ខេត្តស្ទឹងត្រែងចាប់ផ្តើមពង្រីកមូលដ្ឋានទេសចរណ៍ធម្មជាតិ

February 15, 2019

ដោយ វុត្ថា

ស្ទឹងត្រែង៖ មន្ទីទេសចរណ៍ខេត្តស្ទឹងត្រែង បានលើកទឹកចិត្តឱ្យវិស័យឯកជនរៀបចំតំបន់អេកូទេសចរណ៍ធម្មជាតិនៅជិត តំបន់កោះកប្បាស ដើម្បីធ្វើជាខ្សែសង្វាក់ ក្នុងដំណើរកំសាន្តរបស់ភ្ញៀវទេសចរ រវាងតំបន់ទេសចរណ៍ទឹកធ្លាក់ព្រះនិមិត្តនឹងតំបន់ផ្សោតព្រះរំកិល។

លោក អ៊ន់ ប៉ោសឿន ប្រធានមន្ទីរទេសចរណ៍ខេត្តបានអោយដឹងកាលពីព្រឹកថ្ងៃទី១៤ កុម្ភៈកន្លងមកថា គំរោងនេះ ជាការរួមចំណែកក្នុងការលើកស្ទួយវិស័យទេសចរណ៍ ធ្វើឱ្យមានរមណីយដ្ឋានទៅដល់ទីជនបទ ស្របតាមគោលការណ៍ណែនាំរបស់ក្រសួងទេសចរណ៍។ លោកបន្ថែមថា នៅពេលបង្កើតបានតំបន់អេកូទេសចរណ៍នេះ យើងអាចការពារ ធនធានជីវចំរុះបាន ហើយប្រជាពលរដ្ឋនៅតំបន់នេះ ក៍ទទួលបានប្រាក់ចំណូល ពីការលក់ដូរចំណីអាហារនៅទីនោះ។

លោកបន្តថា “ខ្ញុំគាំទ្រនៅគំនិតរបស់គាត់ផ្តួចផ្តើម ចង់ឱ្យមានការរៀបចំឱ្យបានល្អប្រសើរថែមទៀតពង្រីកឱ្យបានទំហ៊ំធំ ជាងនេះទៀតដើម្បីត្រៀមទទួលភ្ញៀវ ទៅថ្ងៃអនាគត”។ លោកបន្តថា “ភ្ញៀវទេសចរផ្សងព្រេងដែលស្ពាយសាក់ការដូ ពួកគាត់ចាប់អារម្មណ៍មកកន្លែងហ្នឹង ធ្វើម៉េចផ្សាភ្ជាប់ជាមួយធម្មជាតិ ហើយគាត់ចំណាយលុយតិចក្នុងការស្នាក់នៅ តែចំណាយក្នុងការហូបចុកច្រើន”។

លោកស្រី យុន សុខធីម ដែលមានស្វាមីជាជនជាតិអាល្លឺម៉ង់មករៀបចំតំបន់អេកូទេសចរណ៍នេះបានអះអាងថា នៅតំបន់នេះ មិនទាន់មានអាជ្ញាធរពាក់ព័ន្ធចាប់អារម្មណ៍ចង់រៀបចំអភិវឌ្ឍន៍អ្វីនោះទេ។ លោកស្រីថា អ្វីដែលត្រូវមើលឱ្យជ្រៅជាងនេះទៀត តំបន់មួយនេះមានសម្បត្តិធម្មជាតិ ប្រកបដោយសក្តានុពលផ្តល់លក្ខណៈសំខាន់ អាចរៀបចំតំបន់អេកូទេសចរណ៍បាន។

ចំណែកលោក ផយ វណ្ណា សមាជិកសហគមន៍អេកូទេសចរណ៍ ផ្សោតព្រះរំកិលបានសំដែងការគាំទ្រ ចំពោះគម្រោងអភិវឌ្ឃតំបន់អេកូទេសចរណ៍ធម្មជាតិមួយនេះ ព្រោះពេលបង្កើតហើយ ដូចយើងបាននាំគ្នាមករស់នៅថែរក្សាសម្បត្តិធម្មជាតិឱ្យស្ថិតនៅគង់វង្ស។

លោកបន្តថា “ខ្ញុំគាំទ្រថាអ្វីដែលគាត់ធ្វើនេះល្អមែនទែន ដែលអាចទាក់ទាញភ្ញៀវចូលមកទាំងរកថវិកាចូលខ្លួនគាត់ទាំងមានភ្ញៀវដើរលេង មកតរហូតមកដល់ផ្ទះសហគមន៍គឺបន្តបន្ទាប់ទៅរហូតដល់មានផលប្រយោជន៍ទាំងអស់គ្នានេះ”។

លោក គ្រីស ស្ទីន ជនជាតិអាល្លឺម៉ង ដែលកំពុងអភិវឌ្ឍន៍តំបន់អេកូទេសចរណ៍នេះដែរបានបញ្ជាក់ថា គោលបំណងនេះលោកចង់ ឱ្យបងប្អូនប្រជាពលរដ្ឋនៅទីជនបទ មានទំនាក់ទំនងល្អជាមួយគ្នា ជាពិសេសពេលមានភ្ញៀវទេសចរជាតិនឹងអន្តរជាតិមកលេង ធ្វើការរាក់ទាក់និងចេះកែច្នៃផលិតផលកសិកម្មលក់ដូរ ហើយរួមគ្នាបញ្ឃប់ការពឹងផ្អែកលើផលអនុផលព្រៃឈើ នឹងការធ្វើនេសាទហួសកំរិត។

តំបន់អេកូទេសចរណ៍ធម្មជាតិ ទើបបង្កើតថ្មីនេះស្ថិតនៅចំណុចក្បាលកោះកប្បាស ឃុំព្រះរំកិលស្រុកថាឡាបរិវ៉ាត់ខេត្តស្ទឹងត្រែង។ នេះជាលើកដំបូងហើយដែលមន្ទីរទេសចរណ៍បង្កលទ្ធភាពដល់ផ្នែកឯកជន បង្កើតឱ្យមានរមណីយដ្ឋានទេចរណ៍ធម្មជាតិនៅទីជនបទមួយនេះ ឱ្យមានផ្ទះស្នាក់ អាហារដ្ឋាន បែបធម្មជាតិ នៅក្នុងខេត្តស្ទឹងត្រែង៕

The cable bridge connecting to Chroy Changvar is under construction

February 15, 2019

0

By Kong Soriya

Phnom Penh: Overseas Cambodian Investment Corporation (OCIC) has started construction of a cable bridge connecting National Road No 5 to the Chroy Changva satellite city.

