ក្រុមហ៊ុនមួយរបស់លោក Jack Ma ចាប់ផ្ដើមចូលមកវិនិយោគនៅកម្ពុជា

March 21, 2019

ដោយ វុត្ថា

ភ្នំពេញ៖ រដ្ឋមន្ត្រីពាណិជ្ជកម្ម បានប្រកាសស្វាគមន៍ និងគាំទ្រគម្រោងវិនិយោគរបស់ក្រុមហ៊ុន Shenzhen 4PX Express ដែលជាបុត្រសម្ព័ន្ធរបស់ក្រុមហ៊ុន Alibaba Cainiao Logistics Group ដើម្បីជំរុញការធ្វើពាណិជ្ជកម្មតាមប្រព័ន្ធអេឡិចត្រូនិក (E-Commerce) ឆ្លងកាត់ព្រំដែននៅក្នុងប្រទេសកម្ពុជា និងបង្កើតកាលានុវត្តភាពធុរកិច្ច សម្រាប់សហគ្រាសធុនតូច និងមធ្យម ដើម្បីពង្រីកការនាំចេញ។

នៅក្នុងជំនួបជាមួយប្រតិភូក្រុមហ៊ុន Shenzhen 4PX Express និងតំណាងអង្គការ UNDP ប្រចាំនៅកម្ពុជា កាលពីថ្ងៃទី២០ ខែមីនាម្សិលមិញនេះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មក៏បានជំរុញក្រុមហ៊ុន Shenzhen 4PX Express ធ្វើការបោះទីតាំងនៅក្នុងប្រទេសកម្ពុជា ដើម្បីបង្កើតនូវហេដ្ឋារចនាសម្ព័ន្ធផ្នែកទន់ (ការបណ្តុះបណ្តាលធនធានមនុស្ស និងផ្ទេរចំណេះដឹង) សម្រាប់គាំទ្រប្រតិបត្តិការ E-Commerce និងការអភិវឌ្ឍសេដ្ឋកិច្ចឌីជីថល ស្របតាមយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល។

លោករដ្ឋមន្ត្រី បានស្នើក្រុមហ៊ុន Shenzhen 4PX Express ពិចារណាចាប់ដៃគូ ជាមួយសហគ្រាសធុនតូច និងមធ្យមនៅកម្ពុជា ដើម្បីជំរុញវត្តមានផលិតផលខ្មែរ ដូចជាទំនិញកសិកម្ម គ្រឿងចម្លាក់ពីដៃ វត្ថុអនុស្សាវរីយ៍ ផ្លែឈើស្រស់ និងម្ហូបអាហារ នៅលើទីផ្សារអនឡាញ ជាពិសេស Alibaba ដែលជាគេហទំព័របោះដុំទំនិញធំបំផុត នៅក្នុងប្រទេសចិន និងលើពិភពលោក ដែលមានលោក Jack Ma ជាសហស្ថាបនិក និងជាមេធំ។

លោករដ្ឋមន្ត្រី ក៏បានជម្រាបជូនក្រុមហ៊ុន Shenzhen 4PX Express អំពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការជំរុញវិស័យ E-Commerce តាមរយៈការពន្លឿនច្បាប់ស្តីពី E-Commerce និងយុទ្ធសាស្ត្រវិស័យនេះ ការកសាងមជ្ឈមណ្ឌលពាណិជ្ជកម្ម និងវប្បធម៌កម្ពុជា នៅតាមទីក្រុងធំៗក្នុងប្រទេសចិន និងការធ្វើបច្ចុប្បន្នភាពយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) ជំនាន់ទី៤ ជាដើម។

លោក KEVIN Yue Li ស្ថាបនិកក្រុមហ៊ុន Shenzhen 4PX Express បានប្តេជ្ញាចូលរួមអភិវឌ្ឍន៍វិស័យ E-Commerce ជាមួយក្រសួងពាណិជ្ជកម្ម និងរាជរដ្ឋាភិបាលកម្ពុជា តាមរយៈការចាប់ដៃគូ ជាមួយអង្គការ UNDP និងក្រុមហ៊ុនក្នុងស្រុក ព្រមទាំងការកសាងស្ថានីយមួយ ដែលសហគ្រាសធុនតូច និងមធ្យម អាចទម្លាក់ផលិតផលរបស់ខ្លួន ដើម្បីក្រុមហ៊ុនលក់ និងចែកចាយទៅកាន់ទីផ្សារក្នុងតំបន់ និងពិភពលោក។

ក្រសួងសាធារណៈការ និងដឹកជញ្ជូនកាលពីពេលថ្មីៗនេះ ក៏បានចុះហត្ថលេខាលើអនុស្សរណៈយោគយល់ និងកិច្ចព្រមព្រៀងសហហិរញ្ញប្បទាន រវាង UNDP ជាមួយក្រុមហ៊ុន SHENZHEN 4PX EXPRESS CO., LTD លើគម្រោង “ផ្សារភ្ជាប់ប្រទេសកម្ពុជា៖ រួមគ្នាឆ្ពោះទៅរកសេដ្ឋកិច្ចឌីជីថល” ដើម្បីជំរុញ និងលើកកម្ពស់ការធ្វើពាណិជ្ជកម្មតាមប្រព័ន្ធអេឡិចត្រូនិកឆ្លងដែន ដោយមានមូលដ្ឋានទីផ្សារនៅក្នុងព្រះរាជាណាចក្រកម្ពុជា និងអភិវឌ្ឍសមត្ថភាពសហគ្រាសខ្នាតតូច និងមធ្យមនៅក្នុងតំបន់ ដើម្បីបង្ហាញពិភពលោកពីផលិតផលរបស់ខ្លួនតាមរយៈវេទិកាពាណិជ្ជកម្មតាមប្រព័ន្ធអេឡិចត្រូនិកសកលរបស់ក្រុមហ៊ុន Alibaba ដោយសហការជាមួយក្រុមហ៊ុន 4PX Epress៕

ឳកាសការងារៈក្រុមហ៊ុនសន្តិសុខហ្គារូដាប្រកាសរើសបុគ្គលិកក្នុងចំនួនច្រើន

March 21, 2019

0

ដោយគង់ សូរិយា

ភ្នំពេញ៖ ក្រុមហ៊ុនសន្តិសុខហ្គារូដា បានប្រកាសជ្រើសរើសបុគ្គលិកភេទប្រុស និងភេទស្រីក្នុងចំនួនមិនកំណត់មួយ ដោយសារតម្រូវការបុគ្គលិកផ្នែកនេះកំពុងមានការកើនឡើងខ្ពស់នៅកម្ពុជា។

