ប្រទេសចិននឹងជួយរៀបចំផែនការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា

March 26, 2019

ដោយវុត្ថា

ចិន៖ ប្រទេសចិនបានឯកភាពជួយសិក្សារៀបចំ ផែនការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន នៅក្នុងជំនួបពិភាក្សាការងារជាមួយ លោក Zhou Keqin អនុប្រធានក្រុមប្រឹក្សាពិគ្រោះយោបល់ បក្សនយោបាយប្រជាជនចិន នៃគណៈកម្មាធិការ ក្រុង Chongqing កាលពីថ្ងៃទី ២៥ ខែមីនា ម្សិលមិញនេះ បានស្នើរឱ្យមានកិច្ចសហប្រតិបត្តិការ រវាង កម្ពុជា និងក្រុង Chongqing ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន និងឡូជីស្ទីក ជាពិសេសលទ្ធភាពនៃការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា និងការជួយពង្រឹងសមត្ថភាពធនធានមនុស្សរបស់កម្ពុជា។

លោកស៊ុនចាន់ថុលក៏បានពិភាក្សាពីការតភ្ជាប់ច្រករបៀងប៉ែកខាងត្បូង រវាងប្រទេសចិន ក្រុង Chongqing ប្រទេសសិង្ហបុរី ប្រទេសវៀតណាម និងប្រទេសកម្ពុជា ដើម្បីពង្រឹងទំនាក់ទំនង មិត្តភាព និងកិច្ចសហប្រតិបត្តិការលើវិស័យទេសចរណ៍ ពាណិជ្ជកម្ម និងការវិនិយោគ រវាង កម្ពុជា-ចិន និងប្រទេសក្នុងតំបន់។

លោក Zhou បានយល់ព្រមលើសំណើរបស់ លោកទេសរដ្ឋមន្ត្រី លើកិច្ចសហប្រតិបត្តិការ រវាងក្រុង Chongqing និងក្រសួងសាធារណការ និងដឹកជញ្ជូន ក្នុងការសិក្សារៀបចំ ផែនការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ និងសិក្សាលទ្ធភាពក្នុងការពង្រឹង និងពង្រីកទំនាក់ទំនងឡូជីស្ទីករវាងប្រទេសទាំងពីរ ដោយលោក Zhou បានសន្យាថានឹងរៀបចំក្រុមការងារគណៈប្រតិភូ នៃការិយាល័យដឹកជញ្ជូនក្រុង Chongqing (Chongqing Municipal Transport Bureau) និងក្រុមការងារឡូជីស្ទីក ទៅបំពេញទស្សនកិច្ចសិក្សា នៅកម្ពុជាក្នុងពេលឆាប់ៗខាងមុខនេះ ។

លោក Zhou ក៏បានឯកភាពតាមសំណើរបស់ទេសរដ្ឋមន្ត្រីស៊ុនចាន់ថុលផងដែរ លើកិច្ចសហប្រតិបត្តិការ នៃការកសាង និងពង្រឹងសមត្ថភាពមន្ត្រីក្រសួងសាធារណការ និងដឹកជញ្ជូន ដោយសន្យាថា នឹងពិនិត្យលទ្ធភាព ផ្តល់ជូននូវគ្រូបណ្តុះបណ្តាលជំនាញពីក្រុង Chongqing ទៅកម្ពុជា និងរៀបចំវគ្គបណ្តុះបណ្តាលខ្លីៗ សម្រាប់ផ្លាស់ប្តូរបទពិសោធន៍ និងឱកាសសិក្សាស្វែងយល់ ទៅវិញទៅមក ព្រមទាំងលទ្ធភាពនៃការផ្តល់ជូនអាហារូបករណ៍ ទៅដល់និស្សិតកម្ពុជា ថ្នាក់ឧត្តមសិក្សាផងដែរ ដើម្បីជំរុញឱ្យទំនាក់ទំនងរវាង ក្រុង Chongqing និងប្រទេសកម្ពុជា កាន់តែរីកចម្រើនទៅមុខ មួយកម្រិតទៀត។

លោកទេសរដ្ឋមន្ត្រី ស៊ុន ចាន់ថុល ទេសរដ្ឋមន្ត្រី បានគូសបញ្ជាក់ពីការកោតសរសើរ និងថ្លែងអំណរគុណ ចំពោះឆន្ទៈ និងគោលជំហរ ក្នុងការរិតចំណងមិត្តភាព និងកិច្ចសហប្រតិបត្តិការរវាងកម្ពុជា-ចិន ជាពិសេសទំនាក់ទំនង រវាងក្រុង Chongqing និងក្រសួងសាធារណការ និងដឹកជញ្ជូន ហើយលោកទេសរដ្ឋមន្ត្រី សង្ឃឹមជឿជាក់ថា ទំនាក់ទំនង និងកិច្ចសហប្រតិបត្តិការនេះ និងចូលរួមជំរុញការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន នៅកម្ពុជា ឱ្យកាន់តែរីកចម្រើនឈានឡើងមួយកម្រិតទៀត៕

កម្ពុជាស្វែងរកកិច្ចសហការកាន់តែធំជាងមុនជាមួយក្រុមហ៊ុនរបស់លោក Jack Ma

March 26, 2019

0

ដោយ វុត្ថា

ភ្នំពេញ៖ រដ្ឋាភិបាលបានស្វះស្វែងរកកិច្ចសហប្រតិបត្តិការ កាន់តែទូលំទូលាយជាងមុនជាមួយក្រុមហ៊ុន SHENZHEN 4PX EXPRESS CO., LTD ដែលជាបុត្រសម្ព័ន្ធរបស់ក្រុមហ៊ុន Alibaba របស់មហាសេដ្ឋី Jack Ma នៅក្រុង SHENZHEN។

យោងតាមការចុះផ្សាយរបស់ទំព័ត៌មាន ហ្វេសបុកផ្លូវការរបស់ក្រសួងសាធារណៈការ និងដឹកជញ្ជូន បានឱ្យដឹងនៅថ្ងៃទី ២៥ ខែមីនាកន្លងមកថា ក្នុងដំណើរទស្សនកិច្ចទៅកាន់ប្រទេសចិន លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូន លោកទេសរដ្ឋមន្រ្តីរូបនេះបានអញ្ជើញទៅទស្សនកិច្ចនៅក្រុមហ៊ុន SHENZHEN 4PX EXPRESS CO., LTD ក្នុងគោលបំណងស្វែងរកកិច្ចសហប្រតិបត្តិការបន្ថែម ដើម្បីអភិវឌ្ឍន៍វិស័យដឹកជញ្ជូននៅកម្ពុជា ក៏ដូចជាពង្រីកការដឹកជញ្ជូនរវាងកម្ពុជា និងវិនិយោគនានាជាមួយចិន។

