា និងកោះជេជូ-ណារីតានឹងត្រូវផ្អាកដំណើរការចាប់ពីខែ វិច្ឆិកា។លើសពីនេះទៀត ក្រុមហ៊ុនអាកាសចរណ៍ Korean Air នឹងបញ្ឈប់ការហោះហើរជាបណ្តោះអាសន្នពីទីក្រុងសេអ៊ូលទៅអាសាហ៊ីកាវ៉ា កាហ្គូស៊ីម៉ា និងកូម៉ាស៊ូដែលចាប់ផ្តើមនៅចុងខែ កញ្ញា។

ទំនាក់ទំនងរវាងប្រទេសយក្សសេដ្ឋកិច្ចជិតខាងទាំងពីរនេះកាន់តែយ៉ាប់យ៉ឺន ដោយសារជម្លោះជុំវិញការបញ្ជូនកូរ៉េខាងត្បូងរបស់ជប៉ុននៅឆ្នាំ ១៩១០ ដល់ ១៩៤៥ ដែលបានបង្ខំឲ្យជនជាតិកូរ៉េរាប់លាននាក់ធ្វើការឱ្យជប៉ុន និងបានបញ្ជាឱ្យស្ត្រីជនជាតិកូរ៉េជាង ២ សែននាក់ធ្វើការជាទាសករផ្លូវភេទដល់យោធាខ្លួន។

សង្រ្គាមពាណិជ្ជកម្មបានកើតឡើងដល់ចំណុចមួយដែលប្រទេសទាំងពីរបានវាយលុកគ្នាទៅវិញទៅមកពីបញ្ជីពាណិជ្ជកម្មដែលអាចរំខានដល់សង្វាក់ផ្គត់ផ្គង់បច្ចេកវិទ្យាសកល៕

ប្រធានសមាគម CVEA ដឹកនាំគណៈប្រតិភូទៅចូលរួមកិច្ចប្រជុំស្ដីពីអចលនទ្រព្យនៅប្រទេសមីយ៉ាន់ម៉ា

August 21, 2019

0

ដោយ ៖ រ៉ាណេត

ភ្នំពេញ ៖ ស្របទៅតាមគម្រោងនៃមហាសន្និបាត និងពិព័រណ៍បណ្តាញអចលនទ្រព្យអស៊ាន (ARENA) ដែលរៀបចំឡើងដោយប្រទេសមីយ៉ាន់ម៉ា ក្នុងទីក្រុងរ៉ងហ្គូនក្នុងនាមជាម្ចាស់ផ្ទះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានដឹកនាំគណៈប្រតិភូកម្ពុជាចំនួន៣២នាក់ដើម្បីចូលរួមនៅក្នុងព្រឹត្តិការណ៍ដ៏អស្ចារ្យប្រចាំឆ្នាំមួយនេះ។

មានប្រសាសន៍មុនពេលឡើងយន្តហោះចាកចេញពីប្រទេសកម្ពុជា កាលពីព្រឹកថ្ងៃទី២១ ខែសីហា ឆ្នាំ២០១៩ព្រឹកមិញនេះ ប្រធានសមាគមន៍អ្នកវាយតម្លៃ និងភ្នាក់ងារអចលនវត្ថុមកម្ពុជា (CVEA) លោក ច្រឹក សុខនីម បានមានប្រសាសន៍ប្រាប់ឱ្យដឹងថា តាមរយៈមហាព្រឹត្តិការណ៍មួយនេះ គ្រប់បណ្តាអ្នកដែលចូលរួមទាំងអស់នឹងទទួលបានចំណេះដឹងថ្មីៗស្ដីពីវិស័យអចលនទ្រព្យទាំងក្នុង និងក្រៅតំបន់ ជាពិសេស បានផ្សារភ្ជាប់ទំនាក់ទំនងដើម្បីស្វែងយល់ពីឱកាសនៃការចាប់ដៃសហការជាដៃគូជាមួយគ្នានៅក្នុងវិស័យមួយនេះ។

លោក ច្រឹក សុខនីម បានបន្តទៀតថា រយៈពេល៣ថ្ងៃ“កម្មវិធីមួយនេះនឹងត្រូវធ្វើឡើងរយៈពេល៣ថ្ងៃ ចាប់ពីថ្ងៃទី២២-២៤ ខែសីហា ឆ្នាំ២០១៩ ប៉ុន្តែដោយសារតែខ្ញុំជាប្រធានសមាគម និងជាអ្នកដឹកនាំគណៈប្រតិភូ កម្មវិធីតម្រូវឱ្យទៅមុនគេចំនួន១ថ្ងៃដើម្បីប្រជុំពីកិច្ចការមួយចំនួនរបស់សមាគម ARENA” ។

លោកបានបន្តទៀតថា “នៅក្នុងឱកាសនៃការចូលរួមនៅក្នុងកម្មវិធីនេះ ខ្ញុំបានត្រៀមរួចជាស្រេចក្នុងការនាំយកនូវចំណុចសំខាន់ៗពីឱកាសនៃការវិនិយោគលើវិស័យអលនទ្រព្យនៅកម្ពុជា ដើម្បីធ្វើការផ្សព្វផ្សាយទៅកាន់ឆាកអន្តរជាតិ ក្រោមការចូលរួមពីបណ្តាសមាជិករបស់ ARENA ប្រមាណ៧០០នាក់”។

លោកបានបន្តទៀតថា “ខ្ញុំបាននាំយកចំណុចសំខាន់ ៣ យ៉ាងពីវិស័យអចលនទ្រព្យនៅកម្ពុជាទៅចែករំលែកនៅក្នុងពិធីទាំងមូល”។ ចំណុចទាំង ៣ ដែលប្រធានសមាគម CVEA នាំយកទៅបង្ហាញបណ្តាប្រទេសនានាដែលបានចូកលរួម ដោយទី១ និយាយអំពីការអភិវឌ្ឍនៅក្នុងសម័យបច្ចេកវិទ្យាចូលទៅក្នុងទីផ្សារអចលនទ្រព្យ ទី២ តើវិស័យបច្ចេកវិទ្យាអាចចូលរួមធ្វើឱ្យវិស័យអចលនទ្រព្យមានភាពរីកចម្រើនយ៉ាងដូចម្ដេច ហើយទី៣ និយាយពីភាពរីកចម្រើននៃវិស័យអចលនទ្រព្យនៅក្នុងប្រទេសកម្ពុជា ដើម្បីផ្សព្វផ្សាយឱ្យសាកលលោកគេបានដឹងច្បាស់ពីការទទួលបានឱកាសវិនិយោគបន្ថែមទៀតនៅកម្ពុជា។

