សង្រ្គាមពាណិជ្ជកម្មអាម៉េរិក-ចិន: កម្ពុជា និងអាស៊ី បាន និងកំពុងផ្លាស់ប្តូរពីការពឹងផ្អែកលើប្រាក់ដុល្លារ

May 22, 2019

ដោយ ៖ Donald Lee

ភ្នំពេញ ៖ ដោយសារសង្រ្គាមពាណិជ្ជកម្មរវាងសហរដ្ឋអាមេរិក និងចិនបន្តមានភាពតានតឹង កម្ពុជា និងសមាជិកអាស៊ានបូកបី រួមមានប្រទេសចិន ជប៉ុន និងកូរ៉េខាងត្បូងកំពុងចាត់វិធានការយ៉ាងសកម្ម ដើម្បីផ្លាស់ប្តូរពីការពឹងផ្អែកប្រាក់ដុល្លារអាមេរិក។

ខណៈដែលសង្គ្រាមពាណិជ្ជកម្មអាម៉េរិក និងចិនបានកើតឡើងជាថ្មីនៅក្នុងខែឧសភានេះ រដ្ឋមន្ដ្រីហិរញ្ញវត្ថុមកពីបណ្តារដ្ឋជាសមាជិកអាស៊ានបូកបីបានជួបគ្នា ដើម្បីបង្កើនសមាហរណកម្មហិរញ្ញវត្ថុ និងមូលប័ត្ររូបិយប័ណ្ណក្នុងតំបន់ ដើម្បីធានាដល់សេដ្ឋកិច្ចរបស់ពួកគេនៅចំពេល ដែលមានការភ័យខ្លាចថាមានវិបត្តិសេដ្ឋកិច្ចសកលលោក។

ក្រុមអ្នកវិភាគជឿថា រដ្ឋជាសមាជិកអាស៊ាន និងអាស៊ានបូកបី កំពុងជំរុញការកាត់បន្ថយភាពអាស្រ័យលើប្រាក់ដុល្លារអាមេរិក ដែលជាគ្រឹះនៃប្រព័ន្ធហិរញ្ញវត្ថុពិភពលោក។ ទិន្នន័យសេដ្ឋកិច្ចបានបង្ហាញថា ជាលទ្ធផលនៃសង្រ្គាមពាណិជ្ជកម្មអាមេរិក-ចិនបានធ្វើឲ្យគំរូវិនិយោគទុនសកល កំពុងងាកចេញពីសកលភាវូបនីយកម្ម និងឆ្ពោះទៅរកប្រព័ន្ធពាណិជ្ជកម្មតំបន់បី ដែលផ្តោតលើសហរដ្ឋអាមេរិក សហភាពអឺរ៉ុប និងចិន។

ប៉ុន្តែការគ្របដណ្តប់របស់សហរដ្ឋអាមេរិក លើវិស័យហិរញ្ញវត្ថុសកលមិនអាចត្រូវបានគេប៉ាន់ប្រមាណបាននោះទេ។ ប្រាក់ដុល្លារអាមេរិកនៅតែជារូបិយប័ណ្ណបម្រុងពិភពលោកជាក់ស្តែង។ ប្រាក់ដុល្លារអាមេរិកមានចំនួន៦៣ភាគរយនៃទុនបំរុងពិភពលោក ខណៈប្រាក់អឺរ៉ូមានចំនួន២០ភាគរយ។ រូបិយប័ណ្ណអាស៊ី ដូចជា ប្រាក់យ៉េនមានចំនួន៥ ភាគរយនិងប្រាក់យន់ចិន២ភាគរយ។

ដោយមានការសម្របសម្រួលជាមួយធនាគារកណ្តាលនានានៅអាស៊ី ធនាគារជាតិនៃកម្ពុជា បានជួបប្រជុំកាលពីថ្ងៃសុក្រ ដើម្បីពង្រឹងកិច្ចខិតខំប្រឹងប្រែងរបស់ខ្លួនក្នុងការធ្វើបដិដុល្លាររូបនីយកម្មសេដ្ឋកិច្ចរបស់កម្ពុជា ដោយប្រើប្រាស់ឧបករណ៍ហិរញ្ញវត្ថុសំដៅដល់វិស័យធនាគារ។

ប្រាក់កម្ចីធនាគារពាណិជ្ជនានា នៅក្នុងប្រទេសកម្ពុជាជាទូទៅមានតម្លៃជាដុល្លារ។ នៅឆ្នាំ២០១៦ ធនាគារជាតិនៃកម្ពុជាបានប្រកាសថា ធនាគារត្រូវបានតម្រូវឱ្យមានកូតាជាប្រាក់រៀលចំនួន១០ភាគរយ នៅក្នុងសមតុល្យឥណទានរបស់ខ្លួននៅចុងឆ្នាំនេះ។ ផ្នែកដ៏សំខាន់មួយនៃគំនិតផ្តួចផ្តើមរបស់ធនាគារជាតិ គឺធ្វើឱ្យគ្រឹះស្ថានហិរញ្ញវត្ថុរួមចំណែកដល់កិច្ចខិតខំប្រឹងប្រែង ក្នុងការធ្វើបដិដុល្លាររូបនីយកម្មរបស់រដ្ឋាភិបាល និងការលើកកម្ពស់រូបិយវត្ថុក្នុងស្រុក។

ធនាគារពាណិជ្ជភាគច្រើន កំពុងជួបការលំបាកក្នុងការឆ្លើយតបជាមួយកូតាប្រាក់រៀលនេះជាពិសេស ដោយសារតែខ្វះតម្រូវការប្រាក់កម្ចីរៀលពីអ្នកខ្ចីប្រាក់។ ប៉ុន្តែធនាគារជាតិទាមទារថា ធនាគារពាណិជ្ជនានា ត្រូវតែបំពេញកូតានេះនៅចុងឆ្នាំនេះ ដែលជាផ្នែកមួយនៃយុទ្ធសាស្រ្តរបស់ខ្លួន ក្នុងការគ្រប់គ្រងរូបិយវត្ថុនៃសេដ្ឋកិច្ច ដែលស្ទើរតែពឹងផ្អែកទាំងស្រុងលើរូបិយប័ណ្ណបរទេស។