កាលពីពេលថ្មីៗនេះផងដែរ លោករដ្ឋមន្រ្តី ស៊ុន ចាន់ថុល បានជួបពិភាក្សាការងារជាមួយគណៈប្រតិភូដឹកនាំដោយលោក Kevin Li ប្រធានគ្រប់គ្រងទូទៅនៃក្រុមការងារបណ្តាញ Global Parcel Network Team របស់ក្រុមហ៊ុន 4PX Express Co. , Ltd. (ផ្នែកមួយនៃក្រុមហ៊ុន Alibaba Cainiao Logistics Group) នៅក្នុងប្រទេសកម្ពុជាក្នុងគោលបំណងលើកកម្ពស់ការធ្វើពាណិជ្ជកម្ម តាមប្រព័ន្ធអេឡិចត្រូនិកឆ្លងកាត់ ព្រំដែនក្នុងទីផ្សារកម្ពុជាក៏ដូចជា កសាងសមត្ថភាពដល់សហគ្រាសខ្នាតតូច និងមធ្យមក្នុងស្រុក ដើម្បីបង្ហាញផលិតផលរបស់ខ្លួន ក្នុងវេទិកានៃការធ្វើពាណិជ្ជកម្មតាមប្រព័ន្ធអេឡិចត្រូនិក ទូទាំង សកលលោក ដែលជាបុត្រសម្ព័ន្ធរបស់ក្រុមហ៊ុន 4PX Express។

លោកទេសរដ្ឋមន្រ្តី បានសម្តែងនូវការកោតសរសើរ និងការគាំទ្រយ៉ាងពេញទំហឹងចំពោះដំណោះ ស្រាយឡូជីស្ទីកក្នុងការធ្វើពាណិជ្ជកម្ម តាមប្រព័ន្ធអេឡិចត្រូនិកនៅកម្ពុជា ហើយបានស្នើបន្ថែមឱ្យក្រុមហ៊ុនពិចារណា លើព្រលានយន្តហោះនៅកំពង់ឆ្នាំង ដែលកន្លងមកត្រូវបានប្រើ ប្រាស់ជាមជ្ឈមណ្ឌលដឹកជញ្ជូនទំនិញរបស់ខ្លួន ដោយសារតែខេត្តនេះជាទីតាំងឋិតនៅ ចំចំណុចកណ្តាលសម្រាប់ការតភ្ជាប់ តាមផ្លូវដែក ផ្លូវទឹក ផ្លូវហាយវេ និងផ្លូវជាតិផងដែរ។

រាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន និងក្រុមប្រឹក្សាជាតិភស្តុភារកម្ម នឹងជួយសម្របសម្រួលដល់រំហូរការងារដឹកជញ្ជូនទំនិញ និងសេវារបស់ក្រុមហ៊ុនទាំងនោះឱ្យកាន់តែប្រសើរឡើង ដើម្បីឱ្យពួកគេមានសក្ដានុពលក្នុងការពង្រីកវិសាលភាពរបស់ខ្លួនទាំងក្នុងតំបន់ និងពិភពលោក ដោយរៀបចំឱ្យមានហេដ្ឋារចនាសម្ព័ន្ធដឹកជញ្ជូនសម្បូរបែប និងតភ្ចាប់គ្រប់ច្រកល្ហក ព្រមទាំងមានមណ្ឌល ឬឃ្លាំងស្តុកទំនិញតាមស្តង់ដាអន្តរជាតិ និងការសម្រួលដល់នីតិវិធីឯកសាររដ្ឋបាលផងដែរ៕

រដ្ឋមន្ត្រីពាណិជ្ជកម្មប្រាប់សមាជិកព្រឹទ្ធសភាអាមេរិកថាកម្ពុជាមានគោលនយោបាយវិនិយោគល្អជាងគេ

March 26, 2019

0

ដោយ នៅ វឌ្ឍនា

ភ្នំពេញ៖ រដ្ឋមន្ត្រីកម្ពុជាកម្ពុជាបានប្រាប់ព្រឹទ្ឋសមាជិកសភាអាមេរិកថា កម្ពុជាគឺជាប្រទេសបើកចំហរ ជាមួយគោលនយោបាយវិនិយោគល្អជាងគេនៅក្នុងតំបន់ ដែលវិនិយោគិនបរទេស អាចធ្វើប្រតិបត្តិការធុរកិច្ចគ្រប់លើវិស័យ និងអាចកាន់កាប់ភាគហ៊ុន និងប្រាក់ចំណេញ១០០ ដោយមិនបាច់មានដៃគូសហការក្នុងស្រុក។

នៅក្នុងជំនួបជាមួយលោក Doug Ericksen សមាជិកព្រឹទ្ធសភាអាមេរិក និងលោក Jay Rodne វីរៈសេនីយ៍ឯកមកពីរដ្ឋធានីវ៉ាស៊ីនតោន កាលពីរសៀលថ្ងៃចន្ទ ទី២៥ ខែមីនា ឆ្នាំ២០១៩ លោកប៉ាន សូរស័ក្តិ បានបកស្រាយអំពីចក្ខុវិស័យរបស់រាជរដ្ឋាភិបាល និងគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥ ដែលមានគោលដៅបង្កើនជំនាញ និងធ្វើពិពិធកម្មវិស័យកម្មន្តសាល ដើម្បីជំរុញកំណើនសេដ្ឋកិច្ច និងប្រែក្លាយកម្ពុជា ទៅជាប្រទេសមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០។ លោកបន្តថា កម្ពុជាមានការលើកលែងពន្ធនាំចូលគ្រឿងចក្រធុនធ្ងន់ សម្រាប់ការវិនិយោគលើវិស័យកសិកម្មផងដែរ។

លោកបន្តដោយបានស្នើ លោកដុក អេរិកសិន និងលោក ជេយ រូដនី ជួយកៀងគរវិនិយោគិនអាមេរិកឱ្យចូលមកបណ្តាក់ទុនថែមទៀតនៅកម្ពុជា លើវិស័យដែលមានសក្តានុពលសំខាន់ៗដូចជា ឧស្សាហកម្ម (គ្រឿងបន្លាស់រថយន្ត និងវាយនភណ្ឌ) ទេសចរណ៍ ហេដ្ឋារចនាសម្ព័ន្ធ ថាមពល បរិស្ថាន និងកសិកម្ម ដោយសារកម្ពុជា មានធនធានធម្មជាតិមិនទាន់កែច្នៃជាច្រើន ដែលធុរជនអាមេរិក អាចអភិវឌ្ឍន៍ខ្សែចង្វាក់តម្លៃ ដើម្បីទាញយកប្រាក់ចំណេញខ្ពស់ពីការនាំចេញ។