លោកស សារ៉ាក់ប្រធានផ្នែកហ្វឹកហ្វឺននៃក្រុមហ៊ុនសន្តិសុខហ្ការូដាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២០ មិនាកន្លងមកថា ក្រុមហ៊ុនកំពុងជួបការខ្វះខាតបុគ្គលិកជាច្រើន ហេតុនេះទើបក្រុមហ៊ុនសម្រេចជ្រើសរើសបុគ្គលិកបន្ថែម ក្នុងចំនួនមិនកំណត់មួយ។លោកបន្តថា បុគ្គលិកដែលអាចចូលបំរើការងារបាន ត្រូវមានអត្តសញ្ញាណប័ណ្ណ មានសំបុត្រកំណើត និងសៀវភៅគ្រួសារ។

អ្នកអាចចូលបំរើការងារជាសន្តិសុខ អាចធ្វើបានទាំងពីរភេទ ដោយភេទប្រុសមានកំពស់ចាប់ពី១,៦៥ម៉ែត្រឡើង និងមានអាយុចាប់ពី១៨ដល់៥៥ឆ្នាំ និងភេទស្រីត្រូវមានកំពស់ចាប់ពី១,៥៥ម៉ែត្រ និងមានអាយុចន្លោះពី១៨ដល់៥០ឆ្នាំ។លោកបន្តថា បុគ្គលិកដែលអាចចូលបំរើការងារបានត្រូវមានអត្តចរិកល្អ មិនប្រើគ្រឿងញៀន កុំផឹកស្រាជាប្រចាំ។

អ្នកមានចំណាប់អារម្មណ៍នឹងការងារនេះ សូមទាក់ទងតាមរយ:លេខទូរស័ព្ទ០១១ ៨៩៤៥៤៤៕

សិក្សាលើមូលដ្ឋានចំនួន៥ មុនវិនិយោគលើដីធ្លី

March 21, 2019

0

ដោយ ស៊ីវ ម៉េង

ភ្នំពេញ៖ អ្នកណាក៏ចង់ចំណេញច្រើន និងលក់ដីឆាប់ដាច់ដែរ នៅពេលអ្នកវិនិយោគស្វែងរកផលចំណេញ ប៉ុន្តែការទិញដីទាំងប្រថុយប្រថានគ្មានជំនាញច្បាស់លាស់ នឹងមិនធ្វើឲ្យការវិនិយោគរបស់ខ្លួនទទួលបានជោគជ័យនោះទេ។

គេហទំព័រ Propertyarea.asia សូមលើកយកគំនិតអ្នកជំនាញក្នុងវិស័យនេះរយៈពេលជាង២ទសវត្សរ៍មកបង្ហាញ ហើយលោកតែងទទួលបានជោគជ័យនូវការទិញលក់ដីធ្លីជាប្រចាំ។

លោក កាង សុធី អគ្គនាយកក្រុមហ៊ុន Century21 Land Station Real Estate បានលើកយកគំនិតជាច្រើនសម្រាប់ពិចារណា មុនសម្រេចចិត្តវិនិយោគលើដីធ្លី ដើម្បីលក់ឆាប់ដាច់ និងទទួលបានផលចំណេញច្រើន។

ត្រូវរកទិញដីមានតម្លៃទាបជាងទីផ្សារ
ការរកបានដីមានតម្លៃទាបជាងទីផ្សារ គឺទទួលបានជោគជ័យមួយជំហ៊ានរួចហើយ ប៉ុន្តែការរកដីបែបនេះបានគឺត្រូវព្យាយាម និងអត់ធ្មត់ ហើយអ្នកទិញត្រូវធ្វើការជាមួយភ្នាក់ងារអចលនទ្រព្យច្រើន ជាមួយអាជ្ញាធរមូលដ្ឋានជាដើម។ ការរកបានដីបែបនេះ ជួលកាលត្រូវចំណាយពេល១ខែយូរ ឬឆាប់ជាងនេះអាស្រ័យលើការព្យាយាមរបស់យើង។

ការទិញដីឲ្យមានតម្លៃទាបជាងទីផ្សារ២០ភាគរយ ឬ៣០ភាគរយពិតជាល្អប្រសើរ ហើយយើងនឹងលក់ចេញបានលឿន និងត្រូវទុកឳកាសឲ្យអ្នកវិនិយោគបន្ទាប់ចំណេញផង កុំចង់ចំណេញតែម្នាក់ឯង។

ទិញដីនៅតំបន់អភិវឌ្ឍន៍
តំបន់អភិវឌ្ឍន៍ដែលមានរោងចក្រ សហគ្រាស ឬប្រជាជនរស់នៅច្រើនជាប្រភេទដីរស់ មានន័យថាមានចរន្តនៃតម្រូវការជាប្រចាំ។ ហេតុនេះការទិញដីឲ្យបានតម្លៃល្អ និងស្ថិតក្នុងផែនការអភិវឌ្ឍន៍ពិតជាល្អប្រសើរ ដែលធ្វើឲ្យយើងងាយលក់ចេញ និងចំណេញបានលឿន។

ទិញដីដែលមានសណ្ឋានដីល្អ
រូបរាងដីមានសណ្ឋានខុសៗគ្នា ហេតុនេះការទិញដីដែលរូបរាងស្អាត(មើលតាមប្លង់)ក៏ជាដី ដែលផ្តល់ឳកាសឲ្យអ្នកវិនិយោគងាយស្រួលលក់ចេញ និងចំណេញផងដែរ ប៉ុន្តែដីនៅក្នុងចំណុចទី៣នេះ ត្រូវមានរួមបញ្ចូលនូវចំណុចទី១និងទី២ខាងលើផងដែរ។

ទិញដីនៅតាមផ្លូវធំនិងជាផ្លូវវែង
តម្លៃដីក៏មានការប្រែប្រួលលើទាក់ទងនឹងទំហំ និងទាក់ទងនឹងប្រវែងផ្លូវផងដែរ ព្រោះដីនៅតំបន់ផ្លូវតូចៗ និងផ្លូវទាល់មិនងាយឡើងថ្លៃ និងពិបាករកអតិថិជនផងដែរ។ ប្រសិនជាយើងទិញដីនៅលើផ្លូវទ័ល ផ្លូវតូចចង្អៀតមិនទទួលបានជោគជ័យក្នុងការលក់ និងទទួលបានផលចំណេញនោះទេ។

