ភ្នំពេញ៖ កម្ពុជា និង​ចិន បាន​ចុះហត្ថលេខា​លើ​ឯកសារ​កិច្ចព្រមព្រៀង និង​អនុស្សារណៈ​នៃ​ការយោគយល់​គ្នា​ចំនួន៨ ក្រោម​អធិបតីភាព​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​លោក លី ខឺ​ឈាង នាយករដ្ឋមន្ត្រី​ចិន។

ឯកសារ​កិច្ចព្រមព្រៀង និង​អនុស្សារណៈ​នៃ​ការយោគយល់​គ្នា​ចំនួន៨ រួមមាន៖

ទី១/ លិខិត​ប្តូរ​សារ​ស្តីពី​គម្រោង​កែលំអរ​ផ្លូវ​ជនបទ​ជំហាន​ទី។
ទី២/ លិខិត​ប្តូរ​សារ​ស្តីពី​គម្រោង​ផ្គត់​ផ្គត់​ទឹក​ជនបទ​ជំហាន​ទី។
ទី៣/ លិខិត​ប្តូរ​សារ​ស្តីពី​គម្រោង​ការងារ​វិស្វកម្ម​សម្រាប់​គាំទ្រ​ដល់​គម្រោង​ផ្លូវ​ល្បឿន​លឿន​ភ្នំពេញ​ខេត្ត​ព្រះសីហនុ ។

ឯកសារ​ទាំងបី​នេះ​ចុះហត្ថលេខា​រវាង លោក វ​ង្សី វិស្សុត រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ​ជាមួយ​លោក វ៉ាង ស៊ា​វ​ថាវ ប្រធាន​ទីភ្នាក់ងារ​ចិន​សម្រាប់​កិច្ចសហប្រតិបត្តិការ​អភិវឌ្ឍ​ន៍​អន្តរជាតិ ។

ទី៤/ លិខិតបញ្ជាក់​ការប្រគល់​ទទួល​ស្តីពី​គម្រោង​អគារ​អង្គរក្ស​នៃ​ទីស្តីការគណៈរដ្ឋមន្ត្រី ចុះហត្ថលេខា​រវាង​លោក វ​ង្សី វិស្សុត រដ្ឋលេខាធិការ ក្រសួង​សេដ្ឋកិច្ច និង​ហិរញ្ញវត្ថុ ជាមួយ​លោក ជុង សាន រដ្ឋមន្ត្រីក្រសួង​ពាណិជ្ជកម្ម ។

ទី៥/ លិខិតបញ្ជាក់​ការប្រគល់​ទទួល​ស្តីពី​គម្រោង​លើក​កម្រិត​ផ្លូវ ជាតិ​លេខ៧ ដែល​រង​ការខូចខាត​ដោយ​ទឹកជំនន់​ចុះហត្ថលេខា​រវាង​លោក ស៊ុន ចាន់ថុល ទេសរដ្ឋមន្ត្រី និង​ជា​រដ្ឋមន្ត្រីក្រសួង​សាធារណការ និង​ដឹកជញ្ជូន ជាមួយ​លោក ជុង សាន រដ្ឋមន្ត្រីក្រសួង​ពាណិជ្ជកម្ម ។

ទី៦/ លិខិតបញ្ជាក់​ការប្រគល់​ទទួល​ស្តីពី​គំរោង​ជួសជុល​ប្រាសាទតាកែវ​ចុះហត្ថលេខា​រវាង លោក ថោង ខុន រដ្ឋមន្ត្រី​ក្រសួងទេសចរណ៍ ជាមួយ​លោក ជុង សាន រដ្ឋមន្ត្រីក្រសួង​ពាណិជ្ជកម្ម ។

ទី៧/ កិច្ចព្រមព្រៀង​ឥណទាន​សម្បទាន​សម្រាប់ គម្រោង​អភិវឌ្ឍន៍​អាងទឹក​រក្សា​ក្នុង​ខេត្តព្រះវិហារ ចុះហត្ថលេខា​រវាង​លោក វ​ង្សី វិស្សុត ជាមួយ​លោក ហ៊ូ ស៊ា​វ​លាន ប្រធាន​ធនាគារ​នីហរ័ណ​អាហរ័ណ​ចិន។