OCIC deputy general director Touch Samnang said by phone on February 14 that the cable connection was already under construction and that the team has been working on the project and after resolving the impact with the local people. He said that the bridge is about 500 meters long, with a cable in the middle and has two lanes and one lane for motorway.

“The bridge will cost 35 million US dollars, which is the government’s money from the land leasing of the Chroy Changvar satellite city of OCIC,” he said. “The bridge is planned to take 3 years to complete.”0

Touch Samnang said the bridge was designed to help ease traffic jams along National Highway 5 and Chroy Changvar since the concrete bridge was constructed, partly facilitating traffic congestion in Chroy Changvar.

At the same time, OCIC is studying and addressing the impact of the construction of the 400-meter underground tunnel, which is under national road 5 today.

Touch Samnang said that if timely settlement, the construction of the bridge and the tunnel may end simultaneously, but the if impact is not resolved in time, the tunnel can be done in the next step.

វគ្គបណ្តុះបណ្តាលពីឱកាសវិនិយោគ និងដំណោះស្រាយលើការទិញលក់អចលនទ្រព្យនឹងចាប់ផ្តើមនៅចុងសប្តាហ៍នេះ

February 15, 2019

0

ដោយ ស៊ីវ ម៉េង

ភ្នំពេញ៖ វគ្គបណ្តុះបណ្តាលពិសេសមួយ ដោយផ្តោតលើឱកាសវិនិយោគដើម្បីទទួលបានផលចំណេញពី ការវិនិយោគលើវិស័យអចលនទ្រព្យ និងដំណោះស្រាយលើបញ្ហាប្រឈមនឹងចាប់ផ្តើមនៅចុងសប្តាហ៍នេះហើយ នៅក្នុងមជ្ឈមណ្ឌលនៃកិច្ចសហប្រតិបត្តិការកម្ពុជាជប៉ុន (CJCC) ។

វាគ្មិនជំនាញបីរូបនឹងបង្ហាញបទពិសោធន៍ពីភាពជោគជ័យ និងឱកាសស្វែងរកផលចំណេញពីការវិនិយោគលើវិស័យអចលនទ្រព្យ និងមូលដ្ឋាននៃការសិក្សាលើព័ត៌មានជាក់លាក់មុនសម្រេចចិត្តវិនិយោគ នឹងចូលរួមក្នុងវគ្គបណ្តុះបណ្តាលពិសេស និងមិនធ្លាប់មានពីមុនមក គឺលោក ច្រឹក សុខនីម អគ្គនាយកក្រុមហ៊ុន Century21 Mekong និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គៀម សៀកឡុង អគ្គនាយកក្រុមហ៊ុន Century21 Dream Property និងលោក យិន លាងគង់ អគ្គនាយកគេហទំព័រ Propertyarea.asia និងជាអនុប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជា។

លោក ច្រឹក សុខនីម អគ្គនាយកក្រុមហ៊ុន Century21 Mekong និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា

អគ្គនាយកក្រុមហ៊ុនគេហទំព័រ Properyarea.asia លោក យិន លាងគង់ បានមានប្រសាសន៍ឲ្យដឹងនាព្រឹកថ្ងៃទី១៥ កុម្ភៈនេះថា វគ្គបណ្តុះបណ្តាលនេះពិតជាមានសារៈសំខាន់ ដែលផ្តល់ឲ្យអ្នកសិក្សាទទួលបានចំណេះដឹង ជាមូលដ្ឋានទាក់ទងនឹងវិស័យអចលទ្រព្យ ទាក់ទងដំណើរវិវត្តន៍ក្នុងវិស័យនេះ ទាក់ទងនឹងការវិនិយោគដើម្បីបញ្ចៀសហានិភ័យ ពិសេសការស្វែងរកមូលដ្ឋានព៌តមានជាក់លាក់ មុនសម្រេចចិត្តវិនិយោគ។

លោកបន្តថា “មូលដ្ឋានព័ត៌មានច្បាស់លាស់ និងជាក់លាក់មានសារៈសំខាន់ណាស់ ដើម្បីអ្នកវិនិយោគអាំចប្រើប្រាស់ក្នុងការពិចារណា មុនសម្រេចចិត្តវិនិយោគ ដើម្បីបញ្ចៀសហានិភ័យលើការវិនិយោគរបស់ខ្លួន”។ លោកបន្តថា “ព័ត៌មានជាមូលដ្ឋានដ៏សំខាន់ និងមិនអាចខ្វះបាន ហេតុនេះការវិភាគព័ត៌មានឲ្យបានត្រឹមត្រូវ និងស៊ីជម្រៅ ដើម្បីធ្វើជាមូលដ្ឋានក្នុងការសម្រេចចិត្តវិនិយោគ ពិតជាមានតម្លៃមិនអាចខ្វះបានសំរាប់អ្នកវិនិយោគនានា”។

អគ្គនាយកក្រុមហ៊ុន Century21 Dream Property លោក គៀម សៀកឡុង ដែលជាក្រុមហ៊ុនមួយទទួលបានជោគជ័យយ៉ាងខ្លាំងក្នុងវិស័យនេះ និងបានជាប់ជាក្រុមហ៊ុនទី១ដែលលក់អចលនទ្រព្យបានច្រើនជាងគេ កាលពីឆ្នាំមុនក្នុងចំណោមក្រុមហ៊ុនជាសមា ជិកគ្រួសារ Century21 Family បានមានប្រសាសន៍ឲ្យដឹងថា លំហូរសាច់ប្រាក់ និងការពិនិត្យលើកត្តាភូមិសាស្រ្តអចលនទ្រព្យ និងព៌តមានពាក់ព័ន្ឋពិតជាមានសារៈសំខាន់ ដើម្បីឲ្យការវិនិយោគទទួលបានជោគជ័យ។

