ដោយ វុត្ថា

ភ្នំពេញ៖ សារព័ត៌មាន​ល្បីឈ្មោះ​មួយ​ឈ្មោះ Asian Correspondent បាន​ចុះផ្សាយ​ក្នុង​អត្ថបទ​របស់ខ្លួន​កាលពីពេលថ្មីៗនេះ​ថា ទីផ្សារ​អ​ល​ចនទ្រ​ព្យរ​បស់​ប្រទេស​កម្ពុជា​នាពេល​បច្ចុប្បន្ន ទាំង​ការទិញ-លក់​ស្ថិតក្នុង​ចំណាត់ថ្នាក់​ល្អ​បំផុត នៅក្នុង​ចំណោម​ប្រទេស​នៅក្នុង​តំបន់​អាស៊ាន ខណៈ​វិស័យ​មួយ​នេះ​បាន​ជួយ​ជំរុញ​អោយ​វិស័យសេដ្ឋកិច្ច​របស់​ប្រទេស​កម្ពុជា រក្សាបាន​កំណើន​ល្អជា​បន្តបន្ទាប់ ក្នុង​រយៈពេល​ប៉ុន្មាន​ឆ្នាំ​កន្លងមកនេះ។

វិស័យ​អចលនទ្រព្យ នៅក្នុង​បណ្តា​ប្រទេស​តំបន់​អាស៊ាន នាពេល​បច្ចុប្បន្ននេះ​កំពុងមាន​សន្ទុះ​រីកចម្រើន​យ៉ាងខ្លាំង និង​រីកចម្រើន​ប្រកប​កដោយ​ចីរភាព ដោយ​ក្នុងនោះ​ទីផ្សារ​ចលនទ្រព្យ​របស់​ប្រទេស​កម្ពុជា ស្ថិតក្នុង​ចំណោម​ប្រទេស​ទាំង១០នៅក្នុង​តំបន់​មួយ មាន​សុខ​ភាពល្អ​បំផុត​សម្រាប់​អ្នកវិនិយោគ​ជាតិ និង​អន្តរជាតិ​ទាំង​ការទិញ និង​លក់​ក្នុង​រយៈពេល​ប៉ុន្មាន​ឆ្នាំ​កន្លងមកនេះ។

សារព័ត៌មាន Asian Correspondent បាន​ចុះផ្សាយ​ថា ប្រទេស​កម្ពុ​ជាមាន​សេដ្ឋកិច្ច​លូតលាស់​យ៉ាង​លឿន បំផុត​នៅក្នុង​តំបន់​ដែលមាន​កំណើន៧ភាគរយ ជា​រៀងរាល់ឆ្នាំ។ ជាមួយគ្នា​នោះ​ទីផ្សារ​អ​ល​ចនទ្រ​ព្យ​នៅក្នុង​ប្រទេស​នេះ កំពុង​បន្ត​មាន​កំណើន​ល្អ​បំផុត។ សារព័ត៌មាន​នេះ ក៏បាន​ចុះផ្សាយ​ពី​ទីផ្សារ​អចលនទ្រព្យ​នៅក្នុង​ប្រទេស​ហ្វីលីពីន និង​ឥណ្ឌូនេស៊ី​ក៏​កំពុង​រីកចម្រើន​ផងដែរ បើ​ធៀប​ទៅនឹង​បណ្តា​ប្រទេស​នៅក្នុង​ប្រទេស​នៅក្នុង​តំបន់​អាស៊ី។

សារព័ត៌មាន​ដដែល​បាន​បន្តថា ការរីកចម្រើន​នេះ ដោយសារតែ​លំហូរ​ចូល​នៃ​អ្នក​វិនិយោគិន​ចិន​រកស៊ី​កាន់តែច្រើន ក្នុង​វិស័យ​អចលនទ្រព្យ​នៅ​ទូទាំងប្រទេស​កម្ពុជា ជាពិសេស​នៅក្នុង​រាជធានី​ភ្នំពេញ ដោយ​វិនិយោគ​ទៅលើ​លំនៅដ្ឋាន អគារ​ពាណិជ្ជកម្ម ផ្សារ​ទំនើប អគារ​ប្រើប្រាស់​ចម្រុះ និង​អគារ​សំណង់​ជាច្រើន​ផ្សេងទៀត។ សារព័ត៌មាន​នេះ​បញ្ជាក់ទៀតថា តំបន់​មាត់សមុទ្រ ដូចជា ខេត្ត​ព្រះសីហនុ​ទីផ្សារ​អចលនទ្រព្យ​ក៏​កំពុង មាន​សន្ទុះ​រីកចម្រើន យ៉ាងខ្លាំង​ដោយមាន​គម្រោង​មួយចំនួន ត្រូវបាន​សាងសង់​បញ្ចប់ និង​មួយចំនួនទៀត​កំពុង​បន្ត​សាងសង់។