ទី៨/ កិច្ចព្រមព្រៀង​ស្តីពី​ការជំរុញ​កិច្ចសហប្រតិបត្តិការ​វិនិយោគ​ក្រោម​យុទ្ធសាស្ត្រ​ចតុកោណ និង​គំនិត​ផ្តួចផ្តើម​ខ្សែ​ក្រ​វ៉ាត និង​ផ្លូវ​ចុះហត្ថលេខា រវាង​លោក សុខ ចិន្តា​សោភា រដ្ឋមន្ត្រី​ប្រតិភូ​អម​នាយករដ្ឋមន្ត្រី​និង​ជា​អគ្គលេខាធិការ​ក្រុមប្រឹក្សា​អភិ​វ ឌ្ឍ​ន៍​កម្ពុជា ជាមួយ​លោក យី ហួយ​ម៉ាន ប្រធាន​ធនាគារ​ឧស្សាហកម្ម និង​ពាណិជ្ជកម្ម​ចិន៕

ដោយ នៅ វឌ្ឈនា

ព្រះសីហនុ៖ កំពង់ផែទឹកជ្រៅក្រុងព្រះសីហនុ ខេត្តព្រះសីហនុនឹងសហការជាមួយ​កំពង់ផែឈីង តាវរបស់ប្រទេសចិន ដើម្បីដឹកទំនិញដោយផ្ទាល់ពីកម្ពុជាទៅកាន់ទីនោះ ដោយមិនចាំបាច់ឆ្លងកាត់ប្រទេសទី២។

ក្នុងជំនួបជាមួយអភិបាលខេត្តព្រះសីហនុ លោកយន្ត មីនកាលពីថ្ងៃទី២២ មករាកន្លងមកនេះ លោកលួយ ជៀនជុន អភិបាលរងក្រុងឈីងតាវបានមានប្រសាសន៍ថាតាមរយៈការតភ្ជាប់ការដឹកជញ្ជូនរវាងកំពង់ផែទាំងពីរ នឹងជួយជំរុញសកម្មភាពសេដ្ឋកិច្ច ពាណិជ្ជកម្មរវាងប្រទេសទាំងពីរកាន់តែប្រសើរឡើងថែមទៀត។

លោកបន្តថាកំពង់ផែឈាងតាវ និងកំពង់ផែក្រុងព្រះសីហនុ និងសហការគ្នាក្នុងការដឹកជញ្ជូនកាន់តែប្រសើរឡើង ។ ក្នុងឆ្នាំ២០១៨ ទីក្រុងឈីងតាវ ទទួលបានភ្ញៀវទេសចរ១០០លាននាក់ ហើយ សង្ឃឹមថាទីក្រុងឈីងតាវ និងទីក្រុងព្រះសីហនុ នឹងបន្តកិច្ចសហការលើវិស័យទេសចរ​ណ៍កាន់តែល្អថែមទៀត។

លោកក៏បានសំណូមពរដល់អភិបាលខេត្តព្រះសីហនុ ដឹកនាំគណៈប្រតិភូទៅចូលរួមរដូវកាលស្រាបៀរនៅខេត្តឈឺងតាវ និងបានភ្លក់រសជាតិស្រាថ្មីៗ ដើម្បីបង្កើនទំនាក់ទំនង និងកិច្ចសហប្រតិបត្តិការរវាងខេត្តទាំងពីរកាន់តែជិតស្និត។

លោកយន្ត មីន អភិបាល នៃគណអភិបាលខេត្តព្រះសីហនុបានមានប្រសាសន៍ឲ្យ​ដឹងថា ខេត្តព្រះសីហនុមានសកក្កដានុពលសេដ្ឋកិច្ច ដោយមានកំពង់ផែអន្តរជាតិក្រុងព្រះសីហនុ មានវិសាលភាពធំទូលាយសម្រាប់តភ្ជាប់ការដឹកជញ្ជូនតាមផ្លូវសមុទ្រជាលក្ខណៈជាតិ អន្តរជាតិបម្រើទំនិញជាកុងតឺន័រចេញ-ចូលប្រមាណជិត៧៣ភាគរយ នៃបរិមា​ណទំនិញនាំចេញ នាំចូលទូទាំងប្រទេស។

