កម្ពុជា និងចិនឯកភាពគ្នា៦ចំណុចដើម្បីជំរុញកិច្ចប្រតិបត្តិការទេសចរណ៍រវាងប្រទេសទាំងពីរ

May 17, 2019

photo_2019-05-17_09-30-36 — ភ្ញៀវទេសចរណ៍កំពុងទស្សនាប្រាសាទបាយ័ន។ រូបថត៖ ម៉ៃ វីរៈ

ដោយ ម៉ាណេត

ប៉េកាំងៈ កម្ពុជា និងចិនបានឯកភាពចំណុចចំនួន៦ចំណុច ដើម្បីជំរុញកិច្ចសហប្រតិបត្តិការទេសចរណ៍ រវាងប្រទេសទាំងពីរឲ្យឈានមួយកម្រិតទៀត។ នេះយោងតាមការផ្សព្វផ្សាយរបស់ក្រសួងទេសចរណ៍កាលពីម្សិលមិញ។

ក្នុងជំនួបពិភាក្សាការងាររវាងរដ្ឋមន្រ្តីក្រសួងទេសចរណ៍ លោកថោង ខុន និងលោកឡ ស៊ូកាំងរដ្ឋមន្រ្តីក្រសួងវប្បធ៌មនិងទេសចរណ៍ចិន ភាគីទាំងពីរបានឯកភាពគ្នាលើចំណុចមួយចំនួន ដើម្បីជំរុញកិច្ចសហប្រតិបត្តិការទេសចរណ៍ ឲ្យឈានមួយកម្រិតទៀត រួមមាន ទី១ ភាគីចិននឹងគាំទ្រសកម្មភាពនានារបស់កម្ពុជា ក្នុងការផ្សព្វផ្សាយទេសចរណ៍ទៅទីផ្សារចិន នាពេលខាងមុខ។ ទី២ ភាគីចិនបានទទួលយកទីភ្នាក់ងារទេសចរណ៍កម្ពុជាចំនួន ១៣ក្រុមហ៊ុន ជាជំហានដំបូងសិន បន្ទាប់ពីក្រុមហ៊ុនទាំងនោះត្រូវបានវាយតម្លៃតាមប្រព័ន្ធបញ្ជាក់គុណភាពទទួលទេសចរចិន (China Accreditation System) ថាមានគុណភាព និងលក្ខណៈសម្បត្តិទទួលភ្ញៀវចិន ដើម្បីផ្សព្វផ្សាយរកដៃគូសហការជាមួយក្រុមហ៊ុន ទេសចរណ៍ចិន។

ទី៣ ភាគីចិនក៏នឹងជួយពិនិត្យវាយតម្លៃបេក្ខភាពស្ថានតំណាង ផ្សព្វផ្សាយទេសចរណ៍កម្ពុជា ដើម្បីអាចបម្រើការជូនកម្ពុជាប្រកបដោយប្រសិទ្ធភាព។ ទី៤ ភាគីចិននឹងផ្សព្វផ្សាយឲ្យក្រុមហ៊ុនទេសចរណ៍ ចូលរួមកម្មវិធីតាំងពិព័រណ៍ទេសចរណ៍កម្ពុជា (CTM) និងវេទិកាវិនិយោគទេសចរណ៍កម្ពុជាលើកទី២ នៅអំឡុងខែតុលា ឆ្នាំ២០១៩ ខាងមុខ ដែលពិធីទាំងនេះនឹងប្រារព្ធឡើងនៅប្រទេសកម្ពុជា។

ទី៥ភាគីកម្ពុជានឹងសម្រួលដល់ការផ្សព្វផ្សាយ ; នៃការយោគយល់គ្នានានា ដែលបានចុះហត្ថលេខារួចហើយ កម្ពុជា និងចិនឯកភាពបន្តជំរុញកិច្ចប្រតិបត្តិការទេសចរណ៍រវាងប្រទេសទាំង និងទី៦ ភាគីទាំងពីរនឹងពង្រឹងការអនុវត្តរាល់អនុស្សរណនៃការយោគយល់គ្នានានា ដែលបានចុះហត្ថលេខាចហើយ។

សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាបានមានប្រសាសន៍ថា កម្ពុជាគ្រោងយកទេសចរណ៍ចិនឲ្យបាន៥លាននាក់នៅឆ្នាំ២០២៥ខាងមុខនេះ។ នេះតាមប្រសាសន៍របស់សម្តេច ក្នុងពិធីបើកការដ្ឋានសាងសង់ផ្លូវក្រវ៉ាត់ក្រុងទី៣ កាលថ្ងៃទី១៤ មករាកន្លងមកនេះ។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌីបានមានប្រសាសន៍ថា យុទ្ឋសាស្រ្តរបស់ប្រមុខរដ្ឋាភិបាលបែបនេះ សុបិននឹងក្លាយជាការពិត ដោយសារទំនាក់ទំនងកាទូត ពាណិជ្ជកម្ម ពិសេសការប្រកាន់គោលនយោបាយចិនតែមួយ និងការដាក់ចេញយុទ្ឋសាស្រ្តគ្រប់ជ្រុងជ្រោយ នៃមេដឹកនាំរបស់ប្រទេសទាំងពីរកម្ពុជា នឹងសម្រេចបាននូវគោលដៅនេះ ព្រោះបើគិតពីដើមឆ្នាំ២០១៩នេះដល់ឆ្នាំ២០២៥ យើងសល់ពេល៧ឆ្នាំទៀត។

លោកបន្តថា “ជាមួយនឹងកំនើនទេសចរណ៍បែបនេះ អ្វីយើងគួរធ្វើគឺត្រូវរៀបចំខ្លួនបែបណា ដើម្បីទទួលបានភ្ញៀវក្នុងចំនួនច្រើនបែបនេះ ព្រោះយើងមិនចង់បានតែចំនួនមនុស្សទេ តែយើងក៏ត្រូវពង្រឹង និងផ្តល់សេវាកម្មប្រកបដោយគុណភាពផងដែរ”។

កាលពីឆ្នាំ២០១៨ កម្ពុជាបានទទួលទេសចរអន្តរជាតិចំនួន៦.២លាននាក់ ក្នុងកំណើន១១% ក្នុងនោះទេសចរជនជាតិចិនមានចំនួន២.០២លាននាក់ កើនឡើង៦៧%។ រយៈពេល៣ខែ ដើមឆ្នាំ២០១៩នេះ កម្ពុជាបានទទួលទេសចរអន្តរជាតិប្រមាណជាង ១.៨លាននាក់ កើនឡើង៩.៧% ក្នុងនោះទេសចរជនជាតិចិនមានប្រមាណជាង ៦៨ម៉ឺននាក់ កើនជាង ៣៥% ធៀបនឹងរយៈពេលដូចគ្នាក្នុងឆ្នាំ២០១៨៕

ធនាគារពាណិជ្ជបង្កើនទុនវិនិយោគដល់វិស័យអចលនទ្រព្យនៅកម្ពុជា

May 17, 2019

0

photo_2019-05-16_17-39-03 — អគារខ្ពស់ៗជាច្រើនកំពុងបង្ហាញខ្លួនក្នុងក្រុងភ្នំពេញ។ រូបថត៖ ម៉ៃ វីរៈ

ដោយ ដន

ភ្នំពេញៈ ធនាគារពាណិជ្ជនានានៅកម្ពុជា បានបង្កើនដើមទុនក្នុងការផ្តល់កម្ចីដល់វិស័យអចលនទ្រព្យ និងកម្ចីសម្រាប់វិស័យសំណង់មានចំនួនជាង៣០ភាគរយនៃផលប័ត្ររបស់ពួកគេ។ នេះបើយោងតាមធនាគារជាតិនៃកម្ពុជា។

ភាគរយនៃប្រាក់កម្ចីទាក់ទងនឹងអចលនទ្រព្យ មានការកើនឡើងយ៉ាងខ្លាំងធៀបនឹងឆ្នាំមុន និងស្របពេលជាមួយនឹងការវិនិយោគផ្ទាល់ពីបរទេសធំៗ ដែលភាគច្រើនមកពីប្រទេសចិន។

យោងតាមរបាយការណ៍នៃធនាគារជាតិនៃកម្ពុជាបានបង្ហាញថា វិស័យអចលនទ្រព្យ ត្រូវបានគាំទ្រដោយលំហូរចូលវិនិយោគផ្ទាល់ពីបរទេស(FDI) ដល់សកម្មភាពសំណង់ និងអចលនទ្រព្យដែលមានចំនួន២០ភាគរយ នៃការវិនិយោគផ្ទាល់ពីបរទេសសរុបនៅឆ្នាំ២០១៨ និងកើនឡើង២៧,៥ភាគរយ។ ទន្ទឹមនឹងនេះដែរប្រាក់កម្ចីពីធនាគារដល់វិស័យសំណង់ និងសកម្មភាពអចលនទ្រព្យ ដែលមានប្រហែល១៧,១ភាគរយនៃប្រាក់កម្ចីធនាគារសរុបបានកើនឡើង៣៥,៤ ភាគរយនៅក្នុងឆ្នាំ ២០១៨។

