តើអ្វីជាបញ្ហាប្រឈមចំនួន៦ ទីក្រុងភ្នំពេញដែលធនាគារពិភពលោករកឃើញ

August 1, 2019

ដោយស៊ីវ ម៉េង

ភ្នំពេញ៖ អ្នកជំនាញផ្នែកណគរូបនីយកម្មបានជំរុញឲ្យរដ្ឋាភិបាលសិក្សាពីផែនការប្រើប្រាស់ដីលំអិតនៅតាមសង្កាត់និមួយៗ ខណៈធនាគារពិភពលោកបានលើកឡើងបញ្ហាប្រឈមធំៗចំនួន៦ ដែលត្រួវត្រូវដោះស្រាយ។

យោងតាមការសិក្សារបស់ធនាគារពិភពលោកស្តីពី ការអភិវឌ្ឍទីក្រុងភ្នំពេញដែលបានចេញផ្សាយកាលពីចុងឆ្នាំមុនបានឲ្យដឹងថា ការរីកលូតលាសដ៏ឆាប់រហ័សនៃទីក្រុងភ្នំពេញ ក្នុងរយៈពេល១០ឆ្នាំចុងក្រោយនេះ ពិតជាមានរួមចំណែកយ៉ាងច្រើន ក្នុងការបង្កើតឳកាសការងារ ប៉ុន្តែទន្ទឹមនឹងការអភិវឌ្ឍទីក្រុងនេះ មានបញ្ហាប្រឈមជាច្រើន ក្នុងការផ្តល់សេវាកម្មមូលដ្ឋាន ដែលរួមមានប្រព័ន្ឋបង្ហូរទឹកស្អុយ ស្ថានីយ៍កែច្នៃទឹកស្អុយ សេវាកម្មសាធារណៈ ការគ្រប់ គ្រងកាកសំណល់រឹង ការគ្រប់គ្រង និងការផ្តល់ហិរញ្ញប្បទានលើការរៀបចំទីក្រុង ការពង្រឹងអភិបាលកិច្ច និងនិងការគ្រប់គ្រងលើការអភិវឌ្ឍហេដ្ឋារចនាសម្ព័ន្ឋជារឿងចាំបាច់។

ឆ្លើយតបនឹងកង្វល់នេះ ធនាគារពិភពលោកបានផ្តល់អនុសាសន៍ចំនួន៤ចំណុច ដើម្បីអភិវឌ្ឍន៍ទីក្រុងនេះប្រកបដោយភាពសុខដុម ដូចជា ត្រូវកែលំអរ ស្ថាប័ន និងអភិបាលកិច្ច ដើម្បីឲ្យទីក្រុងអាចអភិវឌ្ឍន៍ទៅបាន ប្រកបដោយភាពសុខដុម និងមានប្រសិទ្ឋិភាពជាងមុន។

ធនាគារពិភពលោកបានជំរុញឲ្យរដ្ឋាភិបាល រៀបចំផែនការកែលំអរការរៀបចំទីក្រុង និងការ អនុវត្តន៍ផែនការតាមរយៈ ការបង្កើតបទដ្ឋានគតិយុត្តិ ក្របខ័ណ្ឌច្បាប់ និងពង្រឹងផែនការរៀបចំទីក្រុងដែលមានស្រាប់។ ត្រូវវិនិយោគលើហេដ្ឋារចនាសម្ព័ន្ឋទីក្រុង ប្រកបដោយនិរន្តរភាពដើម្បីលើកកំពស់ជីវភាពរស់នៅ និងការប្រកួតប្រជែងនិងត្រូវធានាថាការរៀបចំទីក្រុង ត្រូវគិតគូរឲ្យបានគ្រប់ជ្រុងជ្រោយ ដើម្បីជៀសវាងវិសមភាព។

ទីក្រុងភ្នំពេញបានរៀបចំផែនការមេរួចហើយ សម្រាប់ឆ្នាំ២០១៥ ២០៣៥ ដែលបាននិងកំពុងអនុវត្តន៍ ប៉ុន្តែអ្នកជំនាញបានមើលឃើញថា ការអភិវឌ្ឍន៍ទីក្រុងនេះតាមផែនការមេមិនបានធ្វើដោយរលូននៅឡើយទេ។

យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់កាលពីឆ្នាំ២០១៣បានរកឃើញថា តង់ស៊ីតេប្រជាពលរដ្ឋរស់នៅក្រុងភ្នំពេញមានចំនួន២៨០០នាក់ក្នុងមួយគីឡូម៉ែត្រ ខណៈទីក្រុងបាងកកមាន៨០០០នាក់ និងទីក្រុងហូជីម៉ិញ ប្រទេសវៀតណាមមាន៤០០០នាក់ក្នុងមួយគីឡូម៉ែត្រ។

លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្មនិងសំណង់ បានថ្លែងតាមទូរស័ព្ទថា ក្រុងភ្នំពេញពិតជាមានការអភិវឌ្ឍលឿន ហេតុនេះបញ្ហាប្រឈមក៏កើតមានទន្ទឹមគ្នា ដែលទាមទារឲ្យក្រុងនេះ រៀបចំផែនការប្រើប្រាស់ដីលំអិត នៅតាមសង្កាត់ និងខ័ណ្ឌនិមួយៗ ព្រោះប្លង់គោលរបស់ទីក្រុងនេះ ដែលផ្តោតលើចន្លោះឆ្នាំ២០១៥ ២០៣០ជាប្លង់ច្បោលៗ គ្មានភាពជាក់លាក់នោះទេ។

លោកបន្តថា “ការសិក្សាពីផែនការការប្រើប្រាស់ដីលំអិត យើងចំណេញនិងអាចដឹងថាបញ្ហាអ្វីដែលកើតឡើងចំពោះមុខ ជាជាងអង្គុយចាំនៅពេលបញ្ហាកើតឡើង”។ លោកបន្តថា “ការប្រើប្រាស់ដីធ្លី និងទាញយកសេដ្ឋកិច្ចពីដីធ្លី នឹងមិនអាចបានអស់សក្តានុពលនោះទេ បើសិនជាគ្មានផែនការប្រើប្រាស់ដីលំអិត នៅតាមមូលដ្ឋាននិមួយៗឲ្យបានច្បាស់លាស់”៕