លោកដុក អេរិកសិន និងលោក ជេយ រូដនី បានកោតសរសើរអំពីវឌ្ឍនភាព និងកំណើនសេដ្ឋកិច្ចដ៏រឹងមាំរបស់កម្ពុជា នៅក្រោមការដឹកនាំរបស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា ព្រមទាំងវប្បធម៌ និងភាពរួសរាយរាក់ទាក់របស់ប្រជាជនខ្មែរ ដែលបានឆក់បេះដូងអ្នកនយោបាយទាំងពីរ ឱ្យវិលត្រលប់មកកម្ពុជាសារជាថ្មីនៅពេលខាងមុខ៕

ខេត្តបាត់ដំបងកំពុងពង្រីកវិសាលភាពលើវិស័យអចលនទ្រព្យ

March 25, 2019

0

ដោយ រ៉ាណេត

ភ្នំពេញ៖ ខេត្តបាត់ដំបង បាននិងកំពុងតែបង្ហាញពីវិសាលភាពរបស់ខ្លួន នៅក្នុងវិស័យអចលនទ្រព្យយ៉ាងល្អប្រសើរ ទាំងផ្នែកសំណង់បុរី លំនៅដ្ឋានកម្រិតមធ្យម សណ្ឋាគារ និងផ្ទះសំណាក់ ដែលជួយជំរុញឱ្យតម្លៃដីធ្លីនៅលើទីផ្សារក្នុងខេត្តមួយនេះ កាន់តែមានសន្ទុះខ្លាំងឡើង។ នេះបើតាមការបង្ហើបឱ្យដឹងពីសំណាក់មន្រ្តីជាន់ខ្ពស់ខេត្តបាត់ដំបង។

អភិបាលនៃគណៈអភិបាលខេត្តបាត់ដំបង លោក ងួន រតនៈ បានមានប្រសាសន៍ឱ្យដឹងតាមទូរស័ព្ទនារសៀលថ្ងៃទី២៥ មិនានេះថា បច្ចុប្បន្ននេះ បើនិយាយពីវិស័យអលចនទ្រព្យ គឺមានភាពរីកចម្រើននិងអភិវឌ្ឍខ្លាំង។ ជាក់ស្ដែង សកម្មភាពនៃការសាងសង់សំណង់នានា បាននិងកំពុងតែសម្រុកកាន់តែច្រើន។ លោកបានបញ្ជាក់ថា “សព្វថ្ងៃនេះ ខេត្តបាត់ដំបង មានភាពទាក់ទាញខុសប្លែកជាងកាលពីឆ្នាំមុនៗ ដោយសារមានការអភិវឌ្ឍលើផ្នែកហេដ្ឋារចនាសម្ព័ន្ធច្រើន ទាំងផ្នែកវិស័យរដ្ឋ និងវិស័យឯកជន។

លោកបន្តថា “វិស័យឯកជន មានការរីកចម្រើនខ្លាំងលើវិស័យអចលនទ្រព្យ ជាពិសេសវិស័យលំនៅដ្ឋានកម្រិតមធ្យមតែម្ដង”។

លោក ងួន រតនៈ បានបន្តទៀតថា ការវិនិយោគលើវិស័យសំណង់លំនៅដ្ឋានមានច្រើនកម្រិត ដែលរាប់ចាប់ពីកម្រិតទាប រហូតដល់កម្រិតទ្រង់ទ្រាយធំ ដែលមានសំណង់លំនៅដ្ឋានរាប់ពាន់ខ្នង ដោយក្រុមហ៊ុនខ្លះ កំពុងសម្រុកសាងសង់បញ្ចប់គម្រោងដែលសល់ពីឆ្នាំចាស់ ហើយក្រុមហ៊ុនខ្លះទៀត ក៏ទើបតែចាប់អនុវត្តនូវគម្រោងថ្មីរបស់ខ្លួន ព្រោះតម្រូវការទីផ្សារពីអ្នករស់នៅក្នុងខេត្តក៏មានចំនួនច្រើន។ ដោយឡែកក្រៅពីមានការអភិវឌ្ឍលើវិស័យលំនៅដ្ឋាន ក៏មានការកើនឡើងនូវការវិនិយោគ ផ្នែកសណ្ឋាគារ និងផ្ទះសំណាក់ផងដែរ ដើម្បីស្វាគមន៍នូវកំណើនភ្ញៀវទេសចរជាតិ អន្តរជាតិ ដែលមកកម្សាន្តនៅក្នុងខេត្តមួយនេះ ខណៈដែលភាគច្រើនអ្នកវិនិយោគគឺជាជនជាតិខ្មែរ ដែលមិនទាន់មានក្រុមហ៊ុនបរទេសណាមួយចូលមកវិនិយោគលើវិស័យមួយនេះនៅឡើយ។

លោកថា “សកម្មភាពនៃការរីកចម្រើន និងអភិវឌ្ឍនូវវិស័យសំណង់ទាំងអស់ខាងលើនេះហើយ ដែលជាមូលហេតុជំរុញតម្លៃនៃដី និងអចលនទ្រព្យកើនឡើងជាងឆ្នាំកន្លងទៅទៀត”។

នាយកក្រុមហ៊ុន ឆៃលីនស៊ា រៀលធី ខូអិលធីឌី លោកស៊ា ឆៃលីន បានទទួលស្គាល់ពីកំណើននៃតម្លៃ អចលនទ្រព្យនៅក្នុងខេត្តបាត់ដំបង ប៉ុន្តែលោកអះអាងថាអត្រានៃការឡើងគឺនៅមានកម្រិត ដែលវានៅមិនទាន់ពុះកញ្ជ្រោល ដូចជា ខេត្តព្រះសីហនុ កំពត កែប និងសៀមរាបនៅឡើយនោះទេ ពោលគឺក្នុងអត្រាប្រមាណ១០ភាគរយក្នុងមួយឆ្នាំតែប៉ុណ្ណោះ។ លោកបានបញ្ជាក់ថា ជាការពិតយើងទទួលស្គាល់ថា ខេត្តបាត់ដំបង គឺមានភាពទាក់ទាញ ព្រោះជាខេត្តដែលមានវ័យចំណាស់ និងល្បីល្បាញខាងវិស័យទេសចរណ៍ ក្រៅពីនេះ ក៏ជាខេត្តដែលតភ្ជាប់រវាងមជ្ឈមណ្ឌលពាណិជ្ជកម្មរាជធានីភ្នំពេញ និងច្រកទ្វារអន្តរជាតិ កម្ពុជា-ថៃ ដែលជាច្រកទ្វារសេដ្ឋកិច្ចយ៉ាងសំខាន់។