ធនាគារក៏បានពង្រីកឥណទានយ៉ាងឆាប់រហ័ស ដល់វិស័យអចលនទ្រព្យ និងផលិតផលហិរញ្ញវត្ថុ ដែលទាក់ទងនឹងប្រាក់កម្ចីអចលនទ្រព្យពី១៦,៥ភាគរយ នៃឥណទានសរុបក្នុងឆ្នាំ២០១២ ដល់ ២៧,៦ ភាគរយនៅឆ្នាំ ២០១៨។

ក្រុមហ៊ុន Moody’s Investors Service Inc. និងភ្នាក់ងារស្រាវជ្រាវសេដ្ឋកិច្ច បានកត់សម្គាល់នៅក្នុងរបាយការណ៍ឥណទានប្រចាំឆ្នាំរបស់ខ្លួនថា សេដ្ឋកិច្ចកម្ពុជាកំពុងស្ថិតក្នុងល្បឿនមួយជាមួយកំណើនប្រកបដោយស្ថិរភាព ដោយសារតែមានការវិនិយោគដោយផ្ទាល់ពីប្រទេសចិននៅក្នុងវិស័យអចលនទ្រព្យ។

ប៉ុន្តែរបាយការណ៍នេះក៏បានព្រមានដែរថា ការពឹងផ្អែករបស់វិស័យធនាគារទៅលើវិស័យអចលនទ្រព្យ អាចធ្វើឱ្យវិស័យហិរញ្ញវត្ថុជួបហានិភ័យ ប្រសិនបើការវិនិយោគពីបរទេសលែងហូរចូលកម្ពុជា ដោយសារការប្រែប្រួលនៃសេដ្ឋកិច្ចពិភពលោក ជាពិសេសសង្គ្រាមពាណិជ្ជកម្មអាម៉េរិក-ចិន និងការព្រួយបារម្ភរបស់វិបត្តិសេដ្ឋកិច្ចពិភពលោក។

ធនាគារកំពុងចាប់ផ្តើមគិតគូពីភាគរយ នៃប្រាក់កម្ចីអចលនទ្រព្យនៃផលប័ត្រសរុបរបស់ពួកគេ ដោយធ្វើតាមការក្រើនរំលឹកពីធនាគារជាតិ អំពីការផ្តល់កម្ចីច្រើនពេកដល់បុគ្គល ឬអង្គភាពដោយគ្មានកំណត់ត្រាហិរញ្ញវត្ថុត្រឹមត្រូវ។

លោក Mohd Hanif Suadi អគ្គនាយកប្រតិបត្តិធនាគារ Maybank Cambodia មានប្រសាសន៍ថា “ប្រទេសកម្ពុជាគឺដូចប្រទេសម៉ាឡេស៊ីកាលមុន។ ឥណទានគឺជាសុពលភាព។ អ្វីដែលអ្នកប្រាប់ខ្ញុំ តើខ្ញុំនឹងធ្វើឱ្យមានសុពលភាព។ អ្នកប្រាប់ខ្ញុំថា អ្នកចង់បានកម្ចី ១០ ម៉ឺនដុល្លារ”។ លោកបន្ថែមថា “តើយើងធ្វើឱ្យមានសុពលភាពយ៉ាងដូចម្តេច? យើងធ្វើវាឲ្យសុពលភាពតាមរយៈការមើលលើអចលនទ្រព្យ ឬទ្រព្យសម្បត្តិ និងមើលថាតើទ្រព្យទាំងនោះ អាចត្រូវបានប្រែជាលំហូរសាច់ប្រាក់បានឬទេ។ នោះកំណត់ថាតើអ្នកអាចបង់ប្រាក់ឬអត់។ ប៉ុន្តែអ្នកទាំងនោះមិនត្រូវបានកត់ត្រាទុកទេ”។

លោក Mohd Hanif Suadi “ដូច្នេះតើយើងបង្កើតកិច្ចការងារ ដើម្បីចាប់ផ្តើមរក្សាកំណត់ត្រាហិរញ្ញវត្ថុយ៉ាងដូចម្តេច”៕

តើស្តេចស៊ុលតង់នៃប្រុយណេមានទ្រព្យប៉ុន្មាន?

May 17, 2019

0

ដោយ វុត្ថា

ប្រុយណេៈ ស្ដេចស៊ុលតង់នៃប្រុយណេ ត្រូវបានគេចាត់ទុកថាជាអ្នកមានបំផុតនៅលើពិភពលោក។ ទ្រព្យសម្បត្តិរបស់សម្តេចអង្គនេះ បើរាប់ចាប់តាំងដើមទសវត្សរ៍ឆ្នាំ១៩៩០ ត្រូវបានគេប៉ាន់ប្រមាណថា ព្រះអង្គម្ចាស់អង្គនេះមានចំនួន ៤០ ពាន់លានដុល្លារសហរដ្ឋអាមេរិកដោយរាប់បញ្ចូលទាំងទ្រព្យសម្បត្តិ ដែលមានរហូតដល់បច្ចុប្បន្ននេះ។

ស្ដេចស៊ុលតង់បានកាន់តំណែង ជាអ្នកមានបំផុតនៅលើពិភពលោកអស់រយៈពេលជាច្រើនឆ្នាំ រហូតដល់គាត់ត្រូវបានជំនួសដោយលោក Bill Gates ។ នៅចុងទសវត្សឆ្នាំ១៩៩០ ដោយបានធ្លាក់ពីចំណាត់ថ្នាក់លេខ១ ដោយសារតែការធ្លាក់ចុះនៃតម្លៃប្រេងនិងការចំណាយប្រាក់យ៉ាងច្រើន ដោយបងប្រុសរបស់គាត់គឺព្រះអង្គម្ចាស់ Jefri។

នៅក្នុងឆ្នាំ២០១៨ សារព័ត៌មាន Forbes បានចាត់ថ្នាក់ស្តេចអង្គនេះថា ជាមហាសេដ្ឋីលំដាប់ទី៤នៅលើពិភពលោក ដែលមានទ្រព្យសម្បត្តិសុទ្ធចំនួន២០ពាន់លានដុល្លារ។

ស្តេចស៊ុលតង់អាចរកប្រាក់បាន១០០ដុល្លារក្នុងមួយវិនាទី ពីប្រាក់ចំណូល និងការវិនិយោគលើវិស័យប្រេងនៅក្នុងប្រទេសរប់ស់ខ្លួន។ ប្រាក់ចំណូលនេះមានរហូតដល់ ចំនួនប្រហែល២ពាន់លានដុល្លារក្នុងមួយឆ្នាំ។ ទ្រព្យសម្បត្តិសុទ្ធរបស់គាត់ប្រែប្រួលយ៉ាងខ្លាំងអាស្រ័យលើកត្តាមួយចំនួនដែលសំខាន់បំផុត គឺប្រែប្រួលលើតម្លៃប្រេងនិងឧស្ម័នធម្មជាតិដែលជាប្រភពនៃប្រាក់ដ៏សំខាន់របស់ស្តេចអង្គនេះ។

ស្ដេចស៊ុលតង់បានប្រើប្រាស់ប្រាក់ផ្ទាល់ខ្លួន ដើម្បីជួយទ្រទ្រង់រូបិយប័ណ្ណនិងទីផ្សារភាគហ៊ុននៅក្នុងប្រទេសសិង្ហបុរី និងម៉ាឡេស៊ី កំឡុងពេលវិបត្តិសេដ្ឋកិច្ចអាស៊ីនៅឆ្នាំ ១៩៩៧-១៩៩៨។ ជាមួយគ្នានេះ ត្រូវបានរាយការណ៍ថាស្តេចស៊ុលតង់បានលក់ទ្រព្យសម្បត្តិខ្លួនយ៉ាងហោចណាស់៣០០លានដុល្លារ ដើម្បីយកប្រាក់ឲ្យទៅកាន់ប្រទេសជិតខាងនៅអាស៊ីអាគ្នេយ៍ខ្ចីសម្រាប់ប្រើប្រាស់។

ស្តេចដែលមានលុយច្រើនរូបនេះ ក៏បានគាំទ្រដល់សកម្មភាព Ollie North នៃរឿងអ៊ីរ៉ង់ Contra ក្នុងកំឡុងពេលរដ្ឋបាលប្រធានាធិបតីអាមេរិកលោករ៉ូណាល់ រីហ្គិន នៅទសវត្សរ៍ឆ្នាំ ១៩៨០ ដោយមានការបរិច្ចាគប្រាក់១០លានដុល្លារផងដែរ៕

គំរោងវាយសណ្ឋាគារកាំបូឌីយ៉ាណាដើម្បីសង់អាគារកំពស់ ៦០០ម៉ែត្រស្ថិតក្នុងភាពមិនច្បាស់លាស់

May 17, 2019

1

ដោយ គង់ សូរិយា

ភ្នំពេញ៖ គំរោងវាយកំទេចចោលសណ្ឋាគារកាំបូឌីយ៉ាណា ដែលកម្មសិទ្ឋរបស់ក្រុមហ៊ុនរ៉ូយ៉ាល់គ្រុប ដើម្បីសាងសង់អាគារខ្ពស់កម្ពស់ជាង ៦០០ម៉ែត្រ ស្ថិតក្នុងភាពមិនច្បាស់លាស់នៅឡើយទេ។

