​ដោយ​ ​នៅ​ ​ស៊ី​វុត្ថា

​ភ្នំពេញ​៖​ ​រដ្ឋាភិបាល​កម្ពុជា​គ្រោង​សាងសង់​អគារ​ច្រក​ទ្វារ​ព្រំដែន​អន្តរជាតិ​ស្ទឹង​បត់​-​បាន​ណង​អៀន​ធំ​ថ្មី​មួយទៀត​នៅ​ក្បែ​ស្ពាន​ស្ទឹង​បត់​ ​ដើម្បី​សម្រួល​ដល់​ការ​ដឹកជញ្ជូន​ពាណិជ្ជកម្ម​ ​និង​ទេសចរណ៍​ឆ្លងកាត់​ ​ខណៈ​ស្ថានីយ៍​នៅ​ច្រក​ប៉ោយប៉ែត​មាន​ភាព​មមាញឹក​ខ្លាំង​ ​និង​ការ​កកស្ទះ​ខ្លាំង​។​

​លោក​ស៊ុន​ចាន់​ថុល​ ​ទេស​រដ្ឋមន្ត្រី​ ​រដ្ឋមន្ត្រី​ក្រសួង​សាធារណៈ​ការ​ ​និង​ដឹកជញ្ជូន​ ​បាន​ថ្លែងប្រាប់​ក្រុម​អ្នកសារព័ត៌មាន​នៅ​ថ្ងៃទី​ ​២២​ ​ខែមេសា​ ​ឆ្នាំ​ ​២០១៩​ ​ន​ថា​ការសាងសង់​អគារ​ច្រក​ទ្វារ​ព្រំដែន​អន្តរជាតិ​ស្ទឹង​បត់​-​បាន​ណង​អៀន​ ​និង​សាងសង់​ផ្លូវ​តភ្ជាប់​ទៅ​ផ្លូវជាតិ​លេខ៥វិញ​ ​រាជរដ្ឋាភិបាល​កម្ពុជា​ ​ទទួល​បាន​ហិរញ្ញប្បទាន​សម្បទាន​ពី​រាជរដ្ឋាភិបាល​ថៃ​ប្រមាណ​ ​២៦.៤២លាន​ដុល្លារ​អាមេរិក​ ​សម្រាប់​សាងសង់​អគារ​ច្រក​ទ្វារ​ត្រួតពិនិត្យ​ព្រំដែន​ ​និង​ផ្លូវ​តភ្ជាប់​,​ ​សំណង់​អគារ​អន្តេវាសិក​ដ្ឋាន​,​ ​ចំណត​សម្រាប់​ផ្ទេរ​ទំនិញ​ឆ្លងកាត់​ ​«​ឃ្លាំង​ ​និង​ទីលាន​កុង​តែ​ន័រ​»​,​ ​ការ​ជួសជុល​កែ​លម្អ​ផ្លូវ​ចាស់​ ​និង​សំណង់​កាត់​បន្ថយ​គ្រោះ​ទឹកជំនន់​។​

​លោក​ ​ស៊ុន​ ​ចាន់​ថុល​ ​បានឱ្យ​ដឹង​ថា​ ​ដំណើរការ​សាងសង់​អគារ​នៅ​ច្រកព្រំដែន​ថ្មីនេះ​ ​គ្រោង​ប្រើប្រាស់​រយៈពេល​សាងសង់​ចំនួន​ ​២៤ខែ​ ​ដោយ​គិត​ចាប់ពី​ខែមេសា​ ​ឆ្នាំ២០១៩​ ​នេះ​តទៅ​។​ ​ការ​បើក​ច្រក​ទ្វារ​ព្រំដែន​អន្តរជាតិ​ស្ទឹង​បត់​-​បាន​ណង​អៀន​ថ្មីនេះ​ ​គឺជា​ការ​បើក​ឡើង​នូវ​ទំព័រ​ប្រវត្តិសាស្ត្រ​ថ្មី​មួយ​សម្រាប់​សម្រួល​ដល់​ការ​ធ្វើ​ពាណិជ្ជកម្ម​ ​ឆ្លងកាត់​ព្រំដែន​រវាង​កម្ពុជា​-​ថៃ​ ​និង​ដើម្បី​ ​ជំរុញ​លើកកម្ពស់​ប្រព័ន្ធ​ភស្តុភារ​កម្ម​នៅ​កម្ពុជា​ផង​ដែរ​។​

​លោក​រដ្ឋមន្ត្រី​បន្ត​ថា​ ​គម្រោង​សាងសង់​ច្រក​ទ្វារ​ព្រំដែន​អន្តរជាតិ​ស្ទឹង​បត់​-​បាន​ណង​អៀន​ ​និង​ផ្លូវ​តភ្ជាប់​ទៅ​ផ្លូវជាតិ​លេខ៥​ ​ធ្វើឡើង​ខណៈ​ដែល​ច្រកព្រំដែន​ប៉ោយប៉ែត​-​អ​រញ្ញ​ប្រ​ថេ​ត​ ​មានការ​ឆ្លងកាត់​ទំនិញ​ ​និង​ទេសចរណ៍​កាន់តែ​មមាញឹក​យ៉ាង​ខ្លាំង​ ​ហើយ​ពេលខ្លះ​មានការ​កកស្ទះ​ចរាចរណ៍​អស់​ជាច្រើន​ម៉ោង​ទៀតផង​។​ ​ការ​កកស្ទះ​នៅ​ច្រក​នាំចេញ​ ​នាំចូល​ទំនិញ​ជា​កត្តា​អវិជ្ជមាន​ដល់​កំណើន​សេដ្ឋកិច្ច​នៃ​ប្រទេស​ទាំងពីរ​។​ ​គម្រោង​នេះ​ជា​ការ​ឆ្លើយតប​យ៉ាង​ប្រាកដ​ទៅ​នឹង​ភាព​មមាញឹក​នៃ​ចរាចរណ៍​ដឹកជញ្ជូន​ ​ដែល​មិន​ត្រឹមតែ​ផ្តល់​ផលប្រយោជន៍​ដល់​ប្រជាពលរដ្ឋ​កម្ពុជា​នោះ​ឡើយ​ ​តែ​ថែមទាំង​ដល់​ប្រជាពលរដ្ឋ​ក្នុង​ប្រទេស​នៃ​មហា​អនុ​តំបន់​មេគង្គ​ផង​ដែរ​។​