សមាជិក ARENA មានសមាជិកប្រមាណ ២០០០០ នាក់ ដែលនៅតែប្រទេសឡាវ និងប្រ៊ុយណេ មិនទាន់សម្រេចចិត្តចូលរួមជាមួយ ARENA នៅឡើយទេ។ ARENA ជាក្រុមប្រចាំតំបន់ដែលត្រូវបានឧទ្ទិសដល់ការជួយសមាជិករបស់ខ្លួននៅក្នុងផ្នែកច្បាប់ និងការកែលម្អទីផ្សារការបណ្តុះបណ្តាល និងកិច្ចសហប្រតិបត្តិការនានា ៕

រយៈពេល ៣ឆ្នាំ ជប៉ុនបានផ្តល់ហិរញ្ញបទានដល់កម្ពុជាចំនួន ៥៥០លានដុល្លារ

August 21, 2019

0

ដោយ វុត្ថា

ភ្នំពេញ៖ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ក្នុងអាណត្តិ ៣ឆ្នាំនៃការបំពេញបេសកកម្មការទូតរបស់ លោក Hidehisa Horinouchi នៅកម្ពុជានេះ កម្ពុជា-ជប៉ុន បានចុះហត្ថលេខា លើកិច្ចព្រមព្រៀងហិរញ្ញប្បទានសហប្រតិបត្តិការ (Japan ODA) មានទឹកប្រាក់សរុបប្រមាណជាង ៥៥០លានដុល្លារ អាមេរិកក្នុងនោះហិរញ្ញប្បទានឥតសំណងមានទឹកប្រាក់ប្រមាណជិត ១៥០លានដុល្លារអាមេរិក។

លោកឧបនាយករដ្ឋមន្ត្រី អូន ព័ន្ធមុនីរ័ត្ន នៅក្នុងជំនួបជាមួយ លោក Hidehisa ; Horinouchi ឯកអគ្គរាជទូតជប៉ុនចប់អាណត្តិ បានឱ្យដឹងកាលពីពេលកន្លងទៅថ្មីៗនេះថា ហិរញ្ញប្បទានសហប្រតិបត្តិការ (Japan ODA)ទាំងនេះ គឺសម្រាប់គាំទ្រលើវិស័យជាច្រើនរួមមាន ផ្លូវ ស្ពាន ការផ្គត់ផ្គង់ទឹកស្អាត ថាមពលអគ្គិសនី អប់រំ សុខាភិបាល និងការកសាងហេដ្ឋារចនាសម្ព័ន្ធននា ។

លោកឧបនាយករដ្ឋមន្ត្រី បន្ថែមថា ចំណែកទឹកប្រាក់ប្រមាណជាង ៤០០ លានដុល្លារអាមេរិក ជាឥណទានសម្បទានសម្រាប់ហិរញ្ញប្បទានបន្ថែម ដល់គម្រោងធ្វើឱ្យប្រសើរឡើងនូវ កំណាត់ផ្លូវជាំតិលេខ ៥ (ស្ពានព្រែកក្តាម-ក្រុងប៉ោយប៉ែត) គម្រោងអភិវឌ្ឍន៍ចំណតកុងតែន័រ កំពង់ផែស្វយ័តក្រុងព្រះសីហនុ គម្រោងស្តារឡើងវិញនូវប្រព័ន្ធធារាសាស្ត្រ និងគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនី ។ល។

លោកឧបនាយករដ្ឋមន្ត្រី អូន ព័ន្ធមុនីរ័ត្ន បញ្ជាក់ថា វិភាគទានរបស់ប្រជាជនជប៉ុន សុទ្ធសឹងតែគាំទ្រដល់យុទ្ធសាស្ត្រនៃការអភិវឌ្ឍជាតិរបស់កម្ពុជា។លោកឧបនាយករដ្ឋមន្ត្រីបញ្ជាក់ទៀតថា ជាមួយគ្នានេះដែរ សម្រាប់ឆ្នាំ ២០១៨ កន្លងមកនេះ ទំហំនៃការវិនិយោគឯកជនពីប្រទែសជប៉ុន មានទឺកប្រាក់ប្រមាណ ៤៤០ លានដុល្លារអាមេរិក ។

គិតត្រឹមឆមាសទី ១ ឆ្នាំ ២០១៩ ទំហំនៃការវិនិយោគ និងពាណិជ្ជកម្មជប៉ុន មានទឹកប្រាក់កើឡើងប្រមាណ ៥០០លានដុល្លារអាមេរិក រីឯការនាំចេញទៅប្រទេសជប៉ុនមានទំហំទឹកប្រាក់ប្រមាណជាំង ១៧០០ លានដុល្លារអាមេរិក។

ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលប៉ុន ដដែលតែងតែរក្សា និងបានផ្តល់នូវកិច្ចសហប្រតិបត្តិការល្អប្រសើរសម្រាប់កម្ពុជា និងបានថ្លែងអំណរគុណយ៉ាងជ្រាលជ្រៅចំពោះ លោក Hidehisa HORINOUCHI ក្នុងអាណត្តិការទូត ដែលបានបំពេញភារកិច្ច និងតួនាទីយ៉ាងសំខាន់ជួលដល់ការអភិវឌ្ឍប្រទេសកម្ពុជា ដោយសម្រេចបាននូវសមិទ្ធិផលផ្លែផ្កាជាច្រើន ទាំងក្នុងទំនាក់ទំនងការទូត កិច្ចសហប្រតិបត្តិការកម្ពុជា-ជប៉ុន និងបានរួមចំណែកយ៉ាងសកម្មដល់ការអភិវឌ្ឍន៍សេដ្ឋកិច្ច-សង្គមកម្ពុជា។