បុគ្គលិកជាន់ខ្ពស់សណ្ឋាគារនេះ បាននិយាយក្នុងលក្ខខ័ណ្ឌមិនបញ្ចេញឈ្មោះឲ្យដឹងកាលពីពេលថ្មីៗនេះថា លោកបានលឺព៌តមាននេះពីសារព៌តមាននានា ប៉ុន្តែលោកមិនដែលបានទទួលការជូនដំណឹង ពីថ្នាក់ដឹកនាំសណ្ឋាគារនេះថា អាគារនេះនឹងត្រូវវាយចោលឡើយ។

លោកបន្តថា “វាជារឿងគួរឲ្យសោកស្តាយ ប្រសិនជាសណ្ឋាគារបុរាណនេះត្រូវវាយចោល តែលោកមិនទោមនស្សអ្វីនោះទេ វាអាស្រ័យលើក្រុមហ៊ុនជាអ្នកសម្រេចប៉ុណ្ណោះ”។

លោកឧកញ៉ា គិត ម៉េង អគ្គនាយកក្រុមហ៊ុន Royal Group មិនដែលបានបង្ហើបពីរឿងនេះដល់សារព៌តមាននោះទេ។

លោកសេង ឡូតអ្នកនាំពាក្យក្រសួងរៀបចំដែនដី នគរូបនីយកម្មបានបដិសេធមិនអត្ថាធិប្បាយ ដោយលោកតែងតែរុញឲ្យសួរទៅក្រុមហ៊ុនផ្ទាល់ ប៉ុន្តែលោកអះអាងថាកន្លងមកក្រុមហ៊ុនរ៉ូយាល់គ្រុបបានស្នើសុំវាយសណ្ឋាគារនេះចោល ដើម្បីសាងសង់អាគារពាណិជ្ជកម្មកំពស់ ៦០០ម៉ែត្រ ហើយរដ្ឋាភិបាលបានយល់ព្រមជាគោលការណ៍រួចហើយ។

លោកបន្តថា “ការសាងសង់គំរោងនេះពេលណា ខ្ញុំមិនអាចបញ្ជាក់បានទេ សូមសាកសួរទៅក្រុមហ៊ុនវិញ”។

នាពេលកន្លងមកក្រុមហ៊ុន ថៃ ប៊ុនរ៉ុង ដែលបានចាប់ដៃគ្នាជាមួយក្រុមហ៊ុន Sun Kian Ip Group របស់ប្រទេសចិន ក៏បានប្រកាសពីផែនការការសាងសង់អគារមួយដែលមានកម្ពស់៥៦១ម៉ែត្រ នៅទីតាំងជិតទីតាំងនោះផងដែរ ពោលគឺនៅក្នុងអតីតសួនកម្សាន្ត Dream Land ក្រោមទុនវិនិយោគប្រមាណ៦០០០លានដុល្លារ។

សម្រាប់គម្រោងធំៗទាំង ២នេះ ប្រសិនជាវាលេចរូបរាងឡើងប្រាកដមែននោះ នឹងក្លាយជាអគារដ៏ខ្ពស់ ដែលមានចម្ងាយជិតបំផុតពីព្រះបរមរាជវាំង និងវិមានឯករាជ្យ ដែលជាទីកម្សាន្តប្រវត្តិសាស្រ្ត និងពេញនិយមនៅក្នុងរាជធានីភ្នំពេញ។

ក្រុមហ៊ុនរ៉ូយ៉ាល់គ្រុប បានទិញយកសណ្ឋាគារកាំបូឌីយ៉ាណាកាលពីឆ្នាំ២០០៥។ សណ្ឋាគារនេះ ជាសណ្ឋាគារទំនើបលំដាប់អន្តរជាតិដំបូងបំផុតនៅកម្ពុជា ដែលត្រូវបានសម្ពោធដាក់ឲ្យប្រើប្រាស់នៅឆ្នាំ១៩៦៩ ប៉ុន្តែបានបិទទ្វាទៅវិញនៅឆ្នាំបន្ទាប់ នៅពេលលោកលន់ ណុល ធ្វើរដ្ឋប្រហារទម្លាក់ព្រះបាទសម្ដេចព្រះនរោត្តម សីហនុ។ សណ្ឋាគារនេះ បានបើកជាថ្មីនៅឆ្នាំ១៩៩០។

ចំណែកលោកសាស្រ្តាចារ្យទួស សាភឿនប្រធានក្រុមវិស្វករនៃគំរោង Thai Bunrong Twin Tower កំពស់ជាង៥៨០ម៉ែត្រ ដែលគ្រោងសាងសង់នៅជិតទីតាំងសណ្ឋាគារកាំបូឌីយ៉ាណា បានមានប្រសាសន៍ថា លោកមិនចង់ជឿថាក្រុមហ៊ុន Royal Group នឹងសាងសង់អាគារខ្ពស់បែបនេះ នៅកៀកនឹងមជ្ឈមណ្ឌលពាណិជ្ជកម្មលំដាប់ពិភពលោកថៃ ប៊ុនរ៉ុងនោះទេ៕

ចំណេះដឹង! តើគួរបញ្ចេញអចលនទ្រព្យនៅពេលណាទើបសមស្របនឹងតម្លៃទីផ្សារ

May 17, 2019

1

photo_2019-05-16_17-02-24 — ផ្ទះវីឡា និងសំណង់អគារនៅម្ដុំបឹងកក់។ រូបថត៖ ម៉ៃ វីរៈ

ដោយៈ រ៉ាណេត

ភ្នំពេញៈ អ្នកវិនិយោគលើវិស័យអចលនទ្រព្យតែងតែចង់បានតម្លៃថ្លៃ មនុស្សមួយចំនួនតែងតែឡើងថ្លៃតម្លៃអចលនទ្រព្យរបស់ខ្លួន នៅពេលមានគេសួរនាំច្រើន ហេតុនេះតើអ្នកវិនិយោគគួរលក់អចលនទ្រព្យបែបណា ទើបទទួលបានផលចំណេញច្រើន និងសមស្របនឹងតម្លៃទីផ្សារពិតប្រាកដ។

ជាទូទៅតម្លៃអចលនទ្រព្យត្រូវបានគេប្រដូចទៅទឹកចរន្តនៃទឹកសមុទ្រ ដែលភាពឡើងចុះគ្រប់វិនាទី ម្ដងជោរ ម្ដងនាច ហើយមានពេលខ្លះក៏នៅស្មើត្រឹងតែម្ដង។ ដូច្នេះ ប្រសិនបើអ្នកមានអចលនទ្រព្យនៅក្នុងដៃ ហើយចង់ទទួលបានផលចំណេញច្រើន តើគួរលក់នៅពេលណាទើបល្អ? ចម្លើយត្រូវបានបង្ហាញថា ដើម្បីអាចទទួលបានផលចំណេញច្រើនពីការលក់ អ្នកគួរតែទុកលក់នៅពេលតម្លៃអចលនទ្រព្យឡើង ដល់ចំណុចកំពូលមួយ ប៉ុន្តែក៏មិនត្រូវទុករហូតទាល់តែតម្លៃចាប់ផ្តើមធ្លាក់ចុះទៅវិញនោះទេ។

មានន័យថា អ្នកមិនត្រូវទន្ទឹងរង់ចាំតម្លៃថ្លៃរហូតបាត់បង់ឱកាសមាស ឱកាសប្រាក់នោះទេ ពោលគឺយើងត្រូវតែធ្វើការប្រៀបធៀបតម្លៃដើម ដែលអ្នកទិញជាមួយនឹងតម្លៃទីផ្សារនៅពេលចង់លក់ដែលកំពុងមានដង្ហើម ហើយចាប់ធ្វើការសម្រេចចិត្តតែម្ដង ខណៈបើតម្លៃនៃភាគចំណេញមានអត្រាស្ទើរតែស្មើនឹង៨០-៩០ ភាគរយទៅហើយនោះ ។ នៅពេលដែលតម្លៃអចលនទ្រព្យរបស់អ្នកឡើងដល់កម្រិតមួយ ដែលអ្នកគិតថាមិនអាចឡើងហួសពីតម្លៃជាក់ស្ដែង អ្នកគួរតែសម្រេចចិត្តលក់ចេញទៅ ព្រោះបើអ្នកនៅតែព្យាយាមរក្សាទុកថា មិនត្រូវអាចជួបការខាតបង់ ឬស្តាយក្រោយដោយសារតែតម្លៃដីធ្លាក់ចុះ ឬតម្រូវការទីផ្សារត្រូវបានគេបំពេញមុនក៏ថាបានដែរ។