លោកថា “បច្ចុប្បន្នមានអ្នកវិនិយោគ និងក្រុមហ៊ុនអភិវឌ្ឍន៍ជាច្រើន បានងាកទៅចាប់អារម្មណ៍ខេត្តមួយនេះ បន្ទាប់ពីខេត្តដែលមានសក្ដានុពលមួយចំនួនដូចជា ខេត្តក ណ្តាលតំបន់ជាយក្រុងភ្នំពេញ និងខេត្តសៀមរាបជាដើម ហើយក៏ចាប់ផ្តើមមានគម្រោងខុនដូ និងអាផាតមិនផងដែរ”។

ចំពោះតម្លៃអចលនទ្រព្យនៅក្នុងខេត្តមួយនេះវិញ លោក ស៊ា ឆៃលីន បានប្រាប់ឱ្យដឹងផងដែរថា ៖ «ដីនៅក្នុងក្រុងគឺមានតម្លៃថ្លៃ ដែលក្នុងមួយម៉ែត្រការ៉េ អាចក្នុងចន្លោះចាប់ពី ១០០០- ១៨០០ដុល្លារ ឬអាចលើសនេះតិចតួច ហើយសម្រាប់ផ្ទះល្វែងអាចតម្លៃចន្លោះពី ១៨-៣០ម៉ឺនដុល្លារក្នុងមួយជុង ដែលវាអាស្រ័យទៅលើទីតាំង ឬបើអគារបុរាណអាចមានតម្លៃថ្លៃជាងនេះ»។ លោកថា ចំពោះតម្លៃដីដែលស្ថិតនៅជាយក្រុង មានតម្លៃចន្លោះ ៣៥០ – ៥០០ ដុល្លារក្នុងមួយម៉ែត្រការ៉េ ។ ប៉ុន្តែបើតម្លៃដីនៅទីប្រជុំជននៃទីរួមស្រុកវិញ អាចមានតម្លៃថ្លៃក្នុងចន្លោះចាប់ពី៥០០-១២០០ ដុល្លារក្នុងមួយម៉ែត្រ (សម្រាប់តែដីដែលនៅកណ្តាលទីរួមស្រុកតែប៉ុណ្ណោះ)។ ដោយឡែកចំពោះដីដែលស្ថិតនៅឆ្ងាយពីទីរួមស្រុកវិញអាចមានតម្លៃទាប ត្រឹម ១០០-១៥០ដុល្លារក្នុងមួយម៉ែត្រការ៉េ ឬអាចទាបជាងនេះក៏មានដែរ »៕

ប្រតិភូអឺរ៉ុបស្វែងយល់ពីការអភិវឌ្ឍន៍នៅខេត្តព្រះសីហនុ

March 25, 2019

0

ដោយ នៅ វឌ្ឍនា

ព្រះសីហនុ៖ ប្រតិភូអឺរ៉ុបដឹកនាំដោយលោក SIMONE PIERI ជាប្រធានគណៈប្រតិភូ បានធ្វើដំណើរបំពេលទស្សនៈកិច្ច សិក្សាស្វែងយល់ពីស្ថានភាពសង្គម និងបញ្ហាប្រឈមនានា ដែលកើតចេញពីការអភិវឌ្ឍនៅក្នុងខេត្តព្រះសីហនុតែម្តង។

លោក ឈិន សេងងួន អភិបាលខេត្តស្តីទីខេត្តព្រះសីហនុបានមានប្រសាសន៍ស្វាគមន៍ និងជម្រាបជូនគណៈប្រតិភូសហភាពអ៊ឺរ៉ុប អំពីស្ថានភាពភូមិសាស្ត្រ និងសក្តានុពលរបស់ខេត្ត មានដូចជា កំពង់ផែអន្តរជាតិទឹកជ្រៅ មានផ្លូវរថភ្លើង មានព្រលានយន្តហោះ ខេត្តមានតំបន់ឧស្សាហកម្មពិសេស តំបន់ពាណិជ្ជកម្ម តំបន់កសិកម្ម និងរមណីយដ្ឋានទេសចរណ៍ល្អ។

រយៈពេល២ឆ្នាំចុងក្រោយនេះ ខេត្តព្រះសីហនុ មានការអភិវឌ្ឍយ៉ាងគំហ៊ុកផ្នែកឧស្សាហកម្មសំណង់ ដែលមានសំណង់អគារពាណិជ្ជកម្ម ខុនដូ សណ្ឋាគារប្រណីតៗ រួមទាំងផ្ទះសំណាក់តូចធំ កំពុងមានការរីកចម្រើនគួរឱ្យកត់សំគាល់ ទន្ទឹមនឹងការរីកចម្រើន ក៏មានបញ្ហាប្រឈមលើផ្នែកហេដ្ឋារចនាសម្ព័ន្ធមួយចំនួន ក៏ប៉ុន្តែរដ្ឋបាលខេត្តបាននិងកំពុងស្ថាបនាកែលម្អរឡើងវិញជាជំហានៗ ដើម្បីបំរើមហាជនទូទៅ និង បំរើឲ្យវិស័យទេសចរណ៍។

លោក SIMONE PIERI ប្រធានគណៈប្រតិភូសហភាពអ៊ឺរ៉ុប (EU) ថ្លែងអំណរគុណដល់រដ្ឋបាលខេត្ត ក្នុងការដឹកនាំ និងធ្វើឱ្យខេត្តនេះមានការរីកចម្រើនគួរឱ្យកត់សំគាល់។ ក្នុងដំណើរបំពេញទស្សនកិច្ចនៅខេត្តព្រះសីហនុ គណៈប្រតិភូក៏មានគោល បំណងសិក្សាឈ្វេងយល់ព័ត៌មានបន្ថែមពីស្ថានភាពសង្គម បញ្ហាប្រឈមនានា និងការអភិវឌ្ឍរបស់ខេត្តព្រះសីហនុជាដើម។

បន្ទាប់ពីកិច្ចជំនួបសំណេះសំណាលផ្លាស់ប្តូរយោបល់នេះ គណៈប្រតិភូអឺរ៉ុប ក៏មានគោលបំណងបន្តទស្សនៈកិច្ចសិក្សាស្វែងយល់ នៅក្នុងតំបន់សេដ្ឋកិច្ចពិសេសរបស់ខេត្តព្រះសីហនុ តំបន់ទេសចរណ៍នានាក្នុងខេត្ត និងពន្ធនាគារខេត្តព្រះសីហនុ ដោយអមជាមួយដោយក្រុមការងារ SIPAR រួមទាំងជួបជាមួយសហគមស៊ីវិល និងដៃគូអភិវឌ្ឍន៍នានា រួមទាំងសភាពាណិជ្ជកម្មខេត្តព្រះសីហនុផងដែរ៕