លោក Hidehisa Horinouchi បានសម្តែងនូវសេចក្តីសោមនស្សរីករាយដែលបានមកបំពេញបេសកម្មកម្មការទូតនៅកម្ពុជា និងកោតសរសើរដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលបានសម្រេចបាននូវកំណើនសេដ្ឋកិច្ចខ្ពស់ និងរីកចម្រើនស្ទើរគ្រប់វិស័យ ។

លោកបន្តថា រដ្ឋាភិបាលជប៉ុននឹងបន្តពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការនានាលើគ្រប់វិស័យអាទិភាព ជាមួយកម្ពុជា រួមាំងបន្តគាំទ្រផ្នែកហិរញ្ញវត្ថុ និងផ្នែកបច្ចេកទេស ដើម្បីចូលរួមចំណែកដល់ការអភិវឌ្ឍ ការវិនិយោគសាធារណៈ និងឯកជននានានៅកម្ពុជា៕

រដ្ឋាភិបាលចិនគាំទ្រកម្ពុជា ក្នុងការប្រកាសផ្អាកការចេញអាជ្ញាប័ណ្ណអាជីវកម្មល្បែងអនឡាញ

August 21, 2019

0

ដោយ ម៉ាណេត

ប៉េកាំង៖ រដ្ឋាភិបាលចិនបានកោតសរសើរចំពោះកិច្ចខិតខំប្រឹងប្រែងរបស់កម្ពុជា និងហ្វីលីពីនដើម្បីកាត់បន្ថយផលប៉ះពាល់ជាអប្បបរមានៃប្រតិបត្តិការល្បែងស៊ីសងតាមអ៊ិនធើណេតក្នុងស្រុករបស់ប្រទេសទាំងពីរ។ នេះបើយោងតាមគេហទំព័រ CalvinAyre ចុះផ្សាយព័ត៌មាននៅថ្ងៃនេះ។

នៅថ្ងៃអង្គារនេះសន្និសីទសារព័ត៌មានទៀងទាត់របស់ក្រសួងការបរទេសលោក Geng Shuang បានលើកឡើងនូវសំណួរមួយចំនួនទាក់ទងនឹងសេចក្តីប្រកាសរបស់កម្ពុជានាពេលថ្មីៗនេះដែលថា ខ្លួននឹងបញ្ឈប់កម្មវិធីផ្តល់អាជ្ញាប័ណ្ណល្បែងស៊ីសងតាមអ៊ិនធើណេត ក៏ដូចជាហ្វីលីពីនប្រកាសផ្អាកក្នុងការចេញអាជ្ញាប័ណ្ណលេងល្បែងអនឡាញថ្មី។

លោក Geng បាននិយាយថា ចិនសូមកោតសរសើរយ៉ាងខ្លាំងចំពោះការសម្រេចចិត្តរបស់កម្ពុជាក្នុងការហាមឃាត់ការលេងល្បែងតាមអ៊ិនធើណេតដោយផ្អែកលើជំនឿរបស់ក្រសួងថា វានឹងជួយការពារផលប្រយោជន៍របស់កម្ពុជា និងចិនព្រមទាំងពង្រឹងកិច្ចសហប្រតិបត្តិការ ពង្រឹងច្បាប់ និងទំនាក់ទំនងមិត្តភាពរបស់ប្រទេសទាំងពីរ។

នៅថ្ងៃទី១៨ ខែសីហា ឆ្នាំ២០១៩កន្លងមកនេះ រដ្ឋាភិបាលកម្ពុជាបានចេញសារាចរណ៍ណែនាំ ឲ្យបញ្ឈប់ការចេញអាជ្ញាប័ណ្ណឲ្យប្រកបអាជីវកម្មល្បែងភ្នាល់ តាមម៉ាស៊ីនអេឡិកត្រូនិកគ្រប់ប្រភេទក្នុងនិងក្រៅប្រទេស។សាលារាចរណ៍ណែនាំនេះ ត្រូវបានចុះហត្ថលេខាដោយប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ។

នៅក្នុងសារាចរណែនាំ រាជដ្ឋាភិបាលបានធ្វើការណែនាំចំនួន៣ចំណុចដូចខាងក្រោម ទី១ មន្ត្រីនគរបាលយុត្តិធម៌ និងអាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវបង្កើនការស្រាវជ្រាវ និងបង្ក្រាបអាជីវកម្មល្បែងភ្នាល់ តាមម៉ាស៊ីនអេឡិចត្រូនិច តាមរយៈអ៉ិនធើណេនអនឡាយ ក្នុងនិងក្រៅប្រទេសគ្រប់ប្រភេទ និងគ្រប់រូបភាព ដែលធ្វើសកម្មភាពដោយមិនមានអាជ្ញាប័ណ្ណពីក្រសួង ស្ថាប័នមានសមត្ថកិច្ច។

ទី២ ចំពោះអាជីវកម្មល្បែងភ្នាល់តាមម៉ាស៊ីន អេឡិចត្រូនិចតាមរយៈអ៉ិនធើណែតអនឡាយក្នុង និងក្រៅប្រទេសដែលមានអាជ្ញាប័ណ្ណ ត្រូវបានអនុញ្ញាតឲ្យធ្វើសកម្មភាពរហូតផុតសុពលភាព ដែលបានកំណត់ក្នុងអាជ្ញាប័ណ្ណ។

បន្ទាប់ពីនេះក្រសួងសេដ្ឋកិច្ច និងហិរញ្ញវត្ថុមិនបន្តសុពលភាព នៃអាជ្ញាប័ណ្ណអនុញ្ញាត ឲ្យប្រកបអាជីវកម្មល្បែងភ្នាល់ប្រភេទនេះតទៅទៀតឡើយ។ ទី៣ រាជរដ្ឋាភិបាលបញ្ឈប់ការផ្តល់គោលការណ៍ និងអាជ្ញាប័ណ្ណអនុញ្ញាតឲ្យប្រកបអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៉ិនធើណេតអនឡាយទាំងក្នុង និងក្រៅព្រះរាជាណាចក្រកម្ពុជា ចាប់ពីថ្ងៃចុះហត្ថលេខាលើសារាចរណែនាំនេះតទៅ។