លោក Mohd Hanif Suadi នាយកប្រតិបត្តិធនាគារ Maybank Cambodia បានមានប្រសាសន៍ថា “យើងត្រូវតែគោរពថា ប្រទេសកម្ពុជាមានរូបិយប័ណ្ណផ្ទាល់របស់ខ្លួន។ ទីមួយយើងត្រូវរកប្រាក់កម្ចីរៀលឱ្យបានគ្រប់គ្រាន់ ដើម្បីឱ្យយើងផ្តល់កម្ចីជាប្រាក់រៀល”។ លោក Suadi បានបន្ថែមថា “យើងគួរតែមានចំនួន៣ភាគរយ ដែលចាប់ផ្តើមនៅត្រីមាសទី ២ នៃឆ្នាំនេះ”។

ធនាគារពាណិជ្ជនៅរដ្ឋធានីភ្នំពេញ បានអភិវឌ្ឍផលិតផលហិរញ្ញវត្ថុដែលនឹងជំរុញ ឬលើកទឹកចិត្តអតិថិជនឱ្យខ្ចីយ៉ាងហោចណាស់មួយផ្នែក នៃប្រាក់កម្ចីរបស់ពួកគេជាប្រាក់រៀល។

លោក Joe Farrugia អគ្គនាយកប្រតិបត្តិធនាគរ Hong Leong Bank Cambodia PLCបានមានប្រសាសន៍ថា “ផលិតផលប្រាក់រៀលទាំងនេះ ពិតជាការទាក់ទាញដល់អតិថិជនដែលមានស្រាប់នៅធនាគាររបស់យើង”។ លោក Joe Farrugiaបានបន្ថែមថា “យើងផ្តល់ការលើកទឹកចិត្តដល់អតិថិជនរបស់យើងឱ្យខ្ចីប្រាក់មួយចំនួន ឬទាំងស្រុងជារូបិយប័ណ្ណក្នុងស្រុក”៕

តើមហាសេដ្ឋីស្រី្តផ្នែកអចលនទ្រព្យនៅលើពិភពលោកជាជនជាតិអ្វី និងមានលុយប៉ុន្មាន?

May 22, 2019

1

ដោយ ៖ វុត្ថា

ភ្នំពេញ ៖ ពីមុនយើងនិយាយតែប្រុសៗទេ ដែលខ្លាំងក្នុងពិភពជំនួញ និងការវិនិយោគក្នុងវិស័យអចលនទ្រព្យ ប៉ុន្តែស្រ្តីនៅលើពិភពលោកនេះ ក៏មិនអន់ដែរ ដោយពួកគេក៏បាននិងកំពុងកាន់កាប់ទ្រព្យសកម្មជាច្រើនក្នុងវិស័យនេះផងដែរ។

តើស្រ្តីរូបណាជាអ្នកមាន និងលេចធ្លោជាងគេក្នុងវិស័យអចលនទ្រព្យនៅលើពិភពលោក។ ការពិតគឺលោស្រី Francoise Bettencourt Meyers គឺជាមហាសេដ្ឋីស្ត្រីជនជាតិបារាំង និងជាអ្នកនិពន្ធសៀវភៅអត្ថាធិប្បាយព្រះគម្ពី និងធ្វើការជាលើទំនាក់ទំនាក់ទំនង សាសនា Jewish-Christian។

លោកស្រីបាកើននៅថ្ងៃទី១០ ខែកក្កដា ឆ្នាំ ១៩៥៣ ដែលបច្ចុប្បន្នមានអាយុ៦៥ ឆ្នាំ ហើយមានលុយចំនួន៥៣.៧ពាន់លានដុល្លារអាមេរិក។

យោងតាមការចុះផ្សាយរបស់ទស្សនាវដ្តីFOBESបានឲ្យដឹងថា លោកស្រី Francoise Bettencourt Meyer គឺជាស្ត្រីដែលមានលុយច្រើនជាងគេបំផុតនៅលើពិភពលោក និងចៅស្រីរបស់ស្ថាបនិកក្រុមហ៊ុន L’Oreal ។ លោកស្រី Bettencourt Meyer និងគ្រួសាររបស់នាងមានភាគហ៊ុន៣៣% នៃក្រុមហ៊ុន L’Oreal ដែលបានកត់ត្រាកំណើនលក់បានល្អបំផុត ក្នុងរយៈពេលជាងមួយទសវត្សរ៍ក្នុងឆ្នាំ២០១៨កន្លងមកនេះ។

លោកស្រីជាប្រធានក្រុមប្រឹក្សាភិបាលនៃក្រុមហ៊ុន L’Oreal តាំងពីឆ្នាំ១៩៩៧ និងជាប្រធានក្រុមប្រឹក្សាភិបាលបុត្រសម្ព័ន្ធជាច្រើនផងដែរ។ ជាមួយគ្នានេះមូលនិធិគ្រួសាររបស់Bettencourt Meyers និងក្រុមហ៊ុនL’Oreal បានបរិច្ចាគថវិកាចំនួន២២៦លានដុល្លារ ដើម្បីជួសជុលព្រះវិហារកាតូលិក Notre Dame បន្ទាប់ពីភ្លើងឆេះនៅឆ្នាំ២០១៩នេះ។

លោកស្រីបានក្លាយជាស្តី្រ ដែលគ្រប់គ្រងដំណែង L’Oreal Heiress ជាស្ត្រីមានលុយច្រើនបំផុតនៅឆ្នាំ២០១៧របស់ប្រទេសបារាំង ខណៈម្ដាយរបស់លោកស្រីឈ្មោះLiliane Bettencourt ជាស្ត្រីអ្នកមានបំផុតនៅលើពិភពលោកបានស្លាប់នៅអាយុ៩៤ឆ្នាំ។

លោស្រីBettencourt Meyer ធ្វើជាប្រធានមូលនិធិសប្បុរសធម៌របស់គ្រួសាររបស់លោកស្រី ដែលបានលើកទឹកចិត្តដល់វឌ្ឍនភាពរបស់បារាំង នៅក្នុងវិស័យវិទ្យាសាស្រ្តនិងសិល្បៈ៕

អចលនទ្រព្យនៅតំបន់មួយចំនួនក្នុងខណ្ឌឫស្សីកែវនឹងប្រែប្រួលដូចម្តេចក្រោយពេលរោងចក្រចាកចេញ