លោក គៀម សៀកឡុង អគ្គនាយកក្រុមហ៊ុន Century21 Dream Property

លោកបន្តថា “ក្នុងវគ្គបណ្តុះបណ្តាលនេះ ខ្ញុំនឹងបង្ហាញពីបទពិសោធន៍នៃការបរាជ័យ និងភាពជោគជ័យ ដើម្បីឲ្យអ្នកសិក្សាស្វែងយល់ និងធ្វើជាមូលដ្ឋានក្នុងការសម្រេចចិត្តវិនិយោគក្នុងវិស័យនេះ ដើម្បីឈានទៅទទួលបានជោគជ័យ”។ លោកបន្តថា “ក្រុមហ៊ុនភ្នាក់ងារអចលនទ្រព្យមានច្រើន ប៉ុន្តែមិនប្រាកដជោគជ័យនោះទេ ហេតុនេះភាពជោគ ជ័យនឹងអាស្រ័យលើកត្តាជាច្រើន ដែលខ្ញុំនឹងធ្វើបទបង្ហាញពីបញ្ហានេះ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជានិងជាអគ្គនាយកក្រុមហ៊ុន Century21 Mekong លោកច្រឹក សុខនីមបានថ្លែងថា តាមរយៈវគ្គបំពាក់បំប៉ននេះ អ្វីសំខាន់ដែលលោកនឹងលើកយកមកបង្ហាញ គឺដំណើរវិវត្តន៍នៃទីផ្សារអចលនទ្រព្យនៅកម្ពុជា ទិដ្ឋភាពទូទៅក្នុងវិស័យនេះ និឱកាសវិនិយោគបែបណាដើម្បីទទួលបានផលចំណេញ និងគួរវិនិយោគនៅទីតាំងណាដែលមានសក្តានុពល ក្នុងការទទួលបានប្រាក់ចំណេញ។

លោកបន្តថា “ជាមួយគ្នានេះ ខ្ញុំនឹងលើកយកយន្តការបែបណាដើម្បីវិនិយោគកុំឲ្យខាត និងប្រសិនជាអចលនទ្រព្យជាប់គាំង តើគួរមានច្រកចេញបែបណា និងគួរធ្វើការជាមួយអ្នកណា ដើម្បីទទួលបានឱកាសចំណេញ និងមិនធ្វើការវិនិយោគបែបផ្សងព្រេង”។លោកបន្តថា “តើការវិនិយោគគួរមានបណ្តាញការងារបែបណា និងធ្វើយ៉ាងណាកុំឲ្យមានការស្ទះលំហូរសាច់ប្រាក់សុទ្ឋតែមានសារៈសំខាន់ ដែលលោកនឹងបង្ហាញនិងផ្តល់ដល់អ្នកចូលរួម”។

អ្នកមានបំណងចូលរួមអាចទាក់ទងតាមរយៈលេខទូរស័ព្ទ ០៨៩ ៨៩៤ ៤៤៩, ០១៦ ៥២៩ ៩៩៥ និងលេខទូរស័ព្ទ០១៦ ៨៨៨ ២៤៨៕

កម្ពុជា-កូរ៉េ គ្រោងរៀបវេទិការសម្រាប់ពាណិជ្ជករ និងវិនិយោគិនកូរ៉េ-កម្ពុជាបានជួបពិភាក្សាគ្នា

February 15, 2019

0

ដោយ វុត្ថា

ភ្នំពេញ៖ កម្ពុជា-កូរ៉េគ្រោងរៀបចំវេទិការួមគ្នាមួយ ក្នុងគោលបំណងជំរុញកិច្ចសហប្រតិបត្តិការពាណិជ្ជកម្ម និងវិនិយោគរវាងប្រទេសកម្ពុជា-កូរ៉េ។

លោក Kyoungmoo Kwon អគ្គនាយកទីភ្នាក់ងារកូរ៉េសម្រាប់ការជំរុញពាណិជ្ជកម្ម និងវិនិយោគ (KOTRA) ប្រចាំនៅកម្ពុជា បានមានប្រសាសន៍ឲ្យដឹងក្នុងជំនួបពិភាក្សាជាមួយមន្ត្រីជាន់ខ្ពស់ក្រសួងពាណិជ្ជកម្មកម្ពុជា កាលពីពេលថ្មីៗនេះបានឲ្យដឹងថា ទីភ្នាក់ងារកូរ៉េសម្រាប់ការជំរុញពាណិជ្ជកម្ម និងវិនិយោគ (KOTRA) នឹងរៀបចំជំនួបពាណិជ្ជកម្មកូរ៉េ-កម្ពុជានៅកម្ពុជានាពេលឆាប់ៗខាងមុខនេះ ដើម្បីជាវេទិកាមួយសម្រាប់ពាណិជ្ជករ និងវិនិយោគិនកូរ៉េ-កម្ពុជាបានជួបពិភាក្សាគ្នា ស្វែងយល់ពីឱកាសពាណិជកម្ម និងវិនិយោគថ្មីៗនៅកម្ពុជា ព្រមទាំងចាប់ដៃគូរពាណិជ្ជកម្ម។

លោកបន្តថា “នៅក្នុងជំនួបពាណិជ្ជកម្មនេះ នឹងមានការអញ្ជើញចូលរួមពីថ្នាក់ដឹកនាំនៃក្រសួងឧស្សាហកម្មសាធារណរដ្ឋកូរ៉េ ដូច្នេះសូមគោរពអញ្ជើញថ្នាក់ដឹកនាំនៃក្រសួងពាណិជ្ជកម្មកម្ពុជា ព្រមទាំងពាណិជ្ជករ និងវិនិយោគិនកម្ពុជាចូលរួមក្នុងព្រឹត្តិការណ៍នេះ ដើម្បីជំរុញការវិនិយោគ និងពាណិជ្ជកម្មនៃប្រទេសទាំងពីរ ឲ្យមានការកើនឡើងមួយកម្រិតទៀត”។