ការចេញសារាណែនាំនេះ ធ្វើឡើងបន្ទាប់ពីរាជរដ្ឋាភិបាលសង្កេតឃើញថា សកម្មភាពអាជីវកម្មល្បែងភ្នាល់ តាមម៉ាស៊ីនអេឡិចត្រូនិចតាមអយៈអ៉ិនធើណេត ក្នុង និងក្រៅប្រទេសមួយចំនួន បានទទួលគោលការណ៍អនុញ្ញាតពីរាជរដ្ឋាភិបាល និងមួយចំនួនទៀតលួចលាក់ធ្វើសកម្មភាពនៅតាមទីតាំងផ្សេងៗគ្នា ហើយពួកឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ដើម្បីធ្វើសកម្មភាពបោកប្រាស់ជំរិតទារប្រាក់ពីជនរងគ្រោះទាំងក្នុង និងក្រៅប្រទេស ដែលធ្វើឲ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងរបៀបរៀបរយក្នុងសង្គម៕

រដ្ឋមន្ត្រីបរិស្ថានមានបំណងឱ្យម្ចាស់បុរី និងម្ចាស់សំណង់ប្រើប្រាស់អំពូល LED ដើម្បីការការពារបរិស្ថាន

August 21, 2019

0

ដោយ វុត្ថា

ភ្នំពេញ៖ រដ្ឋមន្ត្រីក្រសួងបរិស្ថានជំរុញឱ្យម្ចាស់បុរី និងម្ចាស់សំណង់ដែលកំពុងសង់នៅក្នុងប្រទេសកម្ពុជាប្រើប្រាស់អំពូល LED ដើម្បីការការពារបរិស្ថាន និងស្របតាមគោលការណ៍រៀបចំទីក្រុងវៃឆ្លាត (Smart City)។

លោក សាយ សំអាល់ រដ្ឋមន្ត្រីក្រសួងបរិស្ថាន នៅក្នុងជំនួបពិភាក្សាការងារជាមួយ លោក Yoshihisa KAINUMA ប្រធានក្រុមហ៊ុន Minebea Mitsumi បានឱ្យដឹងកាលពីថ្ងៃទី ២០ ខែសីហាម្សិលមិញនេះថា លោកបានផ្តួចផ្តើមគំនិតរៀបចំសិក្ខាសាលាដើម្បីអនុញ្ញាតក្រុមហ៊ុនបង្ហាញនូវបច្ចេកវិទ្យាដែលជួយដល់បរិស្ថានដល់ម្ចាស់បុរី និងម្ចាស់សំណង់នានា។

លោកថា គម្រោងទីក្រុងវៃឆ្លាតតាមរយៈការប្រើប្រាស់ចរន្តអគ្គិសនីជាមួយនឹងអំពូលដែលស៊ីភ្លើងតិចមិនមែនត្រឹមតែជួយសន្សំសំចៃចរន្តអគ្គិសនី ប៉ុណ្ណោះទេ ប៉ុន្តែក៏បានចូលរួមកាត់បន្ថយការបំពុលដោយពន្លឺ ជួយសន្សំសំចៃថវិកា និងចូលរួមការពារបរិស្ថាន ហើយធ្វើឱ្យទីក្រុងមានផាសុកភាពក្នុងការរស់នៅ។

លោករដ្ឋមន្ត្រីបន្ថែមថា គោលដៅរបស់រាជរដ្ឋាភិបាលកម្ពុជា គឺនឹងធ្វើឱ្យកម្ពុជាក្លាយជាប្រទេសដែកលមានចំណូលខ្ពស់នៅឆ្នាំ ២០៥០ ពោលគឺមិនត្រឹមតែជាប្រទេសអ្នកមានទេ ប៉ុន្តែប្រជាពលរដ្ឋពោរពេញទៅដោយចំណេះដឹង ការទទួលខុសត្រូវ ប្រទេសកម្ពុជាប្រកបដោយផាសុកភាព ទីក្រុងគួរជាទីទាក់ទាញ និងមានសុខដុមរមណីយកម្មសង្គម។

លោក Yoshihisa KAINUMA បានរំឭកថា លោកបានទទួលកិត្តិយសដ៏ខ្ពង់ខ្ពស់បានជួបពិភាក្សាការងារជាមួយសម្តេចតេជោ នាយករ្ឋមន្ត្រីនៅអំឡុងពេលធ្វើទស្សនកិច្ចនៅប្រទេសជប៉ុនដើម្បីជម្រាបជូនសម្តេចអំពីគម្រោងទីក្រុងវៃឆ្លាត ហើយពេលនោះសម្តេចតេជោ ហ៊ុន សែន បានជំរុញឱ្យមការដំឡើងអំពូលដែលសន្សំសំចៃចរន្តអគ្គិសនីនេះឱ្យបានច្រើននៅកម្ពុជា។

តាមលោកប្រធាន Yoshihisa KAINUMA ក្រុមហ៊ុន Minebea Mitsumi បានឱ្យដឹងគម្រោងនេះត្រូវបានអនុវត្តនៅរាជធានីភ្នំពេញ និងខេត្តសៀមរាប។ សរុប អំពូល LED ចំនួន ៧៣៥៩ បង្គោលដែលបម្រើឱ្យទម្រង់នៃទីក្រុងវៃឆ្លាតនឹងត្រូវដាក់បរតិបត្តិការនៅឆ្នាំនេះ។

បច្ចុប្បន្ននេះ ក្រុមហ៊ុនបានដំឡើងបានចំនួន ១១៨៧ បង្គោលនៅតាមមហាវិថីចំនួន ៣ នៅរាជធានីភ្នំពេញ។ ចំណែកនៅខេត្តសៀមរាប ក្រុមហ៊ុនបានចុះអនុស្សរណនៃការយោគយល់ជាមួយរដ្ឋបាលសាលាខេត្តសៀមរាបរួចហើយដើម្បីដំឡើង LED បន្ថែមចំនួន ៥០០ ទៀត។ គម្រោងនេះក៏នឹងអាចបន្តអនុវត្តនៅខេត្ត្តព្រះសីហនុដែរ។