ជាទូទៅម្ចាស់អចលទ្រព្យភាគច្រើនតែងរំពឹងចង់បានតម្លៃខ្ពស់បំផុត។ ប៉ុន្តែអ្នកត្រូវចាំថា ពេលខ្លះម្ចាស់អចលនទ្រព្យត្រូវជួបនឹងភាពបរាជ័យ ដោយសារតែចិត្តលោភលន់នេះឯង ចង់បានចំណេញខ្ពស់កប់ពពក រហូតធ្វើឱ្យអ្នកទិញមិនហ៊ានចរចា ឬចរចាហើយមិនទិញក៏មានដែរ ខណៈដែលគេពិចារណាឃើញថា មិនអាចទទួលបានតម្លៃលើសពីការទិញរបស់ពួកគេ។ មិនតែប៉ុណ្ណោះ ឈ្មួញដែលជាអ្នកទិញ ក៏អាចនិយាយព័ត៌មានមិនល្អពីអ្នកប្រាប់ទៅកាន់អ្នកវិនិយោគដូចគ្នាក៏ថាបានដែរ ដែលទាំងអស់នេះសុទ្ធតែជះឥទ្ធិពលមិនល្អដល់អ្នកទាំងអស់។

មានម្ចាស់អចលនទ្រព្យខ្លះមិនបានក្តាប់ជាប់តម្លៃទីផ្សារជាក់ស្ដែង ហើយជឿតាមពាក្យចចាមអារាមថា តម្លៃដីនឹងកាន់តែឡើងថ្លៃ ជាមួយនឹងការព្យាយាមដាក់តម្លៃដីរបស់ខ្លួនខ្ពស់ហួសភាពជាក់ស្ដែង ដែលចំណុចនេះក៏ជាគ្រោះថ្នាក់ដែលអាចអោយមានការបាត់បង់នូវឱកាសទទួលបានលាភសក្ការៈពីអចលន្រព្យរបស់ខ្លួន។ មួយវិញទៀត ប្រសិនបើអ្នកត្រូវការលុយទៅបង្វិលធ្វើអ្វីផ្សេងទៀត ដែលអាចនាំឱ្យចំណេញលុយត្រឡប់មកវិញច្រើន ប៉ុន្តែអ្នកនៅព្យាយាមរង់ចាំតម្លៃដីឡើងថ្លៃទើបសម្រេចលក់ ចុះបើជួនជាចៃដន្យ តម្លៃទីផ្សារអចលនទ្រព្យធ្លាក់ចុះ ឬជួបនឹងហានិភ័យណាមួយកើតឡើង សំណួរសួរថា តើអ្នកនៅតែអាចទទួលបានផលចំណេញពីដី ឬជួបភាពខាតបង់ ដែលចំណាយពេលវេលាឥតប្រយោជន៍?។

ដូច្នេះ ដើម្បីឱ្យមានភាពច្បាស់លាស់ និងអស់មន្ទិលសង្ស័យនៅក្នុងចិត្តខណៈបើអ្នកមិនបានជ្រាបច្បាស់ ពីស្ថានភាពជាក់ស្ដែងនៃតម្លៃទីផ្សារ ជម្រើសចុងក្រោយអ្នកគួរតែរកជំនួយការដែលជាអ្នកជំនាញផ្នែកអចលនទ្រព្យ ឬភ្នាក់ងារជំនាញដែលមានភាពច្បាស់លាស់ មានកេរ្តិ៍ឈ្មោះក្នុងវិស័យអចលនទ្រព្យធ្វើជាបង្អែក ទើបការសម្រេចចិត្តរបស់អ្នកមិនជួបភាពស្តាយក្រោយ៕

ទីផ្សារលំនៅដ្ឋានក្នុងក្រុងបាត់ដំបងផ្តើមផុលផុសខណៈតម្រូវការកើនឡើង

May 16, 2019

1

44062971_1918623468230304_7176848269526433792_n — ទិដ្ឋភាពបុរីមួយកន្លែងក្នុងក្រុងបាត់ដំបង។ រូបថត៖ ម៉ៃ វីរៈ

ដោយ រ៉ាណេត

បាត់ដំបងៈ អាជ្ញាអធរមូលដ្ឋាន និងអ្នកអភិវឌ្ឍន៍បានអះអាងថា ទីផ្សារលំនៅដ្ឋាននៅក្រុងបាត់ដំបងកំពុងមានសកម្មភាពផុសផុល ខណៈតម្រូវការលំនៅដ្ឋានរបស់ប្រជាពលរដ្ឋមានការកើនឡើង ស្របពេលកំនើនប្រាក់ចំណូលរបស់ប្រជាពលរដ្ឋកាន់តែមានភាពល្អប្រសើរ។

អភិបាលក្រុងបាត់ដំបង់ លោក ផេង សិទ្ធី បានមានប្រសាសន៍ប្រាប់តាមទូរស័ព្ទនៅពីព្រឹកថ្ងៃទី១៦ ខែឧសភា នេះថា បច្ចុប្បន្ននេះ ក្រុងបាត់ដំបង់ដែលមានចំនួន១០សង្កាត់ កំពុងតែខិតខំធ្វើការកែលម្អរបន្ថែម ទៅលើវិស័យហេដ្ឋារចនាសម្ព័ន្ធក្នុងក្រុងទាំងមូល ដើម្បីបង្កើនសោភ័ណភាពឱ្យកាន់តែមានភាពទាក់ទាញ ស័ក្ដិសមទៅនឹងកេរ្តិ៍ឈ្មោះជាតំបន់ទេសចរណ៍ល្អឯក ជាពិសេសក៏មានការរៀបចំសណ្ដាប់ធ្នាប់ឱ្យមានរបៀបរៀបរយ ខណៈដែលកំណើនប្រជាសាស្ត្រ កាន់តែមានការកើនឡើងជាប្រចាំដែលបច្ចុប្បន្នប្រជាពលរដ្ឋរស់នៅទីក្រុងនេះបានកើនរហូតដល់ប្រមាណ១៥ម៉ឺននាក់។

លោកបានបន្តទៀតថា “ដោយសារប្រជាសាស្ត្រកាន់តែមានកំណើនជាប្រចាំ បានជំរុញការវិនិយោគលើវិស័យអចលនទ្រព្យ ជាពិសេសផ្នែកសំណង់លំនៅដ្ឋានមានការកើនឡើងយ៉ាងខ្លាំង”។ លោកបន្តថា “រាប់ទាំងការសាងសង់សំណង់លំនៅដ្ឋានសម្រាប់លក់ពីសំណាក់អ្នកវិនិយោគកម្រិតមធ្យម ក៏ដូចជាការអភិវឌ្ឍជាសំណង់បុរីផងដែរ ដូចជាបុរីលោកឧកញ៉ា ភូ ពុយ, បុរីរំចេក និងបុរីរស្មីបាត់ដំបងជាដើម”។

ក្រៅពីនោះក៏មានសកម្មភាពពុះដីឡូតិ៍លក់ច្រើនទីតាំងផងដែរ ជាពិសេសនៅទិសខាងកើត ឈៀងខាងជើង និងទិសខាងជើង ឈៀងខាងលិច ដែលមានតម្លៃខ្ពស់ចាប់ពីជាង១០,០០០ ទៅ២០,០០០ ដុល្លារក្នុងមួយឡូតិ៍។

លោកឧកញ៉ា ហេង តុលា ប្រធានក្រុមហ៊ុនអភិវឌ្ឍន៍បុរីរស្មីបាត់ដំបង បានមានប្រសាសន៍ប្រាប់ឱ្យដឹងថា វិស័យអចលនទ្រព្យនៅក្នុងក្រុងបាត់ដំបងនៅឆ្នាំ គឺមានភាពល្អប្រសើរជាឆ្នាំកន្លងទៅ ខណៈដែលអ្នកវិនិយោគក្នុងស្រុកមួយចំនួនទៀត ក៏កំពុងតែសម្លឹងមើលឱកាសដើម្បីចូលខ្លួនមកធ្វើការអភិវឌ្ឍ ក្នុងវិស័យលំនៅដ្ឋានផងដែរ»។

លោកបន្តទៀតថា ជាបទពិសោធន៍ និងតាមការសង្កេតមើលជាក់ស្ដែងរបស់ខ្ញុំផ្ទាល់ កាលពីប៉ុន្មានឆ្នាំមុន ក៏ដូចជាឆ្នាំកន្លងទៅនេះ សកម្មភាពនៃការទិញលក់វិស័យអចលនទ្រព្យ រួមមានដូចជាសំណង់លំនៅដ្ឋាន ក៏ដូចជាដីឡូតិ៍ មិនសូវជាមមាញឹកនោះទេ ប៉ុន្តែនៅឆ្នាំ២០១៩នេះ ទាំងអ្នកវិនិយោគក្រៅស្រុក ក៏ដូចជាអ្នកដែលកំពុងរស់នៅក្នុងតំបន់តែម្ដង មានការចាប់អារម្មណ៍ចូលខ្លួនមកធ្វើការវិនិយោគគួរឱ្យកត់សម្គាល់។ ជាក់ស្ដែងដូចជាគម្រោងលំនៅដ្ឋានក្នុងបុរីរបស់ខ្ញុំស្រាប់ គឺមានអតិថិជនច្រើន ហើយភាគច្រើនគឺជាការទិញដោយបង់រំលស់។