លោក ច្រឹ​ក សុខ​នី​ម អគ្គ​នាយ​ក្រុមហ៊ុន Century 21 Mekong ដែល​ទើប​ជាប់ឆ្នោត​ជា​ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា​ក៏បាន​ទទួលស្គាល់​ដែរ​ថា វិស័យ​អចលនទ្រព្យ​នៅក្នុង​ប្រទេស​កម្ពុជា មាន​សន្ទុះ​រីកចម្រើន​ខ្លាំង​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ បើ​ធៀប​នឹង​បណ្តា​ប្រទេស​នៅក្នុង​តំបន់​អាស៊ាន​នេះ ហើយ​និង​បន្ត​រី​ចម្រើន​នៅ​ឆ្នាំ​បន្តបន្ទាប់​ទៀត នៅ​ទូទាំងប្រទេស ជាពិសេស​នៅក្នុង​ក្រម​ខណ្ឌ​នៅក្នុង​រាជធានី​ភ្នំពេញ។

យោង​របាយ​ការ​របស់​ក្រសួង​រៀបចំ​ដែនដី នគរូបនីយកម្ម និង​សំណង់​អោយដឹងថា ទុនវិនិយោគ​ក្នុង​វិស័យ​សំណង់ និង​អចលនទ្រព្យ​នៅក្នុង​រយៈពេល១០ខែ​ឆ្នាំ២០១៨នេះ សម្រេចបាន​ទឹកប្រាក់​ជិត៥០០០លាន​ដុល្លារ​អាមេរិក ខណៈដែល​កាលពី​ឆ្នាំមុន​ទុនវិនិយោគ​ក្នុង​វិស័យនេះ មាន​ទឹកប្រាក់​រហូតដល់៦៤០០លាន​ដុល្លារ​អាមេរិក៕

ដោយ ស៊ីវ ម៉េង

ភ្នំពេញ៖ មន្រ្តីជាន់ខ្ពស់ក្រសួងសាធារណៈការ និងដឹងជញ្ជូនបានមានប្រសាសន៍ឲ្យដឹងថា ផ្លូវល្បឿនលឿនភ្នំពេញ បាវិតដែលគ្រោងចំណាយថវិការហូតដល់៣៨០០លានដុល្លារបានបញ្ចប់ការសិក្សាហើយ ប៉ុន្តែការសាងសង់នៅពេលណាមិន​ទាន់កំណត់ពេលវេលាជាក់លាក់នៅឡើយទេ។

លោកទេសរដ្ឋមន្រ្តីស៊ុ​ន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបា​នបង្ហើបឲ្យដឹងពីព៌តមាននេះ ក្នុងពិធីមួយកាលពីថ្ងៃទី១៩ ធ្នូកន្លងមកនេះ។

អ្នកនាំពាក្យក្រសួងដដែលនេះ គឺលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២០ ធ្នូនេះថា នេះ​ជាគំរោងសិក្សាដោយ ទីភ្នាក់ងារសហប្រតិបត្តិការអន្តរជាតិដោយប្រទេសជប៉ុន (JICA)​ ដែលគំរោងនេះជាគំរោង១មានតម្លៃថ្លៃខ្ពស់ ហើយយើងបានស្នើឲ្យ JICA ជួយសិក្សាជាថ្មី ដើម្បីបន្ថយតម្លៃលើការសាងសង់ផ្លូវនេះ។លោកបន្តថា មានក្រុមហ៊ុនជាច្រើន ហើយ​ក្រសួងបានអញ្ជើញប្រទេសជាច្រើនសិក្សាពីផ្លូវនេះ ដើម្បីមានជម្រើសផ្សេងៗគ្នាមុនសម្រេចចិត្តសាងសង់។