ទិញដីនៅតំបន់ស្ថិតក្នុងផែនការអភិវឌ្ឍន៍របស់រដ្ឋាភិបាល
ការដឹងព៌តមានលឿន និងមុនគេ ជាជំហ៊ានជោគជ័យមួយរួចទៅហើយ ប៉ុន្តែការទទួលបានព៌តមានលឿន ពីផែនការអភិវឌ្ឍន៍របស់រដ្ឋាភិបាល និងវិស័យឯកជនជារឿងពិបាកមួយ ដែលទាមទារឲ្យយើងតាមដានព៌តមាន និងមានប្រភពស្និទ្ឋនឹងរដ្ឋាភិបាល ព្រោះមានតែមន្រ្តីរដ្ឋាភិបាលទេ ដែលអាចដឹងរឿងនេះបានមុនគេនិងឆាប់រហ័ស។

ដូច្នេះបើយើងទិញដីស្ថិតនៅក្នុងតំបន់ ដែលស្ថិតក្នុងផែនការអភិវឌ្ឍន៍របស់រដ្ឋាភិបាលបានឆាប់រហ័ស និងជាគំរោងដែលមិនចំណាយេពេលយូរដើម្បីចាប់ផ្តើម យើងនឹងទទួលបានផលចំនេញលឿន និងលក់ឆាប់ដាច់ផងដែរ៕

ចំណេះដឹង! តើអ្នកគួរដាក់ពាក្យស្នើសុំចុះបញ្ជីរក្រុមហ៊ុនឬទេ?

March 21, 2019

0

ដោយ វុត្ថា

ភ្នំពេញ៖ ក្នុងការពិចារណាថាតើលោក/ លោកស្រីគួរចុះបញ្ជីអាករលើតម្លៃបន្ថែមឬយ៉ាងណានោះ លោក/លោកស្រីត្រូវ សួរខ្លួនឯងនូវចំនុចមួយចំនួនដូចខាងក្រោមនេះ ដើម្បីធ្វើឲ្យប្រាកដថា អាជីវកម្មរបស់លោកអ្នកបានប្រព្រឹត្តទៅដោយរលូន។

ក. តើឥណទានអាករលើធាតុចូលរបស់ខ្ញុំ តែងតែលើសពីអាករដែលខ្ញុំកំណត់លើការលក់ដូររបស់ ខ្ញុំឬទេ?។ ឧទាហរណ៏ ប្រសិនបើលោក/លោកស្រីជាអ្នកប្រកបអាជីវកម្មទាក់ទិនដក់ការនាំចេញសេវាដែលជាប់អាករតាម អត្រាសូន្យភាគរយ លោក/លោកស្រីអាចពិចារណាបានថា លោក/លោ កស្រីនឹងមានបំណងចុះបញ្ជី ដោយស្ម័គ្រ ចិត្តដើម្បីស្នើសុំបង្វិលសងវិញ នូវប្រាក់អាករដែលបានបង់លើការទិញនិងចំណាយនានា។

ខ. តើខ្ញុំធ្វើការផ្គត់ផ្គង់ជាប់អាករឱ្យបុគ្គលជាប់អាករ ដែលបានចុះបញ្ជីដទៃទៀតឬទេ? ប្រសិនបើលោក/ លោកស្រីមិនបានចុះបញ្ជីអាករលើតម្លៃបន្ថែមទេ លោក/លោកស្រីមិនអាចចេញវិក្ក័យប័ត្រ អាករលើតម្លៃបន្ថែមឱ្យអតិថិជន ដែលបានចុះបញ្ជីរបស់លោក/លោកស្រីបានទេ។ ពេលនោះអតិថិជនរបស់ លោក/លោកស្រី មិនអាចស្នើសុំឥណទានអាករលើធាតុចូលបានទេ ម្ល៉ោះហើយពេលលក់ចេញវិញ អតិថិជនរបស់លោក/លោកស្រីត្រូវគិតថ្លៃខ្ពស់ជាងសព្វដង។

ក្នុងករណីនេះ គាត់អាចនឹងជ្រើសរើសការធ្វើអាជីវកម្មជា មួយអ្នកផ្គត់ផ្គង់ដែលបានចុះបញ្ជីផ្សេងទៀត ហើយលោក/លោកស្រីនឹងបាត់បង់មុខរបររបស់ខ្លួន។

គ. តើខ្ញុំធ្វើអាជីវកម្មជាសំខាន់ ជាមួយបុគ្គលជាប់អាករដែលមិនបានចុះបញ្ជីឬទេ? ក្នុងករណីនេះ វាហាក់ដូចជា គ្មានផលប្រយោជន៍អ្វីដល់លោក/ លោកស្រី ដើម្បីចុះចញ្ជីអាករលើតម្លៃបន្ថែមទេ រហូតដល់ពេលណាដែលលោក/ លោកស្រីមានផលរបរដល់កំរិតត្រូវចុះចញ្ជីដូចពោលក្នុងចំណុចទី៣ខាងលើ។

ឃ. លោក/លោកស្រីគួរយកមកពិចារណាផងដែរ នូវកាតព្វកិច្ចនៃការចុះបញ្ជីរនៅ ។ ពេលដែលបានចុះបញ្ជីរួចលោក/ លោកស្រីត្រូវគណនាអាករលើធាតុចេញ លើការផ្គត់ផ្គង់ជាប់អាករទាំងអស់។ លោក/ លោកស្រីអាចស្នើសុំឥណទានបាន តែចំពោះអាករលើធាតុចូល ដែលអាចបែងចែកបានចំពោះ ការផ្គត់ផ្គង់ជាប់អាករប៉ុណ្ណោះ។ លោក/លោកស្រីត្រូវដាក់លិខិតប្រកាសអាករលើតម្លៃបន្ថែមជូន អគ្គនាយកដ្ឋានពន្ធដារឱ្យបានទៀងទាត់ ហើយនិងកាន់រក្សាបញ្ជីការ គណនេយ្យឱ្យបានត្រឹមត្រូវសម្រាប់មន្រ្តីអគ្គនាយកដ្ឋាន ពន្ធដារត្រួតពិនិត្យនៅគ្រប់ពេលវេលា។

ប្រសិនបើលោក/ លោកស្រីសម្រេចធ្វើការស្នើសុំចុះបញ្ជីដោយស្ម័គ្រចិត្ត ត្រូវភ្ជាប់មកជាមួយនិងទម្រង់ពាក្យ ស្នើសុំនូវលិខិតពន្យល់អំពីចរិតនៃអាជីវកម្មរបស់លោក/លោកស្រី និងមូល ហេតុដែលលោក/លោកស្រីមាន បំណងចុះបញ្ជីព្រមទាំងចុះកាលបរិច្ឆេទនៃការស្នើសុំចុះបញ្ជីផង។