លោកបន្តថា “ការវិនិយោគ និងអភិវឌ្ឍលំនៅដ្ឋានក្នុងបុរីរបស់ខ្ញុំភាគច្រើន ផ្តោតលើអតិថិជនដែលមានចំណូលមធ្យម និងក្រោមមធ្យម ដែលមានតម្លៃចាប់ពីប្រមាណ ១៥,០០០ដុល្លារឡើងទៅ (ជាប្រភេទលំនៅដ្ឋានកម្រិតស្រាល) រហូតដល់ប្រមាណជាង ៣០,០០០ដុល្លា”។

លោកឧកញ៉ាភូ ពុយ ដែលជាអ្នកវិនិយោគ និងអភិវឌ្ឍលើវិស័យលំនៅដ្ឋាននៅក្នុងក្រុងបាត់ដំបងផងដែរនោះ ក៏បានបង្ហាញពីសុទិដ្ឋិនិយមផងដែរថា វិស័យអចលនទ្រព្យនៅក្នុងក្រុងបាត់ដំបង មិនមែនទើបតែមានសក្ដានុពលនោះទេ ពោលគឺខេត្តក្រុងមួយនេះមានភាពល្អប្រសើរជាយូរមកហើយ។ លោកឧកញ៉ាបានបន្តទៀតថា ភាពពុះកញ្ច្រោលនាពេលនេះ ក៏ព្រោះតែកំណើនសេដ្ឋកិច្ចជាតិ ដែលកាន់តែផ្តល់ឱកាសឱ្យប្រជាពលរដ្ឋមានលទ្ធភាពក្នុងការរកចំណូលបានច្រើនជាងមុន។

លោកឧកញ៉ាបានបន្តទៀតថា “ភាគច្រើនប្រជាពលរដ្ឋរស់នៅក្នុងខេត្តមួយនេះគឺអាស្រ័យដោយផលកសិកម្ម ដូច្នេះនៅពេលសេដ្ឋកិច្ចជាតិមានភាពល្អប្រសើរ ផលិតផលកសិកម្មមានតម្លៃល្អ វាបានជម្រុញឱ្យពួកគាត់មានចំណូលគួរសមដែលអាចផ្តល់លទ្ធភាពក្នុងការទិញលំនៅដ្ឋានបានជាមួយនឹងវិធីសាស្ត្របង់រំលស់”។

លោកបន្តថា “ការទិញ-លក់ក្នុងវិស័យអចលនទ្រព្យនៅក្រុងបាត់ដំបងនាពេលនេះ ថ្វីត្បិតតែមិនទាន់អាចប្រៀបប្រដូចទៅនឹងតំបន់មួយចំនួនស្ថិតនៅជាយរាជធានីភ្នំពេញ និងក្រុងសៀមរាបក៏ពិតមែន ប៉ុន្តែវាកំពុងតែធ្វើដំណើរទៅតាមក្រោយជាបណ្តើរៗហើយ ស្របពេលដែលអ្នកវិនិយោគក្នុងស្រុក ក៏ដូចជាអ្នកវិនិយោគអន្តរជាតិកំពុងតែងាកមកចាប់អារម្មណ៍បោះទុនដើម្បីធ្វើការអភិវឌ្ឍវិស័យអចលនទ្រព្យនៅក្នុងខេត្តមួយនេះ”។

ខ្លោងទ្វារច្រកចូលបុរីមួយនៅក្រុងបាត់ដំបង។ រូបថត៖ ម៉ៃ វីរៈ

លោកឧកញ៉ាភួ ពុយបានបញ្ជាក់ថា ចំពោះសំណង់លំនៅដ្ឋានរបស់លោក ភាគច្រើនគឺផ្តោតទៅលើកម្រិតមធ្យម ដែលមានតម្លៃចាប់ពីជាង៣០,០០០ដុល្លារឡើងទៅ ដែលលំនៅដ្ឋានប្រភេទនេះ ក៏ទទួលបានការចាប់អារម្មណ៍ពីសំណាក់អតិថិជនផងដែរ៕

តើការរៀបចំប្រព័ន្ធបង្ការភ្លើងឆេះលើអាគារខ្ពស់ៗត្រូវបានរៀបចំដូចម្តេចនៅកម្ពុជា

May 16, 2019

0

photo_2019-05-16_15-57-23 — សំណង់អគារខ្ពស់ៗដែលកំពុងសាងសង់ និងសាងសង់រួចនៅក្រុងភ្នំពេញ។ រូបថត៖ ម៉ៃ វីរៈ

ដោយៈ រ៉ាណេត

ភ្នំពេញៈ ជាមួយនឹងភាពរីកចម្រើនយ៉ាងលឿន នៃវិស័យអចលនទ្រព្យនៅកម្ពុជា ជាពិសេស វត្តមាននៃសំណង់អគារខ្ពស់ៗចាប់ពីកម្ពស់១០ជាន់ឡើង បាននិងកំពុងកើនឡើងរហូតដល់ជាង១០០០អាគារនៅទីក្រុងភ្នំពេញ ប៉ុន្តែសំណួរសួរថាតើអ្នកអភិវឌ្ឍទាំងនោះបានរៀបចំប្រព័ន្ធបង្ការហានិភ័យ ករណីមានអគ្គិភ័យឆេះមានស្តង់ដាបែបណានៅតែជាសំណួរមួយ។

នាយិកាប្រចាំប្រទេសក្រុមហ៊ុនអន្តរជាតិ CBRE អ្នកនាង អាន សុធីតា បានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃទី១៥ ឧសភាកន្លងមកថា នៅកម្ពុជាវិធានការការពារហានិភ័យអគ្គីភ័យនៅតាមអគារខ្ពស់ៗ ដែលមានកម្ពស់ចាប់ពី ១០ ជាន់ឡើងទៅ ភាគច្រើនហាក់នៅមានភាពចន្លោះប្រហោងច្រើននៅឡើយ ដោយហេតុថាការចំណាយទៅលើឧបករណ៍បង្ការ និងសង្គ្រោះបឋមដែលត្រូវបំពាក់នៅតាមជាន់នីមួយៗនៃអគារខ្ពស់ៗទាំងអស់នោះគឺមានតម្លៃថ្លៃ ខណៈដែលច្បាប់បង្ការនៅកម្ពុជានៅមិនទាន់មានការរឹតបណ្តឹងនៅឡើយ។

អ្នកនាងបានបន្តទៀតថា “ភាពរីកចម្រើននៃវិស័យអចលនទ្រព្យយ៉ាងគំហុកនៅកម្ពុជា គឺមាននៅត្រឹមរយៈពេលប្រមាណ ១០ឆ្នាំចុងក្រោយនេះ ជាពិសេសចំពោះកំណើននៃវត្តមានអគាពាណិជ្ជកម្មចម្រុះ ក៏ដូចជាសំណង់លំនៅដ្ឋានសហកម្មសិទ្ធិ ឬហៅថា ខុនដូរ ដែលមានកម្ពស់ខ្ពស់ៗ តែម្ដង”។ អ្នកនាងបន្ថែមថា “យើងហាក់មិនទាន់មានការត្រៀមខ្លួន និងរៀបចំច្បាប់ក្នុងការគ្រប់គ្រងហានិភ័យដូចដែលបានលើកឡើងខាងលើនេះនៅឡើយ”។

ទោះជាយ៉ាងណាអ្នកនាងធីតាបានទទួលស្គាល់ថា ក្នុងចំណោមអ្នកអភិវឌ្ឍទៅលើវិស័យសំណង់ធំៗ និងខ្ពស់ៗទាំងអស់នោះ ក៏មានការត្រៀមទុក និងធ្វើឡើងទៅតាមស្ដង់ដានៃអគារខ្ពស់ៗផងដែរ ដែលភាគច្រើនជាក្រុមហ៊ុនបរទេស ដោយពួកគេយកតម្រាប់តាមស្ដង់ដារនៅក្នុងប្រទេសគេ។

លោក នេត វន្ថា ប្រធាននាយកដ្ឋាននគរបាលបង្ការ និងពន្លត់អគ្គីភ័យ បានមានប្រសាសន៍ឲ្យដឹងផងដែរថា តាមភាពជាក់ស្តែង នាយកដ្ឋានបង្ការនិងពន្លត់អគ្គីភ័យរបស់យើង អាចមានលទ្ធភាពក្នុងការគ្រប់គ្រង និងសង្គ្រោះត្រឹមអគារដែលមានកម្ពស់៤-៥ ជាន់តែប៉ុណ្ណោះ បើខ្ពស់ជាងនេះ យើងនៅមិនទាន់មានលទ្ធភាពនៅឡើយទេ។ ប៉ុន្តែក្នុងនោះច្បាប់ដែលត្រូវបានកំណត់ដោយរដ្ឋាភិបាល និងដាក់ឱ្យអនុវត្តក៏បានបញ្ជាក់ពីកាតព្វកិច្ច និងការទទួលខុសត្រូវរបស់អ្នកអភិវឌ្ឍ ក៏ដូច ជាម្ចាស់អគារ ត្រូវតែមានការចូលរួមទទួលខុសត្រូវទៅលើតួសំណង់អគារនីមួយៗ ដោយចាំបាច់ត្រូវតែមានការបំពាក់នូវឧបករណ៍បង្ការ និងទប់ស្កាត់គ្រោះអគ្គីភ័យនៅតាមបន្ទាប់ នៅតាមជាន់នីមួយៗ ជាមួយបច្ចេកទេសដែលអាចទុកចិត្តបាន។

