ដោយៈ រ៉ាណេត
ភ្នំពេញៈ វិស័យអចលនទ្រព្យ និងសំណង់នៅកម្ពុជានាពេលបច្ចុប្បន្ននេះមួយភាគធំ ជាការវិនិយោគដោយផ្ទាល់ពីសំណាក់ក្រុមហ៊ុនចិន ដែលកំពុងជំរុញឱ្យវិស័យមួយនេះមានភាពរីកចម្រើន។ ដែលអ្នកជំនាញបាននិយាយថា កម្ពុជាគួរធ្វើពិពិធកម្មវិនិយោគិនបន្ថែម ដើម្បីពង្រឹងសក្ដានុពលក្នុងវិស័យនេះជាមួយបណ្តាប្រទេសដទៃទៀត ជៀសវាងការទន្ទឹងរង់ចាំតែការគាំទ្រពីសំណាក់ក្រុមហ៊ុនមកពីប្រទេសចិនតែមួយ។
នៅក្នុងចំនួនទុនវិនិយោគសរុបក្នុងវិស័យសំណង់នៅកម្ពុជា មួយភាគធំគឺជាការវិនិយោគដោយផ្ទាល់ពីក្រុមហ៊ុនចិន ប៉ុន្តែប្រទេសដែលកំពុងតែមានការអភិវឌ្ឍមួយនេះ ត្រួវតែមានការខិតខំបន្ថែមទៀត ក្នុងការគៀងគរបណ្តាអ្នកវិនិយោគមកពីបណ្តាប្រទេសនានាលើសាកលលោក ដើម្បីពង្រឹងវិស័យមួយនេះឱ្យកាន់តែរឹងមាំ និងកាត់បញ្ចៀសហានិភ័យខ្ពស់ ក្រោយសកម្មភាពវិនិយោគរបស់ក្រុមហ៊ុនចិន ត្រូវបានកាត់បន្ថយនៅថ្ងៃអនាគត។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ឲ្យដឹងកាលពីថ្ងៃទី៣ កក្កដាកន្លងមកថា លោកទទួលស្គាល់ថា ការវិនិយោគនៅក្នុងវិស័យសំណង់នៅកម្ពុជា នាពេលបច្ចុប្បន្ននេះ ត្រូវបានគាំទ្រយ៉ាងពេញទំហឹងពីសំណាក់ក្រុមហ៊ុនចិន ប៉ុន្តែចំនួនទាំងអស់នេះ នៅមិនទាន់គ្រប់គ្រាន់សម្រាប់ប្រទេសកម្ពុជានៅឡើយនោះទេ។
លោកបន្តទៀតថា “យើងឃើញថាក្រុមហ៊ុនចិនបាន និងសម្រុកចូលមកវិនិយោគក្នុងវិស័យសំណង់នៅកម្ពុជា ប៉ុន្តែកំណើននៃការវិនិយោគទាំងអស់នេះនៅមិនទាន់ច្រើននោះទេ បើប្រៀបជាមួយបណ្តាប្រទេសនានានៅក្នុងតំបន់”។
លោកបានបន្តទៀតថា “យើងសាទរចំពោះវត្តមានក្រុមហ៊ុនអភិវឌ្ឍចិននៅកម្ពុជា ប៉ុន្តែយើងក៏មិនត្រូវលែងដៃនោះដែរ ដែលត្រូវតែព្យាយាមគៀងគរ និងចាប់ដៃគូជាមួយបណ្តាក្រុមហ៊ុនធំៗនានានៅលើសាកលលោកមកបន្ថែមទៀត ដូចជាប្រទេសកូរ៉េ ប្រទេសជប៉ុន សហរដ្ឋអាមេរិក ជាដើម ដែលប្រទេសទាំងនេះក៏មានអំណាចនៅក្នុងវិស័យសំណង់ដែរ”។
លោកសុខនីមបានបញ្ជាក់ថា “កាលដែលទទួលបានបណ្ដាក្រុមហ៊ុនវិនិយោគ និងក្រុមហ៊ុនអភិវឌ្ឍធំៗមកកាន់កម្ពុជា វាជាបង្អែកមួយដ៏រឹងមាំ និងកាត់បន្ថយហានិភ័យក្រោយពេលដែលសកម្មភាពរបស់ក្រុមហ៊ុនចិននានា អាចនឹងកាត់បន្ថយនៅពេលអនាគត។
វិស័យអចលនទ្រព្យ និងសំណង់នៅកម្ពុជាដែលកំពុងរីកចម្រើន គឺមានក្រុមហ៊ុនអភិវឌ្ឍសំណង់ធំៗដែលមានតម្លៃរាប់ពាន់លានដុល្លារ គឺជាការវិនិយោគពីសំណាក់ក្រុមហ៊ុនអន្តរជាតិ។ ដោយឡែកការអភិវឌ្ឍលើវិស័យលំនៅដ្ឋាន ភាគច្រើនជាការវិនិយោគពីសំណាក់ក្រុមហ៊ុនក្នុងស្រុក។