ប្រសិនបើលោក/ លោកស្រី ពុំមានបំណងចុះបញ្ជីក្នុងពេលបច្ចុប្បន្នទេ លោក/លោកស្រីត្រូវបញ្ជាក់ហេតុផល។
ប្រសិនបើលោក/ លោកស្រីត្រូវចុះបញ្ជីដោយស្ម័គ្រចិត្ត លោក/ លោកស្រីស្ថិតក្នុងលក្ខណៈជាបុគ្គលចុះបញ្ជីក្នុង រយៈពេល ២ឆ្នាំដោយមិនគិតពីតម្លៃ នៃផលរបរជាប់អាករនៃអាជីវកម្មរបស់លោក/លោកស្រីឡើយ៕

សកម្មភាពពុះដីឡូតិ៍កាន់តែរីករាលដាលដល់ព្រំដែនខ្មែរ-ថៃ

March 20, 2019

0

ដោយ រ៉ាណេត

ប៉ោយប៉ែត៖ សកម្មភាពនៃការពុះដីឡូតិ៍បានរីករាលដាលដល់តំបន់ព្រំដែនកម្ពុជា ថៃហើយ ខណៈកម្មភាពពុះដីឡូត៍នៅតាមតំបន់ជាយក្រុង ក៏ដូចជានៅតាមបណ្តាខេត្តមួយចំនួនកំពុងបន្តសកម្មភាពយ៉ាងពុះកញ្រ្ជោល។

ក្រុមហ៊ុនមួយបានសម្រេចពុះដីឡូត៍លើផ្ទៃដីទំហំ១០ ហិកតា ដែលស្ថិតនៅក្នុងតំបន់នៃគម្រោងអភិវឌ្ឍន៍ ជាទីក្រុងរណបដ៏ធំប្រចាំនៅក្រុងប៉ោយប៉ែត ត្រូវបានអ្នកជំនួញក្នុងវិស័យដីធ្លីសម្រេចពុះបំបែកជាដីឡូតិ៍ លក់ជូនអតិថិជនយ៉ាងគគ្រឹកគ្រេង។

លោក ខេម ប៊ុនថៃ ដែលនៅក្នុងពិភពសិល្បៈគេស្គាល់ឈ្មោះថា ខេមរៈ សិរីមន្ត ដែលបានវិវឌ្ឍខ្លួន ក្លាយជាអ្នកជំនួញដីធ្លីបាននិយាយឲ្យដឹងកាលពីពេលថ្មីៗនេះថា បើទោះជាលោកគឺជាតារាសិល្បៈ ប៉ុន្តែលោកបានមើលឃើញថា ទីផ្សារដីធ្លីមិនមានបញ្ហា ឬ ហានិភ័យណាមួយកើតឡើងនោះទេ គឺមានតែកញ្ជ្រោលខ្លាំងឡើង ទើបលោកសម្រេចចិត្តបើកគម្រោងពុះលក់ដីឡូតិ៍ លើផ្ទៃដីជាង១០ហិកតា នៅក្នុងតំបន់ប៉ោយប៉ែត ដែលជាតំបន់មានសក្ដានុពលខ្លាំង និងស្ថិតនៅជាប់ព្រំដែន កម្ពុជា - ថៃ។

លោកថា “China Poipet Satellite City ជាគម្រោងអភិវឌ្ឍទីក្រុងរណបថ្មីមួយ ដែលមានភាពទំនើប ស៊ីវីល័យ រួមមាន ដូចជាអាគាខុនដូ សណ្ឋាគារ រីសត ផ្សារទំនើប casino តំបន់សេដ្ធកិច្ចពិសេស រោងចក្រ សួនឧស្សាហ៍កម្ម ផែស្ងួត សំណង់បុរីលំនៅដ្ឋាន លាតសន្ធឹងលើផ្ទៃដីសរុបជាង១ពាន់ហិកតា”។

លោកបន្តថា “គម្រោងពុះដីឡូតិ៍នេះ ក៏ត្រូវបានរៀបចំជាស្រេចនូវប្រព័ន្ធហេដ្ឋារចនាសម្ព័ន្ធ ដែលវានឹងជួយឱ្យតំបន់ព្រំដែនកាន់តែមានភាពរស់រវើក មានភាពរីកចម្រើន និងទាក់ទាញ ខណៈដែលតម្លៃដីមួយឡូតិ៍ត្រឹមតែ ២៩៥០ ដុល្លារតែប៉ុណ្ណោះ។

លោក សួង សុខហ៊ាង ប្រធានក្រុមប្រឹក្សាភិបាលក្រុមហ៊ុន Four Star Plus Four និងក្រុមហ៊ុន Sg Top Trust បានទទួលស្គាល់ថា បច្ចុប្បន្ននេះសក្ដានុពល និងតម្លៃអចលនទ្រព្យនៅក្រុងប៉ោយប៉ែត គឺមានសន្ទុះខ្លាំង ពោលគឺមិនចាញ់ខេត្តព្រះសីហនុនោះឡើយ។ ដោយឡែកតំបន់ដែលឆ្ងាយពីក្រុងប៉ោយប៉ែត ហាក់នៅមានកម្រិតបន្តិចត្បិតចរន្តនៃដំណើរសេដ្ឋកិច្ច នៅមិនទាន់ពុះកញ្ច្រោលនៅឡើយ។

លោកថា “តម្លៃដីនៅក្រុងប៉ោយប៉ែតនាពេលនេះគឺមានសន្ទុះខ្លាំង អាចឡើងរហូតដល់ ៤០០០-៤៥០០ ដុល្លារក្នុងមួយម៉ែត្រការ៉េ ត្បិតតម្រូវការមានទំហំធំជាងការផ្គត់ផ្គង់”។លោកបន្តថា “តំបន់ឆ្ងាយពីប៉ោយប៉ែត អាចមានកម្រិតទាបនៅឡើយ ប៉ុន្តែនៅថ្ងៃខាងមុខវានឹងឡើងថ្លៃបន្តិចម្ដងៗ ដែលវាក៏ជាឱកាសសម្រាប់ ដែលមានបំណងវិនិយោគបន្តទទួលយកចំណេញ”៕

JICA រកឃើញថាខេត្តកំពង់ឆ្នាំងសមស្របសំរាប់ធ្វើជាមជ្ឈមណ្ឌលដឹកជញ្ជូនទំនិញអន្តរជាតិ

March 20, 2019

0

ដោយ ស៊ីវ ម៉េង

ភ្នំពេញ៖ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានរកឃើញថា ខេត្តកំពង់ឆ្នាំងជាភូមិសាស្រ្តមានភាពសមស្របសម្រាប់ជាទីតាំង មជ្ឈមណ្ឌលពាណិជ្ជកម្មប្រចាំតំបន់ ខណៈរដ្ឋមន្រ្តីក្រសួងសាធារណៈការនិងដឹក ជញ្ជូនបានជំរុញឲ្យអ្នកវិនិយោគបរទេស ស្ថាបនាព្រលានយន្តហោះនៅខេត្តកំពង់ឆ្នាំងឡើងវិញ។

រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល លោកជា អូនបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២០ មិនានេះថា ការសិក្សារបស់អង្គការ JICA បានរកឃើញថា ខេត្តកំពង់ឆ្នាំងសមស្របជាទីតាំងកណ្តាល នៃការផ្លាស់ប្តូរទំនិញនិងការដឹកជញ្ជូននៅពេលអនាគត (Cargo Hub) ប៉ុន្តែដើម្បីប្រែក្លាយខេត្តនេះជាតំបន់បែបនេះបានទាមទារឲ្យមានការសាងសង់ផ្លូវហាយវេ និងការសាងសង់ឡើងវិញនូវព្រលានយន្តហោះក្នុងខេត្តឡើងវិញផងដែរ។

លោកបន្តថា “ប៉ុន្តែរហូតមកទល់ពេលនេះ មិនទាន់មានក្រុមហ៊ុនណាចាប់អារម្មណ៍វិនិយោគសាងសង់ព្រលានយន្តហោះក្នុងខេត្តកំពង់ឆ្នាំងឡើងវិញនៅឡើយទេ”។ លោកបន្តថា “រដ្ឋាភិបាលតែងតែមានផែនការអភិវឌ្ឍន៍ហើយ ប៉ុន្តែអ្វីៗវាត្រូវការពេលវេលាជាក់លាក់មួយ”។

ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនលោក ស៊ុន ចាន់ថុល កាលពីថ្ងៃទី១៩ មិនាម្សិលម៉ិញនេះ ដោយលោកបានអំពាវនាវឲ្យក្រុមហ៊ុនឯកជន ធ្វើការវិនិយោគសាងសង់ព្រលានយន្តហោះក្នុងខេត្តកំពង់ឆ្នាំងឡើងវិញ ដោយសារខេត្តនេះមានព្រលានយន្តហោះស្រាប់ និងជាទីតាំងមានសក្តានុពលនាពេលអនាគត ពិសេសជាតំបន់ដែលមានការតភ្ជាប់ផ្លូវដែករវាងរាជធានីភ្នំពេញ ទៅកាន់ព្រំដែនប៉ោយប៉ែត ខេត្តបន្ទាយមានជ័យ៕

បន្ទប់សណ្ឋាគារ និងផ្ទះសំណាក់នៅខេត្តព្រះសីហនុកើនដល់ជាង១ម៉ឺនបន្ទប់

March 20, 2019

0

ដោយ ៖ នៅ វឌ្ឈនា

ព្រះសីហនុៈ ដោះស្រាយបញ្ហាប្រឈមនៃកង្វះបន្ទប់សណ្ឋាគារនៅក្រុងព្រះសីហនុលែងចោទជាបញ្ហាហើយ ដោយចំនួនបន្ទប់សណ្ឋាគារ និងផ្ទះសំណាក់ក្នុងខេត្តជាប់មាត់សមុទ្រនេះបានកើនឡើងដល់ជាង ១០,០០០ បន្ទប់ហើយ។

ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹះស្នា បានមានប្រសាសន៍ ក្នុងពេលក្រុមការងារបច្ចេកទេសរដ្ឋបាលខេត្តព្រះសីហនុ និងមន្ទីរពាក់ព័ន្ធ រួមជាមួយក្រុមការងារក្រុមហ៊ុន Blue Media Cambodia បានរៀបចំនិងត្រួតពិនិត្យឡើងវិញនូវការរៀបចំព្រឹត្តិការណ៍សង្រ្កាន្តសមុទ្រ ដែលនឹងប្រព្រឹត្តទៅ៣ថ្ងៃចូលឆ្នាំខ្មែរនាព្រឹកថ្ងៃទី១៩ មិនាកន្លងមកថា នាពេលបច្ចប្បន្ននេះ នៅទូទាំងក្រុងព្រះសីហនុ មានបន្ទប់សណ្ឋាគារ និងផ្ទះសំណាក់ចំនួនជាង១ម៉ឺនបន្ទប់សម្រាប់ភ្ញៀវជួលស្នាក់នៅ អំឡុងពេលពួកគាត់មកកម្សាន្តនៅទីនេះ។

បន្ថែមលើសពីកន្លែងស្នាក់នៅខេត្តព្រះសីហនុ ក៏សម្បូរទៅដោយភោជនីយដ្ឋាន និងអាហារដ្ឋានជាង៣០០កន្លែងសម្រាប់ទទួលផ្គត់ផ្គង់ម្ហូបអាហារជូនភ្ញៀវទូទៅ។

លោកស្រី ខែក ខេមរ៉ាត អគ្គនាយិការ ក្រុមហ៊ុនប្ល៊ូមេឌា (Blue Media) បានឲ្យដឹងថា ក្រុមហ៊ុនប៊្លូមេឌាបានសហការជាមួយរដ្ឋបាលខេត្ត ដើម្បីត្រៀមរៀបចំកម្មវិធីសង្ក្រាន្តសមុទ្រសម្រាប់អបអរសារទរពិធីបុណ្យចូលឆ្នាំថ្មីប្រពៃណីខ្មែរ នាពាក់កណ្តាលខែមេសាខាងមុងនេះ។ លោកស្រីបន្តថា យើងនឹងរៀបចំជាឆាកវេទិកាធំមួយសម្រាប់ពិធីទទួលទេវតាឆ្នាំថ្មី ការសម្តែងរបាំត្រុដិ ពិធីរាប់បាត្រព្រះសង្ឃ១១៩អង្គ ពិធីស្រង់ព្រះនៅថ្ងៃចូលឆ្នាំទី៣ ការលេងល្បែងប្រជាប្រិយផ្សេងៗ (បោះឈូង អង្គុញ ទាញព្រ័ត្រជាដើម) មានការប្រគំតន្រី្តសម្រាប់រាំលេងកម្សាន្ត ការសម្តែងសិល្បៈប្រពៃណី និងសហសម័យ ពិធីបណ្តែតគោមទឹកនិងបង្ហោះគោមជាដើម និងកម្មវិធីតាំងពិព័រណ៌ផលិតផលផ្សេងៗចំនួនជិត ៣០០ស្តង់។