លោកបនន្តថា “ចំណុចនេះយើងអត់មានគិតថាខ្ពស់ ឬទាបនោះទេ តែត្រូវអនុវត្តមានអនុក្រឹត្យលេខ១៣១ និងអនុក្រឹត្យលេខ ៨៧ ស្តីពីចំណាត់ថ្នាក់សំណង់ ដែលបានកំណត់នូវទំហ៊ុនៃចំនួនក្រឡាផ្ទៃ ដែលកំណត់ត្រូវតែមានបំពាក់ឧបករណ៍ និងប្រព័ន្ធបង្ការ និងពន្លត់អគ្គីភ័យជាចាំបាច់”។

លោកបន្តថា យើងមានក្រុមអធិការកិច្ចចុះត្រួតពិនិត្យជាប្រចាំ នៅតាមគោលដៅ ហើយបើឃើញថា មានម្ចាស់សំណង់អគារណាមួយដែលមិនបានអនុវត្ត និងគោរពទៅតាមច្បាប់នោះ យើងនឹងមានការអនុវត្តចំនួន៣វិធានការ ដោយទី១ មានការធ្វើលិខិតព្រមានលាយល័ក្ខជាអក្សរ ទី២ ផ្អាកសម្មភាពណាមួយដែលពាក់ព័ន្ធនឹងដំណើរប្រតិបត្តិការផ្នែកណាមួយរបស់សំណង់អាគារ ហើយទី៣ នឹងឈានដល់ការផាកពិន័យ និងបញ្ចូនទៅតុលាការ ព្រមទាំងផ្អាកសកម្មភាពទាំងស្រុងតែម្ដង។

លោកនេត វន្ថាបានបញ្ជាក់ទៀតថា ដើម្បីបង្ការគ្រោះអគ្គីភ័យ ដែលអាចកើតមានជាយថាហេតុ ដូច្នេះមានតែការចូលរួមសហការពីសំណាក់ម្ចាស់អគារ ក៏ដូចជាអ្នកអភិវឌ្ឍនានា ធ្វើយ៉ាងណាគោរពទៅតាមគោលការណ៍ដែលបានកំណត់ និងដាក់ចេញឱ្យអនុវត្តជាដាច់ខាត ដើម្បីបញ្ចៀសនូវគ្រោះមហរន្តរាយ និងការខាតបង់។ ជាពិសេសត្រូវមានការយកចិត្តទុកដាក់ខ្ពស់ទៅលើប្រព័ន្ធគ្រប់គ្រងហានិភ័យ ក៏ដូចជាការដឹកជញ្ជូន ការរក្សាទុកនូវសម្ភារផ្សេងៗដែលងាយបង្កជាអគ្គីភ័យ។

អ្នកអភិវឌ្ឍន៍ក្នុងវិស័យនេះ បាននិយាយការពារនិងសម្រាលហានិភ័យលើបញ្ហានេះ។

លោកឧកញ៉ាសៀ រិទ្ឋីអគ្គនាយកក្រុមហ៊ុន World Bridge Land Group ដែលកំពុងអភិវឌ្ឍន៍អាគារកប់ពពកចំនួនពីរនៅក្បែរកោះពេជ្រ គឺគំរោង The Bridge និងគំរោង The PeAk ធ្លាប់បានមានប្រសាសន៍ថា អ្នកអភិវឌ្ឍន៍ឬអ្នកវិនិយោគសាងសង់អាគារខ្ពស់ៗ ពួកគេចំណាយទុនរាប់លានដុល្លារអាមេរិក ហេតុនេះពួកគេបានគិតគូរពីបញ្ហានេះរួចហើយ ទាក់ទងនឹងប្រព័ន្ឋសុវត្ថិភាពនៅតាមអាគារនិមួយៗ ដូចជាជណ្តើរសង្រ្គោះ ប្រព័ន្ឋកណ្តឹងរោទ៍នៅតាមអាគារនិមួយៗ មានឧបករណ៍ពន្លត់អគ្គិភ័យ និងប្រព័ន្ឋបាញ់ទឹកជាស្វ័យប្រវត្តិផងដែរ។

លោកឧកញ៉ាបន្តថា “ប្រព័ន្ឋបង្ការអគ្គិភ័យ តែងតែត្រូវបានគិតគូជាអាទិភាពរបស់អ្នកវិនិយោគសាងសង់អាគារខ្ពស់ៗ ព្រោះគំរោងនិមួយៗចំណាយទុនច្រើន ដែលមិនអាចប្រហែសបាននោះទេ”។

សំណង់អគារខ្ពស់ៗដែលកំពុងសាងសង់ និងសាងសង់រួចនៅក្រុងភ្នំពេញ។ រូបថត៖ ម៉ៃ វីរៈ

អនុប្រធានក្រុមប្រឹក្សាសមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ថា តាមធម្មតានៅពេលនិយាយពីហានិភ័យ ការធ្វើអ្វីមួយក៏មានហានិភ័យដែរ ប៉ុន្តែការរកវិធីបង្ការជាមុន ដើម្បីកាត់បន្ថយហានិភ័យជារឿងចាំបាច់ដែលអ្នកវិនិយោគសាងសង់អាគារខ្ពស់ៗ បានចាត់ទុកជាអាទិភាពរួចហើយ ព្រោះបើសិនជាម្នាក់ៗភ័យខ្លាចស្នាក់នៅអាគារខ្ពស់ៗ ពិភពលោកនេះនឹងមិនមានអាគារខ្ពស់ ដែលកំពុងសាងសង់ប្រណាំងប្រជែងគ្នាពីបណ្តាប្រទេសនានាឡើយ។

លោកបន្តថា “ប្រព័ន្ឋបង្ការហានិភ័យនៅតាមអាគារខ្ពស់ៗ ពិតជារឿងមួយដែលត្រូវយកចិត្តទុកដាក់ពីអ្នកអភិវឌ្ឍន៍នានា ប៉ុន្តែខ្ញុំជឿថាអ្នកអភិវឌ្ឍន៍ដែលមានលុយរាប់រយលានដុល្លារ នឹងមិនប្រហែសឲ្យមានអគ្គិភ័យឆាបឆេះអាគារពួកគេដោយងាយៗឡើយ”៕

ព្រលានយន្តហោះខេត្តព្រះសីហនុអាចទទួលចុះចតយន្តហោះប្រភេទឆ្លងទ្វីបបាន

May 16, 2019

1

1499327663928 — ព្រលានយន្តហោះអន្តរជាតិខេត្តព្រះសីហនុ។ រូបថត៖ សហការី

ដោយ នៅ វឌ្ឈនា

ភ្នំពេញៈ តាមការគ្រោងទុក ព្រលានយន្តហោះអន្តរជាតិខេត្តព្រះសីហនុ អាចនឹងដាក់ឲ្យដំណើរផ្លូវរត់ ដែលអាចមានសមត្ថភាពទទួលចុះចតយន្តហោះខ្នាតធំ ឬយន្តហោះឆ្លងទ្វីបាននៅក្នុងអំឡុងឆ្នាំ២០២០ខាងមុខនេះ ខណៈផ្លូវរត់នេះបាននឹងកំពុងដំណើរការពង្រីក។

រដ្ឋលេខាធិការប្រចាំការ នៃលេខាធិការដ្ឋានអាកាសស៊ីវិលលោកជា អូនបានឲ្យដឹងតាមរយៈទូរស័ព្ទនៅថ្ងៃទី១៦ ខែឧសភា ឆ្នាំ២០១៩នេះថា យើងគ្រាន់តែ មានគម្រោងដាក់ឲ្យដំណើរទៅតាមផែនការ ដែលបានកំណត់តែប៉ុណ្ណោះ ហើយមកដល់បច្ចុប្បន្ននេះការពង្រីកផ្លូវរត់នេះ បានប្រហែលប្រមាណ ៦០ទៅ៧០ភាគរយហើយ។ នៅពេលយើងពង្រីកចប់ ព្រលាន យន្តហោះនេះ អាចទទួលការចុះចតយន្តហោះប្រភេទធុនធំ និងឆ្លងទ្វីបបាន។

លោកបន្តថា “ព្រលានយន្តហោះខេត្តព្រះសីហនុ នឹងចាប់ផ្តើមទទួលចុះចតប្រភេទយន្តហោះ ដែលហោះក្នុងរយៈពេលចន្លោះពី១២ទៅ១៦ម៉ោង មកពីប្រទេសបារាំង និងសហរដ្ឋអាមេរិកបាន”។ លោកបន្តថា “នៅឆ្នាំ២០២៥ កម្ពុជានឹងមាន ព្រលានយន្តហោះទី២ខ្នាត4F នេះដែរ គឺចំណតអាកាសយានដ្ឋានអន្តរជាតិភ្នំពេញថ្មី ស្ថិតនៅក្នុងភូមិសាស្ត្រខេត្តកណ្តាល និងខេត្តតាកែវ”។