ក្នុងនាមអាជ្ញាធរដែនដី លោកអភិបាលខេត្តរូបនេះ បានគាំទ្រអ្នកវិនិយោគចិន ដែលអនុវត្តតាមគោល នយោបាយផ្លូវ១ខ្សែក្រវ៉ាត់១របស់ប្រធានាធិបតីចិន ធ្វើឱ្យខេត្តព្រះ សីហនុ មានការអភិវឌ្ឍលឿនយ៉ាងគំហុក ព្រមទាំងសំណូមពរដល់គណប្រតិភូ ជួយផ្សព្វផ្សាយពីសក្តានុពលរបស់ខេត្ត និងជួយជម្រុញអ្នកវិនិយោគចិនមកកាន់ខេត្តព្រះសី​ហ​នុបន្ថែមទៀត៕

ដោយវុត្ថា
ប៉េកាំង៖ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា បានបង្ហាញមហិច្ឆតាជម្រុញទំហំពាណិជ្ជកម្មកម្ពុជា-ចិនឲ្យកើនដល់១០ពាន់លានដុល្លាអាមេរិកត្រឹមឆ្នាំ២០២៣ខាងមុខនេះ។

សម្តេចតេជោនាយករដ្ឋមន្រ្តី បានថ្លែងនៅក្នុងពិធីបើកវេទិកាជំរុញពាណិជ្ជកម្មកម្ពុជា ចិន នៅទីក្រុងប៉េកាំងប្រទេសចិននៅថ្ងៃទី ២២ ខែមករា ឆ្នាំ២០១៩កន្លងមកថា កាលពីឆ្នាំ២០១៧កន្លងទៅ ទំហំពាណិជ្ជកម្មនៃប្រទេសទាំងពីរសម្រេចបាន ប្រមាណ៦ពាន់ លានដុល្លា ហើយផ្តើមចេញពីលទ្ធផលផ្លែផ្កា ដែលបានអនុវត្តក្នុងឆ្នាំ២០១៧ ប្រទេសទាំងពីរបានដាក់ចេញនូវគោលដៅថ្មីទៀត ដើម្បីជំរុញទំហំពាណិជ្ជកម្មទ្វេភាគីឲ្យឈានដល់១០ពាន់លានដុល្លាអាមេរិក នៅឆ្នាំ២០២៣។

បន្ថែមពីនេះ កម្ពុជាបានបន្តធ្វើកិច្ចសហប្រតិបត្តិការ ជាមួយប្រទេសចិនលើវិស័យ​នានា ទាក់ទងនិងវិស័យពាណិជ្ជកម្ម ដូចជា បង្កើតមជ្ឈមណ្ឌលពាណិជ្ជកម្មកម្ពុជា នៅក្នុងទីក្រុងមួយចំនួននៃប្រទេសចិន ការចុះហត្ថលេខាលើលិខិតប្តូរសារ ដែលបានផ្តល់ឲ្យកម្ពុជានូវប្រព្រឹត្តកម្មមិនជាប់ពន្ធគយ គ្រប់ដណ្តប់លើ៩៧%នៃបន្ទាត់ពន្ធគយសរុប និងការចុះហត្ថលេខាលើអនុស្សារណៈ នៃការយោគយល់គ្នាមួយចំនួន ក្នុងវិស័យពាណិជ្ជកម្ម។

សម្តេចបន្តថា បន្ទាប់ពីកម្ពុជាសម្រេចបាននូវសុខសន្តិភាពយ៉ាងពេញលេញ ព្រមទាំងការឯកភាពជាតិ និងឯកភាពទឹកដីទាំងស្រុងនៅចុងឆ្នាំ១៩៩៨ តាមរយៈការដាក់ចេញ និងអនុវត្តន៍នូវនយោបាយឈ្នះ ឈ្នះ រយៈពេលជាង២ទស្សវត្សរ៍កន្លងមកនេះ កម្ពុជាត្រូវបានគេទទួលស្គាល់ថាមានការផ្លាស់ប្តូរយ៉ាងប្រសើរ ទាំងទិដ្ឋភាពនយោបាយ សន្តិ​សុខ សេដ្ឋកិច្ចនិងសង្គម ជាមួយនិងអាត្រានៃកំណើនសេដ្ឋកិច្ច ប្រចាំឆ្នាំជាមធ្យម៧%។