បន្ថែមលើសពីនោះទៀត យើងក៏ត្រៀមរៀបចំឲ្យមានទីកន្លែងសម្រាប់បាញ់ទឹក (គឺបន្ទាប់ពីពិធីស្រង់ព្រះរួចហើយ) នាពេលណាថ្ងៃមានកម្តៅខ្លាំងផងដែរ។

លោកស្រីបន្តថា កម្មវិធីនេះ នឹងប្រព្រឹត្តទៅរយៈពេល ៣ថ្ងៃសម្រាប់កម្មវីធីសង្ក្រាន្តសមុទ្រ ប៉ុន្តែដោយឡែកសម្រាប់កម្មវិធី តាំងពិព័រណ៌លក់ផលិតផលនានានោះ គណៈកម្មការរៀបចំឲ្យមានរយៈពេល៥ថ្ងៃ។ យើងត្រៀមនឹងរៀបចំជាកម្មវិធីកម្សាន្តប្លែកគ្នាជាច្រើនទៅតាមថ្ងៃនីមួយៗ ក្នុងអំឡុងពេលបុណ្យចូលឆ្នាំថ្មីនេះ ដើម្បីឲ្យស្របទៅតាមប្រពៃណីជាតិខ្មែរផង និងការកម្សាន្តសប្បាយសម្រាប់មហាជនទូទៅផង៕

សញ្ញាវិជ្ជមាន៖ សម្តេចតេជោប្រកាសបញ្ជាទិញកប៉ាល់ផលិតអគ្គីសនីពីប្រទេសទួរគី

March 20, 2019

0

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានប្រកាសបញ្ជាទិញកប៉ាល់ផលិតអគ្គីសនីពីប្រទេសទួរគី ដែលអាចផ្តល់ភ្លើងប្រើប្រាស់បានប្រមាណ ២០០មេហ្កាវ៉ាត់ ដើប្បីឆ្លើយតបទៅនៅនឹងកង្វះខាត នៃការប្រើប្រាស់អគ្គិសនីរបស់ប្រជាពលរដ្ឋនៅក្នុងប្រទេសកម្ពុជា។

នៅក្នុងពិធីសំណេះសំណាលជាមួយបងប្អូនកម្មករ កម្មការិនីជាង ១ម៉ឺននាក់ នៅខេត្តពោធិ៍សាត់ជំនួបនៅថ្ងៃទី២០ ខែមីនា ២០១៩នេះ សម្តេចតេជោបានឲ្យដឹងថា កម្ពុជាត្រូវការរោងចក្រអគ្គីសនី ដែលប្រើប្រាស់បច្ចេកវិទ្យាថ្មីទំនើបនាពេលអនាគត ដើម្បីយកមកផ្គត់ផ្គង់ក្នុងទីក្រុង ទម្រាំមានរោងចក្រផលិតអគ្គីសនីថ្មីថែមទៀត ចាំដកកប៉ាល់ទួរគី ចេញវិញ។

សម្តេចបន្តថា “ទោះបីយើងទិញកប៉ាល់ផលិតអគ្គីសនីពីតួគីថ្លៃបន្តិចមែន ប៉ុន្តែប្រជាពលរដ្ឋមិនទទួលផលប៉ះពាល់ដោយសារថ្លៃភ្លើងទេ”។ សម្តេចបន្ថែមថា “កម្ពុជានឹងប្រឈមនូវកង្វះខាតភ្លើងប្រើប្រាស់ ដោយសារតម្រូវការកាន់តែខ្ពស់ដូចជានៅទីក្រុងភ្នំពេញ, សៀមរាប និងក្រុងព្រះសីហនុជាដើម ដែលពីមុនប្រើប្រាស់តែជាង២០ មេហ្កាវ៉ាត់ ប៉ុន្តែពេលនេះគឺត្រូវការភ្លើងជាង១០០មេហ្កាវ៉ាត់”។

ជាក់ស្តែងវិស័យសំណង់គឺបានកើនឡើងជាង៧០០% បើប្រៀបធៀបក្នុងខែ មករា និង កុម្ភះឆ្នាំទៅ។ ចំណុចហ្នឹងហើយដែលយើងការភ្លើងប្រើប្រាស់កាន់តែច្រើន ដែលខុសពីការព្យាករណ៍របស់រាជរដ្ឋាភិបាលកាលពីមុន។

សម្តេចតេជោហ៊ុន សែន បានជំរុញអោយក្រសួងរ៉ែ និងថាមពល សហការជាមួយអាជ្ញាធរអគ្គិសនីកម្ពុជា ជ្រើសរើសយករោងចក្រផលិតអគ្គិសនី ដែលមានលក្ខណៈបច្ចេកវិទ្យាទំនើប ដូចជា រោងចក្រដែលប្រើប្រាស់ហ្គាស (Gas) ដែលប្រសើរជាងធ្យូងថ្ម ព្រោះយូរទៅវាមានតម្លៃកាន់តែខ្ពស់ដែលបង្កការលំបាក។ ដូច្នេះយើងត្រូវការរោងចក្រផលិតអគ្គិសនីបែបទំនើបសម្រាប់កម្ពុជានាពេលអនាគត។

លោកស្រី Ayda Unlu ឯកអគ្គរដ្ឋទូតនៃសាធារណរដ្ឋទួរគីប្រចាំព្រះរាជាណាចក្រកម្ពុជានៅក្នុងជំនួបសម្តែងការគួរសម និងពិភាក្សាការងារជាមួយ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល កាលពីពេលថ្មីៗនេះ ដោយឧទ្ទេសនាមក្រុមហ៊ុន Karadeniz Holding ដែលជាក្រុមហ៊ុននាំមុខគេផ្នែកថាមពលនៅទួរគី ដើម្បីបានធ្វើបទបង្ហាញពីរោងចក្រអគ្គិសនីនៅលើនាវា ដែលក្រុមហ៊ុននេះ បានសម្រេចផលិតនាវាអគ្គិសនីដែលមានសមត្ថភាពផលិតថាមពលអគ្គិសនី ២៨០០មេហ្គាវ៉ាត់រួចហើយ នៅទូទាំងពិភពលោក និងកំពុងតម្លើងនាវាថ្មី ដែលមានសមត្ថភាពផលិតថាមពលអគ្គិសនីរហូតដល់ទៅ៥០០០មេហ្គាវ៉ាត់តាមការបញ្ជាទិញបន្ថែមទៀត លើសពីនេះ លក្ខខណ្ឌក្នុងការវិនិយោគគឺមានភាពងាយស្រួលទំាងតម្លៃសមរម្យ មិនប៉ះពាល់បរិស្ថានធ្ងន់ធ្ងរ និងប្រើប្រាស់រយៈពេលខ្លីក្នុងការ តម្លើង។ល។