រដ្ឋាភិបាលបានជំរុញឱ្យក្រុមហ៊ុន Alibaba វិនិយោគព្រលានយន្តហោះខេត្តកំពង់ឆ្នាំង

March 25, 2019

0

ដោយ ស៊ីវ ម៉េង

ភ្នំពេញ៖ រដ្ឋាភិបាលកាលពីពេលថ្មីៗនេះ បានជំរុញឱ្យក្រុមហ៊ុន Alibaba វិនិយោគសាងសង់ឡើងវិញនូវព្រលានយន្តហោះខេត្តកំពង់ឆ្នាំង ប៉ុន្តែមិនទាន់មានការឆ្លើយតបបែបណានៅឡើយទេ។

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍បែបនេះ ក្នុងពិធីចុះហត្ថលេខាជាមួយក្រុមហ៊ុន Shenshen 4PX Express ដែលជាក្រុមហ៊ុនបុត្រសម្ព័ន្ឋរបស់ក្រុមហ៊ុន Alibaba របស់មហាសេដ្ឋី Jack Ma កាលពីពេលថ្មីៗនេះ ដោយបានស្នើឱ្យក្រុមហ៊ុននេះ វិនិយោគសាងសង់ព្រលានយន្តហោះខេត្តកំពង់ឆ្នាំងឡើងវិញ ព្រោះខេត្តកំពង់ឆ្នាំងមានសក្តានុពលជាច្រើន លើវិស័យដឹកជញ្ជូន ទាំងផ្លូវទឹក ផ្លូវគោក ផ្លូវដែក និងមានចម្ងាយជិតងាយស្រួលភ្ជាប់ជាមួយរាជធានីភ្នំពេញ។

ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានសិក្សារកឃើញថា ខេត្តកំពង់ឆ្នាំងមានសក្តានុពលសម្រាប់ជាទីតាំង Cargo Hub ដែលជាមជ្ឈមណ្ឌលសម្រាប់ការលើកដាក់ទំនិញលំដាប់អន្តរជាតិ។

លោក ជា អូន អ្នកនាំពាក្យ និងជារដ្ឋលេខាធិការនៃរដ្ឋលេខាធិការដ្ឋានអាកាសចរ ណ៍ស៊ីវិលបានមានប្រសាសន៍ថា ការសិក្សារបស់អង្គការ JICA មិនទាន់បានបញ្ចប់នៅឡើយទេ ហើយវាជាការសិក្សាជំហ៊ានដំបូងប៉ុណ្ណោះ ដែលពួកគេរកឃើញថាខេត្តនេះមានសក្តានុពលសម្រាប់ Cargo Hub ដោយសារមានចម្ងាយជិតនឹងរាជធានីភ្នំពេញ មានផ្លូវគោក ផ្លូវទឹក និងផ្លូវដែកដែលងាយស្រួលក្នុងការតភ្ជាប់។

លោកបន្តថា “Cargo Hub មិនត្រឹមតែសម្រាប់កម្ពុជាទេ តែសម្រាប់ថ្នាក់តំបន់ហេតុនេះ យើងត្រូវមានហេដ្ឋារចនាសម្ព័ន្ឋសមស្រប ពិសេសព្រលានយន្តហោះនាពេលអនាគត”។ លោកបន្តថា “ទោះជាយ៉ាងណារហូតមកទល់ពេលនេះ មិនទាន់មានក្រុមហ៊ុនណាមួយបានដាក់សំណើរសុំចុះសិក្សា ពីការសាងសង់ព្រលានយន្តហោះនៅក្នុងខេត្តកំពង់ឆ្នាំងនៅឡើយទេ”៕

លោកវេជ្ជបណ្ឌិត Denis Laurent! មន្ទីរពេទ្យគន្ឋបុប្ឆាបន្តរក្សាទស្សនវិស័យរបស់លោកវេជ្ជបណ្ឌិត Beat Richner

March 25, 2019

0

ដោយ គង់ សូរិយា

ភ្នំពេញ៖ ថ្នាក់ដឹកនាំមូលនិធិគន្ឋបុប្ឆា ដែលត្រូវបានប្រជាពលរដ្ឋកម្ពុជាមួយចំនួនហៅថាជាពេទ្យទេវតាបានអះអាងថា មន្ទីរពេទ្យនឹងនៅតែបន្តទស្សនវិស័យរបស់លោកវេជ្ជបណ្ឌិត Beat Richner តាមរយៈការពង្រឹងគុណភាព ប្រសិទ្ឋភាពនៃការព្យាបាលក្រម សីលធ៌ម និងការព្យាបាលដោយឥតគិតថ្លៃ។

លោកវេជ្ជបណ្ឌិត Denis Laurent ប្រធានប្រតិបត្តិមូលនិធិគន្ឋបុប្ឆាបានមានប្រសាសន៍ឱ្យដឹងកាលពីចុងសប្តាហ៍មុនថា មន្ទីរពេទ្យគន្ឋបុប្ឆាបាន និងកំពុងដើរតាមទស្សនវិស័យ និងគោលការណ៍របស់លោកវេជ្ជបណ្ឌិត Beat Richner ខណៈដំណើរការរបស់មន្ទីរពេទ្យនេះនៅតែមានភាពល្អប្រសើរ ហើយកុមារចូលសម្រាកក្នុងមន្ទីរពេទ្យបានកើនឡើង៦ភាគរយ ធៀបរយៈពេលដូចគ្នាកាលពីឆ្នាំមុន ដោយសារកុមារមានជំងឺធ្ងន់ធ្ងរបានកើនឡើង។

លោកបន្តថា “នៅឆ្នាំនេះករណីកុមារកើតជំងឺគ្រុនឈាមបានកើនឡើងខ្ពស់ ហើយមន្ទីរពេទ្យបានជូនដំណឹងទៅក្រសួងសុខាភិបាល ជាការឆ្លើយតបក្រសួងសុខាភិបាលបានបង្កើនការផ្សព្វផ្សាយលើករណីនេះ”។ លោកបន្តថា “ កុមារកម្ពុជានៅតែមានជំងឺផ្លូវដង្ហើម និងរលាកខួរក្បាលច្រើន ក្នុងចំណោមកុមារចូលមកសំរាកក្នុងមន្ទីរពេទ្យ ដែលក្នុងមួយថ្ងៃៗមានកុមារចន្លោះពី៣០០០ ទៅ៣៥០០នាក់បានចូលពិគ្រោះជំងឺក្រៅ និងកុមារចន្លោះពី៤០០ ទៅ៥០០នាក់នៅបានចូលសំរាកក្នុងមន្ទីរពេទ្យ ហើយអត្រាប្រើប្រាស់គ្រែជាប្រចាំមានចំនួន២៥០០នាក់រៀងរាល់ថ្ងៃ”។