May 22, 2019

1

ដោយៈ រ៉ាណេត

ភ្នំពេញៈ តើវិស័យអចលនទ្រព្យនៅក្នុងខ័ណ្ឌឬស្សីកែវ នឹងប្រែប្រួលដូចម្តេចក្រោយពេលរោងចក្រ សហគ្រាសនឹងចាកចេញពីក្រុងភ្នំពេញ តាមសេចក្ដីប្រកាសរបស់រដ្ឋបាលសាលារាជធានីភ្នំពេញ ដែលតម្រូវឱ្យបណ្តារោងចក្រ សហគ្រាស និងឃ្លាំង នានា ធ្វើការផ្លាស់ទីតាំងថ្មីនៅតាមបណ្តាតំបន់ជាយក្រុង។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី២២ ខែឧសភានេះថា មិនយូរទៀតនោះទេ តំបន់មួយចំនួនដែលស្ថិតនៅក្នុងខណ្ឌឫស្សី នឹងមានការប្រែប្រួលកាន់តែល្អប្រសើរទៅលើវិស័យសំណង់ និងអចលនទ្រព្យ បន្ទាប់ពីវត្តមានបណ្តារោងចក្រ សហគ្រាស និងឃ្លាំងត្រូវបានដកចេញ។ លោកបន្តថា ការជំរុញឱ្យបណ្តារោងចក្រ សហគ្រាស និងឃ្លាំងតូចធំ ទៅដាក់ទីតាំងនៅតាមបណ្តាជាយក្រុង វាជាផ្នែកមួយដែលជួយឱ្យមានសណ្ដាប់ធ្នាប់នៅក្នុងរាជធានីភ្នំពេញ ដែលមជ្ឈមណ្ឌលពាណិជ្ជកម្មយ៉ាងសំខាន់របស់កម្ពុជា ប៉ុន្តែអ្វីដែលរឹតតែសំខាន់ជាងនេះ វាបានចូលរួមចំណែកក្នុងការផ្លាស់ប្ដូរស្ថានភាពពីតំបន់រោងចក្រ មកជាតំបន់សំណង់លំនៅដ្ឋានកម្រិតមធ្យម រួមជាមួយនឹងអគារពាណិជ្ជកម្មនានានឹងចូលមកជំនួស»។

លោកបានបន្តទៀតថា “បច្ចុប្បន្ននេះ មានរោងចក្រ និងសហគ្រាស ឃ្លាំងមួយចំនួនបានចាប់ផ្តើមរើទីតាំងជាបណ្តើរហើយ ហើយក៏មានសំណង់បុរីលំនៅដ្ឋាន និងខុនដូផងដែរ។ ដោយឡែកនៅក្នុងពេលដ៏ខ្លីខាងមុខនេះ តំបន់ដែលធ្លាប់តែមានរោងចក្រ នឹងជំនួសដោយអគារអាផាតមិន និងខុនដូទំនើបៗបន្ថែមទៀត ដែលជួយជំរុញឱ្យវិស័យសំណង់ និងអចលនទ្រព្យនៅតំបន់នេះមានតម្លៃកើនឡើង”។

លើកឡើងស្រដៀងគ្នានេះ លោកស្រី តាំង ហួរ នាយិកាក្រុមហ៊ុនអចលនទ្រព្យ AMATAK Property Service បានមានប្រសាសន៍ផងដែរថា ជាមួយនឹងការផ្លាស់ប្ដូរមុខមាត់នៅក្នុងវិស័យសំណង់ ក្នុងតំបន់មួយចំនួននៃខណ្ឌឫស្សីកែវ មិនយូរទៀតនោះទេតំបន់នេះ វានឹងមានការអភិវឌ្ឍស្រដៀងគ្នាទៅនឹងតំបន់ទួលគោកដែរ។ លោកស្រីបានបន្តទៀតថា ពេលនេះតម្លៃដីនៅក្នុងតំបន់ទួលសង្កែ ដែលស្ថិតនៅក្បែរព្រំប្រទល់ខណ្ឌទួលគោក ដែលជាតំបន់មានការអភិវឌ្ឍខ្លាំង អាចមានតម្លៃរហូតដល់ជិត៣,០០០ដុល្លារក្នុងមួយម៉ែត្រការ៉េ ហើយនៅទីតាំងខ្លះអាចមានតម្លៃលើសពីនេះ។

លោកស្រីបន្តទៀតថា “តម្លៃដីនៅតំបន់នេះកំពុងបន្តឡើងថ្លៃ តែមាននៅតែតំបន់ និងទីតាំងមួយចំនួនតែប៉ុណ្ណោះ ប៉ុន្តែនៅទីតាំងខ្លះតម្លៃដីក៏នៅមានកម្រិតទាបដដែល ដែលក្នុងមួយម៉ែត្រការ៉េអាចទាបជាង២០០០ដុល្លារ ហើយដីដែលស្ថិតនៅក្នុងខណ្ឌឫស្សីកែវដូចគ្នា ប៉ុន្តែនៅឆ្ងាយពីផ្លូវធំ និងតំបន់អភិវឌ្ឍ គឺមានតម្លៃត្រឹមតែជាង៣០០ដុល្លារក៏មានដែរ”។

លោកស្រីតាំង ហួរបានបន្តថា ទោះជាយ៉ាងណាក៏ដោយនៅពេលមានការអភិវឌ្ឍលើវិស័យសំណង់ តម្រូវការនៃការប្រើប្រាស់ដីនៅតាមមាន ដែលជាកក្តាជំរុញឱ្យតម្លៃដីឡើងថ្លៃជាបន្តបន្ទាប់ទៀត៕

តើភ្នាក់ងារលក់អចលនទ្រព្យធ្វើដូចម្តេចដើម្បីអតិថិជនរបស់ខ្លួនមានទំនុកចិត្តនិងទទួលបានផលចំណេញខ្ពស់?

