ដោយ Donald Lee
ភ្នំពេញៈ អ្វីគ្រប់យ៉ាងហាក់ដូចជាល្អសម្រាប់ក្រុមហ៊ុន Huawei Technologies Co. Ltd. កាលពីដើមឆ្នាំនេះ។ នាយកប្រតិបត្តិរបស់ក្រុមហ៊ុន Huawei Technologies Cambodia Ltd លោក David Li បានប្រកាសដោយមោទនភាព នៅឯវេទិការឌីជីថលកម្ពុជាឆ្នាំ២០១៩ ថា ក្រុមហ៊ុន Huawei គឺជាអ្នកផ្គត់ផ្គង់ឧស្សាហកម្មតែមួយគត់ ដែលអាចផ្តល់នូវប្រព័ន្ធហ្វាយជី (5G) ។
លោកបានមានប្រសាសន៍នៅពេលនោះថា “ខ្ញុំជឿថាឆ្នាំ២០១៩ នេះគឺជាឆ្នាំដ៏សំខាន់មួយសម្រាប់បច្ចេកវិទ្យា 5G នៅក្នុងប្រទេសកម្ពុជា”។
ក្រសួងប្រៃសណីយ៍ និងទូរគមនាគមន៍ បានចុះហត្ថលេខាលើកិច្ចព្រមព្រៀងជាមួយក្រុមហ៊ុនបច្ចេកវិទ្យាចិននេះ ដើម្បីភ្ជាប់ប្រព័ន្ធហេដ្ឋារចនាសម្ព័ន្ធ 5G នៅកម្ពុជានិងផ្តល់សេវាតភ្ជាប់នៅឆ្នាំក្រោយ។
លោក Li Jin Ge ប្រធានក្រុមហ៊ុន Huawei ប្រចាំតំបន់អាស៊ីប៉ាស៊ីហ្វិកបាននិយាយថា “ប្រទេសកម្ពុជានឹងក្លាយជាប្រទេសដំបូងគេនៅក្នុងអាស៊ាន ដើម្បីអភិវឌ្ឍសមត្ថភាព 5G”។
ការប្រែប្រួលក្នុងរយៈពេលប៉ុន្មានសប្តាហ៍នេះ
ខណៈដែលសង្គ្រាមពាណិជ្ជកម្មរវាងសហរដ្ឋអាមេរិក និងចិនបានរីករាលដាលនៅខែនេះ លោកប្រធានាធិបតីអាមេរិក ដូណាល់ ត្រាំ (Donald Trump) បានដាក់ក្រុមហ៊ុន Huawei ក្នុងបញ្ជីខ្មៅរបស់អាមេរិក ហើយបានហាមឃាត់ក្រុមហ៊ុនអាមេរិកមិនឱ្យធ្វើការជាមួយក្រុមហ៊ុននេះ។
ក្រុមអ្នកវិភាគសេដ្ឋកិច្ចមួយចំនួនបានប្រៀបធៀប ពីការធ្វើបែបនេះស្មើទៅនឹង “ការកាត់ទោសប្រហារជីវិត” សម្រាប់ក្រុមហ៊ុនយក្សផ្នែកបច្ចេកវិទ្យានេះ ដែលមូលដ្ឋាននៅទីក្រុង Shenzhen ។
ការហាមប្រាមរបស់អាមេរិក នឹងកាត់ផ្តាច់បណ្តាញផ្គត់ផ្គង់របស់ក្រុមហ៊ុនបច្ចេកវិទ្យា ពីក្រុមហ៊ុនផ្គត់ផ្គង់គ្រឿងអេឡិចត្រូនិកសំខាន់ៗ របស់សហរដ្ឋអាមេរិក និងបច្ចេកវិទ្យាដែលប្រើសម្រាប់ហេដ្ឋារចនាសម្ព័ន្ធ ទូរគមនាគមន៍និងទូរស័ព្ទឆ្លាត 5G ។ ស្ទើរតែ ២០ភាគរយ នៃសមាសធាតុខ្សែចង្វាក់ផ្គត់ផ្គង់របស់ក្រុមហ៊ុន Huawei គឺបានមកពីក្រុមហ៊ុនបច្ចេកវិទ្យាអាមេរិក Qualcomm ក្រុមហ៊ុន Intel និង Micron Technology ដែលផ្តល់នូវ microchips ដែលបានប្រើនៅក្នុងបណ្តាញ5G និងម៉ូឌឹម។
ការសម្រេចចិត្តក្នុងបញ្ជីខ្មៅ បានចាប់ផ្តើមពីដំណឹងអាក្រក់មួយសម្រាប់ក្រុមហ៊ុនយក្សរបស់ចិននេះ។ នៅសប្តាហ៍នេះក្រុមហ៊ុនGoogle បានប្រកាសថា ខ្លួននឹងមិនផ្តល់ប្រព័ន្ធប្រតិបត្តិការAndroid សម្រាប់ទូរស័ព្ទ Huawei ដែលធ្វើឲ្យប្រទេសជប៉ុន តៃវ៉ាន់ និងចក្រភពអង់គ្លេស ដោយលុបចោលការបញ្ជាទិញមុនទូរស័ព្ទឆ្លាតវៃ ដែលប្រតិបត្តិការដោយប្រព័ន្ធ 5G។