លោកបញ្ជាក់ថា ក្រុមហ៊ុនបានដំឡើងអំពូល LED សម្រាប់ការបំភ្លឺផ្លូវពេលយប់ ហើយអំពូលភ្លើងនេះបានចូលរួមក្នុងការ សន្សំសំចៃការប្រើប្រាស់ចរន្តអគ្គិសនី។ អំពូលភ្លើងទាំងនេះត្រូវបានផលិតឡើងដោយក្រុមហ៊ុនជប៉ុនដែលវិនិយោគនៅកម្ពុជា និងប្រើប្រាស់កម្លាំងពលរដ្ឋកម្ពុជា។

ក្រុមហ៊ុនមីនេបៀនេះបាននឹងកំពុងផលិតនូវផលិតផលដែលមានបច្ចេកវិទ្យាខ្ពស់ផ្តល់គុណប្រយោជន៍ដល់បរិស្ថានស្រប តាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ៕

តើពាក្យសាកលភាវូបនីយកម្ម និងដុល្លាររូបនីយកម្មមានន័យដូចម្តេច?

August 21, 2019

0

ដោយ ប៊ី

ភ្នំពេញៈ ពាក្យដ៏សំខាន់ពីរដែលតែងតែអ្នកសេដ្ឋកិច្ច ឬសេដ្ឋវិទូនិយាយជារឿយៗ គឺពាក្យសាកលភាវូបនីយកម្ម និងដុល្លារូបនីយកម្ម។ តើពាក្យទាំងពីរនេះមានន័យដូចម្តេច?។

គេហទំព័រ Propertyarea.asia សូមលើកយកពាក្យទាំងនេះមកពន្យល់ ដើម្បីបានជាចំណេះដឹងដល់អ្នកអាន។

សាកលភាវូបនីយកម្មៈ សាកលភាវូបនីយកម្ម ជាចលនាបំលាស់ប្តូរដោយសេរីនៃទំនិញ សេវាកម្ម និងមនុស្សនៅទូទាំងពិភពលោកដោយភាពសមរម្យ និងសមាហរណកម្ម។ globalization ឬ សាកលភាវូបនីយកម្មអាចត្រូវបានគេចាត់ទុកថាជា លទ្ធផលនៃការបើកសេដ្ឋកិច្ចសាកល និងជាការប្រខិតខំពាណិជ្ជកម្មរវាងរដ្ឋ និងរដ្ឋ។

លើសពីនេះ ប្រទេសទាំងឡាយ ដែលបានឈានដល់ពាណិជ្ជកម្មអន្តរជាតិយ៉ាងខ្លាំងខ្លាបំផុត និងការវិនិយោគអន្តរជាតិរបស់ពួកគេបានបើកទូលាយ សម្រាប់សេដ្ឋកិច្ចរបស់ពួកគេ និងជាសាកល។ ជាលទ្ធផលគឺការកើនឡើងនៃទំនាក់ទំនង និងការរួមបញ្ចូលគ្នានូវសេដ្ឋកិច្ចពិភពលោក។

ដុល្លាររូបនីយកម្មៈ (ក្រៅផ្លូវការ) ដុល្លារូបនីយកម្ម ត្រូវបានកំណត់ដោយការកាន់កាប់ទ្រព្យសម្បត្តិ និងបំណុលដែលជារូបិយប័ណ្ណបរទេស គឺជាក្តីកង្វល់នៃគោលនយោបាយនៅក្នុងការកើនឡើងនៃសេដ្ឋកិច្ចកំពុងអភិវឌ្ឍន៍។ ក្រដាសនេះនិយាយពីការជជែកដេញដោលដុល្លាររូបនីយកម្ម ពីទស្សនវិស័យនេះ ដោយមានគោលដៅកំណត់ដំណាក់កាលសម្រាប់ការពិភាក្សាលម្អិត និងផ្តោតលើថា តើបដិដុល្លាររូបនីយកម្មគួរតែជាគោលបំណងគោលនយោបាយ ហើយបើដូច្នេះតើអ្វីវិធីល្អបំផុតដើម្បីសម្រេចគោលបំណងនេះ។

យើងពិនិត្យមើលទ្រឹស្តីដែលមានស្រាប់ នៃការធ្វើដុល្លាររូបនីយកម្ម និងទំហំដែលពួកគេត្រូវបានគាំទ្រដោយភ័ស្តុតាង ដែលមានបង្ហាញយុទ្ធសាស្ត្រសំខាន់ៗ សម្រាប់ការកែទម្រង់ និងស្នើបញ្ជីនៃអនុសាសន៍នៃការរៀបចំគោលនយោបាយ៕

បារាំងនឹងធ្វើជាម្ចាស់ផ្ទះនៃកិច្ចប្រជុំកំពូល G-7 ខណៈវិបត្តិសេដ្ឋកិច្ចសកលកំពុងកើតឡើង

August 21, 2019

0

ដោយ Donald Lee

ភ្នំពេញៈ មន្ត្រីជាន់ខ្ពស់មកពីប្រទេស ដែលមានសេដ្ឋកិច្ចធំៗលើពិភពលោកនឹងជួបប្រជុំគ្នានៅបារាំងនៅថ្ងៃសៅរ៍ចុងសប្តាហ៍នេះ ខណៈការភ័យខ្លាចវិបត្តិសេដ្ឋកិច្ចនៅតែបន្តកើតមាន។

មន្ត្រីមកពីអាមេរិក បារាំង អង់គ្លេស អាល្លឺម៉ង់ អ៊ីតាលី ជប៉ុន និងកាណាដានឹងជួបជុំគ្នានៅឯកិច្ចប្រជុំកំពូលប្រចាំឆ្នាំ G-7 ដែលប្រារព្ធធ្វើនៅទីក្រុង Biarritz ប្រទេសបារាំងនៅថ្ងៃ សៅរ៍នេះ។