តំបន់ជ្រោយចង្វារកាន់តែទាក់ទាញគម្រោងអភិវឌ្ឍន៍ខុនដូធំៗ

July 31, 2019

0

ដោយ ម៉ាណេត

ភ្នំពេញៈ តំបន់ជ្រោយចង្វារកាន់តែមានភាព ទាក់ទាញគម្រោងអភិវឌ្ឍន៍ខុនដូធំៗជាច្រើន ដែលនឹងប្រែក្លាយតំបន់លំនៅឋានបែបចំរុះ ខណៈប្រជាជនជាច្រើនបាននិងកំពុងផ្លាស់ប្តូរទៅរស់នៅតំបន់នេះ។

អគ្គនាយកក្រុមហ៊ុនអចលនទ្រព្យ ERA Cambodia លោកខន គង្គាបានប្រាប់គេហទំព័រ Propertyasia.area តាមទូរស័ព្ទនារសៀលថ្ងៃទី៣១ កក្កដានេះថា តំបន់ជ្រោយចង្វារវានឹងក្លាយជាតំបន់អភិវឌ្ឍចំរុះ ស្របពេលតំបន់នេះមានការទាក់ទាញច្រើន ហើយគម្រោងអភិវឌ្ឍធំនៅតំបន់នេះច្រើន។ លោកបានឲ្យដឹងថា “តំបន់ជ្រោយចង្វាក្នុងពេលនេះ និងអនាគតជាតំបន់ល្អសម្រាប់អ្នកវិនិយោគ និងអ្នកដែលចង់រស់នៅ ព្រោះតំបន់នេះហុំព័ទ្ធដោយទន្លេ។

លោកបន្តថា “សម្រាប់អ្នកដែលចង់គិតគូពីផាសុខភាព អាចផ្លាស់ប្តូរទៅរស់នៅតំបន់ជ្រោយចង្វារវា ដោយសារតំបន់ជ្រោយចង្វាមានការទាក់ទាញច្រើន ហើយគម្រោងអភិវឌ្ឍធំនៅតំបន់នេះច្រើន”។ លោកបន្តថា “បច្ចុប្បន្នមានអ្នកចាប់អារម្មណ៍ចង់វិនិយោគនៅតំបន់ច្រើន ហើយអ្វីដែលសំខាន់គឺស្ថិតលើទុនវិនិយោគរបស់គាត់ ប៉ុន្តែប្រជាជនជាច្រើនចង់ទៅរស់នៅតំបន់នេះ”។

យ៉ាងណាតម្លៃខុនដូនៅតំបន់ជ្រោយចង្វារ ហាក់មានតម្លៃខ្ពស់ ព្រោះខុនដូនៅទីតាំងដែលល្អ មិនអាចរកក្នុងតម្លៃចាប់ពី
១,៥០០ដុល្លារក្នុងម៉ែត្រការ៉េទេ ប៉ុន្តែតម្លៃដែលអាចរកបានមានចាប់ពីតម្លៃ ១,៨០០ដុល្លារ ដល់ជាង ២,០០០ ដុល្លារក្នុងមួយម៉ែត្រការ៉េ។

លោកអគ្គនាយកក្រុមហ៊ុនអចលនទ្រព្យ ERA បានអះអាងថា ទោះបីយ៉ាងណាក៏ដោយ បើប្រៀបធៀបនឹងតំបន់កោះពេជ្រ គុណភាពខុនដូគឺដូចគ្នា ប៉ុន្តែតម្លៃខុនដូនៅតំបន់ជ្រោយចង្វារវាមានតម្លៃទាបជាង ដោយសារតម្លៃដីនៅតំបន់ជ្រោយចង្វារនៅមានតម្លៃសមរម្យនៅឡើយ។

បុរីដែលកំពុងតែសម្រុកការសាងសង់បញ្ចប់ គម្រោងនៅត្រឹមដំណាច់ឆ្នាំ២០២១ ខាងមុខនេះរួមមាន បុរី Orkide Villa , បុរី The Bontanic City, បុរី Peng Huoth The Star Munirah, បុរី The Phnom Penh Park, បុរី Chroy Changvar Commercial Center (by OCIC), បុរី Heang City, បុរី The Flora Phase 1 &; 2, និង Chip Mong Parkland 6A បុរីមង្គលភ្នំពេញជាដើម។

លោកស្រី Grace Rachny Fong នាយិកាក្រុមហ៊ុន Century 21 Cambodia បានឲ្យដឹងថា បច្ចុប្បន្នតំបន់ជ្រោយចង្វារ កំពុងមានសក្តានុពលមិនត្រឹមតែ សម្រាប់វិស័យខុនដូប៉ុណ្ណោះទេ ប៉ុន្តែក៏សម្រាប់វិស័យអភិវឌ្ឍន៍លំនៅឋានផ្សេងៗផងដែរ។

លោកស្រី Grace បានឲ្យដឹងទៀតថា “សក្តានុពលដែលតំបន់ជ្រោយចង្វារមានគឺតំបន់នេះជាប់មាត់ទន្លេ មានបរិយាកាសល្អសម្រាប់ការរស់នៅ ខ្យល់បរិសុទ្ធ និងមានទេសភាពទេសភាពស្អាត”។ លោកស្រីបន្ថែមថា “តំបន់នេះនាពេលកាន់ប្រែប្រួលខ្លាំងលើវិស័យលំនៅឋាន ដោយសារមានការអភិវឌ្ឍន៍ធំៗច្រើនបាន និងកំពុងរីកចម្រើននៅតំបន់នេះ”។

តាមការព្យាការណ៍របស់ក្រុមហ៊ុនជំនាញក្នុងការស្រាវជ្រាវ CBRE Cambodia កាលពីពេលកន្លងទៅបានបង្ហាញថា កាលពីត្រីមាសទី១នៃឆ្នាំ២០១៩ តំបន់ដែលជាប់ចំណាត់ថ្នាក់លេខ១ នៅក្នុងចំណោមខណ្ឌដែលស្ថិតនៅក្នុងរាជធានីភ្នំពេញ ដែលមានចំនួនសំណង់បុរីលំនៅដ្ឋានច្រើនជាងគេ គឺខណ្ឌសែនសុខ ។ ប៉ុន្តែនៅត្រឹមប៉ុន្មានឆ្នាំក្រោយទៀត ខណ្ឌជ្រោយចង្វារ នឹងចូលខ្លួនមកប្រជែងយកតំណែងមួយនេះនាពេលអនាគតត។