ដោយឆ្លើយតបនិងបន្តបេសកកម្មរបស់លោកវេជ្ជបណ្ឌិត Beat Richner មន្ទីរពេទ្យកំពុងសាងសង់អាគារវះកាត់ប្រព័ន្ឋប្រាសាទ និងវះកាត់បេះដូងកុមារថ្មីមួយ ដែលចំណាយប្រាក់អស់ច៨លានដុល្លារ ដែលអាគារថ្មីនេះមានកម្ពស់៣ជាន់ មានបន្ទប់វះកាត់ធំបី និងមានបន្ទប់សំរាកចំនួន៦ ដែលអាចដាក់គ្រែសរុបបានប្រមាណ២០០គ្រែបន្ថែមទៀត ។ អាគារថ្មីនេះអាចបើកដំណើរការនៅថ្ងៃទី១សីហាខាងមុខនេះ។ នេះបើតាមការឱ្យដឹងពីលោកវេជ្ជបណ្ឌិត Denis Laurent។

ទាក់ទងនឹងមូលនិធិសម្រាប់ទ្រទ្រង់មន្ទីរពេទ្យនេះពីប្រទេសស្វីស បន្ទាប់ពីមរណភាពដ៏ឆាប់រហ័សរបស់លោកវេជ្ជបណ្ឌិត Beat Richner លោកវេជ្ជបណ្ឌិត Denis Laurent បានបន្តថា មូលនិធិពីប្រទេសស្វីសនៅតែដំណើរការល្អប្រសើរ ដោយមន្ទីរពេទ្យនៅតែទទួលបានការគាំទ្រ ពីរដ្ឋាភិបាលស្វីលចំនួន៤លានដុល្លារក្នុងមួយឆ្នាំ និងពីប្រជាជនស្វីសដដែល ព្រោះនាយកមូលនិធិគន្ឋបុប្ឆាលោកវេជ្ជបណ្ឌិត Peter Studer ជាអនុប្រធានមូលនិធិ និងបានធ្វើការជាមួយលោកវេជ្ជបណ្ឌិត Beat Richner តាំងពីឆ្នាំ១៩៩២មកម្លេះ។

លោកបន្តថា មន្ទីរពេទ្យត្រូវចំណាយប្រាក់ចន្លោះពី៤០ ទៅ៤២លានដុល្លារអាមេរិកក្នុងមួយឆ្នាំ ក្នុងនោះថវិការបស់រដ្ឋាភិបាលកម្ពុជា តាមរយៈមូលនិធិគន្ឋបុប្ឆាកម្ពុជា និងបដិភាគពីការលក់សំបុត្រចូលទស្សនាអង្គរចំនួន២ដុល្លារ ក្នុងសំបុត្រមួយសរុបមានចំនួនចន្លោះពី១៥ទៅ១៦លានដុល្លារអាមេរិក ការឧបត្ថម្ភពីវិស័យឯកជនមានចន្លោះពី៤ទៅ៥លានដុល្លារក្នុងមួយឆ្នាំ និងថវិកាសម្តេចកិត្តព្រឹទ្ឋបណ្ឌិតប៊ុន រ៉ានី ហ៊ុនសែនបានផ្តល់ជូនកាកបាតក្រហមកម្ពុជាចំនួន១លានដុល្លារជារៀងរាល់ឆ្នាំ និងក្រៅពីនោះជាថវិកាបានមកពីការឧបត្ថម្ភពីផ្នែកឯកជនរបស់ប្រជាជនស្វីស។

លោកវេជ្ជបណ្ឌិត Denis Laurent បានបន្តថា “ស្ថានភាពមានការលំបាក ប៉ុន្តែអ្វីៗនៅតែដំណើរការល្អប្រសើរ ដោយយើងនឹងនៅតែមានការប្តេជ្ញាចិត្ត ដើម្បីធានានិរន្តរភាព របស់មន្ទីរពេទ្យនេះ”។ លោកបន្តថា “ទាំងរដ្ឋាភិបាលកម្ពុជា និងរដ្ឋាភិបាលស្វីសសុទ្ឋតែបង្ហាញការប្តេជ្ញាចិត្តក្នុងការជួយមន្ទីរពេទ្យនេះ ដើម្បីឱ្យមន្ទីរពេទ្យនេះដំណើរការប្រកបដោយនិរន្តរភាព”៕

ដំណឹងរីករាយ៖ ស្ពានជ្រោចង្វារបានបញ្ចប់ការសាងសង់ ១០០ភាគរយហើយរង់ចាំតែថ្ងៃសម្ដេចទៅសម្ពោធ

March 25, 2019

0

ដោយ រ៉ាណេត

ភ្នំពេញ៖ ស្ពានមិត្តភាពកម្ពុជា ជប៉ុន (ស្ពានជ្រោយចង្វារ) រហូតមកដល់ពេលនេះត្រូវបានបញ្ចប់ការសាងសង់ ១០០ភាគរយហើយ ដោយនៅរង់ចាំតែសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា អញ្ជើញទៅសម្ពោធបើកឱ្យប្រើប្រាស់ជាផ្លូវការណ៍ឡើងវិញនៅត្រឹមថ្ងៃទី៣ ខែមេសា ឆ្នាំ២០១៩ ខាងមុខនេះតែប៉ុណ្ណោះ។

លោក វ៉ាស៊ីម សូរិយា អ្នកនាំពាក្យក្រសួងសាធារណការ និងដឹងជញ្ជូន បានមានប្រសាសន៍ឱ្យដឹងនៅរសៀលថ្ងៃទី២៥ ខែមីនា នេះថា រហូតមកដល់ពេលនេះក្រុមការងារសាងសង់ស្ពានជ្រោយចង្វារ បានបញ្ចប់ការសាងសង់១០០ភាគរយហើយ ដែលរង់ចាំតែថ្ងៃបើកសម្ពោធប្រកាសដាក់ឱ្យប្រើប្រាស់ឡើងវិញ ក្រោមវត្តមានដ៏ខ្ពង់ខ្ពស់របស់សម្ដេច តេជោ ហ៊ុន សែនតែប៉ុណ្ណោះ ។ លោកបានបញ្ជាក់ទៀតថា ស្ពាននេះ ជាស្ពានដ៏ធំមួយដែលឆ្លងកាត់ដៃទន្លេសាប ស្ថិតនៅទន្ទឹមគ្នានឹងស្ពានមិត្តភាពកម្ពុជា ចិន ខណៈដែលការសាងសង់ឡើងវិញនេះ មួយផ្នែកធំនៃអតីតតួស្ពានចាស់ត្រូវបានប្ដូរចេញ ក៏ដូចជាសរសរស្ពានជាដើម គឺត្រូវបានសាងសង់ឡើងវិញ ដោយសារតែភាពចំណាស់ និងការទ្រុឌទ្រោមនៃអាយុកាលរបស់ស្ពាន។