លោកបន្តថា “មូលហេតុដែលផ្លូវនេះថ្លៃ ដោយសារផ្លូវនេះត្រូវសាងសង់ស្ពានមាន​ប្រវែងរហូតដល់១០គីឡូម៉ែត្រ ឆ្លងកាត់ផ្ទៃបឹងនៅស្រុកល្វាឯម ព្រោះផ្លូវនេះគ្រោងសាង​សង់ចេញពីស្រុកល្វាឯម ឆ្លងកាត់ខេត្តកណ្តាល ឆ្ពោះទៅកាន់ខេត្តព្រៃវែង និងទៅកាន់ក្រុងបាវិតខេត្តស្វាយរៀង”។

លោកបន្តថា “បើតាមការសិក្សារបស់ JICA ផ្លូវនេះ ត្រូវជួបប្រសប់ជាមួយផ្លូវជាតិលេខ១ នៅស្រុកកំពង់ត្របែកខេត្តព្រៃវែង មុនឆ្ពោះទៅកាន់ខេត្តស្វាយរៀង”។

លោកវ៉ា ស៊ីមសូរិយាបានមានប្រសាសន៍ឲ្យដឹងទៀតថា គំរោងសាងសង់ផ្លូវល្បឿ​នលឿននេះមានប្រវែង១៦០គីឡូម៉ែត្រ ដែលខ្លីជាងផ្លូវជាតិលេខ១បច្ចុប្បន្នដែលមាន​ប្រវែងត្រឹម១៦៧គីឡូម៉ែត្រប៉ុណ្ណោះ គិតពីរាជធានីភ្នំពេញ ដល់ក្រុងបាវិតព្រំប្រទល់​ប្រទេ​សវៀតណាម៕

ដោយគង់ សូរិយា

​ភ្នំពេញ: ជាដំណឹងរីករាយមួយ សម្រាប់ប្រជាពលរដ្ឋរស់នៅក្រុងពោធិសាត់ ដោយផ្សារទំនើបដំបូងគេ នៅក្រុងនៃខេត្តភូមិភាគពាយ័ព្យនេះ នឹងបើកដំណើរការនៅពាក់ក ណ្តាល​ឆ្នាំ២០១៩ខាងមុខនេះហើយ។

​លោកឧកញ៉ាភួ ពុយអ្នកវិនិយោគបុរីដំបូងគេនៅក្រុងពោធិសាត់ និងជាប្រធានសភាពាណិជ្ជកម្មខេត្តពោធិសាត់ បានមានប្រសាសន៍ឲ្យដឹងតាមទូរស័ព្ទនាថ្ងៃទី១៩ ធ្នូកន្ល​ងមកថា បច្ចុប្បន្នផ្សារនេះសាងសង់ជិតរួចរាល់ហើយ និងកំពុងចាប់ផ្តើមរៀបចំរចនាផ្សារនេះឲ្យមានភាពទាក់ទាញ។ លោកបន្តថា ផ្សារនេះនឹងមានរោងភាពយន្តទំនើប មានលក់​សម្ភារៈប្រើប្រាស់ និងសម្លៀកបំពាក់ជាដើម។

​លោកបន្តថា “យើងរំពឹងថាផ្សារនេះ នឹងអាចបើកដំណើរការនៅពាក់កណ្តាលឆ្នាំ២២០១៩ខាងមុខ ខណៈការសាងសង់ជិតបញ្ចប់ តែការជួលស្តង់ក្នុងផ្សារនេះមិនទាន់បើកឲ្យអតិថិជនជួលនៅឡើយទេ”។លោកបន្តថា “បុរីក្នុងទីក្រុងនេះសាងសង់និងលក់បា​ន​ទទួលជោគជ័យ ដោយសារមានការគាំទ្រពីប្រជាពលរដ្ឋ ដោយរហូតមកទល់ពេលនេះយើងសាងសង់បានប្រមាណ៣០០ល្វែងហើយ”។

​លោកឧកញ៉ាភួ ពុយបានបន្តថា ជាមួយគ្នានេះលោកក៏បាននិងកំពុងរៀបចំគិតគូរទីកន្លែងលក់បន្លែ ផ្លែឈើ ត្រីសាច់ ជូនដល់ប្រជាពលរដ្ឋក្នុងមូលដ្ឋានបានលក់ដោយឥតគិតថ្លៃក្នុងរយៈពេលណាមួយផងដែរ។