បើតាមការឱ្យដឹងពីសំណាក់មន្ត្រីជំនាញស្រាវជ្រាវ ផ្នែកអចលនទ្រព្យប្រចាំក្រុមហ៊ុន CBRE Cambodia កញ្ញា គឹម គិនកេសា បានប្រាប់តាមរយៈទូរស័ព្ទឱដឹងថា បច្ចុប្បន្ននេះមានគម្រោងបុរីចំនួន៨គម្រោង បានបញ្ចប់ការសាងសង់គម្រោងរបស់ខ្លួន ខណៈដែលមានគម្រោងជាច្រើនទៀត កំពុងតែសកម្មក្នុងការសាងសង់ ដែលនឹងបញ្ចប់គម្រោងនៅត្រឹមដំណាច់ឆ្នាំ២០២១ខាងមុខនេះ៕

លោកឧកញ៉ាលី ហួរ៖ ទីផ្សារលំនៅដ្ឋាននៅតែមានភាពល្អប្រសើរនៅឆ្នាំនេះ

July 31, 2019

0

ដោយ គង់ សូរិយា

ភ្នំពេញ៖ ទីផ្សារលំនៅដ្ឋាននៅកម្ពុជា មិនទាន់មានសញ្ញាថមថយល្បឿននៅឡើយទេ ខណៈការសាងសង់និងការលក់់នៅតែមានភាពល្អប្រសើរ។ នេះបើតាមការអះអាងរបស់លោកឧកញ៉ាលី ហួរប្រធានសមាគមអ្នកអភិវឌ្ឈន៍លំនៅដ្ឋានកម្ពុជា។

លោកឧកញ៉ាបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី៣១ កក្កដានេះថា ស្ថានភាពការលក់លំនៅដ្ឋាននៅតែមានដំណើរការល្អប្រសើរ សម្រាប់រយៈពេល៧ខែនៃឆ្នាំ២០១៩នេះ និងមានភាពល្អប្រសើររហូតដល់ដំណាច់ឆ្នាំនេះ។លោកបន្តថា ទីផ្សារលំនៅដ្ឋានតម្លៃមធ្យម លើមធ្យមនៅតែមានតម្រូវការច្រើន មិនមានអ្វីជាបញ្ហាគួរឲ្យបារម្ភនោះទេ។

លោកបន្តថា “ខ្ញុំគិតថាអ្វីៗមានភាពប្រសើរ ហើយអ្នកវិនិយោគវិស័យលំនៅដ្ឋាននៅតែមានសុទិដ្ឋិនិយមពីទីផ្សារនៅឡើយ”។ លោកបន្តថា “បើសេដ្ឋកិច្ច និងស្ថានភាពនយោបាយនៅតែមានភាពរលូនបែបនេះ វិស័យលំនៅដ្ឋាននៅតែបន្តរីកចម្រើន និងនៅតែមានតម្រូវការ”។

យោងតាមការសិក្សារបស់ក្រសួងររៀបចំដែនដី នគរូបនីយកម្មនិងសំណង់បានឲ្យដឹងថា គិតត្រឹមឆ្នាំ២០១៧ ដល់ឆ្នាំ ២០៣០ខាងមុខ កម្ពុជានៅតែមានតម្រូវការលំនៅដ្ឋាន ប្រមាណ ៨០ម៉ឺនខ្នងទៀតសម្រាប់ឆ្លើយតបនឹងតម្រូវការរបស់ប្រជាពលរដ្ឋ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានថ្លែងថា ទីផ្សារលំនៅដ្ឋាននៅតែមានតម្រូវការច្រើន ពិសេសលំនៅដ្ឋានសំរាប់ប្រជាជនមានប្រាក់ចំណូលមធ្យម និងក្រោមមធ្យម។ លោកបន្តថា អ្នកទិញភាគច្រើនជាស្រទាប់ប្រជាពលរដ្ឋមានប្រាក់ចំណូលមធ្យម អ្នករស់នៅជាយរាជធានីភ្នំពេញ និងអ្នកចូលមកពីតាមបណ្តាខេត្តនានា។

លោកបន្តថា ដោយមើលឃលញតម្រូវការនេះ អ្នកអភិវឌ្ឍន៍ធំៗបាននិងកំពុងសំរុកទិញដីច្រើននៅតាមបណ្តោយផ្លូវជាតិលេខ៣ និងផ្លូវជាតិលេខ៤ យ៉ាងច្រើន និងជាគំរោងវិនិយោគធំៗ ដែលផ្តោតលើលំនៅដ្ឋានតម្លៃមធ្យម៕

ការចរចាពាណិជ្ជកម្មរវាងអាមេរិក និងចិនបានបរាជ័យបន្ទាប់ពីមានការរិះគន់របស់ប្រធានាធិបតីអាមេរិក

July 31, 2019

0

ដោយ Donald lee

ភ្នំពេញៈ មន្ត្រីជាន់ខ្ពស់អាមេរិក បានបញ្ចប់កិច្ចចរចាចរចាពាណិជ្ជកម្ម ជាមួយភាគីចិននៅទីក្រុងសៀងហៃនៅថ្ងៃនេះ ហើយបច្ចុប្បន្នកំពុងធ្វើដំណើរត្រឡប់ទៅអាមេរិក ដោយគ្មានសញ្ញាណាមួយនៃកិច្ចព្រមព្រៀងត្រូវបានធ្វើឡើង។

រដ្ឋមន្រ្តីក្រសួងរតនាគារអាមេរិក លោក Steven Mnuchin និងអ្នកតំណាងពាណិជ្ជកម្មអាមេរិកលោក Robert Lighthizer បានជួបពិភាក្សាការងារជាមួយលោកឧបនាយករដ្ឋមន្រ្តី Liu He នៅថ្ងៃនេះនៅសណ្ឋាគារ Xijiao។

ការរំពឹងទុកនៃកិច្ចព្រមព្រៀងមួយដែលរំពឹងថា នឹងត្រូវបានធ្វើឡើងនៅថ្ងៃនេះ ត្រូវបានរារាំងយ៉ាងខ្លាំង ដោយមតិអវិជ្ជមានរបស់ប្រធានាធិបតីអាមេរិក លោក Donald Trump ស្តីពីការឈានទៅរកកិច្ចប្រជុំ។