កំណើនសេដ្ឋកិច្ចខ្ពស់នេះ បានធ្វើឲ្យកម្ពុជាសម្រេចបានឋានៈជាប្រទេស មានចំណូលមធ្យ​មកម្រិតទាបនៅឆ្នាំ២០១៥ និងស្ថិតនៅលើគន្លងនៃការឈានទៅសម្រេចបាននូវឋានៈនៃប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០ និងជាប្រទេសមានចំណូ​លខ្ពស់នៅឆ្នាំ២០៥០។

រាជរដ្ឋាភិបាលកម្ពុជាបានដាក់ចេញ និងកំពុងអនុវត្តន៍ គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ដែលជាយុទ្ធសាស្រ្តកំណើនសេដ្ឋកិច្ច ថ្មី សំដៅធ្វើពិពិធកម្មសេដ្ឋកិច្ច និងកែប្រែរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញត្រឹមឆ្នាំ២០២៥ ដែលគោលនយោបាយនេះមានភាពស៊ីសង្វាក់គ្នា ជាមួយនិងគំនិតផ្តួចផ្តើមខ្សែក្រវ៉ាត់មួយ ផ្លូវមួយ។

សម្តេចតេជោហ៊ុន សែនបានសង្កត់ធ្ងន់ថា សម្តេចបានសម្រេចធ្វើកំណែទំរង់ស៊ីជម្រៅលើប្រព័ន្ធសេដ្ឋកិច្ចផ្ទៃក្នុង តាមរយៈការដាក់ចេញ និងអនុវត្តន៍នូវវិធានការថ្មីមួយ គឺការរក្សាទុកតែភ្នាក់ងារគយប៉ុណ្ណោះ ក្នុងការត្រួតពិនិត្យទំនិញ នៅតាមច្រកទ្វារអន្តរជាតិ ច្រកទ្វារ ព្រំដែនអន្តរជាតិ ច្រកទ្វារព្រំដែនទ្វេភាគី ច្រកទ្វារតំបន់ព្រំដែន និងច្រកទ្វារកំពុងផែសមុទ្រ តំបន់សេដ្ឋកិច្ចពិសេស ទីកន្លែងសន្និធិគយបណ្តោះអាសន្ន និងទីកន្លែងត្រួតពិនិត្យទំនិញនាំចេញ នាំចូលផ្សេងទៀត។

សម្តេចបន្តថា “ការសម្រេចបែបនេះ គឺជាការអនុវត្តនូវអភិក្រមវះកាត់ ដែលជាការកែទំរង់ដ៏ធំសំម្បើមមួយរបស់កម្ពុជា ដើម្បីកាត់បន្ថយភាពស្មុគស្មាញ និងថ្លៃដើម ក្នុងការធ្វើពាណិជ្ជកម្ម សំដៅធ្វើឲ្យកាន់តែល្អប្រសើរ នូវបរិយាកាសអំណោយផលសម្រាប់ធុរកិច្ច និងការវិនិយោគ និងការលើកកម្ពស់សមត្ថភាពប្រកួតប្រជែងរបស់កម្ពុជា”៕

ដោយគង់ សូរិយា

ភ្នំពេញ៖ តាមរយៈទំនាក់ទំនងដ៏ល្អរវាងរដ្ឋាភិបាលនៃប្រទេសទាំងពីរ បានធ្វើឲ្យទំហំទុនវិនិយោគរបស់ចិន នៅកម្ពុជាកើនដល់៦៨០០លានដុល្លារអាមេរិក កាលពីដំណា​ច់ឆ្នាំ២០១៨ថ្មីៗនេះ។

សម្តេចតេជោហ៊ុន សែននាយករដ្ឋមន្រ្តីកម្ពុជាបានថ្លែងក្នុងដំណើរទស្សនកិច្ចនៅប្រទេសចិន និងជួបជាមួយថ្នាក់ដឹកនាំធុរកិច្ចនៃប្រទេសចិន កាលពីថ្ងៃទី២២ មករាកន្លងមកថា ទំហំវិនិយោគបានស្ទុះឡើងរហូតដល់ប្រមាណ៦,៨ពាន់លានដុល្លា កើនប្រមាណ៧% ធៀបនិងឆ្នាំ២០១៧ ក្នុងនោះប្រទេសចិនបន្តស្ថិតនៅជាប្រទេសនាំមុខ ដែលបានបណ្តាក់ទុនវិនិយោគធំជាងគេបង្អស់នៅកម្ពុជាក្នុងឆ្នាំ២០១៨។