May 22, 2019

0

ដោយ វុត្ថា

ភ្នំពេញ៖ អ្នកជំនាញអចលនទ្រព្យបានឲ្យដឹង ដើម្បីឲ្យទទួលបានទំនុកចិត្តនិងទទួលបានផលចំណេញខ្ពស់ ភ្នាក់ងារអចលនទ្រព្យ ឬក្រុមហ៊ុនអចលនទ្រព្យត្រូវផ្តល់សេវាកម្មផ្សេងៗ លើសពីការរំពឹងទុកទៅកាន់អតិថិជនរបស់ខ្លួន តាមរយៈផ្តល់ប្រឹក្សាយោបល់ និង មានភាពស្មោះត្រង់បំផុត និងភាពរួសរាយរាក់ទាក់។

ស្ថាបនិក និងជាអគ្គនាយកក្រុមហ៊ុន Century 21 Dream Property លោក គាម សៀកឡុង បានមានប្រសាសន៍ឲ្យដឹងនាព្រឹកថ្ងៃទី២២ ឧសភានេះថា ភ្នាក់ងារអចលនទ្រព្យ ឬក្រុមហ៊ុនអចលនទ្រព្យ ត្រូវផ្តល់សេវាជាកញ្ចប់មានទាំងរត់ឯកសារ លិខិតកក់ប្រាក់ កិច្ចសន្យាទិញ-លក់ និងមានទាំងប្រថាប់ត្រាពីសំណាក់មេធាវី ដើម្បីឲ្យអតិថិជនមានភាពកក់ក្តៅ និងការទិញលក់របស់គាត់មានសុវត្ថិភាព និងមានភាពងាយស្រួល។

លោកបន្តថា “បើអតិថិជនបានទិញចលនទ្រព្យ តាមរយៈភ្នាក់ងាររបស់យើង យើងត្រូវធ្វើឲ្យមានភាពចំណេញដល់អតិថិជននោះ តាមរយៈការបង្ហាញអចលនទ្រព្យល្អ និងមានតម្លៃក្រោមទីផ្សារ។ លោកបន្តថា “បើយើងធ្វើបានបែបនេះ ថ្ងៃក្រោយគាត់នឹងណែនាំអ្នកផ្សេងឲ្យមករកសេវាកម្មរបស់យើង”។

លោកគាម សៀកឡូងបានបន្តថា នៅពេលអថិជនណែនាំបន្តគា្ន នោះមានន័យថា គេមានជំនឿរបស់យើង និងទទួលបានផលច្រើន តែបើអតិថិជនដែលមិនដែលប្រើសេវាកម្មរបស់យើង ប្រាកដណាស់គេមិនសូវទុកចិត្តខ្លំាងនោះទេ។

លោកបានផ្តល់យោបល់បន្ថែមទៀតថា ក្នុងនាមជាអ្នកផ្តល់សេវាកម្មលើវិស័យអចលនទ្រព្យ យើងត្រូវមានចំណេះដឹងឲ្យបានជ្រៅជ្រះ តាមរយៈបង្កើនចំណេះដឹងជាប្រចាំ កាអនុវត្តផ្ទាល់ និងដឹងពីតម្លៃទីផ្សារនៅក្នុងតំបន់ដែលខ្លួនគ្រប់គ្រង។ ហើយចំណេះដឹងទាំងអស់នេះ នឹងធ្វើឲ្យអតិថិជនមានទំនុកចិត្ត និងជឿជាក់លើយើង។

លោកបន្តថា “បើយើងមានចំណេះដឹងទាបជាងពួកគាត់ នៅពេលដែលយើងនិយាយទៅ គាត់នឹងមិនទុកចិត្តយើងនោះទេ ជាពិសេសយើងត្រូវស្គាល់អថិជនជាគោលដៅរបស់ខ្លួនអោយបានច្បាស់លាស់ ហើយយើងធ្វើការជាមួយអ្នកលក់ឬអ្នកទិញផ្ទាល់”។ លោកបន្ថែមថា “បើមិនស្គាល់អតិថិជនរបស់ខ្លួនច្បាស់ទេ យើងនឹងបរាជ័យ តាមរយៈការធ្វើកិច្ចការមិនច្បាស់លាស់”៕

ថ្នាក់ដឹកនាំ CREA អំពាវនាវឲ្យពលរដ្ឋឆែកលើប្លង់កម្មសិទ្ធឲ្យបានច្បាស់លាស់មុនសម្រេចចិត្តទិញអចលនទ្រព្យ

May 22, 2019

0

photo_2019-04-27_12-51-20 — ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋី។ រូបថត៖ សហការី

ដោយ គង់ សូរិយា

ភ្នំពេញៈ ថ្នាក់ដឹកនាំសមាគមអ្នកជំនាញអចលនទ្រព្យកម្ពុជា បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្ន ក្នុងការឆែកប្លង់កម្មសិទ្ឋពាក់ព័ន្ឋនឹងផ្លូវច្បាប់ មុនសម្រេចចិត្តទិញអចលនទ្រព្យណាមួយ។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២២ ឧសភានេះថា បញ្ហាខ្លះៗបានកើតមានក្នុងវិស័យអចលនទ្រព្យ ពិសេសទាក់ទងនឹងការទិញលក់ ហេតុនេះប្រជាពលរដ្ឋគួរតែសិក្សាឲ្យបានច្បាស់លាស់ទៅលើទិដ្ឋភាពច្បាប់ ដើម្បីធ្វើឲ្យប្រាកដថាអចលនទ្រព្យដែលខ្លួនបានទិញ ជាគំរោងស្របច្បាប់។

លោកបន្តថា “ប្រជាពលរដ្ឋមិនគួរទិញអចលនទ្រព្យ ដែលគ្មានប្លង់ច្បាស់លាស់នោះទេ ហេតុនេះពួកគេត្រូវតែសិក្សាជាមួយអ្នកជំនាញ និងស្វែងរកអ្នកជំនាញពិភាក្សា ដើម្បីកាត់បន្ថយហានិភ័យក្នុងការទិញលក់របស់ពួកគេ”។ លោកបន្តថា “ជាមួយគ្នានេះ ខ្ញុំអំពាវនាវឲ្យអ្នកអភិវឌ្ឍន៍នានា គួរតែស្វែងរកច្បាប់ ដើម្បីជួយធ្វើឲ្យវិស័យនេះមានការអភិវឌ្ឍដោយលំនឹង និងមាននិរន្តរភាព ជាជាងគិតពីផលចំណេញរយៈពេលខ្លី ហើយធ្វើឲ្យប្រជាពលរដ្ឋជាអ្នករងគ្រោះ”។

លោកឃាង ពុទ្ឋីបានបន្តឲ្យដឹងទៀតថា ជាមួយគ្នានេះមន្ត្រី សមត្ថកិច្ចពាក់ព័ន្ធគួរតែជួយពន្លឿនក្នុងការងាររបស់ខ្លួន ជាជាងយកទៅទុកចោល ពន្យាពេលក្នុងការផ្តល់និតិវិធីផ្លូវច្បាប់ ព្រោះការធ្វើបែបនេះវាមិនបានជួយដល់វិស័យនេះទេ ប៉ុន្តែវាជាការរារាំង ក៏ដូចជាធ្វើឲ្យវិស័យនេះមានការអភិវឌ្ឍយឺតយ៉ាវ។