​លោកបានសម្តែងសុទិដ្ឋិនិយមថា ប្រជាពលរដ្ឋនៅក្រុងពោធិសាត់ ក៏ដូចជារស់នៅ​តាមបណ្តាស្រុកនានាក្នុងខេត្តនេះ ភាគច្រើនពួកគាត់មានជីវភាពធូរធារ ធៀបនឹងខេត្តដទៃទៀត ដែលនេះជាមូលហេតុធ្វើឲ្យលោកសម្រេចចិត្តវិនិយោគនៅក្នុងទីក្រុងនេះ។ ជា​មួយនេះ ក្រុងពោធិសាត់មានតែផ្សារមួយប៉ុណ្ណោះ ដែលធ្វើឲ្យប្រជាពលរដ្ឋពិបាករកកន្លែ​ង​លក់ដូរ ហេតុនេះផ្សារនេះនឹងជួយរំលែកនូវភាពណាន់ណាប់តាន់តាប់ ដែលផ្សាររបស់ក្រុងពោធិសាត់កំពុងជួបប្រទះនាពេលបច្ចុប្បន្ននេះ។

​អភិបាលខេត្តពោធិសាត់លោកម៉ៅ ធរនិន្ទធ្លាប់បានមានប្រសាសន៍ស្វាគមន៍គំរោងវិនិយោគនេះ ដោយលោកបានលោកឡើងពីសក្តានុពលរបស់ខេត្ត ពិសេសប្រឡាយទឹកដែលជាអំណោយរបស់សម្តេចតេជោ បានជួយធ្វើឲ្យជីវភាពរបស់ប្រជាពលរដ្ឋក្នុងខេត្តមានភាពល្អប្រសើរ។

លោកបន្តថា “រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោបាននិងកំពុងគិតគូពីសុខទុក្ខ និងលើកកំពស់ជីវភាពរបស់ប្រជាពលរដ្ឋជាប់ជាប្រចាំ”៕

​ដោយគង់ សូរិយា
​ភ្នំពេញ: អាគារពាណិជ្ជកម្មធំជាងគេទី១នៅក្រុងភ្នំពេញ The Parkway Square បានឈានដល់ការបញ្ចប់នូវសករាជរបស់ខ្លួន ដោយក្រុមហ៊ុនក្នុងស្រុកដ៏ធំមួយបានទិញគំរោងនេះ ដើម្បីសាងសង់មជ្ឈមណ្ឌលពាណិជ្ជកម្មលំដាប់អន្តរជាតិថ្មីមួយ។

​យោងតាមប្រភពព៌តមានជាក់លាក់បានឲ្យដឹងថា ក្រុមហ៊ុនជីព ម៉ុងបានទិញយកគម្រោងនេះ ដើម្បីសាងសង់អាគារខ្ពស់មួយនៅទីក្រុងភ្នំពេញ។

​The Parkway Squreមានទីតាំងនៅតាមបណ្តោយមហាវិថីម៉ៅ សេទុង ស្ថិតក្នុង​ខ័ណ្ឌចំការមន ក្រុងភ្នំពេញ។

​អ្នកនាងGrace Rachny Fongនាយិកាក្រុមហ៊ុនCentury21 Cambodiaដែល​មានការិយាល័យនៅលើអាគារនេះ បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៩ ធ្នូកន្លងមកថា ក្រុមហ៊ុនជីព ម៉ុងបានកំណត់ឳសានវាទដើម្បីឲ្យក្រុមហ៊ុននានា ដែលបានជួលការិយាល័យនៅលើអាគារនេះ ចាកចេញឲ្យបានត្រឹមមុនថ្ងៃទី២៥ ធ្នូខាង​មុខនេះ។

អ្នកនាងបន្តថា តាមអ្វីដែលយើងដឹង ក្រុមហ៊ុននឹងសាងសង់អាគារថ្មីនៅលើគំរោងនេះ ប៉ុន្តែការវាយអាគារចាស់ចោលឬយ៉ាងណា ស្ថិតនៅក្នុងភាពមិនច្បាស់លាស់នៅឡើយទេ។
​អ្នកនាងបន្តថា “យើងកំពុងរួសរាន់ចាកចេញពីអាគារនេះ ដើម្បីទៅកាន់ការិយាល័​យថ្មី ស្ថិតក្នុងខ័ណ្ឌទួលគោក ក្រុងភ្នំពេញ”។

​ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាថ្មី និងជាអគ្គនាយកក្រុមហ៊ុនCentury21 Mekongលោកច្រឹក សុខនីមដែលមានការិយាល័យនៅលើអាគារនេះផងដែរបានឲ្យដឹងថា ក្រុមហ៊ុនរបស់លោកនឹងរើការិយាល័យចាកចេញពីអាគារនេះនៅសប្តាហ៍ក្រោយនេះ ព្រោះកុងត្រារបស់យើងបានផុតហើយ។

​ទាក់ទងនឹងតម្លៃដីនៅតំបន់នេះ លោកសុខនីមបានឲ្យដឹងថា ដីនៅតំបន់នេះមាន​តម្លៃចន្លោះពី៤០០០ ទៅ៤៥០០ដុល្លារអាមេរិកក្នុងមួយម៉ែត្រការ៉េ ហើយដីនៃអាគារនេះ​មានទំហំជាង២ហិកតា៕

ដោយ រតនៈ

ភ្នំពេញ៖ បុរី​ប៉េង ហួត​បានប្រកាស​បញ្ចុះតម្លៃ​ពិសេស​រហូតដល់៣ភាគរយ សម្រាប់​គម្រោង​ថ្មី ដឹ​ស្តា មុនី​រ៉ា​ហ៍ និង៥ គម្រោង​ផ្សេងទៀត​ព្រម​គ្នា ផុតកំណត់​ត្រឹម​ថ្ងៃទី២១ ខែធ្នូ ឆ្នាំ២០១៨ខាងមុខ​នេះហើយ។

យោងតាម​សេចក្តីប្រកាស​ព៌​ត​មាន​ពី​ក្រុមហ៊ុន​នេះ បាន​ឲ្យ​ដឹង​នា​រសៀល​ថ្ងៃទី១៩ ធ្នូ​នេះ​ថា ចាប់ពី​ថ្ងៃ​ដែលមាន​ការបញ្ចុះ​តម្លៃ​ពិសេស រហូតមកដល់​ពេលនេះ អតិថិជន​បាន​អញ្ជើញ​មក​សាកសួរ​ព័ត៌មាន និង​ជាវ​លំនៅដ្ឋាន​យ៉ាងច្រើន​កុះករ នេះ​សបញ្ជាក់​អោយឃើញថា​បុរី​ប៉េង ហួត ពិតជា​ទទួល​បានការ​ជឿជាក់​ពី​អតិថិជន ទៅលើ​គុណភាព​សំណង់ សោភ័ណភាព និង​ភាព​ច្នៃប្រឌិត​ឈានមុខ​គេ ក្នុង​ព្រះរាជាណាចក្រ​កម្ពុជា នាពេល​បច្ចុប្បន្ននេះ។ ហើយ​ជាពិសេស​ជាងនេះទៅទៀត គម្រោង​ថ្មី ដឹ​ស្តា មុនី​រ៉ា​ហ៍ ក៏​ទទួលបាន​ការគាំទ្រ​ពី​អតិថិជន​ថា​ជា​គម្រោង ដែល​សាក​សម​បំផុត​ក្នុង​ការរស់នៅ​ថែម​ទៀតផង។

ដឹ​ស្តា​មុនី​រ៉ា​ហ៍ ជា​គម្រោង​ដែលមាន​ទីតាំង​ស្ថិតនៅ តាម​បណ្តោយ​ផ្លូវជាតិ​លេខ ៦A ចំងាយ500ម៉ែត្រ ពី​សាលា​កសិកម្ម​ព្រែកលាប លាតសន្ធឹង​លើ​ផ្ទៃដី៨ហិច​តា នៅលើ​ទីតាំង​ភូមិសាស្ត្រ​ល្អ និង អាកាសធាតុ​អំណោយផល អម​ទៅដោយ​ទន្លេ​សងខាង ដែល​ធ្វើអោយ​ការរស់នៅ ប្រកបដោយ​បរិយាកាស​បរិសុទ្ធ​បែប​ធម្មជាតិ។