ជាមួយគ្នានេះ សម្តេចតេជោនាយករដ្ឋមន្រ្តីបានលើកឡើងពីចក្ខុវិស័យរបស់កម្ពុជាជាច្រើន ពិសេសគោលនយោបាយលើកទឹកចិត្តអ្នកវិនិយោគចិន និងអ្នកវិនិយោគដទៃទៀតឲ្យមកវិនិយោគនៅកម្ពុជា ដោយសម្តេចបានមានប្រសាសន៍ថា រាជរដ្ឋាភិបាលបានដាក់ចេញ ក្នុងនោះទី១ ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច ទី២ ការបើកចំហរសេដ្ឋកិច្ចសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ ទី៣កម្លាំងពលកម្មដែលមានភាពសំបូរបែបនិងវ័យក្មេង ដែលក្នុងនោះប្រជាជនដែលមានអាយុ៣៥ឆ្នាំចុះ មានចំនួនដល់ទៅ៧២% នៃចំនួនប្រជាជនសរុបគួបផ្សំនឹងប្រាក់ឈ្នូលដែលមានភាពប្រកួតប្រេជែង។

ទី៤ កម្ពុជាស្ថិតនៅលើទីតាំងយុទ្ធសាស្រ្តក្នុងតំបន់អាស៊ាន ដែលតំបន់នេះបាន និងកំពុងក្លាយជារោងចក្រនៃអាស៊ី។ ទំនិញផលិតនៅកម្ពុជាអាចផ្គត់ផ្គង់ទីផ្សារក្នុងស្រុក ទីផ្សារអនុតំបន់មេគង្គ ទីផ្សារអាស៊ាន និងទីផ្សារដទៃទៀត ក្នុងពិភពលោក និងទី៥ កម្ពុជា ចិន មានកិច្ចព្រមព្រៀងជាមួយគ្នាជាច្រើន ដែលជួយជំរុញនិងផ្តល់អត្ថប្រយោជន៍យ៉ាងសំបូរបែប ជូនដល់ធុរជន និងអ្នកវិនិយោគិនចិនទាំងការលើកទឹកចិត្ត និងការធានាការវិនិ​យោគ៕

ដោយ​វុត្ថា

ប៉េកាំង៖ ធនាគារ​ចិន បាន​ប្តេជ្ញា​បន្ត​វិនិយោគ​បន្ថែមទៀត និង​ផ្តល់ទុន​ដល់​ក្រុមហ៊ុន​វិនិយោគ​នានា​នៅក្នុង​ប្រទេស​កម្ពុជា ស្របតាម​គំនិត​ផ្តួចផ្តើម​នយោបាយ​ខ្សែក្រវាត់​មួយ ផ្លូវ​មួយ​របស់​រដ្ឋាភិបាល​ចិន និង​យុទ្ធសាស្ត្រ​ចតុកោណ​របស់​រាជរដ្ឋាភិបាល​កម្ពុជា មានការ​ស៊ីសង្វាក់ និង​ប្រទាក់ក្រឡា​គ្នា។

លោក Chen Siqing នៅក្នុង​ជំនួប​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជា​ណា​កម្ពុជា​នៅ​ថ្ងៃទី ២២ ខែមករា ឆ្នាំ ២០១៩ នេះ​បាន​វាយតម្លៃ​កម្ពស់​ចំពោះ​ចក្ខុវិស័យ​ដឹកនាំ​របស់​សម្តេច ពោល​សម្តេច​ដែលមាន​ចក្ខុវិស័យ​ដឹកនាំ​ច្បាស់លាស់​ក្នុងការ​ធ្វើ​ឲ្យ​ប្រទេស​កម្ពុជា​មានការ​អភិវឌ្ឍ​ន៍​ក្លាយជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ២០៣០ និង​ប្រទេស​មាន​ចំណូល​ខ្ពស់​នៅ​ឆ្នាំ២០៥០ ។ លោក​បន្តថា ធនាគារ​របស់លោក នឹង​បន្ត​វិនិយោគ​នៅក្នុង​ប្រទេស​កម្ពុជា ជាពិសេស គឺ​ផ្តល់ទុន​ដល់​ក្រុមហ៊ុន​វិនិយោគ​នានា។