កាលពីម្សិលមិញ លោក Trump បានសរសេរក្នុង Twitter ថា “ក្រុមការងាររបស់ខ្ញុំកំពុងចរចាជាមួយ [ប្រទេសចិន] ឥឡូវនេះ ប៉ុន្តែពួកគេតែងតែផ្លាស់ប្តូរកិច្ចព្រមព្រៀងនៅចុងបញ្ចប់ដើម្បីផលប្រយោជន៍របស់ពួកគេ”។

លោក Trump បានបន្ថែមទៀតថា ប្រហែលជាចិនមានបំណងរង់ចាំការបោះឆ្នោតប្រធានាធិបតីអាមេរិកលើកក្រោយនៅឆ្នាំ២០២០ ហើយមើលថាតើពួកគេអាចទទួលបានកិច្ចព្រមព្រៀងពាណិជ្ជកម្មប្រសើរជាងមុនដែរឬទេ ប្រសិនបើលោកTrump ចាញ់ការបោះឆ្នោត។

លោកបានមានប្រសាសន៍ថា “បន្ទាប់មកពួកគេអាចធ្វើបានច្រើន ដូចជា ក្នុងរយៈពេល៣០ឆ្នាំកន្លងមក ហើយបន្តបំបែកអាមេរិកខ្លាំងជាងពេលមុនទៅទៀត”។

លោកបានបន្ថែមថា “បញ្ហាជាមួយចិននៅតែជាការរង់ចាំមួយគឺថា ប្រសិនបើខ្ញុំឈ្នះឆ្នោតជាថ្មី ហើយកិច្ចព្រមព្រៀងដែលពួកគេនឹងទទួលបាន នឹងកាន់តែធ្ងន់ធ្ងរជាងអ្វីដែលយើងកំពុងចរចាឥឡូវនេះ ឬគ្មានកិច្ចព្រមព្រៀងអ្វីទាំងអស់”។

អ្នកនាំពាក្យក្រសួងការបរទេសចិនលោកស្រី Hua Chunying មានប្រសាសន៍ថា យុទ្ធសាស្ត្រដាក់សម្ពាធរបស់អាមេរិក មិនមានឥទ្ធិពលអ្វីលើការចរចាពាណិជ្ជកម្មទេ។

អ្នកនាំពាក្យរូបនេះ បាននិយាយនៅក្នុងសន្និសីទសារព័ត៌មាន នៅទីក្រុងប៉េកាំងនៅថ្ងៃនេះថា“មានតែនៅពេលដែលមេរិក បង្ហាញភាពស្មោះត្រង់គ្រប់គ្រាន់ និងមានជំនឿលើបានប៉ុណ្ណោះ ទើបយើងអាចទទួលបានវឌ្ឍនភាពនៅក្នុងកិច្ចចរចាពាណិជ្ជកម្ម”។

លោកស្រីបានបន្ថែមទៀតថា “ខ្ញុំជឿថា វាមិនសមហេតុផលសម្រាប់អាមេរិក ក្នុងការធ្វើយុទ្ធនាការរបស់ខ្លួន ដើម្បីដាក់ចេញនូវសម្ពាធអតិបរិមានៅពេលនេះទេ”៕

អ្នកជំនាញបង្ហាញពីអចលនទ្រព្យដែលមានសក្ដានុពលខ្លាំង និងហានិភ័យទាប

July 31, 2019

0

ដោយៈ រ៉ាណេត

ភ្នំពេញៈ ជាទូទៅសម្រាប់អចលនទ្រព្យ ដែលស្ថិតនៅតាមបណ្តាផ្លូវធំៗនៅតំបន់ទីប្រជុំជន ជាពិសេសក្នុងតំបន់ក្រុងតែម្ដង សុទ្ធតែមានសក្ដានុពលខ្លាំងក្នុងការធ្វើអាជីវកម្មផ្សេងៗរហូតតំបន់ខ្លះក្លាយជាបណ្តុំពាណិជ្ជកម្មចំរុះ និងមានតម្រូវការខ្ពស់។

ដោយឡែកចំពោះអចលនទ្រព្យស្ថិតនៅផ្លូវធំ តំបន់ជាយក្រុង តើអាចមានសក្ដានុពលដែរឬទេ?។

អ្នកវិភាគបញ្ហាសង្គម និងសេដ្ឋកិច្ចអចលនទ្រព្យ លោក ង៉ែត ជូ ដែលបានបង្ហោះនៅលើគណនីហ្វេសប៊ុកផ្ទាល់ខ្លួនបានលើកឡើងថា “ខ្ញុំតែងយល់ថា អ្នកដែលមានអចលនទ្រព្យ ឬដីនៅផ្លូវធំ (ទីតាំងពាណិជ្ជកម្ម) កាន់កាប់ឱកាស ៥០% នៃគ្រប់អាជីវកម្មទាំងអស់ ព្រោះគ្រប់អាជីវកម្មទាំងអស់សុទ្ធតែត្រូវការទីតាំង”។

លោកបានសរសេរបន្តទៀតថា ជាក់ស្តែងយើងអាចវិភាគលើកត្តាសំខាន់ៗមួយចំនួនដូចជា ទី១ កាល៥ឆ្នាំមុនផ្ទះល្វែងសំរាប់ពាណិជ្ជកម្ម (shop house) នៅជាយក្រុងមានតម្លៃប្រមាណ ១០ម៉ឺនដុល្លាអាមេរិក ឥឡូវមានតម្លៃប្រមាណ ៣០ម៉ឺនដុល្លាអាមេរិក។ ទី២ ស្ថាបនិករបស់ក្រុមហ៊ុនលក់ទំនិញអនឡាញដ៏ធំបំផុតរបស់អាមេរិក (អាម៉ាហ្សូន) បានលើកឡើងថា អាម៉ាហ្សូន ជាក្រុមហ៊ុនលក់រាយតាមអនឡាញដ៏តូចមួយ ព្រោះទីផ្សារលក់រាយ ៩០% គឺជាទីផ្សារលក់តាមហាង និងតាមផ្ទះ។

លោកបានបន្តថា “កម្ពុជាប្រទេសកំពុងអភិវឌ្ឍន៍ ការពង្រីកវិសាលភាពទីក្រុងភ្នំពេញមានសន្ទុះខ្លាំង។ ដូច្នេះការវិនិយោគរយៈពេលវែង (ចន្លោះពី ៥-១០ ឆ្នាំ) លើដីធ្លីបែបពាណិជ្ជកម្ម (ផ្លូវធំៗ ចាប់ពីទំហំ៣០ម៉ែត្រឡើង) នៅជាយក្រុងឬជាប់ក្រុង ដែលមានតម្លៃក្រោម ២០០ដុល្លាក្នុង១ម៉ែត្រការ៉េ ជាជម្រើសវិនិយោគដ៏ល្អបំផុត”។