​បន្ទាប់ពី​គម្រោង​សាងសង់​អគារ​ច្រក​ទ្វារ​ព្រំដែន​អន្តរជាតិ​ស្ទឹង​បត់​-​បាន​ណង​អៀន​ ​និង​ការ​តភ្ជាប់​ផ្លូវ​ភ្ជាប់​ទៅ​ផ្លូវជាតិ​លេខ៥​ ​ដាក់​ឱ្យ​ដំណើរការ​តំបន់​ប៉ោយប៉ែត​នឹង​ប្រែក្លាយ​ ​ជា​តំបន់​អភិវឌ្ឍ​មួយ​យ៉ាង​ខ្លាំង​ ​ជា​មជ្ឈមណ្ឌល​ស្តុក​ ​និង​ចែកចាយ​ទំនិញ​ ​និង​ជា​តំបន់​សេដ្ឋកិច្ច​ពិសេស​ ​ដែល​បង្កើត​ជា​សក្តា​នុ​ពល​រូប​វ័ន្ត​ដ៏​រឹងមាំ​សម្រាប់​ទ្រទ្រង់​ដល់​ ​គម្រោង​វិនិយោគ​នានា​ក្នុង​ស្រុក​ ​និង​ក្នុង​ប្រទេស​នៃ​មហា​អនុ​តំបន់​ទន្លេមេគង្គ​៕​

ដោយៈរ៉ាណេត

ភ្នំពេញៈ ជាមួយនឹងគម្រោងជាក់លាក់នៃការស្ថាបនាផ្លូវល្បឿនលឿន តភ្ជាប់រវាងរាជធានីភ្នំពេញ- ក្រុងបាវិត ខេត្តស្វាយរៀងនាពេលខាងមុខ អ្នកជំនាញក្នុងវិស័យអចលនទ្រព្យបានលើកឡើងពីភាពល្អប្រសើរ និងសក្ដានុពលនៃវិស័យអចលនទ្រព្យនៅក្នុងទីក្រុងដែលស្ថិតនៅជាប់តំបន់ព្រំដែនមួយនេះ។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានមានប្រ​សា​សន៍ប្រាប់តាមរយៈទូរស័ព្ទ កាលពីពេលកន្លងទៅថ្មីៗនេះថា ភ្ជាប់ជាមួយនឹងគម្រោងស្ថា​ប​នាផ្លូវល្បឿនលឿនរាជធានីភ្នំពេញ ក្រុងបាវិត វិស័យអចលនទ្រព្យនៅក្នុងទីក្រុងមួយនេះ នឹងកាន់តែមានភាពល្អប្រសើរមិនចាញ់ក្រុងប៉ោយប៉ែត ខេត្តបន្ទាយមានជ័យនោះទេ។

លោកបានបញ្ជាក់ទៀតថា ក្រុងបាវិតត្រូវបានរដ្ឋាភិបាលដាក់បញ្ចូលក្នុងផែនការអភិវឌ្ឍន៍ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ ២០១៥ – ២០២៥ ដែលបច្ចុប្បន្នទីក្រុងនេះ បានទាក់ទាញការវិនិយោគយ៉ាងច្រើន និងមានតំបន់សេដ្ឋកិច្ចពិសេសប្រមាណ១០ទីតាំង រួមមានដូចជាទីក្រុងរណបចំនួនពីរ គឺទីក្រុងរណប ហេង ហេង និង ទីក្រុងរណប Empire World ដែលបាន និងកំពុងសាងសង់យ៉ាងសកម្ម។

លោកបន្តទៀតថា “ទីក្រុងបាវិតបច្ចុប្បន្នមានស្ថានភាពដូចគ្នា ទៅនឹងទីក្រុងព្រះសីហនុកាលពី ២-៣ ឆ្នាំមុន ដែលកំពុងទទួលបានការចាប់អារម្មណ៍ និងទាក់ទាញការវិនិយោគពីអ្នកវិនិយោគក្នុងស្រុកបណ្តើរៗ ហើយតម្លៃដីធ្លីក៏នៅមានភាពសមរម្យអាចវិនិយោគបាន ប៉ុន្តែរយៈពេល២-៣ឆ្នាំខាងមុខទៀត តម្លៃដីធ្លីនៅក្រុងបាវិតនឹងកើនឡើងខ្ពស់ដូចក្រុងប៉ោយប៉ែតនាពេលបច្ចុប្បន្ននេះ”។

ក្រៅពីនេះ ប្រយោជន៍បន្ថែមដែលទទួលបានការស្ថាបនា ផ្លូវល្បឿនលឿនរាជធានីភ្នំពេញ ទៅក្រុងបាវិត នេះ គឺបានផ្តល់ចំណេញយ៉ាងច្រើន ទាំងវិស័យឯកជន ក៏ដូចជារាជរដ្ឋាភិបាល ដែលអាចជួយបង្កើនកំណើនសេដ្ឋកិច្ចជាតិ តាមរយៈវិស័យដឹកជញ្ជូន»។

លោកឃាង ពុទ្ឋីបានបញ្ជាក់ថា “ផ្លូវល្បឿនលឿនមួយខ្សែនេះ ជាផ្នែកមួយយ៉ាងសំខាន់ ក្នុងនាមជាផ្លូវសេដ្ឋកិច្ចលើការដឹកជញ្ជូនរវាងប្រទេសកម្ពុជា និងប្រទេសវៀតណាម ដែលនឹងចូលរួមចំណែកក្នុងការជំរុញកំណើនសេដ្ឋកិច្ចជាតិ កាត់បន្ថយពេលវេលាក្នុងការដឹកជញ្ជូន ដែលកាន់តែផ្តល់ឱកាសចំណេញសម្រាប់អ្នកវិនិយោគ ហើយក៏ផ្តល់ផលចំណេញដល់បណ្តាប្រជាពលរដ្ឋ ដែលមានលំនៅដ្ឋានស្ថិតនៅជិត និងក្បែរគម្រោងសា​ងសងសង់ផ្លូវល្បឿនលឿននេះផងដែរ”។

នៅក្នុងប្លង់គោលនៃការអភិវឌ្ឍន៍ទីក្រុងបាវិត ត្រូវបានរៀបចំ និងបែងចែកផែនការប្រើប្រាស់ដីយ៉ាងច្បាស់លាស់ រវាងតំបន់ឧស្សាហកម្ម តំបន់កសិកម្ម តំបន់លំនៅដ្ឋាន មជ្ឈមណ្ឌលពាណិជ្ជកម្ម សួនសាធារណៈ និងតំបន់សេដ្ឋកិច្ចពិសេស។

