ដោយ គង់ សូរិយា
ភ្នំពេញ៖ វិធីសាស្រ្តជ្រើសរើសការងាររបស់យុវជន និងការចាប់អាជីពមានសារៈសំខាន់ណាស់សំរាប់អនាគតរបស់ពួកគេ ហេតុនេះតើយុវជនគួរជ្រើសរើសអាជីពការងារបែបណា។
លោកង៉ែត ជូដែលជាអ្នកជំនាញផ្នែកសេដ្ឋកិច្ច និងអចលនទ្រព្យបានសរសើរលើបណ្តាញទំនាក់ទំនងសង្គមរបស់លោកថា យុវជនគួរជ្រើសរើស ឬផ្តោតលើការងារណាដែលផ្តល់នូវឱកាសពង្រឹងសមត្ថភាពនិងទទួលបានប្រាក់ខែខ្ពស់។ យុវជនគួរជ្រើសរើសការងារពីរយ៉ាង ទី១ជ្រើសរើសយកការងារដែលអ្នកមានឱកាសអភិវឌ្ឍសមត្ថភាព និងផ្តល់បទពិសោធន៍ល្អៗ ជាជាងជ្រើសរើសយកការងារដែលមានលំនឹង ឬការងារដែលមានកុងត្រារយៈពេលវែង (Capacity development versus Job Security)។
ពោលគឺផ្តោតលើការងារណា ដែលអាចជួយអោយអ្នកមានសមត្ថភាពពេញលេញអាចក្លាយខ្លួនជាអ្នកធ្វើជំនួញ ឬជាអ្នកវិនិយោគបាននាពេលអនាគត។ អ្នកមិនគួរផ្តោតលើការងារដែលមានលំនឹង ហើយគ្មានឱកាសរៀនសូត្រ ឬមានឱកាសរៀនសូត្រតិចតួចនោះទេ ព្រោះអ្វីដែលអ្នកត្រូវការគឺសមត្ថភាព ហើយមុន និងក្រោយអ្នកនឹងប្រែក្លាយខ្លួនជាម្ចាស់ជំនួញឬអ្នកវិនិយោគ ដូច្នេះកុំខ្លាចបាត់បង់ការងារឬអត់ការងារធ្វើ។
ទី២ ជ្រើសរើសការងារដែលផ្តល់ប្រាក់ខែខ្ពស់ ជាជាងការងារដែលផ្តល់កញ្ចប់ផលប្រយោជន៍ច្រើន (High salary versus Good compensation package)។ អ្នកធ្វើការងារបណ្តើឆ្លៀតធ្វើជំនួញ ឬវិនិយោគបណ្តើដើម្បីទទួលបានបទពិសោធន៍ ដូច្នេះអ្នកគួរផ្តោតយកការងារណា ដែលមិនត្រឹមតែផ្តល់ឱកាសអោយ អ្នកបានររៀនបទពិសោធន៍ល្អៗនោះទេ អ្នកក៏គួរផ្តោតលើការងារណាដែលទទួលបានប្រាក់ខែច្រើន ព្រោះបើទទួលបានប្រាក់ខែច្រើន អ្នកក៏អាចខ្ចីប្រាក់ពីធនាគារយកមកធ្វើជាដើមទុនបានច្រើនដែរ។
លោកបន្តថា “ពេលវាយតម្លៃកម្ចី ធនាគារគេមើលតែលិខិតបញ្ជាក់ប្រាក់ខែប៉ុណ្ណោះ គេមិនខ្វល់ថាក្រុមហ៊ុន ឬស្ថាប័នដែលអ្នកធ្វើការផ្តល់ធានារ៉ាប់រងសុខភាព សាហ៊ុយធ្វើដំណើរ ឬចំណាយបេសកកម្មរបបសាំង ឬឯកសណ្ឋានប៉ុន្មានកុំប្លេក្នុង១ឆ្នាំនោះទេ”។ លោកបន្តថា “ម្យ៉ាង បើអ្នកចង់ច្នៃខ្លួនអោយក្លាយជាអ្នកធ្វើជំនួញ ឬជាអ្នកវិនិយោគ អ្នកមិនគួរគ្រាន់តែសំលៀកបំពាក់ (ឯកសណ្ឋាន) និងផលប្រយោជន៏ទាំងនេះ ក៏ត្រូវការក្រុមហ៊ុនឬស្ថាប័នចាត់ចែងអោយដែរនោះទេ”៕