លោកស៊ាង ថៃ អនុរដ្ឋលេខាធិការក្រសួងពាណិជ្ជកម្ម បានគាំទ្រចំពោះព្រឹត្តិការណ៍ជំនួបពាណិជ្ជកម្មកូរ៉េ-កម្ពុជា ដែលនឹងរៀបចំនៅកម្ពុជានាពេលឆាប់ៗខាងមុខនេះ ហើយ លោកជឿជាក់ថាព្រឹត្តិការណ៍នេះ នឹងក្លាយជាឱកាសដ៏ល្អមួយ សម្រាប់ពាណិជ្ជករ និងវិនិយោគិននៃប្រទេសទាំងពីរក្នុងការសហការអាជីវកម្ម និងពាណិជ្ជកម្ម។

លោក ស៊ាង ថៃ ក៏បានវាយតម្លៃខ្ពស់ចំពោះកិច្ចសហប្រតិបត្តិការពាណិជ្ជកម្មទ្វេភាគីនៃប្រទេសទាំងពីរ ដែលកន្លងមកកម្ពុជាបាននាំចេញផ្លែស្វាយទៅទីផ្សារប្រទេសកូរ៉េ ប៉ុន្តែដោយសារបញ្ហាប្រឈមខាងបច្ចេកទេសអនាម័យ និងភូតគាមអនាម័យ(SPS) ធ្វើឲ្យផ្លែស្វាយ និងផលិតផលកសិកម្មផ្សេងទៀតរបស់កម្ពុជា ពុំអាចនាំចេញជាលក្ខណៈទ្រង់ទ្រាយធំពីកម្ពុជាទៅប្រទេសកូរ៉េបាន។

KOTRA ជាស្ថាប័នមួយស្ថិតនៅក្រោម ក្រសួងឧស្សាហកម្មនៃសាធារណរដ្ឋកូរ៉េ ចំពោះការប្រតិបត្តិការនៅកម្ពុជា KOTRA ស្ថិតក្រោមស្ថានទូតកូរ៉េទទួលបន្ទុកផ្នែកពាណិជ្ជកម្ម៕

ដំណឹងរីករាយ! សេដ្ឋកិច្ចកម្ពុជាសម្រេចបានកំនើន ៧,៥ភាគរយ

February 15, 2019

0

ដោយ គង់ សូរិយា

ភ្នំពេញ៖ ខណៈសេដ្ឋកិច្ចកម្ពុជាត្រូវបានព្យាករណ៍ពីកំនើនខុសៗគ្នាកន្លងមក ពេលនេះការវាយតម្លៃចុងក្រោយដោយស្ថាប័នអន្តរជាតិបានបង្ហាញថា សេដ្ឋកិច្ចកម្ពុជាសម្រេចបានកំនើន៧,៥ភាគរយកាលពីឆ្នាំមុន។

សម្តេចតេជោហ៊ុន សែននាយករដ្ឋមន្ត្រីកម្ពុជាបានមានប្រសាសន៍ក្នុងពិធីបិទសន្និបាតការងារក្រសួងមហាផ្ទៃកាលពីល្ងាចថ្ងៃទី១៤ កុម្ភៈកន្លងមកថា មូលនិធិរូបិយប័ណ្ណអន្តរជាតិ(IMF) សហការជាមួយស្ថាប័នជំនាញរបស់កម្ពុជាវាយតម្លៃថា កំណើនសេដ្ឋកិច្ចកម្ពុជា ក្នុងឆ្នាំ២០១៨មានកំណើនរហូតដល់ ៧,៥%នោះ។

ជាមួយនឹងលទ្ឋផលដ៏ប្រសើរនេះ សម្តេចក៏បានស្នើឲ្យក្រុមប្រឹក្សាអភិវឌ្ឍន៍កម្ពុជា រៀបចំវេទិការរវាងរាជរដ្ឋាភិបាល និងវិស័យឯកជននៅខែមីនាខាងមុខនេះ ដើម្បីពិភាក្សាជំរុញល្បឿនសេដ្ឋកិច្ចកម្ពុជាបន្ថែមទៀត។

សំដៅដល់ការដាក់ចេញនិតិវិធី ដើម្បីដកប្រព័ន្ឋអនុគ្រោះពន្ឋពីសហភាពអឺរ៉ុបចេញពីកម្ពុជា សម្ដេចតេជោ ហ៊ុន សែនបានបញ្ជាក់ថា យើងត្រូវរួមគ្នាធ្វើការដើម្បីពង្រីការលូតលាស់ខាងសេដ្ឋកិច្ច ដើម្បីបន្តពង្រឹងឯករាជ្យភាពខាងនយោបាយរបស់យើង។ ប្រទេសមួយបើមិនអាចអនុវត្តច្បាប់របស់ខ្លួនបាន មិនចាំបាច់ហៅថារដ្ឋអធិបតេយ្យនោះទេ។

សម្តេចបន្តថា “យើងត្រូវប្រែក្លាយការប្រឈម ឱ្យទៅជាឱកាស ជាកាលានុវត្តភាព នៃការខិតខំឈានឡើងនៃសេដ្ឋកិច្ចរបស់យើង”។ សម្ដេចថ្លែងបន្តថា “ការព្យួរ EBA ដែលនឹងមានរយៈពេល១៨ខែទៀត បើទោះជាបាត់ឬនៅមានជាបន្ត ក៏មិនអាចធ្វើឱ្យយើងស្លាប់ ឬក្លាយទៅជាអ្នកមានបានដែរ។ EBA មុននិងក្រោយគង់នឹងបាត់ដូចគ្នា គ្រាន់តែយូរនិងឆាប់តែប៉ុណ្ណោះ ដូចនេះការរកស៊ីបង់ពន្ធឱ្យគេ និងគេបង់ពន្ធឱ្យយើងគឺជារឿងជៀសមិនរួច ហើយថ្លៃថ្នូរ និងមានស្ថិរភាពទៀតផង”៕