គម្រោងស្ថាបនាផ្លូវល្បឿនលឿនរាជធានីភ្នំពេញ ក្រុងបាវិត ព្រំដែនកម្ពុជា-វៀតណាម ត្រូវបានសិក្សាលម្អិតដោយក្រុមហ៊ុនវិនិយោគសាជីវកម្មស្ពាន និងថ្នល់ចិន (China Road and Bridge Coporation CRBC) ដែលជាក្រុមហ៊ុនកំពុងសាសង់ផ្លូវល្បឿនលឿន ភ្នំពេញ – ព្រះសីហនុ នាពេលបច្ចុប្បន្ន៕

​ដោយស៊ីវ ម៉េង

​ភ្នំពេញ ៖ការវិនិយោគលើគំរោងអចលនទ្រព្យ បែបលំហែរកាយកំពុងកើនឡើងនៅកម្ពុជា ខណៈដែលការស្វែងរកកន្លែងលំហែរ និងសម្រាកកំសាន្តពីប្រជាជនក្នុងស្រុក និងភ្ញៀវទេសចរណ៍កើនឡើង។

ជាក់ស្តែងគំរោងជាច្រើនបានលេចឡើង ដូចជា គំរោងអភិវឌ្ឍន៍រមណីយដ្ឋានធម្មជាតិស្រះខ្វាវ និងដីឡូត៍ សម្រាប់សាងសង់ផ្ទះលំហែរកាយ ភូមិឋានសំណាង គំរោងវិនិយោកគRelax Resort វិនិយោគរបស់ក្រុមហ៊ុន Macau Legend Development Limited ដែលមាន​​​ចុះ​បញ្ជី​នៅ​ផ្សារ​ហ៊ុន​ក្រុង​ហុងកុង ដែលក្រុមហ៊ុននេះ​​បាន​ទិញ​ភាគហ៊ុន​ទាំង​​អស់​របស់​​​​ក្រុមហ៊ុនHowing Enterprises ​នៅ​​​​កម្ពុជា​​ក្នុង​តម្លៃ៩០​លាន​ដុល្លារ ​ក្នុង​គោល​​បំណង​​អភិវឌ្ឍ​រមណីយដ្ឋាន​សមាហរណ​កម្ម​​ (IR)​ នៅ​ខេត្ត​សៀម​រាប​​។​

ប្រធាន​នាយក​ប្រតិបត្តិ​ Macau Legend Development លោក Chow Kam Fai បាន​ឲ្យ​ដឹង​​​ថា ការ​ទិញ​ដី​នេះ​​មាន​បំណង​​សាងសង់​ និង​អភិវឌ្ឍ​រមណីយដ្ឋាន​សមាហរណ​កម្ម​នៅ​ខេត្ត​សៀមរាប​ ​ដែល​អាច​ឲ្យ​​ក្រុមហ៊ុន​ចូល​រួម​​ និង​ទទួល​នូវ​​អត្ថ​ប្រយោជន៍​ពី​ឧស្សា​ហ​កម្ម​ទេសចរណ៍​ដែល​កំពុង​រីក​​ ចម្រើន​​របស់​​កម្ពុជា​។​ លោក​ឲ្យ​ដឹងបន្ត​​ថា​ “​​ក្រុម​ប្រឹក្សា​ភិបាល​​​​ចាត់​ទុក​ថា លក្ខខណ្ឌ​​នៃ​ការ​ទិញ​លក់​​នេះ​ត្រឹម​ត្រូវ​ និង​សម​ហេតុផល​ ហើយ​ការ​ទិញ​នេះ​ស្ថិត​​ក្នុង​ផល​ប្រយោជន៍​របស់​ក្រុមហ៊ុន​ និង​ភាគទុនិក​ទាំង​អស់​​របស់​ខ្លួន​”។​ មកពីទីក្រុងម៉ាកាវ ដែលគ្រោងវិនិយោគរមណីយដ្ឋាន​ សមាហរណកម្មបែបវិស្សមកាលលើផ្ទៃដី១២០០ហិកតា នៅខេត្តសៀមរាប និងគំរោងជាច្រើនទៀតនៅជាយក្រុងភ្នំពេញ។

​​ជាមួយគ្នានេះ លោកម៉ោង ម៉ាតាំងសហស្ថាបនិក និងក្រុមភាគហ៊ុនិកនៃគំរោងអភិវឌ្ឍន៍រមណីយដ្ឋានធម្មជាតិស្រះខ្វាវ និងដីឡូត៍ សម្រាប់សាងសង់ផ្ទះលំហែរកាយ បានមានប្រសាសន៍ឲ្យ​ដឹងផងដែរថា គំរោងនេះស្ថិតនៅលើផ្ទៃដីជាង២៣ហិកតា ក្នុងនោះផ្ទៃដីជាង៤ហិកតា នឹងត្រូវរៀបចំជារំណីយដ្ឋានធម្មជាតិ ដោយមានអាងហែលទឹក ផ្ទះលំហែរ កន្លែងបោះតង់ សួនច្បារ ស្ពានសម្រាប់ទស្សនាព្រៃសហគមន៍ជាដើម។

លោកបន្តថា “ដោយសារយើងមើលឃើញប្រជាពលរដ្ឋ កាន់តែច្រើនបានចាកចេ​ញ​ពីទីក្រុងនៅចុងសប្តាហ៍ ដើម្បីស្វែងរកកន្លែងសំរាកកាយ និងលំហែរចុងសប្តាហ៍ ទើប​យើងវិនិយោគគម្រោងនេះឡើង”។ លោកបន្តថា “គំរោងនេះមានទីតាំងជាប់ផ្ទះសំណាក់បៃតង និងគំរោងរមណីយដ្ឋានធម្មជាតិស្រះដូនរីក ដែលអភិវឌ្ឍន៍ដោយទីភ្នាក់ងារអភិវឌ្ឍន៍របស់អង្គការសហប្រជាជាតិ(UNDP)”។