កិច្ចប្រជុំនេះធ្វើឡើងក្នុងពេលវេលាដ៏សំខាន់មួយ ដែលអ្នកសេដ្ឋកិច្ចជាច្រើនកំពុងព្យាករណ៍ពីការធ្លាក់ចុះនៃសេដ្ឋកិច្ចពិភពលោក ហើយសង្គ្រាមពាណិជ្ជកម្មរវាងអាមេរិក និងចិនហាក់ដូចជាមិនមានដំណោះស្រាយទេ។

យោងតាមក្រុមអ្នកវិភាគបានឲ្យដឹងថា សេដ្ឋកិច្ចពឹងផ្អែកលើពាណិជ្ជកម្មដ៏ខ្លាំងក្លាដូចជា សឹង្ហបូរី និងអាល្លឺម៉ង់ទំនងជាធ្លាក់ចូលក្នុងវិបត្តិនៅឆ្នាំនេះ។

ក្រុមសេដ្ឋវិទូបានចង្អុលបង្ហាញវោហារស័ព្ទ ប្រធានាធិបតីអាមេរិកដូណាល់ត្រាំថាជាកត្តាសំខាន់សម្រាប់ការធ្លាក់ចុះអត្រាកំណើនសេដ្ឋកិច្ចពិភពលោក។

របាយការណ៍របស់ Bloomberg បានរកឃើញថា ភាពចលាចលផ្នែកសេដ្ឋកិច្ចដែលបង្កឡើងដោយសង្រ្គាមពាណិជ្ជកម្មអាមេរិក ចិន អាចបណ្តាលឱ្យផលិតផលក្នុងស្រុកសរុបរបស់ពិភពលោក បាត់បង់តម្លៃដែលមានតំលៃប្រហែល៥៨៥ពាន់លានដុល្លារក្នុងឆ្នាំ២០២១ ។

ភាពតានតឹងផ្នែកពាណិជ្ជកម្មបានបង្កភាពវឹកវរយ៉ាងខ្លាំង ក្នុងរយៈពេលប៉ុន្មានខែចុងក្រោយនេះ។ វាមិនទំនងថា កិច្ចប្រជុំកំពូលនៃក្រុម G7 នឹងបញ្ចប់ដោយសេចក្តីថ្លែងការណ៍រួមមួយ។

មន្ត្រីជប៉ុនមួយរូប បានប្រាប់សារព័ត៌មាន Reuters ថា “វាមានសារៈសំខាន់ណាស់សម្រាប់មនុស្សគ្រប់គ្នា ក្នុងការបង្កើតការយល់ដឹងរួមគ្នា តាមរយៈការជជែកដេញដោលគ្នា។ ប៉ុន្តែវាពិបាកក្នុងការបញ្ជូនសារទៅកាន់ពិភពលោកទាំងមូល នៅពេលដែលសេចក្តីថ្លែងការណ៍មិនត្រូវបានចេញ។

ប្រសិនបើសេចក្តីថ្លែងការណ៍រួមមិនត្រូវបានចេញផ្សាយ វានឹងក្លាយជាលើកដំបូងនៅក្នុងប្រវត្តិសាស្ត្រនៃកិច្ចប្រជុំកំពូល G-7 ដែលសេចក្តីថ្លែងការណ៍មួយមិនត្រូវបានព្រមព្រៀង៕

ផ្សារទំនើបសេន ជូរីផ្លាហ្សាចាប់ផ្តើមដំណើរការសាងសង់ជាមួយនឹងការរចនាដ៏ទាក់ទាញ

August 21, 2019

0

ដោយៈ រ៉ាណេត

ភ្នំពេញៈ បន្ទាប់ពីមានភាពចម្រូងចម្រាស់ ដែលកើតចេញពីបណ្តាអាជីវករលក់ដូរនៅផ្សារ សេន ជូ រី ស្ថិតនៅបណ្តោយមហាវិថីសហព័ន្ធរុស្សី ប្រឆាំងទៅនឹងគម្រោងប្រែក្លាយផ្សារប្រពៃណីដ៏ចំណាស់មួយនេះ ទៅជាផ្សារទំនើបកម្ពស់៧ជាន់នោះ ពេលនេះត្រូវបានក្រុមហ៊ុនម្ចាស់គម្រោង និងអជ្ញាធររដ្ឋបាលសាលារាជធានីភ្នំពេញ ធ្វើការសម្របសម្រួលដើម្បីឈានទៅចាប់ផ្តើមសាងសង់គំរោងនេះហើយ។

នៅត្រឹមរយៈពេលសប្ដាហ៍ចុងក្រោយនេះ ការតវ៉ាយ៉ាងខ្លាំងរហូតធ្វើការបិតផ្លូវប្រឆាំងទៅនឹងគម្រោងអភិវឌ្ឍផ្សារ សេន ជូ រី ដែលស្ថិតនៅបណ្តោយមហាវិថីសហព័ន្ធរុស្សី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ទៅជាផ្សារទំនើបលំដាប់អន្តរជាតិ មានកម្ពស់៧ជាន់ ដោយតម្រូវអាជីវករធ្លាប់លក់ដូរនៅជុំវិញផ្សារទាំងមូល ដែលមិនមានស្ដង់សរុបប្រមាណជិត៨០០នាក់ត្រូវបញ្ចប់សកម្មភាព។

រដ្ឋបាលសាលារាជធានីភ្នំពេញ រួមទាំងអាជ្ញាធរ ខណ្ឌពោធិ៍សែនជ័យ និងក្រុមហ៊ុន សេន ជូ រី ហ្គ្រុបបានបង្ហាញគោលនយោបាយ ដោះស្រាយច្បាស់លាស់ជូនអាជីវករ ដោយបានឯកភាពរៀបចំកន្លែងលក់ដូរ បណ្តោះអាសន្នជូនដល់អតីតអាជីវករ ដែលធ្លាប់លក់នៅ ផ្សារ សេន ជូ រី ផ្លា ហ្សាចាស់ ក្នុងពេលអនុវត្តគម្រោងសាងសង់ផ្សារទំនើបថ្មី ដែលត្រូវចំណាយពេលសាងសង់២ឆ្នាំ និងលេចចេញជារូវរាងនាឆ្នាំ២០២១ខាងមុខនេះ។