អគ្គនាយកក្រុមហ៊ុនអចលនទ្រព្យTown City លោកវ៉ន ចាន់ថន បានមានប្រសាសន៍ឲ្យដឹងផងដែរថា ក្រុមហ៊ុនដែលកំពុងតែមានសកម្មភាព និងទាញយកប្រយោជន៍ពីវិស័យអចលនទ្រព្យនៅកម្ពុជាគឺមានច្រើន ទាំងក្រុមហ៊ុនក្នុងស្រុក និងក្រុមហ៊ុនអន្តរជាតិ។ លោកបានបន្តទៀតថា ភាគច្រើនក្រុមហ៊ុនក្នុងស្រុក បង្កើតឡើងក្នុងនាមជាក្រុមហ៊ុនភ្នាក់ងារតែប៉ុណ្ណោះ ប៉ុន្តែសម្រាប់ក្រុមហ៊ុនអភិវឌ្ឍភាគច្រើនគឺមកពីក្រៅប្រទេស។
លោកបានបន្តទៀតថា “ក្រុមហ៊ុនអភវិវឌ្ឍលើវិស័យសំណង់ធំៗ នៅកម្ពុជាភាគច្រើនមកពីប្រទេសចិន ក្រៅពីនោះក៏មានក្រុមហ៊ុនមកពីប្រទេសនានាផងដែរ ដូចជា កូរ៉េ ជប៉ុន អាមេរិក និងបណ្តាប្រទេសផ្សេងៗទៀត”។
លោកបានបន្តទៀតថា “យើងរីករាយជាមួយនឹងសមិទ្ធផល ដែលកំពុងតែមាននាពេលនេះ ប៉ុន្តែយើងនៅតែទាមទារឱ្យមានការចូលមកវិនិយោគវិស័យមួយនេះ ពីបណ្តាក្រុមហ៊ុនបរទេសបន្ថែម”។ លោកបានបញ្ជាក់ថា “វាជាការប្រឈមមួយរបស់កម្ពុជា ប្រសិនបើក្រុមហ៊ុនចិនមួយចំនួនកាត់បន្ថយសកម្មភាពវិនិយោគ”។
លោក វ៉ន ចាន់ថន បានមានប្រសាសន៍បន្តទៀតថា “កម្ពុជាចាំបាច់ត្រូវតែព្យាយាមគៀងគរក្រុមហ៊ុនអន្តរជាតិមកបន្ថែមទៀត ដើម្បីគាំទ្រ និងពង្រឹងសមត្ថភាពវិស័យសំណង់នៅកម្ពុជាឱ្យកាន់តែរឹងមាំ”។
លោកបន្តថា “ពេលនេះនៅក្នុងយុទ្ធសាស្ត្រក្នុងការផ្សព្វផ្សាយ និងបង្កើនទំនាក់ទំនងទៅកាន់ពិភពលោកវាមិនមែនជាឧបសគ្គរបស់កម្ពុជានោះទេ ព្រោះកម្ពុជាមានសមាគមសាងសង់ យើងមានសភាពាណិជ្ជកម្ម ហើយបណ្តាប្រទេសនានាមួយចំនួនក៏មានស្ថាប័នតំណាងផ្នែកវិស័យពាណិជ្ជកម្មប្រចាំនៅកម្ពុជាដែរ ដូចជាសមាគមពាណិជ្ជកម្មកូរ៉េ ជប៉ុន ក៏ដូចជា សហរដ្ឋអាមេរិក ជាដើម”។
លោកបានបន្តទៀតថា យើងអាចបង្កើនទំនាក់ទំនងតាមរយៈសមាគម និងសមាគម ឬតាមរយៈសភាពាណិជ្ជកម្ម រួមជាមួយនឹងប្រព័ន្ធបច្ចេកវិទ្យា។ ប៉ុន្តែយ៉ាងណាក្តីយើងត្រូវតែព្យាយាមដើម្បីអាចទទួលបានអ្នកវិនិយោគ និងអភិវឌ្ឍលើវិស័យសំណង់បន្ថែមទៀត។
លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងយល់ស្របនឹងការលើកឡើងខាងលើ ដោយលោកថ្លែងថា កម្ពុជាគួរស្វែងរកទីផ្សារថ្មី ឬស្វែងរកកិច្ចសហការជាមួយ អ្នកវិនិយោគមកពីប្រទេសដទៃទៀតឲ្យបានច្រើន ដើម្បីពង្រីកទីផ្សារ ក៏ដូចជាជំរុញកំនើនសេដ្ឋកិច្ចរបស់យើង។
លោកបន្តថា “បើយើងពឹងផ្អែកប្រទេសតែមួយ ប្រៀបដូចជាយើងមានរន្ឋច្រមុះពីរ ដែលដង្ហើមបានតែមួយ ហើយបើគេខ្ទប់យើងនឹងស្លាប់ ប៉ុន្តែបើយើងដកដង្ហើមបានតាមរន្ឋទាំងពីរ យើងទោះគេបិទមួយតែយើងនៅមានរន្ឋមួយសំរាប់ដកដង្ហើមបានដែរ”៕