ព្រលានយន្តហោះអន្តរជាតិខេត្តព្រះសីហនុ បានពង្រីកផ្លូវរត់បន្ថែមទៀត ដោយពង្រីកផ្លូវរត់ពី២៨០០ម៉ែត្រទៅ ៣២០០ ម៉ែត្រ និងអាចអនុញ្ញាត្តឲ្យយន្តហោះម៉ាក Boeing 777 និងយន្តហោះ Airbus 330 ដែលផ្ទុកអ្នកដំណើរចន្លោះពី៣០០ ទៅ ៣៥០នាក់អាចចុះចតបាន។

សព្វថ្ងៃព្រលានយន្តហោះអន្តរជាតិខេត្តព្រះសីហនុ ដែលមានប្រវែងផ្លូវរត់២,៥00ម៉ែត្រ មិនទាន់ឆ្លើយតបតាមតម្រូវឱ្យការហោះហើរ និងចុះចតរបស់យន្តហោះធុនធំបានទេ ដូច្នេះសព្វថ្ងៃព្រលាននេះទទួលបានត្រឹមតែយន្តហោះប្រភេទ Air bus 321 និងបូអ៊ីង 757 ក៏ប៉ុន្តែតម្រូវការឱ្យយន្តហោះធ្វើដំណើរផ្លូវឆ្ងាយប្រភេទយន្តហោះធំៗ មិនទាន់អាចចុះចតបាននៅឡើយ។

បើតាមគម្រោងការពង្រីកព្រលានប្រវែង៣00ម៉ែត្របន្ថែម នឹងត្រូវបញ្ចប់ជាស្ថាពរនៅចុងឆ្នាំដដែល ដែលអាចធ្វើឱ្យយន្តហោះធុនធំចុះចតបាន។ ដំណាក់កាលទី២ នឹងពង្រីកផ្លូវហោះហើរប្រវែង 500ម៉ែត្របន្ថែម ដែលនឹងធ្វើឱ្យផ្លូវរត់ហោះ(Runway) មានប្រវែងរហូតដល់ ៣,៣00ម៉ែត្រ និងអាចឱ្យយន្តហោះប្រភេទធំៗចុះចតបានដូចការគ្រោងទុក។

បច្ចុប្បន្នអាកាសយានដ្ឋានអន្តរជាតិខេត្តព្រះសីហនុ មានភ្ញៀវឆ្លងកាត់ចេញចូលមកតាមរដូវកាល ដោយនៅក្នុងរដូវ Low season មានជើងហោះហើរ ២១ជើងក្នុងមួយថ្ងៃ មានន័យថាចុះចត ២១ ចេញដំណើរ២១ ហើយបើទោះបីជា Low season ក៏មានកំណើនលើសពី High Season កន្លងមកដែ។

លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងទទួលស្គាល់ថា ព្រលានយន្តហោះអន្តរជាតិកងកេង ខេត្តព្រះសីហនុ ពិតជាមានសកម្មភាពមមាញឹកខ្លាំងធៀបនឹងប៉ុន្មានឆ្នាំមុន ដោយសារគោលនយោបាយបើកចំហជើងមេឃរបស់សម្តេចតេជោ បានធ្វើឲ្យវិស័យអាកាសចរណ៍មានការរីកចម្រើនយ៉ាងខ្លាំងនៅកម្ពុជា ដោយបច្ចុប្បន្នទីផ្សារអ្នកដំណើរតាមផ្លូវអាកាសបានកើនឡើងខ្ពស់ជាងផ្លូវគោក និងផ្លូវទឹក៕

ក្រុមហ៊ុនចិនធំមួយបោះទុនវិនិយោគលើផ្ទៃដី ២០០០ហិកតាលើវិស័យកសិកម្មនៅខេត្តកំពង់ធំ

May 16, 2019

0

60430007_2458247854213404_894794283649859584_n — លោករដ្ឋមន្ត្រី វេង សាខុន និងលោក He Jianping ប្រធានក្រុមប្រឹក្សាភិបាលនៃក្រុមហ៊ុន BGI International Investment

ដោយ ម៉ាណេត

ភ្នំពេញៈ ក្រុមហ៊ុនធំមួយមកពីប្រទេសចិន គឺ BGI International Investment បាននិងកំពុងរៀបចំដីជាង២ពាន់ហិកតា នៅខេត្តកំពង់ធំសម្រាប់ធ្វើការដាំដុះ កែច្នៃ និងវេចខ្ចប់ផលិតផលកសិកម្ម ដូចជាអង្ករ ស្វាយ និងស្វាយចន្ទី។

ក្នុងជំនួបរវាង លោករដ្ឋមន្ត្រី វេង សាខុន និងលោក He Jianping ប្រធានក្រុមប្រឹក្សាភិបាលនៃក្រុមហ៊ុន BGI International Investment នាព្រឹកថ្ងៃទី១៦ ឧសភានេះ ប្រធានក្រុមហ៊ុនបានអះអាងថា គំរោងវិនិយោគនេះ ផ្តោតសំខាន់ទៅលើបំណង និងផែនការវិនិយោគរបស់ក្រុមហ៊ុនក្នុងការកែច្នៃ វេចខ្ចប់ ពិសេសការបំពេញខ្សែច្រវាក់ផលិតកម្មកសិកម្មពីចំណុចផ្តើម រហូតដល់ការនាំចេញតែម្តង ហើយអ្វីដែលសំខាន់នោះ ការធ្វើពាណិជ្ជកម្ម និងទីផ្សារកសិផលគឺតាមរយៈប្រព័ន្ធអ៊ីនធឺណេត ដែលអាចកាត់បន្ថយពេលវេលា ការចំណាយ និងបង្កើនភាពទូលំទូលាយជូនគ្រប់ភាគីពាក់ព័ន្ធ។

លោក He Jianping បានបញ្ជាក់ផងដែរថា “ដើម្បីឱ្យផែនការវិនិយោគរបស់ក្រុមហ៊ុនទទួលបានជោគជ័យ ក្រុមហ៊ុនបានរៀបចំដីជាង២ពាន់ហិកតា នៅខេត្តកំពង់ធំសម្រាប់ធ្វើការដាំដុះ កែច្នៃ និងវេចខ្ចប់ផលិតផលកសិកម្ម ដូចជាអង្ករ ស្វាយ ស្វាយចន្ទីជាដើម ហើយគម្រោងនេះក៏ទទួលបានការសហការគាំទ្រពីក្រសួងកសិកម្ម និងកិច្ចការជនបទនៃសាធារណរដ្ឋប្រជាមានិតចិនផងដែរ”។

លោករដ្ឋមន្ត្រីវេង សាខុនបានថ្លែងថា ចំណងមិត្តភាពយ៉ាងជិតស្និទ្ធរវាងកម្ពុជា និងចិន បាននាំមកនូវការអភិវឌ្ឍលើគ្រប់វិស័យសម្រាប់ប្រទេសកម្ពុជា ដោយភាគីចិនបានដើរតួយ៉ាងសំខាន់ ក្នុងការជួយឧបត្ថម្ភគាំទ្រទាំងការផ្តល់ហិរញ្ញប្បទាន និងបច្ចេកទេសមកដល់កម្ពុជា។

លោកបន្ថែថា “វិស័យកសិកម្ម ភាគីចិនក៏បាននិងកំពុងបន្តផ្តល់កិច្ចសហប្រតិបត្តិការយ៉ាងល្អប្រសើរជាមួយភាគីកម្ពុជាផងដែរ ដោយភាគីចិនបានឯកភាពបង្កើនកូតានាំចូលអង្ករកម្ពុជារហូតដល់ ៤០០ពាន់តោន និងថ្មីៗនេះបានអនុញ្ញាតឱ្យចេកអំបូងលឿងកម្ពុជាធ្វើការនាំចេញឆ្ពោះត្រង់ទៅកាន់ទីផ្សារចិន ហើយសង្ឃឹមថាផលិតផលកសិកម្មមួយចំនួនទៀតដូចជាស្វាយ ផ្លែមៀន ម្រេច ផ្លែស្រកានាគ ផ្លែដូង និងទឹកមាត់ត្រចៀកកាំ ដែលភាគីទាំងពីរកំពុងធ្វើការចរចាអំពីលក្ខខណ្ឌតម្រូវស្តីពីអនាម័យ និងភូតគាមអនាម័យ នឹងអាចធ្វើការនាំចេញក្នុងពេលឆាប់ៗខាងមុខនេះ”។

លោកឲ្យដឹងថា ទន្ទឹមនឹងនេះ ចំនួននៃការវិនិយោគពីក្រុមហ៊ុនចិន មកលើវិស័យកសិកម្មនៅកម្ពុជា ក៏បាននិងកំពុងមានការកើនឡើងគួរឱ្យកត់សម្គាល់ផងដែរ ដូច្នេះឯកឧត្តមរដ្ឋមន្ត្រីគាំទ្រ និងស្វាគមន៍ចំពោះបំណង និងផែនការវិនិយោគរបស់ក្រុមហ៊ុនមកលើវិស័យនេះ ដោយត្រូវសំដៅលើការកែច្នៃ វេចខ្ចប់វត្ថុធាតុដើមដើម្បីផ្គត់ផ្គង់ទីផ្សារក្នុងស្រុក និងនាំចេញ៕

តើអ្នកណាជាកំពូលមហាសេដ្ឋីអចលនទ្រព្យប្រចាំប្រទេសថៃ?