សម្តេចតេជោប្រាប់ឲ្យក្រុមហ៊ុនអឺរ៉ុបបន្តរកស៊ីនៅកម្ពុជាទោះជា EBA ត្រូវដក

February 15, 2019

0

ដោយ គង់ សូរិយា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានស្នើឲ្យក្រុមហ៊ុនអឺរ៉ុបបន្តវិនិយោគនៅកម្ពុជា ទោះជាប្រព័ន្ឋ EBA ត្រូវដកឬមិនដកចេញពីកម្ពុជានាពេលខាងមុខ ដោយសម្តេចធានារក្សានូវសន្តិភាព និងស្ថេរភាពនយោបាយនៅកម្ពុជា ពិសេសកែទម្រង់លើស្ថាប័នជាច្រើនដើម្បីលើកទឹកចិត្តធុរជន។

សម្តេចតេជោបានមានប្រសាសន៍ ក្នុងពេលអញ្ជើញចូលរួមបិទសន្និបាតការងារក្រសួងមហាផ្ទៃនាល្ងាចថ្ងៃទី១៤ កុម្ភៈម្សិលម៉ិញថា រាជរដ្ឋាភិបាលកំពុងតែចាត់វិធានការកែទម្រង់ដ៏មុតស្រួច និងស៊ីជម្រៅ សំដៅកែលម្អ និងលើកស្ទួយភាពប្រកួតប្រជែងរបស់កម្ពុជា ពិសេសវិធានការសម្រួលពាណិជ្ជកម្ម និងការកាត់បន្ថយថ្លៃដើមធ្វើធុរកិច្ច ជាអាទ៍ ការលុបបំបាត់វិញ្ញាបនបត្រប្រភពដើមទំនិញ ការកែសម្រួលមុខនាទីរបស់កាំកុងត្រូលចេញពីមុខនាទីត្រួតពិនិត្យទំនិញនាំចេញ នាំចូល។

ការរំសាយអង្គភាពកាំសាប ការកាត់បន្ថយថ្លៃស្គែនកុងទីណ័រ និងថ្លៃសេវាមួយចំនួនទៀត ការកែលម្អសេវាពាក់ព័ន្ធ ការលើកទឹកចិត្តផ្នែកសារពើពន្ធដល់សហគ្រាសធុនតូច និងមធ្យម និងវិធានការសំខាន់ៗជាប្រព័ន្ធជាច្រើនទៀត ដែលសហគមន៍ធុរកិច្ចនឹងបានឃើញ ព្រមទាំបានទទួលផល ប្រយោជន៍ជាក់ស្ដែងបន្ថែមជាបន្តបន្ទាប់ក្នុងពេលដ៏ខ្លីខាងមុខ។

សម្តេចបានបញ្ជាក់ថា “ខ្ញុំចង់យកពេលនេះ និយាយទៅកាន់បណ្ដាក្រុមហ៊ុនអឺរ៉ុបរាប់រយក្រុមហ៊ុន ដែលកំពុងធ្វើអាជីកម្មនៅកម្ពុជា សូមបន្តការរកស៊ី និងស្នាក់នៅដោយការសប្បាយរីករាយ ជាមួយសុខសន្តិភាពសម្រាប់អស់លោកអ្នក”។

សម្តេចបញ្ជាក់ថា “ខ្ញុំក៏សូមជម្រាជូនធុរជន និងវិនិយោគិនទាំងឡាយ ទាំងអ្នកដែលកំពុងមានការវិនិយោគ និងការប្រកបអាជីកម្មនៅកម្ពុជា ទាំងអ្នកដែលមានបំណងមកដាក់ទុន ឬកំពុងសិក្សាដាក់ទុនវិនិយោគនៅកម្ពុជា ជាមួយនឹងការប្ដូរផ្ដាច់រក្សាឱ្យបានល្អប្រសើរនូវសុខសន្តិភាព និងស្ថិរភាពនយោបាយនៅក្នុងប្រទេស”។

សម្តេចតេជោបានបន្តថា ក្នុងស្មារតីនៃការខិតខំខាងលើបាវចនាពីរ គឺ កែទម្រង់ខាងក្នុង និងពង្រីកមិត្តខាងក្រៅ ក្នុងស្មារតីឯករាជ្យ និងអភិក្រម៥ គឺឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ត្រូវតែយកមកអនុវត្តព្រមៗគ្នា។

ទន្ទឹមនិងការកែទម្រង់ផ្ទៃក្នុងដែលកំពុងទទួលផល យើងក៏កំពុងបន្តទំនាក់ទំនងជាមួយប្រទេសនានា នៅក្នុងសហភាពអឺរ៉ុបផងដែរ ដោយមិនទុកឱ្យបញ្ ហាEBA ក្លាយទៅជាឧបសគ្គនៃទំនាក់ទំនងរវាងរដ្ឋ និងរដ្ឋ សហគមន៍ និងសហគមន៍នោះទេ។

សម្តេចបន្តថា “កម្ពុជានិងរួមជាមួយសមាជិកអាស៊ានផ្សេងទៀត បន្តចរចាលើកិច្ចព្រមព្រៀងពាណិជ្ជកម្មសេរី រវាងអាស៊ាន និងអឺរ៉ុប ព្រមទាំងពិនិត្យពេលវេលាសមស្រប សម្រាប់ភាពជាដៃគូយុទ្ធសាស្ត្ររវាងអាស៊ាន និងអឺរ៉ុប តាមសំណើរបស់សហភាពអឺរ៉ុប”។

សម្តេចបន្តថា “កម្ពុជានិងបន្តពិភាក្សាជាមួយដៃគូអឺរ៉ុប សម្រាប់ប្រធានបទ និងកិច្ចដំណើរការនៃការប្រជុំអាស៊ី អឺរ៉ុបលើកទី១៣នៅកម្ពុជា នាឆ្នាំ២០២០ខាងមុខ ដែលកម្ពុជាសង្ឃឹមថា ដៃគូអឺរ៉ុបរបស់យើងដើម្បីសម្រេចជោគជ័យ ក្នុងវេទិកាពហុភាគីដ៏សំខាន់មួយនេះ”។