សម្តេច​តេ​ជោ​នាយករដ្ឋមន្ត្រី ក៏បាន​មានប្រសាសន៍​ផងដែរ អំពី​តម្រូវការ​នៃ​ទុន​ជាច្រើន ហើយ​សព្វថ្ងៃនេះ​ធនាគារ​ចិន មាន​ទុន​ច្រើន ហើយ​មាន​សាខា​ច្រើន​នៅលើ​ពិភពលោក ដូច្នេះ​ធនាគារ​ចិន​អាចជួយ​សម្រេច​នូវ​តម្រូវការ​មួយ​នេះ។ ឆ្នាំនេះ​ប្រទេស​ចិន​នឹង​រៀបចំ​កិច្ចប្រជុំ​កំពូល​នៃ​ខ្សែក្រវាត់​មួយ ផ្លូវ​មួយ នា​ខែមេសា ខាងមុខនេះ ធនាគារ​ចិន នឹងមាន​ការចុះ​កិច្ចព្រមព្រៀង​មួយចំនួន ដើម្បី​ផ្តល់​ឥណទាន​ដល់​ក្រុមហ៊ុន​នានា ដែល​ស្ថិតនៅក្នុង​គម្រោង​នយោបាយ​ខ្សែក្រវាត់ និង​ផ្លូវ។

លោក​ប្រធាន​ធនាគារ ក៏បាន​ថ្លែងអំណរគុណ​សម្តេច​តេ​ជោ ដែល​បានអនុញ្ញាត​ឲ្យ​រូបលោក​បាន​ជួប​កាលពី​ឆ្នាំ២០១៥កន្លងទៅ ដោយ​សម្តេច​បានផ្តល់​អ​នុ​សាសន៍​ជាច្រើន​សម្រាប់​ការវិនិយោគ​នៅ​កម្ពុជា ហើយ​ធនាគារ​របស់លោក ក៏បាន​ចូលរួម​បណ្តុះបណ្តាល​ជាច្រើន​ដល់​មន្ត្រី​របស់​កម្ពុជា​ផងដែរ។

សម្តេច​តេ​ជោ ហ៊ុន សែន ក៏បាន​អញ្ជើញ​ប្រធាន​ធនាគារ​ចិន ទៅ​ទស្សនកិច្ច​នៅ​កម្ពុជា ដើម្បី​ពិនិត្យ​គម្រោង​វិនិយោគ​នានា ដែល​គាំទ្រ​ដោយ​ធនាគារ​ចិន។ សម្តេច​តេ​ជោ​នាយករដ្ឋមន្ត្រី ក៏បាន​មានប្រសាសន៍​ដែរ​ថា សម្តេច​ចង់ឃើញ​ឲ្យ​មាន​ការចុះ​កិច្ចព្រមព្រៀង​នៃ​គម្រោង​ទាំងឡាយ​ដែល​ស្ថិតនៅក្រោម​គម្រោង​នយោបាយ​ខ្សែក្រវាត់ និង​ផ្លូវ​ជាពិសេស​សម្តេច​បាន​ចាត់តាំង​ឲ្យ​ក្រសួង​សេដ្ឋកិច្ច និង​ហិរញ្ញវត្ថុ ដែលជា​ស្ថាប័ន​របស់​រដ្ឋ​ធ្វើការ​ជាមួយ​ធនាគារ​ចិន។

សម្តេច​តេ​ជោ បាន​ចាប់អារម្មណ៍​ចំពោះ​ការប្រកាស​របស់​ឯកឧត្តម​ប្រធានាធិបតី ស៊ី ជីន​ពីង ក្នុងការ​បង្កើត​វិថី​សូត្រ​សតវត្សរ៍​ទី២១នេះ​ឡើង ដែលជា​ចំណុច​ដ៏​សំខាន់​សម្រាប់​ការអភិវឌ្ឍ​ប្រទេស​ជា​សមាជិក។