ស្ពានជ្រោយចង្វារ ត្រូវបានដាក់ឱ្យដំណើរការលើកដំបូងនៅឆ្នាំ១៩៦២ និងត្រូវកាត់ផ្តាច់ដោយគ្រាប់បែកក្នុងកំឡុងឆ្នាំ ១៩៧២។ ស្ពាននេះត្រូវបានជួសជុលឡើងវិញលើកទី១ នៅឆ្នាំ១៩៩១ និងដាក់ឱ្យប្រើប្រាស់ជាថ្មីនៅឆ្នាំ ១៩៩៣។

គម្រោងស្តារឡើងវិញស្ពានមិត្តភាពកម្ពុជា-ជប៉ុន (ស្ពានជ្រោយចង្វារទី១) ជាហិរញ្ញប្បទាន ឥតសំណងរបស់រដ្ឋាភិបាលជប៉ុន ដែលមានទឹកប្រាក់ ៣០លានដុល្លារ សម្រេចបាន ៩៣ភាគរយហើយ និងគ្រោងបើកដំណើរការមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។

គម្រោងសាងសង់ស្ពាននេះត្រូវបានចុះហត្ថលេខា នៅថ្ងៃទី៣១ខែមីនា ឆ្នាំ២០១៦។ គម្រោងនេះ បានចាប់ផ្តើមការជួសជុលសាងសង់នៅថ្ងៃទី១៥ ខែកញ្ញា ឆ្នាំ២០១៧ ដោយមានក្រុមហ៊ុន Obayashi ជាក្រុមហ៊ុនទទួលបានសិទ្ធិក្នុងការជួសជុលសាងសង់ និងក្រុមហ៊ុន Central Consultant Inc ជាក្រុមហ៊ុនទីប្រឹក្សាបច្ចេកទេស។

សម្តេចតេជោលើកឡើងពីបញ្ហាប្រឈមនៃបដិវត្តន៍ឧស្សាហកម្មទី៤

March 25, 2019

0

ដោយ វុត្ថា

ភ្នំពេញ៖ សម្តេចតេជោហ៊ុន សែននាយករដ្ឋមន្រ្តីកម្ពុជាបានលើកឡើងពីកាលានុវត្តន៍ភាព និងបញ្ហាប្រឈមនៃបដិវត្តន៍ឧស្សាហកម្មទី៤ ដែលសម្តេចនឹងចូលរូមសន្និសីទប្រចាំឆ្នាំនៃវិទ្យាស្ថានអភិវឌ្ឍន៍កម្ពុជា (CDRI) ស្តីអំពីបដិវដ្តឧស្សាហកម្មទី៤នៅថ្ងៃស្អែកនេះ។

សម្តេចតេជោថ្លែងនៅក្នុងចែកសញ្ញាបត្រដល់និស្សិតនៃ សាកលវិទ្យាល័យភ្នំពេញអន្តរជាតិ (PPIU) នៅវិទ្យាស្ថានជាតិអប់រំ នៅថ្ងៃទី២៥ ខែមីនានេះថា ការចូលរួមឧស្សាហកម្មនេះ ដើម្បីទាញយកផលចំណេញ យ៉ាងដូចម្តេចហើយទប់ស្កាត់នៃផលវិបាកនៃវិស័យបដិវដ្តឧស្សាហកម្មទី៤ បច្ចេកវិទ្យាមួយនេះអាចធ្វើការជំនួសមនុស្សជាច្រើន។

សម្តេចថា “បើវាតែម្នាក់ឯង(មនុស្សយន្ត) ធ្វើការជំនួសមនុស្សម៉ាការគោកហើយ ហើយមនុស្សមានការងារអីធ្វើ ដោយប្រើសុទ្ធតែមនុស្សយន្តហោះរួចទៅហើយចឹងមនុ ; ស្សមែនទែនមានការងារឯណាធ្វើ។ នេះជាបញ្ហា” ។ សម្តេចបន្តថា “នៅថ្ងៃស្អែកនេះ ខាងវិទ្យាស្ថានអភិវឌ្ឍន៍កម្ពុជា នឹងដាក់មនុស្សយន្តតឱ្យនិយាយតជាមួយសម្តេច និងស្វាគមន៍សម្តេចដែលបានចូលរួមប្រជុំ ។ បើវានិយាយជំនួសយើងបានទៀតថ្ងៃក្រោយ យើងនឹងយកប្រើប្រាស់វា”។

បដិវត្តន៍ឧស្សាហកម្មទី៤បានចាប់ផ្តើម តាមរយៈទាញយកផលប្រយោជន៍ពីការប្រើប្រាស់សេដ្ឋកិច្ចបែបឌីជីថល ដែលជានិន្នាការថ្មីមួយតម្រូវឱ្យប្រទេសកំពុងអភិវឌ្ឍន៍ត្រូវរៀបចំខ្លួន ដើម្បីទាញយកសក្តានុពលពីបច្ចេកវិទ្យា ដែលកំពុងមានភាពរូកចម្រើនដ៏លឿននេះ។

ឆ្លើយតបបញ្ហានេះ រាជរដ្ឋាភិបាលកម្ពុជា តាមរយៈក្រសួងប្រៃសណីយ៍ និងទូរគមនាគមន៍បាន និងកំពុងបង្កើតគោលនយោបាយ សម្រាប់សេដ្ឋកិច្ចបែបឌីជីថល ដែលជាវិស័យថ្មីមួយនៃសេដ្ឋកិច្ចបែបឌីជីថល។

រដ្ឋលេខាធិការក្រសួងប្រៃសណីយ៍ និងទូរគមនាគមន៍លោក កាន ច័ន្ទមេត្តាបានមានប្រសាសន៍ក្នុងពិធីបើកសិក្ខាសាលា ដើម្បីប្រមូលធាតុចូលសម្រាប់រៀបចំគោលនយោបាយ សម្រាប់ការបង្កើតធុរកិច្ចឌីជីថលកាលពីពេលថ្មីៗនេះថា គោលនយោបាយនេះ នឹងជួយឱ្យយុវជនកម្ពុជាមានសមត្ថភាព មានចំណេះដឹងបច្ចេកវិទ្យា មានឱកាសកាន់តែច្រើនក្នុងការបង្កើតអជីវកម្មថ្មី ជាពិសេសប្រែក្លាយអជីវកម្មប្រពៃណី មកជាអាជីវកម្មឌីជីថលដោយប្រើប្រាស់បច្ចេកវិទ្យា។ លោកបន្តថា ទាំងយុវជនកម្ពុជា ទាំងសហគ្រាសធនតូច និងមធ្យម នឹងអាចទាក់ទាញអ្នកវិនិយោគខាងក្រៅមកបណ្ដាក់ទុនបន្ថែម។