ជាមួយគ្នានេះលោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ប្រសិនជាអឺរ៉ុបដកប្រព័ន្ឋ EBA ពីកម្ពុជា សេដ្ឋកិច្ចកម្ពុជានឹងរងផលប៉ះពាល់ ប៉ុន្តែមិនធ្ងន់ធ្ងរទេ ប៉ុន្តែវាជាពេលវេលាដែលកម្ពុជាត្រូវពង្រឹងខ្លួនឯង ជាជាងការពឹងផ្អែកលើគេខ្លាំងពេក ព្រោះយើងមិនអាចពឹងគេបានរហូតនោះទេ បើយើងពឹងគេថ្ងៃណាមួយគេឈប់ជួយយើង យើងនឹងស្លាប់។

លោកបន្តថា “ហេតុនេះយើងត្រូវខិតខំពង្រឹងខ្លួនឯង ធ្វើពិពិធម្មទីផ្សារ និងធ្វើពិពិធកម្មផលិតផលរបស់យើង ដើម្បីយើងអាចមានមូលដ្ឋានរ៉ឹងមាំក្នុងការទ្រទ្រង់សេដ្ឋកិច្ចរបស់ខ្លួន”៕

ដំណឹងល្អ! ស្ពានយោងដោយខ្សែកាបទៅតំបន់ជ្រោយចង្វារចាប់ផ្តើមសាងសង់ហើយ

February 15, 2019

0

ដោយ គង់ សូរិយា

ភ្នំពេញ៖ ក្រុមហ៊ុន OCIC បានចាប់ផ្តើមសាងសង់ស្ពានយោងដោយខ្សែកាប ដែលតភ្ជាប់រវាងផ្លូវជាតិលេខ៥ ឆ្ពោះទៅកាន់ទីក្រុងរណបជ្រោយចង្វារហើយ។

អគ្គនាយករងក្រុមហ៊ុន OCIC លោក ទូច សំណាង បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៤ កុម្ភៈកន្លងមកថា ស្ពានយោងដោយខ្សែកាបនេះបាននិងកំពុងចាប់ផ្តើមសាងសង់ហើយ ដោយបច្ចុប្បន្នក្រុមការងារបាន និងកំពុងធ្វើការងារនេះហើយ បន្ទាប់ពីដោះស្រាយផលប៉ះពាល់ជាមួយប្រជាពលរដ្ឋរួច។ ស្ពាននេះមានប្រវែងប្រមាណ៥០០ម៉ែត្រ ដែលមានខ្សែកាបនៅចំកណ្តាល និងអាចបើករថយន្តបានពីរគន្លងសំរាប់ម្ខាងៗនៃស្ពាន និងមានផ្លូវសំរាប់ម៉ូតូផងដែរ។

លោកបន្តថា “ស្ពាននេះគ្រោងចំណាយថវិកា សាងសង់៣៥លានដុល្លារអាមេរិក ដែលថវិកានេះជាថវិការបស់រដ្ឋាភិបាល បានមកពីការជួលដីទីក្រុងរណបជ្រោយចង្វារដល់ក្រុមហ៊ុន OCIC”។ លោកបន្តថា “ស្ពាននេះតាមគំរោងនឹងចំណាយពេល៣ឆ្នាំ ដើម្បីសាងសង់បញ្ចប់”។

លោក ទូច សំណាង បានបន្តថា ការសាងសង់ស្ពាននេះ ដើម្បីជួយសម្រាលការកកស្ទះចរាចរណ៍នៅតាមបណ្តោយផ្លូវជាតិលេខ៥ និងតំបន់ជ្រោយចង្វារ ព្រោះតាំងពីស្ពានបេតុងបានសាងសង់រួច បានជួយសម្រូលការធ្វើចរាចរណ៍មិនឲ្យកកស្ទះនៅតំបន់ជ្រោយចង្វារបានមួយចំណែកផងដែរ។

ជាមួយគ្នានេះ ក្រុមហ៊ុន OCIC កំពុងសិក្សា និងដោះស្រាយផលប៉ះពាល់ជាមួយប្រជាពលរដ្ឋ ពីការសាងសង់ផ្លូវក្រោមដីប្រវែងប្រមាណ៤០០ម៉ែត្រ ដែលផ្លូវនេះស្ថិតនៅពីក្រោមផ្លូវជាតិលេខ៥សព្វថ្ងៃនេះ។

ការសាងសង់ស្ពាននេះបានចាប់ផ្តើមក្នុងកំឡុងដើមខែកុម្ភៈនេះ និងគ្រោងបញ្ចប់ការសាងសង់នៅចុងឆ្នាំ២០២១។ ស្ពាននេះនឹងសាងសង់ចេញពីតំបន់អតីតឃ្លាំងស្តុកប្រេងឥន្ឋនៈសូគីម៉ិច ស្ថិតនៅតាមបណ្តោយផ្លូវជាតិលេខ៥ ឆ្ពោះទៅកាន់តំបន់ជ្រោយចង្វារ ស្ថិតសង្កាត់ជ្រោយចង្វារ ខ័ណ្ឌជ្រោយចង្វារ រាជធានីភ្នំពេញ។

លោកទូច សំណាងបានបន្តថា បើការដោះស្រាយទាន់ពេលវេលា ការសាងសង់ស្ពាន និងផ្លូវក្រោមដីនេះអាចបញ្ចប់ក្នុងពេលដំណាលគ្នា ប៉ុន្តែបើដោះស្រាយមិនចប់ផ្លូវក្រោមដីនេះអាចធ្វើក្នុងជំហ៊ានបន្ទាប់៕

ចំណេះដឹង! តើអចលនទ្រព្យប្រភេទណាខ្លះត្រូវជាប់ពន្ធ?

