ដោយៈ រ៉ាណេត
ភ្នំពេញៈ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នឹងបង្កើតវេទិកាដ៏មានសារៈសំខាន់សម្រាប់បណ្តាភ្នាក់ងារ និងក្រុមហ៊ុនអចលនទ្រព្យនានាក៏ដូចជាបណ្តាសាធារណៈជនទូទៅដែលមានបំណងស្វែងយល់ពីវិស័យមួយនេះ។
ជាការចូលរួមលើកកម្ពស់ការយល់ដឹងពីវិស័យអចលនវត្ថុ ក៏ដូចជាការចូលរួមក្នុងការផ្សព្វផ្សាយដល់សាធារណៈជនទូទៅ ឱ្យបានយល់ដឹងកាន់តែទូលំទូលាយពីវិស័យអចលនទ្រព្យនៅក្នុងព្រះរាជាណាចក្រកម្ពុជា សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នឹងរៀបចំវេទិកាស្តីអំពី “ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់” ដែលនឹងប្រព្រឹត្តិទៅនៅថ្ងៃទី២៧ ខែកក្កដា ឆ្នាំ២០១៩ ខាងមុខនេះ ចាប់ពីម៉ោង ១: ៣០ រសៀល ដល់ម៉ោង៥ល្ងាច នៅមជ្ឈមណ្ឌលសហប្រតិបត្តិការ កម្ពុជា-កូរ៉េ (CKCC) ដោយមានការចូលរួមពីវាគ្មិនសំខាន់ៗដែលមានបទពិសោធន៍ច្រើនឆ្នាំ និងទទួលបានភាពជោគជ័យនៅក្នុងវិស័យអចលនទ្រព្យ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៥ មិថុនានេះថា វេទិកាដែលនឹងប្រារព្វនៅថ្ងៃខាងមុខនេះស្ដីពី ការវិនិយោគលើវិស័យអចលនទ្រព្យ ប្រកប ដោយប្រសិទ្ធភាព និងទទួលបានប្រាក់ចំណេញខ្ពស់ គឺពិតជាមានសារសំខាន់បំផុត។
លោកបានបន្តទៀតថា “សម្រាប់វេទិកានេះ គឺរៀបចំឡើងដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ក្រោមការគាំទ្រពីបណ្តាក្រុមហ៊ុនអចលនទ្រព្យនានាដែលជាសមាជិក ក៏ដូចជាស្ថាប័នដែលពាក់ព័ន្ធវិស័យរួមគ្នាផងដែរ”។ លោកបានបន្តទៀតថា “ការរៀបចំ និងបង្កើតឱ្យមានវេទិកានេះឡើង គឺក្រោមគោលបំណងចែករំលែកនូវចំណេះដឹង ក្នុងវិស័យអចលនទ្រព្យទៅដល់បណ្តាក្រុមហ៊ុន ដែលទើបតែចាប់ផ្តើមបង្កើតឡើងថ្មី ក៏ដូចជាបណ្តាភ្នាក់ងារអចលនទ្រព្យផងដែរ”។
លោកបានបន្តទៀតថា សម្រាប់បណ្តាបងប្អូនសាធារណៈជនទូទៅ ដែលចង់ស្វែងយល់ពីវិស័យអចលនទ្រព្យនៅកម្ពុជា ក៏អាចចូលរួមបានដែរ ដោយគ្រាន់តែចូលរួមជួយឧបត្ថម្ភជាវិភាគទានសម្រាប់ជួលទីតាំង និងថ្លៃអាហារសម្រន់តែប៉ុណ្ណោះ។
សម្រាប់អ្នកដែលបានចូលរួម ក្រៅពីអាចចោទសួរនូវចម្ងល់ពាក់ព័ន្ធនឹងវិស័យអចលនទ្រព្យ ក៏នឹងទទួលបានការសិក្សាស្វែងយល់បន្ថែមអំពី ទី១ – ការទទួលបានព័ត៌មាន និងទំនាក់ទំនងល្អជាមួយភ្នាក់ងារអចលនវត្ថុ ទី២ របៀបប្រើប្រាស់ទុនវិនិយោគក្នុងវិស័យអចលនវត្ថុ ទី៣ ការវាយតម្លៃអចលនវត្ថុមុនពេលវិនិយោគ ទី៤ ការកសាងទំនុកចិត្ត រវាងភ្នាក់ងារអចលទ្រព្យ និងវិនិយោគិន ដើម្បីភាពជោគជ័យក្នុងការវិនិយោគគម្រោងធំៗ
សម្រាប់អ្នកដែលមានបំណងចង់ចូលរួមសូមអញ្ជើញទំនាក់ទំនង ដើម្បីជាវជាសំបុត្រចូលរួមសម្រាប់សមាជិក CVEA ១៥ ដុល្លារ/សំបុត្រ។ សម្រាប់សាធរណៈជនទូទៅ ២០ ដុល្លារ/សំបុត្រ។ តម្លៃសំបុត្ររួមបញ្ចូលអាហារសម្រន់ ១ ពេល
ទំនាក់ទំនងលេខទូរស័ព្ទ៖ 010 510 250 | 017 615 894 069 211 268 | 016 899 030 ឬ Online Register Click Link: http://tiny.cc/cvea-registration៕