សម្រាប់​កម្ពុជា​សម្តេច​តេ​ជោ ហ៊ុន សែន បាន​មានប្រសាសន៍ថា អាទិភាព​របស់​កម្ពុជា​ទាំងអស់​ទាំង​រដ្ឋ និង​ឯកជន គឺ​ផ្តោត​សំខាន់​ទៅលើ​វិស័យធំៗចំនួន៤ គឺ​ការអភិវឌ្ឍ​ធនធានមនុស្ស ទឹក ផ្លូវ និង​ភ្លើង ដែលជា​វិស័យសំខាន់ៗសម្រាប់​រាជរដ្ឋាភិបាល។ សម្រាប់​ការអភិវឌ្ឍ​ធនធានមនុស្ស​នេះ សម្តេច​តេ​ជោ ចង់​ឲ្យ​ចិន​ផ្តល់នូវ​ជំនួយឥតសំណង ដើម្បី​ចូលរួម​បណ្តុះបណ្តាល​ធនធានមនុស្ស សម្រាប់​ហេដ្ឋារចនាសម្ព័ន្ធ មាន​ផ្លូវ ស្ពាន ព្រលានយន្តហោះ និង​កំពង់ផែ​ជាដើម​ដែល​ត្រូវការ​ទុន​ជាច្រើន​ពី​មិត្ត​ចិន។

សម្តេច​តេ​ជោ ស្នើ​ឲ្យ​ធនាគារ​ចិន​ផ្តល់ទុន​សម្រាប់​ក្រុមហ៊ុន​ទាំងឡាយ ដែល​វិនិយោគ​ទៅលើ​ការបណ្តុះបណ្តាល ប្រព័ន្ធ​ហេដ្ឋារចនាសម្ព័ន្ធ ក៏ដូចជា​លើ​វិស័យ​កសិកម្ម​ជាដើម ដើម្បី​ជំរុញ​ការកែច្នៃ​កសិផល​របស់​កម្ពុជា។

សម្តេច​តេ​ជោ ក៏បាន​គូស​បញ្ជាក់ដែរថា ថាមពល​អគ្គិសនី ក៏​ជា​រឿង​សំខាន់​ផងដែរ​សម្រាប់​កម្ពុជា។ ក្នុងន័យនេះ​សម្តេច​តេ​ជោ ហ៊ុន សែន ស្នើ​ធនាគារ​ចិន​បន្ត​គាំទ្រ​ដល់​ការកសាង​ខ្សែបណ្តាញ​ចែកចាយ​អគ្គិសនី បន្តទៀត។

សម្តេច​តេ​ជោ​នាយករដ្ឋមន្ត្រី ក៏បាន​បញ្ជាក់​ផងដែរ​ថា កម្ចី​របស់​កម្ពុជា​នាពេល​កន្លងទៅ គឺមាន​គោលដៅ​សំខាន់បំផុត​ក្នុងការ​អភិវឌ្ឍន៍​សេដ្ឋកិច្ច ដូច្នេះ​សម្តេច​ស្នើ​ធនាគារ​ចិន​ផ្តល់​ការប្រាក់​ឲ្យ​បាន​ទាប​ទៅលើ​កម្ចី​នោះ។

សម្តេច​តេ​ជោ​នាយករដ្ឋមន្ត្រី បានបង្ហាញ​គាំទ្រ​ឲ្យ​មានការ​ចុះហត្ថលេខា​រវាង​ធនាគារ​ចិន ជាមួយ​ស្ថាប័ន​របស់​កម្ពុជា​នូវ​រាល់​គម្រោង​ទាំងឡាយ ដែល​ស្ថិតក្រោម​នយោបាយ​ខ្សែក្រវាត់ និង​ផ្លូវ ក៏ដូចជា​ស្ថិតនៅក្នុង​គោលនយោបាយ​យុទ្ធសាស្ត្រ​ចតុកោណ​របស់​រាជរដ្ឋាភិបាល​កម្ពុជា។

បើ​គម្រោង​វិនិយោគ​ស្ថិតនៅក្រោម​នយោបាយ​ខ្សែក្រវាត់ និង​ផ្លូវ​ទទួលបាន​ជោគជ័យ នោះ​គំនិត​ផ្តួចផ្តើម​ខ្សែក្រវាត់ និង​ផ្លូវ របស់​ឯកឧត្តម​ប្រធានាធិបតី​ចិន ក៏​ជោគជ័យ​ផងដែរ៕