February 15, 2019

0

ដោយ វុត្ថា

ភ្នំពេញ៖ យោងទៅតាមច្បាប់ពន្ធអចលនទ្រព្យកម្ពុជា ការប្រមូលពន្ធត្រូវអនុវត្តន៍ចំពោះអចលនទ្រព្យនៅទូទាំងប្រទេសកម្ពុជា ប៉ុន្តែនៅក្នុងជំហ៊ានដំបូងច្បាប់នេះបានកំ ណត់យកពន្ធលើអចលនទ្រព្យទាំងឡាយណា ដែលស្ថិតនៅតាមតំបន់រដ្ឋបាលថ្នាក់ក្រុង (ទីក្រុង) និងតំបន់រដ្ឋបាលថ្នាក់ខេត្ត (ទីរួមខេត្ត) ជាមុនសិនចំណែកតំបន់ផ្សេងទៀតដូចជាថ្នាក់ស្រុក និងទីជនបទមិនទាន់ជាប់ពន្ធនោះទេ។

អចលនទ្រព្យជាប់ពន្ធទាំងនេះអាចមាន ដូចជា ដី ផ្ទះ និងសំណង់នានាដែលសាងសង់ភ្ជាប់ជាមួយដីនោះ។ ទោះយ៉ាងណាមានអចលនទ្រព្យមួយចំនួន ត្រូវបានលើកលែងដោយមិនតម្រូវឲ្យបង់ពន្ធដែលមាន ដូចជា ដីកសិកម្ម ដីកម្មសិទ្ធិរបស់រដ្ឋ ដីកម្មសិទ្ធិរបស់ស្ថានទូត ដីកម្មសិទ្ធិរបស់អង្គការក្រៅរដ្ឋាភិបាល អង្គការសាសនា និងអង្គការសប្បុរសធម៌។

អចលនទ្រព្យជាប់ពន្ធលុះត្រា តែអចលនទ្រព្យនោះ មានតម្លៃសរុបលើសពី១០០លានរៀល (២៥,០០០ដុល្លារ)ឡើងទៅ។ យោងទៅតាមច្បាប់ អ្នកដែលជាប់បន្ទុកបង់ពន្ធគឺម្ចាស់កម្មសិទ្ធិ ឬអ្នកកាន់កាប់ឬអ្នកទទួលប្រយោជន៍ចុងក្រោយ លើអចលនទ្រព្យជាប់ពន្ធ។

តើត្រូវបង់ពន្ធនៅឯណា?
សម្រាប់អចលទ្រព្យនៅតាមខេត្ត តម្រូវឲ្យបង់ពន្ធតាមសាខាពន្ធដារខេត្ត ប្រសិន បើអចលនទ្រព្យស្ថិតក្នុងទីក្រុងភ្នំពេញ ត្រូវបង់នៅសាខាពន្ធដារខណ្ឌ ដែលអចលនទ្រព្យនោះស្ថិតនៅ។ជាទូទៅពន្ធអចលនទ្រព្យ តម្រូវឲ្យបង់បានមុនបំណាច់ខែកញ្ញានៃឆ្នាំដែលជាប់ពន្ធ។ ទាក់ទងនឹងការបង់ពន្ធនេះ អ្នកបង់ពន្ធតម្រូវឲ្យដាក់លិខិតប្រកាសពន្ធ និងគណនាពន្ធដោយខ្លួនឯង។

ក្រៅពីការបង់ពន្ធតាមសាខាពន្ធដារម្ចាស់អចលនទ្រព្យ ក៏អាចបង់ពន្ធនៅតាមសាខាធនាគារដៃគូមួយចំនួនដូចជា ធនាគារអេស៊ីលីដា ធនាគារវឌ្ឍនៈ ធនាគារកាណាឌីយ៉ាធនាគារ អេអិនហ្សិតរ៉ូយ៉ាល់ ឬធនាគារកម្ពុជាសាធារណៈ៕

សម្តេចតេជោ៖ ការរស់ពឹង EBA មិនអាចពឹងឲ្យកម្ពុជាក្លាយជាប្រទេសអ្នកមាននោះឡើយ

February 14, 2019

0

ដោយវុត្ថា

ភ្នំពេញ៖ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានស្នើឲ្យអាជ្ញាធរ និងកម្លាំងនគរបាលត្រូវប្រឹងប្រែងរួមគ្នាលើកកម្ពស់សេដ្ឋកិច្ច ដើម្បីពង្រឹងឯករាជ្យជាតិ អធិបតេយ្យជាតិដោយសម្តេចបានលើកឡើងថា ការរស់ពឹង EBA មិនអាចពឹងឲ្យកម្ពុជាក្លាយជាប្រទេសអ្នកមាននោះឡើយ។

នៅក្នុងពិធីអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតត្រួតពិនិត្យការងារឆ្នាំ២០១៨ របស់ក្រសួងមហាផ្ទៃ នៅថ្ងៃទី ១៤ ខែកុម្ភៈ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើរដល់ប្រជាពលរដ្ឋ កុំខ្វល់ទៅនឹងសម្តីអ្នកដទៃ បើនៅតែអាចបន្តបើកប្រាក់បៀវត្សរ៍ និងអាចប្រកបរបបទទួលទានជាប្រក្រតីនោះ។ សម្តេចតេជោ បញ្ជាក់ថា កម្ពុជានៅតែបន្តកិច្ចសហប្រតិបត្តិការល្អជាមួយសហភាពអឺរ៉ុប និងជាម្ចាស់ផ្ទះក្នុងកិច្ចប្រជុំ អាស៊ី-អឺរ៉ុប លើកទី១៣ នៅឆ្នាំ២០២០ ដោយមិនធ្វើឲ្យបញ្ហា EBA ប៉ះពាល់ដល់ទំនាក់ទំនងកម្ពុជា-អឺរ៉ុបនោះឡើយ។

សម្តេចតេជោ ហ៊ុន សែន ក៏បានអំពាវនាវដល់ក្រុមហ៊ុនមកពីបណ្តាប្រទេសនៅតំបន់អឺរ៉ុបទាំងអស់ ឲ្យបន្តរកស៊ី និងស្នាក់នៅដោយក្តីរីករាយក្រោមម្លប់សុខសន្តិភាពរបស់កម្ពុជា។ សម្តេចតេជោបានបន្តអំពាវនាវដល់អ្នកវិនិយោគ និងធុរជនទាំងអស់ឲ្យបន្តជឿជាក់ក្នុងការរកស៊ីនៅកម្ពុជា ខណៈកម្ពុជាកំពុងធ្វើកំណែទម្រង់លើសេវាផ្សេងៗជាច្រើនទៀត ដើម្បីសម្រួលដល់ការរកស៊ី។សម្ដេចតេជោ នាយករដ្ឋមន្រ្តី បានបង្ហាញការជឿជាក់ថា តាមរយៈការធ្វើកំណែទម្រង់ជាច្រើននេះ បរិយាកាសនៃការវិនិយោគនៅកម្ពុជានៅតែល្អប្រសើរ ពីព្រោះតាមរយៈការវាយតម្លៃជាថ្មីរកឃើញថា កំណើនសេដ្ឋកិច្ចរបស់កម្ពុជាមានរហូតដល់ទៅ ៧.៥ភាគរយ។