លោកបន្តថា “ការពន្លឿននិតិវិធីផ្លូវច្បាប់ ការចេញប្លង់កម្មសិទ្ឋជូនប្រជាពលរដ្ឋ ក៏ដូចជាអ្នកវិនិយោគបានលឿន វាជារឿងល្អប្រសើរ ដើម្បីធ្វើឲ្យបរិយាកាសវិនិយោគ ក៏ដូចជាជំរុញឲ្យវិស័យនេះមានការអភិវឌ្ឍ ដែលជាការផ្តល់ផលប្រយោជន៍រួមដល់ប្រជាជន និងប្រទេសជាតិទាំងអស់គ្នា”៕

អ្នកជំនាញមកពីប្រទេសចិនកំពុងពង្រាងប្លង់មេសម្រាប់អភិវឌ្ឍន៍ខេត្តព្រះសីហនុ

May 22, 2019

0

ដោយ ម៉ាណេត

ភ្នំពេញៈ អ្នកជំនាញមកពីវិទ្យាស្ថានផ្នែកគំរូប្លង់ និងនគររូបនីយកម្ម នៃទីក្រុង Shenzhen បានចូលរួមលើពង្រាងប្លង់មេសម្រាប់អភិវឌ្ឍន៍ខេត្តព្រះសីហនុ ដែលត្រូវរាជ រដ្ឋាភិបាលចាត់ចូលជាតំបន់សេដ្ឋកិច្ចពិសេសពហុបំណង។ នេះបើតាមការចេញផ្សាយរបស់ក្រសួងឧស្សាហកម្ម និងសិប្បកម្មចេញកាលពីព្រឹកនេះ។

ក្នុងជំនួបពិភាក្សាការងាររវាង លោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយប្រតិភូវិទ្យាស្ថានគំរូប្លង់ និងនគររូបនីយកម្ម នៃទីក្រុង Shenzhen ប្រទេសចិន ដឹកនាំដោយលោក ស៊ាវ ស៊ីម៉ា (Xiao Sima )កាលពីថ្ងៃទី ២១ ខែ ឧសភា ឆ្នាំ ២០១៩ ដៃគូសន្ទនា បានផ្តោតការយកចិត្តទុកដាក់ ទៅលើពង្រាងប្លង់មេ ដែលធ្វើឡើងដោយអ្នកជំនាញមកពីវិទ្យាស្ថានផ្នែកគំរូប្លង់ និងនគររូបនីយកម្ម នៃទីក្រុង Shenzhen សម្រាប់អភិវឌ្ឍន៍ខេត្តព្រះសីហនុ ដែលត្រូវរាជរដ្ឋាភិបាលចាត់ចូលជាតំបន់សេដ្ឋកិច្ចពិសេសពហុបំណង។

លោកទេសរដ្ឋមន្ត្រី ចម ប្រសិទ្ធបានថ្លែងថា “គំរូប្លង់មេដែលធ្វើឡើងដោយអ្នកជំនាញផ្នែកនគររូបនីយកម្ម នៃទីក្រុងShenzhen នឹងមានលក្ខណៈល្អប្រសើរសម្រាប់អភិវឌ្ឍន៍នៅខេត្តព្រះសីហនុ ឲ្យមានលក្ខណៈស៊ីវិល័យ ការពារបាននូវកំរិតបរិស្ថានខ្ពស់ និងជាទីតាំងដ៏ទាក់ទាញសម្រាប់ការវិនិយោគ និងតំបន់ឧស្សាហកម្ម ក្នុងបរិបទនៃបដិវត្តន៍ឧស្សាហកម្មជំនាន់ទី៤យើងនេះ”។

លោកបានបញ្ជាក់ទៀតថា “នៅ ពេលដែលពង្រាងប្លង់មេនេះ លេចចេញជារូបរាងហើយ យើងនឹងយកមកដាក់ការពិភាក្សាក្នុងកិច្ចប្រជុំអន្តរក្រសួង មុននឹងដាក់ឆ្លងទៅគណៈរដ្ឋមន្ត្រីសម្រេច”។

លោក ស៊ាវ ស៊ីម៉ា បានបញ្ជាក់ថា ក្រុមការងារបច្ចេកទេសនៃវិទ្យាស្ថានរបស់លោក បានមកសិក្សាលើកទី១ កាលពីខែ មីនា កន្លងទៅ ដោយបានឃើញនូវភាពរីកចម្រើន និងសក្តានុពលរបស់កម្ពុជា គួរជាទីចាប់អារម្មណ៍សម្រាប់ការវិនិយោគ និងបង្កើតសួនឧស្សាហកម្ម។

លោកបានបន្ថែមថា “វិទ្យាស្ថានរបស់លោក នឹងយកបទពិសោធជោគជ័យ និងដំណោះស្រាយឈ្នះៗ ដែលធ្លាប់បានអភិវឌ្ឍន៍នៅទីក្រុង Shenzhen មកអភិវឌ្ឍន៍នៅកម្ពុជា ដោយធ្វើយ៉ាងណាឲ្យស្របនិងគោលនយោបាយអភិវឌ្ឍន៍វិស័យឧស្សាហកម្មកម្ពុជាពីឆ្នាំ ២០១៥ ដល់ឆ្នាំ២០២៥”៕

ខណ្ឌទួលគោកចាប់ផ្តើមក្លាយជាតំបន់ CBD ខណៈគំរោងខុនដូ និងមជ្ឈមណ្ឌលពាណិជ្ជកម្មកំពុងសង់ប្រជែងគ្នា

May 22, 2019

0

photo_2019-05-21_21-20-04 — អាគារខុនដូ និងអគារមជ្ឍមណ្ឌលខ្ពស់ៗនៅតំបន់ទួលគោក។ រូបថត៖ ម៉ៃ វីរៈ

ដោយ វុត្ថា

ភ្នំពញៈ តំបន់ទួលគោកបានក្លាយជាមជ្ឈមណ្ឌលពាណិជ្ជកម្ម (CBC) ខណៈពីមុនតំបន់នេះត្រឹមតែជាតំបន់លំនៅដ្ឋានប៉ុណ្ណោះ ប៉ុន្តែបច្ចុប្បន្នអាគារពាណិជ្ជកម្ម និងខុនដូខ្ពស់ៗកំពុងរត់ប្រជែងគ្នា និងកើនកំពស់ជារៀងរាល់ថ្ងៃ។