ជាមួយគ្នានេះ ក្រុមហ៊ុនA2A Town Cambodiaក៏បានវិនិយោគរមណីយដ្ឋាននិងផ្ទះលំហែរកាយចុងសប្តាហ៍នៅរមណីយដ្ឋានគិរីរម្យផងដែរ ដែលគម្រោងនេះរួមមានផ្ទះស្នាក់នៅច្រើនប្រភេទ ទីលានបោះតង់ដែលអាចផ្ទុកមនុស្សបាន២០០០នាក់ និងគំរោងទីលានវាយកូនហ្គោលជាដើម។

នាយកផ្នែកអភិវឌ្ឍន៍អាជីវកម្មនៃក្រុមហ៊ុនA2A Town Cambodiaលោកហ៊ិន សុជាតិ បានមានប្រសាសន៍ថា វាត្រូវការពេលវេលាបន្ថែមទៀត ដើម្បីឲ្យគំរោងនេះ​ដំណើរការ ខណៈការសាងសង់ផ្ទះសម្រាប់លំហែរកាយលក់ ទទួលបានអតិថិជនភាគច្រើនជាជនជាតិជប៉ុន ច្រើនជាងអ្នកវិនិយោគក្នុងស្រុក។លោកបន្តថា ក្នុងចំណោមផ្ទះលំហែរកាយ ដែលសាងសង់សម្រាប់លក់ប្រមាណ៨០ផ្ទះ រហូតមកទល់ពេលនេះលក់អស់បានប្រមាណ៦០ទៅ៧០ភាគរយហើយ។

ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា ការវិនិយោគលើគំរោងអចលនទ្រព្យបែបរមណីយដ្ឋាន ពិតជាបាន​និងកំពុងកើនឡើង ដោយសារប្រជាជនចាប់ផ្តើមស្វែងរកពេលវេលាលំហែរ ព្រោះប្រាក់ចំណូលពួកគេកើនឡើង។លោកបន្តថា យើងអាចចាត់ទុកជាផលិតផលថ្មីក្នុងវិស័យនេះនៅកម្ពុជា តែមិនមែនជារឿងថ្មីនៅបណ្តាប្រទេសនានានោះទេ។

លោកបន្តថា “ការវិនិយោគបែបនេះក៏ជាផ្នែកមួយ ជួយជំរុញការអភិវឌ្ឍសេដ្ឋកិច្ច​សង្គមរបស់កម្ពុជាផងដែរ ហើយជាការជួយរដ្ឋាភិបាលក្នុងការអភិវឌ្ឍសេដ្ឋកិច្ចជាតិ”៕

ដោយវុត្ថា

ភ្នំពេញ ៖ក្រុមប្រឹក្សាអភិវឌ្ឍន៍ជាតិបានបង្ហាញថា ចាប់ពីឆ្នាំ២០១៣-២០១៧ កម្ពុជាបានទទួលគម្រោងវិនិយោគពីបណ្ដាក្រុមហ៊ុន ក្នុងស្រុក និងបរទេសសរុបប្រមាណជា ៩៧០គម្រោង ដែលមានទុនវិនិយោគសរុបចំនួន២៣.៤៨០លានដុល្លារអាមេរិក។

ទុនវិនិយោគនេះ មានទំហំប្រមាណ៤.០០០លានដុល្លារអាមេរិក ក្នុងមួយឆ្នាំ ហើ​យមានសក្ដានុពលបង្កើតការងារថ្មី ជូនប្រជាពលរដ្ឋជាមធ្យមប្រមាណ២១៩ពាន់នាក់ក្នុងមួយឆ្នាំ។ របាយការណ៍ដដែលបានបន្តថា ក្នុងរយៈពេល៥ឆ្នាំខាងលើនេះ (ឆ្នាំ២០១៣-២០១៧)ទុនវិនិយោគផ្ទាល់ពីបរទេស ជាមធ្យមប្រចាំឆ្នាំមានប្រមាណជា៤០% នៃទុនវិនិយោគសរុបក្នុងឆ្នាំនីមួយៗ។

របាការណ៍ដដែលបានបន្តថា នៅក្នុងឆ្នាំ២០១៨ ទុនវិនិយោគផ្ទាល់ពីបរទេសបានកើនឡើងជិត៧០% នៃទុនវិនិយោគសរុបដែលបានកត់ត្រានៅ ក.អ.ក. ដែលនេះបានឆ្លុះបញ្ចាំងពីភាពកាន់តែជឿទុកចិត្តរបស់អ្នកវិនិយោគទាំងក្នុង និងក្រៅប្រទេស មកលើការដឹកនាំរបស់រាជរដ្ឋាភិបាលកម្ពុជា ហើយការវិនិយោគនេះក៏រំពឹងថា នឹងបន្តកើនឡើងនាឆ្នាំបន្តបន្ទាប់។ កំណើននៃការវិនិយោគនេះ នឹងផ្ដល់នូវកាលានុវត្តភាពដល់សហគ្រាសក្នុងស្រុកក្នុងការកសាងភាពជាដៃគូ ជាមួយក្រុមហ៊ុនវិនិយោគផ្ទាល់ពីបរទេស ដើម្បីបង្កើនផលិតភាព សមត្ថភាពប្រកួតប្រជែង និងការតភ្ជាប់ទៅនឹងទីផ្សារតំបន់ និងសកល។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមា​នប្រសាសន៍ថា កម្ពុជាបានក្លាយជាប្រទេសមួយ ស្ថិតក្នុងគោលដៅនៃការវិនិយោគពីបរ​ទេស ដោយសារកត្តាសន្តិភាព និងកំនើនសេដ្ឋកិច្ចដែលកម្ពុជាសម្រេចបានក្នុងកំនើនជាង៧ភាគរយ ក្នុងរយៈពេលជាង២ទសវត្សរ៍ចុងក្រោយនេះ។ អ្នកនាងបន្តថា បើនិយាយពីវិស័យអចលនទ្រព្យវិញ កម្ពុជានៅមានឳកាសចំណេញ ដោយសារជាទីផ្សារថ្មីដែលអ្នកវិនិយោគអាចរកផលចំណេញពីការវិនិយោគ(Return of Investment)ប្រមាណ៧ភាគរយប្រចាំឆ្នាំ ខណៈប្រទេសក្នុងតំបន់អ្នកវិនិយោគមានឳកាសចំណេញទាបជាងនេះ។

