ដោយ Donald Lee
ភ្នំពេញៈ សេដ្ឋកិច្ចវៀតណាមអាចនឹងកើនលើសប្រទេសសិង្ហបុរីក្នុងរយៈពេល១០ឆ្នាំខាងមុខនេះ។ នេះបើយោងតាមការស្រាវជ្រាវ ដែលបានចុះផ្សាយដោយធនាគារ DBS Bank LTD ដែលជាសាជីវកម្មហិរញ្ញវត្ថុ និងសេវាពហុជាតិដែលមានទីស្នាក់ការនៅសិង្ហបុរី។
សេដ្ឋវិទូ Irvin Seah ដែលមានមូលដ្ឋាននៅប្រទេសសិង្ហបុរីបាននិយាយថា “ប្រសិនបើវៀតណាម អាចទ្រទ្រង់កំណើនលូតលាស់បានថេរ សេដ្ឋកិច្ចវៀតណាមនឹងមានទំហំធំជាងទំហំសេដ្ឋកិច្ចសិង្ហបុរីក្នុងរយៈពេល១០ឆ្នាំខាងមុខ”។
ផលិតផលក្នុងស្រុកសរុបរបស់វៀតណាម ត្រូវបានគេរំពឹងថានឹងកើនឡើងជាមធ្យម៦ ទៅ៦,៥ភាគរយក្នុងរយៈ ពេល ១០ ឆ្នាំខាងមុខនេះ ដោយសារតែការវិនិយោគដោយផ្ទាល់ពីបរទេស និងកំណើនផលិតកម្ម។
ប្រទេសវៀតណាម និងកម្ពុជាទំនងជានឹងទទួលប្រយោជន៍ពីសង្គ្រាមពាណិជ្ជកម្មរវាងសហរដ្ឋអាមេរិក និងចិន។
លោក Seah បានបន្ថែមថា “ប្រទេសវៀតណាមស្ថិតនៅក្នុងទីតាំងអំណោយផលដើម្បីទទួលបានផលប្រយោជន៍ពីជម្លោះពាណិជ្ជកម្ម ដែលកំពុងតែកើតមានឡើងរវាងសហរដ្ឋអាមេរិកនិងប្រទេសចិន។ សេដ្ឋកិច្ចត្រូវបានដាក់បញ្ចូលទៅក្នុងខ្សែចង្វាក់ផ្គត់ផ្គង់ក្នុងវិស័យឧស្សាហកម្ម”។
ផលិតផលក្នុងស្រុកសរុបវៀតណាម នាពេលបច្ចុប្បន្នមានចំនួន២២៤ពាន់លានដុល្លារប្រហែល៧០ភាគរយ នៃទំហំសេដ្ឋកិច្ចរបស់ប្រទេសសិង្ហបុរី។ ប្រទេសនេះបានក្លាយទៅជាអ្នកនាំចេញទំនិញអេឡិចត្រូនិច លំដាប់ទីពីរនៅក្នុងអាស៊ាន ដោយសារមានតម្លៃកម្លាំងពលកម្មទាប ដែលស្មើនឹងមួយភាគបីនៃប្រាក់ឈ្នួល ជាមធ្យមរបស់ប្រទេសចិន។
ប្រទេសវៀតណាមក៏បានវិនិយោគជិត ៦ ភាគរយ នៃផលិតផលក្នុងស្រុកសរុប (GDP) របស់ខ្លួនលើការអភិវឌ្ឍហេដ្ឋារចនាសម្ព័ន្ធដើម្បីទ្រទ្រង់កំណើនរយៈពេលវែងរបស់ខ្លួន៕