អាគារខុនដូ និងអគារមជ្ឍមណ្ឌលខ្ពស់ៗនៅតំបន់ទួលគោក។ រូបថត៖ ម៉ៃ វីរៈ

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមធ្លាប់បានឲ្យដឹងកាលពីពេលថ្មីៗនេះថា សម្រាប់ទីផ្សារខុនដូនៅក្នុងតំបន់ទួលគោក កំពុងតែចាប់ផ្តើមតែមិនទាន់ជាផុលផុស ដូចតំបន់មួយចំនួននៅក្នុងទីក្រុងភ្នំពេញនោះទេ ព្រោះប្រជាពលរដ្ឋខ្មែរ មិនទាន់ពេញពេញនិយមចំពោះការរស់នៅក្នុងខុនដូ តែក្នុងរយៈពេលប្រហែលជា៥ ទៅ៧ ឆ្នាំទៀត ប្រជាពលរដ្ឋខ្មែរនឹងងាកមករស់នៅក្នុងខុនដូ ហើយទីផ្សារនៅក្នុងតំបន់នេះ នឹងមានការកើនឡើងខ្លាំង។

លោកបន្តថា “បច្ចុប្បន្ន មានគំរោងខុនដូប្រមាណ២០ និងមជ្ឈមណ្ឌលពាណិជ្ជកម្មជាច្រើនកំពុងសាងសង់នៅតំបន់នេះ ហើយតម្លៃខុនដូបើគិតជាម៉ែត្រការ៉េ គឺមានតម្លៃចន្លោះពី១៨០០ដល់៣០០០ដុល្លារអាមេរិកក្នុងមួយម៉ែត្រការ៉េ”។

អ្នកនាងអាន សុធីតា នាយិកាក្រុមហ៊ុន CBRE Cambodiaបានឲ្យដឹងផងដែរថា តំបន់ទួលគោក ជាតំបន់មានសក្តានុពល និងរីកចម្រើនខ្លាំងក្នុងរយៈពេល២ឆ្នាំចុងក្រោយនេះ ហើយនៅមិនឆ្ងាយពីកណ្តាលភ្នំពេញនោះទេ មានទាំងហេដ្ឋារចនាសម្ព័ន្ធល្អ តម្លៃដីក៏នៅមានតម្លៃសមរម្យ និងជាកន្លែងចាប់អារម្មណ៍របស់អ្នកវិនិយោគនានាទៀតផង។

អ្នកនាងបន្តថា “តំបន់នេះ ព្រោះវាមានសក្តានុពលអភវិឌ្ឍន៍លើវិស័យខុនដូ ហើយមិនយូមិនឆាប់តំបន់នេះ និងរីកដុះដាលខ្លាំងលើវិស័យនេះ ដែលអាចប្រកួតប្រជែងជាមួយតំបន់ផ្សេងទៀតបាន”។

កាលពីដើម ខែឧសភានេះ ក្រុមហ៊ុនខ្នាតធំក្នុងស្រុកRoyal Group បានបុកគ្រឹះសាងសង់គម្រោងអភិវឌ្ឍន៍ចម្រុះ ដ៏សំខាន់នៅក្នុងតំបន់ទួលគោក ជាមួយនឹងដៃគូសហការអភិវឌ្ឍន៍អចលនទ្រព្យ Hong Lai Huat ដែលមានទីតាំងនៅប្រទេសសិង្ហបុរី។ គម្រោងខ្នាតធំរបស់ក្រុមហ៊ុន Royal Group នេះ មានឈ្មោះថា Royal Platinum ជាមួយនឹងទំហំផ្ទៃក្រឡាអាគារ១០០.០០០ ម៉ែត្រការ៉េ។ គម្រោងអភិវឌ្ឍន៍នេះ មានប្រភេទផ្ទះ អាផាតមិន ចំនួន ៨៥១ខ្នង និងផ្ទះដែលអាចធ្វើពាណិជ្ជកម្មបានចំនួន៥០ខ្នង។

លោក Mark Hanna នាយកផ្នែកហិរញ្ញវត្ថុរបស់ក្រុមហ៊ុន Royal Group បាននិយាយថា ការអភិវឌ្ឍនេះនៅក្នុងតំបន់ទួលគោកនេះមានសារៈសំខាន់ ប្រកបដោយ ភាពរីកចម្រើនក្នុងតំបន់ទួលគោក ដែលជាតំបន់ដ៏សម្បូរបែបមួយ នៅចំណុចកណ្តាល ទីក្រុង។

ក្រៅពីគម្រោងខាងលើ កាលពីពេលថ្មីៗនេះ ក្រុមហ៊ុន ជីប ម៉ុង គ្រុប ក៏បានបើកការដ្ឋានសាងសង់អគារពាណិជ្ជកម្មចម្រុះ លំដាប់អន្តរជាតិកម្ពស់៤៥ជាន់ នៅក្នុងតំបន់ទួលគោក ជាប់ទៅនឹងស្ពានអាកាសតិចណូផងដែរ។

ក្រុមហ៊ុន HoHsin Gevelopment Co.,Ltd បច្ចុប្បន្នក្រុមហ៊ុនបាននិងកំពុងចាប់អារម្មណ៍ ងាកមកសាងសងគម្រោងអគារខុនដូទី២ក្នុងតំបន់ទួលគោក ក្រោយមើលឃើញពីសក្ដានុពលក្នុងទីតាំងនេះ បន្ទាប់ពីទទួលបានជោគជ័យលើការអភិវឌ្ឍគម្រោងខុនដូ គម្រោងThe View 2 នៅបឹងកេងកងរួចមក។

ក្រុមហ៊ុនេះគ្រោងបោះទុនរាប់លាន ដុល្លារវិនិយោគលើគម្រោងខុនដូ The View2 ក្នុងតំបន់ទួលគោកនេះ ដោយសារតែក្រុមហ៊ុនបានសិក្សាឃើញថា តំបន់នេះ នឹងក្លាយជាទីតាំងសក្ដានុពលថ្មីមួយទៀតក្នុងរាជធានីភ្នំពេញ ខណៈគម្រោងវិនិយោគធំៗមួយចំនួន បាននិងកំពុងពង្រីកខ្លួនមកក្នុងតំបន់នេះ៕