ម្យ៉ាងអចលទ្រព្យប្រភេទនេះ មានហានិភ័យទាប ព្រោះក្នុងកាលៈទេសៈណាក៏វាបំរើឱ្យមុខងារសេដ្ឋកិច្ចតាមរយៈសកម្មភាពពាណិជ្ជកម្មនានា”។

ជាមួយគ្នានេះ អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍តាមទូរស័ព្ទកាលពីរសៀលថ្ងៃទី៣១ ខែកក្កដា ឆ្នាំ២០១៩ នេះថា បើនៅទីប្រជុំជនក្នុងក្រុង អចលនទ្រព្យគ្រប់ប្រភេទសុទ្ធ តែមានតម្រូវការខ្ពស់ ប៉ុន្តែបើជាយក្រុង ហើយកត្តាប្រជាសាស្ត្រមិនអំណោយផលក៏អាចប្រឈមដែរ។ លោកឧកញ៉ាបន្តទៀតថា “សម្រាប់ក្នុងក្រុងមិនថានៅផ្លូវធំ ឬតូចនោះទេ ភាគច្រើនសុទ្ធតែអាចបង្កើតអាជីវកម្មបានទាំងអស់ ប៉ុន្តែបើនៅជាយក្រុង តំបន់ខ្លះហាក់មិនទាន់អាចបង្កើតអាជីវកម្មបាននៅឡើយនោះទេ។

លោកបានបន្តទៀតថា “ការដែលអាចក្លាយជាតំបន់អាជីវកម្ម ឬមិនអាចអាស្រ័យលើកត្តាប្រជាសាស្ត្រ ឬដង់ស៊ីតេក្នុងតំបន់បានន័យថា កត្តាប្រជាជនសំខាន់”។ លោកបានបន្តទៀតថា “បច្ចុប្បន្ននេះរហូតរយៈពេល១០ឆ្នាំខាងមុខ អចលនទ្រព្យដែលស្ថិតនៅចម្ងាយពីក្រុង៣០គីឡូម៉ែត្រ គឺនៅមានឱកាសវិនិយោគ ហើយរហូតដល់ឆ្នាំ២០៥០ ក្រោយពេលវិសាលភាពក្រុងត្រូវបានពង្រីក វានឹងបន្តរហូតដល់ចម្ងាយប្រមាណ៥០គីឡូម៉ែត្រ”៕

ជនជាតិចិនទិញអចលនទ្រព្យកម្ពុជាកើនឡើងដល់ ៩០ភាគរយក្នុងរយៈពេលបីឆ្នាំមកនេះ

July 31, 2019

0

ដោយ វុត្ថា

ភ្នំពេញៈ អ្នកជំនាញខាងទីផ្សារបាននិយាយថា ចំណាប់អារម្មណ៍របស់ជនជាតិចិនលើវិស័យអចលនទ្រព្យនៅកម្ពុជាកំពុងមានការរីកចម្រើន ខណៈដែលវិនិយោគិនចិនព្យាយាមទាញយកតម្រូវការលំនៅដ្ឋាន ដែលកំពុងកើនឡើង និងស្វែងរកអចលនទ្រព្យនៅក្រៅប្រទេស។

លោក Carrie Law នាយកប្រតិបត្តិគេហទំព័រវិបសាយអចលនទ្រព្យ Juwai.com ដែលមានមូលដ្ឋាននៅហុងកុង បានឱ្យប្រាប់សារព័ត៌មាន Southeast Asia’s Business News Site កាលពីពេលថ្មីៗនេះថា ការទិញអចលនទ្រព្យរបស់ជនជាតិចិននៅកម្ពុជាបានកើនឡើច្រើនក្នុងរយៈពេល៣ឆ្នាំកន្លងមក។

លោកបន្តថា “ការទិញអចលនទ្រព្យរបស់ចិន បានកើនឡើងជាង ៩០ភាគរយចាប់តាំងពីពាក់កណ្តាលឆ្នាំ២០១៧ ដល់ត្រីមាសទី៤នៃឆ្នាំ ២០១៨ និងត្រីមាសទី១ ឆ្នាំ ២០១៩ មានចំនួនខ្ពស់បំផុត និងខ្ពស់បំផុតលំដាប់ទី២ នៃការសាកសួរអំពីការទិញរបស់ជនជាតិចិននៅត្រីមាសទី១នេះ”។

លោក Carrie Law បានឲ្យដឹងទៀតថា អ្នកទិញជាជនជាតិចិនចូលចិត្តប្រទេសកម្ពុជា ព្រោះប្រទេសនេះនៅជិត ហើយផ្តល់នូវផ្ទះប្រណីតថ្មីៗដែលមានតំលៃសមរម្យ មានវប្បធម៌ស្រដៀងគ្នា ហើយរំពឹងថា នឹងទទួលបានផលច្រើន ក្នុងរយៈពេលយូ ខណៈសេដ្ឋកិច្ចរបស់ប្រទេសនេះ រក្សាបានស្ថេរភាព និងមានការរីកចំរើនឆាប់រហ័យ។

លោកបន្តថា កំណើនការនាំចេញរបស់កម្ពុជាភាគច្រើន គឺដោយសារក្រុមហ៊ុនចិនបានពង្រីកខ្លួន ឬផ្លាស់ប្តូរទីតាំងទៅក្នុងប្រទេសនេះ។ ជនជាតិចិនកាន់តែច្រើនកំពុងផ្លាស់ប្តូរមករស់នៅក្នុងប្រទេសកម្ពុជា ដើម្បីធ្វើការនៅក្នុងអាជីវកម្មទាំងនេះ។ ពួកគេត្រូវការកន្លែងរស់នៅហើយជារឿយៗ ពួកគេមានថវិកាទិញផ្ទះខ្ពស់ជាងតំបន់ធម្មតា។ ទីផ្សារនាំចេញដែលកំពុងកើនឡើង ដែលជំរុញដល់សកម្មភាពនៅក្នុងទីផ្សារលំនៅដ្ឋាន។