លោកអ៊ិន ចាន់នីប្រធាននាយកប្រតិបត្តិធនាគារអេស៊ីលីដាភី អ៊ិលស៊ីធ្លាប់បានមាន​ប្រសាសន៍ថា កម្ពុជាមានភាពទាក់ទាញការវិនិយោគពីបរទេស ដោយសារកត្តាសំខាន់ៗចំនួន៤ ដូចជា ទី១ ការក្សាបាននូវស្ថេរភាពនយោបាយ ទី២ ការរក្សាបាននូវស្ថេរភាព​សង្គម ទី៣ កំណើនសេដ្ឋកិច្ចកម្ពុជាមានភាពរ៉ឹងមាំ និងទី៤ច្បាប់វិនិយោគរបស់កម្ពុជាមាន​ភាពបើកចំហ ដោយរដ្ឋាភិបាលបានអនុញ្ញាត្តឲ្យជនបរទេសមានសិទ្ឋវិនិយោគ១០០ភាគ​រយ និងច្បាប់ពន្ឋរបស់កម្ពុជាមិនមានលក្ខណៈស្មុគ្រស្មាញ។

លោកបន្តថា “នៅពេលសម្រេចចិត្តវិនិយោគនៅប្រទេសណាមួយ អ្នកវិនិយោគតែ​ងតែសម្លឹងមើលកត្តាសំខាន់ៗទាំងនេះ ហើយពេលពួកគេសិក្សាច្បាស់លាស់ហើយ ពួកគេនឹងមកវិនិយោគ”៕

​ដោយគង់ សូរិយា

​ភ្នំពេញ: ស្របពេលការវិនិយោគកើនឡើង ពីអ្នកវិនិយោគក្នុងស្រុក និងអ្នកវិនិយោ គចិនបានធ្វើឲ្យតម្លៃដីធ្លី នៅតាមតំបន់មួយចំនួននៅខេត្តកោះកុង បន្តហក់ឡើងខ្ពស់នៅដើមឆ្នាំនេះ។

​អនុប្រធានសភាពាណិជ្ជកម្មខេត្តកោះកុង លោកជឹង សុខម៉េងបានមានប្រសាសន៍ឲ្យដឹងកាលពីចុងសប្តាហ៍មុនថា ដោយសារកំនើនវិនិយោគចិន និងអ្នកវិនិយោគក្នុងស្រុក ពិសេសលោកឧកញ៉ាលី យ៉ុងផាត់បានវិនិយោគគំរោងជាច្រើន ពិសេសផែនការកសាង​ហេដ្ឋារចនាសម្ព័ន្ឋរបស់រដ្ឋាភិបាល គឺពង្រីកផ្លូវជាតិលេខ៤៨ជាបួនគន្លង កសាងផ្លូវពីសំឡូត ក្នុងខេត្តបាត់ដំបងតភ្ជាប់មកកាន់ខេត្តកោះកុង និងការសាងសង់គំរោងតារាសាគរ ពិសេសព្រលានយន្តហោះនៃគំរោងនេះ បានធ្វើឲ្យតម្លៃដីធ្លីនៅខេត្តនេះកើនឡើងខ្ពស់។

​លោកបន្តថា “ខ្ញុំគិតថាខេត្តកោះកុងនឹងមានការអភិវឌ្ឍមិនចាញ់ ខេត្តព្រះសីហនុនោះទេ ដោយសារបច្ចុប្បន្នព្រលានយន្តហោះ នៅក្នុងគំរោងតារាសាគរបានសាងសង់ទាំងយប់ទាំងថ្ងៃ”។

លោកបន្តថា “បើសិនជាក្រុមហ៊ុនBangkok Airway រៀបចំសាងសង់ព្រលានយន្តហោះក្នុងខេត្ត នឹងធ្វើឲ្យតម្លៃដីនៅក្នុងទីរួមខេត្តកើនឡើងបន្ថែមទៀត”។

​លោកបន្តថា ដីធ្លីនៅទីរួមខេត្តជុំវិញផ្សារទីរួមខេត្ត មានតម្លៃចន្លោះពី២៥០០ទៅ៣០០០​ដុល្លារក្នុងមួយម៉ែត្រការ៉េ និងនៅតំបន់លំនៅដ្ឋានមានតម្លៃចន្លោះពី១០០ទៅ៣០០ដុល្លារ ក្នុងមួយម៉ែត្រការ៉េ។ ក្រៅពីទីរួមខេត្ត តំបន់បាក់ខ្លងមានតម្លៃ២០០ដុល្លារ នៅតាមផ្លូវតភ្ជាប់ ទៅកាន់ព្រំដែនថៃមានតម្លៃចន្លោះពី២០០ ទៅ៣០០ដុល្លារក្នុងមួយម៉ែត្រការ៉េ និងតំបន់កោះស្តេចដែលស្ថិតក្នុងតំបន់តារាសាគរ ដែលវិនិយោគដោយក្រុមហ៊ុនUnion Development Group តម្លៃដីបានហក់ឡើងខ្ពស់ផងដែរ។

សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ដែលបានអញ្ជើ ញចូលរួមពិធីបុណ្យសមុទ្រជុំទី២នៅខេត្តកោះកុង បានសម្តែងមោទនភាពចំពោះការរីក​ចម្រើនរបស់ខេត្តនេះ ពិសេសកំឡុងពេលនោះសម្តេចប្រកាសពង្រីកផ្លូវជាតិលេខ៤៨ជា​បួនគន្លង និងសាងសង់ផ្លូវពីសំឡូត ក្នុងខេត្តបាត់ដំបង មកកាន់ខេត្តកោះកុងនាពេលឆាប់ៗខាងមុខនេះ។
​

សម្តេចបន្តថា “សម្តេចកំពុងរកថវិកាសាងសង់ស្ពានតភ្ជាប់ពីថ្មបាំង នៅក្នុងខេត្តកោះកុង ដើម្បីចាប់ផ្តើមសាងសង់ផ្លូវដ៏សំខាន់ដែលតភ្ជាប់ពីតំបន់ភូមិភាគពាយ័ព្យ មកកាន់ខេត្តកោះកុងជាប្រវត្តិសាស្រ្តនេះ”។

​អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រ​សាសន៍ថា ការតភ្ជាប់ផ្លូវពីស្រុកសំឡូតមកកាន់ខេត្តកោះកុង មិនត្រឹមតែជាការធ្វើសមាហរណកម្មផ្ទៃក្នុងកម្ពុជាប៉ុណ្ណោះទេ តែជាការលើកកំពស់វិស័យសេដ្ឋកិច្ចពាណិជ្ជកម្មកម្ពុជា តាមរយៈការកាត់បន្ថយការពឹងផ្អែកប្រទេសជិតខាង ដោយប្រើប្រាស់ផ្លូវនេះសំរាប់ដឹកជញ្ជូនកសិផលពីភូមិភាគពាយ័ព្យ មកកាន់កំពង់ផែទឹកជ្រៅនៅក្នុងខេត្តនេះ ហើយបន្តដឹកទៅកាន់ប្រទេសចិន និងបណ្តាប្រទេសមួយចំនួនទៀត។

​លោកបន្តថា “នេះការវិនិយោគដ៏ត្រឹមត្រូវរបស់រដ្ឋាភិបាល ដើម្បីជំរុញកំនើនសេដ្ឋកិច្ច ព្រោះដើម្បីសេដ្ឋកិច្ចរីកចម្រើនបន្ថែមទៀត រដ្ឋាភិបាលត្រូវវិនិយោគលើហេដ្ឋារចនាសម្ព័ន្ឋជាចាំបាច់”៕

ដោយ ៖ រ៉ាណេត

ភ្នំពេញៈ តំបន់អ្នកលឿងក្រោយពេលតភ្ជាប់ស្ពាត្សឹបាសា បាននិងកំពុងទាក់ទាញការចាប់អារម្មណ៍ ដោយតម្លៃដីធ្លីបានកើនឡើងក្នុងកម្រិតមួយ ខណៈតំបន់ជុំវិញស្ពាននេះក្លាយជាតំបន់ដែលគេទៅហួស មកហួស ខុសពីតំបន់នេះកាលពីអតីតកាល ដែលអ្នកដំណើរត្រូវឆ្លងសាឡាង។

ប្រធានសមាគមនអ្នកជំនាញអ្នកចលនទ្រព្យកម្ពុជា លោក ឃាង ពុទ្ធី បានមានប្រសាសន៍ឱ្យដឹងតាមរយៈទូរស័ព្ទកាលពីព្រឹកថ្ងៃទី២០ ខែមេសា នេះថា តំបន់អ្នកលឿងពេលនេះ ខុសពីប្រមាណ៣ឆ្នាំមុន។ បច្ចុប្បន្នតំបន់នេះ មានការអភិវឌ្ឍច្រើន ទាំងផ្នែកសំណង់លំនៅដ្ឋាន និងតំបន់សេដ្ឋកិច្ចផងដែរ ជាក់ស្ដែងដូចជាមានកំពង់ផែរាជធានីភ្នំពេញ រោងចក្រ សហគ្រាស ឃ្លាំងផ្ទុកទំនិញ រួមជាមួយគម្រោងអភិវឌ្ឍធំៗមួយចំនួនទៀតដែលនឹងលេចចេញជារូបរាងក្នុងពេលខាងមុខនេះ។

លោកបន្តទៀតថា បើយើងគិតចាប់ពីចំណូចគល់ស្ពានអ្នកលឿង ដែលស្ថិតនៅជាប់ផ្លូវជាតិលេខ១ ឆ្ពោះមកកាន់រាជធានីភ្នំពេញ គឺមានភាពល្អប្រសើរជាងកាលពីប៉ុន្មានឆ្នាំមុន ដោយសារតែនៅតំបន់នេះមានមណ្ឌលពាណិជ្ជកម្ម និងគម្រោងអភិវឌ្ឍធំជាច្រើន ដែលស្ថិតនៅក្នុងប្លងគោលអភិវឌ្ឍន៍របស់រដ្ឋាភិបាល។

លោកបន្តថា “ដោយសារតែភាពល្អប្រសើរទាំងនេះ បច្ចុប្បន្នបានជំរុញឱ្យមានតម្រូវការ និងតម្លៃដីធ្លីនៅទីនេះមានការកើនឡើង ដែលដីស្ថិតនៅជាប់ផ្លូវជាតិលេខ១ អាចមានតម្លៃចាប់ពី១០០ដុល្លារក្នុងមួយម៉ែត្រការ៉េ ឬអាចលើសពីនេះនៅតំបន់ដែលមានលំនៅដ្ឋានច្រើន”។លោកបន្តថា “ដោយឡែកដីដែលស្ថិតនៅឆ្ងាយពីផ្លូវជាតិលេខ១ គឺនៅមានតម្លៃទាប ដែលភាគច្រលនជាប្រភេទដីលិចទឹក ឬជាប្រភេទដីបឹង ហើយម្ខាងទៀតជាតំបន់ជាប់ជ្រាំងមាត់ទន្លេ ដែលមិនសូវមានតម្រូវការនោះទេ”។

អគ្គនាយកក្រុមហ៊ុន Khmer Foundation Appraisal (KFA) លោកឧកញ៉ា នួន រិទ្ធី ដែលជាអ្នកជំនាញផ្នែកវិស័យអចលនទ្រព្យបានមានប្រសាសន៍ឱ្យដឹងផងដែរថា តំបន់ដែលស្ថិតនៅតាមផ្លូវជាតិលេខ១ នឹងមានភាពកាន់តែល្អប្រសើរ មិនចាញ់តំបន់ឯទៀត ដែលស្ថិតនៅជាប់ជាយក្រុងរាជធានីភ្នំពេញនោះឡើយ ខណៈបច្ចុប្បន្នកំពុងមានសក្ដានុពល និងភាពទាក់ទាញច្រើន ដែលផ្តល់ឱកាសដ៏ល្អ សម្រាប់អ្នកវិនិយោគស្វែងរកភាគចំណេញ ជាពិសេស តំបន់ស្រុកកៀនស្វាយ និងស្រុកលើកដែក។

លោកឧកញ៉ាបានបន្តទៀតថា ហេតុផលដែលបណ្តាលឱ្យដីនៅតំបន់នេះ មានភាពទាក់ទាញ ក៏ព្រោះនៅតំបន់នេះ នឹងមានការអភិវឌ្ឍយ៉ាងលឿននាពេលអនាគត ដែលអាចនិយាយបានថា ជាតំបន់ពហុអភិវឌ្ឍ មានកំពង់ផែអន្តរជាតិ មានរោងចក្រ ជាតំបន់តភ្ជាប់ព្រុំដែនកម្ពុជា-វៀតណាម មានតំបន់កម្សាន្តកែច្នៃដ៏ធំ ជាពិសេសស្ថិតនៅជាប់ផ្លូវក្រវ៉ាត់ក្រុងទី៣ ដែលជាភាពទាក់ទាញយ៉ាងសម្រាប់សម្រាប់អ្នកអភិវឌ្ឍ។