ផ្សារទំនើបក្នុងស្រុក និងអន្តរជាតិចំនួន៩ នឹងបញ្ចប់នៅចុងឆ្នាំ២០១៩នេះ

May 22, 2019

0

ដោយៈ រ៉ាណេត

ភ្នំពេញៈ យ៉ាងហោចណាស់ផ្សារទំនើបសរុបចំនួន៩ទៀត នឹងចូលខ្លួនមកបង្ហាញវត្តមានស្វាគមន៍អតិថិជនជាតិ និងអន្តរជាតិ នៅត្រឹមចុងឆ្នាំ២០១៩ឆាប់ៗខាងមុខនេះ។

ផ្អែកតាមការបង្ហើបប្រាប់ឱ្យដឹងពីសំណាក់អ្នកជំនាញស្រាវជ្រាវផ្នែកអចលនទ្រព្យជាន់ខ្ពស់ប្រចាំនៅក្រុមហ៊ុនអចលនទ្រព្យ CBRE Cambodia កញ្ញាគឹម គិនកេសា បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២១ ឧសភាកន្លងមកថា យ៉ាងយូរនៅត្រឹមចុងឆ្នាំ២០១៩ខាងមុខ ផ្សារទំនើបតូច ធំសរុបចំនួន៩ទៀត នឹងបញ្ចប់ការសាងសង់ ដាក់ឱ្យដំណើរការ។

ផ្សារទំនើប ដែលខ្លះស្ថិតក្នុងអាគារកម្មចម្រុះ ត្រូវបានបែងចែកជា៣ប្រភេទផ្សេងគ្នា ដែលក្នុងនោះរួមមាន ប្រភេទ Shopping Mall ( The Olympia Mall) មានទំហំសរុបចំនួន ៥២,២៣២ ម៉ែត្រការ៉េ , ប្រភេទ Retail Podium (Gold Tower 42, The Bridge) មានទំហំសរុបចំនួន៣២,៨៩៥ ម៉ែត្រការ៉េ និងប្រភេទ Community Mall (Midtown Mall, Downtown 93, Chip Mong’s Noro Mall, WB Arena, The Point, និង The Commune )មានទំហំសរុបចំនួន៥៨,៩៨០ ម៉ែត្រការ៉េ »។

កញ្ញាបានបន្តទៀតថា “ឆ្នាំ២០១៩នេះទំហំនៃផ្ទៃក្រឡា សម្រាប់ដាក់លក់រាយនៅក្នុងបណ្តាផ្សារទំនើបនៅកម្ពុជា មានកំនើនរហូតដល់ចំនួន៣៤៨,០០០ ម៉ែត្រការ៉េ ខណៈដែលកាលពីឆ្នាំ២០១៨ផ្ទៃក្រឡាសម្រាប់ទីតាំង លក់រាយមានចំនួនត្រឹមតែ ២៨២,០០០ ម៉ែត្រការ៉េតែប៉ុណ្ណោះ”។

ជាមួយនឹងកំណើននៃចំនួនផ្សារទំនើបទាំងនេះ ប្រធានសមាគមអ្នកជំនាញអលចនទ្រព្យកម្ពុជា លោក ឃាង ពុទ្ធី បានមានប្រសាសន៍បង្ហាញពីការសាទរ ដោយលោកបានលើកឡើងថា វត្តមាននៃកំណើនផ្សារទំនើបទាំងអស់នេះ នឹងចូលរួមចំណែកយ៉ាងធំក្នុងការជួយលើកស្ទួយវិស័យសេដ្ឋកិច្ច វិស័យពាណិជ្ជកម្ម ក៏ដូចជាសុខុមាលភាពរបស់ប្រជាជនផងដែរ។លោកបន្តថានៅពេលមានផ្សារទំនើបកាន់តែច្រើន ទីក្រុងកាន់តែរីកធំ ហើយអាជីវករ ឬពាណិជ្ជករ ដែលធ្លាប់តែប្រកបតាមបែបប្រពៃណីនោះ នឹងងាកចូលទៅប្រកបរបរនៅក្នុងផ្សារទំនើបវិញ។

លោកបានបញ្ជាក់ទៀតថា “បើទោះជាផ្សារទំនើបទាំង៩ នឹងចូលខ្លួននៅត្រឹមចុងឆ្នាំ២០១៩ខាងមុខនេះ ប៉ុន្តែវានៅមិនទាន់ច្រើនលើសតម្រូវការនៅឡើយនោះទេ ដែលវាទាមទារឱ្យមានបណ្តាអ្នកវិនិយោគ ចូលមកបង្កើតផ្សារទំនើបដូចនេះបន្ថែមទៀត ដើម្បីឱ្យសមស្របទៅតាមតម្រូវការនៃការបញ្ជាទិញជាក់ស្ដែង”៕

ចំណេះដឹង! លក្ខខណ្ឌនៃការរំលាយ ឬការរំលាយកិច្ចសន្យាធ្វើឡើងដូចម្តេច?

May 22, 2019

0

ដោយ វុត្ថា

ភ្នំពេញៈ ការរំលាយកិច្ចសន្យាត្រូវធ្វើឡើង ដោយមូលហេតុមិនអនុវត្តកាតព្វកិច្ច និងការរំលាយដោយការបំពានកិច្ចសន្យាយ៉ាងធ្ងន់ធ្ងរ។ តើទម្រង់នៃកិច្ចសន្យា ឬការរំលាយកិច្ចសន្យាត្រូវធ្វើឡើងក្នុងរូបភាពបែបណា។

លក្ខខណ្ឌ៖ ក្នុងករណីដែលលក្ខខណ្ឌរំលាយកាតព្វកិច្ច ឬសិទ្ធិដែលកើតឡើងដោយកិច្ចសន្យា ឬសកម្មភាពឯកតោភាគី អានុភាពនៃកាតព្វកិច្ច ឬសិទ្ធិនោះត្រូវរលត់នៅពេលលក្ខខណ្ឌរំលាយនោះត្រូវបានបំពេញ។

ប្រសិនបើភាគីដែលនឹងទទួលការខូចប្រយោជន៍ ដោយសារលក្ខខណ្ឌត្រូវបានបំពេញហើយ ភាគីនោះបានរារាំងមិនឲ្យលក្ខខណ្ឌនោះ ត្រូវបានបំពេញដោយចេតនា ភាគីម្ខាងទៀតអាចចាត់ទុកថា លក្ខខណ្ឌនោះត្រូវបានបំពេញរួចហើយ។

ការកំណត់ពេល៖ ករណីមានការកំណត់ពេលអានុភាព នៃកិច្ចសន្យាមិនត្រូវកើតឡើងឡើយ លុះត្រាតែពេលកំណត់នោះមកដល់។