សេចក្តីប្រកាស​ព៌​ត​មាន​ដដែល​បាន​បន្តថា ចំពោះ​គម្រោង​ទាំង៦ខាងលើ សុទ្ធសឹងតែ​ជា​គម្រោង​អភិវឌ្ឍ​ដែល​ស្ថិត ក្នុង​តំបន់​ដែលមាន​សក្តានុពល​ដោយឡែក​ពីគ្នា ក្នុង​រាជធានី​ភ្នំពេញ ព្រមទាំង​មានការ​រៀបចំ​ហេដ្ឋារចនាសម្ព័ន្ធ​ផ្លូវថ្នល់​ធំ​ទូលាយ ប្រព័ន្ធ​ទឹក ប្រព័ន្ធ​អគ្គិសនី សួនច្បារ​បៃតង សួន​កំសាន្ដ ក្លឹប​ហាត់ប្រាណ អាង​ហែល​ទឹក ធានាបាន​នូវ​ការទទួលយក​បទ​ពិ​សោ​ធ៏​រស់នៅ​ល្អឥតខ្ចោះ លើសពី​រំពឹងទុក។

ចំណែកឯ​លំនៅដ្ឋាន​ក្នុង​គម្រោង​ទាំង៦ខាងលើ​វិញ ជា​លំនៅដ្ឋាន​ប្រណីត និង​រួមបញ្ចូល​នូវ​រចនាបថ​បរទេស និង​រចនាបថ​ខ្មែរ ដោយ​ឈរលើ​គុណភាព​រឹងមាំ​នៃ​សំណង់ រចនាបថ​ទាន់សម័យ​សោ​ភណ្ឌ​ភាព។

សម្រាប់​ព័ត៌មាន​បន្ថែម សូម​ទាក់ទង​ទូរ​សព្ទ​លេខ 015 90 6789 Email: [email protected] ឬ​ចូលទៅ​កាន់​គេហទំព័រ Facebook: www.facebook.com/boreypenghuothgroup ឬ​អាច​អញ្ជើញ​មក​សាកសួរ​ព័ត៌មាន ពី​គ្រប់​ការិយាល័យ​លក់ ដែលមាន​ទីតាំង​ក្បែរ​លោក អ្នក​រៀងរាល់​ម៉ោង​ធ្វើការ៕

ដោយ រ៉ាវី

ភ្នំពេញ៖ ចំការមន​ជា​ខ័​ណ្ឌ​ដែលមាន​ការអភិវឌ្ឍន៍​លឿន​ជាងគេ និង​មាន​គំរោង​អភិវឌ្ឍន៍​អា​ផាត​ម៉ិ​ន​ច្រើនជាងគេ​ផងដែរ ដូច្នេះ​តើ​ស្ថានភាព​អា​ផាត​ម៉ិ​ន​នៅក្នុង​ខ័​ណ្ឌ​នេះ​មាន​តម្រូវការ និង​គ្របដណ្តប់​ប៉ុន្មាន​ភាគរយ​នៃ​ទីផ្សារ​ទាំងមូល ជា​សំណួរ​មួយ​ដែល​យើង​សិក្សា​លើ​របាយការណ៍​ថ្មី​មួយ។

ផ្អែក​តាម​របាយការណ៍​ស្រាវជ្រាវ​ដែល​ធ្វើឡើង​ដោយ​ក្រុមហ៊ុន Vtrust Appraisal បានបង្ហាញ​កាលពី​ថ្ងៃទី១៨ ធ្នូ​កន្លងមក​បាន​ឲ្យ​ដឹងថា ទីផ្សារ​អា​ផាត​មិន​នៅក្នុង​ឆ្នាំ2018 នេះ​គឺមាន​ភាពល្អប្រសើរ​ខ្លាំង ពោលគឺ​មានការ​កើនឡើង​នូវ​តម្រូវការ​ខ្ពស់ រហូតដល់​ប្រមាណ​ជាង 7600យូ​នី​ត ក្នុងចំណោម​អា​ផាត​ម៉ិ​ន​ចំនួន៩០២៥យូ​នី​ត ស្មើនឹង៣៥៥គំរោង និង​មាន​អត្រា​ប្រើប្រាស់​ស្មើនឹង​ប្រមាណ84ភាគរយ គ្របដណ្ដប់​សរុប​លើ​ការប្រើប្រាស់​ទូទាំង​ព្រះរាជាណាចក្រ​កម្ពុជា ជាពិសេស​ខណ្ឌចំការមន​ជា​ខ័​ណ្ឌ ដែលមាន​អា​ផាត​ម៉ិ​ន​ច្រើនជាងគេ។