សម្តេចតេជោនាយករដ្ឋមន្ត្រី បានអំពាវនាវទៅដល់កម្មករ កម្មការិនី កុំមានការព្រួយបារម្ភបញ្ហា EBA ដរាបណាការងារនៅតែមានធ្វើ។ ថ្ងៃនេះសម្ដេចតេជោបានអំពាវនាវឲ្យបងប្អូនប្រជាពលរដ្ឋចូលរួមក្នុងការធ្វើជំរឿនទាំងអស់គ្នានៅថ្ងៃទី ៣ ខែមីនា ឆ្នាំ២០១៩ខាងមុខនេះ៕

កម្ពុជា-ចិនចុះហត្ថេខាលើគំរោងចំនួន១៩ នៃកិច្ចសហប្រតិបត្តិការមេគង្គ-ឡានឆាង

February 14, 2019

0

ដោយ វុត្ថា

ភ្នំពេញ៖ ប្រទេសកម្ពុជា ចិន បានចុះហត្ថលេខាលើកិច្ចព្រមព្រៀងស្តីពី គម្រោងកិច្ចសហប្រតិបត្តិការសម្រាប់មូលនិធិពិសេស នៃគំរោងកិច្ចសហប្រតិបត្តិការមេគង្គ-ឡានឆាង២០១៨ ចំនួន១៩គម្រោងដែលមានទឹកប្រាក់សរុបជាង ៧.៦៦លានដុល្លារអាមេរិកដោយផ្តោលើសកម្មភាពទាក់ទងនឹងការពង្រឹងសមត្ថភាព ការអប់រំ ការសិក្សាស្រាវជ្រាវ និងការផ្លាស់ប្តូរកម្មវិធី។

ថ្លែងនៅក្នុងពិធីចុះហត្ថលេខាលើកិច្ចព្រមព្រៀងស្តីពី គម្រោងកិច្ចសហប្រតិបត្តិការសម្រាប់មូលនិធិពិសេសកិច្ចសហប្រតិបត្តិការមេគង្គ-ឡានឆាង ២០១៨ នៅថ្ងៃទី១៤ ខែកុម្ភៈនេះ ឧបនាយករដ្ឋមន្ដ្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្ដរជាតិឲ្យដឹងងថា កិច្ចសហប្រតិបត្តិការមេគង្គ-ឡានឆាងបាន និងកំពុងបោះជំហានទៅមុខយ៉ាងមាំមួន ជាមួយនឹងចំណងនៃកិច្ចសហប្រតិបត្តិការដ៏រឹងមាំ តាមរយៈគម្រោងអភិវឌ្ឍន៍នានា។

ប្រមុខការទូតកម្ពុជារូបនេះបន្តថា កម្ពុជាប្តេជ្ញាក្នុងការពង្រឹង កិច្ចសហប្រតិបត្តិការមេគង្គ-ឡានឆាង ឲ្យកាន់តែរឹងមាំបន្ថែមទៀត ដើម្បីអភិវឌ្ឍន៍ប្រទេសឲ្យកាន់តែមានភាពរីកចម្រើនលើគ្រប់វិស័យ និងឈានទៅរកការប្រកួតប្រជែងនៅលើឆាកអន្ដរជាតិ។

លោក ប្រាក់ សុខុន បានបន្ដថា កន្លងមកប្រទេសកម្ពុជាបានទទួលគម្រោងសរុបចំនួន៣៥ ដែលមានវិសាលភាពគ្របដណ្តប់ លើសកម្មភាពកិច្ចសហប្រតិបត្តិការ ក្នុងវិស័យជាច្រើន ដូចជា វិស័យកសិកម្ម ទេសចរណ៍ បច្ចេកទេសព័ត៌មានវិទ្យា អប់រំនិងស្រាវជ្រាវ ធនធានទឹក អភិវឌ្ឍន៍ជនបទ ការតភ្ជាប់ផ្លូវអាកាស ការផ្លាស់ប្តូរផ្នែកវប្បធម៌ និងសាសនា ខណៈដែលគម្រោងមួយចំនួនត្រូវបានបញ្ចប់ជាស្ថាពរ និងគម្រោងដែលនៅសល់ផ្សេងទៀត ជិតត្រូវបានបញ្ចប់។

លោកបន្ថែមទៀតថា នៅក្នុងបរិបទនៃការវិវត្តយ៉ាងឆាប់រហ័សនៃទិន្នន័យ និងការច្នៃប្រឌិតថ្មីរបស់ពិភពលោក សមត្ថភាពនៃការចែករំលែក ចំណេះដឹងថ្មី ចំណេះធ្វើ និងបទពិសោធន៍ របស់ប្រទេសមេគង្គ និងចិន ដែលជាហេដ្ឋារចនាសម្ព័ន្ធទន់ បានជួយបំពេញយ៉ាងល្អទៅដល់ហេដ្ឋារចនាសម្ព័ន្ធរឹង ដែលត្រូវបានអនុវត្តក្រោមគម្រោងទ្វេភាគី និងពហុភាគីដទៃទៀត។

គម្រោងរបស់កម្ពុជាចំនួន១៩ ត្រូវបានអនុម័តនៅក្នុងកិច្ចប្រជុំរដ្ឋមន្រ្តីការបរទេសមេគង្គ-ឡានឆាង លើកទី៤ នៅទីក្រុងហ្លួងប្រាបាង្គ ប្រទេសឡាវ កាលពីពាក់កណ្តាលខែធ្នូ ឆ្នាំ២០១៨៕