លោកបន្តថា “វាគឺជាវេទិការដំបូងដែលផ្ដល់ឱកាសដល់ដៃគូរពាក់ព័ន្ធ ធ្វើការពិភា ក្សាលើបញ្ហាប្រឈម និងផលលំបាកនានា ដែលជាការរំខានដល់ការអភិវឌ្ឍឌីជីថលជូនដល់អ្នករៀបចំគោលនយោបាយ ដើម្បីកំណត់ជាវិធាន ការគាំទ្រ ការជំរុញការវិនិយោគ និងលើកទឹកចិត្តឱ្យមានការប្រកួតប្រជែងស្មោះត្រង់ និងស្របច្បាប់សម្រាប់សហគ្រិនក្នុងវិស័យឌីជីថល”។

លោកកាន ច័ន្ទមេត្តាបានបន្តថា “បញ្ហានេះរដ្ឋាភិបាលតែម្ខាង មិនអាចដោះស្រាយបាននោះទេ ហេតុនេះបានជាសិក្ខាសាលានេះ បានអញ្ជើញឱ្យអ្នកចូលរួមគ្រប់ភាគីពាក់ព័ន្ធ សហការគ្នា និងផ្តោតលើដំណោះស្រាយដែលអាចអនុវត្តបាន រវាងរដ្ឋាភិបាល វិស័យឯកជន ធនាគារ សហគ្រិន និងក្រុមហ៊ុនចាប់ផ្ដើមធុរកិច្ច និងអ្នកសិក្សាជាដើម”។

ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិលោកបណ្ឌិតម៉ី កល្យាណបានថ្លែងថា ជានិន្នាការសេដ្ឋកិច្ច តាមបែបប្រព័ន្ឋឌីជីថលកំពុងធ្វើដំណើរទៅមុខ យើងមិនអាចទប់បាននោះទេ ប៉ុន្តែយើងត្រូវពិនិត្យមើលដោយប្រុងប្រយ័ត្ន និងត្រូវសួរថាតើប្រព័ន្ឋឌីជីថលនេះស្ថិតនៅកន្លែងណា ដួចជាប្រើប្រាស់ទាក់ទងនឹងការទូទាត់លុយ ការប្រាស្រ័យទាក់ទងគ្នា និងការចែកចាយព៌តមានជាដើម។

លោកបន្តថា “យើងអាចប្រឈមនឹងបញ្ហា ប្រសិនជាយើងយល់ពីវាមិនបានច្បាស់លាស់ឬធ្វើឡើងសើរៗ ហើយបើយើងរត់តាមគេ និងធ្វើមិនបានស៊ីជម្រៅ វានឹងមិនផ្តល់ផលប្រយោជន៍ច្រើននោះឡើយ”៕

សម្តេចតេជោ៖ កម្ពុជាមិនទាន់មានលទ្ឋភាពផ្គត់ផ្គង់ផ្នែកវិស្វកម្មក្នុងវិស័យសំណង់នៅកម្ពុជា

March 25, 2019

1

ដោយ នៅ វឌ្ឍនា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានអះអាងថា បច្ចុប្បន្នកម្ពុជាមិនទាន់មានលទ្ឋភាព ក្នុងការផ្គង់ផ្គង់ធនធានមនុស្សផ្នែកវិស្វកម្ម និងសំណង់កម្រិតខ្ពស់នៅឡើយ។

សម្តេចបានមានប្រសាសន៍ក្នុងពិធីចែកសញ្ញាបត្រ ជូនដល់និស្សិតសាកលវិទ្យាល័យភ្នំពេញអន្តរជាតិនាព្រឹកថ្ងៃទី២៥ មិនានេះបន្តថា ការផ្គត់ផ្គង់ក្នុងវិស័យវិស្វកម្ម និងសំណង់ផ្នែកបច្ចេកទេសកម្រិតខ្ពស់ គឺយើងមិនទាន់មានលទ្ធភាពនៅឡើយទេ សូម្បីតែការផ្គត់ផ្គង់ក្នុងកម្រិតមធម្យម នៅតែមិនទាន់គ្រប់គ្រាន់ផងដែរ។ ដូច្នេះបានជាយើងនាំអ្នកបច្ចេកទេសមកពីក្រៅប្រទេសមកផ្គត់ក្នុងស្រុក ដូចជា ការការសាងសងស់ស្ពានឆ្លងកាត់ទន្លេ វិស្វករបស់យើងមិនទាន់មានលទ្ធភាពនៅឡើយទេក្នុងការធ្វើកិច្ចការនេះ។

ជាមួយគ្នានេះ ប្រធានសមាគមអ្នកជំនាញអចលនទ្រព្យកម្ពុជាលោកឃាង ពុទ្ឋីបានគាំទ្រការលើកឡើងរបស់ប្រមុខរដ្ឋាភិបាល ដោយលោកបានមានប្រសាសន៍អំពាវនាវឱ្យអ្នកនៅក្នុងវិស័យសំណង់ និងអចលនទ្រព្យបន្តពង្រឹងខ្លួងឯង និងវិស័យឯកជននានាចូលរួមបណ្តុះបណ្តាលធនធានមនុស្សក្នុងវិស័យនេះ។

លោកបន្តថា សមាគមអ្នកជំនាញអចលនទ្រព្យបង្កើតឡើង ក្នុងគោលដៅរួមចំណែកបណ្តុះបណ្តាលធនធានមនុស្សក្នុងវិស័យនេះ ដោយសារធនធានមនុស្សក្នុងវិស័យនេះមានការខ្វះខាត ព្រោះវិស័យសំណង់ និងអចលនទ្រព្យនៅកម្ពុជាមានការរីកចម្រើនលឿន ក្នុងរយៈពេលមួយទសវត្សរ៍ចុងក្រោយនេះ។

លោកបន្តថា “ខ្ញុំសូមអំពាវនាវឱ្យវិស័យឯកជន ចូលរួមបណ្តុះបណ្តាលធនធានមនុស្សក្នុងវិស័យនេះ ដើម្បីឆ្លើយតបនឹងការរីកចម្រើននៃវិស័យនេះ ក៏ដូចជារួមចំណែកលើកកម្ពស់សេដ្ឋកិច្ចសង្គមកម្ពុជា”៕