យោងតាមរបាយការណ៍ចុងក្រោយនេះបានបង្ហាញថា កម្ពុជាបានអនុម័តគម្រោងវិនិយោគអចលនទ្រព្យ ដែលមានតម្លៃជាង ២,៧ពាន់លានដុល្លារ ក្នុងរយៈពេល៤ខែដំបូងនៃឆ្នាំ ២០១៩ ដែលមានការកើនឡើង ៦៧,៣ ភាគរយបើប្រៀបធៀបទៅនឹងឆ្នាំមុនកន្លងមកនេះ៕

ដំណឹងល្អ៖ ស្ពានបេឡេឫស្សីកែវឆ្លងកាត់ទន្លេសាបចំណុចឃ្លាំងសាំងសូគីមិចនឹងដំណើរឡើងវិញនៅថ្ងៃស្អែក

July 31, 2019

0

ដោយ ប៊ី

ភ្នំពេញៈ ស្ពានបេឡេឫស្សីកែវ ឆ្លងកាត់ទន្លេសាប ចំណុចឃ្លាំងសាំងក្រុមហ៊ុនសូគីមិច នឹងបើកអោយដំណើរការឡើងវិញសម្រាប់ប្រជាពលរដ្ឋ អ្នកដំណើរបានធ្វើចរាចរថ្ងៃ ស្អែក នេះតទៅ ក្រោយពីបានផ្អាកមួយរយៈពេលដើម្បីធ្វើការថែទាំ និងត្រួតពិនិត្យលក្ខណៈបច្ចេកទេសឡើងវិញ។

មន្ត្រីរដ្ឋបាលរាជធានីភ្នំពេញបានឲ្យដឹងថា ក្រោយពីបានផ្អាកមួយរយៈ ដើម្បីធ្វើការថែទាំ និងត្រួតពិនិត្យលក្ខណៈបច្ចេកទេស។ ស្ពានបេឡេឫស្សីកែវ នឹងដាក់អោយដំណើរការធ្វើចរាចរជាធម្មតាឡើងវិញ នៅថ្ងៃព្រហស្បតិ៍ទី១ ខែសីហា ឆ្នាំ២០១៩ វេលាម៉ោង ៨:០០ព្រឹកតទៅ។

លោក ម៉េត មាសភ័ក្ដីអ្នកនាំពាក្យរដ្ឋបាលរាជធានីភ្នំពេញបានឱ្យដឹងថា ស្ពានបេឡេឫស្សីកែវ ឆ្លងកាត់ទន្លេសាបចំណុចឃ្លាំងសាំងក្រុមហ៊ុនសូគីមិច នឹងបើកឱ្យប្រជាពលរដ្ឋ ធ្វើចរាចរជាធម្មតាឡើងវិញនៅព្រឹក ថ្ងៃទី១ ខែសីហា ឆ្នាំ២០១៩នេះតទៅ បន្ទាប់ពីបានផ្អាកមួយរយៈពេល ដើម្បីធ្វើការថែទាំ ជួសជុល និងត្រួតពិនិត្យលក្ខណៈបច្ចេក ទេសរួចមក ដូច្នេះសូមបងប្អូនប្រជាពលរដ្ឋមេត្តាជ្រាបជាព័ត៌មាន។

អ្នកនាំពាក្យសាលារាជធានីភ្នំពេញបានបញ្ជាក់ថា ស្ពានដែកបេឡេតភ្ជាប់ពីផ្លូវជាតិលេខ៥ ស្ថិតនៅខណ្ឌឫស្សីកែវទៅតំបន់អភិវឌ្ឍន៍ជ្រោយចង្វារ ស្ថិតនៅខណ្ឌជ្រោយចង្វារ រាជធានីភ្នំពេញ ត្រូវបានដាក់ឱ្យដំណើរការអស់រយៈពេលប្រមាណ០១ឆ្នាំមកហើយ។

លោកបានថ្លែងថា “ដើម្បីធានាបាននូវគុណភាព និងសុវត្ថិភាពជូនប្រជាពលរដ្ឋដែលធ្វើដំណើរឆ្លងកាត់ស្ពានដែកបេឡេ ឱ្យស្របតាមបទដ្ឋានបច្ចេកទេសនោះ ទើបរដ្ឋបាលរាជធានីភ្នំពេញត្រូវការថែទាំ ជួសជុល និងត្រួតពិនិត្យលក្ខណៈបច្ចេកទេសរបស់ស្ពានដែកបេឡេនេះ រួមមាន គ្រឿងបង្គំស្ពានផ្នែកខាងលើ និងផ្នែកសសរទម្រស្ពាន”។

លោកម៉េត មាសភ័ក្ដីបានបន្តថា ក្រោយពីបានផ្អាកមួយរយៈពេល ដើម្បីធ្វើការថែទាំជួសជុល និងត្រួតពិនិត្យលក្ខណៈបច្ចេកទេសនេះ រដ្ឋបាលរាជធានីភ្នំពេញក៏បានសម្រេចបើកឱ្យធ្វើចរាចរណ៍ជាធម្មតាឡើងវិញ នៅថ្ងៃទី១ ខែសីហា ឆ្នាំ២០១៩ខាងមុខនេះ។

ស្ពាននេះមានប្រវែង ៥០៦ម៉ែត្រ ទទឹង១២ម៉ែត្រ តភ្ជាប់ពីខណ្ឌឫស្សីកែវ មកខណ្ឌជ្រោយចង្វារ សម្រាប់ជួយបសម្រួលចរាចរណ៍នៅស្ពានជ្រោយចង្វានិងស្ពានព្រែកព្នៅ។

រដ្ឋបាលរាជធានីភ្នំពេញ បានធ្វើការការផ្អាកជាបណ្តោះអាសន្ន នូវការធ្វើចរាចរឆ្លងកាត់ស្ពានដែកបេឡេ ឆ្លងកាត់ទន្លេសាប ស្ថិតនៅខណ្ឌប្ញស្សីកែវ និងខណ្ឌជ្រោយចង្វារ រាជធានីភ្នំពេញ កាលពីថ្ងៃទី២៨ខែមិថុនា ឆ្នាំ២០១៩ ដើម្បីថែទាំ និងត្រួតលក្ខណៈបច្ចេកទេសស្ពាន។