May 16, 2019

0

Charoen Sirivadhanabhakdi1 — លោក Caroen Sirivadhanabhakdi ជាកំពូលសេដ្ឋី និងអ្នកជំនួញលើវិស័យអលចនទ្រព្យជាប់លំដាប់ទី១ នៅថៃ

ដោយ វុត្ថា

ប្រទេសថៃ៖ ប្រទេសដែលមានសេដ្ឋកិច្ចធំលំដាប់ទី២ នៅតំបន់អាស៊ាន គឺប្រទេសថៃ ដែលជាប្រទេសមួយមានមហាសេដ្ឋីច្រើនផងដែរ ប៉ុន្តែមហាសេដ្ឋីលេខ១ផ្នែកអចលនទ្រព្យប្រចាំប្រទេសនេះ មិនសូវមានអ្នកដឹងច្រើននោះទេ។

តាមពិតលោក Caroen Sirivadhanabhakdi ជាកំពូលសេដ្ឋី និងអ្នកជំនួញលើវិស័យអលចនទ្រព្យជាប់លំដាប់ទី១ នៅក្នុងប្រទេសថៃ ដែលបច្ចុប្បន្នលោកមានអាយុ ៧៥ឆ្នាំ។

លោកកើតនៅថ្ងៃទី២ ខែឧសភា ឆ្នាំ១៩៤១ ដែលបច្ចុប្បន្ននេះមហាសេដ្ឋីវ័យចំណាស់នេះ មានទឹកប្រាក់ចំណាយ១៩.៩ពាន់លានដុល្លារ ។ សេដ្ឋីអចលនទ្រព្យរូបនេះ ជាស្ថាបនិកក្រុមហ៊ុន Thai Beverage និងជាប្រធាននក្រុមប្រឹក្សាភិបាលនៃ ក្រុមហ៊ុនTCC GROUP និង ក្រុមហ៊ុន Fraser and Neave, Ltd (F&N)។

ក្រុមគ្រួសាររបស់មហាសេដ្ឋីរូបនេះ ជាអ្នកអភិវឌ្ឍលើវិស័យអចលនទ្រព្យដ៏ធំបំផុតនៅក្នុងប្រទេសថៃ ; ដោយលោកបានអភិវឌ្ឍន៍លើទំហំដី១០០,៨០០ ហិកតា បូកជាមួយនឹងអគារជួល និងពាណិជ្ជកម្មនៅក្នុងប្រទេសសឹង្ហបុរី ។

មហាសេដ្ឋរូបនេះ បានគ្រប់គ្រងសណ្ឋាគារចំនួន ៥០នៅក្នុងតំបន់អាស៊ី សហរដ្ឋអាមេរិក ចក្រភពអង់គ្លេស និងអូស្រ្តាលី រួមទាំងសណ្ឋាគារផ្កាយ៥ Plaza Athenee ក្នុងសង្កាត់ Manhattan សហរដ្ឋអាមេរិក និងសណ្ឋាគារ The Okura Prestige នៅក្នុងទីក្រុងបាងកក។

មហាសេដ្ឋី Caroen Sirivadhanabhakdi ជាកូនទី ១១ ដែលកើតនៅក្នុងត្រកូលមានជាប់ឈាមស្រឡាយចិន ដែលជាអាជីវករលក់ដូនៅតាមចិញ្ចើមផ្លូវ ហើយបានធ្វើអន្តោប្រវេសន៍ទៅរស់នៅក្នុងនៅក្នុងទីក្រុងបាងកក។ ឈ្មោះជាភាសាចិនរបស់គាត់ គឺ Su Zuming ត្រូវបានព្រះមហាក្សត្រភូមិបុលអាឌុលយ៉ាដេត បានដាក់ឈ្មោះរបស់លោកជា Sirivadhanabhakdi នៅក្នុងឆ្នាំ ១៩៨៨ ។

មហាសេដ្ឋីរូបនេះបានឈប់រៀន ក្នុងអាយុ៩ឆ្នាំ ដើម្បីទៅធ្វើការដែលអាចនិយាយភាសាចិន និងភាសាថៃបានយ៉ាងស្ទាប់ចំនាញ។

ចាប់តាំងពីឆ្នាំ ២០០០ មហាសេដ្ឋីអាលចនទ្រព្យរូបនេះ ទទួលបានជោគជ័យនិងមានកេរ្តិ៍ឈ្មោះ បោះសម្លេងលើការអភិវឌ្ឍន័វិស័យអចលនទ្រព្យ ដោយបានបង្កើតក្រុមហ៊ុនដ៏ធំមួយឈ្មោះ TCC Land Co Ltd ។ ក្រុមហ៊ុននេះនាពេលបច្ចុប្បន្ន គឺជាក្រុមហ៊ុនមួយដ៏ធំផុត លើការអភិវឌ្ឍន៍អចលនទ្រព្យនៅក្នុងប្រទេសថៃ ដោយបានវិនយោគនិងអភិវឌ្ឍន៍លអគារស្នាក់នៅ អគារជួល និងបដិសណ្ឋារកិច្ច រួមជាមួយនឹងការគ្រប់គ្រងអចលនទ្រព្យ ឡូជីស្ទីក និងជំនួញជាច្រើនផ្សេងទៀតនៅក្នុងប្រទេសថៃ និងសឹង្ហបុរីជាដើម។

ចាប់តាំងពីការបង្កើតក្រុមហ៊ុន TCC Land នេះ បានផ្តោតជាសំខាន់លើការអភិវឌ្ឍនៅក្នុងប្រទេសថៃ ក្រុមគ្រួសសារមហាសេដ្ឋីរូបនេះ បានកាន់កាប់ដីរហូតដល់ទំហំប្រមាណ ៦៣០,០០០រ៉ៃ។ នៅក្នុងឆ្នាំ២០១៤ លោកបានគ្រប់គ្រងដីច្រើនជាងគេលំដាប់ទី៣ក្នុងប្រទេសថៃ ហើយប្រហែល២១ដង នៃដីដែលគ្រប់ដោយព្រះមហាក្សត្រថៃ ។ ក្រុមហ៊ុន TCC Land ក៏មានអចលនទ្រព្យនៅក្រៅប្រទេសផងដែរ រួមមាននៅសហរដ្ឋអាមេរិក អូស្រ្តាលី ជប៉ុន ចិន និង នៅក្នុងប្រទេសមួយចំនួននៅក្នុងតំបន់អាស៊ាន។

នៅដើមឆ្នាំ២០១៣ មហាសេដ្ឋី Charoen បានទទួលជោគជ័យក្នុងការទិញក្រុមហ៊ុនសឹង្ហបុរី Fraser and Neave, Ltd ដែលមានអចលនទ្រព្យជាច្រើននៅក្នុងតំបន់អាស៊ី រោងចក្រផលិតភេសជ្ជៈ ដែលមានតម្លៃនៃទំហំទឹកប្រាក់ចំនួន១១.២ ពាន់លានដុល្លារ ។ គាត់ទទួលបានកិច្ចព្រមព្រៀង លើប្រតិបត្តិការហិរញ្ញវត្ថុនៅក្នុងតំបន់អាស៊ីក្នុងឆ្នាំ ២០១២ ពីក្រុមធនាគារ រួមមាន United Overseas Bank, Ltd របស់ប្រទេសឹង្ហបុរី ; និងDBS Bank, Ltd។ ភាគហ៊ុននៃក្រុមហ៊ុន Fraser and Neave, Ltd របស់លោក Charoen រួមមាន ព្រមសម្បត្តិរបស់ក្រុមហ៊ុន TCC និង Thai Beverage មានចំនួន ១.១៩ ពាន់លានដុល្លារ ប្រហែល៨៩ភាគរយនៃភាគហ៊ុន។

នៅក្នុងឆ្នាំ២០១៧ លោក Charoen បានប្រកាសអភិវឌ្ឍន៍គម្រោង៣.៥ពាន់លានដុល្លារ សាងសង់អគារលើទំហំដី១០៤រ៉ៃ ដែលមានរួមមាន អគារRama IV និង Wireless Road ទល់មុខ Lumphini Park ដែលគេហៅថាOne Bangkok ដែលរួមបញ្ចូលទាំង ការិយាល័យ បន្ទប់ជួល បន្ទប់ស្នាក់នៅ សណ្ឋាគារ និង កន្លែងសម្តែងសិល្បៈ ដែលអភិឌ្ឍន៍ដោយ ក្រុមហ៊ុន TCC និង Frasers Property ដែលមានទំហំទឹកប្រាក់ចំនួន១.៨៣ ពាន់លានដុល្លារ ហើយគំរោងទាំងនេះត្រូវបានគេរំពឹងថានឹងបញ្ចប់នៅក្នុងឆ្នាំ ២០២៥៕