លោក ទី នរិន្ទ រដ្ឋលេខាធិការក្រសួងរ៉ែ និងថាមពលកាលពីពេលថ្មីៗនេះបានដឹកនាំកិច្ចប្រជុំស្តីពី “ការពិនិត្យជម្រើសរោងចក្រអគ្គិសនីលើកនាវា” ដោយមានការចូលរួមពីថ្នាក់ដឹកនាំនៃអគ្គនាយកដ្ឋានថាមពលនៃក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជា។

កិច្ចប្រជុំនេះមានគោលបំណង ពិនិត្យទីតាំងជម្រើសរោងចក្រអគ្គិសនីលើកាប៉ាល់ ទីតាំងសម្រាប់ភ្ជាប់ជាមួយបណ្តាញជាតិបញ្ជូនអគ្គិសនី ឯកសារបច្ចេកទេស និងរយៈពេលដែលត្រូវការចាំបាច់ពេលខ្វះខាតថាមពលអគ្គិសនី៕

តំបន់ជ្រោយចង្វារកាន់តែមានភាពលេចធ្លោជាមួយគំរោងជាច្រើនលេចឡើងនៅឆ្នាំនេះ

March 20, 2019

0

ដោយ រ៉ាណេត

ភ្នំពេញ៖ តំបន់ជ្រោយចង្វារបាន និងកំពុងមានភាពលេចធ្លោកាន់តែខ្លាំងនៅដើមឆ្នាំ ២០១៩នេះ ដោយសារគំរោងអភិវឌ្ឍន៍ជាច្រើនបានលេចចេញជារូបរាង ខណៈហេដ្ឋារចនាសម្ព័ន្ឋធំៗជាច្រើនបាននិងកំពុងសាងសង់ និងត្រៀមបញ្ចប់ការសាងសង់ផងដែរ។

សម្រាប់ឆ្នាំ២០១៩នេះ ជ្រោយចង្វារនឹងកាន់តែមានភាពអស្ចារ្យបន្ថែមទៀតជាមួយនឹងវត្តមានសំណង់អគារជាច្រើនរួមមាន អាគារការិយាល័យកណ្តាលរបស់ក្រុមហ៊ុន OCIC កំពស់២០ជាន់ អាគាររបស់អគ្គនាយកដ្ឋានពន្ឋដាកំពស់ ៣៦ជាន់ សាលពិព៌ណលំដាប់អន្តរជាតិ សួនកំសាន្តដាយណូស័រ Palace food ដែលបានវិនិយោគដោយក្រុមហ៊ុន OCIC នៅក្នុងទីក្រុងរណបជ្រោយចង្វារ។

ជាមួយគ្នានេះមណ្ឌលកម្សាន្ត ដែលមានតម្លៃរាប់សិនលានដុល្លារ និងទីក្រុងរណបរបស់ក្រុមហ៊ុនលី យ៉ុងផាត់ ព្រមគ្នាជាមួយនឹងទីក្រុងរណបតេជោមរកត ដែលវិនិយោគដោយក្រុមហ៊ុនលី យ៉ុងផាត់ និងក្រុមហ៊ុនចិន បាននិងកំពុងធ្វើឲ្យតំបន់នេះមានការរីកចម្រើនយ៉ាងឆាប់រហ័ស។

លោក ស៊ា ឆៃលីន នាយកក្រុមហ៊ុនអចលនទ្រព្យឆៃលីន ស៊ារៀលធី ខូអិលធីឌី បង្ហាញពីការសាទរជាមួយនឹងភាពល្អប្រសើរ និងការអភិវឌ្ឍន៍យ៉ាងឆាប់រហ័សក្នុងតំបន់ជ្រោយចង្វារ។ លោកថា វាជារឿងមួយដ៏ល្អប្រសើរ ហើយយើងក៏រីករាយនូវសមិទ្ធិផលទាំងអស់នេះដែរ។

លោកបន្តថា “នៅពេលតំបន់ណាមួយមានការអភិវឌ្ឍ វានឹងជំរុញឱ្យតម្លៃអចលនទ្រព្យនៅក្នុងតំបន់នោះឡើងថ្លៃហួសពីការរំពឹងទុក ជាក់ស្ដែងដូចជាតំបន់ជ្រោយចង្វារនេះជាដើមដើម”។លោកបន្ថែមថា “បន្ទាប់ពីមានគម្រោងអភិវឌ្ឍន៍ជាតំបន់លំនៅដ្ឋានលំដាប់ខ្ពស់ ជាពិសេសមានការបង្កើតជាទីក្រុងរណប ដែលមានតម្លៃរាប់ពាន់លានដុល្លារ វាបានជំរុញតម្លៃដីឱ្យឡើងថ្លៃខ្ពស់រហូតដល់១គុណនឹង១០ ឯណោះ”។

លោកឆៃលីន ស៊ាបានបន្តថា កាលពីប៉ុន្មានឆ្នាំមុន តម្លៃដីនៅតំបន់ជ្រោយចង្វារអាចមានតម្លៃត្រឹម៤០០ ដុល្លារក្នុងមួយម៉ែត្រការ៉េតែប៉ុណ្ណោះ ប៉ុន្តែបច្ចុប្បន្នតំបន់ដដែលនេះ មានទីតាំងខ្លះមានតម្លៃរហូតដល់៣៥០០ ដុល្លារក្នុងមួយម៉ែត្រការ៉េក៏មាន។ យ៉ាងណាក៏ដោយ លោកក៏បានបញ្ជាក់ផងដែរថា តម្លៃនេះអាចនឹងមានកំណើនបន្តទៀតប្រមាណ ១០-១៥ ភាគរយសម្រាប់ឆ្នាំ២០១៩នេះ។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) បានមានប្រសាសន៍ថា មិនថាពេលនេះ ឬថ្ងៃអនាគតនោះទេ តំបន់ជ្រោយចង្វារនៅតែមានភាពទាក់ទាញ និងមានសក្ដានុពលសម្រាប់ការវិនិយោគ។ ភាពទាក់ទាញទាំងអស់នោះ ក៏ព្រោះតែនៅតំបន់នេះមានគម្រោងអភិវឌ្ឍធំៗជាច្រើន ដូចជាទីក្រុងរណប និងមជ្ឈមណ្ឌលពិព័រណ៍ខ្នាតអន្តរជាតិរបស់ក្រុមហ៊ុន OCIC និងទីក្រុងរណប និងមជ្ឈមណ្ឌលកម្សាន្តលំដាប់អន្តរជាតិ ជាបណ្តុំលំនៅដ្ឋានបែបទំនើបកម្រិតខ្ពស់ជាដើម ក៏ដូចជា ប្រព័ន្ធហេដ្ឋារចនាសម្ព័ន្ធជាច្រើនត្រូវបានបង្កើតឡើង ជាពិសេសស្ពានជាច្រើនកន្លែងក៏បានសាងសង់រួចរាល់ងាយស្រួលក្នុងការធ្វើដំណើរឆ្លងកាត់។