ទីតាំងដែលត្រូវក្លាយជាផ្សារលក់ដូរបណ្តោះអាសន្ន រយៈពេល២ឆ្នាំក្នុងការសាងសង់ផ្សារទំនើបដែលមានកម្ពស់៧ជាន់នេះ តម្រូវយកសួនកុមារពោធិ៍ចិនតុង ស្ថិតនៅមហាវិថី សហព័ន្ធរុស្ស៊ី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ (ទល់មុខផ្សារ សេន ជូ រី ចាស់)។

កាសាងសង់ផ្សារទំនើប សេនជូរីថ្មី ដែលមានកម្ពស់រហូតដល់ទៅ៧ជាន់នេះ ត្រូវបានតំណាងក្រុមហ៊ុន និងអាជ្ញាធររាជធានីបញ្ជាក់ថា ដោយសារស្ថានភាពផ្សារសេន ជូ រី ផ្លា ហ្សា បច្ចុប្បន្នមានសភាពចាស់ទ្រុឌទ្រោម ពុំមានសោភ័ណភាព អនាម័យ ទាំងក្នុងផ្សារ និងនៅក្រៅផ្សារ ជាពិសេសនៅបរិវេណជុំវិញផ្សារតែម្ដង ដោយសារអាជីវករលក់ដូរទំនិញគ្រប់ប្រភេទនៅតាមដងផ្លូវ និងលើចិញ្ចើមផ្លូវ ធ្វើឱ្យបាត់បង់នូវសោភ័ណភាព អនាម័យ បរិស្ថាន។

រដ្ឋបាលរាជធានីភ្នំពេញ រួមទាំងអាជ្ញាធរខណ្ឌ ពោធិ៍សែនជ័យ បានកំណត់យកថ្ងៃទី ២៣ ខែសីហា ឆ្នាំ ២០១៩ ដើម្បីប្រជុំដោះស្រាយជាមួយអាជីវករ អ្នកតវ៉ា ។

ដោយឡែក អ្នកតំណាងក្រុមហ៊ុន សេន ជូ រី ផ្លាហ្សា បានបញ្ជាក់យ៉ាងច្បាស់ថា ក្រុមហ៊ុន មានគោលនយោបាយច្បាស់លាស់ ក្នុងការដោះស្រាយជូនអាជីវករទាំងអស់នៅផ្សារ សេន ជូ រី គឺ ដូចជានៅពេលសាងសង់ផ្សារទំនើបថ្មីនេះ ក្រុមហ៊ុនបានខ្ចីសួន កុមារ ពោធិ៍ចិនតុង នៅមុខផ្សារ សេន ជូ រី ចាស់ ដើម្បីសាងសង់ផ្សារ បណ្តោះអាសន្នឱ្យ អាជីវករលក់ដូរ។

ក្រុមហ៊ុនមិនយកប្រាក់ឈ្នួលលើការលក់ដូរនៅផ្សារបណ្តោះអាសន្ននេះទេ ។ នៅពេល សាងសង់ផ្សារថ្មីរួចរាល់ ទើបក្រុមហ៊ុនយកថ្លៃសេវាជួលតូបទាប បំផុត ដូចការព្រមព្រៀង ខាងលើក្នុងថ្ងៃប្រជុំផ្សព្វផ្សាយ កាលពី ថ្ងៃទី៤ ខែសីហា ឆ្នាំ ២០១៩ ៕

ការសរសេរលើបណ្តាញសង្គម Twitter របស់ Donald Trump នឹងធ្វើឲ្យប៉ះពាល់ដល់ GDP ពិភពលោកក្នុងទឹកប្រាក់ ៥៨៥ពាន់លានដុល្លារ

August 21, 2019

0

ដោយ Donald Lee

ភ្នំពេញៈ សង្គ្រាមពាណិជ្ជកម្មអាមេរិក ចិនកំពុងធ្វើឱ្យសេដ្ឋកិច្ចពិភពលោកខាតបង់ប្រាក់រាប់រយលានដុល្លារ។ នេះបើយោងតាមរបាយការណ៍សេដ្ឋកិច្ច Bloomberg ដែលចេញផ្សាយកាលថ្មីៗនេះ។

សេដ្ឋវិទូបានប្រៀបធៀបសំណុំទិន្នន័យ នៃសេដ្ឋកិច្ចពិភពលោកដែលមានភាពច្របូកច្របល់សព្វថ្ងៃ និងការព្យាករណ៍សេដ្ឋកិច្ចពិភពលោក ដោយគ្មានសង្គ្រាមពាណិជ្ជកម្ម។

អ្នកសេដ្ឋកិច្ចបានរកឃើញថា សង្គ្រាមពាណិជ្ជកម្មមានភាពវឹកវរ និងកំពុងបង្កឱ្យមានការរំខានយ៉ាងខ្លាំង នៅក្នុងបណ្តាញផ្គត់ផ្គង់ផលិតកម្មសំខាន់ៗ នៅជុំវិញពិភពលោក និងភាពមិនប្រាកដប្រជា ដែលនឹងធ្លាក់ចុះផលិតផលក្នុងស្រុកសរុប០,៦ ភាគរយនៅឆ្នាំ ២០២១ ។

មូលនិធិរូបិយវត្ថុអន្តរជាតិ(IMF)បានព្យាករថា ផលិតផលក្នុងស្រុកសរុបរបស់ពិភពលោកនៅឆ្នាំ២០២១ នឹងមានតម្លៃប្រមាណ៩៧ ទ្រីលានដុល្លារ។ នោះមានន័យថា ចលាចលសេដ្ឋកិច្ច ដែលបង្កឡើងដោយសង្គ្រាមពាណិជ្ជកម្ម អាចស្មើនឹង៥៨៥ពាន់លានដុល្លារ។

របាយការណ៍បានសន្និដ្ឋានថា ភាពច្របូកច្របល់ និងភាពមិនប្រាកដប្រជានេះដែលភាគរយបណ្តាលមក ពីការសរសេរលើបណ្តាញសង្គម Twitter ដោយប្រធានាធិបតីអាមេរិក Trump គឺច្រើនជាងទ្វេដង នៃថ្លៃពន្ធលើទំនិញអាមេរិក និងចិន។