ស្ថាបនិកក្រុមហ៊ុន Huawei លោក Ren Zhengfei ត្រូវបានទាមទារឲ្យបង្ហាញខ្លួននៅលើកញ្ចក់ទូរទស្សន៍ចិន នៅចំពេលដែលមានមតិជាច្រើនថា “មហិច្ឆតានៃការដាក់ឲ្យប្រើប្រាស់បច្ចេកវិទ្យា5G ជាសាកលរបស់ក្រុមហ៊ុននេះ អាចនឹងមិនកើតឡើងបន្ទាប់ការដាក់បញ្ចូលក្នុងបញ្ជីខ្មៅរបស់លោកប្រធានាធិបតេយ្យ ត្រាំ”។
លោក Ren Zhengfei បាននិយាយថា “យើងបានចំណាយញើសឈាមដែលមានការចូលរួមបុគ្គលម្នាក់ៗ និងក្រុមគ្រួសាររបស់យើង ដើម្បីជាប្រយោជន៍ដល់គោលគំនិតមួយដើម្បីឈរជើងនៅលើពិភពលោក។ លោកបន្ថែមថា “សម្រាប់ឧត្តមគតិនេះ វានឹងមានការប៉ះទង្គិចជាមួយ និងអាមេរិកមិនយូរមិនឆាប់នាពេលខាងមុខនេះ”។
លោកបានបន្តថា សកម្មភាពរបស់រដ្ឋាភិបាលអាមេរិកនៅពេលនេះ កំពុងមើលស្រាលសមត្ថភាពរបស់យើង។ ស្ថាបនិកក៏បានកត់សម្គាល់ផងដែរថា ក្រុមហ៊ុននេះមិនអាចមានបញ្ហាទេ ដោយសារតែក្រុមហ៊ុនមាន microchip ទាក់ទងនឹងបច្ចេកវិទ្យា 5G ហើយគ្មានក្រុមហ៊ុនផ្សេងទៀត មិនមានលទ្ធភាពដែលប្រជែងជាមួយក្រុមហ៊ុន ដែលមានបច្ចេកវិទ្យា5Gនេះ ក្នុងរយៈពេលពីរទៅបីឆ្នាំខាងមុខនេះ។
ក្រុមហ៊ុនបច្ចេកវិទ្យាអាមេរិក ក៏នឹងត្រូវខូចខាតផងដែរ ប្រសិនបើសង្គ្រាមពាណិជ្ជកម្មរវាងអាមេរិកនិងចិននៅតែបន្ត។
យោងតាមរបាយការណ៍របស់ក្រុមហ៊ុន Information Technology & Innovation Foundation បានឱ្យដឹងថា ក្រុមហ៊ុនអាមេរិក អាចបាត់បង់ប្រាក់ចំណូលរហូតដល់ទៅ ៥៦,៣ ពាន់លានដុល្លារក្នុងរយៈពេល៥ ឆ្នាំ ដោយសារតែពន្ធគយ និងការហាមឃាត់ការនាំចេញបច្ចេកវិទ្យាទាក់ទងនឹងក្រុមហ៊ុន Huawei និងក្រុមហ៊ុនផ្សេងៗទៀត។
ជិត ៨២ភាគរយ នៃប្រជាជនកម្ពុជាប្រើប្រាស់អ៊ីនធឺណេត និងប្រហែល ៧លាននាក់ប្រើប្រាស់ហ្វេសប៊ុក។ យោងតាមតួលេខជាផ្លូវការក្នុងខែមករាឆ្នាំនេះ បានឱ្យដឹងថា ចំនួនស្មាតហ្វូន (ទូរស័ព្ទឆ្លាតវៃ) បានកើនឡើងដល់ ១៩,៥ លានគ្រឿង។
ក្រៅពីអនុស្សរណៈយោគយល់ ដែលបានចុះហត្ថលេខាជាមួយក្រុមហ៊ុន Huawei ដើម្បីធ្វើការជាមួយក្រុមហ៊ុនទូរគមនាគមន៍របស់រដ្ឋ ដើម្បីអភិវឌ្ឍហេដ្ឋារចនាសម្ព័ន្ធ 5G ក្រុមហ៊ុន Cellcard ដែលជាក្រុមហ៊ុនរ៉ូយ៉ាល់គ្រុប ក៏បានប្រកាសផែនការអភិវឌ្ឍបច្ចេកវិទ្យា5G ផងដែរ។
លោក Ian Watson នាយកប្រតិបត្តិក្រុមហ៊ុន Cellcard បានប្រាប់សារព័ត៌មាន Nikkei Asian Review ថា ដំណាក់កាលដំបូងនៃការដាក់ឱ្យដំណើរការ 5G នឹងចាប់ផ្តើមនៅខែក្រោយ និងមានជាង១,០០០ពាន់ស្ថានីយ ដែលនឹងបំពាក់ដោយប្រព័ន្ធ 5G នៅទីក្រុងភ្នំពេ សៀមរាប និងព្រះសីហនុ។
ចំណែកក្រុមហ៊ុន Smart Axiata ដែលជាកម្មសិទ្ធិរបស់ម៉ាឡេស៊ី និងក្រុមហ៊ុន Metfone ដែលជាក្រុមហ៊ុនវៀតណាម ក៏បានប្រកាសផែនការសម្រាប់ការសាកល្បង 5G នៅឆ្នាំនេះផងដែរ៕