លោកបន្តទៀតថា “សកម្មភាពអភិវឌ្ឍន៍ទាំងអស់នេះហើយ ដែលជាកត្តារុញច្រានទំនោរចិត្តរបស់អ្នកវិនិយោគជាតិ និងអន្តរជាតិ ឱ្យងាកទៅធ្វើការវិនិយោគនៅតំបន់នេះ ហើយវាអាចនឹងបន្តរហូតដល់ ព្រំប្រទល់ស្រុកមុខកំពូលខេត្តកណ្តាល ហើយដោយឡែកចំពោះតម្លៃដីក៏នៅតែបន្តកើនឡើង”៕

សម្តេចតេជោនឹងប្រកាសចេញនូវកំណែទម្រង់សេដ្ឋកិច្ចដែលមានចក្ខុវិស័យយូរអង្វែង

March 20, 2019

0

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជានឹងប្រកាសដាក់ចេញនូវកំណែទម្រង់សេដ្ឋកិច្ច ដែលមានចក្ខុវិស័យយូរអង្វែង ដើម្បីឈានឆ្ពោះទៅរកដង្ហើមដកចេញចូល និងរស់ដោយខ្លួនឯង ដោយគ្មានការកៀបសង្កត់ពីបរទេស។

សម្តេចតេជោបានប្រកាសបែបនេះ នៅលើទំព័រហ្វេសបុកផ្លូវការរបស់សម្តេច នៅថ្ងៃទី២០ ខែមីនានេះថា នៅថ្ងៃទី២៩ មីនា ២០១៩ ខាងមុខនេះ រាជរដ្ឋាភិបាលកម្ពុជានឹងប្រកាសចេញ នូវកំណែទម្រង់សេដ្ឋកិច្ចដែលមានចក្ខុវិស័យយូរអង្វែង ដើម្បីឈានឆ្ពោះទៅរកដង្ហើមដកចេញចូល និងរស់ដោយខ្លួនឯង ដោយគ្មានការកៀបសង្កត់ពីបរទេស។

សម្តេចបន្តថា “កំណែទម្រង់នេះ នឹងមិនរងផលប៉ះពាល់ដោយកត្តាខាងក្រៅនោះទេ។ ប៉ុន្តែនឹងផ្តល់នូវភាពអនុគ្រោះ និងផលប្រយោជន៍កាន់តែច្រើន ដើម្បីលើកទឹកចិត្តដល់វិស័យឯកជន ដែលជាឱកាសដ៏ល្អ សម្រាប់វិនិយោគគិន និងពាណិជ្ជករទាំងក្នុងស្រុក និងមកពីបរទេស”។

សម្តេចបន្ថែមថា កន្លងទៅនេះ រាជរដ្ឋាភិបាលកម្ពុជាបានធ្វើកំណែទម្រង់ជាបណ្តើរៗមួយចំនួនហើយ ដើម្បីសម្រួលអោយការនាំទំនិញចូលមកកម្ពុជា មានល្បឿនលឿន មិនចំណាយលើតុ ក្រោមតុច្រើន ដូចជា ការរំលាយចោលអង្គភាពកាំសាប ដកចេញកាំកុងត្រូល និងមិនចាំបាច់តម្រូវអោយស្កែន (Scan) ទំនិញនាំចូល។

ប៉ុន្តែក្នុងករណីដែលយើងសង្ស័យថាមានគ្រឿងញៀន គឺអាចស្កែនបាន ប៉ុន្តែត្រូវធ្វើអោយបានលឿន និងឆាប់រហ័សបំផុត ដើម្បីកុំអោយខកពេលវេលា និងខាតបង់ប្រាក់កាសក្រុមហ៊ុនច្រើន។ ចំពោះការនាំចេញវិញ បើស្កែន គឺធ្វើចំពោះប្រទេសណាដែលគេតម្រូវអោយស្កែនតែប៉ុណ្ណោះ។

លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបាន បានឲ្យដឹងថា ការដាក់ចេញនូវកំណែទម្រង់ថ្មីរបស់រដ្ឋាភិបាលនេះ នឹងជួយដល់ការរីកចម្រើននៅក្នុងប្រទេសកម្ពុជា និងជាផលចំណេញហិរញ្ញវត្ថុរបស់ជាតិផងដែរក្នុងការយកទៅអភិវឌ្ឍប្រទេស និងជួយដល់ពលរដ្ឋ។ អ្វីដែលរដ្ឋាភិបាលរំលាយចោលអង្គភាពកាំសាប, ដកចេញកាំកុងត្រូលជាដើម គឺជាការដកនូវនាំងនូវការនាំចូល និងនាំចេញរបស់វិនិយោគិនមានលក្ខណៈងាយស្រួលមួយកម្រិតទៀត។

លោកបន្តថា “ប្រទេសមួយចំនួននៅលើពិភពលោក ក៏គេគិតផងដែរទៅលើវិស័យណាដែលជារនាំង ឬការិយាល័យធិប្បតេយ្យ ដែលត្រូវបានគេសម្រួលដើម្បីនាំចេញនាំចូល និងការការលើកទឹកចិត្តដល់វិនិយោគិន”។ លោកបន្តថា “ចាប់ពីពេលនេះឬទៅមុខទៀត រដ្ឋាភិបាលក៏គួរតែគិតផងដែរដល់ស្ថាប័នណាដែលជាន់គ្នា ជៀសវាងការរេរាំងដល់ការវិនិយោគ និងបាត់បង់ពេលវេលា និងចំណូលរបស់វិនិយោគិន ព្រមទាំងជាការទាក់ទាញវិនិយោគិនជាច្រើនផ្សេងទៀតមកវិនិយោគក្នុងប្រទេសកម្ពុជា”។

លោកបានរំពឹងថា រដ្ឋាភិបាលនឹងបន្តគិតគូដល់ការកំណែទម្រង់ផ្សេងៗទៀតដើម្បីទាក់ទាញមូលធនថ្មី តាមរយៈលំហូរទុនវិនិយោគផ្ទាល់មកចាក់នៅក្នុងប្រទេសកម្ពុជា តែបើយើងគ្មានវិនិយោគិនថ្មី យើងគ្មានលុយថ្មី ហើយក៏គ្មានកំណើនសេដ្ឋកិច្ចផងដែរ”៕