បន្ថែមពីនេះ សាលារាជធានីភ្នំពេញ ក៏បានបង្ហាញពីគម្រោងផ្លាស់ប្ដូររោងចក្រ និងឃ្លាំងស្តុកទំនិញនានា ចេញពីរាជធានីទៅតាំងនៅតំបន់ផ្លូវក្រវ៉ាត់ក្រុងទី៣ ក្នុងពេលដ៏ខ្លីខាងមុខនេះ។ សរុបទៅវាមានភាពល្អប្រសើរច្រើន ដែលអាចនឹងរីកចម្រើនខ្លាំងជាងតំបន់នានាដែលស្ថិតនៅជុំវិញរាជធានីភ្នំពេញ៕

ដោយ ​គង់​ ​សូ​រិយា​

ភ្នំ​ពេញៈ​ ​ស្រប​ពេល​ការ​អភិវឌ្ឍ​ហេ​ដ្ឋា​រចនាសម្ព័ន្ឋ​ ​របស់​រដ្ឋាភិបាល​កាន់តែ​ប្រសើរ​ឡើង​ ​អ្នក​វិនិយោគ​ជាតិ​ ​អន្តរជាតិ​ ​បាន​ងាក​ទៅ​អភិវឌ្ឍ​គំរោង​លំនៅ​ដ្ឋាន​ ​បុរី​ ​និង​ដី​ឡូត៍​នី​តំបន់​ជាយក្រុង​កាន់តែ​ច្រើន​ ​ដើម្បី​ឆ្លើយតប​នឹង​តម្រូវការ​។​

ក្រុម​អ្នកជំនាញ​អចលនទ្រព្យ​សុទ្ឋ​តែ​បាន​ទទួលស្គាល់​ថា​ ​តំបន់​ជាប់​ផ្លូវជាតិ​លេខ១​ ​បាន​និង​កំពុង​ទទួល​បានការ​ចាប់​អារម្មណ៍​ខ្លាំង​ជាងគេ​ ​លើ​ការសាងសង់​លំនៅ​ដ្ឋាន​ ​និង​មជ្ឈមណ្ឌល​កំសាន្ត​នានា​ ​ដោយសា​រដ្ឋាភិបាល​បាន​ ​និង​កំពុង​ដាក់ចេញ​នូវ​ផែនការ​ឲ្យ​បណ្តា​រោងចក្រ​ ​សហគ្រាស​នានា​ចាកចេញ​ពី​កណ្តាល​ក្រុង​ ​ហើយ​ឆ្ពោះទៅ​កាន់​ផ្លូវជាតិ​លេខ៥១​ ​ដែល​ជា​តំបន់​មាន​ហេ​ដ្ឋា​រចនាសម្ព័ន្ឋ​ ​និង​ការ​តភ្ជាប់​ទៅកាន់​បណ្តា​ផ្លូវជាតិ​សំ​ខាន់​ៗ​មាន​ភាព​ងាយស្រួល​ ​ដូចជា​ផ្លូវជាតិ​លេខ៥​ ​ផ្លូវជាតិ​លេខ៤​ ​ផ្លូវជាតិ​លេខ៣ជាដើម​។​

ដោយ​មើល​ឃើញ​សក្តា​នុ​ពល​នេះ​ ​ក្រុមហ៊ុន​ ​Victory​ ​Land​ ​បាន​ចាប់ផ្តើម​គំរោង​វិនិយោគ​លំនៅ​ដ្ឋាន​ជាលើកដំបូង​នៅ​លើ​ផ្លូវជាតិ​លេខ១​ ​ស្ថិតនៅ​ភូមិ​ចិន​កោះ​ ​ឃុំ​កៀនស្វាយ​ ​ស្រុក​កៀនស្វាយ​ ​ខេត្តកណ្តាល​។​ ​

គំរោង​នេះ​បាន​ផ្តោត​លើ​លំនៅ​ដ្ឋាន​ប្រណីត​ ​ដូចជា​វីឡា​កូនកាត់​ ​វីឡា​ប្រភេទ A​ ​និង​វីឡា​កូនកាត់​ប្រភេទ B​ ​ហ្សប​ហោស៍​ដែល​មាន​ការ​ឌី​សាញ​យ៉ាង​ប្រណីត​ ​ប្រកបដោយ​គុណភាព​ ​និង​សោភ័ណភាព​ ​ពិសេស​ជា​គំរោង​ដែល​ផ្តោត​លើ​ភាព​បៃតង​ ​ដោយ​អ្នក​អភិវឌ្ឍន៍​គំរោង​នេះ​ ​បាន​ទុក​ដី​សំរាប់​សួនច្បារ​លំ​ហែរ​សំរាប់​គ្រួសារ​និ​មួយ​ៗ​។

​គំរោង​លំនៅ​ដ្ឋាន​នៃ​ ​Victory​ ​Land​ ​បាន​ផ្តល់​នូវ​សេវា​សន្តិសុខ២៤ម៉ោង​ ​ជាមួយនឹង​ការរៀបចំ​ហេ​ដ្ឋា​រចនាសម្ព័ន្ឋ​ធំ​ទូលាយ​ ​ដើម្បីឲ្យ​ខ្យល់អាកាស​ចេញចូល​ក្នុង​បរិវេណ​បុរី​កាន់តែ​មាន​ភាព​មនោរម្យ​ ​ក៏ដូចជា​ធ្វើឲ្យ​អ្នក​រស់នៅ​ក្នុង​បុរី​នេះ​ ​មាន​ភាព​ងាយស្រួល​ក្នុង​ការ​ធ្វើដំណើរ​ចេញចូល​ផង​ដែរ​។​ ​

គំរោង​នេះ​បាន​ចាប់ផ្តើម​ពីដើម​ឆ្នាំ២០១៨​ ​និង​គ្រោង​បញ្ចប់​នៅ​ឆ្នាំនេះ​ ​ជាមួយ​លំនៅ​ដ្ឋាន​ដែល​មានតម្លៃ​ចាប់ពី៧៨,៨០០​ ​ដល់​ជាង១២ម៉ឺន​ដុល្លារ​អាមេរិក​។​គំរោង​លំនៅ​ដ្ឋាន​ប្រណីត​នេះ​ ​អាច​ធ្វើដំណើរ​ត្រឹម១០នាទី​ប៉ុណ្ណោះ​ ​ពី​ស្ពាន​ព្រះមុនីវង្ស​ច្បារអំពៅ​ ​ខ័ណ្ឌ​ច្បារអំពៅ​ ​ក្រុងភ្នំពេញ​។