សេដ្ឋវិទូបានលើកឡើងនៅក្នុងរបាយការណ៍ថា “លើបណ្តាញសង្គម Twitter គឺខ្លាំងជាងពន្ធគយ។

សេដ្ឋវិទូ៖ វិបត្តិសេដ្ឋកិច្ចធ្លាក់ចុះ

ការស្ទង់មតិរបស់អ្នកសេដ្ឋកិច្ចកំពូលរបស់ពិភពលោកបានរកឃើញថា ភាគច្រើនជឿជាក់ថា សេដ្ឋកិច្ចពិភពលោក និងសេដ្ឋកិច្ចអាមេរិក នឹងឆ្ពោះទៅរកការធ្លាក់ចុះ។ នេះបើយោងតាមសមាគមសេដ្ឋកិច្ចពាណិជ្ជកម្មជាតិ។

នៅពេលអ្នកសារព័ត៌មានសួរលោកTrump អំពីការស្ទង់មតិ លោកបានបដិសេធយ៉ាងច្បាស់ពីទស្សនៈរបស់សេដ្ឋវិទូ។

លោក Trump បាននិយាយកាលពីថ្ងៃអាទិត្យថា “ខ្ញុំមិនគិតថាយើងកំពុងមានវិបត្តិសេដ្ឋកិច្ចទេ។ លោកបានបន្ថែមថា “យើងធ្វើបានល្អណាស់ អ្នកប្រើប្រាស់របស់យើងជាអ្នកមាន”៕

ចំណេះដឹង! តើគោលនយោបាយលើកទឹកចិត្តគាំទ្រការងារគ្រប់គ្រងលំនៅស្ថានតម្លៃសមរម្យមានសារៈសំខាន់ដូចម្តេច?

August 21, 2019

0

ដោយ វុត្ថា

ភ្នំពេញៈ គោលនយោបាយលើកទឹកចិត្ត និងឯកសារបច្ចេកទេសដែលគាំទ្រការងារគ្រប់គ្រងលំនៅស្ថាន ដែលមានតម្លៃសមរម្យត្រូវបានរៀបចំឡើង មានលក្ខណៈសម្បត្តិដល់អតិថិជនគោលដៅដែលអាចទទួលបានសិទ្ធិ ក្នុងការទិញលំនៅឋានតម្លៃសមរម្យ លក្ខខណ្ឌកំណត់ក្រោយការទិញលំនៅឋានតម្លៃសមរម្យ និងនិតិវិធី នៃការដាក់ពាក្យស្នើសុំទិញ ឬជួលលំនៅឋានតម្លៃសមរម្យ។

រដ្ឋាភិបាលកម្ពុជាបានដាក់ចេញនូវគោលនយោបាយស្ដីពី ការលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍលំនៅឋានតម្លៃសមរម្យ និងឯកសារបច្ចេកទេសគាំទ្រនេះ គឺដើម្បីធានាសិទ្ធទទួលបានលំនៅឋានសមរម្យ ជូនប្រជាជន និងសម្រាប់គាំទ្រដល់ការរៀបចំអភិវឌ្ឍន៍នគរូបនីយកម្មមួយ ប្រកបដោយប្រសិទ្ធភាព ដែលអាចទ្រទ្រង់សុខមាលភាព និងវិបុលភាព សេដ្ឋកិច្ច និងសង្គមផង។

ជាពិសេសជួយគាំទ្រ ដល់ក្រុមគ្រួសារមានប្រាក់ចំណូលទាប និងមធ្យមព្រមទាំងគ្រួសារងាយរងគ្រោះនៅទូទាំងប្រទេស។ ដោយឡែកនឹងមានកាលានុវត្តភាពនិងលទ្ធភាពខ្ពស់ជាងមុន ក្នុងការទទួលបានលំនៅស្ថានសមរម្យ ជាមួយតម្លៃដែលអាចឆ្លើយតបលទ្ធភាពចំណូលរបស់ពួកគាត់។

អាស្រ័យដោយកំណើនតម្រូវការលំនៅឋាន និងការតាំងទីលំនៅថ្មី មានការកើនឡើងយ៉ាងឆាប់រហ័ស ដែលបានជះឥទ្ធិពលដល់សណ្តាប់ធ្នាប់របៀបរៀបរយ សន្តិសុខ សុវត្ថិភាព និងសោភ័ណ្ឌភាពទីក្រុង ជាពិសេសដោយមើលឃើញថា លទ្ធភាពទទួលបានលំនៅឋានសមរម្យ មានសភាពកាន់តែទាបទៅ។

តាមគោលនយោបាយនេះ ប្រជាពលរដ្ឋដែលមានចំណូលទាប និងធម្យមអាចមានលទ្ធភាពគ្រប់គ្រាន់ ដើម្បីទិញដោយបង់ប្រាប់បង្គ្រប់ក៏បាន ឬបង់រំលោះក៏បាន។

ម្យ៉ាងទៀតគោលនយោបាយ ស្តីពីការលើកទឹកចិត្ត និងការបង្កើតកម្មវិធីជាតិសំរា ប់ការអភិវឌ្ឍលំនៅឋានតម្លៃសមរម្យ ដែលរដ្ឋាភិបាលដាក់ចេញនេះពេលនេះ គឺបានគិតគូរក្នុងការរួមចំណែកលើកកម្ពស់ សុខុមាលភាព និងសេចក្តីថ្លៃថ្នូររបស់ប្រជាជនកម្ពុជាជាទូទៅ និងជាពិសេសក្រុមគ្រួសារមានប្រាក់ចំណូលទាប និងមធ្យម ព្រមទាំងគ្រួសារងាយរងគ្រោះ តាមរយៈការបង្កើតកាលានុវត្តភាពថ្មីមួយនេះ ដែលក្រុមគ្រួសារទាំងនោះ មានលទ្ធភាពខ្ពស់ជាងមុន ក្នុងការទទួលបានលំនៅឋានសមរម្យ ជាមួយតម្លៃដែលអាចឆ្លើយតបលទ្ធភាពចំណូលរបស់ខ្លួន៕