អំឡុងពេល៖ ប្រសិនបើជាការគណនាអំឡុងពេល ត្រូវគិតជាម៉ោង នាទី ឬវិនាទី គឺគិតគណនាពីពេលចាប់ផ្តើមរហូតដល់ចប់។ ប្រសិនបើកំណត់ជាថ្ងៃ សប្តាហ៍ ខែ ឬឆ្នាំវិញ មិនត្រូវគិតបញ្ជូលថ្ងៃដែលចាប់ផ្តើមនោះទេ លើកលែងតែអំឡុងពេលនោះចាប់ផ្តើមពីម៉ោងសូន្យទៅ។

ចំណែកថ្ងៃបញ្ចប់ពេញលេញវិញ គឺនៅថ្ងៃចុងក្រោយនៃអំឡុងពេលនោះ តែបើចំថ្ងៃអាទិត្យ ឬថ្ងៃបុណ្យ សំរាកពេលផុតត្រូវលើកទៅថ្ងៃបន្ទាប់៕

ការផ្តល់ឥណទានក្នុងវិស័យអចលនទ្រព្យបន្តសម្រេចបានកំនើនខ្ពស់

May 22, 2019

0

ដោយ ម៉ាណេត

ភ្នំពេញៈ កំណើននៃចំនួនការស្នើសុំកម្ចីអចលនទ្រព្យ និងការស្នើសុំហិរញ្ញវត្ថុផ្ទាល់ខ្លួនបានធ្វើឲ្យចំនួននៃការស្នើសុំឥណទាន លក្ខណៈបុគ្គលមានកំណើនត្រលប់មកវិញក្នងកម្រិត១១.៤៤ ភាគរយ ក្នុងត្រីមាសទី១ ឆ្នាំ២០១៩នេះ ប្រៀបធៀបទៅនឹងត្រីមាសមុន។ នេះបើយោងតាមទិន្នន័យចុងក្រោយរបស់ការិយាល័យឥណទានកម្ពុជា។

ទិន្នន័យបានបង្ហាញថា ទំហំឥណទានលក្ខណៈបុគ្គលកើនឡើងដល់៦.៧០ពាន់ដុលា្លរ កើនឡើង៧.៤៥ ភាគរយក្នុងត្រីមាសទី១ឆ្នាំ២០១៩នេះ ប្រៀបធៀបទៅនឹងត្រីមាសដូចគ្នាកាលពីឆ្នាំមុន។

ការស្នើសុំឥណទានលក្ខណៈបុគ្គល បានបង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទាន ក្នុងលក្ខណៈជាហិរញ្ញវត្ថុផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។

ក្នុងត្រីមាសទី១ ឆ្នាំ២០១៩នេះ ចំនួននៃការស្នើសុំឥណទានលក្ខណៈបុគ្គលមានកំណើនត្រលប់មកវិញក្នងកម្រិត ១១.៤៤ភាគរយ ប្រៀបធៀបទៅនឹងត្រីមាសមុន។ កំនើននេះ ដោយសារតែមានការកើនឡើងនៃចំនួន នៃការស្នើសុំហិរញ្ញវត្ថុផ្ទាល់ខ្លួន១២ភាគរយ និងចំនួននៃការស្នើសុំកម្ចីអចលនទ្រព្យ (Mortgage) ៨ភាគរយ។

ទិន្នន័យដដែលបានបង្ហាញទៀតថា ក្នុងត្រីមាសនេះផងដែរ ទំហំទឹកប្រាក់នៃការស្នើសុំឥណទាននេះក៏នៅតែបន្តកើនឡើងដល់ ៣១ ភាគរយ ធៀបនឹងត្រីមាសមុន ហើយខ្ពស់ជាងត្រីមាសដូចគ្នាក្នុងឆ្នាំ២០១៨ ចំនួន១០ភាគរយ។ កំណើននេះចូលរួមដោយកំនើននៃទំហំទឹកប្រាក់ នៃការស្នើសុំហិរញ្ញវត្ថុលក្ខណៈបុគ្គល៣៧ភាគរយ និងកម្ចីអចលនទ្រព្យ ភាគរយ ទោះបីជាទំហំទឹកប្រាក់ នៃការស្នើប័ណ្ណឥណទានធ្លាក់ចុះ១១ភាគរយក៏ដោយ។

ធនាគារពាណិជ្ជនានានៅកម្ពុជា បានបង្កើនដើមទុនក្នុងការផ្តល់កម្ចីដល់វិស័យអចលនទ្រព្យ និងកម្ចីសម្រាប់វិស័យសំណង់មានចំនួនជាង៣០ភាគរយ នៃផលប័ត្ររបស់ពួកគេ។ នេះបើយោងតាមធនាគារជាតិនៃកម្ពុជា។

លោក Mohd Hanif Suadi អគ្គនាយកប្រតិបត្តិធនាគារ Maybank Cambodia មានប្រសាសន៍ថា “ប្រទេសកម្ពុជាគឺដូចប្រទេសម៉ាឡេស៊ីកាលមុន។ ឥណទានគឺជាសុពលភាព។ អ្វីដែលអ្នកប្រាប់ខ្ញុំ តើខ្ញុំនឹងធ្វើឱ្យមានសុពលភាព។ អ្នកប្រាប់ខ្ញុំថា អ្នកចង់បានកម្ចី ១០ ម៉ឺនដុល្លារ”។ លោកបន្ថែមថា “តើយើងធ្វើឱ្យមានសុពលភាពយ៉ាងដូចម្តេច? យើងធ្វើវាឲ្យសុពលភាពតាមរយៈការមើលលើអចលនទ្រព្យ ឬទ្រព្យសម្បត្តិ និងមើលថាតើទ្រព្យទាំងនោះ អាចត្រូវបានប្រែជាលំហូរសាច់ប្រាក់បានឬទេ។ នោះកំណត់ថាតើអ្នកអាចបង់ប្រាក់ឬអត់។ ប៉ុន្តែអ្នកទាំងនោះមិនត្រូវបានកត់ត្រាទុកទេ”។

លោក Mohd Hanif Suadi “ដូច្នេះតើយើងបង្កើតកិច្ចការងារ ដើម្បីចាប់ផ្តើមរក្សាកំណត់ត្រាហិរញ្ញវត្ថុយ៉ាងដូចម្តេច”៕