​ជាមួយគ្នា​នេះ​ ​ក្រុមហ៊ុន​ ​Victory​ ​Land​ ​ក៏បាន​និង​កំពុង​ពុះ​ដី​ឡូត៍​លក់​នៅ​លើ​ផ្លូវជាតិ​លេខ៥១​ ​ដែល​មាន​ហេ​ដ្ឋា​រចនាសម្ព័ន្ឋ​ល្អ​ប្រសើរ​ ​មាន​ផ្សារ​សហគមន៍​ ​និង​មាន​គំរូ​លំនៅ​ដ្ឋាន​ដ៏​ស្រស់​ស្អាត​ ​ដែល​អ្នកទិញ​ដី​អាច​សាងសង់​សំណង់​បាន​យ៉ាង​មាន​របៀបរៀបរយ​ ​និង​មាន​សោភ័ណភាព​ខ្ពស់​ផង​ដែរ​។​ ​

ពិសេស​ដី​ឡូត៍​ក្នុង​គំរោង​នេះ​ ​មា​នព័ទ្ឋ​ជុំវិញ​ដោយ​រោងចក្រ​ ​សហគ្រាស​ដែល​មានកម្ម​ករ​ ​និយោជិត​បំរើ​ការងារ​រាប់ពាន់​នាក់​ផង​ដែរ​។

​អតិថិជន​ចាប់អារម្មណ៍​ទិញ​ដី​ឡូត៍​ ​និង​លំនៅ​ដ្ឋាន​ ​Victory​ ​Land​ ​អាច​ទាក់ទង​តាមរយៈ​លេខទូរស័ព្ទ​ ​099​ ​770​ ​880​,​ ​098​ ​27​ ​37​ ​88​,​ ​011​ ​812​ ​888​៕​

ដោយនៅ ស៊ីវុត្ថា

ភ្នំពេញៈ រដ្ឋបាលរាជធានីភ្នំពេញកំពុងរៀបចំគម្រោងប្លង់អភិវឌ្ឍន៍ចំនួនពីរ នៅរាជធានីភ្នំពេញ គឺតំបន់អភិវឌ្ឍន៍ប៉ែកខាងត្បូង នៃកិច្ចសហប្រតិបត្តិការរដ្ឋបាលរាជធានីភ្នំពេញ-សាលាក្រុងប៉ារីស និងប្លង់អភិវឌ្ឍន៍របស់ក្រុមហ៊ុនING GROUP។

ក្នុងកិច្ចប្រជុំរបស់រដ្ឋបាលរាជធានីភ្នំពេញ កាលពីថ្ងៃទី១៩ ខែមេសា ឆ្នាំ២០១៩នេះ អភិបាលរាជធានីភ្នំពេញ លោក ឃួង ស្រេង បានជំរុញឲ្យមន្រ្តីជំនាញពាក់ព័ន្ធប្រមូលមតិយោបល់មកពិភាក្សា និងសិក្សាឱ្យបានល្អិតល្អន់ មុននិងដាក់បញ្ចូលទៅក្នុងគម្រោងកសាងផ្លូវសាធារណៈ និងប្រព័ន្ធធារាសាស្រ្តថ្មីៗនៃរាជធានីភ្នំពេញ។

លោកបានស្នើឱ្យមន្រ្តីបច្ចេកទេស រួមសហការគ្នា ជាមួយមន្រ្តីពាក់ព័ន្ធបន្តសិក្សា ពិគ្រោះយោបល់ឱ្យបានច្បាស់លាស់ និងយកចិត្តទុកដាក់បន្ថែមទៀត ពិនិត្យទៅលើគម្រោងប្លង់ទាំងពីរថា តើមួយណាមានផលប៉ះពាល់តិចជាង ដើម្បីយកមកពិនិត្យជាថ្មី មុននឹងអនុវត្តគម្រោងអភិវឌ្ឍន៍មួយនេះឱ្យទទួលបានជោគជ័យ។

លោកអភិបាលថា“រាល់ការអភិវឌ្ឈជៀសមិនផុតពីការប៉ះពាល់ ប៉ុន្តែត្រូវកាត់បន្ថយនូវផលប៉ះពាល់ទាំងនោះ ឱ្យនៅតិចតួចបំផុតតាមតែអាចធ្វើទៅបាន មិនមានន័យថា មានផលបះពាល់មិនអភិវឌ្ឍន៍នោះទេ គឺត្រូវកែសម្រួល ឬកាត់តម្រឹមឱ្យមានតម្លាភាព ពោលគឺយកប្រយោជន៍ជាតិធំជាងប្រយោជន៍បុគ្គល”។

លោកក៏បានស្នើឱ្យមន្រ្តីពាក់ព័ន្ធគិតគូជាពិសេស ដោយពិនិត្យលទ្ធភាពរកទីតាំង ឱ្យបានត្រឹមត្រូវ បម្រុងទុកសម្រាប់កសាងទ្វារទឹក និងស្ថានីយ៍បូមទឹក ដើម្បីកុំឱ្យមានការជន់លិចនៅក្នុងតំបន់ទាំងនោះ នាពេលអនាគត តាមចក្ខុវិស័យរបស់ប្រមុខរាជរដ្ឋភិបាល។

អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភ័ក្តីបានមានប្រសាសន៍ថា ការសិក្សាលើផែនការនេះ ធ្វើឡើងដើម្បីបន្ស៊ីគ្នាជាមួយប្លង់គោលអភិវឌ្ឍន៍រាជធានីភ្នំពេញ ដែលការសិក្សានេះក៏រួមបញ្ចូលនៅតំបន់មួយចំនួននៅក្នុងគំរោងING ផងដែរ ព្រោះគំរោងទីក្រុងរណបING ក៏ស្ថិតនៅភាគខាងត្បូង។

ទោះជាយ៉ាងណាលោកមិនបញ្ជាក់នៅឡើយថា តើផែនការសិក្សានេះនឹងបញ្ចប់នៅពេលណា និងចំណាយថវិកាប៉ុន្មាននៅឡើយទេ៕