ក្នុងនោះ​ខ័​ណ្ឌ​ចំការមន មាន​ចំនួន​អា​ផាត​ម៉ិ​ន​ច្រើនជាងគេ ដែល​រហូតដល់២៣០គំរោង​ស្មើនឹង៥៨២០យូ​នី​ត និង​គ្របដណ្តប់៦៤ភាគរយ នៃ​ចំណែក​ផ្គត់ផ្គង់​ទីផ្សារ​ទាំងមូល។

លោក​ឧកញ៉ា នួន រឹទ្ធី អគ្គនាយក​ក្រុមហ៊ុន Khmer Foundation Appraisal បានទទួល​ស្គាល់ និង​យល់ស្រប​ទៅនឹង​របាយការណ៍​ខាងលើនេះ ដោយ​លោក​បាន​លើកឡើងថា តម្រូវការ​ទីផ្សារ​អា​ផាត​មិន​នាពេល​បច្ចុប្បន្ននេះ ពិតជា​កំពុងមាន​សន្ទុះ​ខ្លាំង​ពិតមែន។ លោក​បន្តទៀតថា ការកើនឡើង​នូវ​តម្រូវ​ខាងលើនេះ ដោយសារ​បណ្តាលមកពី​កត្តា​រួមផ្សំ​ជាច្រើន ដូចជា កត្តា​ស្ថិរភាព​នយោបាយ សន្តិសុខ​សង្គម កត្តា​សេដ្ឋកិច្ចជាតិ​មាន​ភាពល្អប្រសើរ​ជាដើម ជាពិសេស គឺ​លំហូរ​នៃ​អ្នកវិនិយោគ​បរទេស។

លោក​ថា បើតាម​ការសង្កេត​ជាក់ស្ដែង អា​ផាត​មិនដែល​កំពុងមាន​តម្រូវការ​ក្នុង​រាជធានី​ភ្នំពេញ គឺ​ភាគច្រើន​ច្រើន​ស្ថិតនៅក្នុង​ខណ្ឌ​ចំនួន4 ដូចជា​ខណ្ឌចំការមន, ខណ្ឌដូនពេញ, ខណ្ឌទួលគោក និង​ខណ្ឌ7មករា ។ ដោយឡែក​ចំពោះ​អា​ផាត​មិនដែល​ស្ថិតនៅក្នុង​ខណ្ឌចំការមន ជាពិសេស​ម្ដុំ​ទួល​ទំពូង​តែម្ដង ក៏ត្រូវ​បាន​គេ​កត់សម្គាល់ឃើញ​ផងដែរ​ថា ក្រៅពី​មាន​តម្រូវ​ការជួល​ស្នាក់នៅ​ច្រើន​នោះ ចំពោះ​តម្លៃ​វិញ​ក៏មាន​ខ្ពស់​គួរសម​ដែរ ដែល​អាចមាន​ចាប់ពី350-450ដុល្លារ​ក្នុង​មួយ​យូ​នី​ត (ជាង30កា​រ៉ែ​ឡើងទៅ) និង​មាន​បន្ទប់​គេង​ចំនួន1 ហើយ​អាច​ឈានដល់1500-2000ដុល្លារ ក៏មាន សម្រាប់​យូ​នី​ត​ដែលមាន​បន្ទប់​គេង​ចំនួន3 ឬ​អាច​លើសពីនេះ។

លោក​ឧកញ៉ា​នួន រិ​ទ្ឋី​បាន​បន្តថា បើ​គិត​ជា​មធ្យម​អា​ផាត​ម៉ិ​ន មានតម្លៃ​ចាប់ពី10-30ដុល្លារ​ក្នុង​មួយ​ម៉ែត្រការ៉េ អាស្រ័យទៅលើ​ទីតាំង បរិយាកាស សេវាកម្ម ក៏ដូចជា​ប្រភេទ​ឧបករណ៍ប្រើប្រាស់​ជាដើម។ ជាមួយគ្នានេះ លោក​ឧកញ៉ា ក៏បាន​បញ្ជាក់​ផងដែរ​ថា ចំពោះ​អតិថិជន​វិញ គឺមាន​ជនបរទេស​ច្រើនជាង​អតិថិជន​ក្នុងស្រុក ដែល​គ្រប់​ដណ្ដប់​រហូតដល់​ប្រមាណ​ជិត80ភាគរយ៕