រដ្ឋបាលរាជធានីភ្នំពេញញធ្លាប់បានបញ្ជាក់ហើយថា ស្ពានដែកបេឡេតភ្ជាប់ពីផ្លូវជាតិលេខ៥ ស្ថិតនៅខណ្ឌឬស្សីកែវ ទៅតំបន់អភិវឌ្ឍជ្រោយចង្វារ ស្ថិតនៅខណ្ឌជ្រោយចង្វារ រាជធានីភ្នំពេញ ត្រូវបានដាក់ឲ្យដំណើរការអស់រយៈពេល ប្រមាណ១ឆ្នាំមកហើយ៕

ការិយាល័យលក់ខុនដូកប់ពពក AGILE SKY RESIDENCE ចាប់ផ្តើមសម្ពោធដំណើរការ

July 31, 2019

0

ដោយៈ រ៉ាណេត

ភ្នំពេញៈ មជ្ឈមណ្ឌលលក់ខុនដូ AGILE SKY RESIDENCE របស់ក្រុមហ៊ុន Agile Property Development Project ដែលមានទីតាំងស្ថិតតាមបណ្តោយផ្លូវព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ ត្រូវបានកាត់ខ្សែបូរណ៍ប្រកាសបើកដំណើរការជាផ្លូវការហើយ។

លោកមាស ង៉ែតវាសនា នាយកប្រតិបត្តិក្រុមហ៊ុន NaKi Group បានមានប្រសាសន៍ឱ្យដឹងថា AGILE SKY RESIDENCE ជាមជ្ឈមណ្ឌលលក់ខុនដូបែបទំនើប ដែលមានឈ្មោះថា AGILE SKY RESIDENCE មានទីតាំងស្ថិតសង្កាតបឹងកេងកង៣ ខណ្ឌបឹងកង រាជធានីភ្នំពេញ ក្រោមកិច្ចសហការជាដៃគូអភិវឌ្ឍរវាងក្រុមហ៊ុន NAKI Group និងក្រុមហ៊ុន Agile Property Development Project ដែលជាក្រុមហ៊ុនមានឈ្មោះល្បី និងស្ថិតនៅលំដាប់ទី១០នៅប្រទេសចិន។

ពិធីចុះហត្ថលេខាជាដៃគូវិនិយោគ និងអភិវឌ្ឍអគារខុនដូ AGILE SKY RESIDENCE ត្រូវបានធ្វើឡើងកាលពីថ្ងៃទី៤ ខែកក្កដា ឆ្នាំ២០១៩ កន្លងទៅ។

អគារខុនដូដ៏ទំនើប AGILE SKY RESIDENCE មានកម្ពស់ ៤៤ជាន់ស្មើនឹងប្រមាណ ៩៦៣យូនីត ដោយត្រូវចំណាយរយៈពេលសាងសង់ចំនួន៣ឆ្នាំ នឹងមានបំពាក់ទៅដោយសម្ភារបរិក្ខារទំនើបៗ និងទីកម្សាន្តនានាជាច្រើន ដើម្បីផ្តល់ជូននូវផាសុកភាពដល់ការរស់នៅបែបទាន់សម័យ រួមជាមួយនឹងសួនច្បារ Sky Garden ចំនួន៤ មានកន្លែងហាត់ប្រាណ ហាងកាហ្វេ មណ្ឌលកម្សាន្តសម្រាប់កុមារ បណ្ណាល័យ រួមជាមួយនឹងផ្សារទំនើបផងដែរ៕

មីយ៉ាន់ម៉ានឹងធ្វើជាម្ចាស់ផ្ទះរៀបចំសន្និបាត និងពិព័រណ៍បណ្តាញអចលនទ្រព្យអាស៊ាន

July 31, 2019

0

ដោយ វុត្ថា

មីយ៉ាន់ម៉ាៈ ប្រទេសមីយ៉ាន់ម៉ានឹងធ្វើជាម្ចាស់ផ្ទះរៀបចំសន្និបាត និងពិព័រណ៍បណ្តាញអចលនទ្រព្យអាស៊ាន (ARENA) នៅទីក្រុងរ៉ង់ហ្គូនចាប់ពីថ្ងៃទី២៣ ដល់ថ្ងៃទី ២៤ ខែសីហានេះ។

បើយោងតាមសមាគមសេវាកម្មអចលនទ្រព្យមីយ៉ាន់ម៉ា (MRESA) ដែលជាអ្នករៀបចំសន្និបាតនេះបានឱ្យដឹងថា ពិពរណ៍ARENA-២០១៩ នេះ មានការចូលរួមពីប្រទេសជាសមាជិកចំនួន៨នៃសមាគមប្រជាជាតិអាស៊ីអាគ្នេយ៍ (អាស៊ាន) នឹងក្លាយជាព្រឹត្តិការណ៍ទី៤ ដែលមានការចូលរួមពីសំណាក់សហគ្រិនរកស៊ី ក្នុងវិស័យអចលនទ្រព្យចំនួន ៤០០នាក់មកពីប្រទេសកម្ពុជា ឥណ្ឌូនេស៊ីហ្វីលីពីន ម៉ាឡេស៊ី មីយ៉ាន់ម៉ា សិង្ហបុរី ថៃ និងវៀតណាម។

លោកU Khin Maung Than ប្រធាន MRESA មានប្រសាសន៍ថា ព្រឹត្តិការណ៍ ARENA នេះនឹងផ្តល់អត្ថប្រយោជន៍ ក្នុងការអភិវឌ្ឍវិស័យអចលនទ្រព្យដ៏រឹងមាំ នៅក្នុងតំបន់សេដ្ឋកិច្ចអាស៊ាន តាមរយៈកិច្ចសហប្រតិបត្តិការជាមួយភ្នាក់ងារអចលនទ្រព្យ អ្នកអភិវឌ្ឍន៍ និងអ្នកម៉ៅការសំណង់។

ប្រទេសហ្វីលីពីន សិង្ហបុរី និងម៉ាឡេស៊ីជាសមាជិកស្ថាបនិក ARENA ហើយបានបង្កើតឡើងនៅខែមីនា ឆ្នាំ ២០១២ ដោយឈរឈ្មោះជាសមាគមអចលនទ្រព្យជាតិចំនួន ៨ នៃក្រុមតំបន់ហើយធម្មនុញ្ញរបស់ ARENA ត្រូវបានផ្តល់សច្ចាប័នដោយប្រធានអចលនទ្រព្យទាំង៨នៃសមាគមជាតិនីមួយៗ នៅទីក្រុងបាងកកប្រទេសថៃ កាលពីឆ្នាំ ២០១៦។

សមាជិក ARENA ដែលមានសមាជិក ២០.០០០ នាក់ ដែលនៅតែប្រទេសឡាវ និងប្រ៊ុយណេ មិនទាន់សម្រេចចិត្តចូលរួមជាមួយ ARENA នៅឡើយទេ។

ARENA ជាក្រុមប្រចាំតំបន់ដែលត្រូវបានឧទ្ទិស ដល់ការជួយសមាជិករបស់ខ្លួននៅក្នុងផ្នែកច្បាប់ និងការកែលម្អទីផ្សារការបណ្តុះបណ្តាល និងកិច្ចសហប្រតិបត្តិការ៕

ប្រធានាធិបតីអាមេរិក៖ សេដ្ឋកិច្ចចិនបានជួបរឿងអាក្រក់បំផុតក្នុងរយៈពេល ២៧ឆ្នាំមកនេះ

July 31, 2019

0

ដោយ Donald Lee

សៀងហៃៈ ប្រធានាធិបតីអាមេរិកលោក Donald Trump មានការរំពឹងទុកថា កិច្ចព្រមព្រៀងពាណិជ្ជកម្មរវាងសហរដ្ឋអាមេរិក និងចិនអាចត្រូវបានចរចាអំឡុងកិច្ចចរចាពាណិជ្ជកម្មដែលបានចាប់ផ្តើមកាលពីថ្ងៃអង្គារ ប៉ុន្តែជាមួយគ្នានេះដែរ Trump បាននិយាយថា សេដ្ឋកចិ្ចចិនជួបរឿងអាក្រក់។

នៅថ្ងៃនោះដែរ អ្នកចរចាអាមេរិក បានត្រៀមបើកកិច្ចពិភាក្សាពាណិជ្ជកម្មជាមួយសមភាគីចិននៅប្រទេសចិន។ នេះបើតាមលោក Trump បានបង្ហោះសារធ្វីតធ័រនៅលើគណនីបណ្តាញសង្គមរបស់គាត់។

លោក Trump បានសរសេរអត្ថាធិប្បាយអំពីកំនើនសេដ្ឋកិច្ចយឺតរបស់ចិនថា “សេដ្ឋកិច្ចចិនកំពុងជួបរឿងអាក្រក់ណាស់ ដែលជាឆ្នាំអាក្រក់បំផុតក្នុងរយៈពេល២៧ឆ្នាំកន្លងមកនេះ”។

លោក Trump បានអត្ថាធិប្បាយអំពីការសន្យារបស់ប្រទេសចិន ក្នុងការនាំចូលសណ្តែកសៀងពីអាមេរិកថា ជាវិធានការសុឆន្ទៈ មុនពេលកិច្ចពិភាក្សាពាណិជ្ជកម្ម ដោយបាននិយាយថា “ចិនគួរចាប់ផ្តើមទិញផលិតផលកសិកម្មរបស់យើង ប៉ុន្តែវាមិនកើតឡើង”។

ការនាំចេញសណ្តែកសៀងរបស់អាមេរិក បានធ្លាក់ចុះដល់កំរិតទាបបំផុតនៅឆមាសទីមួយនៃឆ្នាំ ២០១៩ ដែលមិនធ្លាប់មានក្នុងរយៈពេល១០ឆ្នាំ។

លោក Trump បានបន្ថែមថា “នោះគឺជាបញ្ហាជាមួយប្រទេសចិន ដោយពួកមិនបានសហការទេ។ សេដ្ឋកិច្ចរបស់យើងមានទំហំធំជាងសេដ្ឋកិច្ចចិន ក្នុងរយៈពេល៣ឆ្នាំចុងក្រោយនេះ”។

អ្នកវិភាគខ្លះយល់ឃើញថា ការអត្ថាធិប្បាយរបស់លោក Trump គឺជាវិធីសាស្ត្រចរចាមួយ ដែលនឹងធ្វើឱ្យវាហាក់ដូចជា អ្នកចរចាអាមេរិកសុខចិត្តដើរចេញ ពីពាណិជ្ជកម្ម ប្រសិនបើសម្បទានមិនត្រូវបានបំពេញ។

លើសពីនេះទៀត ការអត្ថាធិប្បាយតាមបណ្តាញសង្គមបានបង្ហាញថា លោក Trump ជឿជាក់ថា លោកជាអ្នកទទួលខុសត្រូវ ចំពោះកាតធ្លាក់ចុះសេដ្ឋកិច្ចចិន បន្ទាប់ពីបានដាក់ពន្ធលើការនាំចូលរបស់ចិន ដែលមានតម្លៃ ២០០ពាន់លានដុល្លារ និងក្រុមហ៊ុនបច្ចេកវិទ្យាយក្ស Huawei ដែលមានឈ្មោះក្នុងបញ្ជីខ្មៅរបស់អាមេរិក។

ការនាំចេញរបស់ចិន ទៅកាន់សហរដ្ឋអាមេរិកបានធ្លាក់ចុះជិត ៩ភាគរយ នៅឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

លោក Trump បាននិយាយថា “ប្រទេសចិនកំពុងព្យាយាមយ៉ាងខ្លាំង ដើម្បីធ្វើកិច្ចព្រមព្រៀងជាមួយខ្ញុំ ប៉ុន្តែថាតើខ្ញុំនឹងធ្វើវា ឬអត់នោះ វាអាស្រ័យលើខ្ញុំ វាមិនមែនអាស្រ័យលើពួកគេទេ”។ លោក Trump បានបន្ថែមថា “ខ្ញុំគិតថា ចិនសុខចិត្តលះបង់ច្រើនណាស់ ប៉ុន្តែមិនមែនមានន័យថា ខ្ញុំសុខចិត្តទទួលយកទេ”។

របាយការណ៍សេដ្ឋកិច្ចរបស់ Bloomberg ដែលបានចេញផ្សាយកាលពីខែមុនបានប៉ាន់ប្រមាណថា ការចំណាយនៃសង្គ្រាមពាណិជ្ជកម្មអាមេរិក-ចិនអាចឈានដល់ ១,២ ពាន់ពាន់លានដុល្លារ និងទាញសេដ្ឋកិច្ចពិភពលោក ឱ្យខិតទៅរកវិបត្តិសេដ្ឋកិច្ចជាសាកល៕